Read Southern Kisi Īkīlīsi̍a̍a̍tīī 7 Bible Online

Īkīlīsi̍a̍a̍tīī 7 - Southern Kisi bible

Īkīlīsi̍a̍a̍tīī 7

¹“Dīōlā kɛ̄ndɛ̄ la̍ŋ nɔ̄ɔ̍ la̍ŋ la̍ hi̍o̍ū nāŋɔ̄ɔ̄ a̍ chūɛ̄īmā ba̍ā kāla᷄ŋ sūūnɔ᷄ŋndo̍. Le̍nde̍ ko̍ni̍, pāa̍le̍ wānā wu᷅ le̍ŋ le̍ŋ le̍ hi̍o̍ū nāŋɔ̄ɔ̄ a̍ pāa̍le̍ ŋ̄ vīālūŋ nde̍ŋ.

²“Kɔ̄la̍ŋ o̍ bɛ̍ɛ̄ cha᷄ŋndo̍ ndu̍ hi̍o̍ū nāŋɔ̄ɔ̄, a̍ kɔ̄la̍ŋ o̍ bɛ̍ɛ̄ du̍nyɛ̍i̍ bɛ̍ndūe̍i̍ ī chō wo̍. Kāni̍ fo̍ndōle̍ wānā o̍ wānā ā nɔ̄ mā sɔ̍la̍ pīɔ̍mndo̍, le̍la̍ŋ ō bɛ̄ndā mī wānā ku̍ɛ̄ o̍ fo̍ndāŋ wāā le̍nde̍ le̍ mā yi̍ya̍ŋ māā nūm bɛ̍ɛ̍ pīɔ̍mndo̍ chō nu̍m kūēē.

³“Kɔ̄l tāmbɛ̍i̍yo̍ ndu̍ hi̍o̍ū nāŋɔ̄ɔ̄ a̍ kɔ̄l kɛ̄ndɔ̄ɔ̍, ka̍ni̍ fo̍ndōle̍, kɔ̄l tāmbɛ̍i̍yo̍ ō kīndī wa̍nā kɔ᷅l.

⁴“Wāna̍ kɔ̄l kālo̍o̍ ndu̍ cha᷅ wa᷅ŋnda̍ cha᷄ŋndo̍ o̍ bīīsi̍o̍o̍ chōo̍ ni̍ mbō yīya̍ŋ a̍ pīɔ̍mndo̍, kɛ̍ dīɔ̄mndo̍ ndu̍ ndu̍ le̍ te̍le̍ŋ o̍ te̍le̍ŋ a̍ sɔ̄ɔ̍ŋ kɔ̄l kɛ̄ndɔ᷄ŋ o̍kɔ̄ɔ̄ ko̍ni̍ o̍ yi̍yāŋ ni̍.

⁵“Ō bɛ̄ndā mī wāna̍ kɔ̄l kālo̍o̍ ō kpāa̍ nu̍m o̍ īsɔ̄ɔ̍ ni̍ŋ, mbo̍ hīāū dīɔ̄mndo̍ nu̍m sāŋgālāa̍ o̍ chōndo̍ŋ ni᷄ŋ.

⁶“Dīɔ̄mndo̍ māmɔ̄ɔ̄ ndɔ̄ɔ̍ ō chō māchūāā mɛ̄ɛ̍ nyāānda̍ŋ ŋ̄ wā nu̍a̍ā ŋɔ̄ɔ̍ o̍ yīŋ yɛ̍, tāāsi̍ o̍ tāāsi̍ cho̍ le̍ni̍ŋ te̍.

⁷“Ka̍fāla̍ŋ wāŋnda̍ tōsāllo̍ mī lā sīīŋgu̍u̍ wāna̍ kɔ̄l kālo̍o̍ dīɔ̄mndo̍. Ndu̍yɛ̍ lūɛ̄īyɔ̄ɔ̄lā ni᷄ŋ nda̍ŋ bīyɔ̄ɔ̍ wāŋnda̍ o̍ lābā, la̍ŋ la̍ tɛ̍ɛ̍mbūū wa̍nā tɔ̍ɔ̍ ni̍.

⁸“Nyɔ̄ɔ̍ chīīyo̍ tōsāa̍ ndu̍ hi̍a̍ū na̍ŋɔ̄ɔ̄ a̍ kāndɔ̄ɔ̍ ndu̍ tōsāa̍. “Ndu̍yɛ̍ bīūwɔ᷄ŋndo̍ o̍ īsɔ̄ɔ̍ o̍ īsɔ̄ɔ̍ ni̍ŋ ndu̍ hi̍o̍ū nāŋɔ̄ɔ̄ a̍ yōŋgāa̍ tōsāa̍.

⁹“Ō bɛ̍ndā mī wānā dɔ̍u̍nu̍ŋ tu̍mbe̍ chɔ̍ chɔ̍ le̍, dīɔ̄mnda̍ nda̍ du̍a̍u̍nūŋ tu̍mbe̍ ni̍ ndu̍yɛ̍ mā kɛ̄si̍ŋ sɔ̍ɔ̍ŋ o̍ lākɔ̄l.

¹⁰“Ō ve᷅ su̍ɛ̍i̍ kɔ̄l kālu̍ mī wānā nyu̍na̍ bɛ̍ɛ̍ āā, ‘Vɛ᷅ mi̍ sīndɔ̄ɔ̍ ō nāŋ mbo̍ hīāū wa̍a̍li̍o̍ō le̍?’ Nyūnā īdīɔ̄mndo̍ ndu̍ wa᷅ ko̍ŋ ni̍.

¹¹“Kɔ̄l kālo̍o̍ nɔ̄ɔ̍ ō chō ko̍ māā nyɛ̄m kɛ᷅. Kɔ̄l kālo̍o̍ ndu̍ cho̍ tɔ̄nɔ̄ bɛ̍ndōo̍ o̍ chi̍e̍ēŋndo̍ ho̍ō chōo̍ le̍ wānā o̍ wānā ni̍.

¹²Mɛ̄ɛ̍ nyɛ̄ sɔ̄lāa̍ ō nɔ̄lā mbō mānda̍ wānā yɛ̍, le̍nde̍ ko̍ni̍ kɔ̄l kālo̍o̍ bɛ̍ɛ̍ o̍ nɔ̍lā mbō mānda̍ wānā ni̍. Kɛ̍ kɔ̄l kālo̍o̍ ndu̍ hi̍o̍ū, kāni̍ fo̍ndōle̍, kɔ̄l kālo̍o̍ nɔ̍lā mbō chīīndi̍a̍a̍ wāna̍ nɔ̍ ndu̍ wo̍.

¹³“Wānā o̍ wānā yi̍ya̍ŋ ndɔ̍ a̍ wa̍li̍ Mɛ̄lɛ̄ka̍ tōsā wō. Tē ō tūndū nyɛ̄ o̍ nyɛ̄ pɛ̍, ō nɛ̄ɛ̍nɛ̍ nɔ̍lā yɛ̍ nyɛ̄ kōŋ sīɛ̄ndī?

¹⁴Tē dɛ̍nɛ̍ kɛ̍ndɔ̄ɔ̍ ō kōma̍l nu̍m o̍ yo̍o̍mū nūmndo̍ ni᷄ŋ pɛ̍, dɔ̍u̍nu̍ŋ nya̍a̍le̍ ma̍ na̍ŋ kɔ̄l. Ndu̍yɛ̍ tē pālɛ̍i̍ wɔ̍ɔ̍nŋde̍ ī kōma̍l nu̍m vɛ̄lɛ̄ pɛ̍, cha̍l mā yi̍ya̍ŋ. Si̍na̍ pɛ̍ŋgu̍ māā dɛ̍nɛ̍ kɛ̍ndɛ̄ ni̍ nyɛ̄ kīndīlāā ni̍, kpo̍u̍ o̍ Mɛ̍lɛ̄ka̍ lo̍ la̍ cha᷅ŋ ni̍. Ko̍ŋ to̍sā ni̍ wānā o̍ wānā a̍ nɔ̍lā mā si̍na̍ nyɛ̍ cho̍ sīɔ̄dīi̍ yɔ̄nɔ᷄ŋndo̍ le̍.

¹⁵“O̍ yōōmū fo̍ndō ya̍ I̍ cho̍ ho̍ō ni᷄ŋ ndo̍, mi̍ cha᷅ nyɛ̄ o̍ nyɛ̄ a̍ hɔ̄ltē nīle̍ŋ. I̍ che᷅ wānāā tōnya̍a̍ a̍ tōnya̍ ndāa̍ kpo̍u̍ ma̍ sɔ̄lā pīɔ̍mnda̍ŋ, ndu̍yɛ̍ mi̍ cha᷅ vɛ̄lɛ̄ wānāā dɛ̍nɛ̍ wɔ̍ɔ̍ŋnda̍ a̍ dɛ̍nɛ̍ ndā wɔ̍ɔ̍ŋndo̍ kpo̍u̍ ma̍ vīāū yōōmū.

¹⁶Le̍la̍ŋ ō bɛ̄nda̍ mī wānā hi̍u̍ wa̍ wānā kɛ̍ndɛ̄ le̍, ndu̍yɛ̍ ō bɛ̄nda̍ mī wānā hi̍u̍ vɛ̄lɛ̄ wā wāna̍ kɔ̄l kālu̍ bɛ̍ndū le̍, yɔ̄ŋi̍ ŋ̄ tɛ̄ɛ̄mbu̍u̍ nu᷅m pi̍la̍.

¹⁷Ō bɛ̄nda̍ mī wānā hi̍u̍ wā wāna̍ dɛ̍nɛ̍ wɔ̍ɔ̍ŋ te̍, ndu̍yɛ̍ ō bɛ̄nda̍ mī wānā hi̍u̍ vɛ̄lɛ̄ wā dīɔ̄m bɛ̄ndū le̍, yɔ̄ŋi̍ ŋ̄ wu̍ te̍le̍ŋ nu̍mndo̍ lāchī.

¹⁸Sīlālā sālā tīɔ̍ɔ̍ŋnda̍ŋ nda᷅ŋ kpo̍u̍ ō bɛ̄nda̍ mī wānā chu̍a̍ la̍ŋ, a̍ chu̍ē ho̍ō mā kɛ̍ɛ̍ ho̍ō chūā le̍. Ndu̍yɛ̍ wānā o̍ wāna̍ nɔ̍ sīōōŋīi̍ Mɛ̄lɛ̄kɛ̍i̍ pɛ̍, nɔ̄lāa̍ ŋ̄ nɔ̄lā la̍ŋ chūā kpo̍u̍ ni̍.

¹⁹“Wāna̍ kɔ̄l kālo̍o̍ mī kɔ̄l kālu̍ ndɔ̄ɔ̍ ō tōsa̍ mbō nɔ̄ kpāāyāa̍ mbō hīōū māsāa̍ ŋ̄wāŋ tɔ̍ chi̍o̍o̍ ni᷄ŋ kpa̍a̍yā.

²⁰“Wānā o̍ wānā cho̍ o̍ chi̍e̍ēŋndo̍ ho̍ō chōo̍ mbō wa̍ māā ndu̍ ndu̍ sɔ̄ɔ̍ŋ kɛ̍ndɔ᷄ŋ ko̍ni̍ o̍ to̍sā le̍ te̍le̍ŋ o̍ te̍le̍ŋ ni̍, ō to̍sā yɔ᷅ŋ wɔ̄ɔ̍ŋ te̍ le̍.

²¹“Tē a̍ di̍mi̍ pɛ̍ māā nyɛ̄ o̍ nyɛ̄ wāŋnda̍ ā dīmī māā ndu̍ kpo̍u̍ ŋ̄ yāŋ ni᷅la̍ŋ ni̍, bu̍ɛ̍ī nūmndo̍ bɛ̍ɛ̍ kɛ̍sɛ̍ kɛ̍sɛ̍ mbō yēi̍ nu̍m.

²²Nūm bɛ̍ɛ̍ kɛ̍sɛ̍ kɛ̍sɛ̍ kɔ̄l nūmndo̍ ō nɔ̄lā mbō kīlu̍l nu̍m yāmɛ̍i̍ māā a̍ tɛ̍ɛ̍mbu̍u̍ ni᷅ŋ wāŋnda̍ bɛ̄ɛ̄la̍ŋ te̍le̍ŋnda̍ ka̍ ka̍.

²³“Mu̍ŋ kpo̍u̍ mi̍ fu̍lā mu̍ŋ kɔ̄ɔ̄lī a̍ kɔ̄l kālu̍ nūu̍. Ya̍ i̍i̍ ye̍e̍ma̍ kpe̍e̍kpe̍i̍ mī ya̍ i̍i̍ si̍mnu᷄ŋ wa᷅na̍ kɔ̄l kālu̍ bɛ̍ndū, kɛ̍ I̍ chi̍ nɛ̍ī o̍ nɛ̄ī le̍.

²⁴Nyɛ̄ o̍ nyɛ̍ cho̍ o̍ chi̍e̍ēŋndo̍ ho̍ō chōo̍, sīnā nāā pɛ̍ŋgo̍o̍ ō chō bɔ̄ɔ̍ la̍nda̍ŋ a̍ ndu̍, nyɛ̄m cho̍ o̍ chi̍e̍ēŋndo̍ ho̍ō chōo̍ wo̍ŋ ŋ̄ yīŋgi̍la̍ bɔ̄ɔ̍ le̍ mī ŋ̄ sīna̍ mu̍ŋ pɛ̄ŋgu̍, wānā o̍ wānā cho̍ mā si̍na̍ mu̍ŋ pɛ̄ŋgu̍ le̍.

²⁵Mi̍ du̍a̍ū kɔ̄l nūu̍ kpo̍u̍ le̍ mī nɔ̍la̍ mī si̍na̍ sɔ̄ɔ̍ŋ pɛ̄ŋgu̍, le̍ mī pɛ̍ɛ̍ku̍ mī si̍na̍ a̍ kɔ̄l kālo̍o̍ o̍kɔ̄ɔ̄, ndu̍yɛ̍ a̍ mɛ̄ɛ̍ sɔ̄ɔ̍ŋ ŋ̄ yɔ̄nūŋ yɛ̍, le̍ mī si̍na̍ vɛ̄lɛ̄ a̍ mɛ̄ɛ̍ i̍ cho̍ sūɛ̍i̍ īdīɔ̄m le̍ wāa̍ wāna̍ dɛ̍nɛ̍ wɔ̍ɔ̍ŋ yɛ̍, ndu̍yɛ̍ a̍ mɛ̄ɛ̍ dīɔ̄mnde̍ ī chō sūɛ̍i̍ se̍e̍mɛ̍i̍ yɛ̍.

²⁶“Ndu̍yɛ̍ mi̍ sa̍a̍lu᷄ŋ vɛ̍lɛ̄ sūɛ̍i̍ che᷅le̍ŋ i̍ wɔ̍u̍ bɛ̍ɛ̍ mi̍ ī hīāū pīɔ̍mndo̍ ve̍. Ndi̍ yɔ̍nūŋ ni̍ māā wānā la̍nɔ̍ɔ̍ o̍ ye᷅ŋ ho̍ō wāŋ pīāāndūa̍a̍ yāŋɔ̄ɔ̄le̍ŋ ndo̍. Kāālā o̍ chɔ᷅m wa̍nā pɔ̍nɔ̍ɔ̍ wo̍ ō chō māchūāā mɛ̄ɛ̍ nda̍ yēŋ nu̍a̍ā vīsīo̍o̍ yāŋɔ̄ɔ̄le̍ŋ yɛ̍. Kɔ̄ma᷄ŋ o̍ kɔ̍māŋ wa̍nā pɔ̍nɔ̍ɔ̍ wo̍ mɛ̄ɛ̍ nda̍ yīī nu̍a̍ā wāŋndo̍ a̍ yɔ̄lɔ᷄ŋ yɛ̍ le̍nde̍ o̍ yi̍ī wa̍nā pɔ̍nɔ̍ɔ̍ ni̍. Mɛ̄ɛ̍ wānā pɔ̍nɔ̍ to̍sā sɔ̍ɔ̍ŋ hi̍nī Mɛ̍lɛ̄ka̍a̍ kɔ̄llo̍ wo̍ mbō nɔ̄la̍ ndu̍ hīɔ̄lɔ᷄ŋ. Kɛ̍ wānā pɔ̍nɔ̍ cho̍ o̍ yɔ̄ŋ wɔ̄ɔ̍ŋndo̍ ni᷄ŋ ndo̍ ndu̍, bīyɔ̄ɔ̍ chūā kōŋ ō bīī ndu̍ ni̍.

²⁷Nyɛ̄ ya̍ wa̍nā si̍nāā dɛ̍nɛ̍ bɛ̍ndōo̍ dīmi̍ wo̍ cho̍ ho̍ō ni̍. I̍ mɛ̍ɛ̍nda᷄ŋ o̍ sɔ̄ɔ̍ŋ mu᷅ŋ ni᷄ŋ o̍ nɛ̄ī o̍ nɛ̄ī ni᷄ŋ le̍ mī che᷅ bōllē sūɛ̍i̍ he̍ī. Ndu̍yɛ̍ nyɛ̄ ya̍ I̍ sa̍a̍lu̍ŋ ndo̍ cho̍ ho̍ō ni̍.

²⁸Mi̍ ki̍ndī o̍ nɛ̄ī o̍ nɛ̄ī ni̍ŋ a̍ kɔ̄l nūu̍ kpo̍u̍, le̍ mī sa̍a̍lu̍ŋ bōllē sūɛ̍i̍ he̍ī kpo̍u̍, kɛ̍ I̍ nɔ̍la̍ mī sa̍a̍lu̍ŋ bo̍llē ndɔ̄le̍ŋ kpo̍u̍ le̍. O̍ kīndīo̍o̍ le̍ bōllē sūɛ̍i̍ he̍ī sāālɔ᷄ŋ ndo̍ ni᷄ŋ, mi̍ sa̍a̍lu᷄ŋ māā o̍ wāŋnda̍ wāa̍ ō pīlɛ̍ tɛ̄ɛ̄ŋ, wānā sa̍a̍lūŋ wa̍nā pɔ̍nɔ̍ɔ̍ ō pīlɛ̍, ō wānā nɔ̍lā mā ke̍ bɛ̄ɛ̄le̍ŋ ndo̍, kɛ̍ wānā se̍e̍lūŋ wa̍nā la̍nɔ̍ɔ̍ ō pīlɛ̍ bɛ̍ɛ̍ nda̍ tɛ̄ɛ̄ŋ ō wānā ke᷅ bɛ̍ɛ̄le̍ŋ ndo̍ le̍.

²⁹Nyɛ̄ ya̍ I̍ sa̍a̍lu̍ŋ o̍ sūɛ̍i̍ he̍ī ni᷄ŋ ndo̍ cho̍ ho̍ō ni̍. Māā Mɛ̄lɛ̄ka̍ tōōsi̍a̍a̍ wāna̍ chi̍o̍o̍ le̍ mbō wa̍ sa̍kpō, ndu̍yɛ̍ mbō wa̍ wāna̍ tōnya̍. Kɛ̍ mi̍ wāna̍ chi̍o̍o̍ ō mūli᷄ŋ nɛ̍īla̍ to̍sāā yɔ̄ŋ wɔ̄ɔ̍ŋnda̍ŋ nūūvīa̍a̍.”