Read Southern Kisi Āīsa̍yā 22 Bible Online

Āīsa̍yā 22 - Southern Kisi bible

Āīsa̍yā 22

¹Yōōŋgōo̍ a̍ lɛ̄ŋndē dɛ̍ŋgbɛ̍le̍ yi̍lāŋnde̍ŋ o̍ pēmbo᷄ŋ tɛ̄ɛ̄ŋ o̍kɔ̄ɔ̄ ndu̍ cho̍ ho̍ō ni̍. Wāŋnda̍ Chūlu̍sɛ̄lɛ̄m, ō yɛ̄ɛ̍nɛ̍ yɔ̍nu̍ŋ yɛ̍? Vɛ᷅ mi̍ wānā o̍ wānā wa᷅ nyāānɔ᷄ŋndo̍ mbō hēl o̍ chīɛ̄ī ndɔ̄ɔ̍ chōo̍?

²Chi̍o̍o̍ ho̍ō ō chō chi̍e̍e̍ wɔ̍kɔ̄ wɔ̄kɔ̄ bɛ̄ndū. Bɔ̄ɔ̄lūū bɛ̄ndōo̍ kpo̍sōŋ ko̍ni̍ wānā tu̍ɛ̍ī ba᷅ o̍ bā ni̍. Bā o̍ bā wānā hi̍o̍u̍, kūūlīāālā kɔ̄ltā kɛ̄ndɛ̄la̍ŋ kpo̍sōŋ wānā tu̍ɛ̍ī chi̍o̍o̍ kpo̍u̍ ni̍. Kɛ̍ wānāā nyāa̍ vi᷅ o̍ chɔ̄ūwo̍ ho̍ō ni᷄ŋ nda̍, ā sɔ̄la̍ bɛ̍ɛ̍ pi̍ɔ̍m a̍ mɔ̄ɔ̄ŋ fāŋ te̍. Ndu̍yɛ̍ o̍ cho̍ bɛ̍ɛ̍ o̍ sɔ̍ŋgɔ̄ ni᷄ŋ te̍ nda̍ sɔ̄la̍ pīɔ̍m te̍.

³Wānāa̍ cho̍ nya̍ chīla̍ŋ nda̍, nda̍ kpo̍u̍ ma̍ nyāānu᷄ŋ di̍ōmndo̍ ō pīlɛ̍. Kɛ̍ mi̍ ya̍a̍mɔ̍ɔ̍wa̍ bīū nda̍ kpo̍u̍. Ndu̍yɛ̍ wāŋndo̍ ō pīlɛ̍ bɛ̍ɛ̍ ō nɔ̄la̍ mbō sīmu̍l ya̍a̍mɔ̍ɔ̍wa̍a̍ ka̍ŋ, mbō wūu̍ chīŋɔ̍le̍ŋ lēpīlɛ̍ bɛ̍ɛ̍ le̍. Nya̍ kpo̍u̍ ya̍a̍mɔ̍ɔ̍wa̍ nda̍ a̍a̍ fu̍u̍lu̍u̍ wɔ̍ bɛ̍ɛ̍ le̍, mi̍ lā nyāānu᷄ŋ, kɛ̍ ma̍ hu᷄ŋ bi̍ū nya̍ kpo̍u̍.

⁴Mi̍ lo᷅ o̍ ko̍ŋ mi̍ di̍mūl wāŋnda̍ a̍a̍, “Lā ma᷄l la̍ mī cha̍ŋ kpe̍e̍kpe̍i̍ cha̍ŋ kɔ̄l tāmbɛ̍i̍ bɛ̍ndōo̍, le̍ wānāā nīa̍a̍ nda̍ dīu̍ ha̍ā wa̍. Wānā o̍ wānā sa̍ŋga᷄ŋ le̍ ya̍ nyɔ̄ɔ̄lū le̍ mī me̍i̍ le̍.”

⁵Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ nɔ̍ kpāāyāa̍ kpo̍u̍ wo̍, ō hɛ̄li̍ pāa̍le̍ŋ te̍ŋge̍ŋ, pāa̍le̍ wo̍o̍lūŋ wo̍o̍lūŋ bɛ̄ndōo̍ ō wā ni̍ŋ de̍ŋ, ndu̍yɛ̍ mī kɔ̄lta̍ŋ lā lāāsi̍a̍ŋ wa᷅ŋnda̍, o̍ ko̍ŋ kɔ̍ɔ̍lī, mā wa̍ wāŋnda̍ chi̍e̍e̍ya̍ kpāātīa̍a̍ a̍ lābɛ̄ŋgu̍ o̍ lɛ̄ŋndē dɛ̍ŋgbɛ̍le̍ yi̍lāŋnde̍ŋ ni᷄ŋ nde̍ŋ. Sāāsāla̍ ba̍lu̍ chi̍o̍o̍ la̍ŋ kpo̍u̍ ā pēsi̍ pe̍si̍ la̍ŋ. Wāŋndā chō cha̍ŋnda̍ŋ o̍ pēmbūŋ bɛ̄ndo᷄ŋ kpe̍e̍kpe̍i̍ le̍ mālāa̍.

⁶So̍vɛ̄i̍ya̍ Ɛ̍lām a̍ chu̍a̍ bɔ̄lɔ̄la̍ ndāla̍ māchīŋɔ̄la̍ŋ a̍ chīɔ̄ūlā ndāla̍ŋ, ndu̍yɛ̍ mā chūa̍ nyɛ̄lā ndāla̍ chɔ̄ūlā su̍a̍a̍ ā nāŋ nda̍ŋ, o̍ ko̍ŋ kɔ̍ɔ̍lī, a̍ su̍a̍ā ndāa̍ chɔ̄ūwa̍ mā hūŋ le̍ sɔ̍ŋgɔ̍ɔ̍ a̍ nya̍. Ndu̍yɛ̍ so̍vɛ̄i̍ya̍ Ki̍a̍ā bɛ̍ɛ̍, ā bɛ̄ɛ̄ndi̍a̍a̍ nyɛ̄lā ndāla̍ nda̍ sɔ̄ŋgā o̍ lābā māā bōo̍la̍ bɛ̍ndū le̍ nda̍ māndāa̍ la̍ŋ nyɛ̄ kɛ̄ndɛ̄ kɛ̍ndɛ̄ mā hūŋ.

⁷Nyɛ̄lā chɔ̄ūlā su̍a̍a̍ ā nāŋ nda̍ŋ lā chō lā tīūwāā o̍ lɛ̄ŋīī nyɛ̄i̍ dɛ̍ŋgbɛ̍i̍ cho̍ o̍ pēmbo᷄ŋ tɛ̄ɛ̄ŋ mī tɔ̄lɔ̄ɔ̄la̍ŋ lā nāŋ nde̍ ni᷄ŋ kpo̍u̍. Ndu̍yɛ̍ so̍vɛ̄i̍ya̍a̍ sɔ̍ŋgā o̍ su̍a̍ā chōo̍ wa̍ ā chō ā kɛ̄sīāā o̍ dīōlā sāāsa̍ chi̍o̍o̍ kpɛ̍ kpɛ̍.

⁸Nyɛ̄ o̍ nyɛ̄ lɛ̄ŋndē Chu̍dāle̍ŋ le̍e̍ ti̍i̍nda̍ŋ le̍ nda̍ māndāa̍, lā chūū tɛ̄ɛ̄mbūū kpo̍u̍. A̍ te̍le̍ŋ ko̍ŋ, wōlɔ̄ɔ̄lā chɔ̄ūla̍ wa̍ lā kɛ̄sīāā o̍ chīɛ̄ī būndɔ̍ɔ̍ ni᷄ŋ nda̍ŋ, la̍ŋ wāŋnda̍ Chūlu̍sɛ̄lɛ̄m nda̍ a̍a̍ ti̍i̍nda̍ŋ ni̍.

⁹Mɛ̄ɛ̍ nya̍ mɛ̄ɛ̄ndi̍a̍ŋ sa̍a̍sāla̍ ba̍lu̍ Chūlu̍sɛ̄lɛ̄m nda̍ŋ, mi̍ lā sāālu᷄ŋ māā fo̍ndāŋndā bɔ̄ɔ̍ bɔ̍ɔ̍ mɛ̄ɛ̍ mī la̍ mīŋgi̍ la̍ŋ bɛ̄ɛ̄ndīāā o̍ sāāsāla̍ŋ nda᷅ŋ, le̍ mī lā mīīŋgu̍ lā kālā ka̍lā. O̍ ko̍ŋ, mi̍ lā tōsā mi̍ mɛ̄ŋnda̍ŋ mā mīīŋgū o̍ fo̍ndā māmɛ̄ŋ pāāndōo̍ mātōū.

¹⁰O̍ ko̍ŋ kɔ̍ɔ̍lī, mi̍ lā mɛ̄ɛ̄ndīa̍ŋ chi̍ɛ̍īla̍ŋ Chūlu̍sɛ̄lɛ̄m, mi̍ lā pēsī pēsī lā ti᷄ŋ le̍ mī lā sōli̍ pōūta̍ŋ lo̍ŋ le̍ sāāsāla̍ŋ nda᷅ŋ mīŋgīo̍o̍ bɛ̄ɛ̄ndīa̍a̍ ō kālā ka̍lā.

¹¹Mi̍ lā lō o̍ ko̍ŋ mi̍ lā tāŋgūl nāa̍ mɛ̄ŋnda̍ŋ mā wā wa̍, o̍ sāāsāla̍ ti̍ɔ̍ɔ̍ŋnda̍ŋ tɛ̄ɛ̄ŋ, le̍ mī mɛ̄ŋnda̍ŋ mā wa̍ chɔ̄nɔ᷄ŋndo̍ o̍ fo̍ndā māmɛ̄ŋ pāāndōo̍ mī mā kūā lo̍ŋ. Kɛ̍ Mɛ̄lɛ̄ka̍ to̍o̍si̍a̍a̍ nyɛ̄m kāla᷄ŋ ndo̍, lā ke̍ ndu̍ lēbɛ̄ɛ̄ le̍. Ndu̍ wāna̍ kɛ̍ɛ̍si̍a̍a̍ sīndɛ̄ pa̍ māā nyɔ̄ɔ̍ŋ mu᷅ŋ ŋ̄ wa̍ wo̍, lā nu̍e̍ ndu̍ bɛ̍ɛ̍ le̍.

¹²Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍ ō dīmūl nya̍ le̍ mī lā cha᷄ŋ, ndu̍yɛ̍ mī kɔ̄ltā nyāla̍ŋ lā bīī mɔ̍nɛ̍i̍. Mbo̍ dīmūl nya̍ le̍ mī lā sēndi̍ yu̍ŋgu̍lta̍ŋ, ndu̍yɛ̍ mī lā wōōnu̍ŋ nyɛ᷅lā lābɛ̍kīla̍ŋ le̍ kɔ̄ltā nyāla̍ ta̍mbɛ̍i̍la̍ŋ chɔ̄mndo̍.

¹³Kɛ̍ yɔ̄ŋi̍ nya̍ a̍a̍ to̍sa̍ le̍nde̍ yɛ̍, mi̍ lā wā kɔ̄l kɛ̄ndɛ̄ bɛ̄ndōo̍ tōsāa̍, mī lā tōsā du̍nya̍ŋ bɛ̍ndo᷄ŋ. Mī lā dīū na̍u̍vāā nyāa̍ a̍ sāa̍ nyāa̍ mī lā dīā, ndu̍yɛ̍ mī lā kōlī mu̍ɛ̍īmā nyāma̍ mākīle̍pīi̍ya̍ŋ. O̍ ko̍ŋ kɔ̍ɔ̍lī, mī lā dīmu̍la᷅ŋ a̍a̍ “Ŋ̄ dīōnu᷅ŋ mī ŋ̄ kōlnu᷅ŋ, fo̍ndōle̍, ŋ̄ sīnā māā ŋ̄ nɔ̄ le̍ wūo̍o̍ sīɔ̄dīi̍.”

¹⁴Kɛ̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍, ō sōō nāa̍ ya̍ chu̍a̍ mbo̍ dīmī āā, “Wāŋnda̍ ha̍ā ā wū le̍nde̍, I̍ me᷅l nda̍ le̍ nyɛ̄ nda̍ tōsa̍ wo̍ le̍.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍, ō dīmi̍ wo̍ chō ko̍ŋ ni̍.

¹⁵Mi̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍ ō dīmūl la̍ āā, “Kɔ̍ nāa̍ Si̍ɛ̍bi̍nā chu̍a̍, wāna̍ cho̍ chīɛ̄ī lēmāsāa̍ bōlle̍ŋ ndo̍, mā kɔ̍ di̍mu̍l ndu̍ āā,

¹⁶‘Vɛ̄ɛ̍nɛ̍ ŋ̄ yīya̍ŋ yɛ̍ māā ā chō? Ō yɛ̄ɛ̍nɛ̍ dɔ̍ū yɛ̄ nu̍m yīya᷄ŋ ko̍ŋ o̍ kɔ̄l māā ā nɔ̄ mā bɛ̍ɛ̍ndi̍a̍a̍ sɛ̄i̍ nu̍mndo̍ na̍nu᷄ŋ? Ō nɛ̄ɛ̍nɛ̍ ke̍ yɛ̄ nu̍m kpāāyā ko̍ŋ, le̍ sɛ̄i̍ nu̍mndo̍ tōūwɔ̄ɔ̍ o̍ pōūwo̍ ni᷄ŋ, o̍ fo̍ndāŋ te̍māa̍ le̍ nu̍m hūnɔ̄ɔ̍ chɔ̄ɔ̍ lēni᷄ŋ?

¹⁷Ya̍ŋ ndɔ̍ ni᷅la̍ŋ mā tūēī. A̍ kpāāyā nu̍m bɛ̄ndū ŋ̄ nɔ̄ wo̍ kpo̍u̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m hūnɔ̄ɔ̄ chūā mbō vīōū nu̍m fo̍ko̍lo̍. Ō chō nu̍m hūnɔ̄ɔ̄ bīyɔ̄ɔ̄,

¹⁸mbō hi᷄ŋ nu̍m mbō vīōū nu̍m o̍ lɛ̄ŋndē bɛ̍ndūle̍ŋ ni᷄ŋ fo̍ko̍lo̍, mɛ̄ɛ̍ nda̍ vīāū nu̍a̍ā nyɔ̄ɔ̍ yɛ̍. Lo̍ŋ ŋ̄ chō lō ni̍ mā vī. Nyɛ̄lā nūmnda̍ nya̍a̍na᷄ŋ nda̍ kɛ̍ndɛ̍ kɛ̍ndɛ̄lā su̍a̍a̍ ā nāŋ nda̍ŋ kpo̍u̍, o̍ lɛ̄ŋndē lēŋ ni᷄ŋ la̍ cho̍ lō ni̍. Nu̍m to̍sa̍ hāū ni̍, mi̍ si̍ɔ̍mbu̍la̍ bɛ̍ndūla̍ŋ lā tūāl chīɛ̍i̍ Māsānɔ̄ nu̍mndo̍ chōo̍.

¹⁹Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m hūnɔ̄ɔ̄ sōlī o̍ wa̍llo̍ ni᷄ŋ, mbō fāŋa̍ nu̍m o̍ fo̍ndā nu᷄m lēbīɔ̍ɔ̍ ba̍ū.’ ”

²⁰Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ mbō dīmī āā, “Tē te̍le̍ŋ ko̍ŋ ō fūūlu̍u̍ pɛ̍, I̍ cho̍ bu̍ɛ̍ī nūu̍ Īlīa̍a̍kīm, po̍ Hīlīka̍yā wo̍ vēēlū mī mi̍ŋgi̍ ndu̍ o̍ fōōfō nu̍mndo̍.

²¹I̍ cho̍ ndu̍ dōmā nu̍m wa̍li̍ lēbīɔ̍ɔ̍ wōū, ndu̍yɛ̍ mī yi̍i̍ ndu̍ kōlā i̍pɛ̍ŋgɛ̍ ŋ̄ kāndāŋ o̍ chāŋ māā lēyāu̍ le̍ wa̍llo̍ wo̍, o̍ ko̍ŋ kɔ̍ɔ̍lī, mī chu̍a̍ kpāāyā nu̍mndo̍ mī ke̍ ndu̍. Īlīa̍a̍kīm, o̍ wa᷅ ni̍ŋ ma̍wa̍ā māā fi̍nyā le̍ wāŋnda̍ Chūlu̍sɛ̄lɛ̄m a̍ wāŋnda̍ Chu̍dā kpo̍u̍.

²²I̍ cho̍ ndu̍ kpāāyāa̍ o̍ chīɛ̄ī lēmāsa̍ Dēēvi̍o̍o̍ ni᷄ŋ kpo̍u̍ ha̍ndɔ̄ɔ̄ o̍ chōŋgu̍. Ndu̍ nɔ᷅ ni̍ŋ ki̍īye̍ o̍ bā le̍ chīɛ̄ī kōŋ kpo̍u̍ ni̍. Tē ō kūmbi̍ dīō o̍ dīō pɛ̍, wānā o̍ wānā nɔ̍lā mbō ki̍nda̍ ndu̍ le̍. Ndu̍yɛ̍ tē ō kīnda̍ pɛ̍, wānā o̍ wānā nɔ̍lā mbō ku̍mbi̍ le̍.

²³I̍ cho̍ ndu̍ kɛ̄sī o̍ fo̍ndā ko̍ŋ, mɛ̄ɛ̍ nda̍ tūāl nu̍a̍ā pɛ̍ɛ̍kīi̍le̍ŋ lɛ̄ŋ lē hi̍i̍lūŋ te̍ yɛ̍. Ndu̍yɛ̍ ō tōsā ni̍ŋ mī yu̍ŋgu̍ fi̍nyā ndɔ̄ɔ̍ kpo̍u̍ o̍ si̍mnu᷄ŋ yu̍ŋgu̍ lēbɛ̄ɛ̄ bɛ̄ndū.

²⁴“Chīɛ̍i̍ fi̍nyā ndɔ̄ɔ̍ kpo̍u̍, ndu̍yɛ̍ a̍ wānā o̍ wāna̍ fu̍la̍ o̍ pūlāle̍ ndāle̍ŋ chōo̍, chūāāmbɔ̄ ni̍, ka̍a̍so̍ŋnɔ̍ ni̍, nda̍ kpo̍u̍ ndu̍ nda̍ tīīndāŋ ni̍ŋ ni̍. Mɛ̄ɛ̍ nda̍ lɛ̄ɛ̄ndūū nu̍a̍ā nyɛ̄m lāāndo᷄ŋ, ŋ̄pɔ̄mbɔ̄ ni̍, ŋ̄ bɛ̄ndū ni̍, o̍ nyɛ̄ lɛ̄ɛ̄ndāā ŋ̄ nyɛ̄m lāāndōo̍ yɛ̍, le̍nde̍ nda̍ kpo̍u̍ a̍ wa᷅ ni̍ŋ ndu̍ ā lɛ̄ɛ̄nda᷄ŋ ni̍.

²⁵Ndu̍yɛ̍ tē ā lɛ̄ɛ̄ndu̍ŋ ndu̍ le̍nde̍ pɛ̍, te̍le̍ŋ cho̍ fūūlūū, mi̍ chē bɛ̍ɛ̍ mbo̍ wā mɛ̄ɛ̍ nda̍ tūāl nu̍a̍ā pɛ̍ɛ̍kīi̍le̍ŋ lɛ̄ŋ lē hi̍i̍lūŋ te̍ yɛ̍ ni̍, kɛ̍ kpāāya̍ ndɔ̄ɔ̍ chō yɔ̄njɔ̄lā mɛ̄ɛ̍ pɛ̍ɛ̍kīi̍le̍ŋ kpāāya̍ ndɔ̄ɔ̍ ō yɔ̄njɔ̄lā nu̍a̍ā mī lē de᷄l lɛ̍. O̍ ko̍ŋ, nyɛ̄ o̍ nyɛ̍ cho̍ ndu̍ ō lānda᷄ŋ, mbō de᷄l mī nyɛ̄ o̍ nyɛ̄ tāmbu̍.” Nyɛ̄ Mɛ̍lɛ̄ka̍ Ya̍a̍wɛ̄ɛ̄, di̍mi̍ wo̍ ndu̍ cho̍ ko̍ŋ ni̍.