Read Southern Kisi Chōndi̍i̍ Sɔ̍lɔ̍mɔ̄ŋ Nde̍ 5 Bible Online

Chōndi̍i̍ Sɔ̍lɔ̍mɔ̄ŋ Nde̍ 5 - Southern Kisi bible

Chōndi̍i̍ Sɔ̍lɔ̍mɔ̄ŋ Nde̍ 5

¹I̍ hi᷅ŋ o̍ kpe̍le̍ nūu̍ ni᷄ŋ, tīŋgu̍e̍i̍nɔ̍ nūu̍, la̍a̍ ni̍ nāā ŋ̄ chō hūnɔ̄ɔ̄ cha᷄lle̍ wo̍. I̍ chu̍u̍ŋgi̍a̍a̍ nyɛ̄m ni̍ŋ chūŋ kɛ̄ndɔ᷄ŋ, mɔ̍ɔ̄ a̍ nyɛ̄m chūŋ kɛ̄ndɛ̄ŋ chēle̍ŋndo̍ŋ. I̍ cho̍ wāa̍la̍ nīla̍ mālɛ̄la̍ŋ nīla̍ŋ dīo̍o̍, ndu̍yɛ̍ mi̍ wa᷅ lɛ̄ma̍ nīa̍a̍ŋ dēēmbūū wo̍. I̍ cho̍ mūɛ̄īmā nīa̍a̍ŋ, a̍ mi̍li̍kīi̍ma̍ nīa̍a̍ŋ kōlɔ̄ɔ̍. Chāānja̍ŋ, lā dīo̍ mī lā ko᷄l, Lā ko᷄l mī mā bīī nya̍, wānāā nīāā ka̍a̍lāa̍.

²I̍ wa̍ īhīni̍ o̍ lūa̍ŋ, kɛ̍ kɔ̄l nūu̍ lɔ᷄l te̍, I̍ wa̍ hɔ̄lte̍ŋ o̍ nɛ̄ī le̍ fāl nūu̍. Ɔ̍ɔ̄ lā mēi̍yɔ̍, I̍ tu̍e̍ī fāl nūu̍ dīo̍o̍ lɔ̄ɔ̍. Ku̍mbu̍l la̍ I̍ lu̍ɛ̍ī, tīŋgu̍e̍i̍nɔ̍ nūu̍, o̍ nī ya̍ ka̍a̍la̍ wo̍, nāŋɔ̄ɔ̄ chu̍ū le̍. Mɔ᷄mndo̍ līīvi̍a̍a̍ ya̍ bōlle̍ŋ yɔ̍ yɔ̍, Yīīŋnde̍ kpo̍u̍ ī līwa̍ ya̍ o̍ lēbōl a̍ nyɛ̄ yu̍u̍yu̍u̍ chu̍chū i̍chɔ᷅l lo̍.

³I̍ chi̍i̍ ni᷅ŋ sōōlɔ᷄ŋ fɔ̍, I̍ nɔ̍lā lɛ̍ mī mi̍ŋgi̍ŋ nyɛ᷅la̍ŋ lēkɔ̄ɔ̍ mī chɛ̍ŋ te̍. I̍ chi̍i̍ ni᷅ŋ pēlo᷄ŋ pūlɔ̄ɔ̄ mi̍ hi̍nī, I̍ ye̍e̍ma̍ lɛ̍ mī nɔ̍ɔ̍li̍a̍a̍ pēlūŋ nu᷄ŋ te̍.

⁴Wāna̍ nī ka̍a̍lāa̍ ō wōu̍ bāa̍ o̍ tɛ̄ɛ̄ŋgēi̍, kɔ̄llo̍ lāāsi̍a̍ŋ ya̍ ni᷄ŋ kpo̍u̍ a̍ kāālā ndɔ̍ pɛ᷅ ya̍ o̍ kɔ̄l lo̍.

⁵Mi̍ cha̍ŋ le̍ mī ku̍mbu̍l ndu̍ dīo̍o̍ mbō lūɛ̄ī. Chūɛ̄īmā chūŋ kɛ̄ndɛ̄ māmɔ̍ɔ̄ wa̍ŋ mā wa̍ ya̍ dēlīo̍o̍ o̍ bāla̍ŋ tu̍e̍ tu̍e̍. Su̍lu̍ku̍ ya̍ I̍ sa̍a̍ nu̍a̍ā le̍ dīo̍o̍ kūmbīo̍o̍ wo̍, mɔ̍ɔ̄mā chūŋ kɛ̄ndɛ̄ kɛ̍ndīa̍ŋ mā wa̍ ya̍ dēlīo̍o̍ o̍ sōo̍ŋ tu̍e̍ tu̍e̍.

⁶Mi̍ ku̍mbi̍ dīo̍o̍ le̍ mī wāna̍ nī ka̍a̍la̍ wo̍ ō lūɛ̄ī, kɛ̍ ndu̍ o̍o̍ mu̍li̍ŋ ni᷅ŋ mbo̍ kūānu᷄ŋ. Tūēīyɔ̄ɔ̄ ko̍ŋ ndu̍ dīōmndo̍, fūlāa̍ ni᷅ŋ I̍ chi̍ lɛ̍ ndu̍ le̍, mi̍ kɔ̄llo̍ tāmbu̍ pɛ̍. I̍ to̍fa̍ ni᷅ŋ fe̍e̍ I̍ chi̍ lɛ̍ ndu̍ le̍. Mi̍ ve̍e̍lū, kɛ̍ ō chɛ᷄l te̍, ndu̍ o̍o̍ ku̍ɛ̍ŋnu᷄ŋ ni᷅ŋ.

⁷I̍ lo̍ bālɔ̄ɔ̍ ndu̍ nūūvīa̍a̍ mi̍ ŋ̄ bɔ̄ŋa᷅ŋ na̍a̍ wānāā mɛ̄ŋgɛ̄lāa̍, ā wa̍ bālɔ̄ɔ̍ o̍ bɛ̍ɛ̄la̍ŋ. Ma̍ lūāā ya̍, ndu̍yɛ̍ ma̍ bōōlūū ya̍. Mi̍ wānāā mɛ̄ŋgɛ̄lāa̍ ha̍ā, a̍ wa̍ o̍ sāāsa̍ chi̍o̍o̍ wa̍, ā kūānu᷄ŋ a̍ dōma̍ ni̍ wa̍ ya̍ lēkɔ̄ɔ̍ wɔ̍.

⁸Chūāā lāāndūa̍a̍ Chūlu̍sɛ̄lɛ̄m, lā chu̍e̍l la̍ ībūŋgā, māā tē lā chi᷄l la̍ wāna̍ nī ya̍ i̍ ka̍a̍lāa̍ pɛ̍, lā chō ndu̍ dīmūl māā I̍ na̍a̍ fi̍ā, a̍ kāāla̍ ndɔ̍ cho̍ ya̍ o̍ kɔ̄l lo̍.

⁹Nūm tīŋgu̍e̍i̍nɔ̍ɔ̍ ho̍ō se̍ī, nu̍m hi̍o̍ū ho̍ō wāŋ lāāndūa̍a̍ kpo̍u̍ na̍ŋɔ̄ɔ̄ wo̍, mɛ̄ɛ̍ a̍ yi̍ya̍ŋ māā po̍ nūm ka̍a̍lāa̍ ō bɛ̄nda̍ mbo̍ hīāū o̍ wānā o̍ wāna̍? Mɛ̄ɛ̍ a̍ ye̍e̍ma̍ mā di̍mi̍ māā ō bɛ̄nda̍ mbo̍ hīāū o̍ wa̍nā o̍ wānā, mā vēm na̍a̍ būŋgɛ̄ī wāā le̍nde̍ chu̍a̍a̍?

¹⁰Fāl nī ka̍a̍lāa̍ ō na᷄ŋ ō bɔ̄ɔ̍, ndu̍yɛ̍ ō nɔ̄ dīāllūŋ kāla᷄ŋ. Ō hīōū pūa̍a̍ wāa̍la̍ŋ tɔ̍ bɛ̍ɛ̍ na̍ŋɔ̄ɔ̄, wānā tu̍ū ndu̍ bɛ̍ɛ̍ a̍ po̍ o̍ po̍ le̍.

¹¹Bōlle̍ŋ ndu̍ ko̍o̍līi̍ kɛ̍ndɛ̄ kɛ̍ndɛ̄i̍ kpo̍sōŋ. Yīīŋnde̍ ndu̍ ī hīnīāā o̍ lēbōl nyɛ̄ kɛ̄ndɛ̄ tɔ̍lɔ̄kɔ̍ a̍ kāŋnda̍ŋ, ī tīŋī kpi̍lo̍, nu̍a̍ā ŋ̄ chā āā bāsa̍bāsa̍kūēndo̍o̍ ni̍.

¹²Hɔ̄lta̍ŋ ndu̍ nu̍a̍ā ŋ̄ chā āā pīīŋāā pēē kɔ̍ŋgu̍a̍a̍ pu̍lu᷄ŋ o̍ mi̍li̍kīi̍ya᷄ŋ ni᷄ŋ, ma̍ wā ā hūmbū, ā lɛ̄ɛ̄nda᷄ŋ, nu̍a̍ā ŋ̄ chā āā yɔ̄lɔ᷄ŋ ba̍ā kāla᷄ŋ ni̍.[2]

¹³Kāŋgbāla̍ ndɔ̄la̍ŋ chūŋ kɛ̄ndɔ̄ɔ̍, nu̍a̍ā ŋ̄ chā āā kpe̍le̍ yɔ̄mīī chūŋ kɛ̄ndɛ̄i̍ ni̍. Chɔ̄chɔ᷄ŋ ndɔ᷄ŋ yēēlāa̍ nu̍a̍ā ŋ̄ chā pɔ̄mbīa̍ŋ ni̍, ŋ̄ līvɛ̍i̍ le̍nde̍ a̍ chūɛ̄īmā chūŋ kɛ̄ndɛ̄mā mɔ̍ɔ̄ wa̍ŋ.

¹⁴Bālā ndɔ̄la̍ŋ nāŋɔ̄ɔ̍, nu̍a̍ā chāā tīnda̍ īko̍o̍līi̍ kɛ̍ndɛ̄ kɛ̍ndɔ̄ɔ̍ ni̍, lā tōōsīāā le̍nde̍ a̍ pōū ko̍sa̍lɛ̍i̍tīi̍yo̍. Dīāllūŋ ndɔ᷄ŋ ni̍ŋgīli̍ nu̍a̍ā ŋ̄ chāā chīŋīī kāmɛ̄i̍ nda̍ bɛ̄ɛ̄ndi̍a̍a̍ ni̍ mi̍ ī wā ni̍ŋgīli̍, ŋ̄ bɛ̍ɛ̍ndīāā a̍ pōūtā ba̍ā kālālā sāfa̍lūɛ̄la̍ŋ.[3]

¹⁵Lɔ̄lūlā ndɔ̄la̍ŋ lā kɛ̄ndɛ̄ kpe̍ŋgbe̍le̍ŋ, nu̍a̍ā chāā sūŋgbu̍a̍ŋ nda̍ bɛ̄ɛ̄ndi̍a̍a̍ a̍ pōū ma̍bōō wo̍ ni̍, ma̍ sīmī ma̍ŋ o̍ nyɛ̄lā sīmīāālā nda̍ tōōsi̍a̍a̍ a̍ ko̍o̍līi̍yo̍ŋ nda̍ŋ ni᷄ŋ. Mɛ̄ɛ̍ pēmbūŋ vīlɛ̄īyo̍ŋ Le̍ba̍nɔ̄ŋ ŋ̍ cho̍ nu̍a̍ā wānā che᷅ mu̍ŋ pɛ̍, nyɔ̄ɔ̍ hɛ̄nāŋ nu̍m yɛ̍, le̍nde̍ o̍ cho̍ ni̍, mɛ̄ɛ̍ yɔ̄mīī si̍dāāve̍ Le̍ba̍nɔ̄ŋ i̍ cho̍ nu̍a̍ā, ī vīlɛ̄ī ī kɛ̄ndɛ̄ kɛ̍ndɛ̄ yɛ̍, le̍nde̍ o̍ cho̍ si᷄mnda̍ŋ ni̍.

¹⁶Sōndō ndɔ̄ɔ̍ yēēlāa̍ pīla̍ o̍ ye̍e̍la̍ le̍ wūɛ̄īyo̍ ni̍. Mbɔ̄ nyɛ̄ o̍ nyɛ̍ cho̍ a̍ ndu̍ o̍kɔ̄ɔ̄ ō hɛ̄nāŋ ya̍ bɔ̄ɔ̍. Mɛ̄ɛ̍ nu̍a̍ā wāna̍ ni̍ ya̍ I̍ ka̍a̍la̍ ho̍ō wɔ̍ ō chō ni̍, chūāā lāāndūa̍a̍ Chūlu̍sɛ̄lɛ̄m, nu̍a̍ā chāa̍ŋ nūu̍ ho̍ō ō chō ni̍.