Read Southern Kisi Āīsa̍yā 26 Bible Online

Āīsa̍yā 26 - Southern Kisi bible

Āīsa̍yā 26

¹Te̍le̍ŋ cho̍ fūūlūū wāŋnda̍ sōlī ni̍ŋ chōnde̍i̍ he̍ī o̍ lɛ̄ŋndē Chu̍dāle̍ŋ ni̍ŋ māā, chi̍e̍e̍ na̍a̍ ō chō chi̍e̍e̍ kpāāyā bɛ̍ndū. Mɛ̄lɛ̄ka̍ pīla̍ kpe̍e̍kpe̍i̍ cho̍ na̍a̍ māndāa̍ ni̍. Ndu̍ cho̍ sāāsā ka̍lā ka̍la̍ cho̍ na̍a̍ ō bālāā, ya̍a̍mɔ̍ɔ̍wa̍ ā nɔ̍lā mā lūēēlu̍l na̍a̍ le̍ wo̍ ni̍.

²Lā kūmbi̍ di̍o̍la̍ sāāsāla̍ŋ, le̍ mī lɛ̄ŋndē wānāā ndūa̍a̍ ā tōsā le᷅ŋ nyɛ̍ bɛ̍nda̍ Mɛ̄lɛ̄ka̍ o̍ hɔ̄l lo̍ŋ le̍ŋ lē lūɛ̄ī, lɛ̄ŋndē wānāā ndūa̍a̍ ā tōsā le᷅ŋ sɔ̄ɔ̍ŋ o̍ nɛ̄ī sa̍kpōo̍ chōo̍ le̍ŋ.

³Mɛ̄lɛ̄ka̍ Ya̍a̍wɛ̄ɛ̄, wānāa̍ du̍a̍ū ha̍ā kɔ̄ltā ndāla̍ŋ o̍ nūmndo̍ wa̍, le̍ te̍le̍ŋ o̍ te̍le̍ŋ kɔ̄l nyūlū kpe̍e̍kpe̍i̍yo̍ ŋ̄ kē nda̍ ni̍, fo̍ndōle̍ le̍ mɛ̄ɛ̍ nda̍ tīīnda̍ŋ nu̍m yɛ̍.

⁴Lā dɔ̍u̍ ti̍i̍nda᷄ŋndo̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ le̍ te̍le̍ŋ o̍ te̍le̍ŋ, ō nɔ̄lā mbō mānda̍ nya̍ le̍ fɛ̍ɛ̍ŋ a̍ fɛ̍ɛ̍ŋ.

⁵Wānāā nda̍ a̍a̍ dɔ̍u̍nu᷄ŋ yo̍ŋgāa̍ o̍ lākɔ̄l la̍, mbo̍ tūsī nda̍ tōōlō. Chi̍e̍e̍ nda̍ kpāāyā bɛ̍ndōo̍, mbo̍ tɛ̄ɛ̄mbūū ndu̍, ndu̍yɛ̍ mbo̍ mīŋgī sāāsāla̍ ka̍lā ka̍lāla̍ ba̍lu̍ ndu̍ la̍ŋ lɛ̄ŋ mɛ̍mɛ̍.

⁶Wānāā wāŋnda̍ ha̍ā ā wa̍ nyɛ̄ pālāa̍ tūsīo̍o̍ chōo̍ wa̍, nda̍ cho̍ ni᷅ŋ ha̍ū ba̍lɔ̄ɔ̍ o̍ chi̍e̍e̍ pɔ᷅mndo̍ ho̍ō ni᷄ŋ ni̍. Wānāā nda̍ tōsa̍ ma̍ sīmnu᷄ŋ wa̍nāā tāmbɛ̍i̍ya̍, ā chō ni᷅ŋ ha̍ū ni̍ɔ̍ū nīɔ̄ūwo̍ o̍ chi̍e̍e̍ pɔ᷅mndo̍ ho̍ō ni᷄ŋ.

⁷Mɛ̄lɛ̄ka̍ Ya̍a̍wɛ̄ɛ̄, wānāa̍ cho̍ sa̍kpō wa̍, le̍ te̍le̍ŋ o̍ te̍le̍ŋ nɛ̄īyo̍ ŋ̄ bɛ̄ɛ̄ndīāā nda̍ lāchī nyɛ̄ kɛ̄ndɛ̄ kɛ̍ndɛ̄ ni̍. Tōsāa̍ ŋ̄ tōsā ni̍, mī nɛ̄īyo̍ ō wa̍ ō pēēlāā ndā lāchī tɛ̍lɛ̍lɛ̍.

⁸Mɛ̄lɛ̄ka̍ Ya̍a̍wɛ̄ɛ̄, nyɛ̄ ŋ̄ hɛ̄na̍ŋ māā ō yɔ̄nu̍ŋ ndo̍, ndu̍ na̍a̍ ŋ̄ chō tōlɔ̄ɔ̍ kɔ̄ɔ̄lī ni̍, ndu̍yɛ̍ mi̍ ŋ̄ wā lēhɔ̄l o̍ nɛ̄ī le̍ te̍le̍ŋ nu̍m kpe̍e̍kpe̍i̍yo̍. Dīōlā nūmnda̍ cho̍ le̍ fɛ̍ɛ̍ŋ a̍ fɛ̍ɛ̍ŋ nda̍ŋ, o̍ la̍ŋ yēēmɛ̍i̍ nɛ̄i̍ kpo̍u̍ i̍ cho̍ ni̍.

⁹Tē I̍ hi̍ni̍ īchɔ̄l pɛ̍, yīya᷄ŋ nūu̍ kpo̍u̍ o̍ nūmndo̍ o̍ wa᷅ ni̍. Tē pāa̍le̍ŋ lē sɛ̄ vɛ̄lɛ̄ pɛ̍ mī chɛ̍ŋ, nyɛ̄ o̍ nyɛ̄ chēle̍ŋ kɔ̄l nūu̍ ō ye̍e̍mā le̍, mɛ̄ɛ̍ nu᷄m pīlɛ̍ kpe̍. Tē a̍ ki̍lu̍l chi̍e̍ēŋndo̍ yāmɛ̍i̍ pɛ̍, mā tu̍si̍ ndu̍ nyɛ̄ pālāa̍ chōo̍, wānāa̍ cho̍ o̍ chi̍e̍ēŋndo̍ ni᷄ŋ nda̍, sīnāa̍ nda̍ sīnā nyɛ᷅ cho̍ sa̍kpō le̍ tōsāa̍ wo̍ ni̍.

¹⁰Wānāā dɛ̍nɛ̍ wɔ̍ɔ̍ŋnda̍ nda̍, ā yɔ̍ŋ bɛ̍ɛ̍ mā to̍sa̍l nda̍ dɛ̍nɛ̍ kɛ̍ndɔ̄ɔ̍, ā nɔ̍lā mā māŋga̍la̍ŋ mā tōsa̍ nyɛ̍ cho̍ sa̍kpō le̍ tōsāa̍ wo̍ le̍. O̍ lɛ̄ŋnde̍ŋ nde᷅ŋ ni᷄ŋ bɛ̍ɛ̍, lɛ̄ŋnde̍ cho̍ le᷅ŋ sa̍kpō nu̍m o̍ hɔ̄l le̍ŋ, hīōūwɔ̄ɔ̍ nda̍ hīāū la̍chi̍ a̍ sɔ̄ɔ̍ŋ wɔ̍ɔ̍ŋndo̍ŋ tōsāa̍ ni̍. Ā si̍nā māā ā chō wāna̍ tɔ̍ɔ̍ma̍ bɛ̄ndū le̍.

¹¹Mɛ̄lɛ̄ka̍ Ya̍a̍wɛ̄ɛ̄, ya̍a̍mɔ̍ɔ̍wa̍a̍ nu̍mnda̍, ā cho̍ bɛ̍ɛ̍ si̍nā māā a̍ bɛ̍ɛ̍ndi̍a̍ŋ le̍ nda̍ nyɛ̄ pālāa̍ tūsīo̍o̍ chōo̍ le̍. Chɔ̍m nda̍ mɛ̄ɛ̍ ŋ̄ nɔ̄ kɔ̄llo̍ le̍ sɔ̄ɔ̍ŋ tōsāa̍ yo̍ōna̍ yo̍ōna̍ yɛ̍, mā sīna̍ māā a̍ ka̍a̍la̍ wānāā nūmnda̍. Tu̍si̍ nda̍ dɛ̍nɛ̍ pa̍lāā ŋ̄ kɛ̄ɛ̄si̍a̍a̍ le̍ nda̍ tūsīo̍o̍ chōo̍ wo̍ chōo̍, mī si̍ɔ̍mbu̍la̍ŋ lā bīī nda̍.

¹²Mɛ̄lɛ̄ka̍ Ya̍a̍wɛ̄ɛ̄, ŋ̄ sīnā māā ā chō tōsā mī ŋ̄ wa̍ a̍ kɔ̄ltā nyūlū. Dɛ̍nɛ̍ kɛ̍ndɛ̄ o̍ dɛ̍nɛ̍ kɛ̍ndɛ̄ na̍a̍ ŋ̄ sɔ̄la̍, ŋ̄ sɔ̄la̍ ndu̍ le̍ wa̍li̍ nāā to̍sāā le̍, nu̍m ke̍ na̍a̍ ndu̍ ni̍.

¹³O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ na̍a̍, ō fūla̍ o̍ nūm kɔ̍ɔ̍lī, māsāā che᷅le̍ŋ ā kēēku̍ na̍a̍ chōo̍ ma̍ wā na̍a̍ chīla̍ŋ, kɛ̍ ŋ̄ ke̍ ma̍sā o̍ māsā lēbɛ̄ɛ̄ māā nūm te̍.

¹⁴Māsāā ka̍ŋ ki̍nɛ̍i̍, nda̍ vī ni᷅ŋ, ō pīlɛ̍ bɛ̍ɛ̍ o̍ mi̍i̍ŋgū lɛ̍ hāū yo̍o̍mū le̍. Nyi̍nāā ndāa̍ bɛ̍ɛ̍ ā mi̍i̍ŋgū lɛ̍ hāū yo̍o̍mū le̍. A̍ tu̍si̍ nda̍ nyɛ̄ pālāa̍ chōo̍, ndu̍yɛ̍ ma̍ tɛ̄ɛ̄mbūū nda̍, ma̍ tōsā wānā o̍ wānā o̍ lo̍o̍nūŋ ndɛ̍ bɛ̍ɛ̍ a̍ nda̍ le̍.

¹⁵Mɛ̄lɛ̄ka̍ Ya̍a̍wɛ̄ɛ̄, a̍ to̍sa̍ mi̍ lɛ̄ŋndē nāāle̍ŋ lē chɔ̄ɔ̄lu᷄ŋ, ndu̍yɛ̍ mi̍ lē kūā a̍ pɛ̄ŋgɛ̄la᷄ŋndo̍ kɛ᷅ kɛ̍. Ndu̍yɛ̍ he̍ī tōsa̍, mi̍ dīōlā nūmnda̍ŋ lā chɔ̄ɔ̄lū bɛ̄ɛ̄le̍ŋ sɔ̄lā ta̍u̍ ta̍u̍. Pɛ̄ŋgu̍la̍ lɛ̄ŋndē nāāle̍ŋ lā kūɛ̄ a̍ chɔ̄ɔ̄lɔ᷄ŋndo̍ kɛ᷅ kɛ̍.

¹⁶Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ sāŋgāa̍ ō tōl wānāā nūmnda̍ chōo̍, na̍a̍ kpo̍u̍ mi̍ ŋ̄ mīīŋgū nu̍m o̍ ībūŋ. Mɛ̄ɛ̍ ŋ̄ tūsi̍ na̍a̍ dɛ̍nɛ̍ pa̍lāa̍ chōo̍ le̍ na̍a̍ sīlāa̍, mi̍ ŋ̄ pīɛ̄ī nu̍m le̍ mā ma̍la̍ na̍a̍.

¹⁷Nyɛ̄ pālāā ŋ̄ tūsi̍ na̍a̍ chōo̍ wo̍ Mɛ̄lɛ̄ka̍ Ya̍a̍wɛ̄ɛ̄, ō wa̍ māwāā mɛ̄ɛ̍ wānā la̍nɔ̍ɔ̍ te̍le̍ŋ ndɔ̄ vi̍a̍lāa̍ ō fūūlūū nu̍a̍ā mbō wa̍ o̍ sāŋgā kōŋ ni᷄ŋ yɛ̍.

¹⁸Kɛ̍ na̍a̍ sāŋgā nāa̍, tɔ̄nɔ̄ o̍ tɔ̄nɔ̄ o̍ fu̍la̍ le̍kɔ̍ɔ̍lī, mɛ̄ɛ̍ wāna̍ yo᷄llo̍ ō sāŋgā nu̍a̍ā, kɛ̍ ndu̍yɛ̍ mbō vēlū chūā ndɔ̄ɔ̍ yɛ̍ le̍. Ō hi᷄ŋ a̍ mālā o̍ mālā, o̍ to̍sā mī lɛ̄ŋndē nāāle̍ŋ lē sɔ̄la̍ pīōŋɔ̄ɔ̍ wo̍ le̍. Ŋ̄ sɔ̄la̍ wa̍nā o̍ wānā mbō fūla̍ o̍ pūlāle̍ nāāle̍ŋ chōo̍ mbō chūa̍ chi̍e̍ēŋndo̍ le̍.

¹⁹Kɛ̍ ndu̍yɛ̍ ŋ̄ sīnā māā wānāā nūm a̍ vi᷅ wa̍ ki̍nɛ̍i̍, ā chō vɛ̄lɛ̄ mīīŋgū yōōmū. Dīāllūŋ ndāa̍ŋ ŋ̄ chō vɛ̄lɛ̄ mīīŋgū yōōmū. Nya̍ cho̍ o̍ pūūlōo̍ bɛ̄ŋgu̍ wa̍, lā tīōndu̍ mī lā mīīŋgu̍ yōōmū, ndu̍yɛ̍ mī lā dɔ̄ɔ̄nu᷄ŋ nya̍a̍le̍ a̍ chōndo̍ŋ. Mɛ̄ɛ̍ mɔ᷄mndo̍ ō chūchū nu̍a̍ā o̍ tɔ̄lɔ̄ɔ̄la̍ŋ chōo̍ mbō tōsa̍ mī tɔ̄lɔ̄ɔ̄la̍ŋ lā wa̍ pūīyo̍ tɛ̍ɛ̍tɛ̍ɛ̍ yɛ̍, le̍nde̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ wānāa̍ vi᷅ ni᷅ŋ sīndɛ̄ pa̍ wa̍ mīŋgī yōōmū ni̍.

²⁰Lā lūɛ̍i̍ chi̍ɛ̍īla̍ŋ ni᷄ŋ wānāā nīa̍a̍, mī lā kīīndi̍a̍ŋ di̍ōla̍ŋ kɔ̄ɔ̄lī. Lā vīōŋnu̍ŋ chi̍ɛ̍īla̍ŋ ni᷄ŋ mī lā wa̍ lo̍ŋ le̍ te̍le̍ŋ bi̍ŋgī, ha̍a̍a̍ mbō lo̍ o̍ ko̍ŋ mī tu̍mbe̍ Mɛ̄lɛ̄ka̍ dɔ̄ɔ̄nu̍ŋ ndo̍ ō pɔ̄lu̍l.

²¹Mɛ̄lɛ̄ka̍ Ya̍a̍wɛ̄ɛ̄ o̍ cho̍ chɔ̄nɔ᷄ŋ o̍ fo̍ndāŋ ndɔ̄ɔ̍ chōo̍ cho̍o̍, mbō hu᷄ŋ tu̍sī wāŋnda̍ o̍ chi̍e̍ēŋndo̍ ni᷄ŋ nyɛ᷅ pālāa̍ chōo̍, le̍ yɔ̄ŋndā wɔ̄ɔ̍ŋnda̍ nda̍ tōsa̍ la̍ŋ. Wāna̍ chi̍e̍e̍ o̍ wāna̍ chi̍e̍e̍ nda̍ dīī o̍ chi̍e̍ēŋndo̍ chōo̍, wāŋnda̍ chō hūnɔ̄ɔ̄ chɔ̄ kpo̍u̍. Ndu̍yɛ̍ wānā o̍ wānā nda̍ dīī, lɛ̄ŋnde̍ŋ lē vi᷅ŋ ndɛ̍ ni̍ŋ wa̍nāā kāŋ te̍.