Read Southern Kisi Chōndi̍i̍ Sɔ̍lɔ̍mɔ̄ŋ Nde̍ 8 Bible Online

Chōndi̍i̍ Sɔ̍lɔ̍mɔ̄ŋ Nde̍ 8 - Southern Kisi bible

Chōndi̍i̍ Sɔ̍lɔ̍mɔ̄ŋ Nde̍ 8

¹Ndu̍ o̍o̍ bɛ̍ndā bɔ̍ɔ̍ mī nūm o̍o̍ wa̍ yēma̍ nī, ō kāla̍ nūu̍ wɛ̄si̍ wo̍. Tē nūm o̍o̍ wa̍ le̍nde̍ pɛ̍, ya̍ i̍i̍ ko̍ma̍l nu̍m bɛ̍ɛ̍ o̍ lu᷅ŋ mī ya̍ i̍i̍ wu̍ɛ̍i̍ nu̍m sōndōo̍, wānā o̍ wānā ndu̍ o̍o̍ pɛ̍ɛ̍sā ya̍ le̍.

²I̍ wa̍ nu̍m chūā mī ya̍ i̍i̍ ku̍ɛ̄ a̍ nūm o̍ nde̍ nūu̍ lo̍ chi̍ɛ̍ī ni̍ŋ, kāla̍ ni̍ chɔ̍m ya̍ chi̍e̍ēŋndo̍ wo̍ o̍ ndu̍ lo̍ chi̍ɛ̍ī ni̍ŋ. I̍ wa̍ lākɔ̄ a̍ nūm lo̍ŋ mī ya̍ i̍i̍ kɔ̍ ke᷅ nu̍m mūɛ̄īmā kɛ̄ndɛ̄ kɛ̍ndīa̍ŋ, mūɛ̄īmā nī ma̍ māpɔ̄mɛ̄ki̍la̍ne̍tīi̍ya̍ŋ, mī nūm o̍o̍ ko̍l.

³Ŋ̄ chōnu̍ŋ i̍hi̍ni̍, mi̍ ya̍mbū ndu̍ bōlle̍ŋ o̍ bā ndɔ̄ mi̍āllo̍ chōo̍, mbo̍ kɔ̄ma᷄ŋ ya̍ a̍ bā ndɔ̄ kɛ̍ndɔ̄ɔ̍.

⁴Chūāā lāāndūa̍a̍ Chūlu̍sɛ̄lɛ̄m, yāndi̍i̍ lā chu̍e̍l la̍ būŋgɛ̄i̍, māā lā pa̍lā ni̍ŋ na̍a̍ o̍ kāālā nāa̍ ho̍ō ni᷄ŋ te̍.

⁵Chūā lāāndu̍ kūɛ̍ɛ̍nɛ̍ cho̍ yɛ̍ ho̍ō chɔ̄nɔ᷄ŋndo̍ bā po̍llo̍ mbo̍ wā hūnɔ̄ɔ̍, ma̍ sāāna᷅ŋ ba̍la̍ŋ nda̍ wāna̍ ndɔ̄ o̍ ka̍a̍la̍a̍? A̍ wa̍ īhīni̍ o̍ lūa̍a̍ŋ o̍ yɔ̄m a̍pɔ̄ɔ̄ wo̍ bɛ̄ŋgu̍ mi̍ ti̍ndī nu̍m. O̍ yɔ̄m kōŋ bɛ̄ŋgu̍ kālā nu̍m ō chūa̍ yo᷄l nu̍mndo̍ ni̍. Lo̍ŋ o̍ ve̍lū nu̍m ni̍.

⁶Dīōlā nīla̍ŋ lā wa̍ nu̍m o̍ kɔ̄l le̍ te̍le̍ŋ o̍ te̍le̍ŋ, lā wa̍ nu̍m o̍ kɔ̄l mɛ̄ɛ̍ wāŋndo̍ ō nɔ̄ nu̍a̍ā kēlɛ̄i̍ ta̍mbūe̍i̍ye̍ o̍ bā lɔ̄ɔ̍ yɛ̍. Mɛ̄ɛ̍ pīɔ̍mndo̍ ō chō nyɛ̄ kpāāyā bɛ̍ndū yɛ̍, le̍nde̍ ko̍ni̍ kāālāa̍ ō chō nyɛ̄ kpāāyā ni̍. Ndu̍yɛ̍ pāŋālā ndɔ̄ɔ̍, mɛ̄ɛ̍ sɛ̄īyo̍ ō wɔ̄u̍ nu̍a̍ā yɛ̍ le̍nde̍ o̍ wɔ̍u̍ ni̍. Mɛ̄ɛ̍ yīŋnde̍ŋ lē sāndū nu̍a̍ā yɛ̍, le̍nde̍ kāālāa̍ chō ni̍. Ō chō māchūāā mɛ̄ɛ̍ yīŋndē kpāāyāle̍ bɛ̍ndūle̍ŋ lē chō nu̍a̍ā yɛ̍.

⁷A̍ yɔ᷄ŋ bɛ̍ɛ̍ āā mɛ̄ŋnda̍ŋ o̍ Pēe̍ Mɛ̄ŋmā Īhɛ᷄llo̍ kpo̍u̍, mā nɔ̍lā yi᷅ŋndē kāālāāle̍ŋ nyūmī le̍. Mɛ̄ŋnda̍ŋ o̍ pēēla̍ŋ kpo̍u̍ mā chūūŋgi̍āŋ bɛ̍ɛ̍ na̍a̍ pi᷅lɛ̍, mā nɔ̍lā mī mā tōsa̍ mī kāālāa̍ ō lo̍ le̍. Ndu̍yɛ̍ ō cho̍ nyɛ᷅ wānā pe̍ndū le̍ o̍ cho̍ le̍, ā yɔ᷄ŋ bɛ̍ɛ̍ mā yɔ̍ŋgu̍ nyɛ̄ o̍ nyɛ̄ sɔ̄lāā ŋ̄ nɔ̄ o̍ nūmndo̍ chi̍ɛ̍ī ni̍ŋ, māmɔ̄ɔ̍ ko̍ni̍ wāŋnda̍ mām nu̍m ni̍.

⁸Ŋ̄ nɔ̄ yēma̍ nāā pɔ̍mbɔ̄ pīlɛ̍. Mɛ̄ɛ̄ya̍ŋ mā tūūnu̍ŋ ndɔ̍ bɛ̍ɛ̍ ndu̍ le̍. Chūāāmbɔ̄ɔ̍ ho̍ō tē wāŋndo̍ ō fūla̍ le̍ ndu̍ pɛ̍, le̍ mā cha᷄l nda̍ ndu̍, vɛ̄ɛ̍nɛ̍ na̍a̍ ŋ̄ chō yɛ̍ ndu̍ mālā?

⁹Tē ō wa̍ pɛ̍ kpa̍nda̍ma̍la̍ŋ māā kpākī, ŋ̄ chō ndu̍ bɛ̍ɛ̍ndīāā mɛ̄ɛ̍ nda̍ tāŋgu̍l nu̍a̍ā fo̍ndāŋndā vīlɛ̄īlā kālā ka̍lāla̍ŋ o̍ kpākīo̍o̍ a̍ ka̍ni̍i̍ hu̍mbūe̍i̍ kpo̍so̍ŋ yɛ̍. Kɛ̍ tē ō wa̍ pɛ̍ māā dīō kpākī, ŋ̄ chō ndu̍ bɛ̄ɛ̄ndīāā mɛ̄ɛ̍ nda̍ bɛ̄ɛ̄ndīāā nu̍a̍ā dīō yɔ̄m si̍dāā wo̍ nyɛ̄ kɛ̄ndɛ̄ kɛ̍ndɛ̄ yɛ̍.

¹⁰Le̍nde̍ ya̍ I̍ wa̍ŋnu̍ŋ kpa̍nda̍ma̍la̍ŋ ni̍, mɛ̄ɛ̍ kpākīo̍o̍ ō wā nu̍a̍ā yɛ̍. Kɛ̍ I̍ nɔ̍ ni᷅ŋ mɛ̄ɛ̄ya̍ŋ mɛ̄ɛ̍ fo̍ndāŋndā vīlɛ̄īlā kālā ka̍lāla̍ŋ lā wā nu̍a̍ā o̍ kpākīo̍o̍ yɛ̍. Ndu̍yɛ̍ wāna̍ ni̍ ya̍ I̍ ka̍a̍la̍ wɔ̍ ō hīni̍ kɔ̄l a̍ ya̍.

¹¹Māsāa̍ Sɔ̍lɔ̍mɔ̄ŋ ndu̍ o̍o̍ nɔ̍ kpe̍le̍ mākīle̍pīi̍ pi᷅lɛ̍, o̍ fo̍ndāŋ pīlɛ̍ dīōla̍ŋ āā Bāāl Ha̍mɔ̄ŋ. Mbo̍ kē wāŋnda̍ kpe̍lo̍o̍ ho̍ō le̍ mā wa̍ ndu̍ hɔ̄lte̍ŋ le̍ ndu̍. Wānāā o̍ ke̍ kpe̍lo̍o̍ ho̍ō wa̍ mbo̍ dīmūl nda̍ māā tē ā pīsi̍ kɔ̄mndē kpe̍lo̍o̍ ho̍ō ō chō sōlī le̍ŋ pɛ̍, māā wānā o̍ wānā ō nɔ̄ mbō chūu̍ ndu̍ ka̍ni̍ŋ hu̍mbo᷄ŋ wāa̍ ō pīlɛ̍ (1,000).

¹²Kɛ̍ ya̍ ya̍ kpe̍le̍ ni̍ mākīle̍pīi̍yo̍ ho̍ō, o̍ cho̍ ho̍ō le̍ ya̍ kɛ̍sɛ̍ kɛ̍sɛ̍ wo̍, le̍ ya̍ pīlɛ̍ kpe̍ o̍ cho̍ ni̍. Sɔ̍lɔ̍mɔ̄ŋ, nūm nūm chu̍a̍ ka̍ni̍ŋ nu̍m wāa̍ pi᷅lɔ̍ŋ, mī wānāa̍ cho̍ kpe̍lo̍o̍ māndāa̍ wa̍ nda̍ lōo̍ kɛ̄mɛ̄ lē di̍i̍ŋ di̍i̍ŋ (200) nda̍ŋ.

¹³Nya̍ cho̍ o̍ kpe̍le̍la̍ŋ ni᷄ŋ nda̍, Chāāŋāā nīa̍a̍ ā chō chūmndo̍ le̍ mā tūēī nya̍ sūɛ̍i̍. I̍ ye̍e̍ma̍ mī tu̍e̍ī nya̍ sūɛ̍i̍.

¹⁴Ke̍le̍ŋa̍ hu̍nɔ̄ɔ̄ wāna̍ nī ka̍a̍lāa̍ mɛ̄ɛ̍ kīa̍llo̍ ō kēlēŋā nu̍a̍ā yɛ̍. Ke̍le̍ŋa̍ pe̍le̍ŋgā pe̍le̍ŋgā mɛ̄ɛ̍ kīa̍l fɔ̍ŋndɔ̍ɔ̍ ō kēlēŋā nu̍a̍ā o̍ pēmbīī yɔ̄mīī chūŋ kɛ̄ndɛ̄i̍ chōo̍ yɛ̍.