Read Southern Kisi Āīsa̍yā 25 Bible Online

Āīsa̍yā 25 - Southern Kisi bible

Āīsa̍yā 25

¹O̍o̍ Mɛ̄lɛ̄ka̍ Ya̍a̍wɛ̄ɛ̄, nu̍m cho̍ Mɛ̄lɛ̄ka̍ nūu̍ ni̍. I̍ cho̍ dīōlā nūmnda̍ŋ hēēlū te̍mā, ndu̍yɛ̍ mī sa̍ŋga̍la̍ nu̍m. A̍ to̍sa̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndū. Sɔ̄ɔ̍ŋ ŋ̄ kɛ̄ɛ̄si̍a̍a̍ sīndɛ̄ pa̍ wo̍ŋ, mu̍ŋ ŋ̄ to̍sā mu᷅ŋ ni̍, ma̍ lō o̍ lēdīōm.

²A̍ to̍sa̍ mi̍ chi̍o̍o̍ ho̍ō ō pīɔ̄l mbo̍ sīmnu᷄ŋ be̍mbe̍la̍ŋ kpo̍so̍ŋ. Chi̍e̍e̍ wa̍ ō bālāā a̍ sāāsāla̍ ka̍lā ka̍lālā bɛ̍ndūla̍ŋ ndo̍, ō sīmnu᷄ŋ pɔ᷅mndo̍. Chi̍e̍e̍ wānāā lēkāa̍wa̍ nda̍ a̍a̍ chu̍a̍ māā fo̍ndāŋ kālā ka̍lā le̍ nda̍ māndāa̍ wo̍, ō cho̍ lɛ̍ ha̍ū chi̍e̍e̍ le̍. Ndu̍yɛ̍ le̍ fɛ̍ɛ̍ŋ a̍ fɛ̍ɛ̍ŋ ō mi̍i̍ŋgū lɛ̍ mbō tāŋgu̍lu̍ŋ te̍.

³Wānāa̍ cho̍ o̍ lɛ̄ŋīī kpāāyɛ̄ī bɛ̄ndūe̍i̍ ni᷄ŋ nda̍, ā chō nu̍m bɛ̄ɛ̄le̍ŋ kē, le̍ nyɛ̍ yɔ̍nu̍ŋ ho̍ō wo̍. Chi̍e̍e̍ŋ kɔ̄l vēsɛ̍i̍ ŋ̍ bɛ̍ndu᷄ŋ cho̍ o̍ lɛ̄ŋnde̍ ni᷄ŋ ndo̍ŋ, ŋ̄ chō nu̍m bɛ̄ɛ̄le̍ŋ kē.

⁴Nu̍m cho̍ fo̍ndāŋ kālā ka̍lā wānāā tāmbɛ̍i̍ya̍ ā kūā vi̍o̍ŋnɔ᷄ŋndo̍, mī yōōmūlā ndāla̍ŋ lā sɔ̄la̍ chīndāa̍ wo̍ ni̍. Wānāa̍ nɔ̍ nyɛ᷅ o̍ nyɛ̄ o̍ lābā le̍ wa̍, tē dɛ̍nɛ̍ pa̍lāa̍ ō kōma̍l nda̍ pɛ̍, o̍ nūmndo̍ nda̍ nyāānūŋ ni̍ mā sɔ̄la̍ mālāa̍. Tē ya̍a̍mɔ̍ɔ̍wa̍ ā hīnu̍l nda̍ pɛ̍, mɛ̄ɛ̍ hūēīyīī bɛ̄ndūe̍i̍ ī hūŋ nu̍a̍ā yɛ̍, o̍ nūm bɛ̍ŋgu̍ nda̍ vīāŋnūŋ ni̍, mɛ̄ɛ̍ wāŋndo̍ vīāŋnūŋ nu̍a̍ā pīɔ̍ɔ̍ o̍ yɛ̄kpɔ̍ɔ̍ bɛ̄ŋgu̍ yɛ̍. Tē ā hīnu̍l nda̍ pɛ̍, mɛ̄ɛ̍ hāŋgu̍l tūū bɛ̄ndōo̍ ō hūŋ nu̍a̍ā yɛ̍, nu̍m cho̍ wūndu̍ma̍ ndā chāl le̍bɛ̍ŋgu̍ wa̍ŋ ni̍. Wānāā kɔ̄l vēsɛ̍i̍ya̍a̍ bɛ̍ndūa̍a̍, mɛ̄ɛ̍ hūēīyīī kpāāyɛ̄ī bɛ̄ndūe̍i̍ ī hūŋ nu̍a̍ā mī ī wa̍ sāāsāa̍ nyīndɔ̄ɔ̍ yɛ̍, le̍nde̍ nda̍ hīnūl wa̍nāā nūmnda̍ ni̍.

⁵Mɛ̄ɛ̍ hāŋgu̍l tūū bɛ̄ndōo̍ ō chāŋ nu̍a̍ā o̍ lɛ̄ŋndē po̍lte̍ŋ ni̍ŋ mbō hīŋ yɛ̍, le̍nde̍ nda̍ hūŋ ni̍. Kɛ̍ nūm Mɛ̄lɛ̄ka̍ Ya̍a̍wɛ̄ɛ̄, ma̍ kīndā wānāā lēkāa̍wa̍ ha̍ā sōndōla̍ŋ. Ya̍a̍mɔ̍ɔ̍wa̍a̍ nāa̍ ā wa̍ chōndo̍ŋ sōlīo̍o̍ mā kūūlīāā, kɛ̍ ma̍ lō o̍ ko̍ŋ ma̍ nyūmī nda̍, mɛ̄ɛ̍ pāa̍le̍ŋ lē wā nu̍a̍ā fūlāa̍ mī ha̍la̍ īkpūŋgbāa̍ ō kūmbū le̍ŋ, mī lē yɔ̄nu̍ŋ tɔ̍līɔ̄ɔ̄ yɛ̍.

⁶Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, o̍ cho̍ bɔ̄ŋa᷅ŋ bɛ̄ndū dīāā nyɛ̄ dīa̍a̍ tōsā o̍ Pēmbīī Sa̍a̍yɔ̄ŋnde̍ he̍ī chōo̍ le̍ lɛ̄ŋnde̍ o̍ chi̍e̍ēŋndo̍ ni᷄ŋ kpo̍u̍. Ō chō bɔ̄ŋa᷅ŋ bɛ̄ndōo̍ tōsā a̍ nyɛ̄ dīāā kɛ̄ndɛ̄ kɛ̍ndɛ̄ bɛ̄ndōo̍, a̍ vīsīo̍ŋ nyɛ̄ kɛ̄ndɛ̄ kɛ̍ndɛ̍, ndu̍yɛ̍ a̍ mūɛ̄īmā mākīle̍pīi̍ma̍ kɛ̄ndɛ̄ kɛ̍ndīa̍ŋ.

⁷Fe̍ŋgbɛ̍ nda̍ sīmbū wa̍nāā vīlɛ̍i̍ya̍, mbo̍ wā ō pɛ̄ŋgɛ̄la᷄ŋ lɛ᷅ŋnde̍ o̍ chi̍e̍ēŋndo̍ ni᷄ŋ kpo̍u̍ cho̍o̍ māā ha̍la̍ īkpūŋgbāa̍ wo̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ lō o̍ Pēmbīī Sa̍a̍yɔ̄ŋnde̍ he̍ī chōo̍, mbō fāŋa̍ ndu̍ o̍ lēpīlɛ̍ ni᷄ŋ kpe̍.

⁸Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō chō hūnɔ̄ɔ̄ kpāāya̍ pīɔ̍mndo̍ tɛ̄ɛ̄mbūū, ndu̍yɛ̍ māmɛ̍mɛ̍ o̍ māmɛ̍mɛ̍ ma̍ cho̍ wāŋnda̍ o̍ lāhɔ̄l, mbō wɔ̄ɔ̄su̍u̍ ma̍ŋ fo̍. Bɛ̄ɛ̄la̍ ta̍mbɛ̍i̍la̍ wānāā ndūa̍a̍ o̍ chi̍e̍ēŋndo̍ ni᷄ŋ kpo̍u̍ a̍ sɔ̍la̍ la̍ŋ, ō chō tōsā le̍ fɛ̍ɛ̍ŋ a̍ fɛ̍ɛ̍ŋ, a̍ sɔ̍la̍ lɛ̍ la̍ŋ te̍. Mɛ̄lɛ̄ka̍ Ya̍a̍wɛ̄ɛ̄, ndu̍ pi̍la̍ so̍ō ni̍.

⁹Tē te̍le̍ŋ ko̍ŋ ō fūūlu̍u̍ pɛ̍, wāŋnda̍ dīmī ni̍ŋ āā, “A̍ tōnya̍ kpe̍e̍kpe̍i̍, Mɛ̄lɛ̄ka̍ nāa̍ cho̍ ho̍ō ni̍. Ŋ̄ lo̍ o̍ ko̍ŋ mi̍ ŋ̄ dūāū tīīnda᷄ŋ nāa̍ o̍ ndu̍ ni̍ŋ le̍ na̍a̍ mālāa̍, ndu̍yɛ̍ mbo̍ pīŋī na̍a̍. Mɛ̄lɛ̄ka̍ Ya̍a̍wɛ̄ɛ̄ kpe̍e̍kpe̍i̍ cho̍ ho̍ō ni̍, Mɛ̄lɛ̄ka̍ na̍a̍ ŋ̄ dɔ̄ū tīīnda᷄ŋ na̍a̍ o̍ ndu̍ ni̍ŋ ndo̍. Lā ŋ̄ tōsa᷅ŋ kɔ̄l kɛ̄ndɔ̄ɔ̍ mī ŋ̄ dɔ̄ɔ̄nu᷄ŋ nya̍a̍le̍, le̍ mɛ̄ɛ̍ o̍ chi̍i̍ndi̍a̍a̍ na̍a̍ yɛ̍.”

¹⁰Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ Pēmbīī Sa̍a̍yɔ̄ŋnde̍ māndā, nyɛ̄ o̍ nyɛ̄ yɔ̍nūŋ a̍ ndi̍ le̍. Kɛ̍ lɛ̄ŋndē Mo̍wa̍bīle̍ŋ nde̍ŋ, ō chō le̍ŋ hūnɔ̄ɔ̄ nīɔ̄ū chōo̍, mɛ̄ɛ̍ nda̍ nīɔ̄ū nu̍a̍ā bīllo̍ mā vīōū ndu̍ o̍ sa᷄llo̍ chōo̍ yɛ̍.

¹¹Wāŋnda̍ Mo̍wa̍bī a̍ ki̍ndī ni̍ŋ le̍ nda̍ pi̍la̍ chīīndīa̍a̍, mɛ̄ɛ̍ wānā sa̍a̍nāa̍ ō hūŋ nu̍a̍ā le̍ lōo̍ mbō wa̍ kīndī kīndīo̍o̍ le̍ fūlāa̍ yɛ̍, kɛ̍ ā nɔ̍lā ni̍ŋ te̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mī yōŋgā bɛ̍ndū nda̍ chō kīōlɔ̄ɔ̍ wo̍ ō mɛ̄ɛ̄lu̍, lātūlu̍ a̍ nyɛ̄ o̍ nyɛ̄ nda̍ chāā to̍o̍sīa̍a̍ a̍ lābā.

¹²Sāāsāla̍ vi̍lɛ̄īlā kālā ka̍lālā ba̍lū Mo̍wa̍bī le̍ ndu̍ māndāa̍ la̍ŋ, Mɛ̄lɛ̄ka̍ chō la̍ŋ pēsī pēsī mbō mīŋgi̍ la̍ŋ lɛ̄ŋ mɛ̍mɛ̍.