Read Southern Kisi Āīsa̍yā 20 Bible Online

Āīsa̍yā 20 - Southern Kisi bible

Āīsa̍yā 20

¹Wɔ̄sī Māsā Bɛ̍ndōo̍ Sa̍a̍kɔ̄ŋ, o̍ wa̍ Āsi̍i̍līāā wo̍, ō vēm wāna̍ wa̍ pūa̍a̍ chɔ̄ūwa̍ Āsi̍i̍līāā bōlle̍ŋ ndo̍, nda̍ pūa̍a̍ ndūa̍a̍ chɔ̄ūwa̍ ma̍ kɔ̍ chi᷅ŋa̍la᷅ŋ A̍si̍dɔ̍dī, chi̍e̍e̍ Fīli̍i̍tīāŋnda̍ wo̍,

²mi̍ Mɛ̄lɛ̄ka̍ Ya̍a̍wɛ̄ɛ̄ ō di̍mūl Āīsa̍yā, po̍ E̍mɔ̍ɔ̍sī wo̍ āā, “So̍li̍ nyɛ᷅lā lābɛ̍kīla̍ cho̍ nu̍m lēkɔ̄ɔ̍ la̍ŋ, a̍ kɔ̄vɛ̄i̍la̍ŋ nu̍m o̍ ŋ̄pēlū.” O̍ ko̍ŋ, mi̍ Āīsa̍yā so̍lī nyɛ̄lā lābɛ̍kīla̍ wa̍ ndu̍ lēkɔ̄ɔ̍ la̍ŋ, a̍ kɔ̄vɛ̄i̍la̍ŋ mbō bālū ni᷅ŋ fo̍ndō, a̍ pēlo᷄ŋ fo̍ndō.

³Bōōndi̍i̍ pi᷅lɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “Le̍ wɔ̄sīla̍ŋ ni᷅ŋ lā yāa̍, bu̍ɛ̍ī nūu̍ Āīsa̍yā o̍ cho̍ bālɔ̄ɔ̍ fo̍ndō, nyɛ̄ o̍ nyɛ̄ cho̍ ndu̍ lēkɔ̄ɔ̍ le̍, kɔ̄vɛ̄i̍ cho̍ ndu̍ o̍ ŋ̄pēlū le̍. He̍ī chō māchūāā māā tāāmāsi̍o̍o̍ le̍ chɔ̄mndo̍ nyɛ̍ yɔ̍nūŋ ni̍ŋ a̍ I̍chi̍pī ndu̍yɛ̍ a̍ Īto̍o̍pīāā wo̍.

⁴Wānā o̍ wāna̍ cho̍ o̍ lɛ̄ŋīī ŋīi̍ŋnde̍ he̍ī ni᷄ŋ, I̍chi̍pī a̍ Īto̍o̍pīāā, nu̍a̍ā Māsāa̍ Āsi̍i̍līāā o̍ yu̍ŋgā ni̍ŋ nda̍ ni̍, mbō kūɛ̄ a̍ nda̍ o̍ bīyɔ̄ɔ̍ ni᷄ŋ. Bɛ̄ndū yūvɛ̍i̍ ni̍, chūāāmbɔ̄ fɔ̍ŋndɔ̍ ni̍, ō chō nda̍ yūŋgā kpo̍u̍ mbō mɛ̄i̍ nda̍ tūū fo̍ndō, ndu̍yɛ̍ mbō sōōlu̍u̍ nda̍ kɔ̄vɛ̄i̍la̍ŋ o̍ ŋ̄pēlū mbō kūɛ̄ a̍ nda̍ le̍nde̍ o̍ bīyɔ̄ɔ̍ ni᷄ŋ. O̍ ko̍ŋ, mī si̍ɔ̍mbu̍la̍ bɛ̍ndūla̍ŋ lā bīī wāŋnda̍ I̍chi̍pī.

⁵Wānāā nda̍ a̍a̍ ti̍i̍nda̍ŋ Īto̍o̍pīāā le̍ nda̍ mālāa̍ wa̍, a̍ wānāā nda̍ a̍a̍ ke̍lū yōŋgāa̍ a̍ I̍chi̍pī o̍kɔ̄ɔ̄ wa̍, kɔ̄lta̍ŋ lā chō nda̍ hūnɔ̄ɔ̄ lāāsīa̍ŋ, ndu̍yɛ̍ mī si̍ɔ̍mbu̍la̍ŋ lā bīī nda̍.

⁶Tē te̍le̍ŋ ko̍ŋ ō fūūlu̍u̍ pɛ̍, wānāa̍ cho̍ o̍ Pēe̍ Mɛ̄ŋmā Īhɛ᷄llo̍ kɔ̄ŋgɔ̍ o̍ lɛ̄ŋndē Fīli̍i̍tīāŋnde̍ŋ ni᷄ŋ nda̍, ā chō dīmūla᷅ŋ āā, ‘Ŋ̄ si̍nā mɛ̄ɛ̍ na̍a̍ ŋ̄ chō he̍ī yɔ̍ŋ yɛ̍ le̍. Wāŋnda̍ ha̍ā nda̍ na̍a̍ ŋ̄ ti̍i̍nda̍ŋ le̍ na̍a̍ mālāa̍ ni̍. Nāa̍ nda̍ chūā na̍a̍ ŋ̍ nya̍a̍nūŋ pa̍a̍ndū ni̍ le̍ na̍a̍ māndāa̍, mā chīɔ̍u̍ nāa̍ Māsāa̍ Āsi̍i̍līāā o̍ bā. Kɛ̍ to̍fa̍ wɔ̍ i̍ ko̍ma̍l nda̍ ve̍. Ŋ̄ si̍nā mɛ̄ɛ̍ na̍a̍ ŋ̄ chō lōōkū hīɔ̄lɔ᷄ŋ o̍ he̍ī ni᷄ŋ te̍.’ ”