Read Southern Kisi Āīsa̍yā 2 Bible Online

Āīsa̍yā 2 - Southern Kisi bible

Āīsa̍yā 2

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ kē vɛ̄lɛ̄ Āīsa̍yā, po̍ E̍mɔ̍ɔ̍sī wo̍ yōōŋgōo̍ le̍ Chu̍dā a̍ Chūlu̍sɛ̄lɛ̄m.

²Mi̍ Āīsa̍yā di̍mī māā, te̍le̍ŋ cho̍ fūūlūū, tē pālɛ̍i̍ mɛ̍ɛ̍lɛ̄i̍ le̍ chi̍e̍ēŋndo̍ ho̍ō ī fūūlu̍u̍ pɛ̍, pēmbīī chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chō ō tāŋgūlāā lē chōo̍ ve̍, ī bāndū ni̍ŋ mī ī hīōū pēmbūŋ bɛ̄ndo᷄ŋ kpo̍u̍. Pēmbūŋ pɔ̄mbɔ᷄ŋ kpo̍u̍ ŋ̄ wā ni̍ŋ lɛ᷅ŋ pɔ̍ pɔ̍. Wāŋnda̍ o̍ lɛ̄ŋnde̍ ni᷄ŋ kpo̍u̍ ā wā ni̍ŋ kɔ᷅la̍ŋ ndo̍ŋ i̍kpɔ̍lɔ̄ kpɔ̄lūɛ̍i̍.

³Wāŋnda̍ o̍ lɛ̄ŋīī bɔ̄ɔ̍ bɔ̍ɔ̍ ni̍ŋ, ā wā ni̍ŋ di᷅mu̍la᷅ŋndo̍ āā, “Lā ŋ̄ kɔ̄ŋnu᷅ŋ o̍ pēmbīi̍ Mɛ̄lɛ̄ka̍ Ya̍a̍wɛ̄ɛ̄ ve̍ chōo̍, ŋ̄ kɔ̄ŋnu᷅ŋ o̍ chīɛ̍i̍ Mɛ̄lɛ̄ka̍ Che̍kɔ̍pū wo̍. Ō chō lākɔ̄ na̍a̍ pɛ̄ɛ̄kū nyɛ̄ o̍ ye̍e̍ma̍ na̍a̍ mī ŋ̄ tōsa̍ wo̍, mī ŋ̄ wa̍ o̍ nɛ̄i̍ ndɔ̄ɔ̍ chōo̍. Kāni̍ fo̍ndōlē, Sa̍a̍yɔ̄ŋ chi̍e̍e̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ ni̍ŋ wa᷅ŋnda̍ sāwāla̍ ndɔ̄la̍ŋ pɛ̄ɛ̄kōo̍ ni̍. Chūlu̍sɛ̄lɛ̄m chi̍e̍e̍ o̍ wa᷅ ni̍ŋ su̍ɛ̍i̍ nāa̍ wāŋnda̍ chūā ni̍.”

⁴Ō dīmī ni̍ŋ sɔ̍ɔ̍ŋ lɛ̄ŋnde̍ tɛ̄ɛ̄ŋ mbō chīi̍ sɔ̍ŋgɔ̄la̍ wa᷅ ni̍ŋ lɛ̍ŋīī bɔ̄ɔ̍ bɔ̍ɔ̍ tɛ̍ɛ̄ŋ nda̍ŋ. Wāŋnda̍ hūŋ ni̍ŋ mā hu᷄ŋ chɔ̍ū mɔ̄ɔ̄ŋ ndāa̍ŋ fāŋndo̍ŋ dɛ̍ndɛ̄lā wāāla̍ŋ, ndu̍yɛ̍ mā tōōsi̍a̍a̍ ba̍lta̍ ndāla̍ŋ mɔ̄ɔ̄ŋ nda̍ bɛ̄ɛ̄ndīāā tɔ̍lɔ̄ɔ̄la̍ŋ ndo̍ŋ. A̍ te̍le̍ŋ ko̍ŋ, lēlɛ̄ŋ o̍ lēlɛ̄ŋ lē me̍lnūŋ ndɛ̍ mī lē kɔ̍ sa̍ā lɛ̄ŋndē chēle̍ŋ a̍ sɔ̍ŋgɔ̄ɔ̍ le̍. Lēlɛ̄ŋ o̍ lēlɛ̄ŋ lē bɛ̍ɛ̍ndīāŋ ndɛ̍ le̍ lākɔ̄ o̍ chɔ̄ū le̍.

⁵Le̍la̍ŋ nya̍ wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍ wa̍, lā ŋ̄ tōsa᷅ŋ wa̍llo̍ o̍ nyɛ̄ wa̍wo̍ŋ Mɛ̄lɛ̄ka̍ Ya̍a̍wɛ̄ɛ̄ wo̍ ni̍ŋ.

⁶Mɛ̄lɛ̄ka̍, le̍ nyɛ̄ wānāā nūmnda̍ ā tōsa̍ wo̍, nda̍ yɔ̍nūŋ ni̍ māā yu̍ŋgu̍ Che̍kɔ̍pū wo̍, ma̍ lō o̍ ko̍ŋ ma̍ kɛ̄ɛ̄ nda̍ ma̍ māl nda̍ o̍ bā ndāa̍ chōo̍. Ka̍ā vīāmāā lāyāwa̍ cho̍ o̍ lɛ̄ŋnde̍ cho̍ bā pāa̍le̍ŋ lē chāŋndo̍ le̍ŋ ni᷄ŋ ndo̍, ka̍ā kōŋ wānāā nūmnda̍ ha̍ā ā chūa̍ ni̍, ma̍ tōsā mbo̍ tīū o̍ lɛ̄ŋnde̍ŋ nde᷅ŋ ni᷄ŋ kpo̍u̍. Nda̍ bɛ̍ɛ̍ ma̍ sīmnu᷄ŋ ni᷅ŋ wānāā vīāmāā lāyāwā māā wāŋnda̍ Fīli̍i̍tīāā, o̍ ko̍ŋ kɔ̍ɔ̍lī, ma̍ tūāl ka̍ā wānāā lēkāa̍wa̍ kɔ̄ɔ̄lī, mā sōōlūū Mɛ̍lɛ̄ka̍ā chēle̍ŋnda̍ nda̍ nda̍ā lātūlu̍.

⁷Ndu̍yɛ̍ ō cho̍ fu̍u̍ le̍ he̍ī yɔ̄nu̍ŋ te̍, lɛ̄ŋndē I̍sɔ̄lūɛ̍i̍le̍ŋ lē bīī mi̍ lē sūl sūllo̍ pīla̍ a̍ ka̍ni̍ŋ hu̍mbo᷄ŋ, ndu̍yɛ̍ a̍ ko̍o̍līi̍yo̍ŋ. Nyɛ̄m sūla᷄ŋ cho̍ I̍sɔ̄lūɛ̄ī yo̍ŋ ŋ̄ chō ŋ̄ bɔ̄ɔ̍. Su̍a̍a̍ ā chō ā pīāā o̍ lɛ̄ŋnde̍ŋ ni᷄ŋ cha̍, o̍ ko̍ŋ kɔ̍ɔ̍lī, mi̍ nyɛ̄m nyāāna᷄ŋ su̍a̍ā ā nāŋ ndo̍ŋ mu̍ŋ wa̍nu᷄ŋ ta̍u̍ ta̍u̍.

⁸Mɛ̄lɛ̄ka̍a̍ yɛ̍ yi̍a̍a̍ wāŋnda̍ sōōlūū wa̍, ā chō ā tīūwāā lɛ̄ŋnde̍ŋ kpo̍u̍. Nyɛ̄m nda̍ pi̍la̍ tōōsi̍a̍a̍ a̍ bālā ndāla̍ŋ ndo̍ŋ, mu̍ŋ nda̍ sōōlūū ni̍ māā mɛ̄lɛ̄ka̍ā nda̍.

⁹Kɛ̍ ndu̍yɛ̍ yōŋga̍ ndāa̍ chō hūnɔ̄ɔ̄ mɛ̄ɛ̄lū. Si̍ɔ̍mbu̍la̍ bɛ̍ndūla̍ŋ lā chō nda̍ hūnɔ̄ɔ̄ bīyɔ̄ɔ̄. Mɛ̄lɛ̄ka̍ Ya̍a̍wɛ̄ɛ̄, ma᷅l nda̍ le̍ nyɛ̄ nda̍ tōsa̍ wo̍ le̍.

¹⁰Wāŋnda̍ I̍sɔ̄lūɛ̄ī, sīōōŋnde̍ bīi̍ nya̍ pɔ̍ɔ̍ le̍ tu̍mbe̍ bɛ̍ndū Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nūŋ ni̍ŋ a̍ nya̍ wo̍, ndu̍yɛ̍ a̍ le̍ kpāāya̍ ndɔ̍ kɔ̄ndɔ̄fi̍li̍ bɛ̄ndōo̍, mī lā kɔ̍ vi̍ŋi᷄ŋ o̍ pēmbo᷄ŋ chōo̍ o̍ pōūta̍ŋ tɛ̄ɛ̄ŋ. Lā to̍ū so̍o̍ŋnda̍ŋ mī lā vīŋi̍ŋ le̍ni̍ŋ.

¹¹Te̍le̍ŋ cho̍ fūūlūū mī yōŋga̍ wāŋndā chīe̍e̍ya̍ ā dɔ̄ɔ̄nu᷄ŋ ndo̍ ō hu᷄ŋ mɛ̍ɛ̍lū. Hɔ̍lāā wāna̍ chi̍o̍o̍ ō hēēlu̍ chōo̍ wa̍, ō chō nda̍ hūnɔ̄ɔ̄ tūsī lɛ̄ŋ. A̍ te̍le̍ŋ ko̍ŋ, Mɛ̄lɛ̄ka̍ Ya̍a̍wɛ̄ɛ̄ ndu̍ pīlɛ̍ kpe̍ sɔ̍lā ni̍ŋ he̍e̍lōo̍ ni̍.

¹²Mɛ̄lɛ̄ka̍ Ya̍a̍wɛ̄ɛ̄, nɔ̍ kpāāyāa̍ kpo̍u̍ wo̍ ō kɛ̄ɛ̄si̍a̍a̍ pāa̍le̍ŋ, pāa̍le̍ o̍ tu̍sī ni̍ŋ wa̍nāā kpāāyāā bɛ̄ndūa̍a̍, a̍ wānāā yōŋgāa̍ tōōlō le̍ŋ, a̍ wānāa̍ chu̍a̍nu̍ŋ nda̍ pi̍la̍ ā bɛ̄ndū ma̍ hēēlū nda̍ pi̍la̍ wa̍.

¹³Yɔ̄mīī si̍dāā ī vīlɛ̄īye̍ Le̍ba̍nɔ̄ŋ kpo̍u̍, a̍ yɔ̄mīī ɔ̍kū ve̍ Ba̍sīāŋ, ndi̍ kpo̍u̍ ō chō ndi̍ hūnɔ̄ɔ̄ mīŋgī lɛ̄ŋ.

¹⁴Lūāŋūŋ bɛ̄ndo᷄ŋ kpo̍u̍ a̍ pēmbūŋ vīlɛ̄īyo̍ŋ, ō chō mu̍ŋ hūnɔ̄ɔ̄ mīŋgī lɛ̄ŋ mɛ̍ mɛ̍.

¹⁵Fo̍ndāŋndā vīlɛ̄īlā kālā ka̍lā la̍ŋ kpo̍u̍, a̍ sāāsāla̍ ka̍lā ka̍lālā bɛ̄ndūla̍ŋ, ō chō la̍ŋ hūnɔ̄ɔ̄ pēsī mbō mīŋgi̍ la̍ŋ lɛ̄ŋ mɛ̍ mɛ̍.

¹⁶Dɛ̄ndɛ̄la̍ bɛ̍ndūlā lēyākōla̍ ku̍ā o̍ mɛ̄ŋnda̍ŋ chōo̍ la̍ŋ ni̍, a̍ dɛ̄ndɛ̄la̍ kɛ̍ndɛ̄ kɛ̍ndɛ̄lā chēle̍ŋnda̍ ku̍ā o̍ mɛ̄ŋnda̍ŋ chōo̍ la̍ŋ kpo̍u̍, ō chō tōsā mī lā hu᷄ŋ mɔ̍ɔ̍wā o̍ mɛ̄ŋnda̍ŋ bɛ̄ŋgu̍.

¹⁷Yōŋgā bɛ̍ndū wāŋndā chīe̍e̍ya̍ ā dɔ̄ɔ̄nu᷄ŋ ndo̍ ō chō hūnɔ̄ɔ̄ mɛ̄ɛ̄lū. Hɔ̄lāā wāna̍ chi̍o̍o̍ ō hēēlu̍ chōo̍ wa̍, ō chō nda̍ hūnɔ̄ɔ̄ tūsī lɛ̄ŋ. Mɛ̄lɛ̄ka̍ Ya̍a̍wɛ̄ɛ̄ ndu̍ pīlɛ̍ kpe̍ sɔ̍lā ni̍ŋ he̍e̍lōo̍ ni̍.

¹⁸Nyɛ̄m chēle̍ŋ wāŋnda̍ sōōlūū māā mɛ̄lɛ̄ka̍ā ndā wo̍ŋ kpo̍u̍, ŋ̄ chō hūnɔ̄ɔ̄ lō.

¹⁹Tē Mɛ̄lɛ̄ka̍ Ya̍a̍wɛ̄ɛ̄, o̍ hi᷅ŋ le̍ chi̍e̍ēŋndo̍ ho̍ō hīīlūūwo̍ pɛ̍, wāŋndā chīe̍e̍ya̍ ā hēl ni̍ŋ o̍ pēmbo᷄ŋ chōo̍, mā kɔ̍ vi̍ŋi᷄ŋ o̍ pōūta̍ŋ tɛ̄ɛ̄ŋ, mī ha̍ā tōū so̍o̍ŋnda̍ŋ mā vīŋi̍ŋ le̍ni̍ŋ, fo̍ndōle̍, sīōōŋīī bɛ̄ndūe̍i̍ ī wā ni̍ŋ nda̍ le̍ tu̍mbe̍ bɛ̍ndū Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nūŋ ni̍ŋ a̍ nda̍ wo̍, ndu̍yɛ̍ a̍ le̍ kpāāya̍ ndɔ̄ɔ̍, a̍ le̍ nāŋɔ̄ɔ̄ ndɔ̄ bɛ̄ndōo̍.

²⁰Tē te̍le̍ŋ ko̍ŋ ō fūūlu̍u̍ pɛ̍, nyɛ̄m wāŋnda̍ ā tōōsi̍a̍a̍ a̍ ka̍ni̍ŋ hu̍mbo᷄ŋ, a̍ ko̍o̍līi̍yo̍ŋ mā sōōlūū mu̍ŋ māā mɛ̄lɛ̄ka̍ā ndā wo̍ŋ, ā chō mu̍ŋ hūnɔ̄ɔ̄ chūā mā vīōū mu̍ŋ. Ā chō mu̍ŋ mɛ̄lī lɛ̄ŋ mī ŋ̄ wa̍ le̍ vīsīāā yōndūa̍a̍, a̍ lɛ̄fɛ̄ŋnda̍.

²¹Bōōndi̍i̍ Mɛ̄lɛ̄ka̍ Ya̍a̍wɛ̄ɛ̄ o̍ hu᷅ŋ ni̍ŋ le̍ chi̍e̍ēŋndo̍ ho̍ō hīīlūūwo̍ ve̍, wāŋnda̍ vīŋīŋ ni̍ŋ o̍ būūlūla̍ŋ ni᷄ŋ, a̍ o̍ pōūta̍ŋ tɛ̄ɛ̄ŋ o̍ pēmbo᷄ŋ chōo̍, fo̍ndōle̍, sīōōŋīī bɛ̄ndūe̍i̍ ī wā ni̍ŋ nda̍ le̍ tu̍mbe̍ Mɛ̄lɛ̄ka̍ Ya̍a̍wɛ̄ɛ̄ dūāūnūŋ ni̍ŋ a̍ nda̍ wo̍, ndu̍yɛ̍ a̍ le̍ kpāāya̍ ndɔ̄ɔ̍, a̍ le̍ nāŋɔ̄ɔ̄ ndɔ̄ bɛ̄ndōo̍.

²²Lā du̍a̍ū tīīnda᷄ŋ nyāa̍ o̍ wāna̍ chi̍o̍o̍ ni᷄ŋ le̍ nya̍ mālā le̍, fo̍ndōle̍ wāna̍ chi̍o̍o̍ ō nɔ̍lā mbō māla̍ nya̍ le̍.