Read Southern Kisi Āīsa̍yā 18 Bible Online

Āīsa̍yā 18 - Southern Kisi bible

Āīsa̍yā 18

¹Nyɛ̄ pālāa̍ bɛ̄ndōo̍ ō wā ni̍ŋ le̍ lɛ̄ŋnde̍ cho̍ o̍ pēēla̍ bɛ̍ndūla̍ŋ Īto̍o̍pīāā le̍e̍lōo̍ le̍ŋ, nāa̍ so̍o̍nu̍a̍a̍ ā chō ku̍ndālā bɛ̄ndūla̍ŋ nda̍.

²Wāŋnda̍ o̍ lɛ̄ŋnde̍ŋ nde᷅ŋ ni᷄ŋ ā vēm wāŋnda̍ hɔ̄ltē ndā a̍ yōōŋgōo̍. Wānāā nda̍ vēm nda̍ ā chō Pēē Bɛ̍ndōo̍ Na̍īl tāŋɔ̄ɔ̍ o̍ bēmbēla̍ŋ chōo̍. Nya̍ wānāā nda̍ vēm ha̍ā mi̍ lā wā kēlēŋā bɛ̄ndōo̍ wa̍, lā kɔ̍. Lā la̍kɔ̍ o̍ lɛ̄ŋnde̍ŋ ni᷄ŋ a̍ yōōŋgōo̍ kōŋ, lɛ̄ŋndē pēēla̍ŋ lā pīɔ̍u̍ le᷅ŋ a̍ būŋga᷄ŋ nde̍ŋ, lɛ̄ŋnde̍ nɔ̍ le᷅ŋ kpāāyā bɛ̍ndōo̍, ndu̍yɛ̍ mī lē kēī lɛ᷅ŋnde̍ yōmɔ̄ɔ̍ le̍ŋ, lɛ̄ŋndē wāŋnda̍ o̍ chi̍e̍ēŋndo̍ ni᷄ŋ kpo̍u̍ a̍ nɔ̍ le᷅ŋ sīōōŋnde̍ le̍ le̍ŋ nde̍ŋ. Lā dīmu̍l wa̍nāa̍ cho̍ ha̍ā ā vīlɛ̄ī kpo̍lōŋ kpōlōŋ, ndu̍yɛ̍ mi̍ kɔ̄ɔ̍le̍ŋ lē wā nda̍ kpɔ̍lɔ̄kɔ̍ kpɔ̍lɔ̄kɔ̍ wa̍ yōōŋgōo̍ kōŋ.

³Nya̍ wāŋnda̍ o̍ chi̍e̍ēŋndo̍ ni᷄ŋ kpo̍u̍, nya̍ wānā o̍ wāna̍ cho̍ o̍ chi̍e̍ēŋndo̍ ni᷄ŋ, lā wā to̍fāa̍, le̍ mī lā chē bēēndi̍ɛ̍ī wa᷅ ni̍ŋ o̍ he̍e̍lāā o̍ pēmbūŋ bɛ̄ndo᷄ŋ tūllo̍, le̍ wāa̍ māā tāāmāsi̍ le̍ chɔ̄ūwo̍ wo̍. Lā wa̍ ni᷅la̍ŋ yāŋɔ̄ɔ̍ le̍ mī lā tūēī bu̍lu̍ chɔ̄ū su̍a̍ā ni̍ŋ ndo̍.

⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “I̍ cho̍ wā o̍ fo̍ndā nī cha̍lāa̍ chōo̍ cho̍o̍ mī to̍fā lɛ᷅ŋ, le̍ mī che᷅ nyɛ̍ cho̍ yɔ̄nɔ᷄ŋndo̍ wo̍. Ndu̍yɛ̍ nyɛ̄ o̍ nyɛ̄ wā ni̍ŋ ya̍ o̍ hɔ̄l kpe̍nde̍ke̍le̍. Mɛ̄ɛ̍ pāa̍le̍ŋ lē wā nu̍a̍ā chōo̍ cho̍o̍ a̍ te̍le̍ŋ pāa̍le̍ ka̍lāa̍, nyɛ̄ o̍ nyɛ̄ ve᷅ le̍cho̍ō le̍ yɛ̍, le̍nde̍ ya̍ I̍ wa᷅ ni̍ŋ nyɛ᷅ o̍ nyɛ̄ chɔ̄ɔ̍ kpe̍nde̍ke̍le̍ ni̍. Mɛ̄ɛ̍ ha̍la̍ īkpūŋgbāa̍ ō wā nu̍a̍ā chōo̍ cho̍o̍ a̍ te̍le̍ŋ ku̍a̍u̍wāā ŋ̄chīɔ̍ɔ̍ yɛ̍, le̍nde̍ nyɛ̄ o̍ nyɛ̄ wa̍ ni̍ŋ ya̍ o̍ hɔ̄l kpe̍nde̍ke̍le̍ ni̍.

⁵Mɛ̄ɛ̍ wāŋndo̍ ō tūāl nu̍a̍ā kīle̍pīi̍ya̍ŋ, mī mā yāndu̍ mī mā kōm, te̍le̍ŋ ma̍ hu᷅ŋ le̍ dīūwɔ̄ɔ̍ wo̍ ki̍nɛ̍i̍, mā fu̍u̍lūū te̍le̍ŋ ke̍ndīāā le̍, mī wāŋndo̍ ō kīli̍ yɔ̄mīī mākīle̍pīi̍ye̍ ke̍ŋ, ndu̍yɛ̍ mbō kīli̍ lɛ̄ūwūŋ ndɔ̍ŋ kpo̍u̍ yɛ̍, le̍nde̍ ya̍a̍mɔ̍ɔ̍wa̍ ā tɛ̄ɛ̄mbūū ni̍ŋ wa᷅ŋnda̍ Īto̍o̍pīāā ni̍.

⁶Ā chō nda̍ hūnɔ̄ɔ̄ dīū kpo̍u̍, ndu̍yɛ̍ mī yōūwāa̍ cho̍ o̍ pēmbo᷄ŋ chōo̍ wa̍ a̍ vīsīāā yōndūa̍a̍ ā hu᷄ŋ di̍ō dīāllūŋ ndāa̍ŋ. Dīāllūŋ ndāāŋ vi̍lɛ̍i̍yo̍ŋ, mu̍ŋ wa᷅ ni̍ŋ nyɛ̍ dīa̍a̍ le̍ yōūwa̍ a̍ te̍le̍ŋ wɔ̄ɔ̄le̍ŋ ni̍, o̍ ko̍ŋ kɔ̍ɔ̍lī, a̍ te̍le̍ŋ lēsīāllo̍ ki̍nɛ̍i̍, mu̍ŋ vīsīāā yōndūa̍a̍ ā wā ni̍ŋ di̍o̍o̍ ni̍.

⁷“A̍ te̍le̍ŋ ko̍ŋ, lɛ̄ŋnde̍ cho̍ le᷅ŋ mi̍ pēēla̍ bɛ̍ndūla̍ŋ lā pīɔ̍u̍ le᷅ŋ a̍ būŋga᷄ŋ nde̍ŋ, lɛ̄ŋnde̍ nɔ̍ le᷅ŋ kpāāyāa̍, ndu̍yɛ̍ mī lē kēī lɛ᷅ŋnde̍ yōmɔ̄ɔ̍ le̍ŋ, lɛ̄ŋndē wāŋnda̍ o̍ chi̍e̍ēŋndo̍ ni᷄ŋ kpo̍u̍ a̍ nɔ̍ le᷅ŋ sīōōŋnde̍ le̍ le̍ŋ nde̍ŋ, lɛ̄ŋndē wānāā ndūa̍a̍ ā chō ha̍ā ā vīlɛ̄ī kpo̍lōŋ kpōlōŋ, ndu̍yɛ̍ ma̍ nɔ̄ kɔ̄ɔ̍le̍ŋ kpɔ̍lɔ̄kɔ̍ kpɔ̍lɔ̄kɔ̍ le̍ŋ nda̍, wāŋndā o̍ lɛ̄ŋnde̍ŋ nde᷅ŋ ni᷄ŋ, ā hūŋ ni̍ŋ a̍ nyɔ̄ɔ̍ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ māā lākē. Wāŋnda̍ ha̍ā ā chō hūnɔ̄ɔ̄ a̍ nyɔ̄ɔ̍ŋ mu᷅ŋ o̍ Pēmbīī Sa̍a̍yɔ̄ŋnde̍ chōo̍, nāa̍ nda̍ sōōlūū Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ wa̍.”