Read Southern Kisi Āīsa̍yā 27 Bible Online

Āīsa̍yā 27 - Southern Kisi bible

Āīsa̍yā 27

¹Tē te̍le̍ŋ ko̍ŋ ō fūūlu̍u̍ pɛ̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ mūɛ̄ī ndūɛ̍i̍ fāŋīī kpāāyɛ̄ī bɛ̍ndūe̍i̍ chūā, mūɛ̄ī ndūɛ̄ī lu̍ɛ̍i̍yɛ̄ī bɛ̄ndūe̍i̍, mūɛ̄ī ndūɛ̍i̍ kpūndɛ̍i̍ bɛ̄ndūe̍i̍, le̍ Līvīa̍a̍tāŋ[4] nyɛ̄ pālāa̍ tūsīo̍o̍ chōo̍, ndu̍ yɔ̍nūŋ ni̍ māā, kɛ̄ū nyāāna᷄ŋ bɛ̍ndōo̍, kɛ̄ū nyīlīpīpī bɛ̄ndōo̍ o̍ pēēlo̍, Mɛ̄lɛ̄ka̍ chō tāmba̍lāka̍ tūūndu̍ɛ̍i̍ cho̍ ko̍ŋ o̍ Pēe̍ Mɛ̄ŋmā Īhɛ᷄llo̍ ni᷄ŋ ndo̍ dīyɔ̄ɔ̄.

²A̍ te̍le̍ŋ ko̍ŋ, wāŋnda̍ sōlī ni̍ŋ chōnde̍i̍ he̍ī, a̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī ni̍ŋ a̍ kpe̍le̍ ndɔ̍ mākīle̍pīi̍ kɛ̍ndɛ̄ kɛ̍ndɔ̄ɔ̍ o̍kɔ̄ɔ̄ yɛ̍ āā,

³“Ya̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ kpe̍le̍ ni̍ mākīle̍pīi̍yo̍ māndāa̍. Le̍ te̍le̍ŋ o̍ te̍le̍ŋ I̍ cho̍ ndu̍ pɔ̄ɔ̄līa̍a̍ nyɛ̄ kɛ̄ndɛ̄ kɛ̍ndɛ̄. Le̍ īdīi̍ a̍ īchɔ̄l I̍ cho̍ ndu̍ māndāa̍, yɔ̄ŋi̍ wānā hu̍ŋ mbō hu̍ŋ tɛ̍ɛ̍mbūū ndu̍.

⁴I̍ cho̍ lɛ̍ a̍ tu̍mbe̍ ndɔ̄ le̍. Nda̍ a̍a̍ yɔ̍ŋ bɛ̍ɛ̍ mī ko̍o̍yu̍e̍i̍ a̍ yɔ̄mīī ŋ̄yūɛ̍i̍ ndi̍ i̍i̍ wa̍ nyɛ̄ sīmūlāā ya̍ o̍ kpe̍lo̍o̍ ho̍ō ni᷄ŋ, I̍ wa̍ sɔ̍ŋgā a̍ ndi̍. I̍ wa̍ ndi̍ lōmɔ̄ɔ̄ kpo̍u̍.

⁵Kɛ̍ ndu̍yɛ̍ tē ya̍a̍mɔ̍ɔ̍wa̍a̍ wānāā nīa̍a̍ ā yēēma̍ pɛ̍ mī ma̍nda̍ nda̍, mɛ̄ɛ̍ ā hu᷄ŋ mī ŋ̄ hu᷄ŋ to̍sā chɛ̄la᷅ŋ kɔ̄l nyūlōo̍ na̍a̍ nda̍ā. Ā hu᷄ŋ mī ŋ̄ hu̍ŋ to̍sā chɛ̄la᷅ŋ kɔ̄l nyūlōo̍ na̍a̍ nda̍ā.”

⁶Te̍le̍ŋ cho̍ fūūlūū wāŋnda̍ I̍sɔ̄lūɛ̄ī, nda̍ yɔ̍nūŋ māā yu̍ŋgu̍ Che̍kɔ̍pū wo̍ ni̍, ā chō hūnɔ̄ɔ̄ wā māā yɔ̄m kūāmāā. Ā chō pūūndo̍ŋ lūɛ̄īyɔ̄ɔ̄ lɛ̄ŋ nyɛ̄ kɛ̄ndɛ̄ kɛ̍ndɛ̍, mā yāndu̍ mā sōli̍ pe̍e̍ŋge̍la̍ŋ ndu̍yɛ̍ mā kōm. Ndu̍yɛ̍ kōmɔ̄ɔ̄ nda̍ yɔ̄ŋgū ni̍ŋ ndo̍, ō tīū ni̍ŋ o̍ chi̍e̍ēŋndo̍ ni᷄ŋ kpo̍u̍.

⁷Nyɛ̄ pālāā Mɛ̄lɛ̄ka̍ Ya̍a̍wɛ̄ɛ̄ o̍ tu̍si̍ I̍sɔ̄lūɛ̍i̍ya̍ chōo̍ wo̍, ō cho̍ nyɛ᷅ pālāā wāā le̍nde̍ le̍ o̍ tu̍si̍ ya̍a̍mɔ̍ɔ̍wa̍a̍ ndāa̍ chōo̍ le̍. Ō dīu̍ I̍sɔ̄lūɛ̍i̍ya̍ mɛ̄ɛ̍ o̍ di̍u̍ ya̍a̍mɔ̍ɔ̍wa̍a̍ ndāa̍ yɛ̍ le̍.

⁸Nyɛ̄ pālāā o̍ ha̍ndu̍ wānāā ndūa̍a̍ I̍sɔ̄lūɛ̍i̍ chōo̍ wo̍, ndu̍ cho̍ yɔ̄ŋndo̍ nda̍ o̍ bīyɔ̄ɔ̍ ni᷄ŋ ni̍. Mbo̍ chūā nda̍ mbō yɔ̄ŋ nda̍ po̍lo̍ŋ, mɛ̄ɛ̍ hūēīyīī wɔ̄ɔ̍ŋīī bɛ̄ndūi̍i̍ cha᷅ŋ ba᷅ pāa̍le̍ŋ lē chāŋndo̍ ve̍, kūānūŋ nu̍a̍ā a̍ nyɔ̄ɔ̍ yɛ̍.

⁹Kɛ̍ ndu̍yɛ̍ le̍ mī I̍sɔ̄lūɛ̍i̍ya̍, nda̍ yɔ̍nūŋ māā yu̍ŋgu̍ Che̍kɔ̍pū wo̍ ni̍, ā sɔ̄la̍ mālɔ̄ɔ̍ le̍ yɔ̄ŋndā ndāla̍ wɔ̍ɔ̍ŋnda̍ŋ, ndu̍yɛ̍ nyɛ̄ o̍ nyɛ̄ wɔ̄ɔ̍ŋ nda̍ tōsa̍ mī Mɛ̄lɛ̄ka̍ fāŋa̍ nda̍ ndu̍ chōo̍, mɛ̄ɛ̍ mā tɛ̄ɛ̄mbu̍u̍ ma̍āŋndā nda̍ sōlī sa̍lāla̍ŋ o̍ mɛ̄lɛ̄ka̍a̍ ndāā yɛ̍ yi̍a̍a̍ lo̍ la̍ŋ, ndu̍yɛ̍ mā pēsi̍ pōūtā nda̍ tāŋgu̍l ma̍āŋndā lāŋ nda̍ŋ, mā chūī la̍ŋ mu̍lu̍lu̍ māā chu̍ndu̍. Sūŋgbu̍ma̍ nda̍ sīmi̍ sɔ̍ŋgɔ̍ mɛ̄lɛ̄ka̍ A̍si̍ɛ̍lūā wa̍ŋ, a̍ ma̍āŋndā nda̍ lūām nyɛ᷅m chūŋ kɛ̄ndɔ᷄ŋ lēchōo̍ o̍ mɛ̄lɛ̄ka̍a̍ ndāa̍ lo̍ la̍ŋ, ā nɔ̄ mā fa̍a̍ŋi̍a̍a̍ la̍ŋ kpo̍u̍.

¹⁰Chi̍e̍e̍ wa̍ ho̍ō ō bālāā a̍ sāāsāla̍ ka̍lā ka̍lālā bɛ̄ndūla̍ŋ le̍ ndu̍ māndāa̍ wo̍, ō sīmnu᷄ŋ pɔ᷅mndo̍. Ō pīɔ̍l mbo̍ lō fo̍ndō, mbo̍ sīmnu᷄ŋ mɛ̄ɛ̍ lɛ̄ŋndē po̍lte̍ŋ lē wā nu̍a̍ā yɛ̍. Ō sīmnu᷄ŋ fo̍ndāŋ nāūva̍ ā kūā di̍o̍la̍ŋ a̍ hīni̍ŋnda̍ŋ ndo̍. Yɔ̄mīī pūīyɛ̄i̍ cho̍ lo̍ŋ nde̍ kpo̍u̍, nāūva̍ chīi̍ pēi̍ sōōndīāā o̍ lɛ̄ūwūŋ ndɔ̄ɔ̍ŋ pa̍ku̍.

¹¹Lɛ̄ūwo̍ŋ o̍ yɔ̄mnde̍ kpo̍u̍, ŋ̄ vēsa̍ mi̍ ŋ̄ wā dēlīo̍o̍, mī wāŋ lāāndūa̍a̍ chɔ̄ɔ̄vīāā mā kūā dɔ̍wɔ̄ɔ̄ o̍ yīŋ. Wāŋnda̍ ha̍ā ā nɔ̍ si̍nā pɛ̄ŋgu̍ o̍ sīnā pɛ̄ŋgu̍ le̍. Le̍ he̍ī, wāna̍ to̍o̍si̍a̍a̍ nda̍ wo̍, ō nɔ᷅ ni̍ŋ i̍nyi̍ɛ̍ɛ̍ o̍ īnyīɛ̍ɛ̍ le̍ nda̍ le̍. Wāna̍ ma̍l nda̍ o̍ chi̍e̍ēŋndo̍ chōo̍ wo̍, ō nɔ̍lā ni̍ŋ mbō chē nda̍ nyīnā o̍ nyīnā le̍.

¹²A̍ te̍le̍ŋ ko̍ŋ, Mɛ̄lɛ̄ka̍ Ya̍a̍wɛ̄ɛ̄ o̍ cho̍ wānāā ndūa̍a̍ I̍sɔ̄lūɛ̍i̍ hɛ̄lī ā pīlɛ̍ŋ pi̍lɛ̍ŋnda̍, chɔ̍ŋ o̍ Pīo̍o̍ Yūfi̍lu̍a̍tīī mbō kūɛ̄ o̍ pɛ̄ŋgu̍la̍ŋ a̍ lɛ̄ŋndē I̍chi̍pīle̍ŋ.

¹³Tē te̍le̍ŋ ko̍ŋ ō fūūlu̍u̍ pɛ̍, bu̍lu̍ bɛ̍ndōo̍ chō īsɔ̄ɔ̍. O̍ ko̍ŋ, I̍sɔ̄lūɛ̍i̍ya̍a̍ cho̍ ā lāāsīa̍ŋ Āsi̍i̍līāā wa̍ ni̍, a̍ cho̍ o̍ bīyɔ̄ɔ̍ ni᷄ŋ I̍chi̍pī wa̍ ni̍, nda̍ kpo̍u̍ ā chō hūnɔ̄ɔ̄ Mɛ̄lɛ̄ka̍ Ya̍a̍wɛ̄ɛ̍ sōōlūū o̍ pēmbīī ndūɛ̄ī di̍a̍ndɛ̄i̍ Chūlu̍sɛ̄lɛ̄m cho̍o̍.