Read Southern Kisi Chōndi̍i̍ Sɔ̍lɔ̍mɔ̄ŋ Nde̍ 7 Bible Online

Chōndi̍i̍ Sɔ̍lɔ̍mɔ̄ŋ Nde̍ 7 - Southern Kisi bible

Chōndi̍i̍ Sɔ̍lɔ̍mɔ̄ŋ Nde̍ 7

¹Pēlūŋ nūmndo̍ŋ ŋ̄ na᷄ŋ bɔ̄ɔ̍ o̍ kɔ̄vɛ̄i̍la̍ŋ ni᷄ŋ. Chūā lēmāsāa̍ kpe̍e̍kpe̍i̍ ŋ̄ chō ni̍. Vīsīo̍ŋ nu̍m ŋ̄ chɛ̄līchɛ̄līāā o̍ lɔ̄lūla̍ŋ mɛ̄ɛ̍ nda̍ tūūlā nyɛ̍ a̍ lābā, wānā che᷅ la̍ŋ nāŋɔ̄ɔ̍ pɛ̍ āā yɔ̄lɔ᷄ŋ ba̍ā kāla᷄ŋ ni̍.

²Pūle̍ŋ nu̍m lēkɛ̄ndɛ̄ ti̍u̍ māā tāālā. Mbɔ̄ māā mūɛ̄īmā kɛ̄ndɛ̄mā chu̍ū lēni᷄ŋ te̍ fɔ̍. Dēmbōo̍ nu̍m nu̍a̍ā ŋ̄ chā āā, wi̍tīi̍yo̍ŋ ŋ̍ cho̍ ku̍ndāa̍, ŋ̄ bālāā a̍ pɔ̄mbīa̍ŋ ni̍.

³Mɛ̄ɛ̄mā nūmnda̍ŋ mā pɔ̄mbɔ̄ le̍nde̍ nyɛ᷅ kɛ̄ndɛ̄ kɛ̍ndɛ̄. Mɛ̄ɛ̍ kīa̍la̍a̍ pɛ̍ndūa̍a̍ ā wā nu̍a̍ā dīo̍la̍ŋ o̍ pɔ̄mbīa̍ŋ ni᷄ŋ wānā che᷅ nda̍ pɛ̍ nyɔ̄ɔ̍ hɛ̄nāŋ nu̍m yɛ̍, le̍nde̍ mɛ̄ɛ̄mā nūmnda̍ŋ mā na᷄ŋ nūa̍a̍ ni̍.

⁴Kɛ̄se̍i̍ nu̍m ī vīlɛ̄ī nyɛ̄ kɛ̄ndɛ̄ cho̍nyā, mɛ̄ɛ̍ nda̍ bɛ̍ɛ̍ndīāā nu̍a̍ā fo̍ndā vīlɛ̄ī kɛ̄ndɛ̄ kɛ̍ndɔ̄ɔ̍ a̍ chīŋīī ka̍mɛ̍i̍ yɛ̍. Hɔ̄lta̍ŋ nu̍m ŋɛ̄lɛ̄ŋgi̍ ŋɛ̍lɛ̄ŋgi̍ nu̍a̍ā ŋ̄ chā āā pēēla̍ pɔ̍mbɔ̄la̍ŋ Hɛ̍si̍bɔ̄ŋ ni̍, pēēla̍ pɔ̍mbɔ̄la̍ cho̍ o̍ sāāsa̍ chīe̍e̍ tɔ̍ɔ̍ma̍ kōŋ īkɛ̄i̍ la̍ŋ. Mi᷄ŋndo̍ nu̍m nyɛ̄ kɛ̄ndɛ̄ cho᷅nya̍ mɛ̄ɛ̍ fo̍ndā vīlɛ̄īyo̍ Le̍ba̍nɔ̄ŋ o̍ cho̍ nu̍a̍ā, tē wānā che᷅ ndu̍ dɔ̍ɔ̍ pɛ̍ nyɔ̄ɔ̍ hɛ̄nāŋ nu̍m yɛ̍, fo̍ndā vīlɛ̍i̍ mu̍li̍ hɔ̄lla̍ kūmbū Dāma̍si̍kɔ̍ɔ̄ wo̍ wo̍.

⁵Bōlle̍ŋ nu̍m nyɛ̄ kɛ̄ndɛ̄ cho᷅nya̍ to̍fa̍ wɔ̍ ko̍ mɛ̄ɛ̍ Pēmbīī Ka̍mɛ̄lve̍ ī chō nu̍a̍ā tē wānā che᷅ ndi̍ pɛ̍ nyɔ̄ɔ̍ hɛ̄nāŋ nu̍m yɛ̍. Yīīŋnde̍ nu̍m ī dēlāā o̍ kɔ̄ɔ̄ pɔ̍, ī tīŋī kpi̍lo̍ ndu̍yɛ̍ mi̍ ī wā ŋɛ̄lɛ̄ŋgi̍ ŋɛ̍lɛ̄ŋgi̍ bɛ̍ndū. Māsā o̍ māsā bɛ̍ndū, te̍ ō chē nu̍m yīīŋīī kēŋ o̍ lēbōl pɛ̍, kɔ̄la̍ŋ kɔ̄llo̍ kūā ndu̍ o̍ nu̍mndo̍ ni̍, a̍ mɛ̄ɛ̍ i̍ na᷄ŋ yɛ̍.

⁶A̍ na̍ŋ ō bɔ̄ɔ̍ fɔ̍ chūa̍a̍, ndu̍yɛ̍ nāŋɔ̄ɔ̄ nūmndo̍ ō hīnī wa̍nā kɔ᷅l bɔ̄ɔ̍. I̍ hi̍ni̍ bɔ̄ɔ̍ kɔ᷅l a̍ kāālā nūmndo̍.

⁷Si᷄mnda̍ nu̍mnda̍ŋ nyɛ̄ kɛ̄ndɛ̄ sa̍kpō, nu̍a̍ā ŋ̄ chā āā wāūwo̍ ni̍. Mɛ̄ɛ̄ya̍ŋ nu̍m mā lānda᷄ŋ mɛ̄ɛ̍ kōmɔ̄ɔ̄ yɔ̄mndo̍ ō lāndūŋ nu̍a̍ā kpɔ̄ŋnjɔ̄la̍ŋ yɛ̍.

⁸Mi̍ di̍mī a̍a̍, “I̍ cho̍ wāūwo̍ ho̍ō hēlɔ̄ɔ̄, mī kɔ̍ ke̍ndī kpɔ̄ŋnjɔ̄la̍ ndɔ̄la̍ŋ nda᷅ŋ. Mbɔ̄ māā mɛ̄ɛ̄mā nu̍mnda̍ŋ mā yēēla̍ ya̍ o̍ sōndō mɛ̄ɛ̍ kīle̍pīi̍ya̍ŋ mā yēēla̍ nu̍a̍ā yɛ̍ fɔ̍. Mbɔ̄ māā hūēīyīi̍ fu̍lā nu̍m ni᷄ŋ nde̍ ī nɔ̍ chu᷅ŋ kɛ̄ndɔ̄ɔ̍ mɛ̄ɛ̍ a̍pɔ̄ɔ̄ wa̍ŋ mā nɔ̄ nu̍a̍ā chūŋ kɛ̄ndɔ̄ɔ̍ yɛ̍ fɔ̍.

⁹Sōndō nūmndo̍ ō na᷄ŋ wūɛ̄īyo̍ bɔ̄ɔ̍, nu̍a̍ā ŋ̄ chā āā mūɛ̄īmā kɛ̄ndɛ̄ kɛ̍ndīa̍ŋ ni̍.” Mɛ̄ɛ̍ mūɛ̄īmā kāla᷄ŋ mā kɔ̍ ni̍ko̍ sa̍kpō wāna̍ ni̍ ya̍ I̍ ka̍a̍la̍ wo̍ o̍ sōndō, mā kēēku̍ ndu̍ o̍ chɔ̄chɔ᷄ŋ a̍ o̍ chīŋndo̍ŋ ni᷄ŋ.

¹⁰Wāna̍ ni̍ ya̍ ka̍a̍la̍ wo̍ ndu̍ nɔ̍ ya̍ ni̍, ndu̍yɛ̍ ya̍ cho̍ hɛ̍na᷄ŋ ndɔ̄ɔ̍ ni̍.

¹¹Wāna̍ nī ka̍a̍lāa̍, hu̍ŋ ŋ̄ kɔ̄ŋnu̍ŋ ba᷅ yōndōo̍. Ŋ̄ kɔ̍ wa᷅ lūa̍a̍ŋ o̍ sɔ̄ndɔ̄kɔ̍lta̍ŋ.[6]

¹²Ŋ̄ pēna̍ la̍kɔ̍ŋnɔ᷄ŋ o̍ kpe̍le̍ mākīle̍pīi̍yo̍ ni᷄ŋ, mī ŋ̄ kɔ̍ chɔ᷅ ko̍ kīle̍pīi̍ya̍ŋ mā yāndu̍ ni᷅ŋ, mī ŋ̄ kɔ̍ to̍fā ko̍ mā kāndu̍ ni᷅ŋ yāndɔ̄ɔ̍, ko̍ pɔ̄mɛ̄ki̍la̍ne̍tīi̍ya̍ŋ bɛ̍ɛ̍ ma̍ yāndu̍ ni᷅ŋ. Lo̍ŋ ya̍ I̍ cho̍ lākɔ̄ nu̍m kāālā nūu̍ chɔ̄m ni̍.

¹³Yɔ̄mīī ma̍ndu̍lūe̍i̍ chu̍u̍lu̍ ve̍, ī chō chūŋ kɛ̄ndɔ̄ɔ̍ kpe̍e̍kpe̍i̍. Kōmɔ̄ɔ̄lā yēēlɛ̍i̍la̍ kɛ̍ndɛ̄ kɛ̍ndɛ̄la̍ŋ lā chō ni᷅ŋ na̍a̍ chūmndo̍ o̍ dīō. Wāna̍ ni̍ ya̍ ka̍a̍la̍ wo̍, I̍ kɛ̍su̍l nu̍m kōmɔ̄ɔ̄lā yēēlɛ̍i̍la̍ kɛ̄ndɛ̄ kɛ̍ndɛ̄la̍ŋ, lā tāse̍ ni̍ lā mɛ̄ɛ̄lāā ni̍.