Read Southern Kisi Āīsa̍yā 23 Bible Online

Āīsa̍yā 23 - Southern Kisi bible

Āīsa̍yā 23

¹Yōōŋgōo̍ a̍ Ta̍a̍yā o̍kɔ̄ɔ̄ ndu̍ cho̍ ho̍ō ni̍. Nya̍ wānāa̍ ku̍ā a̍ dɛ̄ndɛ̄la̍ bɛ̍ndūla̍ŋ o̍ Pēe̍ Mɛ̄ŋmā Īhɛ᷄llo̍ chōo̍ wa̍, lā kōŋu̍l cho̍o̍ cho̍o̍ kpe̍le̍ŋ. Kāni̍ fo̍ndōle̍, Ta̍a̍yā o̍ ta̍mbu̍ mbo̍ sīmnu᷄ŋ pɔ᷅mndo̍. Chīɛ̄ī o̍ chīɛ̍i̍ wa̍ Ta̍a̍yā chi̍e̍e̍, lātūlu̍ a̍ fo̍ndāŋ dɛ̄ndɛ̄la̍ bɛ̍ndūla̍ŋ lā kūā si̍mnda̍ŋ ndo̍, lā tāmbu̍. Mɛ̄ɛ̍ dɛ̄ndɛ̄la̍ nyāla̍ŋ lā fūūlu̍u̍ o̍ lɛ̄ŋndē Sa̍i̍pūlɔ̄ɔ̄le̍ŋ ni᷄ŋ, o̍ ko̍ŋ nya̍ tūēī yōōŋgōo̍ ho̍ō ni̍.

²Nya̍ cho̍ o̍ Pēe̍ Mɛ̄ŋmā Īhɛ᷄llo̍ kɔ̄ŋgɔ̍ wa̍, nya̍ wānāā lēyākūa̍a̍ Sa̍i̍dɔ̄ŋ, lā bīi̍ mɔ̍nɛ̍i̍ o̍ kɔ̄ltā nyāla̍ŋ ni᷄ŋ le̍ nyɛ̍ yɔ̍nu̍ŋ ho̍ō wo̍. Wānāā nyāa̍ nya̍ vīām ya̍kōle̍ŋ nda̍ mā mālnu̍ŋ mā kūɛ̄ o̍ Pēe̍ Mɛ̄ŋmā Īhɛ᷄llo̍ chōo̍.

³Wāŋnda̍ ha̍ā ma̍ kūā o̍ pēēla̍ mɛ̄ŋmā īhɛ᷄lta̍ bɛ̍ndūa̍ŋ chōo̍ le̍ kɔ̄la̍ŋ yākōle̍ŋ. Mā kɔ̍ chu̍ā nyɛ̄ dīa̍a̍ o̍ lɛ̄ŋndē I̍chi̍pīle̍ŋ ni᷄ŋ, mā hīŋ a̍ ndu̍ Ta̍a̍yā. Chīɔ̄ɔ̄ŋ nda̍ to̍sā o̍ Pīo̍o̍ Na̍īl kɔ̍ŋgɔ̍, I̍chi̍pī wo̍ŋ, nyɛ̄ dīa̍a̍ fu̍lā o̍ chīɔ̄ɔ̄ŋ mu᷅ŋ ni᷄ŋ ndo̍, ndu̍ nda̍ kūā hu̍nɔ̄ɔ̍ ni̍. Mi̍ fo̍ndā nyāa̍ ō sīmnu᷄ŋ fo̍ndā lēyākō bɛ̄ndōo̍ le̍ lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍.

⁴Wāŋnda̍ Sa̍i̍dɔ̄ŋ, si̍ɔ̍mbu̍la̍ bɛ̍ndūla̍ŋ lā bīī nya̍. Sa̍i̍dɔ̄ŋ o̍ wa̍ māwāā chi̍e̍e̍ kpāāyā bɛ̍ndōo̍ le̍ Pēe̍ Mɛ̄ŋmā Īhɛ᷄llo̍. Kɛ̍ Pēe̍ Mɛ̄ŋmā Īhɛ᷄llo̍ ō kɛ̄ɛ̍ ndu̍ mbō dīmī āā, “I̍ vi̍lu̍ chu̍ā o̍ chūā le̍. I̍ ma̍nda̍ chu̍ā wānā pɔ̍nɔ̍ le̍, I̍ ma̍nda̍ chu̍ā wānā la̍nɔ̍ le̍.”

⁵Tē wāŋnda̍ I̍chi̍pī a̍ tu̍e̍ī pɛ̍ māā Ta̍a̍yā o̍ ta̍mbu̍, kɔ̄lta̍ŋ lā chō nda̍ tāmbu̍.

⁶Lā nyāānu̍ŋ mī lā tāŋnu̍ŋ o̍ lɛ̄ŋndē Fōni̍i̍sīāāle̍ŋ ni᷄ŋ. Lā kōŋu̍l cho̍o̍ cho̍o̍ kpe̍le̍ŋ, nya̍ wāŋnda̍ o̍ Pēe̍ Mɛ̄ŋmā Īhɛ᷄llo̍ kɔ̄ŋgɔ̍.

⁷Ta̍a̍yā, chi̍e̍e̍ nya̍ kɔ̄l kɛ̄ndɛ̄ bɛ̄ndōo̍ pāāndū, ndu̍ cho̍ ni᷅ŋ hāū nu̍a̍ā ni̍? Chi̍e̍e̍ māsīndɛ̄ si̍ndɔ̄ɔ̍ ho̍ō ndu̍ cho̍ ni᷅ŋ hāū ho̍ō ni̍? Ō cho̍ chi̍o̍o̍ ho̍ō le̍ ndu̍ o̍o̍ yɔ᷅ŋ wa᷅ŋnda̍ pāāndū o̍ lɛ̄ŋīī lēvīlle̍ ni᷄ŋ le̍ mā kɔ̍ ki̍lā cha᷄lta̍ŋ lo̍ŋ te̍?

⁸Wāŋnda̍ Ta̍a̍yā, mi̍ lā tōsa̍ mi̍ wāŋnda̍ ā sīmnu᷄ŋ ma̍sāā bɛ̍ndūa̍a̍, ndu̍yɛ̍ mi̍ wānāā nyāa̍ lēyākūa̍a̍ ā sīmnu᷄ŋ māā chūāūwāā māsāā bɛ̍ndū. Wāŋnda̍ o̍ chi̍e̍ēŋndo̍ ni᷄ŋ kpo̍u̍ nda̍ a̍a̍ nɔ̍ bɛ̄ɛ̄le̍ŋ le̍ wāŋnda̍ ha̍ā. Kɛ̍ Ta̍a̍yā o̍ ta̍mbu̍. Ndu̍yɛ̍ o̍ nɛ̄ɛ̍nɛ̍ kɛ̍ɛ̍si̍a̍a̍ yɛ̄ le̍ he̍ī tōsāa̍ a̍ Ta̍a̍yā?

⁹Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ndu̍ kɛ̍ɛ̍si̍a̍a̍ ni̍, le̍ mbō tōsa̍ mī yōŋga̍ wāŋnda̍ ha̍ā ō mɛ̄ɛ̄lu̍, yōŋga̍ nda̍ ke̍lū o̍ nyɛ̄ nda̍ tōsa̍ wo̍ ni᷄ŋ ndo̍. Ndu̍ kɛ̍ɛ̍si̍a̍a̍ ni̍, le̍ mbō tōsa̍ mī wānāā chi̍e̍ēŋndo̍ kpo̍u̍ a̍ ke̍ ha̍ā bɛ̄ɛ̄le̍ŋ nda̍, ā tāmbu̍ lābɛ̄ɛ̄.

¹⁰Nya̍ wānāa̍ fu̍la̍ Ta̍a̍yā mī lā kɔ̍ cha᷅l Sīpe᷅ŋ nda̍, lā mīīŋgu̍ mī lā kɔ̍ ti̍ū o̍ lɛ̄ŋndē nyāle̍ŋ ni᷄ŋ mɛ̄ɛ̍ mɛ̄ŋnda̍ŋ o̍ Pīo̍o̍ Na̍īl ma̍ pi̍a̍ā nu̍a̍ā mī mā tīu̍ o̍ fo̍ndāŋnda̍ŋ yɛ̍, kāni̍ fo̍ndōle̍, fo̍ndā nya̍ dɛ̄ndɛ̄la̍ bɛ̍ndūlā māmɛ̄ŋnda̍ŋ lā kūā si̍mnda̍ŋ ndo̍ ō cho̍ lɛ̍ le̍.

¹¹Mɛ̄lɛ̄ka̍ Ya̍a̍wɛ̄ɛ̄ o̍ yu̍lū bā ndɔ̄ɔ̍ o̍ Pēe̍ Mɛ̄ŋmā Īhɛ᷄llo̍ chōo̍. Ō tōsa̍ mi̍ māsɛ̄i̍ o̍ chi̍e̍ēŋndo̍ ni̍ŋ i̍ hi̍i̍lu᷄ŋ. Ō yɔ̄ŋgu̍ dīōmndē kpāāyāle̍ŋ māā chi̍e̍e̍ŋ bɛ̍ndo᷄ŋ Fōni̍i̍sīā, ŋ̍ nɔ̍ sāāsāla̍ ka̍lā ka̍lālā bɛ̄ndūla̍ŋ ndo̍ŋ, ŋ̄ nɔ̄ mī ŋ̄ wa̍ ŋ̄ tɛ̄ɛ̄mbāā.

¹²Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ māā, wāŋnda̍ Sa̍i̍dɔ̄ŋ, kɔ̄l kɛ̄ndɛ̄ bɛ̄ndū nya̍ a̍a̍ to̍sā wo̍ ō mɛ̄ɛ̄lu̍, fo̍ndōle̍ ya̍a̍mɔ̍ɔ̍wa̍ hīŋ nya̍ tɛ̄ɛ̄mbūū. Ndu̍yɛ̍ ā yɔ̍ŋ bɛ̍ɛ̍ mī lā nyāānu̍ŋ, mī lā ta᷄ŋ o̍ lɛ̄ŋndē Sa̍i̍pūlɔ̄ɔ̄le̍ŋ ni᷄ŋ, lā sɔ̍lā ni̍ŋ pɛ̍ŋgī o̍ pɛ̄ŋgī le̍.

¹³“Lā tōfa̍ wɔ̍ nyɛ̍ yɔ̍nu̍ŋ a̍ lɛ̄ŋndē Ba̍bi̍lɔ̄ŋnde̍ŋ ndo̍. Ba̍bi̍lɔ̄ŋ o̍ cho̍ lɛ̍ hāū le̍lɛ̍ŋ te̍. Āsi̍i̍līāā o̍ to̍sa̍ mi̍ Ba̍bi̍lɔ̄ŋ o̍ si̍mnu᷄ŋ ha̍ū fo̍ndāŋ vīsīāā yōndūa̍a̍ ā chāl lo̍. Ba̍bi̍lɔ̄ŋ o̍ wa̍ ō bālāā kpɔ̍kɔ̍su̍ a̍ sāāsāla̍ ka̍lā ka̍lālā bɛ̄ndūla̍ŋ. Mi̍ pūa̍a̍ Āsi̍i̍līāā a̍ hu̍ŋ ta̍ŋgūl bāndu̍la̍ vi̍lɛ̄īla̍ŋ ma̍ bālū ndu̍ kpɔ̍kɔ̍su̍ ma̍ chīŋa̍la᷅ŋ ndu̍. Ma̍ pēsī sāāsāla̍ ka̍lā ka̍lāla̍ wa̍ ndu̍ lā bālāā la̍ŋ, ndu̍yɛ̍ ma̍ mīŋgī ndu̍ pɔ̄m.”

¹⁴“Le̍la̍ŋ nya̍ ku̍ā a̍ dɛ̄ndɛ̄la̍ bɛ̍ndūla̍ŋ māmɛ̄ŋnda̍ŋ nda̍, lā cha᷄ŋ mī lā kōŋūl chōo̍ cho̍o̍ kpe̍le̍ŋ. Kāni̍ fo̍ndōle̍, chīe̍e̍ nya̍ nya̍ a̍a̍ ti̍i̍nda̍ŋndo̍, ō tāmbu̍.”

¹⁵Te̍le̍ŋ cho̍ fūūlūū wāŋnda̍ chō hūnɔ̄ɔ̄ pūɛ̄ɛ̄nɔ᷄ŋ a̍ Ta̍a̍yā o̍kɔ̄ɔ̄ lē wɔ̄sīla̍ŋ be̍le̍ ŋɔ̍mmɛ̍ū, wɔ̄sīlā māsā bɛ̍ndōo̍ ō pīlɛ̍ o̍ chi̍ī kpu̍lu̍ku̍u̍ chɔ̍ŋ a̍ vīōlɔ᷄ŋ ndɔ̍ɔ̍ ha̍a̍a̍ mbō vī la̍ŋ. Tē wɔ̄sīlā be̍le̍ ŋɔ̍mmɛ̍ūla̍ŋ lā hīōū pɛ̍, i̍ chō yɔ̄nɔ᷄ŋ a̍ Ta̍a̍yā, mɛ̄ɛ̍ nda̍ sōli̍ chōnde̍i̍ a̍ wānā la̍nɔ̍ ti̍a̍māā pūm o̍kɔ̄ɔ̄ yɛ̍, māā,

¹⁶nūm wānā la̍nɔ̍ ti̍a̍māā pūa̍a̍ kpo̍u̍ a̍ pu̍ɛ̍ɛ̍nu̍ŋ ni᷅ŋ ho̍ō a̍ nūm o̍kɔ̄ɔ̄ wo̍, chu̍a̍ to̍wāa̍ mā bālu̍ chi̍o̍o̍ kpo̍u̍ a̍ ndu̍ lɔ̄ɔ̍. Mā ba̍lu̍ a̍ ndu̍ lɔ̄ɔ̍ nyɛ̄ kɛ̄ndɛ̄ kɛ̍ndɛ̄, ndu̍yɛ̍ mā so̍li̍ chōndo̍ŋ ta̍u̍ ta̍u̍, le̍ mī pūa̍a̍ ā yīya̍ŋ vɛ̍lɛ̄ a̍ nūm o̍kɔ̄ɔ̄.

¹⁷Tē wɔ̄sīlā be̍le̍ ŋɔ̍mmɛ̍ūla̍ŋ lā hīōū pɛ̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ vɛ̄lɛ̄ hɔ̄lla̍ mūlī o̍ Ta̍a̍yā mbō tōsa̍ mī Ta̍a̍yā o̍ mi̍i̍ŋgu̍ vɛ̄lɛ̄ yākōle̍ŋ māā pāāndū. Ta̍a̍yā cho̍ hūnɔ̄ɔ̄ wā lɛ̄ŋnde̍ kpo̍u̍ tɛ̍ɛ̄ŋ o̍ chi̍e̍ēŋndo̍ ni᷄ŋ, mɛ̄ɛ̍ wānā la̍nɔ̍ ti̍a̍māa̍ ti̍ām ho̍ō le̍ nyɛ̄ sɔ̄lāa̍ wo̍ ō wā nu̍a̍ā yɛ̍.

¹⁸Kɛ̍ ndu̍yɛ̍ tɔ̄nɔ̄ o̍ tɔ̄nɔ̍ o̍ sɔ̍lā ni̍ŋ, a̍ nyɛ̄ o̍ nyɛ̄ o̍ nu̍u̍wā ni̍ŋ, ŋ̄ chō wā ŋ̄ yɔ̄ŋga᷄ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍. Nyɛ̍ o̍ nyɛ̄ o̍ nu̍u̍wā ni̍ŋ, ō nɔ̍lā ni̍ŋ mbō kɛ̄sī ndu̍ le̍. Wānāa̍ sa̍a̍ŋgīāl Mɛ̄lɛ̄ka̍ Ya̍a̍wɛ̄ɛ̄ wa̍, nda̍ wa᷅ ni̍ŋ nyɛ᷅m mu᷅ŋ sɔ̄lāa̍ ni̍. Mā pēndū nyɛ̄ dīa̍a̍ ta̍u̍ ta̍u̍ a̍ nyɛ̄ chūɛ̄ɛ̄na᷄ŋ kɛ̍ndɛ̄ kɛ̄ndɔ̄ɔ̍.