Read Southern Kisi Īkīlīsi̍a̍a̍tīī 8 Bible Online

Īkīlīsi̍a̍a̍tīī 8 - Southern Kisi bible

Īkīlīsi̍a̍a̍tīī 8

¹Ō nɛ̄ɛ̍nɛ̍ cho̍ yɛ̍ wāna̍ kɔ̄l kālu̍ ko̍ŋ, o̍ nɔ̍lā mbō tɛ̄ɛ̄si̍a̍a̍ īsɔ̄ɔ̍ o̍ īsɔ̄ɔ̍ cho̍ yɔ̄nɔ᷄ŋndo̍ wo̍? Kɔ̄l kālo̍o̍ mbō tōsa̍ mī hɔ̄lla̍ nīŋgi̍la̍ wānā ni̍ŋgīli̍. Ā yɔ᷄ŋ bɛ̍ɛ̍ mī hɔ̄lla̍ ā wa̍ nu̍m ā tūū kpɛ̍i̍ ō nɔ̄lā mbō māŋga̍la̍ nu̍m hɔ̄lla̍ mbō tōsa̍ mā ma̍m.

²Wānā o̍ wānā lā tūe̍i̍ ma̍sā bɛ̍ndōo̍ dīōm, fo̍ndōle̍ le̍nde̍ nya̍ chūa̍ būŋgɛ̄i̍ Mɛ̄lɛ̄ka̍ o̍ hɔ̄l ī kālā ka̍lā le̍ ndu̍ dīōmndo̍ tūēīyɔ̄ɔ̍ ni̍.

³Ke̍lēŋā māsā bɛ̍ndōo̍ fūlā o̍ bā bɛ̄ŋgu̍ chɔ̍ chɔ̍ le̍. Hi̍a̍ū īsɔ̄ɔ̍ o̍ īsɔ̄ɔ̍ wɔ̍ɔ̍ŋ kɔ̄ɔ̄lī le̍ ndu̍ le̍, fo̍ndōle̍ ō nɔ̄ kpāāyāa̍ mbō tōsa̍ nyɛ̄ o̍ nyɛ̄ o̍ hɛ̍na̍ŋ le̍ tōsāa̍ a̍ nūm.

⁴Kāni̍ fo̍ndōle̍, lēdīōm o̍ lēdīōm māsā bɛ̍ndōo̍ ō dīmi̍ pɛ̍, kpāāyāa̍ chō dīōmndēlēŋ kɔ̄ɔ̄lī. Ō tōsa̍ bɛ̍ɛ̍ nyɛ᷅ o̍ nyɛ̄, wānā o̍ wānā nɔ̍ kpa̍a̍yā mā nyu̍na̍ ndu̍ māā, Vɛ᷅ he̍ī tōsāa̍ le̍?

⁵Le̍la̍ŋ wānā o̍ wāna̍ tu̍e̍ī māsā bɛ̍ndōo̍ dīōm pɛ̍, ō to̍sāl nu̍m īsɔ̄ɔ̍ o̍ īsɔ̄ɔ̍ wɔ̍ɔ̍ŋ te̍. Wāna̍ cho̍ wāna̍ kɔ̄l kālo̍o̍, sūɛ̍i̍ bɛ̍nda̍ le̍ tōsāa̍ ve̍ ndi̍ o̍ to̍sā ni̍, ndu̍yɛ̍ a̍ te̍le̍ŋ o̍ nɔ̍ le̍ ndi̍ tōsāa̍ wo̍ o̍ to̍sā ndi̍ ni̍.

⁶Īsɔ̄ɔ̍ o̍ īsɔ̄ɔ̍ yɔ̍nūŋ, a̍ te̍le̍ŋ i̍ nɔ̍ le̍ yɔ̄nɔ᷄ŋndo̍ wo̍ i̍ yɔ̍nūŋ ni̍, ndu̍yɛ̍ a̍ mɛ̄ɛ̍ i̍ nɔ̍ le̍ yɔ̄nɔ᷄ŋndo̍ yɛ̍, mi̍ chē bɛ̍ɛ̍ te̍le̍ŋnda̍ŋ lā pūm mī nyɔ̄ɔ̍ ō kīndi̍la̍ na̍a̍ wāŋndā chīe̍e̍ya̍ kīndīlāa̍ pīla̍.

⁷Wānā o̍ wānā nɔ̍lā mbō chɔ᷄m wāŋndo̍ nyɛ̍ cho̍ yɔ̄nɔ᷄ŋ o̍ sīɔ̄dīi̍ yo̍ ni᷄ŋ ndo̍ le̍, fo̍ndōle̍ wānā o̍ wānā nɔ̍lā mbō sīna̍ nyɛ̍ cho̍ yɔ̄nɔ᷄ŋ si̍ɔ̍dīi̍ yo̍ le̍.

⁸Wānā o̍ wānā nɔ̍ kpa̍a̍yā pīɔ̍mndo̍ chōo̍, tē pāa̍le̍ nu̍mnde̍ŋ lē fūūlu̍u̍ pɛ̍ mā kpa̍a̍ ndu̍ le̍. Pīɔ̍mndo̍ chō māchūāā chɔ̄ū wānā nɔ̍lā mā hɛ̄lu᷄ŋ te̍ wo̍. Wānāā dɛ̍nɛ̍ wɔ̍ɔ̍ŋnda̍ ā nɔ̍lā mā chīīndi̍a̍a̍ wānāā dɛ̍nɛ̍ wɔ̍ɔ̍ŋnda̍ le̍.

⁹Mɛ̄ɛ̍ ya̍ I̍ mɛ̍ɛ̍nda̍ŋ mɛ̄ɛ̍ sɔ̄ɔ̍ŋ ŋ̄ yɔ̄nūŋ o̍ chi̍e̍ēŋndo̍ ho̍ō chōo̍ yɛ̍, mu᷅ŋ kpo̍u̍ ya̍ I̍ sa̍a̍lu̍ŋ ni̍. Mi̍ sa̍a̍lu᷄ŋ māā wāŋnda̍ pūm ā nɔ̄ kpāāyāla̍ŋ, mi̍ wāŋnda̍ ā wā nda̍ sāŋgāa̍ o̍ bā bɛ̄ŋgu̍.

¹⁰O̍ ko̍ŋ kɔ̍ɔ̍lī, mi̍ sa̍a̍lu᷄ŋ vɛ̍lɛ̄ mɛ̄ɛ̍ nda̍ kē wa̍nāā dɛ̍nɛ̍ wɔ̍ɔ̍ŋnda̍ bɛ̄ɛ̄le̍ŋ o̍ nda̍ chɔ̄ɔ̍ ni᷄ŋ yɛ̍, wānāā dɛ̍nɛ̍ wɔ̍ɔ̍ŋāa̍ wa᷅ ha̍ā o̍ fo̍ndāŋ dīāndāa̍ Mɛ̄lɛ̄ka̍a̍ īdīi̍ a̍ īchɔ̄l la̍. Chi̍e̍e̍ŋ wānāā dɛ̍nɛ̍ wɔ̍ɔ̍ŋnda̍ ha̍ā ā tōsā sɔ̍ɔ̍ŋ wɔ̍ɔ̍ŋndo̍ŋ ndo̍ŋ, wāŋnda̍ o̍ chi̍e̍e̍ŋ mu̍ŋ nda̍ mi̍i̍ŋgū wa᷅ŋnda̍ ha̍ā sāŋgālāa̍ o̍ bīīsi̍lā ndāla̍ŋ chōo̍ ni̍. He̍ī bɛ̍ɛ̍ I̍ che᷅ ndi̍ nyɛ̄ fo̍ndō fu̍u̍.

¹¹Tē wāŋndo̍ tōsa̍ yɔ̄ŋ wɔ̄ɔ̍ŋndo̍ pɛ̍, mā kɛ̄ɛ̍ le̍ ndu̍ nyɛ̄ pālāa̍ tūsīo̍o̍ chōo̍, ko̍ŋ ke᷅ wa᷅ŋnda̍ ā pīli̍a̍a̍ kɔ̄llo̍ nda̍ bɛ̍ɛ̍ mā to̍sa̍ sɔ̄ɔ̍ŋ wɔ̍ɔ̍ŋ wāā le̍ndo̍ŋ.

¹²Wāna̍ yɔ̄ŋ wɔ̄ɔ̍ŋndo̍ mbō wānu̍ŋ o̍ yɔ̄ŋ wɔ̄ɔ̍ŋndo̍ ni᷄ŋ le̍ te̍le̍ŋ o̍ te̍le̍ŋ, ndu̍yɛ̍ mbō vīōū yōōmū ta̍u̍ ta̍u̍. Kɛ̍ ya̍ I̍ la̍a̍la̍ŋ māā wāna̍ ke᷅ ho̍ō Mɛ̄lɛ̄ka̍ bɛ̄ɛ̄le̍ŋ ndo̍, ndu̍ hi̍a̍ū ni̍ŋ wa᷅ o̍ fo̍ndāŋ kɛ̄ndɛ̄ mbo̍ hīāū wāna̍ yɔ̄ŋ wɔ̄ɔ̍ŋ wāā le̍nde̍.

¹³I̍ si̍nā māā wānāā dɛ̍nɛ̍ wɔ̍ɔ̍ŋnda̍ nyɛ̄ o̍ nyɛ̄ ve᷅ ni̍ŋ o̍ kɛ̍ndɛ̄ a̍ nda̍ le̍. Ā chō lō o̍ lēpīlɛ̍ ni᷄ŋ kpe̍ mɛ̄ɛ̍ wūndu̍le̍ nyɔ̄ɔ̍ lē lō nu̍a̍ā yɛ̍, fo̍ndōle̍, le̍ mɛ̄ɛ̍ nda̍ nɔ̍ i̍si̍o̍o̍ŋ le̍ Mɛ̄lɛ̄ka̍ le̍ yɛ̍.

¹⁴Sūɛ̍i̍ pi᷅lɛ̍ ī yɔ̄nūŋ vɛ̍lɛ̄ o̍ chi̍e̍ēŋndo̍ ho̍ō chōo̍ mi̍ cha᷅ ndi̍ nyɛ̄ fo̍ndō fu̍u̍. Wānāā kɛ̄ndīa̍a̍ nda̍ sɔ̍lā dɛ̍nɛ̍ pa̍lāā wānāā dɛ̍nɛ̍ wɔ̍ɔ̍ŋnda̍ nɔ̄ mā sɔ̄la̍ wo̍ ni̍, o̍ ko̍ŋ kɔ̍ɔ̍lī mī wānāā dɛ̍nɛ̍ wɔ̍ɔ̍ŋnda̍ nda̍ sɔ̄la̍ dɛ̍nɛ̍ kɛ̍ndɛ̄ wānāā sa̍kpō wa̍ ā nɔ̄ mā sɔ̄la̍ wo̍. He̍ī bɛ̍ɛ̍ I̍ che᷅ ndi̍ nyɛ̄ fo̍ndō fu̍u̍.

¹⁵Le̍la̍ŋ, ya̍ I̍ di̍mi̍ māā nyɛ̍ bɛ̍nda̍ le̍ wāna̍ chi̍o̍o̍ bōōndi̍i̍ o̍ cho̍ o̍ chi̍e̍ēŋndo̍ chōo̍ ve̍, ndu̍ cho̍ dīo̍o̍ a̍ kōlɔ̄ɔ̍ ni̍, mbō tūēī yōōmū ndɔ̄ɔ̍ yēēlā. O̍ nɛ̄īyo̍ ho̍ō ni᷄ŋ wāna̍ chi̍o̍o̍ ō nɔ̄lā mbō sɔ̄la̍ kɔ̄l nyūlōo̍ nyɛ̄ pɔ̄mbɔ̄ o̍ yōōmū ndɔ̄ɔ̍ ni᷄ŋ, yōōmū Mɛ̄lɛ̄ka̍ ō ke̍ ndu̍ ho̍ō mbō lo̍ bɛ̄pɛ̄lāa̍ ha̍a̍a̍ a̍ yōōmū kōŋ mɛ̄ɛ̄lu̍la̍ŋ ndo̍.

¹⁶Mi̍ lo᷅ o̍ ko̍ŋ mi̍ du̍a̍ū kɔ̄l nūu̍ kpo̍u̍ o̍ kɔ̄l kālo̍o̍ nūūvīa̍a̍ ni᷄ŋ, ndu̍yɛ̍ a̍ le̍ mī si̍na̍ mɛ̄ɛ̍ wāŋndā chīe̍e̍ya̍ ā tōsā sɔ̍ɔ̍ŋ o̍ chi̍e̍ēŋndo̍ ho̍ō chōo̍ yɛ̍. Ya̍ i̍i̍ lɔ᷅l o̍ wāla̍ cho̍o̍ le̍, īdīi̍ ni̍ īchɔ̄l ni̍.

¹⁷O̍ ko̍ŋ kɔ̍ɔ̍lī, mi̍ mɛ̍ɛ̍nda᷄ŋ nyɛ᷅ o̍ nyɛ̄ Mɛ̄lɛ̄ka̍ ō tōsa̍ o̍ chi̍e̍ēŋndo̍ ho̍ō chōo̍. Nyɛ̄ o̍ nyɛ̄ Mɛ̄lɛ̄ka̍ ō tōsa̍ mbo̍ wā yɔ̄nɔ᷄ŋndo̍ o̍ chi̍e̍ēŋndo̍ ho̍ō chōo̍, wāna̍ chīe̍e̍ nɔ̍lā mā si̍na̍ ndu̍ pɛ̄ŋgu̍ le̍. Mɛ̄ɛ̍ o̍ mɛ̄ɛ̍ ŋ̄ kīndi̍ nūm wāna̍ chi̍o̍o̍ a̍ nɔ̍lā mā si̍na̍ ndu̍ pɛ̄ŋgu̍ le̍. Mɛ̄ɛ̍ o̍ mɛ̄ɛ̍ wāŋndo̍ ō chūānu̍ŋ māā ō chō wāna̍ kɔ̄l kālu̍ bɛ̍ndū, ō nɔ̍lā mbō sīna̍ ndu̍ pɛ̄ŋgu̍ le̍.