Read Southern Kisi Āīsa̍yā 14 Bible Online

Āīsa̍yā 14 - Southern Kisi bible

Āīsa̍yā 14

¹Te̍le̍ŋ cho̍ fūūlūū mī Mɛ̄lɛ̄ka̍ Ya̍a̍wɛ̄ɛ̄ o̍ hu̍ŋ tu̍i̍i̍nu᷄ŋ yu̍ŋgu̍ Che̍kɔ̍pū wo̍ īnyīɛ̍ɛ̍, mbō mīŋgi̍ nda̍ vɛ̄lɛ̄ chūā māā wānāā ndɔ̄, mbō tōsa̍ mā cha᷄l vɛ̄lɛ̄ o̍ lɛ̄ŋndē ndāle̍ŋ ni᷄ŋ. Wāŋnda̍ mālnu᷄ŋ ni̍ŋ o̍ lɛ̄ŋīī chēle̍ŋnde̍ ni᷄ŋ mā kɔ̍ cha᷅l nda̍ tɛ̄ɛ̄ŋ, ndu̍yɛ̍ mī wānāā kāŋ bɛ̍ɛ̍ a̍ si̍mnu᷄ŋ yu̍ŋgu̍ Che̍kɔ̍pū wo̍.

²Wāŋnda̍ o̍ lɛ̄ŋīī chēle̍ŋnde̍ ni᷄ŋ, nda̍ cho̍ hūnɔ̄ɔ̄ I̍sɔ̄lūɛ̍i̍ya̍ mālā ni̍, mā chūa̍ nda̍ mā mīŋgi̍ nda̍ o̍ lɛ̄ŋndē ndāle̍ŋ ni᷄ŋ, lɛ̄ŋnde̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ nda̍ le̍ŋ. Ndu̍yɛ̍ wānāā kāŋ, ha̍ā ā sīmnūŋ ni̍ŋ chi̍a̍ā wāŋ pīāāndūa̍a̍ a̍ chīa̍a̍ wāŋ lāāndūa̍a̍ le̍ wāŋnda̍ I̍sɔ̄lūɛ̄ī, o̍ lɛ̄ŋnde̍ŋ nde᷅ŋ ni᷄ŋ, mā sāāŋgi̍a̍l I̍sɔ̄lūɛ̍i̍ya̍. Wānāā I̍sɔ̄lūɛ̍i̍ya̍ wa̍ o̍ bā o̍ bīyɔ̄ɔ̍ ni᷄ŋ nda̍, nda̍ bɛ̍ɛ̍ ā cho̍ hūnɔ̄ɔ̄ mīīŋgū mā sīmnu᷄ŋ chīa̍a̍ le̍ I̍sɔ̄lūɛ̍i̍ya̍. Ndu̍yɛ̍ wānāa̍ wa̍ I̍sɔ̄lūɛ̍i̍ya̍ nyɛ̄ pālāa̍ tūsīo̍o̍ chōo̍ wa̍, ā chō hūnɔ̄ɔ̄ wā I̍sɔ̄lūɛ̍i̍ya̍ o̍ bā bɛ̄ŋgu̍, mī I̍sɔ̄lūɛ̍i̍ya̍ nɔ̄ nda̍ kpāāyāa̍ chōo̍.

³Sāŋgā o̍ sāŋgā cho̍ I̍sɔ̄lūɛ̍i̍ya̍ chōo̍, ndu̍yɛ̍ a̍ nyɛ̄ nɛ̄īyāā o̍ nyɛ̄ nɛ̄īyāā nda̍ chō nda̍ lūēīyo̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nda̍ ndu̍ fāŋā chōo̍ kpo̍u̍, mbō tōsa̍ mā sɔ̄la̍ pɛ̄ŋgīo̍o̍. Wa̍lta̍ ka̍lā ka̍lālā nda̍ chō nda̍ kīndīlāa̍ le̍ tōsāa̍ la̍ŋ kpo̍u̍ lā chō hūnɔ̄ɔ̄ mɛ̄ɛ̄lū.

⁴A̍ te̍le̍ŋ ko̍ŋ, wāŋnda̍ I̍sɔ̄lūɛ̄ī a̍ so̍lī ni̍ŋ chōnde̍i̍ he̍ī a̍ Māsāa̍ Ba̍bi̍lɔ̄ŋ o̍kɔ̄ɔ̄ le̍ ndu̍ māmɔ̄ɔ̍, āā, “Māsa̍ kɔ̄l vēsɛ̍i̍ bɛ̄ndōo̍ ō chūū. Tu̍mbe̍ bɛ̍ndū ndu̍ o̍o̍ du̍a̍u̍nūŋ o̍ Māsāle̍ ndɔ̄le̍ŋ ni᷄ŋ ndo̍ ō mɛ̄ɛ̄lu̍.

⁵Māsāa̍ dɛ̍nɛ̍ wɔ̍ɔ̍ŋnda̍, Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mi̍ kpāāyāla̍ ndāla̍ŋ lā mɛ̄ɛ̄lū.

⁶Māsāa̍ ha̍ā le̍ te̍le̍ŋ o̍ te̍le̍ŋ ā wa̍ wāŋnda̍ nyɛ̄ pālāa̍ tūsīo̍o̍ chōo̍ a̍ kɔ̄l ndā tu̍ū bɛ̄ndōo̍. Lɛ̄ŋīi̍ wa̍ nda̍ o̍ bā bɛ̄ŋgu̍ ve̍, le̍ te̍le̍ŋ o̍ te̍le̍ŋ kɔ̄lta̍ŋ lā wa̍ nda̍ lā tūū a̍ lɛ̄ŋīī kēŋ. Nyɛ̄ pālāa̍ tūsīo̍o̍ tu̍ŋ nda̍ a̍a̍ tu̍sī lɛ̍ŋīī kēŋ chōo̍ ni̍, nda̍ a̍a̍ pɛ̍ŋgī le̍.

⁷Kɛ̍ lɛ̄ŋndē kpo̍u̍ ī chō ni᷅ŋ hāū pɛ̍ŋgīo̍o̍, ndu̍yɛ̍ mi̍ ī wā o̍ kɔ̄l nyūlū ni᷄ŋ. Wāŋnda̍ chō ni᷅ŋ hāū cho̍ndu̍ŋ kɔ̄l kɛ̄ndɔ᷄ŋ sōlīo̍o̍ bā o̍ bā fe̍e̍.

⁸Yɔ̄mīī sa̍i̍pu̍lūɛ̄ɛ̄ve̍ ni̍, a̍ yɔ̄mīī si̍dāāve̍ Le̍ba̍nɔ̄ŋ, ndi̍ bɛ̍ɛ̍ ī chō a̍ kɔ̄l kɛ̄ndɔ̄ɔ̍ kpe̍e̍kpe̍i̍. Ī chō dīmīo̍o̍ māā, māsāa̍ ho̍ō dēlɔ̄ɔ̍ ni᷅ŋ, wānā o̍ wānā hi᷅ŋ ndɛ̍ ni̍ŋ mbō kēlū ndi̍ le̍.

⁹“Māsāa̍ Ba̍bi̍lɔ̄ŋ, chi̍e̍e̍ wāŋ vīlɛ̍i̍ya̍ ō chō ni᷅ŋ yēēmɛ̍i̍ kpe̍e̍kpe̍i̍ le̍ nu̍m chɔ̄ɔ̍. Wāŋ bɛ̄ndūa̍a̍ wa̍ chi̍e̍ēŋndo̍ ho̍ō chīla̍ŋ ma̍ wū wa̍, nyi̍nāā ndāa̍ cho̍ chi̍e̍e̍ pīɔ̍mnda̍ kpo̍u̍, ā chɛ᷄ŋ le̍ nu̍m hūnɔ̄ɔ̍ bɔ̄ŋāa̍. Māsāa̍ bɛ̍ndūa̍a̍ vi᷅ ni᷅ŋ nda̍ kpo̍u̍, nyi̍nāā ndāa̍ cho̍ chi̍e̍e̍ pīɔ̍mnda̍, ā chɛ᷄ŋ o̍ kpe̍ŋgbe̍i̍la̍ ndāla̍ lēmāsāla̍ŋ chōo̍ ma̍ sīm le̍ nu̍m yīlɔ̄ɔ̍.

¹⁰Wāŋ bɛ̄ndūa̍a̍ ha̍ā kpo̍u̍, ā chō nu̍m dīmūl āā, ‘Nūm bɛ̍ɛ̍ ā sīmnu᷄ŋ māā na̍a̍. Mɛ̄ɛ̍ na̍a̍ ŋ̄ chō ŋ̄ nɔ̍ lɛ̍ kpāāyā o̍ kpāāyā le̍ yɛ̍, le̍nde̍ ko̍ni̍ nūm bɛ̍ɛ̍ nūm cho̍ ni᷅ŋ ni̍.

¹¹Yōŋgā bɛ̍ndū nūm o̍o̍ nɔ̍ wo̍ ni̍, a̍ bɛ̄ɛ̄le̍ wāŋnda̍ nda̍ a̍a̍ ke᷅ nu̍m a̍ tōwāla̍ŋ lɔ̄ɔ̍ le̍ŋ, mu̍ŋ kpo̍u̍ ŋ̄ tōl hāū chi̍e̍e̍ pīɔ̍m. Chāa̍, nda̍ cho̍ ni᷅ŋ ha̍ū kpe̍lē nu̍m hīnīa̍a̍ ni̍. Dōndo̍po᷅lla̍ nda̍ cho̍ kōlā nu̍m kūūmba᷄ŋndo̍ ni̍.’ ”

¹²Māsāa̍ Ba̍bi̍lɔ̄ŋ, a̍ wa̍ māwāā mɛ̄ɛ̍ lūe̍i̍ īdīi̍ye̍ ī chō nu̍a̍ā yɛ̍ a̍ nāŋɔ̄ɔ̍, kɛ̍ a̍ fu̍la̍ chōo̍ cho̍o̍ ma̍ hu᷄ŋ de᷅l lɛ̄ŋ. Mɛ̄ɛ̍ pāa̍le̍ŋ lē kāndu̍ nu̍a̍ā hēlɔ̄ɔ̍ mī lē wa̍ dīōndɔ̄ɔ̍ bɛ̄ndōo̍ yɛ̍, le̍nde̍ ŋ̄ wa̍ ni̍. Lɛ̄ŋīī bɔ̄ɔ̍ bɔ̍ɔ̍ o̍ chi̍e̍ēŋndo̍ ni̍ŋ, nu̍m mi̍ŋgi̍ ndi̍ hāū lɛ᷅ŋ ni̍. Kɛ̍ nūm bɛ̍ɛ̍ ā tūsi̍ nu̍m lɛ̄ŋ.

¹³Ma̍ lō o̍ ko̍ŋ ma̍ dīmūl nūm pi̍la̍ māā, I̍ cho̍ hēlɔ̄ɔ̄ chōo̍ cho̍o̍ mī kɔ̍ cha᷅l lo̍ŋ. I̍ cho̍ lākɔ̄ kpe̍ŋgbe̍i̍ ni̍ lēmāsāa̍ kɛ̄sī chōo̍ cho̍o̍ pɔ̍ o̍ lōo̍ŋ Mɛ̄lɛ̄ka̍ŋ chōo̍. I̍ cho̍ hēlɔ̄ɔ̄ o̍ pēmbīi̍ cho̍ bā lūāŋndo̍ ve̍ chōo̍, nāa̍ mɛ̄lɛ̄ka̍a̍ ā chūūŋgi̍āŋ nda̍ mī cha̍l lo̍ŋ.

¹⁴I̍ cho̍ hēlɔ̄ɔ̄ mī kɔ̍ wa᷅ o̍ ha̍la̍ īkpūŋgbāa̍ kɔ̄ɔ̄lī, mī si̍mnu᷄ŋ māā Mɛ̄lɛ̄ka̍ Bɛ̄ndōo̍ Kpo̍u̍.

¹⁵Kɛ̍ ā tūsi̍ nu̍m hāū o̍ sɛ̄īyo̍ ni᷄ŋ. Ā chō ni᷅ŋ hāū o̍ fo̍ndāŋ yīŋgi̍lɛ̍i̍ bɛ̍ndōo̍.

¹⁶Wānā o̍ wānā che᷅ nu̍m pɛ̍, ā chō wōōlū a̍ nūm. Kɔ̄ndɔ̄fi̍llo̍ chō nda̍ bīyɔ̄ɔ̄ mā dīmi̍ āā, “O̍ hi̍i̍lu̍u̍ chi̍e̍ēŋndo̍, mbo̍ tōsā māsɛ̄ī kpo̍u̍ mi̍ ī nyīīyā wo̍, ndu̍ cho̍ ho̍ō ni̍?

¹⁷Po̍ to̍sa̍ mi̍ chi̍e̍ēŋndo̍ ō sīmnu᷄ŋ ha̍ū māā po̍llo̍, o̍ tɛ̍ɛ̍mbu̍u̍ chi̍e̍e̍ŋ bɛ̍ndo᷄ŋ o̍ chi̍e̍ēŋndo̍ ni᷄ŋ ndo̍, ō ndu̍ o̍o̍ bi̍ī wa᷅ŋndā o̍ chɔ̄ūwo̍ ō me᷅l nda̍ mā mīīŋgu̍ o̍ nda̍lo̍ le̍ wo̍, ndu̍ cho̍ ho̍ō ni̍?”

¹⁸Māsāā bɛ̍ndūa̍a̍ o̍ chi̍e̍ēŋndo̍ ni᷄ŋ kpo̍u̍, mɛ̄ɛ̍ nda̍ vī ma̍ chɔ̄ nda̍ chɔ̄ lēbīɔ̍ɔ̍, wānā o̍ wānā o̍ sɛ̄i̍ ndɔ̄ɔ̍ ni᷄ŋ.

¹⁹Kɛ̍ nūm nūm a̍ nɔ̍ sɛ̍ī o̍ sɛ̄i̍ nda̍ chɔ̍ nu̍m te̍. Ā vīōū dīāllūŋ nūmndo̍ŋ mɛ̄ɛ̍ nda̍ kīālū nu̍a̍ā lɛ̄vīī yɔ̄mndo̍ mā vīōū ndi̍ yɛ̍. Wānāā nda̍ dīu̍ o̍ chɔ̄ūwo̍ ni᷄ŋ, ma̍ wā kɔ̄la̍ŋ dīāllūŋ nda᷄ŋ vīōūwɔ̄ɔ̍ o̍ so̍o̍ŋndo̍ ni᷄ŋ o̍ pōūta̍ŋ tɛ̄ɛ̄ŋ nda̍, ā pēi̍ dīāllūŋ nda᷄ŋ o̍ dīāllūŋ nūmndo̍ŋ chōo̍ cha̍. Mɛ̄ɛ̍ so̍vɛ̄i̍ya̍ ā dīī nu̍a̍ā wāŋnda̍ o̍ chɔ̄ūwo̍, mā kēi̍ nda̍ nīɔ̄ū chōo̍ mā hīōū yɛ̍, le̍nde̍ dīāllūŋ nūm vīlɛ̍i̍yo̍ŋ ŋ̄ sīmnu᷄ŋ nyɛ᷅ fo̍ndō fu̍u̍ ni̍.

²⁰Nūm a̍ sɔ̍la̍ chɔ᷅ o̍ chɔ᷅ mɛ̄ɛ̍ māsāa̍ ā pīli̍a̍a̍ ā sɔ̄la̍ chɔ̄ɔ̍ yɛ̍ le̍, fo̍ndōle̍, le̍ mɛ̄ɛ̍ ŋ̄ tɛ̄ɛ̄mbu̍u̍ lɛ̄ŋndē nūmnde̍ŋ, ndu̍yɛ̍, ma̍ lō o̍ ko̍ŋ ma̍ dīū wānāā nūmnda̍ yɛ̍. Chūā o̍ chu̍a̍ fu̍la̍ o̍ yu̍ŋgu̍ dɛ̍nɛ̍ wɔ̍ɔ̍ŋndo̍ ho̍ō chōo̍, wāŋnda̍ chō hūnɔ̄ɔ̄ pūɛ̄ɛ̄nɔ᷄ŋ a̍ nda̍ o̍kɔ̄ɔ̄, mī dīōlā ndāla̍ŋ lā nyu᷄m o̍ chi̍e̍ēŋndo̍ chōo̍.

²¹Lā bɛ̄ɛ̄ndi̍a̍a̍ fo̍ndāa̍ le̍ pūa̍a̍ ndūa̍a̍ dīūwo̍, fo̍ndōle̍, le̍ yɔ̄ŋ wɔ̄ɔ̍ŋ fi̍nyāā ndāā ma̍māa̍ ā tōsa̍ wo̍. Lā dīu̍ nda̍ kpo̍u̍, yɔ̄ŋi̍ nda̍ lo̍ vɛ̍lɛ̄ kīndi᷄ŋndo̍ mā chūa̍ chi̍e̍ēŋndo̍ ho̍ō mā nɔ̄ ndu̍ kpāāyāa̍ chōo̍, yɔ̄ŋi̍ nda̍ tīu̍ vɛ̍lɛ̄ chi̍e̍e̍ŋ ndāa̍ŋ o̍ chi̍e̍ēŋndo̍ ni᷄ŋ kpo̍u̍.

²²Mɛ̄lɛ̄ka̍ Ya̍a̍wɛ̄ɛ̄, nɔ̍ kpāāyāa̍ kpo̍u̍ wo̍ ō dīmi̍ āā, “I̍ cho̍ sɔ̍ŋgā a̍ Ba̍bi̍lɔ̄ŋ. I̍ cho̍ Ba̍bi̍lɔ᷄ŋ tɛ̄ɛ̄mbūū, lātūlu̍ a̍ wānāā ndūa̍a̍, ndu̍yɛ̍ a̍ chūāūwāā ndāa̍ kpo̍u̍. I̍ cho̍ tōsā, wānā o̍ wānā lo᷅ ni̍ŋ yo̍o̍mū Ba̍bi̍lɔ̄ŋ te̍. Ya̍ Mɛ̄lɛ̄ka̍ Ya̍a̍wɛ̄ɛ̄ ya̍ so̍ō ni̍.

²³I̍ cho̍ tōsā mī Ba̍bi̍lɔ̄ŋ o̍ si̍mnu᷄ŋ hu᷅ŋndo̍, ō chō sīmnɔ᷄ŋ nāa̍ hu̍a̍a̍ ā chāl la̍. Nyɛ̄ o̍ nyɛ̍ cho̍ Ba̍bi̍lɔ̄ŋ, I̍ cho̍ ndu̍ bāsɔ̄ɔ̄ tɛ̍ɛ̍ mɛ̄ɛ̍ nda̍ bāsū nu̍a̍ā fo̍ndāa̍ a̍ bɛ̄sōo̍ yɛ̍. Ya̍ Mɛ̄lɛ̄ka̍ Ya̍a̍wɛ̄ɛ̄, nɔ̍ kpāāyāa̍ kpo̍u̍ wo̍, ya̍ so̍ō ni̍.”

²⁴Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō mēna̍ŋ po̍, mbo̍ dīmī a̍a̍, “Nyɛ̄ o̍ nyɛ̄ ya̍ I̍ kɛ̍ɛ̍si̍a̍a̍ le̍ tōsāa̍, mɛ̄ɛ̍ mī to̍sa̍ ndu̍. Nyɛ̄ ya̍ I̍ di̍mi̍ le̍ tōsāa̍ a̍ wāŋnda̍ ha̍ā wo̍, nyɛ̄ o̍ nyɛ̄ tɛ̍ɛ̍mbūū ndu̍ le̍.

²⁵I̍ cho̍ wāŋnda̍ Āsi̍i̍līāā hūnɔ̄ɔ̄ tɛ̄ɛ̄mbūū o̍ lɛ̄ŋndē nīle̍ŋ ni̍ŋ I̍sɔ̄lūɛ̄ī, ndu̍yɛ̍ mī ni̍ɔ̍u̍ nīɔ̄ū nda̍ a̍ lābɛ̄ŋgu̍ o̍ pēmbūŋ nūu̍ŋ chōo̍. Nyɛ̄ kīndīlāā nda̍ chō wānāā nīa̍a̍ hāndɔ̄ɔ̍ chōo̍ wo̍, I̍ cho̍ nda̍ ndu̍ fāŋā chōo̍, ndu̍yɛ̍ mī to̍sa̍ mī wōlɔ̄ɔ̄lā lūsu̍lɛ̍i̍la̍ nda̍ ha̍ndu̍ nda̍ o̍ lēbōl la̍ŋ lā fāŋa̍ŋ nda̍ o̍ lēbōl.

²⁶Nyɛ̄ ya̍ Mɛ̄lɛ̄ka̍ kɛ̄ɛ̄si̍a̍a̍ le̍ chi̍e̍ēŋndo̍ ho̍ō kpo̍u̍ wo̍ ndu̍ cho̍ ko̍ŋ ni̍. Ndu̍yɛ̍ bāa̍ chō ya̍ ni᷅ŋ ō hēēlāā chōo̍ le̍ lɛ̄ŋnde̍ sōŋɔ̄ɔ̍ a̍ nyɛ̄ pālāa̍.”

²⁷Mɛ̄lɛ̄ka̍ Ya̍a̍wɛ̄ɛ̄, nɔ̍ kpāāyāa̍ kpo̍u̍ wo̍, ō chīi̍ kɛ̄ɛ̄sīāā le̍ he̍ī tōsāa̍. Ō hēēlu̍ bāa̍ le̍ wāŋnda̍ sōŋɔ̄ɔ̍ a̍ nyɛ̄ pālāa̍, ndu̍yɛ̍ wānā o̍ wānā cho̍ mbō nɔ̄la̍ ndu̍ kpāā le̍.

²⁸Wɔ̄sī Māsā Bɛ̍ndōo̍ E̍ha̍a̍sī o̍ vi᷅ wo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ yōōŋgōo̍ ho̍ō le̍ wāŋnda̍ Fīli̍i̍tīāā. Mbo̍ dīmī āā,

²⁹“Wāŋnda̍ Fīli̍i̍tīāā, lā du̍a̍u̍nu᷄ŋ nya̍a̍le̍ le̍ mɛ̄ɛ̍ Māsa̍ wa̍ nya̍ nyɛ̄ pālāa̍ tūsīo̍o̍ chōo̍ wo̍ ō vī yɛ̄ le̍. Māsāa̍ ho̍ō tē ō wa̍ māā yɔ̄ŋɔ̄ɔ̄ pɛ̍, ō wa̍ māwāā mɛ̄ɛ̍ kɛ̄ūwo̍ ō chō nu̍a̍ā yɛ̍, kɛ̍ kɛ̄u̍ mi̍i̍ŋgū ni᷅ŋ o̍ fōōfo̍ ndɔ̄ɔ̍ wo̍, ndu̍ bɛ̍ɛ̍ hi̍a̍ū ni̍ŋ le̍wɔ̍ū a̍ ndu̍. Ndu̍yɛ̍ kɛ̄u̍ mi̍i̍ŋgū ni̍ŋ ko̍ŋ o̍ fōōfo̍ ndɔ̄ɔ̍ wo̍, kɛ̄ūwāā wɔ̄ɔ̍ŋ wɔ̍ɔ̍ŋ nda̍, a̍ hu̍u̍lū le̍ wāna̍ chi̍o̍o̍ lɔ̄wāa̍ wa̍, nda̍ fu̍lā ni̍ŋ o̍ ndu̍ ni̍ŋ ni̍.

³⁰Te̍le̍ŋ cho̍ fūūlūū, wānāa̍ ta̍mbu̍ ma̍ hīāū wāŋnda̍ kpo̍u̍ wa̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ wā māā wānā ma̍ndāā lāsāā le̍ nda̍, ndu̍yɛ̍ wānāā bā hāvɛ̍i̍ya̍a̍ bɛ̍ndūa̍a̍ cho̍ o̍ lɛ̄ŋnde̍ŋ nde᷅ŋ ni᷄ŋ nda̍, mā wānu̍ŋ a̍ kɔ̄ltā nyūlū, nyɛ̄ o̍ nyɛ̄ yɔ̍nūŋ nda̍ le̍. Kɛ̍ nya̍, I̍ cho̍ tōsā mī yīmā bɛ̄ndūa̍ŋ mā chīi̍ nya̍, mī mā bāsu̍ nya̍ tɛ̍ɛ̍. I̍ cho̍ tōsā wāŋndo̍ ō pīlɛ̍ bɛ̍ɛ̍ o̍ lo᷅ ni̍ŋ yo̍o̍mū le̍.

³¹“Nya̍ wānā o̍ wāna̍ cho̍ o̍ chi̍o̍o̍ŋ Fīli̍i̍tīāā, lā cha᷄ŋ mī lā kōŋu̍l chōo̍ cho̍o̍ kpe̍le̍ŋ. Sīōōŋīī bɛ̄ndūe̍i̍ ī bīi̍ nya̍ pɔ̍ɔ̍, nya̍ wāŋnda̍ Fīli̍i̍tīāā kpo̍u̍, fo̍ndōle̍, nyɛ̄ pālāā bɛ̄ndōo̍ ō kōma̍l nya̍. Chu̍ndo̍o̍ kūmbū bā lūāŋndo̍ kpu̍, a̍ hūnɔ̄ɔ̄ pūa̍a̍ chɔ̄ūwāā kpāāyāā bɛ̍ndūa̍a̍ ā chō wo̍. Ndu̍yɛ̍ pūa̍a̍ chɔ̄ūwāā cho̍ hūnɔ̄ɔ̍ wa̍, nda̍ kpo̍u̍ ō kɛ᷅ o̍ kɛ᷅ chō ō bɛ̄ɛ̄ndīāŋ le̍ sɔ̍ŋgɔ̄ɔ̍.

³²“Ki̍i̍la̍a̍ cho̍ chɔ̄nɔ᷄ŋ o̍ lɛ̄ŋndē lēŋ ni᷄ŋ mā hīŋ nda̍, ō yɛ̄ɛ̍nɛ̍ na̍a̍ ŋ̄ chō yɛ̄ nda̍ dīmūl? Ŋ̄ dīmu̍lu᷅ŋ nda̍ āā, ‘Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄ndi̍a̍a̍ Sa̍a̍yɔ̍ŋ ō kālā ka̍lā yɔ̄ŋi̍ ya̍a̍mɔ̍ɔ̍wa̍ bīi̍ ndu̍. Wānāā ndūa̍a̍ cho̍ o̍ sāŋgāa̍ ni᷄ŋ nda̍, ā nɔ̄lā ni᷅ŋ mā kūɛ̄ lo̍ŋ mā kɔ̍ wa᷅ lo̍ŋ, nyɛ̄ o̍ nyɛ̄ yɔ̍nūŋ nda̍ le̍.’ ”