Read Southern Kisi Āīsa̍yā 13 Bible Online

Āīsa̍yā 13 - Southern Kisi bible

Āīsa̍yā 13

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ kē Āīsa̍yā, po̍ E̍mɔ̍ɔ̍sī wo̍ yōōŋgōo̍ a̍ Ba̍bi̍lɔ̄ŋ o̍kɔ̄ɔ̄. Yōōŋgū ko̍ŋ cho̍ ho̍ō ni̍ māā,

²lā hēēlu̍ bēēndi̍ɛ̍īyo̍ chōo̍ cho̍o̍ o̍ pēmbīī vīlɛ̄īye̍ chōo̍, pēmbīi̍ nɔ̍ bi᷅l pūīyāā o̍ bīl pūīyāā lēcho̍ō le̍ ve̍, le̍ wāŋnda̍ dīmūllo̍ mā bɛ̄ɛ̄ndi̍a̍ŋ le̍ chɔ̄ūwo̍. Lā vēēlu̍ so̍vɛ̄i̍ya̍ chōo̍ cho̍o̍. Lā hēēlu̍l nda̍ bāa̍ le̍ nda̍ dīmūllo̍ mā chīŋa̍la᷅ŋ di̍o̍la̍ sāāsāla̍ŋ le̍ mā lūēēlu̍l wānāā tɔ̍ɔ̍wa̍a̍ bɛ̍ndūa̍a̍ ha̍ā a̍ sɔ̍ŋgɔ̍ɔ̍.

³Ya̍ Mɛ̍lɛ̄ka̍ Ya̍a̍wɛ̄ɛ̄ pi̍la̍ I̍ di̍mu̍l so̍vɛ̄i̍ya̍a̍ nīa̍a̍ cho̍ ā hɛ̄līāā te̍ŋge̍ŋ nda̍ le̍ kɔ̄la̍ŋ sɔ̍ŋgɔ̍ɔ̍. I̍ ve̍e̍lu̍ ku̍u̍ba̍a̍ nīa̍a̍ chɔ̄ūwa̍ ha̍ā, le̍ mā kɔ̍ tu̍sī wāŋnda̍ ha̍ā nyɛ̄ pālāā bɛ̄ndōo̍ chōo̍, fo̍ndōle̍ I̍ dɔ̍u̍nu᷄ŋ tu̍mbe̍ a̍ wāŋnda̍ ha̍ā ō kālā ka̍lā. Ndu̍yɛ̍ ā dūāūnūŋ ni̍ŋ nya̍a̍le̍ ta̍u̍ ta̍u̍ le̍ tōsā ya̍ I̍ to̍sā ni̍ŋ mā yēm wāŋnda̍ ha̍ā wo̍.

⁴Lā ya᷄ŋ ndɔ̍ ni᷅la̍ŋ mī lā tūēī bɔ̄ɔ̄lūū bɛ̄ndu̍ cho̍ sūɛ̍i̍ o̍ pēmbo᷄ŋ chōo̍ wo̍. Wāŋnda̍ chō bɔ̄ɔ̄lūūwo̍ kpe̍e̍kpe̍i̍ ku̍ndā bɛ̄ndōo̍. Māsɛ̄i̍ a̍ lɛ̄ŋnde̍ ā chō pūa̍a̍ ndāa̍ chɔ̄ūwa̍ chūūŋgi̍a̍a̍ nāa̍ pi᷅lɛ̍, nda̍ kpo̍so̍ŋ a̍ cho̍ bɔ̄ɔ̄lūūwo̍ nu̍a̍ā ni̍. Mɛ̄lɛ̄ka̍ Ya̍a̍wɛ̄ɛ̄, nɔ̍ kpāāyāa̍ kpo̍u̍ wo̍, ō chō pūa̍a̍ chɔ̄ūwa̍ chūūŋgi̍a̍a̍ nāa̍ pi᷅lɛ̍ le̍ hūnɔ̄ɔ̍ sɔ̍ŋgɔ̄ɔ̍.

⁵Ā chō fūlāa̍ o̍ lɛ̄ŋīī lēvīlle̍ ni᷄ŋ pɔ̍, nāa̍ lɛ̄ŋnde̍ŋ lē mɛ̄ɛ̄lu̍ wa̍ ma̍ wā hūnɔ̄ɔ̍. Pūa̍a̍ chɔ̄ūwa̍ ha̍ā, nda̍ cho̍ wōlɔ̄ɔ̄lā chɔ̄ūla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ ni̍, le̍ sɔ̍ŋgɔ̍ɔ̍ a̍ ya̍a̍mɔ̍ɔ̍wa̍a̍ ndūa̍a̍. Tu̍mbe̍ o̍ dɔ̍u̍nu᷄ŋ a̍ lɛ̄ŋnde̍ŋ ndo̍, pūa̍a̍ chɔ̄ūwa̍ ha̍ā o̍ cho̍ kpe̍ku̍ so̍li᷄ŋ ni̍ māā wōlɔ̄ɔ̄lā ndɔ̄la̍ chɔ̄ū mbō tɛ̄ɛ̄mbu̍u̍ le̍ŋ kpo̍u̍.

⁶Lā cha᷄ŋ mī lā kōŋu̍l chōo̍ cho̍o̍ kpe̍le̍ŋ, fo̍ndōle̍, pāa̍le̍ dɛ̍nɛ̍ pa̍lāāle̍ Mɛ̄lɛ̄ka̍ Ya̍a̍wɛ̄ɛ̄ le̍ŋ lē chō ni᷅ŋ kpɛ̍ɛ̍lūŋ. Pāa̍le̍ le̍ŋ, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō tōsā ni̍ŋ mī nyɛ̄ tāmbɛ̍i̍ bɛ̍ndōo̍ ō wa̍ lɛ̄ŋnde̍ŋ nde᷅ŋ.

⁷Sīōōŋīī bɛ̄ndūe̍i̍ ī bīī ni̍ŋ wa᷅ŋnda̍ mī dīāllo̍ŋ ŋ̄ vī nda̍ pɔ̍lī pɔ̍lī. Wānāā kɔ̄ltā sīmūlāa̍ kpo̍u̍, kɔ̄lta̍ŋ lā chō nda̍ hūnɔ̄ɔ̄ hīīlɔ᷄ŋ.

⁸Nda̍ kpo̍u̍ sīōōŋīī bɛ̄ndūe̍i̍ chō nda̍ hūnɔ̄ɔ̄ bīyɔ̄ɔ̄. Nyɛ̄ nɛ̄īyāā bɛ̄ndōo̍ ō wā ni̍ŋ nda̍ chōo̍, ndu̍yɛ̍ mī kɔ̄ltā ndāla̍ŋ lā tāmbu̍. Ā wā ni̍ŋ ko̍ mɛ̄ɛ̍ nɛ̄īyāa̍ ō wa̍ nu̍a̍ā wānā la̍nɔ̍ɔ̍ chōo̍ a̍ te̍le̍ŋ ndɔ̄ vi̍a̍lāa̍ yɛ̍. Wānā o̍ wānā cho̍ hūnɔ̄ɔ̄ chāa̍ŋ ndɔ̍ hɔ̄lla̍ tōfā a̍ sīōōŋīī bɛ̄ndūe̍i̍. Hɔ̄lta̍ŋ lā chō nda̍ hūnɔ̄ɔ̄ dīūwɔ̄ɔ̄ mɛ̄ɛ̍ dɛ̄ŋgūlta̍ŋ lā wā nu̍a̍ā yɛ̍ a̍ nyɛ̄ nɛ̄īyāa̍ wa᷅ ni̍ŋ nda̍ chōo̍ wo̍.

⁹Lā kɛ̄si̍ŋ o̍ kɔ̄l māā pāa̍le̍ Mɛ̄lɛ̄ka̍ Ya̍a̍wɛ̄ɛ̄ le̍ŋ lē chō o̍ nɛ̄ī, pāa̍le̍ kpūndɛ̍lē bɛ̍ndūle̍ŋ, pāa̍le̍ o̍ chɔ᷅m ni̍ŋ ŋ̍wa̍ŋndā chi̍e̍e̍ tu̍mbe̍ ndɔ̄ bɛ̍ndōo̍ le̍ŋ. Ō chō hūnɔ̄ɔ̄ chi̍e̍ēŋndo̍ ho̍ō tɛ̄ɛ̄mbūū, ndu̍yɛ̍ a̍ wānāā yɔ̄ŋ wɔ̄ɔ̍ŋāa̍ cho̍ lēni᷄ŋ nda̍ kpo̍u̍.

¹⁰Lōo̍ŋ cho̍ o̍ ha̍la̍a̍ ni̍ŋ chōo̍ cho̍o̍ wo̍ŋ kpo̍u̍ ŋ̄ chō pɛ̄ŋgī dīōndɔ̄ɔ̍ o̍ pāa̍le̍ le̍ŋ chōo̍. Pāa̍le̍ŋ lē chō wā hēlɔ̄ɔ̍ ki̍nɛ̍i̍ mī lē pīīmi̍a̍a̍ kpi̍lo̍. O̍ ko̍ŋ kɔ̍ɔ̍lī, pāŋgi̍i̍ di̍a̍ndū i̍chɔ̍lle̍ bɛ̍ɛ̍ ī yɔ̍ŋgū ni̍ŋ nyɛ᷅ wa̍wo̍ŋ pa̍a̍le̍ le̍ŋ te̍.

¹¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ hūnɔ̄ɔ̄ chi̍e̍ēŋndo̍ dɛ̍nɛ̍ pālāa̍ tūsī chōo̍ le̍ yɔ̄ŋndɔ̄ wɔ̍ɔ̍ŋndo̍. Ndu̍yɛ̍ wānāā dɛ̍nɛ̍ wɔ̍ɔ̍ŋnda̍ kpo̍u̍ mī tu̍si̍ nda̍ nyɛ̄ pālāa̍ chōo̍, fo̍ndōle̍ le̍ yɔ̄ŋ ndā wɔ̍ɔ̍ŋndo̍. Wānāā yōŋgāa̍ kpo̍u̍, I̍ cho̍ tōsā mī yōŋga̍ ndāa̍ ō mɛ̄ɛ̄lu̍, ndu̍yɛ̍ wānāa̍ nɔ̍ hɔ̄lāā hēēlāa̍ mā tōsāl wa᷅ŋnda̍ sɔ̄ɔ̍ŋ wɔ̍ɔ̍ŋndo̍ŋ nda̍, mī tu̍si̍ nda̍ tōōlō.

¹²Wānāa̍ lo᷅ ni̍ŋ yo̍o̍mū a̍ te̍le̍ŋ nyɛ̄ pālāā kōŋ nda̍, mɛ̄ɛ̍ ko̍o̍līi̍yo̍ŋ ŋ̄ kēndū nu̍a̍ā sāālɔ᷄ŋ yɛ̍, le̍nde̍ nda̍ kīāndū ni̍ŋ sa̍a̍lɔ᷄ŋ ni̍.

¹³Pāa̍le̍ ya̍ Mɛ̍lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍ chɔ̄m ni̍ŋ māā I̍ dɔ̍u̍nu᷄ŋ tu̍mbe̍ a̍ ŋ̄wāŋndā chīe̍e̍ le̍ŋ, I̍ cho̍ tōsā mī ha̍la̍a̍ chōo̍ cho̍o̍ o̍ hi̍i̍lu̍ŋ, o̍ ko̍ŋ kɔ̍ɔ̍lī, mī chi̍e̍ēŋndo̍ ō hīīlu̍ŋ yo̍kpa᷄ŋ yo̍kpa᷄ŋ bɛ̍ndū.

¹⁴“Wānāā lēkāa̍wa̍a̍ cho̍ o̍ lɛ̄ŋnde̍ŋ nde᷅ŋ ni᷄ŋ nda̍ kpo̍u̍, ā chō hūnɔ̄ɔ̄ sɛ̄ŋi᷄ŋ mī wānā o̍ wānā mi̍i̍ŋgu̍ wānāā ndūa̍a̍ tɛ̄ɛ̄ŋ, wānā o̍ wānā cho̍ mīīŋgū o̍ lɛ̄ŋndē ndɔ̄le̍ŋ ni᷄ŋ. Mɛ̄ɛ̍ kīa̍llo̍ ō wā nu̍a̍ā dōōsūa̍a̍ nyāānɔ᷄ŋndo̍ ō to̍fāŋ a̍ mākɔ̄ɔ̄ le̍ yɛ̍, le̍nde̍ wānā o̍ wānā wa᷅ ni̍ŋ mi̍i̍ŋgōo̍ o̍ ndu̍lo̍ ni̍. Mɛ̄ɛ̍ sāa̍ ā wā nu̍a̍ā a̍ nɔ᷅ wa̍nā o̍ wānā ma̍ndāā le̍, mā sɛ̄ŋi̍ŋ yɛ̍, le̍nde̍ nda̍ sɛ̄ŋīŋ ni̍ŋ ni̍, mī wānā o̍ wānā mi̍i̍ŋgu̍ o̍ lɛ̄ŋndē ndɔ̄le̍ŋ ni̍ŋ.

¹⁵Ā wā ni̍ŋ nda̍ kīlta̍ŋ kɔ̄ɔ̄lī, wānā o̍ wānā nda̍ bīī pɛ̍, ā dīī. Wānāā nda̍ bīī ni̍ŋ ki̍nɛ̍i̍ ya̍, ā chō nda̍ dīū a̍ mɔ̄ɔ̄ŋ fāŋndo̍ŋ.

¹⁶Ā lo̍ ni̍ŋ to̍fāa̍ chi̍ŋ, mā hu᷄ŋ wa᷅ chūāā ndāa̍ dīūwo̍ nda̍ pi̍la̍ o̍ hɔ̄l, ō nda̍ bīī ko̍ ā vīɔ̄l ndu̍ ō wū. Nyɛ̄ o̍ nyɛ̄ cho̍ o̍ chīɛ̄īlā ndāla̍ŋ ni᷄ŋ, ya̍a̍mɔ̍ɔ̍wa̍ chō mu̍ŋ hūnɔ̄ɔ̄ pūŋgā mā kūɛ̄nu᷄ŋ a̍ mu̍ŋ, o̍ ko̍ŋ kɔ̍ɔ̍lī, lāāndāā ndāa̍ mī ya̍a̍mɔ̍ɔ̍wa̍ ha̍ā ā kpūūvi̍a̍a̍ nda̍.”

¹⁷Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ tōsā mī pūa̍a̍ chɔ̄ūwa̍ Mɛ̍dɛ̍sī kɔ̄lta̍ŋ lā yūsa̍ nda̍, mā hu᷄ŋ de᷅l wāŋnda̍ ha̍ā chōo̍ a̍ sɔ̍ŋgɔ̍ɔ̍. Pūa̍a̍ chɔ̄ūwa̍ ha̍ā, ā cho̍ bɛ̍ɛ̍ wa̍nāa̍ nɔ̍ hɔ̄ltē nyɛ̄ sɔ̄lāā le̍, ka̍ni̍ŋ hu̍mbū ni̍, ŋ̄ko̍o̍līi̍ŋ ni̍.

¹⁸Chīɔ̄ūlā ndāla̍ŋ lā chō hūnɔ̄ɔ̄ chūāā pīāāndūa̍a̍ dīū. O̍ ko̍ŋ kɔ̍ɔ̍lī, chɛ̄lɛ̄kpi̍a̍a̍ le̍ndīa̍a̍ cho̍ wūɛ̄īyo̍ wa̍ bɛ̍ɛ̍, pūa̍a̍ ha̍ā ā nɔ᷅ ni̍ŋ i̍nyi̍ɛ̍ɛ̍ o̍ īnyīɛ̍ɛ̍ le̍ nda̍ mā chīīndi̍a̍a̍ nda̍ le̍, kɛ̄lɛ̄ŋgāā le̍ mā yīya̍ŋ bɛ̍ɛ̍ chu̍a̍a̍mbūa̍a̍ pɔ̄mbūa̍a̍ chōo̍ mā mɛ̄i̍ nda̍.

¹⁹Māsɛ̄i̍ o̍ chi̍e̍ēŋndo̍ ni᷄ŋ ki̍nɛ̍i̍, Ba̍bi̍lɔ᷄ŋ hi̍o̍ū nāŋɔ̄ɔ̄ kpo̍u̍. Le̍ bɛ̄ɛ̄le̍ bɛ̍ndūlē Ba̍bi̍lɔ̄ŋ o̍ nɔ̍ lɛ̄ŋnde̍ tɛ̄ɛ̄ŋ nde̍ŋ, mi̍ wāŋnda̍ Ba̍bi̍lɔ̄ŋ a̍ lo᷅ o̍ ko̍ŋ ma̍ kīālū yōŋgāa̍ a̍ lɛ̄ŋndē ndāle̍ŋ o̍kɔ̄ɔ̄. Kɛ̍ ndu̍yɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ cho̍ hūnɔ̄ɔ̄ Ba̍bi̍lɔ᷄ŋ tɛ̄ɛ̄mbūū mbō si̍mnu᷄ŋ māā So̍dɔ̄m a̍ Kōmo̍o̍lūā.

²⁰Ba̍bi̍lɔ̄ŋ o̍ cho̍ hūnɔ̄ɔ̄ sīmnɔ᷄ŋ nāa̍ wāna̍ chi̍e̍e̍ o̍ ve᷅ lɛ̍ le̍ wa̍. Le̍ fɛ̍ɛ̍ŋ a̍ fɛ̍ɛ̍ŋ wāna̍ chi̍e̍e̍ che᷅l lɛ̍ ni̍ŋ Ba̍bi̍lɔ̄ŋ te̍. A̍la̍būi̍ya̍a̍ ba̍lū bɛ̍ɛ̍ cha̍lle̍ o̍ fo̍ndāŋnda̍ŋ o̍ tɛ̍ndīi̍la̍ ndāla̍ŋ ni᷄ŋ nda̍ ā che᷅l lɛ̍ ni̍ŋ lo̍ŋ te̍. Wānāa̍ ma̍ndā sa̍a̍ wa̍ bɛ̍ɛ̍, ā ku̍ē lɛ̍ ni̍ŋ lo̍ŋ a̍ sāa̍ ndāa̍ le̍.

²¹Ba̍bi̍lɔ̄ŋ o̍ cho̍ hūnɔ̄ɔ̄ sīmnɔ᷄ŋ fo̍ndāŋ vīsīāā bīyāa̍ ā chāl lo̍. Chīɛ̄īlā ndāla̍ŋ lā chō hūnɔ̄ɔ̄ sīmnɔ᷄ŋ nāa̍ ɔ̍si̍lu̍i̍chīi̍ya̍ ā hūŋ hi̍ni̍la̍ŋ nda̍. Lo̍ŋ hu̍a̍a̍ ā chāl ni̍ŋ ni̍. Chūīŋāā yōndūa̍a̍ kpo̍u̍ lo̍ŋ nda̍ wā ni̍ŋ pi̍su̍lta̍ŋ ni̍.

²²Fo̍ndāŋndā kālā ka̍lālā nda̍ tāŋgu̍l le̍ nda̍ māndāa̍ la̍ŋ, lo̍ŋ tūŋāā yōndūa̍a̍ ā pīli̍a̍a̍[1] ā wā ni̍ŋ pɛ̍ɛ̍līa̍a̍ ni̍. Chīɛ̄īlā tɔ̍ɔ̍ma̍lā bɛ̄ndūlā nda̍ tāŋgu̍l ta̍ŋ, lēni᷄ŋ tūŋāā yōndūa̍a̍[2] ā wā ni̍ŋ bu̍sɔ̄ɔ̍ ni̍. Ba̍bi̍lɔ̄ŋ mɛ̄ɛ̄lu̍la̍ ndɔ̄la̍ŋ lā hīŋ fūūlūūwo̍. Te̍le̍ŋ ndɔ̄ɔ̍ ō chō ni᷅ŋ kpɛ̍ɛ̍lūŋ.”