Read Southern Kisi Āīsa̍yā 3 Bible Online

Āīsa̍yā 3 - Southern Kisi bible

Āīsa̍yā 3

¹Māsānɔ̄ɔ̍ Mɛ̄lɛ̄ka̍, Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍, nyɛ̄ o̍ nyɛ̄ wāŋnda̍ Chūlu̍sɛ̄lɛ̄m a̍ Chu̍dā a̍ ti̍i̍nda̍ŋ, ō chō ndu̍ hūnɔ̄ɔ̄ sōlī nda̍ tɛ̄ɛ̄ŋ, ndu̍yɛ̍, wānā o̍ wānā nda̍ tīīnda̍ŋ vɛ̍lɛ̄, mbō sōli̍ nda̍ kpo̍u̍ nda̍ tɛ̄ɛ̄ŋ. Nyɛ̄ o̍ nyɛ̄ dīāā nda̍ nɔ̄, ō chō tōsā mbō hu᷄ŋ chu̍ū nda̍ o̍ lābā, ndu̍yɛ̍ mɛ̄ŋmā ndā ma̍ko̍la᷄ŋ bɛ̍ɛ̍ mī mā chūū.

²Ku̍u̍ba̍a̍ ndāa̍ chɔ̄ūwa̍ ni̍, a̍ so̍vɛ̄i̍ya̍a̍ ndāa̍, a̍ chɔ̄ɔ̍chi̍a̍a̍ ndāa̍, a̍ wānāā ndāa̍ su̍a̍ā le̍ Mɛ̄lɛ̄ka̍ wa̍, a̍ wānāā ndāā vi̍a̍māā lāyāwāa̍, a̍ wāŋ bɛ̄ndūa̍a̍ ndāa̍, a̍ wānāa̍ cho̍ so̍vɛ̄i̍ya̍a̍ ndāa̍ bōlle̍ wa̍, a̍ wāŋ bɛ̄ndūāā ndāa̍ lēlɛ̄ŋnda̍, a̍ wānāā ndāā si̍lāa̍, a̍ wānāā ndāā ma̍ŋgālāa̍ kɔ̄l kālu̍a̍a̍ bɛ̍ndūa̍a̍, ndu̍yɛ̍ a̍ wānāā ndāa̍ mākōŋgu̍a̍a̍, nda̍ kpo̍u̍ ō chō hūnɔ̄ɔ̄ chīī a̍ nda̍.

⁴Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ māā, pūa̍a̍mbūāā pɔ̄mbūa̍a̍ nda̍ ya̍ I̍ hɛ̍lī ni̍ŋ ni̍, mī si̍i̍ŋgu̍u̍ nda̍ wāŋ bɛ̄ndūāā lēlɛ̄ŋnda̍ wāŋnda̍ chōo̍. Chɛ̄lɛ̄kpi̍a̍a̍ le̍ndīa̍a̍, nda̍ wa᷅ ni̍ŋ nda̍ chōo̍ ni̍.

⁵A̍ te̍le̍ŋ ko̍ŋ, wānā o̍ wānā o̍ tu̍sī ni̍ŋ cha̍a̍ŋ ndɔ̍ nyɛ̄ pālāa̍ chōo̍. Wānāa̍ chi̍ɛ̍ɛ̍li̍āŋ nda̍, ā tūsi̍āŋ ni̍ŋ nyɛ̍ pālāa̍ chōo̍, ndu̍yɛ̍ mī fe̍le̍ŋgu̍a̍a̍ ā sīmu̍l bɛ̄ndūa̍a̍, o̍ ko̍ŋ kɔ̍ɔ̍lī, mī wānāa̍ cho̍ bɛ̍ɛ̍ ŋ̍wa᷅ŋ kpo̍so̍ŋ te̍ wa̍, ā sīmu̍l wānāa̍ nɔ̍ bɛ̄ɛ̄le̍ŋ nda̍.

⁶A̍ te̍le̍ŋ ko̍ŋ, wāŋndo̍ ō sāā ni̍ŋ wa᷅na̍ nda̍ fūla̍ o̍ yu̍ŋgu̍ pi᷅lɔ̍ɔ̍ chōo̍ wo̍, mbō dīmu̍l ndu̍ āā, “Yāndi̍i̍, mɛ̄ɛ̍ nūm nɔ̄ dōma̍ ŋ̄ wōōnūŋndo̍ yɛ̍, mɛ̄ɛ̍ nūm wa̍ na̍a̍ chōo̍ ma̍sāa̍. Nūm wa̍ pɔ᷅mndo̍ ho̍ō chīla̍ŋ.”

⁷Kɛ̍ mī wānā ko̍ŋ ō kɛ̄ɛ̍, mbō dīmu̍l ndu̍ āā, “I̍ nɔ̍lā mī ma̍la̍ nya̍ le̍, fo̍ndōlē, I̍ nɔ̍ nyɛ̍ dīāā chīɛ̄ī ni̍ŋ te̍. Le̍la̍ŋ lā si̍i̍ŋgūū ya̍ wāna̍ nyā ba̍nā le̍.”

⁸Dɛ̍nɛ̍ pa̍lāā bɛ̄ndōo̍ ō chō le̍ Chūlu̍sɛ̄lɛ̄m. Mbɔ̄ lɛ̄ŋndē Chu̍dāle̍ŋ lē de᷄l. Wāŋnda̍ ha̍ā dīōmnda̍ fu̍lā nda̍ o̍ lāsōndō la̍ŋ, ndu̍yɛ̍ a̍ nyɛ̄ nda̍ chō tōsāa̍ wo̍, ndu̍ kpe̍e̍kpe̍i̍ chɔ᷅m ni̍ māā ā sīmu̍l Mɛ̄lɛ̄ka̍. Nāŋɔ̄ɔ̄ bɛ̄ndu̍ cho̍ le̍ Mɛ̄lɛ̄ka̍ wo̍, ma̍ lō o̍ ko̍ŋ ma̍ tɛ̄ɛ̄mbūū ndu̍ lābɛ̄ɛ̄.

⁹Sɔ̄ɔ̍ŋ wɔ̍ɔ̍ŋ nda̍ chō tōsāa̍ wo̍ŋ, chɔ̄ɔ̍ mu̍ŋ nda̍ o̍ lāhɔ̄l de᷅ŋ, ŋ̄ vi̍ŋnūŋ bɛ̍ɛ̍ le̍. Yɔ̄ŋndā wɔ̄ɔ̍ŋnda̍ŋ, ā vi̍ŋnūŋ bɛ̍ɛ̍ a̍ la̍ŋ tōsāa̍ le̍, tōsāa̍ la̍ŋ kpe̍nde̍ke̍le̍ māā wāŋnda̍ So̍dɔ̄m. Kɛ̍ dɛ̍nɛ̍ pa̍lāā bɛ̄ndōo̍ chō le̍ wāŋnda̍ ha̍ā. Nda̍ pi̍la̍ vēēlu̍ŋ kpu᷅ndɛ̍ bɛ̄ndōo̍ chōo̍.

¹⁰Lā dīmu̍l wa̍nāa̍ to̍sā sɔ̍ɔ̍ŋ kɛ̍ndɔ᷄ŋ nda̍ māā, nyɛ̄ o̍ nyɛ̄ wā ni̍ŋ o̍ kɛ̍ndɛ̄ a̍ nda̍. Ā chō hūnɔ̄ɔ̄ sāŋgā ndāa̍ tɔ̄nɔ̄ di̍o̍.

¹¹Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, dɛ̍nɛ̍ pa̍lāa̍ chō le̍ nda̍. Kpūndɛ̍ bɛ̄ndōo̍ wā ni̍ŋ le̍ nda̍. Nyɛ̄ o̍ nyɛ̄ nda̍ tōsa̍l chāānda̍, nda̍ bɛ̍ɛ̍ ō chō nda̍ hūnɔ̄ɔ̄ yɔ̄nɔ᷄ŋ.

¹²Wānāā nīa̍a̍, chɛ̄lɛ̄kpi̍a̍a̍ le̍ndīa̍a̍, nda̍ tu̍sī ni̍ŋ nda̍ nyɛ̄ pālāa̍ chōo̍ ni̍. O̍ ko̍ŋ kɔ̍ɔ̍lī, mi̍ wāŋ lāāndūa̍a̍ ā nɔ̄ ni᷅ŋ nda̍ kpāāyāa̍ chōo̍. O̍o̍ wānāā nīa̍a̍, wānāa̍ cho̍ nya̍ chīla̍ŋ nda̍ ā fāŋa̍ nya̍ o̍ nɛ̄i̍ kpe̍e̍kpe̍i̍yo̍ chōo̍. Ā yɛ̄ɛ̄ nya̍ o̍ nɛ̄i̍ nya̍ wā a̍ tɛ̍ɛ̍mbāā wo̍ chōo̍.

¹³Mɛ̄lɛ̄ka̍ Ya̍a̍wɛ̄ɛ̄ o̍ bɛ̍ɛ̍ndi̍a̍ŋ le̍ kɔ̍ɔ̍sɔ̍ɔ̍. Ō bɛ̄ɛ̄ndi̍a̍ŋ le̍ mbō kɔ̄ɔ̄sa̍ a̍ wānāā ndūa̍a̍.

¹⁴Mɛ̄lɛ̄ka̍ Ya̍a̍wɛ̄ɛ̄ o̍ hi᷅ŋ kɔ̍ɔ̍sɔ̍ a̍ lāŋgba̍ā kālla̍, ndu̍yɛ̍ a̍ wānāa̍ cho̍ wānāa̍ ndūa̍a̍ chīla̍ŋ nda̍. O̍ dīmu̍l nda̍ āā, “Nya̍ tɛ̍ɛ̍mbu̍u̍ kpe̍le̍ ni̍ mākīle̍pīi̍yo̍ ni̍. Nyɛ̄m nya̍ kēī wa̍nāā tāmbɛ̍i̍ya̍ pōōndīa̍a̍ o̍ lābā wo̍ŋ, mi̍ lā pēī mu̍ŋ chīɛ̄īlā nyāla̍ŋ ni᷄ŋ cha̍ cha̍.

¹⁵Ɔ̍ɔ̄ le̍ sa̍bū nya̍ chō wānāā nīa̍a̍ nyɛ̄ pālāa̍ tūsīo̍o̍ chōo̍, mī lā lūēī wa̍nāā tāmbɛ̍i̍ya̍ mɔ̍nɛ̍i̍ yo̍?” Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ nɔ̍ kpāāyāa̍ kpo̍u̍ wo̍ ō dīmi̍ wo̍ ndu̍ cho̍ ko̍ŋ ni̍.

¹⁶Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋ lāāndūa̍a̍ Chūlu̍sɛ̄lɛ̄m wānāā yōŋgāā bɛ̄ndūa̍a̍ nda̍ chō ni̍. Tē ā wa̍ bālɔ̄ɔ̍ pɛ̍, hɔ̄lla̍ chōo̍ cho̍o̍ pɔ̍ nda̍ wā nda̍ ni̍. Hɔ̄lla̍ mɛ̄ɛ̍ o̍ mɛ̄ɛ̍ ko̍ fe̍e̍ ā māŋgālīāā nda̍, le̍ hāli̍ kpe̍ŋ mī pūa̍a̍ chē nda̍ mā hɛ̄na̍ŋ a̍ nda̍. Tē ā wa̍ kɔ̄la̍ŋ pɛ̍, o̍ sōo̍ŋ chōo̍ pɔ̍ nda̍ nɛ̄ī ni̍, mā nɛ̄ī mī kēla̍ŋ cho̍ nda̍ ŋ̄ bāāyīāā o̍ pēlo᷄ŋ ndo̍ŋ ŋ̄ kūā a̍ chōmu̍llo̍.

¹⁷Kɛ̍ ndu̍yɛ̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ to̍sā ni̍ŋ a̍ wāŋ lāāndūa̍a̍ ha̍ā Sa̍a̍yɔ̄ŋ chi̍e̍e̍ wo̍, ndu̍ wa᷅ ni̍ŋ ho̍ō ni̍, I̍ cho̍ tōsā mī pāūve̍ dēli̍ nda̍ o̍ lēbōl, mī yīīŋnde̍ sūīŋgi̍ŋ nda̍ o̍ lēbōl kpo̍u̍ mā lo̍ a̍ te̍mbe̍lta̍ŋ.”

¹⁸A̍ te̍le̍ŋ ko̍ŋ, nyɛ̄ o̍ nyɛ̄ to̍sa̍ mi̍ wāŋ lāāndūa̍a̍ ha̍ā ā hēēlū hɔ̄lla̍ chōo̍, Māsānɔ̄ɔ̍ Mɛ̄lɛ̄ka̍ chō nda̍ mu̍ŋ pōōndīāā o̍ lābā kpo̍u̍. Nyɛ̄m mu̍ŋ cho̍ mu᷅ŋ ni̍. Kēla᷄ŋ nda̍ bāānu̍ŋ o̍ ŋ̄pēlū wo̍ŋ ni̍, nyɛ̄lā nda̍ yīīnūŋ o̍ lēbōl la̍ŋ ni̍, yɔ̄lɔ᷄ŋ nda̍ bāānu̍ŋ o̍ lābo̍lō wo̍ŋ ni̍,

¹⁹a̍ kēla᷄ŋ nda̍ bāāyīāŋ o̍ lābā wo̍ŋ, a̍ kēla᷄ŋ lānīo̍ŋ, a̍ kōlāla̍ vɛ̍mtu̍ vɛ̍mtu̍la̍ nda̍ hāndūŋ o̍ hɔ̄l le̍ hɔ̄lla̍ kūmbɔ̄ɔ̍ la̍ŋ,

²⁰a̍ mɔ̍si̍lta̍ nda̍ wōōnūŋ nda̍ŋ, a̍ nyɛ̄lā nda̍ bāāyīāŋ o̍ chōŋgu̍la̍ŋ nda̍ŋ, a̍ kōlāla̍ ŋ̍pɛ̍ŋgɛ̍la̍ nda̍ kāndāŋ o̍ lāchāŋ nda̍ŋ, a̍ chūɛ̄īmā ndāma̍ su̍u̍na᷄ŋ nda̍ŋ, a̍ nyɛ̄lā nda̍ bāāyīa̍ŋ le̍ dɛ̍nɛ̍ kɛ̍ndɔ̄ɔ̍ sɔ̄lāa̍ la̍ŋ,

²¹a̍ kēla᷄ŋ ŋ̄sōo̍ŋ, ndu̍yɛ̍ a̍ kēla᷄ŋ nda̍ bāāyīāŋ o̍ mi᷄ŋnda̍ŋ ndo̍ŋ,

²²a̍ dōmāla̍ ndāla̍ vi̍lɛ̄īlā kɛ̄ndɛ̄ kɛ̍ndɛ̄ la̍ŋ, a̍ la̍ cho̍ nu̍a̍ā wu̍yāŋ nda̍ŋ, a̍ dōmāla̍ lēcho̍ō la̍ŋ, a̍ bɔ̄lɔ̄la̍ pɔ̍mbɔ̄lā dūāūwāā ŋ̄ka̍ni̍la̍ nda̍ bālū o̍ lābā la̍ŋ,

²³a̍ tōfa᷅ŋndā nda̍ nūānūŋ le̍ni̍ŋ nda̍ŋ, a̍ dōmāla̍ cho̍ lā tōōsīāā a̍ kōlāla̍ kɛ̍ndɛ̄ kɛ̍ndɛ̄la̍ nda̍ŋ, a̍ mɔ̍si̍lta̍ vi̍lɛ̄īla̍ŋ, a̍ nyɛ̄lā nda̍ wōōnūŋ o̍ lēbōl a̍ nyɔ̄ɔ̍ ō hɔ̄l le̍ nda̍ hɔ̄lla̍ kūmbɔ̄ɔ̍ la̍ŋ.

²⁴Chūɛ̄īmā chūŋ kɛ̄ndɛ̄mā nda̍ a̍a̍ su̍u̍nūŋ pa̍a̍ndū tē ā hīōū pɛ̍, wāŋnda̍ bīī nda̍ hūēīyīī kɛ̄ndɛ̄i̍ ya̍ŋ, tē ā wa̍ ni᷅ŋ hīōūwɔ̄ɔ̍ pɛ̍, hūēīyīī wɔ̄ɔ̍ŋnde̍ wāŋnda̍ ā wā ni̍ŋ nda̍ bīyɔ̄ɔ̍ ni̍. Kōlāla̍ ŋ̍pɛ̍ŋgɛ̍la̍ kɛ̍ndɛ̄ kɛ̍ndɛ̄lā nda̍ a̍a̍ ka̍ndāŋ pa̍a̍ndū o̍ lāchāŋ nda̍ŋ, yūe̍i̍ nda̍ wā ni̍ŋ ka̍nda᷄ŋndo̍ o̍ lāchāŋ sɔ̍ŋgɔ̍ ko̍ŋ ni̍. Yīīŋūŋ nda̍ a̍a̍ to̍o̍sīāā pa̍a̍ndū mā bɛ̄ɛ̄ndi̍a̍a̍ mu̍ŋ nyɛ̄ kɛ̄ndɛ̄ kɛ̍ndɛ̍ī yo̍ŋ, te̍mbe̍lta̍ŋ nda̍ sēndi̍ ni̍ŋ sɔ̍ŋgɔ̍ ko̍ŋ ni̍. Nyɛ̄lā ba̍ā kālālā nda̍ a̍a̍ wo̍u̍nūŋ pa̍a̍ndū la̍ŋ, nyɛ̄lā yūūlu̍la̍ŋ, la̍ŋ nda̍ mīīŋgū ni̍ŋ wo̍u̍nɔ᷄ŋndo̍ sɔ̍ŋgɔ̍ ko̍ŋ ni̍. Nāŋɔ̄ɔ̄ ndāa̍ chō hūnɔ̄ɔ̄ chūwɔ̄ɔ̄, mī si̍ɔ̍mbu̍la̍ŋ lā sīmnu᷄ŋ nyɛ᷅ ndā.

²⁵Pūa̍a̍ chɔ̄ūwāa̍ cho̍ Chūlu̍sɛ̄lɛ̄m nda̍, a̍ mɔ̄ɔ̄ŋ fāŋndo̍ŋ nda̍ chō nda̍ hūnɔ̄ɔ̄ dīū ni̍. Ku̍u̍ba̍a̍ chɔ̄ūwa̍ Chūlu̍sɛ̄lɛ̄m, o̍ chɔ̄ūwo̍ ni᷄ŋ nda̍ chō nda̍ hūnɔ̄ɔ̄ dīū ni̍.

²⁶Wāŋnda̍ wa̍ ni̍ŋ cha̍ŋnda̍ŋ o̍ dīōlā sāāsāla̍ŋ Chūlu̍sɛ̄lɛ̄m, mā kōŋūl cho̍o̍ cho̍o̍ kpe̍le̍ŋ. A̍ chō hūnɔ̄ɔ̄ Chūlu̍sɛ̄lɛ̄m dīndī tɛ̍ɛ̍. Mɛ̄ɛ̍ dɛ̍nɛ̍ pa̍lāā bɛ̄ndōo̍, ō kōmāl nu̍a̍ā wānā la̍nɔ̍ɔ̍ mbō cha᷄l lɛ̄ŋ mbō sāndu̍ yɛ̍ndɛ᷄ŋ yɛ̍, le̍nde̍ i̍ yɔ̍nūŋ ni̍ŋ a̍ Chūlu̍sɛ̄lɛ̄m ni̍.