Read Southern Kisi Āīsa̍yā 10 Bible Online

Āīsa̍yā 10 - Southern Kisi bible

Āīsa̍yā 10

¹Dɛ̍nɛ̍ pa̍lāa̍ chō le̍ nya̍ wāŋnda̍ ha̍ā, nya̍ cho̍ ha̍ā sāwāla̍ lāka̍fāla̍ŋ dɔ̄wɔ̄ɔ̍ le̍ wāŋnda̍ wa̍, nya̍ cho̍ ha̍ā sāwāla̍ŋ dɔ̄wɔ̄ɔ̍ le̍ mɛ̄ɛ̍ nya̍ lōōkū wa᷅ŋnda̍ nyɛ̄ pālāa̍ tūsī chōo̍ yɛ̍ wa̍.

²Le̍ wānāā tāmbɛ̍i̍ya̍ di̍la̍ ndāla̍ŋ tūŋɔ̄ɔ̍, ndu̍yɛ̍, wānāa̍ nɔ̍ nyɛ᷅ o̍ nyɛ̄ le̍ wa̍, mī lā tōsāl nda̍ ka̍fāla̍ŋ o̍ ko̍tīi̍la̍ŋ ni᷄ŋ. O̍ ko̍ŋ kɔ̍ɔ̍lī, wāŋ lāāndūāā pīāāndāā ndāa̍ ā vī wa̍, a̍ vi̍i̍ya̍ a̍ nɔ̍ lɛ̍ ŋ̄fi̍nyā le̍ wa̍, mī lā chɛ̄l mī wāŋnda̍ pōōndīāā nyɛ᷅m ndāa̍ŋ mā dīā mu̍ŋ o̍ ka̍fāla̍ŋ chōo̍, nyɛ̄ kōŋ nya̍ chō sāwāla̍ŋ nda᷅ŋ dɔ̄wɔ̄ɔ̍ ni̍.

³Nya̍ wāŋnda̍ ha̍ā, tē pāa̍le̍ dɛ̍nɛ̍ pa̍lāālē bɛ̍ndūle̍ŋ lē fūūlu̍u̍ pɛ̍, pāa̍le̍ kpūndɛ̍ bɛ̄ndu̍ cha᷅ŋ ni̍ŋ o̍ lɛ̄ŋndē lēvīlte̍ŋ ni᷄ŋ ndo̍ ō tūāl ni̍ŋ nya̍ chōo̍ le̍ŋ, ō yɛ̄ɛ̍nɛ̍ nya̍ yɔ̄ŋ yɛ̍ ni̍ŋ? Nāa̍ nɛ̄ɛ̍nɛ̍ chu̍a̍ nya̍ kūā yɛ̍ ni̍ŋ le̍ mbō māla̍ nya̍? Kūɛ̍ɛ̍nɛ̍ nya̍ mɛ̄ī yɛ̍ ni̍ŋ su̍ltā nyāla̍ŋ?

⁴Lā sɔ̍lā ni̍ŋ ma̍lā o̍ mālā o̍ pāa̍le̍ le̍ŋ chōo̍ le̍. Ā chō lākɔ̄ a̍ nya̍ o̍ bīyɔ̄ɔ̍ ni̍ŋ nya̍ wāŋnda̍ ā pīli̍a̍a̍, o̍ ko̍ŋ kɔ̍ɔ̍lī, nya̍ ā pūm nda̍, mā dīu̍ nya̍ o̍ sɔ̍ŋgɔ̄ɔ̍ ni̍ŋ. Ndu̍yɛ̍ ā yɔ̍ŋ bɛ̍ɛ̍ mī ke̍ŋ i̍ yɔ̍nu̍ŋ, tu̍mbe̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ a̍ nya̍ wo̍, kɔ̄l ndɔ̄ɔ̍ ō pɔ̍lūl lɔ̍ le̍. Bāa̍ wā wɔ̍ ndu̍ ō hēēlāā chōo̍ kɛ᷅ le̍ nya̍ chɔ̄ɔ̄lōo̍ sōŋɔ̄ɔ̍.

⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Dɛ̍nɛ̍ pa̍lāa̍ chō le̍ lɛ̄ŋndē Āsi̍i̍līāāle̍ŋ. Āsi̍i̍līāā o̍ cho̍ māchūāā ya̍ o̍ bā māā kpēlēŋkpēle̍ŋ, le̍ wānāā ya̍ I̍ dɔ̍u̍nu̍ŋ tu̍mbe̍ a̍ nda̍ wa̍ nyɛ̄ pālāa̍ tūsīo̍o̍ chōo̍ a̍ ndu̍.

⁶Wānāa̍ kɛ̍ɛ̍ ya̍ Mɛ̄lɛ̄ka̍, ma̍ tōsā mi̍ du̍a̍u̍nu᷄ŋ tu̍mbe̍ a̍ nda̍ wa̍, Āsi̍i̍līāā ya̍ I̍ ve᷅m ni̍, le̍ mbō kɔ̍ chi᷅ŋa̍la᷅ŋ nda̍. I̍ ve᷅m Māsāa̍ Āsi̍i̍līāā nda̍ pūa̍a̍ ndūa̍a̍ chɔ̄ūwa̍, le̍ mā kɔ̍ pu̍ŋgā nyɛ̄ o̍ nyɛ̍ wāŋnda̍ ha̍ā ā nɔ̄, ndu̍yɛ̍ mā pōōndi̍a̍a̍ nyɛ̄m nda᷄ŋ, o̍ ko̍ŋ kɔ̍ɔ̍lī, mā fūli̍ nda̍ a̍ nda̍ nyɛ̄ pālāa̍ tūsīo̍o̍ chōo̍, mɛ̄ɛ̍ nda̍ kpāātīāā nu̍a̍ā lōōlīo̍o̍ yɛ̍.”

⁷Kɛ̍ Māsāa̍ Āsi̍i̍līāā o̍ cho̍ bɛ̍ɛ̍ si̍nā māā ya̍ le̍ ve᷅m nda̍ vīōmɔ̄ɔ̄ kōŋ te̍. Yīya᷄ŋ ko̍ŋ bɛ̍ɛ̍ o̍ cho̍ ndu̍ o̍ kɔ̄l te̍. Tūu̍ cho̍ ndu̍ o̍ kɔ̄l tu̍ŋ ndo̍, māā le̍ mbō tɛ̄ɛ̄mbu̍u̍ wāŋndā chīe̍e̍ya̍, ndu̍yɛ̍ mbo̍ chīi̍ a̍ lɛ̄ŋīī fāŋgā fa̍ŋgā.

⁸Ō chō hēēlɔ᷄ŋndo̍ kpe̍e̍kpe̍i̍ mbō dīmī āā, “Pūa̍a̍ cho̍ pūa̍a̍ nīa̍a̍ chɔ̄ūwa̍ bōlle̍ wa̍ kpo̍u̍, sɔ̍ŋgɔ̍ Māsāā bɛ̍ndūa̍a̍ ko̍ni̍ nda̍ chō ni̍.

⁹Chi̍o̍o̍ŋ mu᷅ŋ ki̍nɛ̍i̍, mu̍ŋ yɔ̍nūŋ ni̍ māā Ka̍a̍nɔ̄, a̍ Kāāchɛ̄mi̍sī, a̍ Ha̍ma̍tī, a̍ A̍pa̍a̍dī, mi̍ nɔ̍lā mi̍ ya᷅m mu̍ŋ kpo̍u̍. Sāme̍e̍līāā nda̍ Dāma̍si̍kɔ̍ɔ̄ bɛ̍ɛ̍ le̍nde̍ ko̍ni̍ ya̍ I̍ ye᷅m nda̍ ni̍.

¹⁰Lɛ̄ŋīi̍ nɔ̍ mɛ̄lɛ̄ka̍a̍ chēle̍ŋnda̍ ta̍u̍ ta̍u̍ ve̍, mi̍ nɔ̍lā mi̍ ya᷅m ndi̍. Mɛ̄lɛ̄ka̍a̍ yɛ̍ yi̍a̍a̍ wa̍ o̍ lɛ̄ŋnde̍ he̍ī ni᷄ŋ nda̍, ā hīōū mɛ̄lɛ̄ka̍a̍ cho̍ Chūlu̍sɛ̄lɛ̄m a̍ Sāme̍e̍līāā wa̍ po̍lo̍ŋ.

¹¹Mɛ̄ɛ̍ ya̍ I̍ ye᷅m Sāme̍e̍līāā a̍ mɛ̄lɛ̄ka̍a̍ ndūa̍a̍ lātūlu̍ yɛ̍, le̍nde̍ ko̍ni̍ ya̍ I̍ cho̍ Chūlu̍sɛ̄lɛ̄m yōmɔ̄ɔ̄ a̍ nyɛ̄m nda̍ sōōlūū wo̍ŋ ni̍.”

¹²Kɛ̍ Māsānɔ̄ɔ̍ Mɛ̄lɛ̄ka̍ dīmi̍ āā, “Tē I̍ chi̍i̍ nyɛ̄ ya̍ I̍ kɛ̍ɛ̍si̍a̍a̍ le̍ tōsāa̍ o̍ Pēmbīī Sa̍a̍yɔ̄ŋnde̍ chōo̍ a̍ Chūlu̍sɛ̄lɛ̄m chi̍e̍e̍ wo̍ pɛ̍ kpo̍u̍, le̍ hēēlɔ᷄ŋ bɛ̍ndū Māsāa̍ Āsi̍i̍līāā o̍ cho̍ ko̍ŋ mbo̍ wā yōŋgāa̍ sūɛ̍i̍ yo̍, mɛ̄ɛ̍ mī tu̍si̍ ndu̍ nyɛ̄ pālāa̍ chōo̍.”

¹³Māsāa̍ Āsi̍i̍līāā o̍ cho̍ yōŋgāa̍ kīōlɔ̄ɔ̍ mbō dīmī āā, “Sɔ̄ɔ̍ŋ mu᷅ŋ kpo̍u̍, o̍ kpāāya̍ nūu̍ ni᷄ŋ ya̍ I̍ to̍sa̍ mu̍ŋ ni̍. I̍ nɔ̍ bɔ̄ɔ̍ tāāsi̍o̍o̍ a̍ kɔ̄l kālo̍o̍. Lɛ̄ŋīī bɔ̄ɔ̍ bɔ̍ɔ̍ mi̍ nɔ̍lā mi̍ ya᷅m ndi̍, ndu̍yɛ̍ mi̍ pōōndīāā sūltā ndāla̍ŋ kpo̍u̍. A̍ kpāāya̍ ni̍ bɛ̍ndōo̍, mi̍ nɔ̍lā mi̍ tu̍sī Māsāa̍ wa̍ o̍ lɛ̄ŋīī kēŋ ni᷄ŋ nda̍ o̍ kpe̍ŋgbe̍i̍la̍ ndāla̍ lēmāsāla̍ŋ chōo̍.

¹⁴Sūltā wa̍ o̍ lɛ̄ŋnde̍ he̍ī ni᷄ŋ nda̍ŋ kpo̍u̍, mi̍ so̍o̍lūū la̍ŋ mi̍ ku̍a̍ŋnu᷄ŋ a̍ la̍ŋ, mɛ̄ɛ̍ wāŋndo̍ ō kōmāl nu̍a̍ā pēltā yōūwo̍ o̍ wāa̍ŋnde̍ŋ ni᷄ŋ mbō sōōlu̍u̍ la̍ŋ mbō kūɛ̄nu᷄ŋ a̍ la̍ŋ yɛ̍. Mɛ̄ɛ̍ yōūwa̍ ā dūāū nu̍a̍ā mā mɛ̄i̍ pēltā lāŋ mī wāŋnda̍ hu᷄ŋ so̍o̍lūū la̍ŋ yɛ̍, le̍nde̍ ya̍ I̍ so̍o̍lu̍u̍ sūltā wa̍ o̍ lɛ̄ŋnde̍ ni᷄ŋ kpo̍u̍ la̍ŋ ni̍ mi̍ ku̍a̍ŋnu᷄ŋ a̍ la̍ŋ. I̍ chi̍i̍ la̍ŋ sōōlūū kpo̍u̍ wāŋndo̍ bɛ̍ɛ̍ kpe̍ŋa̍ ya̍ le̍, kɛ̄lɛ̄ŋgāā le̍ mī wāŋndo̍ chūa̍ sōndōo̍ mbō sōō.”

¹⁵Kɛ̍ ndu̍yɛ̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ Māsāa̍ Āsi̍i̍līāā o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, “Mɛ̄ɛ̍ o̍ mɛ̄ɛ̍ chūe̍i̍ ī lūɛ̍i̍, ī nɔ᷅ kpāāyāā mī ī hīōū wāna̍ i̍ cho̍ o̍ bā wo̍ le̍. Su̍ɛ̍īyo̍, ō cho̍ o̍ bɛ̄ndū mbō hīōū wāna̍ cho̍ wa̍llo̍ a̍ ndu̍ wo̍ le̍. Yɔ᷄m cho̍ wāŋndo̍ ō bā māā tīnda̍ wo̍, ō nɔ᷅ kpāāyā wāna̍ o̍ cho̍ o̍ bā wo̍ chōo̍ le̍. Yɔ̄m bīŋgi̍ nɔ̍ mbō wa̍ wāŋndo̍ o̍ bā wo̍, o̍ cho̍ yɔ̍m kōŋ te̍ o̍ nɔ̍ mbō chūa̍ wānā ko̍ŋ te̍, wānā ko̍ŋ chu̍ā ndu̍ ni̍.”

¹⁶Le̍ yōŋga̍ Māsāa̍ Āsi̍i̍līāā o̍ cho̍ sūɛ̍i̍ yo̍, Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍, o̍ cho̍ pūa̍a̍ chɔ̄ūwa̍ Āsi̍i̍līāā, a̍ cho̍ŋnu̍ŋ ha̍ā o̍ dīāllūŋ nda᷄ŋ ni᷄ŋ nyɛ̍ kɛ̄ndɛ̄ kɛ̍ndɛ̍ī ya̍ nāā wɔ̄ɔ̍ŋ bɛ̄ndōo̍ tūsī chōo̍. Nyɛ̄ nɛ̄īyāā wa̍ ni̍ŋ o̍ dīāllūŋ ndāa̍ŋ ni᷄ŋ ndo̍, ō wā ni̍ŋ ma̍wa̍ā mɛ̄ɛ̍ yīŋnde̍ŋ lē lūāālūāā nu̍a̍ā o̍ nyɔ̄ɔ̍ ni᷄ŋ yɛ̍.

¹⁷Mɛ̄lɛ̄ka̍, o̍ cho̍ nyɛ̄ wa̍wo̍ŋndo̍ le̍ I̍sɔ̄lūɛ̄ī yo̍, ō chō hūnɔ̄ɔ̄ sīmnɔ᷄ŋ yi᷅ŋnde̍ŋ le̍ nda̍ tɛ̄ɛ̄mbūūwo̍. I̍sɔ̄lūɛ̍i̍ya̍, Mɛ̄lɛ̄ka̍ nda̍ di̍a̍ndāa̍ ō chō sīmnɔ᷄ŋ yi᷅ŋndē wūle̍ wu᷅le̍ le̍bɛ᷅ŋnde̍ŋ le̍ nda̍ chīīyo̍. Ō chō nda̍ tɛ̄ɛ̄mbūū o̍ pāa̍le̍ŋ lē pīlɛ̍ ni᷄ŋ kpe̍, mɛ̄ɛ̍ yīŋnde̍ŋ lē tɛ̄ɛ̄mbūū nu̍a̍ā bīl vēsɛ̍i̍yo̍ a̍ yɔ̄mīī ŋ̄yūɛ̄ī vēsɛ̍i̍ye̍ yɛ̍.

¹⁸Būndɛ̍la̍ kɛ̍ndɛ̄ kɛ̍ndɛ̄lā tɔ̄nɔ̄la̍ŋ kpo̍u̍, a̍ fo̍ndāŋndā tōsāā ŋ̄chīɛ̄ɛ̄la̍ŋ, Mɛ̄lɛ̄ka̍ Ya̍a̍wɛ̄ɛ̄ o̍ cho̍ la̍ŋ tɛ̄ɛ̄mbūū kpo̍u̍. Mɛ̄ɛ̍ nāa̍ ō lō nu̍a̍ā wāŋndo̍ sɔ̄ɔ̄sīa̍a̍ mbō tɛ̄ɛ̄mbu̍u̍ ndu̍ dīāllo̍ŋ kpo̍u̍ yɛ̍, le̍nde̍ i̍ yɔ̍nūŋ ni̍ŋ ni̍.

¹⁹Būndɛ̍la̍ cho̍ lā pīāā a̍ yɔ̄mnde̍ la̍ŋ, yɔ̄mīī lo᷅ ni̍ŋ i̍si̍si̍ le̍ni̍ŋ nde̍, chūāāmbɔ̄ pɔ̄mbɔ̄ɔ̍ bɛ̍ɛ̍ ō nɔ̄lā ni̍ŋ mbō chɔ᷄m ndi̍ mɛ̄ɛ̍ i̍ cho̍ bōllē pīlɛ̍ yɛ̍.

²⁰A̍ te̍le̍ŋ ko̍ŋ, wāŋnda̍ ā ti᷄ŋ ā lō ni̍ŋ yo̍o̍mū I̍sɔ̄lūɛ̄ī, nda̍ yɔ̍nūŋ ni̍ māā yu̍ŋgu̍ Che̍kɔ̍pū wo̍. Wānāa̍ lo᷅ ni̍ŋ ka̍ŋ yōōmū wa̍, te̍le̍ŋ cho̍ fūūlūū a̍ hi̍ū lɛ̍ ni̍ŋ la̍chi̍ a̍ lɛ̄ŋnde̍ ye᷅m nda̍ ma̍ wā le̍ŋ o̍ bā bɛ̄ŋgu̍ le̍ŋ tīīnda᷄ŋndo̍ le̍. Ā hūŋ ni̍ŋ mā hu᷄ŋ dɔ̍ū tīīnda᷄ŋ ndāa̍ kpe̍e̍kpe̍i̍ o̍ Mɛ̄lɛ̄ka̍ Ya̍a̍wɛ̄ɛ̄ ni᷄ŋ, I̍sɔ̄lūɛ̍i̍ya̍ Mɛ̄lɛ̄ka̍ ndā di̍a̍ndāa̍.

²¹Wānāa̍ lo᷅ ni̍ŋ ha̍ā yōōmū o̍ pūlāle̍ Che̍kɔ̍pūle̍ŋ chōo̍ wa̍, ā chō vɛ̄lɛ̄ hūnɔ̄ɔ̄ mīīŋgū Mɛ̄lɛ̄ka̍ kpāāyā bɛ̍ndōo̍ o̍ ībūŋ.

²²Wāŋnda̍ I̍sɔ̄lūɛ̄ī, mi̍ chē bɛ̍ɛ̍ mi̍ lā wā fāŋgā ha̍a̍a̍, mɛ̄ɛ̍ si̍o̍ōŋnde̍ ī wā nu̍a̍ā o̍ pīo̍o̍ kɔ̄ŋgɔ̍ yɛ̍, le̍nde̍ nya̍ chō ni̍, wānā chi̍ī nya̍ chɔ̄m te̍, kɛ̍ wāŋnda̍ nyɛ̄ pɔ̄mbɔ̄ ko̍ni̍ a̍ lo᷅ ni̍ŋ yo̍o̍mū nya̍ chōo̍ ni̍, mā mīīŋgu̍ Mɛ̄lɛ̄ka̍ Ya̍a̍wɛ̄ɛ̄ o̍ ībūŋ. Mɛ̄lɛ̄ka̍ chīi̍ kɛ̄ɛ̄sīāā le̍ lɛ̄ŋnde̍ŋ nde᷅ŋ kpo̍u̍ tɛ̍ɛ̍mbūūwo̍. Ndu̍yɛ̍ o̍ nɛ̄i̍ tōnya̍a̍ cho̍o̍ kpe̍e̍kpe̍i̍ o̍ cho̍ le̍ŋ tɛ̄ɛ̄mbūū ni̍.

²³Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍ ō chō hūnɔ̄ɔ̄ lɛ̄ŋnde̍ŋ nde᷅ŋ kpo̍u̍ tɛ̍ɛ̍mbūū, mɛ̄ɛ̍ o̍ di̍mi̍ yɛ̍, mbō chīi̍ a̍ le̍ŋ lɛ᷅ŋndē o̍ chi̍e̍ēŋndo̍ ni᷄ŋ tɛ̍ɛ̄ŋ.

²⁴Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍ ō dīmi̍ wo̍ cho̍ ho̍ō ni̍. Ō dīmi̍ āā, “Nya̍ wānāā nīa̍a̍ cho̍ Sa̍a̍yɔ̄ŋ chi̍e̍e̍ wa̍, sīōōŋīī bi̍ī nya̍ le̍ Āsi̍i̍līāŋnda̍ le̍. Mi̍ chē bɛ̍ɛ̍ ma̍ wā nya̍ nyɛ̄ pālāā bɛ̄ndōo̍ tūsīo̍o̍ chōo̍ mɛ̄ɛ̍ wāŋnda̍ I̍chi̍pī a̍ tu̍si̍ nya̍ nyɛ̄ pālāa̍ chōo̍ yɛ̍, kɛ̍ lā yɔ᷅ŋ īsīōōŋ te̍.

²⁵Tu̍mbe̍ ya̍ I̍ dɔ̍u̍nu᷄ŋ a̍ nya̍ wo̍, ō be̍ndu̍ lɛ̍ ni̍ŋ a̍ ti᷅ŋ te̍, mī nyɛ̄ o̍ nyɛ̄ chūū ya̍ o̍ kɔ̄l. I̍ cho̍ hūnɔ̄ɔ̄ tu̍mbe̍ nūu̍ mīŋgī a̍ wāŋnda̍ Āsi̍i̍līāā, ndu̍yɛ̍ mī hu̍ŋ tɛ̍ɛ̍mbūū nda̍.”

²⁶Ya̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍ chō nda̍ hūnɔ̄ɔ̄ sōŋɔ̄ɔ̍ a̍ kpātōōlē ndɔ̄le̍ŋ mɛ̄ɛ̍ ya̍ so᷅ŋ wāŋnda̍ Mi̍dīāŋ o̍ pōūwo̍ O̍lu̍ɛ̍bī yɛ̍. I̍ chō nda̍ hūnɔ̄ɔ̄ chīī mɛ̄ɛ̍ o̍ chi̍i̍ sīndɛ̄ wāŋnda̍ I̍chi̍pī o̍ pēēlo̍ yɛ̍, bōōndi̍i̍ ya̍ I̍ yu̍lū sīndɛ̄ tīnda̍ nūu̍ o̍ mɛ̄ŋnda̍ŋ chōo̍, mi̍ mɛ̄ŋnda̍ŋ mā kūmbū wāŋnda̍ I̍chi̍pī ve̍.

²⁷Tē te̍le̍ŋ ko̍ŋ ō fūūlu̍u̍ pɛ̍, nyɛ̄ kīndīlāā o̍ nyɛ̄ kīndīlāā wāŋnda̍ Āsi̍i̍līāā a̍ cho̍ nya̍ hāndɔ̄ɔ̍ chōo̍, ō chō hūnɔ̄ɔ̄ fāŋa᷄ŋ. Wōlɔ̄ɔ̄ o̍ wōlɔ̄ɔ̄ lūsu̍lɛ̍i̍ nda̍ hāndu̍ nya̍ o̍ lēbōl, ō chō nya̍ fāŋa᷄ŋ o̍ lēbōl.

²⁸Pūa̍a̍ chɔ̄ūwa̍ Āsi̍i̍līāā a̍ cho̍ hūnɔ̄ɔ̍ kpe̍e̍kpe̍i̍. Ā bīī ni᷅ŋ E̍yāī chi̍e̍e̍. Ā kēēku̍ a̍ Mi̍ki̍lɔ̄ŋ chi̍e̍e̍ ma̍ wā hūnɔ̄ɔ̍. Ā kɛ̄si̍ wōlɔ̄ɔ̄lā ndāla̍ŋ Mīkīma̍sī chi̍e̍e̍.

²⁹Ā kēēku̍ a̍ nāa̍ ta̍ŋāa̍ ma̍ tāŋ. Nyūmnda̍ŋ mā bīīlu̍l nda̍ Ɛ̄sīɔ̄ŋkɛ̍bɛ̄ chi̍e̍e̍ ma̍ wā lūa̍a̍ŋ ndo̍ŋ. Wānāa̍ cho̍ Lu̍a̍mā chi̍e̍e̍ wa̍ kpo̍u̍ sīōōŋīī bɛ̄ndūe̍i̍ bīī nda̍. Wāŋnda̍ Ki̍bīāā, o̍ Sɔ̍ɔ̄ lo̍ chi̍e̍e̍ kpo̍u̍ ā pīɔ̍l.

³⁰Wāŋnda̍ Ba̍tī Ka̍līm, lā cha᷄ŋ cho̍o̍ cho̍o̍ kpe̍le̍ŋ. Wāŋndā La̍i̍sī, nīla̍ŋ lā wa̍ nya̍ chōo̍ cho̍o̍. Wāŋnda̍ A̍na̍tɔ̍tī, nya̍ bɛ̍ɛ̍ lā wa̍ ni̍ko̍ ye̍ke̍ŋ.

³¹Wāŋnda̍ Mādīmɛ̍nāā chi̍e̍e̍ kpo̍u̍ ā nyāānu̍ŋ. Wāŋnda̍ Kɛ̍bīm chi̍e̍e̍ kpo̍u̍ ā pīɔ̍l.

³²Ya̍a̍mɔ̍ɔ̍wa̍ fūūlu̍u̍ hāū Nɔ̍bī chi̍e̍e̍. Ā chō Pēmbīī Sa̍a̍yɔ̄ŋnde̍ kɔ̄ŋgɔ̄la᷄ŋndo̍ lo̍ŋ kpe̍e̍kpe̍i̍, ndu̍ yɔ̍nūŋ māā Chūlu̍sɛ̄lɛ̄m chi̍e̍e̍ ni̍.

³³Kɛ̄ ndu̍yɛ̍ lā cha᷄l mī lā tōfa̍. Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō chō nda̍ hūnɔ̄ɔ̄ yɛ̄ɛ̄mbūū lɛ̄ŋ kpo̍u̍ a̍ kpāāya̍ ndɔ̄ bɛ̍ndōo̍, mɛ̄ɛ̍ nda̍ kīīŋūū nu̍a̍ā yɔ̄mnde̍ mā yɛ̄ɛ̄mbu̍u̍ ndi̍ yɛ̄. Pūa̍a̍ ndāa̍ kpāāyāā bɛ̍ndūa̍a̍, ō chō nda̍ hūnɔ̄ɔ̄ yɛ̄ɛ̄mbūū lɛ̄ŋ kpo̍u̍. Pūa̍a̍ ndāa̍ tɔ̍ɔ̍wa̍a̍ bɛ̍ndūa̍a̍ kpo̍u̍, ā chō wā ā yɛ̄ɛ̄mbāā lɛ̄ŋ.

³⁴Mɛ̄ɛ̍ nda̍ kīīŋūū nu̍a̍ā yɔ̄mnde̍ o̍ būndɔ̍ɔ̍ ni᷄ŋ a̍ chūe̍i̍ mā yɛ̄ɛ̄mbu̍u̍ ndi̍ yɛ̄, le̍nde̍ o̍ yɛ̍ɛ̍mbūū ni̍ŋ nda̍ lɛ̄ŋ kpo̍u̍ ni̍. Mɛ̄ɛ̍ yɔ̄mīī kɛ̄ndɛ̄ kɛ̄ndɛ̄ī bɛ̄ndūe̍i̍ Le̍ba̍nɔ̄ŋ i̍ wa᷅ nu̍a̍ā i̍ yɛ̄ɛ̄mbāā lɛ̄ŋ yɛ̄, le̍nde̍ Mɛ̄lɛ̄ka̍ kpāāyā bɛ̍ndōo̍ ō yɛ̄ɛ̄mbūū ni̍ŋ nda̍ ni̍.