Read Southern Kisi Āīsa̍yā 11 Bible Online

Āīsa̍yā 11 - Southern Kisi bible

Āīsa̍yā 11

¹Yu̍ŋgu̍ lēmāsa̍ Dēēvi̍o̍o̍ ō chō ni᷅ŋ māchūāā mɛ̄ɛ̍ nda̍ kīālū nu̍a̍ā yɔ̄mndo̍ mī chīīye̍ lo̍ yɛ̄. Kɛ̍ ndu̍yɛ̍ mɛ̄ɛ̍ chīyīī yɔ̄mndo̍ ī pīɔ̄l nu̍a̍ā mī ī sīmnu᷄ŋ yɔ᷅mndo̍, mī yɔ̄m kōŋ ō sōli̍ lɛ̄ūwo̍ŋ yɛ̍, le̍nde̍ Māsā sɛ̍nɛ̄ī chēle̍ŋ ō fūlā ni̍ŋ o̍ pūlāle̍ Dēēve̍le̍ŋ chōo̍ ni̍.

²Ndu̍yɛ̍ Māsā ko̍ŋ, Nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō wā ni̍ŋ ndu̍ kɔ̄ɔ̄lī, mī nyi̍nā kōŋ tōsa̍ mbō nɔ̄ sīnā pɛ̄ŋgo̍o̍, a̍ dɛ̍nɛ̍ si̍nāa̍, a̍ tāāsi̍o̍o̍, a̍ kpāāyāa̍. Nyi̍na̍ Mɛ̄lɛ̄ka̍ kōŋ chō tōsā mbō sīna̍ a̍ Mɛ̄lɛ̄ka̍ Ya̍a̍wɛ̄ɛ̄ o̍kɔ̄ɔ̄, ndu̍yɛ̍ mbō nɔ̄ sīōōŋīi̍ Mɛ̄lɛ̄kɛ̍i̍.

³Ndu̍yɛ̍ le̍ te̍le̍ŋ o̍ te̍le̍ŋ ō wā ni̍ŋ a̍ kɔ̄l kɛ̄ndɛ̄ le̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ndu̍ wo̍ tōsāa̍. Māsāa̍ ho̍ō, ō ki̍lūl ni̍ŋ wa᷅ŋnda̍ īyāma̍ a̍ nyɛ̄ o̍ che᷅ a̍ hɔ̄ltā ndɔ̄la̍ŋ ndo̍, kɛ̄lɛ̄ŋgāā a̍ nyɛ̄ o̍ tu̍e̍ī a̍ nīlā ndɔ̄la̍ŋ ndo̍ le̍.

⁴Ō chō wānāā tāmbɛ̍i̍ya̍ yāma̍ŋ kīlūl o̍ nɛ̄ī sa̍kpō ndu̍yɛ̍, wānāā bā hāvɛ̍i̍ya̍a̍ cho̍ o̍ lɛ̄ŋnde̍ŋ nde᷅ŋ ni᷄ŋ nda̍, mbō tōsa̍ mā wa̍ di̍la̍ ndāla̍ŋ sɔ̄lāa̍ o̍ sɔ̄ɔ̍ŋ ni᷄ŋ. Dīōmnda̍ fu̍lā ni̍ŋ ndu̍ o̍ sōndō la̍ŋ, lā tōsā ni̍ŋ mī wāŋnda̍ o̍ chi̍e̍ēŋndo̍ ni̍ŋ a̍ sɔ̍la̍ dɛ̍nɛ̍ pa̍lāā bɛ̄ndōo̍, ndu̍yɛ̍ wānāā dɛ̍nɛ̍ wɔ̍ɔ̍ŋnda̍ kpo̍u̍ mbō dīu̍ nda̍ a̍ hūēīye̍ ndu̍ o̍ sōndō.

⁵Tōnya̍a̍ ndu̍ wa᷅ ni̍ŋ ma̍wa̍ā māā yāu̍le̍ ndɔ̄, le̍ kānda᷄ŋndo̍ o̍ chāŋ, o̍ ko̍ŋ kɔ̍ɔ̍lī, mī sa̍kpōyɛ̍i̍ ndi̍ wa̍ māā kōla̍ ndɔ̄ i̍pɛ̍ŋgɛ̍ le̍ kānda᷄ŋndo̍ o̍ būŋgɛ̄ī tɛ̄ɛ̄ŋnde̍ o̍ dōmāa̍ chōo̍.

⁶A̍ te̍le̍ŋ ko̍ŋ, kɔ̄l nyūlōo̍ ō wā ni̍ŋ o̍ chi̍e̍ēŋndo̍ ni᷄ŋ ha̍a̍a̍, vīsīāā bīyāa̍ nda̍ sāa̍ ā wānūŋ ni̍ŋ na̍a̍ pi᷅lɛ̍ o̍ ko̍ŋ kɔ̍ɔ̍lī, mī tāmbi̍lla̍ nda̍ chūīŋnda̍ ā hīni̍ŋ na̍a̍ pi᷅lɛ̍, ō pīlɛ̍ bɛ̍ɛ̍ nye̍sū cha̍a̍ŋ ndɔ̍ le̍.

⁷Nāūwa̍ nda̍ su̍lu̍ku̍a̍a̍, ā wā ni̍ŋ di̍o̍la̍ŋ nāa̍ pi᷅lɛ̍, ndu̍yɛ̍ chūāūwāā ndāa̍ vēllāa̍ vēllē, ā wānūŋ ni̍ŋ i̍hi̍ni̍ pi̍su̍lta̍ŋ. Kpɔ̍kūŋnda̍ a̍ wā ni̍ŋ bi᷅llo̍ dīo̍o̍ mɛ̄ɛ̍ nāūwa̍ ā dīā nu̍a̍ā yɛ̍.

⁸Chɛ̄lɛ̄kpɛ̍ le̍ndōo̍ ō wā ni̍ŋ pi̍su̍lta̍ŋ o̍ so̍o̍ŋ yɛ̍lɔ̄ɔ̍ ō chō lēni᷄ŋ ndo̍ īkɛ̄i̍, yɛ̍lɛ̄ kōŋ ō yɔ᷅ŋ ndu̍ nyɛ̄ o̍ nyɛ̄ le̍. Chūāāmbɔ̄ pɔ̄mbɔ̄ɔ̍ ō wōū ni̍ŋ ba̍a̍ kɛ̄ū wɔ̄ɔ̍ŋ wɔ̄ɔ̍ŋndo̍ o̍ sōndō, kɛ̄ū kōŋ ō yɔ᷅ŋ ndu̍ nyɛ̄ o̍ nyɛ̄ le̍.

⁹O̍ pēmbīī dīāndɛ̄i̍ Mɛ̄lɛ̄ka̍ Ya̍a̍wɛ̄ɛ̄ ve̍ chōo̍ kpo̍u̍, nyɛ̄ o̍ nyɛ̄ ve᷅ ni̍ŋ lo̍ŋ mbō yɔ᷄ŋ chāa̍ŋ ndɔ̍ nyɛ̄ le̍, kɛ̄lɛ̄ŋgāā le̍, mī nyɛ̄ o̍ nyɛ̄ tɛ̄ɛ̄mbu̍u̍ chāa̍ŋ ndɔ̍. Mɛ̄ɛ̍ mɛ̄ŋnda̍ŋ mā chō nu̍a̍ā ta̍u̍ ta̍u̍ o̍ pēe̍ mɛ̄ŋmā īhɛ᷄llo̍ yɛ̍, le̍nde̍ sīnā pɛ̄ŋgu̍ wāŋnda̍ nɔ̄ ni̍ŋ a̍ Mɛ̄lɛ̄ka̍ Ya̍a̍wɛ̄ɛ̄ o̍kɔ̄ɔ̄ wo̍ ō wā ni̍ŋ ta̍u̍ ta̍u̍ o̍ chi̍e̍ēŋndo̍ ni᷄ŋ ni̍.

¹⁰Te̍le̍ŋ cho̍ fūūlūū, Māsā sɛ̍nɛ̄i̍ fu̍lā ni̍ŋ o̍ yu̍ŋgu̍ lēmāsa̍ Dēēvi̍o̍o̍ chōo̍ wo̍, o̍ wā ni̍ŋ ma̍wa̍ā māā tāāmāsi̍ le̍ wāŋndā o̍ lɛ̄ŋnde̍ ni᷄ŋ. Wāŋnda̍ o̍ lɛ̄ŋnde̍ ni᷄ŋ a̍ hu᷅ŋ ni̍ŋ mā hu᷄ŋ chu̍ūŋgi̍āŋ nāa̍ pi᷅lɛ̍ nāa̍ o̍ wa᷅ ni̍ŋ nda̍. Ndu̍yɛ̍ fo̍ndā o̍ wa᷅ ni̍ŋ ndo̍, ō wā ni̍ŋ fo̍ndā lēbɛ̄ɛ̄ bɛ̄ndū.

¹¹Tē te̍le̍ŋ ko̍ŋ ō fūūlu̍u̍ pɛ̍, Māsānɔ̄ɔ̍ Mɛ̄lɛ̄ka̍, wānāā ndūa̍a̍ lo̍ yōōmū o̍ lɛ̄ŋnde̍ he̍ī ni̍ŋ nda̍ ki̍nɛ̍i̍, ō chō nda̍ sōlī o̍ lɛ̄ŋīī kēŋ ni᷄ŋ a̍ kpāāya̍ ndɔ̄ bɛ̍ndōo̍, mbō mīŋgi̍ nda̍ o̍ lɛ̄ŋndē ndāle̍ŋ ni᷄ŋ. Lɛ̄ŋīī ke̍ŋ yɔ̍nūŋ ni̍ māā Āsi̍i̍līāā, a̍ I̍chi̍pī, a̍ Pa̍ti̍lɔ̄ɔ̄, a̍ Īto̍o̍pīāā, a̍ Ɛ̍lām, a̍ Ba̍bi̍lɔ̄ŋ, a̍ Ha̍ma̍tī, ndu̍yɛ̍ a̍ lɛ̄ŋīi̍ ho̍lnu̍ŋ Pēe̍ Mɛ̄ŋmā Īhɛ᷄llo̍ ve̍, o̍ ko̍ŋ kɔ̍ɔ̍lī, a̍ lɛ̄ŋīi̍ cho̍ o̍ Pēe̍ Mɛ̄ŋmā Īhɛ᷄llo̍ tɛ̄ɛ̄ŋ nde̍.

¹²Mɛ̄lɛ̄ka̍ Ya̍a̍wɛ̄ɛ̄ o̍ cho̍ bēēndi̍ɛ̍īyo̍ hēēlū chōo̍ cho̍o̍, le̍ lɛ̄ŋnde̍ o̍ chi̍e̍ēŋndo̍ ni᷄ŋ chɔ̄mndo̍ māā wāŋnda̍ I̍sɔ̄lūɛ̄ī a̍ wāŋnda̍ Chu̍dā, a̍ cho̍ ā sɛ̄ŋīa̍ŋ o̍ chi̍e̍ēŋndo̍ ni᷄ŋ kpo̍u̍ o̍ bīyɔ̄ɔ̍ ni᷄ŋ nda̍, māā ndu̍ Mɛ̄lɛ̄ka̍ hīŋ nda̍ chūūŋgīāā nāa̍ pi᷅lɛ̍ mbō mīŋgi̍ nda̍ o̍ lɛ̄ŋndē ndāle̍ŋ ni᷄ŋ.

¹³A̍ te̍le̍ŋ ko̍ŋ, pāŋālā I̍sɔ̄lūɛ̄ī ndu̍ o̍o̍ nɔ̍ le̍ Chu̍dā wo̍ ō chō hūnɔ̄ɔ̄ chūwɔ̄ɔ̄. Ndu̍yɛ̍ o̍ ko̍ŋ kɔ̍ɔ̍lī, lɛ̄ŋndē Chu̍dāle̍ŋ lē ve᷅ lɛ̍ ni̍ŋ lɛ᷅ŋndē lēya̍a̍mɔ̍ɔ̍ le̍ I̍sɔ̄lūɛ̄ī le̍ fɛ̍ɛ̍ŋ a̍ fɛ̍ɛ̍ŋ te̍.

¹⁴Chu̍dā nda̍ I̍sɔ̄lūɛ̄ī a̍ cho̍ hūnɔ̄ɔ̄ dɔ̄ɔ̄nu᷄ŋ na̍a̍ pi᷅lɛ̍ mā kɔ̍ de᷅l lɛ̄ŋndē Fīli̍i̍tīāŋnde̍ŋ chōo̍ ku̍mbū pāa̍le̍ŋ lē dēllo̍. Ā chō hūnɔ̄ɔ̄ dɔ̄ɔ̄nu᷄ŋ na̍a̍ pi᷅lɛ̍ mā kɔ̍ de᷅l wānāa̍ cho̍ bā pāa̍le̍ŋ lē chāŋndo̍ wa̍ chōo̍, mā pūŋga̍ nyɛ̄m ndāa̍ŋ kpo̍u̍. Ā chō hūnɔ̄ɔ̄ lɛ̄ŋndē I̍dɔ̄mnde̍ŋ a̍ lɛ̄ŋndē Mo̍wa̍bīle̍ŋ chīŋa̍la᷅ŋ mā yēm ndi̍. Ndu̍yɛ̍, wāŋnda̍ A̍mɔ̄ŋ bɛ̍ɛ̍, mā hu᷄ŋ yo᷅m nda̍ mī wāŋnda̍ A̍mɔ̄ŋ a̍ wa̍ nda̍ o̍ bā bɛ̄ŋgu̍.

¹⁵Mɛ̄lɛ̄ka̍ Ya̍a̍wɛ̄ɛ̄ o̍ cho̍ Pēe̍ Mɛ̄ŋmā Īhɛ᷄llo̍ I̍chi̍pī vēēlīāā, le̍ mī wānāā ndūa̍a̍ ā ta᷄ŋ. O̍ ko̍ŋ kɔ̍ɔ̍lī, ō chō hūēīyīī tūū bɛ̄ndūe̍i̍ yɔ̄ŋ o̍ mɛ̄ŋnda̍ŋ chōo̍ o̍ Pēē Bɛ̍ndōo̍ Yūfi̍lu̍a̍tīī, mbō tōsa̍ mī hūēīyīī kēŋ ī pīɔ̍u̍ pēē bɛ̍ndū kōŋ lɛ̄ūwūŋ pɔ̄mbɔ᷄ŋ ŋ̄ ŋɔ̍mmɛ̍ū, le̍ mī wānāā ndūa̍a̍ ā nɔ̄la̍ mā ta᷄ŋ a̍ ŋ̄pēlū.

¹⁶Mɛ̄lɛ̄ka̍ Ya̍a̍wɛ̄ɛ̄ o̍ cho̍ nɛ̄ī bɛ̍ndōo̍ yāmbɔ̄ɔ̄ kpa̍la̍ŋ chɔ̄nɔ᷄ŋndo̍ o̍ lɛ̄ŋndē Āsi̍i̍līāā le̍ŋ ni᷄ŋ, le̍ mī wānāā ndūa̍a̍ lo̍ yōōmū lo̍ŋ nda̍ ā nɔ̄la̍ mā fūla̍. Mɛ̄ɛ̍ o̍ yāmbu̍ sīndɛ̄ nɛ̄īyo̍ le̍ mī I̍sɔ̄lūɛ̍i̍ya̍ fi̍nyāā ndāā ma̍māa̍ ā ta᷄ŋ yɛ̍, te̍le̍ŋ nda̍ fūla̍ o̍ lɛ̄ŋndē I̍chi̍pīle̍ŋ ni᷄ŋ ndo̍.