Read Southern Kisi Āīsa̍yā 24 Bible Online

Āīsa̍yā 24 - Southern Kisi bible

Āīsa̍yā 24

¹Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ chi̍e̍ēŋndo̍ ho̍ō tɛ̄ɛ̄mbūū, mbō sīmnu᷄ŋ pɔ᷅m, ndu̍yɛ̍ mbō tōsa̍ mī wāŋnda̍ o̍ chi̍e̍ēŋndo̍ ni᷄ŋ a̍ sɛ̍ŋi̍ŋ.

²Dɛ̍nɛ̍ pa̍lāa̍ tu̍āl ni̍ŋ ndo̍, ō wā ni̍ŋ le̍ wānā o̍ wānā. Wānā so̍līāā lāsa̍lā a̍ wānā yɔ̍ŋāā ni̍, bu̍ɛ̍ī pīāāndū a̍ māsānɔ̍ ndɔ̄ pīāāndū ni̍, bu̍ɛ̍ī lāāndū a̍ māsānɔ̍ ndɔ̄ lāāndū ni̍, wānā pi̍sīāā a̍ wānā pi̍a̍ndāā ni̍, wānā mɛ̍līāā lākūēē a̍ wānā bi̍yāā lākūēē ni̍, wānā su̍lāā a̍ wānā ta̍mbɛ̍i̍ ni̍.

³Chi̍e̍ēŋndo̍ ho̍ō kpo̍u̍ ō chō hūnɔ̄ɔ̄ tāmbū mbō sīmnu᷄ŋ pɔ᷅mndo̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ ndu̍ wo̍ cho̍ ko̍ŋ ni̍.

⁴Nyɛ̄ o̍ nyɛ̄ pūīyāa̍ cho̍ o̍ chi̍e̍ēŋndo̍ chōo̍, ō chō hūnɔ̄ɔ̄ wu̍, ndu̍yɛ̍ mbō vēsa̍. Chi̍e̍ēŋndo̍ ho̍ō kpo̍u̍ ō chō hūnɔ̄ɔ̄ mɔ̍nɛ̍i̍ bīyɔ̄ɔ̄, ndu̍yɛ̍ mī nyɛ̄ o̍ nyɛ̄ pūīyāā ō ve̍sa̍. Nyɛ̄ o̍ nyɛ̍ cho̍ o̍ ha̍la̍a̍ ni᷄ŋ cho̍o̍ cho̍o̍, ō chō hūnɔ̄ɔ̄ mɔ̍nɛ̍i̍ bīyɔ̄ɔ̄ a̍ chi̍e̍ēŋndo̍ lātūlu̍.

⁵Wānāa̍ cho̍ o̍ chi̍e̍ēŋndo̍ ni᷄ŋ nda̍, ā lo̍ o̍ ko̍ŋ ma̍ tɛ̄ɛ̄mbūū chi̍e̍ēŋndo̍ ho̍ō. Ā bīī ma̍ kɛ̄ɛ̄ le̍ pɛ̄ɛ̄kūla̍ Mɛ̄lɛ̄ka̍ la̍ŋ tōlɔ̄ɔ̍ kɔ̄ɔ̄lī, ndu̍yɛ̍ ma̍ kɛ̄ɛ̄ le̍ sāwāla̍ ndɔ̄la̍ŋ chūa̍a̍, o̍ ko̍ŋ kɔ̍ɔ̍lī, ma̍ tɛ̄ɛ̄mbūū kpe̍ma̍ fɛ̍ɛ̍ŋ a̍ fɛ̍ɛ̍ŋ o̍ yi̍i̍ a̍ nda̍ wo̍.

⁶Le̍ he̍ī, sēndi̍ Mɛ̄lɛ̄ka̍ hāndū ni̍ŋ nda̍ chōo̍ wo̍, ō chō hūnɔ̄ɔ̄ chi̍e̍ēŋndo̍ ho̍ō tɛ̄ɛ̄mbūū. Wānāa̍ cho̍ o̍ chi̍e̍ēŋndo̍ chōo̍ wa̍, ā chō hūnɔ̄ɔ̄ dɛ̍nɛ̍ pa̍lāa̍ sɔ̄lā le̍ nyɛ̄ nda̍ tōsa̍ wo̍. Wāŋnda̍ o̍ chi̍e̍ēŋndo̍ ni᷄ŋ a̍ cho̍ hūnɔ̄ɔ̄ ŋɔ̄. Wānāa̍ lo᷅ ni̍ŋ yo̍o̍mū wa̍ ā ve᷅ ni̍ŋ a̍ bɔ̍ɔ̍ le̍.

⁷Bɛ̄ŋgu̍la̍ mākīle̍pīi̍la̍ŋ lā chō hūnɔ̄ɔ̄ vēsā o̍ kpe̍le̍la̍ŋ ni᷄ŋ. O̍ ko̍ŋ kɔ̍ɔ̍lī, mī mūɛ̄īmā mākīle̍pīi̍ya̍ŋ mā lūɛ̄ī pɛ̄ŋnde̍ŋ. Kɔ̄ltā kɛ̄ndɛ̄lā wāŋnda̍ nda̍ a̍a̍ to̍sā la̍ŋ kpo̍u̍, lā chō hūnɔ̄ɔ̄ mɛ̄ɛ̄lū, mī wānā o̍ wānā o̍ ta̍mbu̍ kɔ̄l.

⁸Nyɛ̄m chāāŋ kɔ̄l kɛ̄ndɛ̄ŋ wāŋnda̍ nda̍ a̍a̍ lu̍a̍ā wo̍ŋ kpo̍u̍, ŋ̄ chō hūnɔ̄ɔ̄ mēī. Bɔ̄ɔ̄lūū kɛ̄ndɛ̄ bɛ̄ndū wāŋnda̍ nda̍ a̍a̍ to̍sā o̍ bɔ̄ŋa᷅ŋnda̍ŋ chōo̍ wo̍ kpo̍u̍, ō chō chūwɔ̄ɔ̄. Tōwāla̍ kɔ̄ltā kɛ̄ndɛ̄lā wāŋnda̍ nda̍ a̍a̍ lu̍a̍ā la̍ŋ bɛ̍ɛ̍ lā ve᷅ lɛ̍ ni̍ŋ lɔ̍ɔ̍nɔ᷄ŋ te̍.

⁹Chōndu̍ŋ wānā a̍a̍ tu̍ɛ̍ī pa̍a̍ndū o̍ mūɛ̄īmā mākīle̍pīi̍ya̍ŋ chōo̍ wo̍ŋ kpo̍u̍, wānā tu̍ɛ̍ī lɛ̍ ni̍ŋ mu̍ŋ te̍. Mūɛ̄īya̍ŋ mā lōl ni̍ŋ kpa̍li̍ wa̍nāa̍ ko᷅l ma̍ŋ nda̍ o̍ lāsōndō.

¹⁰Chi̍o̍o̍ kpo̍u̍ ō hīīlu̍ŋ a̍ sɔ̄ɔ̍ŋ kpūndɛ̍ŋ cho̍ yɔ̄nɔ᷄ŋndo̍ wo̍ŋ. Chi̍o̍o̍ pīɔ̍l mbō sīmnu᷄ŋ pɔ᷅mndo̍. Dīōla̍ŋ o̍ chīɛ̄īla̍ŋ kpo̍u̍ lā chō lā bēŋīāā.

¹¹Wāŋnda̍ chō bālɔ̄ɔ̍ o̍ bɛ̍ɛ̄la̍ŋ kēlā mūɛ̄īmā mākīle̍pīi̍ya̍ŋ mā chāŋ le̍ mūɛ̄īmā lēpɛ̄ŋnda̍ŋ. Nya̍a̍le̍ wāŋnda̍ nda̍ a̍a̍ du̍a̍a̍nūŋ pa̍a̍ndū wo̍ ō chūū le̍ fɛ̍ɛ̍ŋ a̍ fɛ̍ɛ̍ŋ. Kɔ̍l kɛ̄ndɛ̍ wa̍ o̍ chi̍e̍ēŋndo̍ ni᷄ŋ ndo̍ ō mɛ̄ɛ̄lu̍.

¹²Chi̍o̍o̍ tāmbu̍ mbo̍ lō pɔ̄m. Dīōlā ndɔ̄la̍ sāāsāla̍ŋ lā chūū pēsī pēsī.

¹³Nyɛ̍ yɔ̍nu̍ŋ a̍ chi̍o̍o̍ ho̍ō wo̍, ndu̍ ko̍ni̍ yɔ̍nūŋ ni̍ŋ a̍ lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍ ni̍. Mɛ̄ɛ̍ nda̍ dīndī nu̍a̍ā ɔ̄li̍fīi̍ bɛ̍ŋgo̍o̍ ɔ̄ɔ̄ bɛ̄ŋgu̍ mākīle̍pīi̍yo̍ kēndīo̍o̍ fo̍fo̍ yɛ̍, le̍nde̍ i̍ yɔ̍nūŋ ni̍ŋ a̍ lɛ̄ŋnde̍ o̍ chi̍e̍ēŋndo̍ ni᷄ŋ ni̍.

¹⁴Wānāa̍ lo᷅ ni̍ŋ yo̍o̍mū wa̍, ā chō hūnɔ̄ɔ̄ kɔ̄l nāŋɔ̄ɔ̄ mā sōli̍ chōndu̍ŋ nya̍a̍lo̍ŋ. A̍ cho̍ bā pāa̍le̍ŋ lē dēl lo̍ wa̍, ā dīmūl ni̍ŋ wa᷅ŋnda̍ a̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ wāna̍ kpāāyā bɛ̍ndū yɛ̍,

¹⁵mī a̍ cho̍ bā pāa̍le̍ŋ lē chāŋndo̍ wa̍ ā sāŋga̍la̍ Mɛ̄lɛ̄ka̍. Wānāa̍ cho̍ o̍ Pēe̍ Mɛ̄ŋmā Īhɛ᷄llo̍ hōlnɔ᷄ŋndo̍ wa̍ ā sāŋgālā ni̍ŋ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍.

¹⁶Ŋ̄ wā ni̍ŋ cho̍ndo̍ŋ tūēīyɔ̄ɔ̍ bā o̍ bā fe̍e̍ o̍ chi̍e̍ēŋndo̍ ni᷄ŋ, a̍ sāŋgālā wāŋnda̍ wā ni̍ŋ Mɛ̄lɛ̄ka̍, wānā di̍a̍ndāā bɛ̄ndōo̍ wo̍. Kɛ̍ ndu̍yɛ̍ kɔ̄l nūu̍ ō tāmbu̍ ō bɔ̄ɔ̍. Nyɛ̄ nɛ̄īyāa̍ chō o̍ kɔ̄l nūu̍ ni̍ŋ fa̍ŋgā, fo̍ndōle̍, a̍ sɔ̄ɔ̍ŋ cho̍ yɔ̄nɔ᷄ŋndo̍ wo̍ŋ. Wānāā dɛ̍nɛ̍ wɔ̍ɔ̍ŋnda̍ ā chō wɔ̄ hīōūwɔ̄ɔ̍ lāchī a̍ wāŋnda̍ yɔ̄ŋ wɔ̄ɔ̍ŋndo̍ tōsāllo̍ kɛ᷅. Wānāa̍ hu̍ī wa᷅ŋnda̍ wa̍, ā chō wāŋnda̍ kēīyo̍ hūīyo̍.

¹⁷Kɛ̍ ndu̍yɛ̍ lā ya̍ŋ ya̍ nīla̍ŋ mɛ̄ɛ̍ nya̍ chō kpo̍u̍. Sɔ̄ɔ̍ŋ to̍sā mī sīōōŋīī bɛ̄ndūe̍i̍ ī bīī nya̍ wo̍ŋ ŋ̄ yɔ̄nu̍ŋ ni̍ŋ nya̍, ndu̍yɛ̍ mī wāŋnda̍ tūu̍ nya̍ so̍o̍ŋnda̍ kpūndɛ̍la̍ŋ, le̍ mī lā de᷄l lēni᷄ŋ, ndu̍yɛ̍, mā ye᷄ŋ nya̍ yāŋɔ̄ɔ̄la̍ŋ le̍ mī lā hāu̍.

¹⁸Ndu̍yɛ̍ wānā o̍ wānā o̍ nɔ̍lā ni̍ŋ mbō hɛ̄lu᷄ŋ sɔ̍ɔ̍ŋ sa̍lā yāa̍ wo̍ŋ mu᷅ŋ kpo̍u̍ le̍. Tē a̍ ki̍ndi̍ pɛ̍ mā kpɛ̍kpɛ̍la̍ sɔ̄ɔ̍ŋ ŋ̄sīo̍o̍ŋ yɔ̍nūŋ ni̍ŋ a̍ nya̍ wo̍ŋ, a̍ de̍l o̍ so̍o̍ŋ kpūndɔ̍ɔ̍ ni᷄ŋ, tē a̍ ki̍ndi̍ pɛ̍ ma̍ kpɛ̍kpɛ̍la̍ so̍o̍ŋ kpūndɔ̍ɔ̍, a̍ kɔ̍ ha̍ū o̍ yāŋɔ̄ɔ̄le̍ŋ. O̍ ko̍ŋ kɔ̍ɔ̍lī, wu̍ndɛ̄i̍la̍ŋ chōo̍ cho̍o̍ la̍ ku̍mbīŋ ni̍ŋ, mī pīɔ̄ɔ̄ bɛ̄ndū bɛ̍ndōo̍ tōl o̍ chi̍e̍ēŋndo̍ chōo̍. O̍ ko̍ŋ, mī chīīyūŋ chi̍e̍ēŋndo̍ o̍ si᷄m chōo̍ wo̍ŋ ŋ̄ hīīlu̍ŋ.

¹⁹Chi̍e̍ēŋndo̍ chō hūnɔ̄ɔ̄ tɛ̄ɛ̄ndīāā, ndu̍yɛ̍ mbō dēli̍ kūmbūla̍ŋ. Ō chō hūnɔ̄ɔ̄ hīīlɔ᷄ŋ yo̍kpa᷄ŋ yo̍kpa᷄ŋ bɛ̍ndu̍.

²⁰Ō wā ni̍ŋ hi̍i̍lɔ᷄ŋndo̍ ta̍ŋge᷄ŋ ta̍ŋge᷄ŋ māā wānā ko̍lāā māmūɛ̄ī. Mɛ̄ɛ̍ hūēīyīī bɛ̄ndūe̍i̍ ī hūŋ nu̍a̍ā le̍ tōŋgōo̍ chūa̍a̍ mī tōŋgōo̍ wa̍ hīīlɔ᷄ŋ ko̍ŋ yɛ̍, le̍nde̍ o̍ wa᷅ ni̍ŋ hi̍i̍lɔ᷄ŋndo̍ ni̍. Yɔ̄ŋ wɔ̄ɔ̍ŋ chi̍e̍ēŋndo̍ tōsa̍, mi̍ chi̍e̍ēŋndo̍ lūsu̍l, ndu̍yɛ̍ mbo̍ kōmbā wɔ̍lɔ̄ wɔ̄lɔ̄, ō mi̍i̍ŋgū lɛ̍ mbō si᷄m fɛ̍ɛ̍ŋ a̍ fɛ̍ɛ̍ŋ te̍.

²¹Tē te̍le̍ŋ ko̍ŋ ō fūūlu̍u̍ pɛ̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ kpāāyāla̍ cho̍ o̍ ha̍la̍a̍ ni᷄ŋ cho̍o̍ cho̍o̍ la̍ŋ nyɛ̄ pālāa̍ tūsī chōo̍, ndu̍yɛ̍, mbō tūsī māsāa̍ o̍ chi̍e̍ēŋndo̍ cho̍o̍ nyɛ᷅ pālāa̍ chōo̍.

²²Mɛ̄lɛ̄ka̍ chō nda̍ hūnɔ̄ɔ̄ chūūŋgīāā nāa̍ pi᷅lɛ̍, mā wa̍ ndu̍ o̍ bā o̍ bīyɔ̄ɔ̍ ni᷄ŋ, mɛ̄ɛ̍ nda̍ dūāū nu̍a̍ā wānāa̍ cho̍ o̍ bīyɔ̄ɔ̍ ni᷄ŋ nda̍ o̍ so̍o̍ŋndo̍ ni᷄ŋ yɛ̍. Ō chō nda̍ dɔ̄wɔ̄ɔ̄ o̍ chīɛ̄ī mānyūmndo̍ ni᷄ŋ mā lo̍ lo̍ŋ, ha̍a̍a̍ mī te̍le̍ŋ o̍ nɔ̍ le̍ nda̍ nyɛ̄ pālāa̍ tūsīo̍o̍ chōo̍ wo̍ ō fūūlu̍u̍.

²³Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō chō wā īchāli̍ Chūlu̍sɛ̄lɛ̄m o̍ Pēmbīī Sa̍a̍yɔ̄ŋnde̍ chōo̍, mbō wa̍ māsāa̍ wānāā ndūa̍a̍ chōo̍. Lo̍ŋ o̍ wa᷅ ni̍ŋ i̍cha̍li̍ ni̍, mī wānāa̍ cho̍ wāŋnda̍ chīla̍ŋnda̍ ā chē nāŋɔ̄ɔ̄ ndɔ̄ di̍a̍ndāā bɛ̄ndōo̍. Ndu̍yɛ̍ dīōndɔ̄ɔ̍ kōŋ ō tōsā ni̍ŋ mī nyɛ̄ wa̍wo̍ŋ pāŋge̍i̍ a̍ pāa̍le̍ŋ ō dɔ̄ɔ̄na̍ŋ.