Read Southern Kisi Āīsa̍yā 16 Bible Online

Āīsa̍yā 16 - Southern Kisi bible

Āīsa̍yā 16

¹Nya̍ wāŋ bɛ̄ndūa̍a̍ o̍ lɛ̄ŋnde̍ŋ nde᷅ŋ ni᷄ŋ, lā vīo̍m wa᷅ŋndo̍ chɔ̄nɔ᷄ŋndo̍ Sɛ̍lā chi̍e̍e̍ a̍ sāā fɔ̍ŋndu̍a̍a̍, mbō kēēku̍ a̍ lɛ̄ŋndē po̍lte̍ŋ mbō kūɛ̄ o̍ Pēmbīī Chūlu̍sɛ̄lɛ̄mnde̍ chōo̍, mbō yōo̍ Māsa̍ cho̍ lo̍ŋ ndo̍ māā kē.

²Wāŋ lāāndūa̍a̍ Mo̍wa̍bī a̍ cho̍ hēēlōo̍ a̍ tūūsōo̍ A̍nɔ̄ŋ o̍ pēēlo̍ kpe̍e̍kpe̍i̍, le̍ tāŋɔ̄ɔ̍ mā nyāānu̍ŋ ya̍a̍mɔ̍ɔ̍wa̍. Mɛ̄ɛ̍ nda̍ sōlī nu̍a̍ā yōūwa̍ mā tɛ̄ɛ̄mbu̍u̍ wāa̍ŋīī ndɛ̄i̍, mā wa̍ bālɔ̄ɔ̍ īyīīye̍ yɛ̍, le̍nde̍ wāŋ lāāndūa̍a̍ ha̍ā ā chō ni᷅ŋ ni̍.

³Ā chō wāŋnda̍ Chu̍dā dīmūllo̍ kpe̍e̍kpe̍i̍ āā, “Lā māla̍ na̍a̍ fɔ̍. Lā chɔ᷄m na̍a̍ nyɛ̄ na̍a̍ ŋ̄ tōsa̍ wo̍. Lā chīīndi̍a̍a̍ na̍a̍ ya̍a̍mɔ̍ɔ̍wa̍a̍ nāa̍ o̍ bā fɔ̍. Ŋ̄ vīāŋnūŋ ndɔ̍ nya̍ o̍ bā bɛ̄ŋgu̍, mɛ̄ɛ̍ pāa̍le̍ŋ lē kīāndū nu̍a̍ā mī lē wa̍ nɛ̄ī bɛ̄ndōo̍, mī wāŋndo̍ kɔ̍ cha᷅l o̍ yɔ̄mndo̍ bɛ̄ŋgu̍ le̍ kɔ̄l nyūlōo̍ sɔ̄lāa̍ yɛ̍. Ŋ̄ chō ya̍a̍mɔ̍ɔ̍wa̍a̍ nāa̍ nyāānɔ᷄ŋndo̍, yāndi̍i̍ lā vīo̍ŋ na̍a̍ fɔ̍, lā pi̍sī na̍a̍ ya̍a̍mɔ̍ɔ̍wa̍a̍ nāa̍ o̍ bā le̍.

⁴Ya̍a̍mɔ̍ɔ̍wa̍ sōli̍ na̍a̍ o̍ lɛ̄ŋndē Mo̍wa̍bīle̍ŋ ni᷄ŋ, yāndi̍i̍ lā chɛ᷄l na̍a̍, mī ŋ̄ cha᷄l o̍ lɛ̄ŋndē nyāle̍ŋ ni᷄ŋ fɔ̍. Lā mānda̍ na̍a̍ yɔ̄ŋi̍ nda̍ tɛ̄ɛ̄mbūū na̍a̍.” Wāŋnda̍ Mo̍wa̍bī, ya̍a̍mɔ̍ɔ̍wa̍a̍ nyāa̍ cho̍ nya̍ ha̍ā nyɛ̄ pālāa̍ tūsīo̍o̍ chōo̍ wa̍, ā chō hūnɔ̄ɔ̄ mɛ̄ɛ̄lū. Le̍ fɛ̍ɛ̍ŋ a̍ fɛ̍ɛ̍ŋ ā de᷅l lɛ̍ nya̍ chōo̍ a̍ sɔ̍ŋgɔ̄ɔ̍, ndu̍yɛ̍ mā tɛ̄ɛ̄mbu̍u̍ lɛ̄ŋndē nyāle̍ŋ te̍.

⁵A̍ te̍le̍ŋ ko̍ŋ, wāna̍ fu̍la̍ o̍ pūlāle̍ Dēēve̍le̍ŋ chōo̍ wo̍, ō sīmnu᷄ŋ ni̍ŋ ma̍sā bɛ̍ndōo̍. Ndu̍yɛ̍ wāna̍ si̍mnūŋ ni̍ŋ ko̍ŋ Māsāa̍ wo̍, māsāle̍ ndɔ̄le̍ŋ lē wā ni̍ŋ sa̍kpō, ndu̍yɛ̍ mbō wa̍ wāna̍ īkɛ̄ndɛ̄. Ō wā ni̍ŋ wa᷅na̍ ke̍le̍ŋa̍ tōnya̍a̍ dīmī wāŋnda̍ tɛ̄ɛ̄ŋ, ndu̍yɛ̍ le̍ te̍le̍ŋ o̍ te̍le̍ŋ mbō chē māā sɔ̄ɔ̍ŋ chō dīmi᷄ŋndo̍ wāŋnda̍ tɛ̄ɛ̄ŋ o̍ nɛ̄ī sa̍kpōo̍ chōo̍.

⁶Wāŋnda̍ Chu̍dā a̍ cho̍ sūɛ̍i̍ a̍ Mo̍wa̍bī o̍kɔ̄ɔ̄ mā dīmī āā, “Ŋ̄ tūēī bɔ̍ɔ̍ a̍ yōŋga̍ wāŋnda̍ ha̍ā o̍kɔ̄ɔ̄, mɛ̄ɛ̍ nda̍ wa̍ wānāā yōŋgāā bɛ̍ndū yɛ̍. Ŋ̄ tūēī mɛ̄ɛ̍ nda̍ wa̍ wānāā wa̍su̍ bɛ̍ndū, ndu̍yɛ̍ ma̍ nɔ̄ yōŋgāa̍, o̍ ko̍ŋ kɔ̍ɔ̍lī, ma̍ wā wānāā hɔ̄lāā hēēlāā bɛ̄ndū yɛ̍. Kɛ̍ yōŋgā o̍ yōŋgā nda̍ wa̍ kīōlɔ̄ɔ̍ fo̍ndō fu̍u̍ o̍ wa̍ ni̍.”

⁷Le̍la̍ŋ wāŋnda̍ Mo̍wa̍bī a̍ cho̍ kōŋu̍l cho̍o̍ cho̍o̍ kpe̍le̍ŋ. Nda̍ kpo̍u̍ kɔ̄lta̍ŋ lā chō nda̍ tāmbu̍, ndu̍yɛ̍ mā cha᷄ŋ cha᷄ŋ īmɔ̍nɔ̍ɔ̍ le̍ lɛ̄ŋndē Mo̍wa̍bīle̍ŋ. Ā yīyāŋ ni̍ŋ a̍ nyɛ̄ dīāā nda̍ a̍a̍ di̍ā Kīāā Hɛ̄lu̍ɛ̍sī chi̍e̍e̍ wo̍, mī kɔ̄lta̍ŋ lā tāmbu̍ nda̍ mā kōŋu̍l chōo̍ cho̍o̍ kpe̍le̍ŋ.

⁸Tɔ̄lɔ̄ɔ̄la̍ŋ o̍ chīɔ̍ɔ̍ŋ ni᷄ŋ Hɛ̍si̍bɔ̄ŋ kpo̍u̍ lā chūū tāmbu̍. O̍ ko̍ŋ kɔ̍ɔ̍lī, kpe̍le̍la̍ mākīle̍pīi̍la̍ŋ Si̍bi̍mā chi̍e̍e̍ kpo̍u̍, la̍ŋ bɛ̍ɛ̍ la̍ chu̍ū tāmbu̍. Kpe̍le̍la̍ kɛ̍ndɛ̄ kɛ̍ndɛ̄lā mākīle̍pīi̍la̍ŋ kpo̍u̍, Māsāa̍ o̍ lɛ̄ŋnde̍ ni᷄ŋ a̍ hu̍ŋ tɛ̍ɛ̍mbūū la̍ŋ, ma̍ mīŋgī la̍ŋ lɛ̄ŋ mɛ̍mɛ̍. Kpe̍le̍la̍ mākīle̍pīi̍la̍ŋ nda᷅ŋ, te̍le̍ŋ pi᷅lɛ̍ ma̍ lō la̍ŋ tōsāa̍ mi̍ lā pɛ̄ŋgɛ̄la᷄ŋ mī lā fūūlūū Cha̍sɛ̄ɛ̄ chi̍e̍e̍ di̍, mi̍ lā fūūlūū vɛ̄lɛ̄ o̍ lɛ̄ŋnde̍ po̍lte̍ŋ ni᷄ŋ, ndu̍yɛ̍ mī lā fūūlūū vɛ̄lɛ̄ o̍ Pēe̍ Mɛ̄ŋmā Īhɛ᷄llo̍ di̍.

⁹Le̍la̍ŋ I̍ cho̍ cha᷄ŋ kpe̍le̍ŋ, le̍ kpe̍le̍la̍ mākīle̍pīi̍la̍ŋ Si̍bi̍mā, mɛ̄ɛ̍ wāŋnda̍ Cha̍sɛ̄ɛ̄ a̍ cha̍ŋ le̍ kpe̍le̍la̍ ndāla̍ mākīle̍pīi̍la̍ŋ yɛ̍. Mɛ̍mi̍a̍ŋ mā chō ya̍ tōlɔ̄ɔ̄ kpa̍sū kpāsū le̍ Hɛ̍si̍bɔ̄ŋ a̍ Īlīa̍a̍lɛ̄ɛ̄, fo̍ndōle̍, yɔ̄mīī kūāmɛ̄ī nda̍ a̍a̍ ke̍ndī pa̍a̍ndū mī ndi̍ i̍i̍ to̍sa̍ mī wāŋnda̍ nda̍ a̍a̍ dɔ̍u̍nu᷄ŋ nya̍a̍le̍ ve̍ kpo̍u̍, ī chō lɛ̍ le̍.

¹⁰Kɔ̄l kɛ̄ndɛ̄ bɛ̄ndū wāŋnda̍ nda̍ a̍a̍ to̍sā o̍ chīɔ̄ɔ̄ŋ ndāa̍ŋ kōwɔ̄ɔ̍ ni᷄ŋ mā sōlī cho̍ndu̍ŋ nya̍a̍lo̍ŋ ndo̍ kpo̍u̍, kɔ̄l kɛ̄ndɛ̄ kōŋ ō cho̍ lɛ̍ hāū le̍. Wānā o̍ wānā tu̍i̍ī lɛ̍ ŋ̄chōndu̍, ɔ̄ɔ̄ bɔ̄ɔ̄lūū kɔ̄l kɛ̄ndɛ̄ o̍ kpe̍le̍ mākīle̍pīi̍ ni̍ŋ te̍. Wānā o̍ wānā wa̍a̍yīāā lɛ̍ mākīle̍pīi̍ le̍ māmūɛ̄ī tōōsīāā le̍. Bɔ̄ɔ̄lūū kɔ̄l kɛ̄ndɛ̄ wānā a̍a̍ tu̍ɛ̍ī pa̍a̍ndū wo̍ kpo̍u̍, wānā tu̍i̍ī lɛ̍ ndu̍ le̍.

¹¹Mɔ̍nɛ̍i̍ bɛ̍ndūe̍i̍ chō o̍ kɔ̄l nūu̍ ni᷄ŋ bɔ̍ɔ̍ le̍ lɛ̄ŋndē Mo̍wa̍bīle̍ŋ. Kɔ̄l nūu̍ ō tāmbu̍ o̍ bɔ̄ɔ̍ le̍ Kīāā Hɛ̄lu̍ɛ̍sī chi̍e̍e̍.

¹²Sāŋgā fo̍ndō fu̍u̍ ko̍ni̍ wāŋnda̍ Mo̍wa̍bī a̍ ku̍ā ni̍ŋ o̍ lūāŋūŋ ndāa̍ŋ a̍ o̍ fo̍ndāŋndā ndāla̍ lāsōōlu̍u̍la̍ŋ ni̍. Ā kɔ̍ bɛ̍ɛ̍ o̍ chīɛ̄īlā ndāla̍ pi̍ɛ̍i̍yāā mɛ̄lɛ̄ka̍la̍ŋ ni᷄ŋ mā pīɛ̍i̍, ā sɔ̍lā ni̍ŋ ma̍lā o̍ mālā le̍.

¹³Mɛ̄lɛ̄ka̍ Ya̍a̍wɛ̄ɛ̄ o̍ so̍ō ni᷅ŋ dīōmnda̍ŋ nda᷅ŋ pāāndū a̍ Mo̍wa̍bī o̍kɔ̄ɔ̄.

¹⁴Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Chɔ̍ŋ na̍nu᷄ŋ mbō chīŋa̍ a̍ wɔ̄sīla̍ŋ lā yāa̍, bɛ̄ɛ̄le̍ Mo̍wa̍bī o̍ nɔ̍ le̍ŋ lē chō hūnɔ̄ɔ̄ chūwɔ̄ɔ̄, lātūlu̍ a̍ wānāā kāāku̍u̍wāā bɛ̄ndūāā o̍ nɔ̍ wa̍. Ndu̍yɛ̍ wānāa̍ lo᷅ ni̍ŋ yo̍o̍mū Mo̍wa̍bī wa̍, ā ve᷅ ni̍ŋ a̍ bɔ̍ɔ̍ le̍, ndu̍yɛ̍ ā nɔ᷅ ni̍ŋ kpa̍a̍yā o̍ kpāāyā le̍.”