Read Southern Kisi Chōndi̍i̍ Sɔ̍lɔ̍mɔ̄ŋ Nde̍ 4 Bible Online

Chōndi̍i̍ Sɔ̍lɔ̍mɔ̄ŋ Nde̍ 4 - Southern Kisi bible

Chōndi̍i̍ Sɔ̍lɔ̍mɔ̄ŋ Nde̍ 4

¹Kpo̍u̍, nūm chūā ya̍ I̍ ka̍a̍la̍ ho̍ō wo̍, a̍ na̍ŋ ō bɔ̄ɔ̍! A̍ na̍ŋ ō bɔ̄ɔ̍ fɔ̍. Kōla̍ ŋ̄ kūūmbu̍ŋ nu̍a̍ā o̍ hɔ̄l lo̍, tē wānā che᷅ nu̍m hɔ̄ltā ku̍lu̍la̍ŋ o̍ kōlā ko̍ŋ bɛ̄ŋgu̍ i̍ta̍fūlāāve̍ pɛ̍, āā hɔ̄ltā pīīŋndo̍ ni̍. Yīīŋnde̍ nu̍m o̍ lēbōl ī hīnīāā sa̍kpō, tīŋī kpi̍lo̍, ī hīnīāā nu̍m o̍ kɔ̄ɔ̄ tɔ̍lɔ̄kɔ̍, nu̍a̍ā ŋ̄ chā āā chūīŋāā ku̍ndāa̍ cho̍ Pēmbīī Ki̍li̍a̍a̍dīve̍ tōlɔ̄ɔ̍ ni̍.

²Chīŋndo̍ŋ nu̍m o̍ sōndō ŋ̄ hūmbū fo̍fo̍, nu̍a̍ā ŋ̍ chā āā sāā hu̍mbūa̍a̍ nda̍ kīli̍ yīīŋnde̍ sɛ̄nɛ̄ī ma̍ pūlū nda̍ mi̍ yīīŋīī ndɛ̄i̍ ī wā ī hūmbū fo̍fo̍ ni̍. Ndu̍yɛ̍ ŋ̄ chō nu̍m ŋ̄ chīŋāā o̍ sōndō sɔ̍dɔ̍, ī pīlɛ̍ bɛ̍ɛ̍ i̍ ke̍ndi̍ŋ ndɔ̍ le̍.

³Chɔ̄chɔ᷄ŋ nu̍m ŋ̄ sīāŋā nyɛ̄ kɛ̄ndɛ̄ ye̍le̍te̍te̍, mɛ̄ɛ̍ kɛ̍īlē sīāŋāle̍ŋ lē wā nu̍a̍ā yɛ̍. Sōndōo̍ ō na᷄ŋ nu̍m bɔ̄ɔ̍ fɔ̍. Kōla̍ ŋ̄ kūūmbu̍ŋ nu̍a̍ā o̍ hɔ̄l lo̍, tē wānā che᷅ nu̍m kpa᷅ŋndo̍ŋ dīīyā kɛ̄ndɛ̄ kɛ̍ndɔ̄ɔ̍ o̍ kōlā ko̍ŋ bɛ̄ŋgu̍ pɛ̍, to̍fa̍ wɔ̍ ko̍ mɛ̄ɛ̍ nda̍ tɛ̄ndā nu̍a̍ā pɔ̄mɛ̄ki̍la̍ne̍tīi̍yo̍ kūmbo᷄ŋ ŋ̄ mūu̍ŋ mbō wa̍ le̍nde̍ o̍ di̍i̍yāā yɔ̍ɔ̄ vēllāa̍ vēllē yɛ̍.

⁴Kɛ̍se̍i̍ nu̍m ī vīlɛ̄ī, nu̍a̍ā ŋ̄ chā āā chīɛ̄ī vīlɛ̄i̍ tɔ̍ɔ̍ Dēēve̍ ndu̍ o̍o̍ ta̍ŋgu̍llo̍ ndu̍ o̍o̍ na̍ŋ nu̍a̍ā yɛ̍. Nyɛ̄m ba̍ā kālāŋ ŋ̄ bāāyi̍a̍ŋ nu̍a̍ā o̍ lābo̍lō wo̍ŋ, tē wānā che᷅ mu̍ŋ pɛ̍, āā nyɛ̄lā pūa̍a̍ chɔ̄ūwa̍ ā sɔ̄ŋgā o̍ lābā māā bōo̍la̍ bɛ̍ndū la̍ŋ la̍ cho̍ nu̍m lā lɛ̄ɛ̄nda᷄ŋ wa̍a̍ (1,000) ō pīlɛ̍ ni̍.

⁵Mɛ̄ɛ̄mā nūmnda̍ŋ mā pɔ̄mbɔ̄ le̍nde̍ nyɛ᷅ kɛ̄ndɛ̄ kɛ̍ndɛ̄. Mɛ̄ɛ̍ kīa̍la̍a̍ pɛ̍ndūa̍a̍ ā wā nu̍a̍ā dīo̍la̍ŋ o̍ pɔ̄mbīa̍ŋ ni᷄ŋ wānā che᷅ nda̍ pɛ̍ nyɔ̄ɔ̍ hɛ̄nāŋ nu̍m yɛ̍, le̍nde̍ mɛ̄ɛ̄mā nūmnda̍ŋ mā na᷄ŋ ni̍.

⁶Lɔ̍ɔ̍pa̍ mī pāa̍le̍ŋ lē sɛ̄ mī nyɔ̄ɔ̍ ō tēŋga̍, I̍ cho̍ lākɔ̄ŋnɔ᷄ŋ o̍ pēmbīī nyɛ̄m chūŋ kɛ̄ndɛ̄ī mɔ̍ɔ̄ ve̍ chōo̍, ndu̍yɛ̍ mī ku̍ɛ̍ŋnu᷄ŋ o̍ pēmbīī nyɛ̄m chūŋ kɛ̄ndɛ̄ī fi̍la̍ki̍ŋsɛ̄ŋnde̍ chōo̍.

⁷Nāŋɔ̄ɔ̄ kpe̍e̍kpe̍i̍yo̍ ŋ̄ na᷄ŋ ni̍ chūa̍a̍. A̍ nɔ̍ sɔ᷅ŋ o̍ sɔ̄ŋ te̍.

⁸To̍l o̍ Pēmbīī Le̍ba̍nɔ̄ŋnde̍ chōo̍ ŋ̄ kɔ̄ŋnu̍ŋ, la̍a̍ ni̍ na̍a̍ ŋ̄ chō hūnɔ̄ɔ̄ cha᷄lle̍ wɔ̍. To̍l la̍ kɔ̄ɔ̄lī, to̍l la̍ kɔ̄ɔ̄lī fɔ̍ ŋ̄ kɔ̄ŋnu̍ŋ. To̍l nāa̍ ŋ̄ chō ka̍ŋ o̍ pēmbūŋ lēvīllo̍ŋ tūllo̍ wa̍, Pēmbīī A̍ma̍nāve̍, a̍ Pēmbīī Sɛ̄nɛ̍ɛ̄ve̍, a̍ Pēmbīī Ha̍mɔ̄ŋnde̍. Fu̍la̍ nāa̍ ŋ̄ chō ka̍ŋ o̍ bɛ̄mɛ̍lta̍ kpɔ̍kūŋnda̍, a̍ tāmbi̍lla̍ wa̍ ŋ̄ kɔ̄ŋnu̍ŋ.

⁹A̍ kpe̍e̍ŋi̍a̍a̍ ya̍ kɔ̄l kāālāa̍ ni᷄ŋ tīŋgu̍e̍i̍nɔ̍ nūu̍, nūm la̍a̍ ni̍ na̍a̍ ŋ̄ chō hūnɔ̄ɔ̄ cha᷄lle̍ wo̍. Nūa̍a̍ ya̍, mi̍ kɔ̄llo̍ ō mūli᷄ŋ ya̍ le̍ pi᷅lɛ̍ kpe̍. Nyɛ̄m ba̍ā kālāŋ ŋ̄ bāānu̍ŋ o̍ lābo̍lō wo̍ŋ, ō pīlɛ̍ kpe̍ ya̍ I̍ de̍l hɔ̄lte̍ŋ ni̍, mi̍ kɔ̄llo̍ ō kpēēŋīa̍ŋ ya̍ ni᷄ŋ kpo̍u̍ a̍ kāālāa̍.

¹⁰Kāālā nūmndo̍ ō hīni̍ ya̍ kɔ̄llo̍ bɔ̄ɔ̍ tīŋgu̍ɛ̍i̍nɔ̍ nūu̍, la̍a̍ ni̍ na̍a̍ ŋ̄ chō hūnɔ̄ɔ̄ cha᷄lle̍ wɔ̍. Kāālā nūmndo̍ ō na᷄ŋ ō hīōū mūɛ̄īya̍ŋ, Chūɛ̄īmā ŋ̄ sūūnu̍ŋ nda̍ŋ, chūɛ̄īmā o̍ chūɛ̄īmā sūūna᷄ŋ ma̍ cho̍ mī mā sūla᷅ŋ chu᷅ŋ kɛ̄ndɛ̄ a̍ ma̍ŋ te̍.

¹¹Chɔ̄chɔ᷄ŋ nūmndo̍ŋ yēēlāa̍, wānā che᷅ pɛ̍ āā līa̍a̍ŋ ni̍. Dīɔ̄ɔ̄mūlē nūmnde̍ŋ wānā che᷅ pɛ̍ āā līa̍a̍ŋ a̍ mi̍li̍kīi̍ya̍ŋ ma̍ cho̍ lēbɛ̄ŋgu̍ ni̍ a̍ yēēlāa̍. Nyɛ̄lā ŋ̄ wōōnūŋ nda̍ŋ chūŋ kɛ̄ndɔ̄ɔ̍, wānā che᷅ pɛ̍ āā Pēmbīī Le̍ba̍nɔ̄ŋnde̍ ni̍.

¹²O̍o̍ tīŋgu̍e̍i̍nɔ̍ nūu̍, la̍a̍ ni̍ na̍a̍ ŋ̄ chō hūnɔ̄ɔ̄ cha᷄lle̍ wo̍, ā chō māchūāā māā kpe̍lo̍o̍ ō wa᷅ ho̍ō ō bɔ̄ŋāā kpɔ̍kɔ̍su̍ a̍ kpākīo̍o̍ wo̍. Kpe̍le̍ wa᷅ ho̍ō ō bɔ̄ŋāā kpɔ̍kɔ̍su̍ a̍ kpākīo̍o̍ wo̍ ŋ̄ chō ni̍, pēē ko̍lāa̍ wa᷅ ho̍ō le̍ wāŋndo̍ ndu̍ pīlɛ̍ kpe̍ wo̍ ŋ̄ chō ni̍.

¹³Ā chō māchūāā māā kpe̍le̍ māpɔ̄mɛ̄ki̍la̍ne̍tīi̍yo̍, o̍ nɔ̍ ho̍ō kōmɔ̄ɔ̄lā yēēlɛ̍i̍la̍ kɛ̍ndɛ̄ kɛ̍ndɛ̄la̍ŋ ndo̍, kpe̍le̍ nɔ̍ ho̍ō nyɛ̄m chūŋ kɛ̄ndɛ̄ kɛ̍ndɔ᷄ŋ mu᷅ŋ ndo̍, hɛ̍nā, a̍ na̍ād, a̍ sa̍fi̍lɔ̄ŋ, a̍ ka̍la̍mɔ̍ɔ̄, a̍ si̍na̍mɔ̄ŋ, a̍ yɔ̄mīī nda̍ tōōsīāā nyɛ᷅m chūŋ kɛ̄ndɛ̄ŋ yɛ̍ yɔ̍ŋ nde̍, fi̍la̍ki̍sɛ̄ŋ, a̍ mɔ̍ɔ̄, a̍ a̍lo̍o̍sī, o̍ ko̍ŋ kɔ̍ɔ̍lī, a̍ nyɛ̄m chūŋ kɛ̄ndɛ̄ kɛ̍ndɛ̄ŋ bɛ̄ndo᷄ŋ.

¹⁵Ā chō māchūāā māā pēe̍ būūlōo̍ o̍ kpe̍lo̍o̍ ni᷄ŋ, so̍o̍ŋ ko̍lāa̍ yɔ̍ŋgū mɛ᷅ŋma̍ yɔ̍ŋgū yōōmūa̍ŋ ndo̍, pēē pɔ̍mbɔ̍ cha᷅ŋ o̍ pēmbūŋ Le̍ba̍nɔ̄ŋ ndo̍.

¹⁶Hūēīye̍ bā lūāŋndo̍ ka̍ndu̍ hɔ᷅ŋndo̍, hūēīyīi̍ cha᷅ŋ ba᷅ tōūwo̍ ve̍, hu̍ŋ a̍ hɔ̄ŋndo̍, mā ke̍e̍ku̍ a̍ hɔ̄ŋndo̍ o̍ kpe̍le̍ nūu̍ ni᷄ŋ. Hɔ̍ŋ o̍ kpe̍le̍ nūu̍ ni᷄ŋ mā to̍sa̍ mī chūŋ kpe̍lo̍o̍ ho̍ō ō tīu̍ bā o̍ bā. Fāl nī ka̍a̍lāa̍ ō hu᷄ŋ o̍ kpe̍le̍ ndɔ̄ɔ̍ ni᷄ŋ, mbō hu᷄ŋ di̍ō kōmɔ̄ɔ̄lā yēēlɛ̍i̍la̍ kɛ̍ndɛ̄ kɛ̍ndɛ̄la̍ cho̍ o̍ kpe̍lo̍o̍ ho̍ō ni᷄ŋ nda̍ŋ.