Read Southern Kisi Āīsa̍yā 17 Bible Online

Āīsa̍yā 17 - Southern Kisi bible

Āīsa̍yā 17

¹Yōōŋgū Mɛ̄lɛ̄ka̍ Ya̍a̍wɛ̄ɛ̄ yɔ̄ŋgu̍ a̍ Dāma̍si̍kɔ̍ɔ̄ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, “Dāma̍si̍kɔ̍ɔ̄ o̍ cho̍ hūnɔ̄ɔ̄ tāmbu̍, fɛ̍ɛ̍ŋ a̍ fɛ̍ɛ̍ŋ ō ve᷅ lɛ̍ chi̍e̍e̍ le̍. Ō chō hūnɔ̄ɔ̄ sīmnɔ᷄ŋ be̍mbe̍la̍ŋ kpo̍so̍ŋ.

²Chi̍o̍o̍ŋ o̍ lɛ̄ŋndē Si̍i̍lūīāle̍ŋ ni᷄ŋ, wāŋnda̍ chō mu̍ŋ hūnɔ̄ɔ̄ mālɔ̄ɔ̄ mī ŋ̄ lo̍ fo̍ndō le̍ fɛ̍ɛ̍ŋ a̍ fɛ̍ɛ̍ŋ. Ŋ̄ chō hūnɔ̄ɔ̄ sīmnɔ᷄ŋ fo̍ndāŋndā sāa̍ a̍ nāūwa̍ ā dīā mā hīnīŋ nda̍ŋ. Ndu̍yɛ̍ wānā o̍ wānā ve᷅ ni̍ŋ mbō kpēŋa̍ nda̍ le̍.

³Chi̍e̍e̍ŋ nɔ̍ sāāsāla̍ ka̍lā ka̍lāla̍ŋ lā bālāā I̍sɔ̄lūɛ̄ī yo̍ŋ kpo̍u̍, ā chō mu̍ŋ hūnɔ̄ɔ̄ tɛ̄ɛ̄mbūū. Ndu̍yɛ̍ Dāma̍si̍kɔ̍ɔ̄ bɛ̍ɛ̍ kpāāya̍ lēmāsā bɛ̄ndū o̍ nɔ̍ wo̍ ō chō hūnɔ̄ɔ̄ chūwɔ̄ɔ̄. Wānāa̍ lo᷅ ni̍ŋ yo̍o̍mū Si̍i̍līāā wa̍, nda̍ bɛ̍ɛ̍ si̍ɔ̍mbu̍la̍ bɛ̍ndūla̍ŋ lā chō nda̍ hūnɔ̄ɔ̄ bīyɔ̄ɔ̄ mɛ̄ɛ̍ i̍ yɔ̍nu̍ŋ a̍ wāŋnda̍ I̍sɔ̄lūɛ̄ī yɛ̍. Ya̍ Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍, ya̍ so̍ō ni̍.

⁴“A̍ te̍le̍ŋ ko̍ŋ, tɔ̍ɔ̍ bɛ̍ndū I̍sɔ̄lūɛ̄ī ndu̍ o̍o̍ nɔ̍ wo̍ ō chō hūnɔ̄ɔ̄ nyūm. Mɛ̄ɛ̍ nāa̍ ō bīī nu̍a̍ā wāŋndo̍ mbō chīi̍ ndu̍ sɔ̄ɔ̄sīāā ō nɔ᷅ lɛ̍ māyōōmū o̍ māyōōmū le̍ yɛ̍, le̍nde̍ i̍ yɔ̍nūŋ ni̍ŋ a̍ I̍sɔ̄lūɛ̄ī ni̍.

⁵Mɛ̄ɛ̍ nda̍ kīlī nu̍a̍ā tɔ̄lɔ̄ɔ̍ kpo̍u̍ o̍ kpe̍lo̍o̍ ni᷄ŋ yɛ̍, le̍nde̍ i̍ yɔ̍nūŋ ni̍ŋ a̍ I̍sɔ̄lūɛ̄ī ni̍. Mɛ̄ɛ̍ nda̍ kūāū nu̍a̍ā chīɔ̍ɔ̍ŋ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Lu̍ɛ̍fēm mā dīndī mu̍ŋ kōwɔ̄ɔ̍ yɛ̍, le̍nde̍ i̍ yɔ̍nūŋ ni̍ŋ a̍ I̍sɔ̄lūɛ̄ī ni̍.

⁶Kɛ̍ ndu̍yɛ̍ wāŋnda̍ I̍sɔ̄lūɛ̄ī a̍ chu̍ū ni̍ŋ kpo̍u̍ le̍, ā ti᷄ŋ ā lō ni̍ŋ yo̍o̍mū. Mɛ̄ɛ̍ nda̍ kēndī nu̍a̍ā ɔ̄li̍fīi̍ya̍ŋ, mī mā ti᷄ŋ mā lo᷄ o̍ tūllo̍ a̍ o̍ lɛ̄ūwo̍ŋ māpīlɛ̍ŋ yɛ̍, le̍nde̍ i̍ yɔ̍nūŋ ni̍ŋ ni̍. Ya̍ Mɛ̍lɛ̍ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, ya̍ so̍ō ni̍.”

⁷A̍ te̍le̍ŋ ko̍ŋ, wāŋnda̍ chō hūnɔ̄ɔ̄ mūli᷄ŋ o̍ wāna̍ to̍o̍si̍a̍a̍ nda̍ wo̍ lo̍. Ā chō hūnɔ̄ɔ̄ hɔ̄lla̍ mūlī, o̍ I̍sɔ̄lūɛ̍i̍ya̍ Mɛ̄lɛ̄ka̍ ndā Di̍a̍ndāa̍ lo̍ le̍ mālāa̍.

⁸Ā ti̍i̍ndāŋ ndɛ̍ ni̍ŋ ma̍āŋndā nda̍ pi̍la̍ tōōsi̍a̍a̍ a̍ bālā ndāla̍ŋ nda̍ŋ, kɛ̄lɛ̄ŋgāā nyɛ̄m nda̍ pīla̍ tōōsi̍a̍a̍ wo̍ŋ le̍ nda̍ mālā le̍, mu̍ŋ yɔ̍nūŋ ni̍ māā sūŋgbu̍ma̍ nda̍ tōōsi̍a̍a̍ māā vēla̍ŋ mɛ̄lɛ̄ka̍ ndāa̍ A̍si̍ɛ̍lūā wa̍ŋ, a̍ ma̍āŋndā nda̍ tōōsi̍a̍a̍ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēcho̍ō la̍ŋ.

⁹Tē te̍le̍ŋ ko̍ŋ ō fūūlu̍u̍ pɛ̍, chi̍e̍e̍ŋ ndāa̍ŋ nɔ̍ sāāsāla̍ ka̍lā ka̍lāla̍ŋ lā bālāā wo̍ŋ kpo̍u̍, ŋ̄ chō hūnɔ̄ɔ̄ pīɔ̄l mī ŋ̄ lo̍ pɔ̄mnda̍ŋ. Ŋ̄ chō hūnɔ̄ɔ̄ sīmnɔ᷄ŋ mɛ̄ɛ̍ chi̍e̍e̍ŋ Hi̍va̍i̍tīi̍ya̍, a̍ A̍mɔ̍lu̍a̍i̍tīi̍ya̍ ā ma᷄l ma̍ nyāānu᷄ŋ, mi̍ ŋ̄ lō pɔ̄mnda̍ŋ ndo̍ŋ ŋ̄ wa̍ yɛ̍, bōōndi̍i̍ I̍sɔ̄lūɛ̍i̍ya̍ ā hīŋ ma̍ mā hu᷄ŋ chu̍ā lɛ̄ŋndē ndāle̍ŋ nde̍.

¹⁰Le̍ sa̍bū mu᷅ŋ chō yɔ̄nɔ᷄ŋ a̍ nya̍ wo̍ cho̍ ni̍, māā le̍ mɛ̄ɛ̍ nya̍ lo̍ o̍ ko̍ŋ mi̍ lā pūɛ̄ɛ̄nu᷄ŋ a̍ Mɛ̄lɛ̄ka̍ nyāa̍, o̍ cho̍ wāna̍ chi̍i̍ndīāā nya̍ wo̍ yɛ̍, le̍ mɛ̄ɛ̍ nya̍ kɛ̄ɛ̍ le̍ lōōnɔ᷄ŋndo̍ a̍ wāna̍ ma̍ndā nya̍ māā pōū kpo̍o̍wa̍ bɛ̍ndū wo̍ yɛ̍. Yɔ̄ŋi̍ nya̍ tōsa̍ le̍nde̍ yɛ̍, mi̍ lā lō o̍ ko̍ŋ mi̍ lā tūāl yɔ̄mīī kūāmɛ̄i̍ kɛ̄ndɛ̄ kɛ̍ndɛ̄i̍ o̍ kpe̍le̍la̍ nyāla̍ŋ ni᷄ŋ, le̍ wāa̍ Mɛ̄lɛ̄ka̍a̍ wāŋnda̍ o̍ lɛ̄ŋīī chēle̍ŋnde̍ ni̍ŋ a̍ so̍o̍lūū wa̍ sōōlūūwo̍ lo̍ŋ.

¹¹Kɛ̍ nda̍ a̍a̍ yɔ̍ŋ bɛ̍ɛ̍ mī yɔ̄mīī kēŋ ndi̍ i̍i̍ su̍l o̍ nyūmnda̍ŋ mā pīlɛ̍ bɛ̄ŋgu̍, ndu̍yɛ̍ mī ndi̍ i̍i̍ so̍li̍ pe̍e̍ŋge̍la̍ŋ, mī ndi̍ i̍i̍ ya̍ndu̍ dīi̍mā ndɔ̄ɔ̍, tē kɔ̄l tāmbɛ̍i̍yo̍ a̍ nyɛ̄ nɛ̄īyāa̍ ō kōma̍l nya̍ pɛ̍, nya̍ a̍a̍ sɔ̍lā ni̍ŋ kōmɔ̄ɔ̄ yɔ̄mīī kēŋ mī ndu̍ o̍o̍ ma̍la̍ le̍.

¹²Lā tūe̍i̍ yɔ̍ sɛ̍lɛ̍ bɛ̍ndu̍ cho̍ bɔ̄ɔ̄lūūwo̍ wo̍ se᷅. Wānā tu̍e̍ī bɔ̄ɔ̄lūū bɛ̄ndū nda̍ chō wo̍ pɛ̍, āā mɛ̄ŋnda̍ŋ o̍ Pēe̍ Mɛ̄ŋmā Īhɛ᷄llo̍ ma̍ cho̍ bɔ̄ɔ̄lūūwo̍ īkpōku̍ kpo᷅ku̍i̍ bɛ̍ndūe̍i̍ ni̍. Lɛ̄ŋīī kpāāyɛ̄ī bɛ̍ndūe̍i̍ ī dɔ̄ɔ̄nu᷄ŋ na̍a̍ pi᷅lɛ̍ le̍ hūnɔ̄ɔ̍ sɔ̍ŋgɔ̄ɔ̍ a̍ nya̍. Ā chō hūnɔ̄ɔ̍ a̍ dēŋīo̍o̍ kpe̍e̍kpe̍i̍.

¹³Wānā tu̍e̍ī nda̍ hūnɔ̄ɔ̍ īkpūūve̍ pɛ̍, āā mɛ̄ŋmā kpāāyā mā bɛ̄ndūa̍ŋ ma̍ cho̍ lɔ̄ɔ̄nɔ᷄ŋndo̍ mi̍ mā wā īkpūūve̍ ni̍. Kɛ̍ Mɛ̄lɛ̄ka̍ chō nda̍ hūnɔ̄ɔ̄ dēŋūl mā mīīŋgu̍ a̍ kīlta̍ŋ. Ō chō nda̍ tōūwɔ̄ɔ̄ mbō kūɛ̄ a̍ nda̍ kɛ᷅, mɛ̄ɛ̍ hūēīye̍ ī bāsū nu̍a̍ā chu̍ndo̍o̍ o̍ pēmbo᷄ŋ chōo̍ mī ī kūɛ̄ a̍ ndu̍ kɛ᷅ kɛ̍ yɛ̍. Mɛ̄ɛ̍ hūēīyīī fēlēŋfēlēŋnde̍ ī kūā nu̍a̍ā a̍ bīl vēsɛ̍i̍yo̍ yɛ̍, le̍nde̍ o̍ ku̍ā ni̍ŋ a̍ nda̍ ni̍.

¹⁴Ā lūēī ni̍ŋ wa᷅ŋnda̍ sīōōŋīī bɛ̄ndūe̍i̍ o̍ nyūmnda̍ŋ mā pīlɛ̍ bɛ̄ŋgu̍. Kɛ̍ lɔ̍ɔ̍pa̍ mī pāa̍le̍ŋ lē sɛ̄, ō pīlɛ̍ bɛ̍ɛ̍ wānā se̍e̍lūŋ ndɛ̍ ni̍ŋ te̍. Wānāa̍ de᷅l ni̍ŋ na̍a̍ chōo̍, mā pūŋga̍ lɛ̄ŋndē nāā le̍ŋ nda̍, nyɛ̍ yɔ̍nūŋ ni̍ŋ a̍ nda̍ wo̍ ndu̍ wa᷅ ni̍ŋ ko̍ŋ ni̍.