Read Southern Kisi Āīsa̍yā 15 Bible Online

Āīsa̍yā 15 - Southern Kisi bible

Āīsa̍yā 15

¹Yōōŋgū Mɛ̄lɛ̄ka̍ yɔ̄ŋgu̍ a̍ lɛ̄ŋndē Mo̍wa̍bīle̍ŋ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, “Chi̍e̍e̍ bɛ̍ndōo̍ A̍ā, a̍ chi̍e̍e̍ bɛ̍ndōo̍ Ki̍a̍ā, ŋ̍ cho̍ o̍ lɛ̄ŋndē Mo̍wa̍bīle̍ŋ ni᷄ŋ ndo̍ŋ, ŋ̄ tāmbu̍ mi̍ ŋ̄ sīmnu᷄ŋ pɔ᷅mnda̍ŋ.

²Wāŋnda̍ Di̍bɔ̄ŋ chi̍e̍e̍, a̍ he̍l o̍ fo̍ndāŋndā ndāla̍ lāsōōlu̍u̍la̍ bɛ̍ndūla̍ŋ le̍ mā kɔ̍ cha᷅ŋ. Wāŋnda̍ Mo̍wa̍bī a̍ cho̍ cha᷄ŋnda̍ īmɔ̍nɛ̍la̍ŋ kpe̍e̍kpe̍i̍ le̍ chi̍e̍e̍ŋ ndāa̍ŋ, mu̍ŋ yɔ̍nūŋ ni̍ māā Ni̍bɔ̄ a̍ Mɛ̍di̍bā. Ā sēndi̍ yu̍ŋgu̍lta̍ŋ ndu̍yɛ̍, ma̍ sēndī sīɛ̍i̍yo̍ŋ kpo̍u̍ le̍ kɔ̄ltā ndāla̍ ta̍mbɛ̍i̍la̍ŋ chɔ̄mndo̍.

³Wāŋnda̍ wōūnu̍ŋ nyɛ᷅lā lābɛ̍kīla̍ŋ ma̍ wā bālɔ̄ɔ̍ o̍ nɛ̄īla̍ bɛ̍ndūla̍ŋ le̍ kɔ̄ltā ndāla̍ ta̍mbɛ̍i̍la̍ŋ chɔ̄mndo̍. Wāŋnda̍ chō cha᷄ŋnda̍ŋ kpe̍e̍kpe̍i̍ mī mɛ̍mi̍a̍ŋ mā tūāl nda̍ kpa̍sū kpāsū, ndu̍yɛ̍ mā chɔ̄m mɔ̍nɔ̍ŋ, o̍ chīɛ̄īla̍ŋ chōo̍ ni̍, a̍ o̍ fo̍ndāŋndā nda̍ bīī bɔ᷅ŋa᷅ŋndā chi̍e̍e̍la̍ŋ nda̍ŋ.

⁴Wāŋnda̍ Hɛ̍si̍bɔ̄ŋ chi̍e̍e̍ ni̍, a̍ wāŋnda̍ Īlīa̍a̍lɛ̄ɛ̄ chi̍e̍e̍, ā chō cha᷄ŋnda̍ŋ chōo̍ cho̍o̍ kpe̍e̍kpe̍i̍. Wānā lo᷅ Cha̍ha̍sī chi̍e̍e̍ pɔ̍ mā tūēī nda̍ cha᷄ŋnda̍ŋ. So̍vɛ̄i̍ya̍ Mo̍wa̍bī bɛ̍ɛ̍ sīōōŋnde̍ bīī nda̍ ma̍ wā cha᷄ŋnda̍ŋ chōo̍ cho̍o̍ kpe̍le̍ŋ kpe̍le̍ŋ. Kɔ̄lta̍ŋ lā lāāsi̍a̍ŋ nda̍ ni᷄ŋ kpo̍u̍ a̍ sīōōŋnde̍.

⁵Mɔ̍nɛ̍i̍ chō o̍ kɔ̄l nūu̍ ni᷄ŋ bɔ̍ɔ̍ le̍ Mo̍wa̍bī. Wānāā chɔ̄ūwo̍ ō sōli̍ Mo̍wa̍bī wa̍ ā sɛ̄ŋi̍ŋ kpo̍u̍, ha̍ā kūɛ̄ So̍wāā chi̍e̍e̍ pɔ̍, mi̍ ha̍ā kūā Ɛ̄kīla̍tī Sīɛ̄līsi̍yā chi̍e̍e̍ pɔ̍ɔ̍li̍. Ā ti᷄ŋ ā chō hēēlōo̍ a̍ nɛ̄i̍ ku̍ɛ̄ Lu̍hi̍tī chi̍e̍e̍ wo̍ a̍ cha᷄ŋnda̍ŋ. Ha̍ā ā nyāānu̍ŋ Ho̍lɔ̍nīm chi̍e̍e̍, ndu̍yɛ̍ ā chō kɔ̄la̍ŋ a̍ cha᷄ŋnda̍ īmɔ̍nɛ̍la̍ŋ kpe̍e̍kpe̍i̍, fo̍ndōle̍, le̍ tɛ̄ɛ̄mbūū nda̍ tɛ̄ɛ̄mbu̍u̍ nda̍ wo̍.

⁶Pēē pɔ̍mbɔ̄ɔ̍ Ni̍mi̍lūīm o̍ ve̍la̍ sɛ̍ɛ̍ŋ. Bi᷄l ho̍lnu̍ŋ pe̍ē ko̍ŋ ndo̍ kpo̍u̍ ō nyāma̍li̍a̍a̍. Tɔ̄lɔ̄ɔ̄la̍ŋ kpo̍u̍ lā vīŋnu᷄ŋ. Wānā se̍e̍lūŋ ndɛ̍ bīl o̍ bīl pūīyāā le̍.

⁷Wāŋnda̍ Mo̍wa̍bī, a̍ cho̍ o̍ lɛ̄ŋndē dɛ̍ŋgbɛ̍le̍ cho̍ o̍ pēmbo᷄ŋ tɛ̄ɛ̄ŋ mi̍ yɔ̄mīī wi̍lōō ve̍ ī wā lo̍ŋ nda̍, ā chō tāŋɔ̄ɔ̍ kpe̍e̍kpe̍i̍ mā nyāānūŋ. Sūl o̍ sūl nda̍ chūūŋgi̍a̍a̍ mbo̍ wā nda̍ o̍ lābā chīɛ̄īla̍ŋ ni᷄ŋ, ā chō tāŋnɔ᷄ŋndo̍ a̍ ndu̍ kpo̍u̍.

⁸Cha᷄ŋnda̍ŋ lā tīu̍ o̍ lɛ̄ŋndē Mo̍wa̍bīle̍ŋ ni᷄ŋ si̍lɔ̍. Wānāa̍ cho̍ Ɛ̍ki̍lɛ̄m chi̍e̍e̍ a̍ Bīɛ̄ɛ̄lu̍i̍līm chi̍e̍e̍ pɔ̍ wa̍, ā chō wāŋnda̍ tūēīyɔ̄ɔ̍ cha᷄ŋnda̍ŋ o̍ lɛ̄ŋndē Mo̍wa̍bīle̍ŋ ni᷄ŋ.

⁹Mɛ̄ŋnda̍ŋ o̍ Pīo̍o̍ Di̍bɔ̄ŋ chi̍e̍e̍ mā yɔ̄nu̍ŋ ma̍ si̍a̍ŋā yɔ̍ɔ̄ a̍ kōo̍ma̍ wāŋndā chi̍e̍e̍ya̍a̍ nda̍ chō dīūwo̍ wa̍. Ndu̍yɛ̍ ya̍ Mɛ̄lɛ̄ka̍ Ya̍a̍wɛ̄ɛ̄, I̍ nɔ̍ wɔ̍ bɛ̍ɛ̍ le̍ hūnɔ̄ɔ̍ a̍ nyɛ̄ pālāā chēle̍ŋ Di̍bɔ̄ŋ chi̍e̍e̍. Wāŋnda̍ ā ti᷄ŋ ā hɛ̄lu᷄ŋ ya̍a̍mɔ̍ɔ̍wa̍ ma̍ lō yōōmū o̍ lɛ̄ŋndē Mo̍wa̍bīlē lēŋ ni᷄ŋ. Kɛ̍ I̍ cho̍ kpɔ̍kūŋnda̍ yɔ̄ŋ mā kɔ̍ de᷅l nda̍ chōo̍ mā dīu̍ nda̍.”