Read Southern Kisi Āīsa̍yā 19 Bible Online

Āīsa̍yā 19 - Southern Kisi bible

Āīsa̍yā 19

¹Yōōŋgū Mɛ̄lɛ̄ka̍ yɔ̄ŋgu̍ a̍ I̍chi̍pī o̍kɔ̄ɔ̄ wo̍ cho̍ ho̍ō ni̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̍ I̍chi̍pī, ō chō hūnɔ̄ɔ̍ o̍ ha̍la̍ hūmbu̍ cho̍ hūnɔ̄ɔ̍ a̍ kīlta̍ bɛ̍ndūla̍ŋ ndo̍ chōo̍. Sīōōŋnde̍ bīī mɛ̄lɛ̄ka̍a̍ wāŋnda̍ I̍chi̍pī a̍ pi̍ɛ̍īya̍, ma̍ wā nyīīyāa̍. Kɔ̄lta̍ŋ lā hīīlu̍ŋ wa᷅ŋnda̍ I̍chi̍pi̍ ni᷄ŋ kpo̍u̍ a̍ sīōōŋnde̍.

²Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ cho̍ tōsā mī sɔ̍ŋgɔ̍ɔ̍ ō de᷄l wāŋnda̍ I̍chi̍pī nda̍ pi̍la̍ tɛ̄ɛ̄ŋ. I̍ cho̍ tōsā mī pɔ̄mbɔ̄ɔ̍ a̍ bɛ̄ndōo̍ mā sɔ̄ŋga̍, ndu̍yɛ̍ mī wāŋndo̍ nda̍ wāna̍ nda̍ chīɛ̄ɛ̄li̍āŋndo̍ mā sɔ̄ŋga̍. O̍ ko̍ŋ kɔ̍ɔ̍lī, chi̍o̍o̍ a̍ chi̍o̍o̍ mā sɔ̄ŋga̍, ndu̍yɛ̍ māsāle̍ŋ a̍ māsāle̍ŋ mā sɔ̄ŋga̍.

³I̍ cho̍ tōsā mī kɔ̄lta̍ŋ lā hīīlu̍ŋ wa᷅ŋnda̍ I̍chi̍pi̍ a̍ sīōōŋnde̍, ndu̍yɛ̍ mī to̍sa̍ tūūlā ndāla̍ŋ kpo̍u̍ mī lā tāmbu̍. Wāŋnda̍ I̍chi̍pī a̍ nyu̍nā ni̍ŋ mɛ̄lɛ̄ka̍a̍ ndāa̍ le̍ mālāa̍, ndu̍yɛ̍ mā kūɛ̄ nāa̍ wānāā ŋ̄wāŋ vīlɛ̍i̍ya̍ chūā, le̍ mā nyūna̍l nda̍ wāŋ vīlɛ̍i̍ya̍ dīōm, o̍ ko̍ŋ kɔ̍ɔ̍lī, mā kōma̍l wānāā vīāmāā lāyāwāa̍ le̍ mā vi᷄m nda̍ yāwāla̍ŋ, ndu̍yɛ̍ mā kūā vɛ̍lɛ̄ o̍ māndi̍a̍a̍ lo̍.

⁴I̍ cho̍ wāŋnda̍ I̍chi̍pi̍ mālɔ̄ɔ̄ māsānɔ̍ ka̍lā ka̍lā bɛ̄ndōo̍ o̍ bā. I̍ cho̍ tōsā mī māsā kɔ̄l vēsɛ̍i̍ bɛ̍ndōo̍ ō nɔ̍ nda̍ kpāāyāa̍ chōo̍, mā wa̍ o̍ māsāle̍ ndɔ̄le̍ŋ bɛ̄ŋgu̍. Ya̍ Mɛ̄lɛ̄ka̍ Ya̍a̍wɛ̄ɛ̄, nɔ̍ kpāāyāa̍ kpo̍u̍ wo̍ ya̍ so̍ō ni̍.”

⁵Mɛ̄ŋnda̍ŋ o̍ Pīo̍o̍ Na̍īl ma̍ cho̍ hūnɔ̄ɔ̄ vēlā. Mā chō hūnɔ̄ɔ̄ vēsā kpa̍dī.

⁶Fo̍ndāŋndā nda̍ tōōsi̍a̍a̍ mī mɛ̄ŋnda̍ŋ mā chāŋ o̍ Pīo̍o̍ Na̍īl mī mā kēēkū lo̍ŋ nda̍ŋ kpo̍u̍, lā chō hūnɔ̄ɔ̄ chūŋ mī lā vēla̍. Pēēla̍ pɔ̍mbɔ̄la̍ŋ I̍chi̍pī kpo̍u̍, lā chō lō dɔ̄ɔ̄nīa̍ŋndo̍ mī lā vēla̍ kpa̍dī. Bi᷄l wu᷅l o̍ pēēla̍ŋ ndo̍ kpo̍u̍ ō chō hūnɔ̄ɔ̄ sīɔ̄ mbō vēsa̍ŋ.

⁷Tɔ̄lɔ̄ɔ̄la̍ cho̍ o̍ Pīo̍o̍ Na̍īl kɔ̍ŋgɔ̍ la̍ŋ kpo̍u̍, lā chō hūnɔ̄ɔ̄ vēsā. Nyɛ̄ o̍ nyɛ̄ nda̍ tɔ̄l o̍ chīɔ̍ɔ̍ŋ ni᷄ŋ Na̍īl kɔ̍ŋgɔ̍, ō chō hūnɔ̄ɔ̄ vēsā kpo̍u̍, ndu̍yɛ̍ mī hūēīye̍ bāsu̍ ndu̍ mī ī kūɛ̄nu᷄ŋ a̍ ndu̍.

⁸Wānāa̍ yɔ̍ɔ̍yā Na̍īl o̍ pēēlo̍ wa̍, ā chō hūnɔ̄ɔ̄ kɔ̄l tāmbū, mā bīī mɔ̍nɛ̍i̍. Wānāa̍ yɔ̍ɔ̍yā a̍ yālāla̍ŋ nda̍ ni̍, a̍ wānāa̍ wu̍ū do̍li̍ŋndo̍ŋ nda̍, nda̍ kpo̍u̍ ā nɔ᷅ lɛ̍ ni̍ŋ wa̍li̍ o̍ wa̍li̍ nda̍ tōsa̍ mā sɔ̄la̍ nyɛ̄ sɔ̄lāā le̍.

⁹Wānāa̍ to̍o̍sīāā ko̍lāla̍ wo̍mūlāāla̍ŋ a̍ tɔ̄lɔ̄ɔ̄ fi̍la̍sī wo̍ wa̍ kpo̍u̍, kɔ̄lta̍ŋ lā chō nda̍ hūnɔ̄ɔ̄ tāmbu̍. Wānāa̍ wo̍mūl mā tōōsīāā ko̍lāla̍ kɛ̍ndɛ̄ kɛ̍ndɛ̄la̍ŋ nda̍, kɔ̄lta̍ŋ lā chō nda̍ hūnɔ̄ɔ̄ lāāsīa̍ŋ kpo̍u̍.

¹⁰Wānāa̍ cho̍ māā sūŋgbu̍a̍ŋ le̍ lɛ̄ŋnde̍ŋ nde᷅ŋ nda̍, ā chō hūnɔ̄ɔ̄ yōmī kpo̍u̍. O̍ ko̍ŋ kɔ̍ɔ̍lī, wānā o̍ wāna̍ cho̍ wa̍llo̍ le̍ pāāwāa̍ o̍ lɛ̄ŋnde̍ŋ nde᷅ŋ ni᷄ŋ, kɔ̄ltā ndāla̍ŋ lā chō hūnɔ̄ɔ̄ tāmbu̍.

¹¹Wāŋ bɛ̄ndūa̍a̍ So̍wāŋ chi̍e̍e̍ dīɔ̄māā bɛ̄ndūa̍a̍ nda̍ chō ni̍. Māsāa̍ I̍chi̍pī wānāā ndūa̍a̍ kɔ̄l kālu̍a̍a̍ a̍ si̍lā ndu̍ wa̍, sīlālā īdīɔ̄mnda̍ŋ kpo̍sōŋ nda̍ chō ndu̍ ni̍. Kɔ̄l kālu̍ kūɛ̍ɛ̍nɛ̍ nya̍ līsāŋ yɛ̍, mī lā dīmūl Ma̍sāa̍ I̍chi̍pī māā, wānāā kɔ̄l kālu̍a̍a̍ bɛ̍ndūa̍a̍ ve̍lū na̍a̍ ni̍, o̍ pūlālē māsāa̍ māsīndīa̍a̍ chōo̍ na̍a̍ ŋ̄ fūla̍ ni̍.

¹²Māsāa̍ I̍chi̍pī, kūɛ̍ɛ̍nɛ̍ wānāā nūm a̍ si̍lāā kɔ̄l kālu̍a̍a̍ bɛ̍ndūa̍a̍ ā chō yɛ̄ ni᷅ŋ? Tē ā chō pɛ̍ wa̍nāā kɔ̄l kālu̍ le̍kɛ̍ndɛ̍ī, mɛ̄ɛ̍ ā chɔ᷄m ndɔ̍ nu̍m nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō kɛ̄ɛ̄si̍a̍a̍ le̍ tōsāa̍ a̍ I̍chi̍pī wo̍.

¹³Wāŋ bɛ̄ndūa̍a̍ So̍wāŋ chi̍e̍e̍ a̍ si̍mnu᷄ŋ di̍ɔ̄mnda̍. Wāŋnda̍ hūi̍ wānāa̍ cho̍ chīla̍ŋ Mɛ̍mfi̍sī chi̍e̍e̍ wa̍. Wānāa̍ cho̍ lɛ̄ŋndē I̍chi̍pīle̍ŋ chīla̍ŋ, ma̍ wā māā pāā kɔ̄ɔ̄ le̍ wāŋnda̍ wa̍, ā tōsa̍ mi̍ lɛ̄ŋndē I̍chi̍pīle̍ŋ lē bīāndū nɛ̄īyo̍.

¹⁴Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mi̍ wāŋnda̍ ha̍ā ā sīmnu᷄ŋ māā lādīɔ̄m. Ā tōsa̍ mi̍ wāŋnda̍ I̍chi̍pī a̍ ma᷅l nɛ̄īyo̍, ma̍ wā sɔ̄ɔ̍ŋ tōsāa̍ māā wānāā kōlāā. Mɛ̄ɛ̍ wānā ko̍lāā māmūɛ̄īyo̍ ō kūsī nu̍a̍ā, mbō kūā a̍ sīɛ̄ɛ̄līa̍a̍ o̍ kūsī kōŋ ni᷄ŋ yɛ̍, le̍nde̍ nda̍ yɔ̄nu̍ŋ ni̍.

¹⁵Wānā o̍ wānā cho̍ lɛ̍ I̍chi̍pī mbō hīŋ a̍ ma̍lāa̍ I̍chi̍pī o̍ nɛ̄ī o̍ nɛ̄ī ni̍ŋ te̍, wānā su̍lāā ni̍, wānā ta̍mbɛ̍i̍ ni̍, wāna̍ tɔ̍ɔ̍ ni̍, wānā yɔ̍ŋāā ni̍.

¹⁶Te̍le̍ŋ cho̍ fūūlūū wāŋnda̍ I̍chi̍pī a̍ cho̍ hūnɔ̄ɔ̄ sīmnɔ᷄ŋ māā ŋ̄wāŋ lāāndū. Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍, ō chō nda̍ hūnɔ̄ɔ̄ bāa̍ hēēlūl le̍ nda̍ sōŋɔ̄ɔ̍ a̍ dɛ̍nɛ̍ pa̍lāa̍ mī sīōōŋīī bɛ̄ndūe̍i̍ bīī nda̍ mā nyīīya̍ kpa̍kpā.

¹⁷Sīōōŋīī bɛ̄ndūe̍i̍ ī chō hūnɔ̄ɔ̄ wāŋnda̍ I̍chi̍pi̍ bīyɔ̄ɔ̄ le̍ wāŋnda̍ Chu̍dā. Wānā o̍ wāna̍ cho̍ I̍chi̍pī, tē ō hu᷄ŋ tu̍e̍ī pɛ̍ mī wāŋndo̍ vēēlu̍ lɛ̄ŋndē Chu̍dāle̍ŋ dīōla̍ŋ, sīōōŋīī bɛ̄ndūe̍i̍ chō ndu̍ bīyɔ̄ɔ̄, fo̍ndōle̍, nyɛ̄ Mɛ̄lɛ̄ka̍ Ya̍a̍wɛ̄ɛ̄, nɔ̍ kpāāyāa̍ kpo̍u̍ wo̍ ō kɛ̄ɛ̄si̍a̍a̍ le̍ tōsāa̍ a̍ lɛ̄ŋndē I̍chi̍pīle̍ŋ ndo̍, ō wɔ̄u̍ ō bɔ̄ɔ̍.

¹⁸Tē te̍le̍ŋ ko̍ŋ ō fūūlu̍u̍ pɛ̍, chi̍e̍e̍ŋ bɛ̍ndo᷄ŋ ŋ̄ ŋūɛ̍ɛ̍nu̍ o̍ lɛ̄ŋndē I̍chi̍pīle̍ŋ ni̍ŋ, sūɛ̍i̍ ma̍ŋgālɛ̄i̍ Ke̍nāŋ, ndi̍ yɔ̍nūŋ māā Hi̍būlūi̍ye̍ ni̍, ndi̍ wa᷅ ni̍ŋ di̍mi᷄ŋndo̍ o̍ chi̍e̍e̍ŋ mu̍ŋ ni̍. Ndu̍yɛ̍ wāŋnda̍ o̍ chi̍o̍o̍ŋ mu᷅ŋ ā chūā ni̍ŋ bu̍ŋgɛ̄i̍ ī kālā ka̍lā, ndu̍yɛ̍ mā mēna̍ŋ o̍ Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍. Chi̍o̍o̍ŋ mu̍ŋ ā vēēlū ni̍ŋ o̍ pīlɔ̍ɔ̍ dīōla̍ŋ āā, “Chi̍e̍e̍ Lēpāa̍ wo̍.”

¹⁹Tē te̍le̍ŋ ko̍ŋ ō fūūlu̍u̍ pɛ̍, ā chō hūnɔ̄ɔ̄ ma̍āŋndo̍ tāŋgūl le̍ Mɛ̄lɛ̄ka̍ Ya̍a̍wɛ̄ɛ̄ o̍ lɛ̄ŋndē I̍chi̍pīle̍ŋ tɛ̄ɛ̄ŋ kpe̍e̍kpe̍i̍, ndu̍yɛ̍ mā bɛ̄ɛ̄ndi̍a̍a̍ sūŋgbu̍le̍ pōū le̍ŋ le̍ Mɛ̄lɛ̄ka̍ Ya̍a̍wɛ̄ɛ̄ o̍ pɛ̄ɛ̄ŋgu̍la̍ lɛ̄ŋndē I̍chi̍pīle̍ŋ.

²⁰Nyɛ̄m sālā tīɔ̍ɔ̍ŋndo̍ŋ mu᷅ŋ, mu̍ŋ wa᷅ ni̍ŋ ni̍ māā lātāāmāsi̍ le̍ chɔ̄mndo̍ māā ā chō Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ sōōlūūwo̍ lɛ̄ŋndē I̍chi̍pīle̍ŋ ni᷄ŋ. O̍ ko̍ŋ, te̍le̍ŋ o̍ te̍le̍ŋ, tē wāŋndā I̍chi̍pī ya̍a̍mɔ̍ɔ̍wa̍a̍ ndāa̍ ā hu᷄ŋ de᷅l nda̍ chōo̍ pɛ̍, le̍ nda̍ nyɛ̄ pālāa̍ tūsīo̍o̍ chōo̍, mā cha᷄ŋ le̍ mālāa̍, Mɛ̄lɛ̄ka̍ Ya̍a̍wɛ̄ɛ̄ o̍ nɔ̍lā mbō ke̍ nda̍ wāŋndo̍ le̍ nda̍ chīīndīa̍a̍, mī wānā ko̍ŋ ō chīɔ̍u̍ nda̍, mbō sōli̍ nda̍ ya̍a̍mɔ̍ɔ̍wa̍a̍ ka̍ŋ o̍ bā.

²¹Mɛ̄lɛ̄ka̍ Ya̍a̍wɛ̄ɛ̄ o̍ cho̍ ndu̍ pi̍la̍ chɔ̄m o̍ wāŋnda̍ I̍chi̍pī lo̍. Ndu̍yɛ̍ a̍ te̍le̍ŋ ko̍ŋ, wāŋnda̍ I̍chi̍pī a̍ cho̍ ndu̍ sīnā māā ndu̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Ā chō ndu̍ sōōlūū, mā sōli̍ sa̍lāla̍ŋ o̍ ndu̍ lo̍, ndu̍yɛ̍ mā hīŋ a̍ sa̍lālā lūāmāāla̍ŋ nāa̍ ndu̍ chu̍a̍. Ā chūā ni̍ŋ bu̍ŋga᷄ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ ndu̍yɛ̍ mā pēēlu̍ būŋgāŋ mu᷅ŋ.

²²Mɛ̄lɛ̄ka̍ Ya̍a̍wɛ̄ɛ̄ o̍ cho̍ wāŋnda̍ I̍chi̍pi̍ nyɛ̄ pālāa̍ tūsī chōo̍, kɛ̍ ō chō nda̍ hūnɔ̄ɔ̄ nyɛ̄ pālāā kōŋ fāŋā chōo̍. Ā chō mūli᷄ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ mā sōōlu̍u̍ ndu̍, ndu̍yɛ̍ mbō mūli̍ nda̍ dīōm mbō fāŋa̍ nda̍ nyɛ̄ pālāa̍ chōo̍.

²³Tē te̍le̍ŋ ko̍ŋ ō fūūlu̍u̍ pɛ̍, nɛ̄ī bɛ̍ndōo̍ ō wā ni̍ŋ I̍chi̍pī tɛ̍ɛ̄ŋ nda̍ Āsi̍i̍līāā. Wāŋnda̍ chāŋ ni̍ŋ I̍chi̍pī mā kūɛ̄ Āsi̍i̍līāā, ndu̍yɛ̍ mī wāŋnda̍ chɛ᷄ŋ A̍si̍i̍līāā mā kūɛ̄ I̍chi̍pī. Wāŋnda̍ I̍chi̍pī a̍ wāŋnda̍ Āsi̍i̍līāā a̍ so̍o̍lūū ni̍ŋ Mɛ̄lɛ̄ka̍ nāa̍ pi᷅lɛ̍.

²⁴A̍ te̍le̍ŋ ko̍ŋ, lɛ̄ŋīī yāa̍ve̍ he̍ī, I̍sɔ̄lūɛ̄ī ni̍, a̍ I̍chi̍pī, a̍ Āsi̍i̍līāā, ī wā ni̍ŋ nyɔ̍ɔ̍ ō pīlɛ̍ kpe̍. Ndu̍yɛ̍ lɛ̄ŋīī yāa̍ve̍ he̍ī, ī wā ni̍ŋ sa̍lāa̍ le̍ chi̍e̍ēŋndo̍ kpo̍u̍.

²⁵Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō chō wāŋnda̍ o̍ lɛ̄ŋnde̍ he̍ī ni᷄ŋ sa̍lā dɔ̄wɔ̄ɔ̄ mbō dīmi̍ āā, “Sa̍lāa̍ chō nya̍ chōo̍, nya̍ wāŋnda̍ I̍chi̍pī, wānāā nīa̍a̍, ndu̍yɛ̍ a̍ nya̍ wāŋnda̍ Āsi̍i̍līāā, wānāā ya̍ Mɛ̄lɛ̄ka̍ tōōsi̍a̍a̍ a̍ bālā nīla̍ŋ nda̍, a̍ nya̍ wāŋnda̍ I̍sɔ̄lūɛ̄ī, wānāā nīa̍a̍ ya̍ I̍ hɛ̍li̍ māā nyɛ̄m ni̍ ŋ̄kɛ᷅ wa̍.”