Read Southern Kisi Īkīlīsi̍a̍a̍tīī 9 Bible Online

Īkīlīsi̍a̍a̍tīī 9 - Southern Kisi bible

Īkīlīsi̍a̍a̍tīī 9

¹Mi̍ yi̍ya᷄ŋ a̍ sɔ̄ɔ̍ŋ mu᷅ŋ o̍kɔ̄ɔ̄ kpo̍u̍. O̍ ko̍ŋ mi̍ sɔ̍lā sīnā pɛ̄ŋgo̍o̍ māā Mɛ̄lɛ̄ka̍ nɔ̄ kpāāyāa̍ wānā o̍ wānā fe̍e̍ cho̍o̍ wo̍, wānāā kɔ̄l kālu̍a̍a̍ bɛ̍ndūa̍a̍ bɛ̍ɛ̍ a̍ wānāā tōnya̍a̍, ndu̍yɛ̍ a̍ nyɛ̄ o̍ nyɛ̄ nda̍ tōsā, nda̍ bɛ̍ɛ̍ o̍ kpāāya̍ ndɔ̄ɔ̍ bɛ̄ŋgu̍ nda̍ chō ni̍. Kɛ̍ ko̍ kāālāa̍ Mɛ̄lɛ̄ka̍ chɔ̄m ni̍ŋ nda̍ ni̍, ko̍ yɛ̍le̍ŋ o̍ tu̍l ni̍ŋ nda̍ ni̍, ā si̍nā le̍. Ā si̍nā nyɛ᷅ o̍ nyɛ̄ a̍ sīɔ̄dīi̍ ndā lāchīo̍o̍ o̍kɔ̄ɔ̄ le̍.

²Na̍a̍ ŋ̄wāŋndā chīe̍e̍ mɛ̄ɛ̍ nāa̍ ŋ̄ chō kpo̍u̍, nāa̍ pi᷅lɛ̍ kpe̍ mɛ̄ɛ̄lu̍la̍ nāāla̍ŋ lā chō ni̍, ndu̍ yɔ̍nūŋ māā chīe̍e̍ pīɔ̍m ni̍, ō wa̍ wa̍nā kɛ̍ndɛ̄, ō wa̍ wa̍nā wɔ̍ɔ̍ŋ, ō wa̍ wa᷅na̍ cho̍ ō dīāndāā Mɛ̄lɛ̄ka̍ o̍ hɔ̄l, ō wa̍ wa᷅na̍ cho̍ o̍ di̍a̍ndāā Mɛ̄lɛ̄ka̍ o̍ hɔ̄l te̍ ni̍, ō wa̍ wa᷅na̍ so̍līāā la̍sa̍lā, ō wa᷅ wa᷅na̍ so̍līāā la̍sa̍lā le̍ ni̍, nda̍ kpo̍u̍ nāa̍ pi᷅lɛ̍ kpe̍ nda̍ mɛ̄ɛ̄lū ni̍. Ō wa̍ wa̍nā kɛ̍ndɛ̄, ō wa̍ wa᷅na̍ yɔ̄ŋ wɔ̄ɔ̍ŋ, ō wa̍ wa᷅na̍ chu̍a̍ ībūŋgā o̍ Mɛ̄lɛ̄ka̍ lo̍, ō wa̍ wa᷅na̍ chu̍e̍ i̍bu̍ŋgā o̍ Mɛ̄lɛ̄ka̍ lo̍ le̍ ni̍, nda̍ kpo̍u̍ nyɛ̍ yɔ̍nūŋ a̍ ho̍ō wo̍, ndu̍ ko̍ni̍ yɔ̍nūŋ vɛ̍lɛ̄ a̍ ō pīlɔ̍ɔ̍ ni̍.

³Sūɛ̍i̍ kɔ̄l tāmbɛ̍i̍ bɛ̍ndūe̍i̍ pīla̍ i̍ yɔ̍nūŋ he̍ī o̍ chi̍e̍ēŋndo̍ ni᷄ŋ ni̍, le̍ na̍a̍ wāŋndā chīe̍e̍ya̍ kpo̍u̍ mī mɛ̄ɛ̄lu̍la̍ nāāla̍ŋ lā wa̍ nāa̍ pi᷅lɛ̍ kpe̍. Na̍a̍ ŋ̄wāŋndā chīe̍e̍ tē ŋ̄ chō wɔ̄ pɛ̍ yo̍o̍mū o̍ chi̍e̍ēŋndo̍ chōo̍, yɔ̄ŋndā wɔ̄ɔ̍ŋnda̍ŋ lā pīāā na̍a̍ o̍ lākɔ̄l cha̍. Yīya᷄ŋnda̍ se̍e̍mɛ̍i̍la̍ŋ kpo̍so̍ŋ ko̍ni̍ la̍ hu᷅ŋ na̍a̍ o̍ lēbōl ni̍. Tē ŋ̄ vī vɛ̄lɛ̄ pɛ̍ ŋ̄ kōma̍l wāŋnda̍ ā pīli̍a̍a̍ chīe̍e̍ pīɔ̍m.

⁴Wāna̍ chi̍o̍o̍ tē ā chō wɔ̄ pɛ̍ yo̍o̍mū o̍ chi̍e̍ēŋndo̍ ho̍ō chōo̍ ā nɔ̄ tīīnda᷄ŋndo̍. Tu᷄ŋ cho̍ yōōmū wo̍ ō bɛ̄nda̍ mbo̍ hīāū kpɔ̍kūŋ vīlɛ̍i̍yo̍.

⁵Wānāa̍ cho̍ yōōmū wa̍ ā sīnā māā, mɛ̄ɛ̍ mɛ̄ɛ̍ nda̍ vi̍o̍u̍ yo̍o̍mū ā nɔ̄ le̍ pīɔ̍mndo̍ sɔ̄lāa̍. Kɛ̍ wānāa̍ vi᷅ ni᷄ŋ nda̍, nda̍ nɔ̍ yi̍ya᷄ŋ ko̍ŋ te̍. Nda̍ nda̍ sɔ̍lā lɛ̍ nyɛ̄ o̍ nyɛ̄ kɛ̄ndɛ̄ o̍ chi̍e̍ēŋndo̍ ho̍ō chōo̍ le̍. Wānā o̍ wānā pūɛ̄ɛ̄nu̍ŋ ni᷅ŋ a̍ nda̍ o̍kɔ̄ɔ̄.

⁶Nda̍ nda̍ nɔ̍lā lɛ̍ mā kāāla̍ wānā o̍ wānā o̍ chi̍e̍ēŋndo̍ ho̍ō chōo̍ le̍, ndu̍yɛ̍ ā nɔ̍lā vɛ̍lɛ̄ mā tu᷄l wānā le̍yɛ̍ le̍, kɛ̄lɛ̄ŋgāāle̍ mā nɔ̄ nɛ̄īyɔ᷄ŋ wānā. Nyɛ̄ o̍ nyɛ̍ yɔ̍nu̍ŋ ni᷅ŋ bɛ̍ɛ̍ o̍ chi̍e̍ēŋndo̍ ho̍ō chōo̍, nda̍ nda̍ nɔ̍ lɛ̍ kpe̍ku̍ o̍ kpe̍ku̍ le̍ni̍ŋ te̍.

⁷Le̍la̍ŋ tē ā nɔ̄ pɛ̍, di̍o̍, mā na̍ŋ kɔ̄l, o̍ ko̍ŋ kɔ̍ɔ̍lī, mā ko̍l mūɛ̄īmā nūmnda̍ŋ mā dɔ̄ɔ̄nu᷄ŋ nya̍a̍le̍, fo̍ndōle̍ Mɛ̄lɛ̄ka̍ chīi̍ nu̍m dīōm chɛ̄lɔ̄ɔ̄.

⁸Le̍ te̍le̍ŋ o̍ te̍le̍ŋ nyɛ̄lā nūmnda̍ŋ lā wa᷄ la̍ di̍a̍ndāā nu̍m lēkɔ̄ɔ̍, mā sūūnūŋ chu̍ɛ̍īya̍ŋ lēkɔ̄ɔ̍ lɔ̍ɔ̍ lɔ̍ɔ̍.

⁹Yōōmu̍ cho̍ŋnu̍ŋ ho̍ō fo̍ndō fu̍u̍ mi̍ Mɛ̄lɛ̄ka̍ ō kē nu̍m ndu̍ wo̍, pālɛ̍i̍ bi̍ŋgīī ŋ̄ nɔ̄ he̍ī le̍ wāa̍ o̍ yōōmū kōŋ ni᷄ŋ o̍ chi̍e̍ēŋndo̍ chōo̍ mi̍ ī wānu̍ŋ fo̍ndō fu̍u̍ ve̍, ki̍ndi̍ mā dē yōōmū nūm ko̍ŋ tɔ̄nɔ̄ nya̍ la̍a̍ nu̍m kāālāa̍, fo̍ndōle̍ nyɛ̄ ŋ̄ tīīnda̍ŋ o̍ chi̍e̍ēŋndo̍ ho̍ō chōo̍ o̍ yɔ̄kpā nūmndo̍ ni᷄ŋ kpo̍u̍ wo̍ ndu̍ ko̍ni̍ cho̍ ko̍ŋ ni̍.

¹⁰Kpe̍ku̍ o̍ kpe̍ku̍ ŋ̄ nɔ̄ pɛ̍ le̍ tōsāa̍ o̍ chi̍e̍ēŋndo̍ ho̍ō chōo̍, to̍sa̍ ndu̍ a̍ kpāāyā nu̍mndo̍ kpo̍u̍, fo̍ndōle̍ chi̍e̍e̍ pīɔ̍m nāa̍ ŋ̄ nɔ̄ le̍ kɔ̄la̍ŋ nda̍, kpe̍ku̍ so̍līāā cho̍ lo̍ŋ te̍, yīya᷄ŋndo̍ a̍ nyɛ̄ o̍ nyɛ̄ o̍kɔ̄ɔ̄ ō cho̍ lo̍ŋ te̍, sīnā a̍ nyɛ̄ o̍ nyɛ̄ o̍kɔ̄ɔ̄ ō cho̍ lo̍ŋ te̍, ndu̍yɛ̍ kɔ̄l kālu̍ wa̍ā nu̍a̍ā ō cho̍ lo̍ŋ te̍.

¹¹Mi̍ sa̍a̍lu᷄ŋ vɛ̍lɛ̄ sūɛ̍i̍ pi᷅lɛ̍ o̍ chi̍e̍ēŋndo̍ ho̍ō chōo̍, ndi̍ cho̍ he̍ī ni̍. Wāna̍ nya̍a̍nūŋ nya̍a̍nɔ᷄ŋ bɛ̍ndōo̍ o̍ kīlta̍ lābɛ̄ɛ̄la̍ la̍ŋ ni᷄ŋ ndo̍, ō ve᷅ bɛ̍ɛ̍ ndu̍ le̍ o̍ hu᷅ŋ wa᷅na̍ tāse̍ o̍ kīlta̍la̍ŋ ni᷄ŋ te̍. Wāna̍ kɔ̄l sīmūlāa̍ ō yi᷅m bɛ̍ɛ̍ ko̍ chɔ̍ū lɔ̍ɔ̍ lɔ̍ɔ̍ le̍. Wāna̍ nɔ̍ ho̍ō kɔ̄l kālo̍o̍ nɔ̄ bɛ̄ndōo̍ wo̍, ō sɔ̍lā bɛ̍ɛ̍ ko̍ nyɛ̍ dīāā o̍ di̍ā lɔ̍ɔ̍ lɔ̍ɔ̍ le̍. Wāna̍ nɔ᷅ ho̍ō tāāsi̍o̍o̍ nɔ̄ bɛ̄ndōo̍ wo̍, sūl ve᷅ bɛ̍ɛ̍ ko̍ le̍ ndu̍ le̍. Wāna̍ nɔ᷅ ho̍ō tāāsi̍o̍o̍ le̍ nyɔ̄ɔ̍ŋ chāa̍ tōōsīa̍a̍ wo̍, ō di̍ī bɛ̍ɛ̍ ko̍ dɛ̍nɛ̍ le̍. Nyɛ̄ o̍ nyɛ̍ ko̍ma̍l wa̍nā o̍ yōōmōo̍ ni᷄ŋ, a̍ te̍le̍ŋ o̍ nɔ̍ le̍ nu̍m kōmāllo̍ wo̍ o̍ ko̍māl nu̍m ni̍, ndu̍yɛ̍ mɛ̄ɛ̍ o̍ nɔ̍ le̍ nu̍m kōmāllo̍ yɛ̍ o̍ ko̍māl nu̍m ni̍.

¹²Wānā o̍ wānā si̍nā pāa̍le̍ nyɛ̄ kīndīlāa̍ o̍ nu̍m ndo̍ ō chō nu̍m kōmāl te̍. Mɛ̄ɛ̍ sūūwo̍ ō hāū nu̍a̍ā o̍ yālāa̍ ni᷄ŋ ō ve᷅ kɔ᷅l te̍ yɛ̍, ɔ̄ɔ̄ mɛ̄ɛ̍ yōūwo̍ ō hāū nu̍a̍ā o̍ yālāā tu̍a̍ndāa̍ ō ve᷅ kɔ᷅l te̍ yɛ̍, le̍nde̍ wāna̍ chi̍o̍o̍ ŋ̄ dēl o̍ nyɛ̄ pālāa̍ ni᷄ŋ o̍ lēpīlɛ̍ ni᷄ŋ kpe̍ ni̍.

¹³Mi̍ cha᷅ vɛ̄lɛ̄ sūɛ̍i̍ pi᷅lɛ̍ mi̍ ī yɔ̄nu᷄ŋ o̍ chi̍e̍ēŋndo̍ ho̍ō chōo̍, tāāmāsi̍o̍o̍ pīla̍ i̍ cho̍ a̍ kɔ̄l kālo̍o̍ o̍kɔ̄ɔ̄ ni̍.

¹⁴Chi̍e̍e̍ pɔ̍mbɔ̄ pīlɛ̍ ō wa̍, chi̍o̍o̍ ho̍ō ndu̍ o̍o̍ nɔ̍ wa̍nāā bɔ̄ɔ̍ le̍. Mi̍ māsā bɛ̍ndū kpāāyā pīlɛ̍ ō chūā pūa̍a̍ ndūa̍a̍ chɔ̄ūwa̍ ma̍ kɔ̍ chi᷅ŋa̍la᷅ŋ chi̍o̍o̍ ho̍ō, ma̍ dūāū ndu̍ o̍ pi̍ŋndo̍ ni᷄ŋ kpɔ̍kɔ̍su̍. Ma̍ dēŋgēlā pūūlōo̍ o̍ sāāsa̍ ba̍lu̍ chi̍o̍o̍ ho̍ō wo̍ bālɔ̄ɔ̍ chɛ̍chɛ̍.

¹⁵Wānā ta̍mbɛ̍i̍ pi᷅lɛ̍ ō wa̍ o̍ chi̍o̍o̍ ho̍ō ni᷄ŋ kɔ̄l kālo̍o̍ pīla̍ ndu̍ o̍o̍ nɔ̍ ni̍. Mi̍ wānā ta̍mbɛ̍i̍yo̍ ho̍ō ō chīīndīāā chi̍o̍o̍ ho̍ō a̍ kɔ̄l kālu̍ ndɔ̄ɔ̍, ya̍a̍mɔ̍ɔ̍wa̍a̍ hi᷅ŋ ha̍ā le̍ chi̍o̍o̍ ho̍ō chīŋa̍la᷅ŋndo̍ wa̍ ā nɔ̄la̍ mā bīī chi̍o̍o̍ ho̍ō le̍. Kɛ̍ dīmīo̍o̍ nu̍a̍ā mi̍ sūɛ̍i̍ he̍ī ī hīāū, mi̍ wānā o̍ wānā pu̍ɛ̍ɛ̍nu᷄ŋ bɛ̍ɛ̍ a̍ wānā ta̍mbɛ̍i̍yo̍ ho̍ō o̍kɔ̄ɔ̄.

¹⁶O̍ ko̍ŋ, mi̍ sɔ̍lā sīnā pɛ̄ŋgo̍o̍ māā kɔ̄l kālo̍o̍ ō na᷄ŋ ō hīōū dīāllūŋ kāla᷄ŋ. Kɛ̍ nɔ̍ bɛ̍ɛ̍ kɔ᷅l kālo̍o̍ ha̍a̍a̍, tē a̍ nɔ̍ nyɛ᷅ o̍ nyɛ̄ o̍ bā le̍, wānā o̍ wānā to̍fā nu̍m bɛ̍ɛ̍ le̍, mɛ̄ɛ̍ mɛ̄ɛ̍ ŋ̄ wa̍ wa᷅na̍ tāāsi̍ bɛ̄ndū.

¹⁷Ō bɛ̄ndā mī wānā ya̍ŋ nīla̍ŋ o̍ dīōmndā wāna̍ kɔ̄l kālo̍o̍ ō sūāā o̍ bɛ̍ɛ̍ŋ bɛ̍ɛ̍ŋndo̍ ni᷄ŋ nda̍ŋ, mbo̍ hīāū māsā bɛ̍ndū dīɔ̍m su̍a̍ā a̍ dēŋīo̍o̍ wo̍ nīla̍ŋ yāŋɔ̄ɔ̍.

¹⁸Kɔ̄l kālo̍o̍ ō nɔ̄ kpāāyāa̍ ō hīōū wōlɔ̄ɔ̄ o̍ wōlɔ̄ɔ̄ chɔ̄ū, kɛ̍ wāna̍ yɔ̄ŋ wɔ̄ɔ̍ŋndo̍ ndu̍ pīlɛ̍ mbō tɛ̄ɛ̄mbu̍u̍ nyɛ̄m kɛ̄ndɛ̄ŋ bɔ̄ɔ̍ bɔ̍ɔ̍.