Read Southern Kisi Āīsa̍yā 30 Bible Online

Āīsa̍yā 30 - Southern Kisi bible

Āīsa̍yā 30

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Dɛ̍nɛ̍ pa̍lāā bɛ̄ndōo̍ ō wā ni̍ŋ le̍ chūāūwāā nīa̍a̍ si̍mu̍l la̍ ha̍ā wa̍. Wāŋnda̍ ha̍ā, tūūlā ndāla̍ nda̍ pi̍la̍ la̍ŋ, la̍ cho̍ bɛ̍ɛ̍ tu̍u̍lā nīle̍ la̍ŋ, la̍ŋ nda̍ tūāl kɔ̍ɔ̍lī ni̍. Ā chō mālɔ̄ɔ̍ mā kūā chɛ᷅la᷅ŋndā kɔ̄l nyūlūla̍ŋ tōsāa̍ a̍ lɛ̄ŋīī chēle̍ŋnde̍, ō ve᷅ bɛ̍ɛ̍ ye̍e̍mɛ̍i̍ nī le̍. Yɔ̄ŋndā wɔ̄ɔ̍ŋnda̍ŋ dɔ̄wɔ̄ɔ̍ tu̍ŋ nda̍ chō la̍ŋ lēchōo̍ a̍ tōsāa̍ ni̍.

²Ā mālnu̍ŋ ma̍ kūā o̍ lɛ̄ŋndē I̍chi̍pīle̍ŋ ni᷄ŋ, le̍ nda̍ kɔ̄la̍ŋ nyūnāa̍ le̍ mālāa̍, nyūnā bɛ̍ɛ̍ ā nyūna̍ ya̍ a̍ ndi̍ o̍kɔ̄ɔ̄. Tīīnda᷄ŋ ndāa̍ ni᷅ŋ kpo̍u̍, o̍ Māsā Bɛ̍ndōo̍ I̍chi̍pī ni̍ŋ o̍ cho̍ ni᷅ŋ ni̍ le̍ nda̍ māndāa̍. Māsā Bɛ̍ndōo̍ I̍chi̍pī, ndu̍ nda̍ tīīnda̍ŋ ni᷅ŋ ni̍ le̍ mbō mānda̍ nda̍.

³Kɛ̍ si̍ɔ̍mbu̍la̍ŋ lā chō nda̍ hūnɔ̄ɔ̄ bīyɔ̄ɔ̄, fo̍ndōle̍, Māsā Bɛ̍ndo̍o̍ I̍chi̍pī o̍ nɔ̍lā ni̍ŋ mbō mānda̍ nda̍ le̍. Ā tīīnda̍ŋ wa᷅ŋnda̍ I̍chi̍pī le̍ nda̍ māndāa̍, kɛ̍ ā chō hūnɔ̄ɔ̄ mɛ̄ɛ̄lū kɔ̄l tāmbu̍.

⁴Mi̍ chē bɛ̍ɛ̍ mi̍ wānāā ndāā bɛ̍ndūa̍a̍ ā wā ni᷅ŋ So̍wāŋ chi̍e̍e̍ o̍ lɛ̄ŋndē I̍chi̍pīle̍ŋ ni᷄ŋ, ndu̍yɛ̍ mi̍ wānāā nda̍ vēm hɔ̄ltē ndā wa̍ ā fūūlūū Ha̍nɛ̍sī chi̍e̍e̍ ni̍,

⁵kɛ̍ si̍ɔ̍mbu̍la̍ŋ lā chō hūnɔ̄ɔ̄ wāŋnda̍ Chu̍dā bīyɔ̄ɔ̄, fo̍ndōle̍, wāŋnda̍ I̍chi̍pī a̍ nɔ̍lā ni̍ŋ mā māla̍ nda̍ le̍. Wānāā nda̍ tīīnda̍ŋ le̍ nda̍ mālāa̍ wā, ā nɔ̍lā ni̍ŋ mā māla̍ nda̍ le̍. Wānāā kāŋ chō tōsā mī si̍ɔ̍mbu̍la̍ŋ lā bīī wāŋnda̍ Chu̍dā, ndu̍yɛ̍ mā tāmbu̍ lābɛ̄ɛ̄.”

⁶Yōōŋgū Mɛ̄lɛ̄ka̍ ke̍ ya̍ Āīsa̍yā a̍ vīsīa̍a̍ o̍ lɛ̄ŋndē po̍lte̍ŋ ni̍ŋ ba᷅ tōūwo̍ o̍kɔ̄ɔ̄ wo̍, ndu̍ cho̍ ho̍ō ni̍. Lɛ̄ŋnde̍ŋ nde᷅ŋ lɛ̄ŋndē wɔ̄ɔ̍ŋ wɔ̄ɔ̍ŋnde̍ŋ pi̍la̍ le̍ cho̍ le̍ bālɔ̄ɔ̍ lēni᷄ŋ ni̍. Kpɔ̍kūŋāā pīāāndūa̍a̍ a̍ ā lāāndūa̍a̍ ā chō ā tīūwāā bā o̍ bā fe̍e̍. Kɛ̄ūwāā wɔ̄ɔ̍ŋ wɔ̄ɔ̍ŋāā bɛ̄ndūa̍a̍, a̍ kɛ̄ūwāā hu̍u̍lū le̍ wāna̍ chi̍o̍o̍ lɔ̄wāa̍ wa̍, ā chō ā tīūwāā lɛ̄ŋnde̍ŋ kpo̍u̍. Lɛ̄ŋnde̍ŋ nde᷅ŋ, le̍ŋ ki̍i̍la̍a̍ wāŋnda̍ Chu̍dā a̍ ve᷅m I̍chi̍pī wa̍ ā kēlū tɛ̄ɛ̄ŋ kpa̍li̍ ni̍, le̍ kɔ̍la̍ŋ wāŋnda̍ I̍chi̍pi̍ nyūnāa̍ le̍ mālāa̍. Ki̍i̍la̍a̍ ha̍ā mɛ̄ɛ̍ nda̍ wa̍ kɔ̄la̍ŋ, ma̍ chūā nyɛ̄m ba̍ā kālāŋ bɛ̄ndo᷄ŋ ma̍ dōvī nyɔ̍mi̍a̍a̍ ndāa̍ a̍ sōfɛ̍li̍a̍a̍ ndāa̍ o̍ lākɔ̄ɔ̄, le̍ mā kūɛ̄ a̍ mu̍ŋ o̍ lɛ̄ŋndē I̍chi̍pīle̍ŋ ni᷄ŋ mā kɔ̍ ke᷅ wāŋnda̍ I̍chi̍pī, wānāa̍ nɔ̍lā ha̍ā mā māla̍ nda̍ kpo̍sōŋ te̍ wa̍.

⁷Mālā ō mālā wāŋnda̍ I̍chi̍pī a̍ nɔ̍lā mā māla̍ wāŋnda̍ ha̍ā le̍. Le̍la̍ŋ I̍ cho̍ I̍chi̍pī dīōlā īsi̍ɛ̍la̍ŋ kē āā, “Lu̍e̍ha̍bi̍,[7] vīsī tɔ̍ɔ̍ma̍ bɛ̄ndu̍ nɔ̍lā wa̍nā nyɛ᷅ yɔ̄ŋ te̍ wo̍.”

⁸Mi̍ Mɛ̄lɛ̄ka̍ lō o̍ ko̍ŋ mbo̍ dīmūl la̍ māā, po̍o̍nyi̍a̍a̍ a̍ ka̍ā wāŋnda̍ ha̍ā o̍kɔ̄ɔ̄ o̍ yāu̍ cho̍o̍ nda̍ o̍ hɔ̄l kpe̍nde̍ke̍le̍. Po̍o̍nyi̍a̍a̍ nyɛ᷅ nda̍ tōsa̍ wo̍ o̍ yāu̍ cho̍o̍ mā ki̍nda̍ kpi̍ŋ, mī yɔ̄ŋndā ndāla̍ wɔ̍ɔ̍ŋnda̍ŋ lā wa̍ lā kɛ̄sīāā le̍ fɛ̍ɛ̍ŋ a̍ fɛ̍ɛ̍ŋ māā lēse̍ī.

⁹Wāŋnda̍ ha̍ā, wānāa̍ si̍mu̍l la̍ wa̍ nda̍ chō ni̍. Wānāā lāchōōwāa̍ nda̍ chō ni̍. Wānāa̍ kɛ̍ɛ̍ le̍ nīla̍ŋ yāŋɔ̄ɔ̍ o̍ nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mu̍l nda̍ wo̍ wa̍ nda̍ chō ni̍.

¹⁰Ā bīī pɛ̍ ā dīmu̍l wānāa̍ su̍a̍ā le̍ Mɛ̄lɛ̄ka̍ wa̍ āā, “Mbɔ̄ lā pɛ̄ŋgi̍ wɔ̍ ni᷅ŋ a̍ sɔ̄ɔ̍ŋ wa̍ā lāchīŋ mu᷅ŋ chɔ̄ɔ̍.” Ndu̍yɛ̍ mā dīmūl nda̍ āā, “Lā di̍mūl lɛ̄ na̍a̍ le̍ nyɛ̄ o̍ nyɛ̄ kɛ̄ndɛ̄ tōsā le̍. Lā dīmu̍l na̍a̍ ni᷅ŋ yōōŋgūla̍ to̍sā mī ŋ̄ na᷄ŋ lākɔ̄l ta̍ŋ. Lā wa̍ bɛ̍ɛ̍ yo̍o̍ŋgūlā lāchōōwā, lā dīmu̍l na̍a̍.

¹¹Lā pɛ̄ŋgi̍ ni᷅ŋ na̍a̍ nɛ̄īyo̍ kīndāa̍ lāchī a̍ yōōŋgūlā nyāla̍ nya̍ chō na̍a̍ dīmūllo̍ la̍ŋ. Lā fāŋa̍ŋ ni᷅ŋ na̍a̍ o̍ nɛ̄ī. Lā pɛ̄ŋgi̍ ni᷅ŋ na̍a̍ dīmūllo̍ a̍ Mɛ̄lɛ̄ka̍ dīāndāā kōŋ I̍sɔ̄lūɛ̄ī o̍kɔ̄ɔ̄.”

¹²Kɛ̍ nyɛ̄ I̍sɔ̄lūɛ̍i̍ya̍ Mɛ̄lɛ̄ka̍ ndā di̍a̍ndāa̍ ō dīmi̍ wo̍ cho̍ ho̍ō ni̍. Ō dīmi̍ āā, “Lā lo̍ o̍ ko̍ŋ mi̍ lā kɛ̄ɛ̄ yōōŋgū nūu̍, mi̍ lā chūā ka̍fāla̍ŋ, a̍ wāŋnda̍ hūīyo̍ māā wa̍li̍ nya̍ tīīnda̍ŋ le̍ nya̍ mālāa̍ wo̍ cho̍ ko̍ŋ ni̍.

¹³Le̍ nyɛ̄ nya̍ chō ho̍ō tōsāa̍ wo̍, dɛ̍nɛ̍ pa̍lāā bɛ̄ndōo̍ chō nya̍ tōlɔ̄ɔ̄ chōo̍. Ndu̍yɛ̍ mɛ̄ɛ̍ sāāsā vi̍lɛ̄ī ba̍lu̍ chi̍o̍o̍ wo̍ ō tɛ̄ndā nu̍a̍ā o̍ lēpīlɛ̍ ni᷄ŋ, mbō kōmba̍ mī nyɛ̄ o̍ nyɛ̄ yōmi̍ me̍ŋgēle᷄ŋ yɛ̍, le̍nde̍ i̍ yɔ̍nūŋ ni̍ŋ a̍ nya̍ ni̍.

¹⁴Mɛ̄ɛ̍ kpɛ̍ɛ̍nɛ̍i̍ pūūlūe̍i̍ ī pīɔ̄l nu̍a̍ā mī ī chūīīnu̍ŋ, tɛ̄ndōo̍ bɛ̍ɛ̍ wānā sɔ̍lā ndu̍ le̍ lēyīŋ chūā lēni᷄ŋ, ɔ̄ɔ̄ le̍ lēmɛ̄ŋ kɔ̄ndɔ̄ɔ̄ a̍ ndu̍ o̍ so̍o̍ŋ ni̍ŋ te̍ yɛ̍, le̍nde̍ i̍ yɔ̍nūŋ ni̍ŋ a̍ nya̍ ni̍.”

¹⁵Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍sɔ̄lūɛ̍i̍ya̍ Mɛ̄lɛ̄ka̍ ndā di̍a̍ndāa̍ ō dīmi̍ wo̍ cho̍ ho̍ō ni̍. Ō dīmi̍ āā, “Tē lā mīīŋgu̍ ya̍ o̍ ībūŋ pɛ̍, ndu̍yɛ̍ mī lā dɔ̄ū tīīnda̍ŋ nyāa̍ o̍ ya̍ ni̍ŋ, chīndāa̍ nya̍ sɔ̄lā ni̍. Tē lā yɔ̄nu̍ŋ pɛ̄ bɛ̍ɛ̍ŋ, ndu̍yɛ̍ mī lā dɔ̄ū tīīnda᷄ŋ nyāa̍ o̍ ya̍ ni̍ŋ, lā chō kpāāyāa̍ sɔ̄lā.” Kɛ̍ lā yēēma̍ mī lā tōsa̍ nyɛ̄ Mɛ̄lɛ̄ka̍ dīmi̍ wo̍ le̍.

¹⁶Mi̍ lā lō o̍ ko̍ŋ mi̍ lā kɛ̄ɛ̄sīāā māā, tē ya̍a̍mɔ̍ɔ̍wa̍ ā hīnu̍l nya̍ pɛ̍, lā nɔ̄lā mī lā he᷄l o̍ su̍a̍ā nyāa̍ nya̍a̍nūŋ nya̍a̍nɔ᷄ŋ bɛ̍ndōo̍ wa̍ chōo̍ mī lā nyāānu̍ŋ. Lā yīya̍ŋ māā su̍a̍ā nyāa̍ ā nyāānūŋ nya̍a̍nɔ᷄ŋ bɛ̍ndōo̍ pīla̍, kɛ̍ ndu̍yɛ̍ wānāa̍ wa᷅ ni̍ŋ nya̍ tōūwɔ̄ɔ̍ wa̍, su̍a̍ā ndāa̍ ā nyāānūŋ ā hīōū su̍a̍ā nyāa̍.

¹⁷So̍vɛ̄i̍ya̍a̍ ya̍a̍mɔ̍ɔ̍wa̍a̍ nyāa̍ ō pīlɛ̍ kpe̍, lā wā ni̍ŋ wa̍a̍ ō pīlɛ̍ mī lā nyāānu̍ŋ ndu̍. Ya̍a̍mɔ̍ɔ̍wa̍a̍ nyāa̍ ā ŋūɛ̍ɛ̍nu̍ kpe̍, nda̍ to̍sā ni̍ŋ ni̍ mī lā nyāānu̍ŋ kpo̍u̍. So̍vɛ̄i̍ya̍a̍ nyāa̍ kpo̍u̍ ā chō hūnɔ̄ɔ̄ pīɔ̄l, ō pīlɛ̍ bɛ̍ɛ̍ ō si᷅m ni̍ŋ te̍. Nyɛ̄ nda̍ mɛ̄ī ni̍ŋ ndo̍, mɛ̄ɛ̍ le̍ yɔ̄m nda̍ hēēlū bēēndi̍ɛ̍īyo̍ wo̍ mbō lo̍ īsīsi̍ pe̍mbēi̍ chōo̍.

¹⁸Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ye̍e̍ma̍ wɔ̄ kɛ᷅ mbō tūīīnu̍ŋ nya̍ īnyīɛ̍ɛ̍. Ō chō ō bɛ̄ɛ̄ndi̍a̍ŋ le̍ te̍le̍ŋ o̍ te̍le̍ŋ mbō tūīīnu̍ŋ nya̍ īnyīɛ̍ɛ̍, kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ to̍sā sɔ̍ɔ̍ŋ sa̍kpō wo̍ o̍ cho̍ ni̍. Ndu̍yɛ̍ wānā o̍ wāna̍ ti̍i̍nda̍ŋ Mɛ̄lɛ̄ka̍ Ya̍a̍wɛ̄ɛ̄ pɛ̍, wānā ko̍ŋ ō pɛ̄l tɔ̄nɔ̄ɔ̍.

¹⁹Nya̍ wāŋnda̍ Sa̍a̍yɔ̄ŋ, nya̍ cho̍ īchāli̍ Chūlu̍sɛ̄lɛ̄m chi̍e̍e̍ wa̍, cha᷄ŋ nyāa̍ ō chūū. Tē lā kōŋu̍l ni᷅ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ le̍ mālāa̍ pɛ̍, ō chō cha᷄ŋ nyāa̍ tūēīyɔ̄ɔ̄ mbō tūīīnu̍ŋ nya̍ īnyīɛ̍ɛ̍. Ndu̍yɛ̍ dīmīo̍o̍ nu̍a̍ā mbō tūēī cha᷄ŋ nyāa̍, ō chō nya̍ dīōm mūlī.

²⁰Māsānɔ̄ɔ̍ Mɛ̄lɛ̄ka̍ tōsa̍ mi̍ lā kēēkū o̍ dɛ̍nɛ̍ pa̍lāā bɛ̄ndōo̍ ni᷄ŋ, a̍ kɔ̄l tāmbɛ̍i̍ bɛ̍ndōo̍. Kɛ̍ ndu̍ pi̍la̍ cho̍ ni᷅ŋ wā nya̍ īkɛ̄i̍ mbō wa̍ māā wānā nya̍ pɛ̄ɛ̄kāā. Lā nɔ̍ lɛ̍ mī lā kēēla̍ lāhɔ̄l le̍ ndu̍ le̍, lā chō ndu̍ chɔ̄ a̍ hɔ̄ltā nyāla̍ŋ pɛ̍ɛ̍ŋ.

²¹Ō chō nya̍ wā māchɛ̄lū, tē lā bēndū nɛ̄īyo̍ pɛ̍, mī lā kūɛ̄ o̍ bā kɛ̄ndɔ̄ɔ̍ chōo̍, ɔ̄ɔ̄ o̍ bā mīāllo̍ chōo̍, lā tūēīnu᷄ŋ di̍ōmndo̍ a̍ mākɔ̄ɔ̄, ō dīmu̍l nya̍ āā, “Nɛ̄īyo̍ cho̍ ho̍ō ni̍. Lā kɔ̍ le̍cho̍o̍.”

²²O̍ ko̍ŋ, nyɛ̄m nya̍ tōōsi̍a̍a̍ māā mɛ̄lɛ̄ka̍a̍ nya̍, mi̍ lā kūmbū mu̍ŋ kpo̍u̍ a̍ ka̍ni̍i̍ hu̍mbūe̍i̍ yo̍ŋ ni̍, ŋ̄ nya̍ kūmbū a̍ ko̍o̍līi̍ye̍ wo̍ŋ ni̍, lā chō mu̍ŋ hūnɔ̄ɔ̄ sōlī o̍ ba̍a̍ ni᷄ŋ, mī lā tɛ̄ɛ̄mbu̍u̍ mu̍ŋ, ndu̍yɛ̍ mī lā chu̍a̍ mu̍ŋ mī lā vīōū mu̍ŋ mɛ̄ɛ̍ wānā la̍nɔ̍ɔ̍ vīāū nu̍a̍ā yūūlu̍ bāhāvɛ̍i̍yo̍ yɛ̄, mī lā dīmu̍l mu̍ŋ āā, “Lā kɔ̍, ŋ̄ yēēma̍ lɛ̍ a̍ nya̍ le̍.”

²³Mɛ̄lɛ̄ka̍ wā ni̍ŋ pi̍ɔ̍ɔ̍ yɔ̄ŋndo̍ o̍ chīɔ̄ɔ̄ŋ nyāa̍ŋ ni᷄ŋ a̍ te̍le̍ŋ nya̍ wāāyīāā chīɔ̄ɔ̄ŋ nyāa̍ŋ mī lā yēēma̍ pīɔ̍ɔ̍ wo̍, ndu̍yɛ̍ mbō tōsa̍ mī lā sɔ̄la̍ nyɛ̄ dīāā kɛ̄ndɛ̄ kɛ̄ndɔ̄ɔ̍ ta̍u̍ ta̍u̍ o̍ chīɔ̄ɔ̄ŋ nyāa̍ŋ ni᷄ŋ. O̍ ko̍ŋ kɔ̍ɔ̍lī, chɔ̄lūāā nyāa̍ bɛ̍ɛ̍ ā nɔ̄ ni̍ŋ bi᷅l pūīyāa̍ ta̍u̍ ta̍u̍ le̍ dīo̍o̍.

²⁴Nāūwāā nyāā wa̍a̍ ni̍, a̍ sōfɛ̍li̍a̍a̍ nyāā wa̍a̍, bīl kɛ̄ndɛ̄ kɛ̍ndɔ̄ɔ̍, o̍ nya̍ tōsā ni̍ŋ o̍ kpe̍le̍la̍ŋ ni̍ŋ ndo̍, ndu̍ nda̍ wā ni̍ŋ cho̍o̍ ni̍.

²⁵A̍ bōōndi̍i̍ nda̍ dīū ni̍ŋ ya̍a̍mɔ̍ɔ̍wa̍a̍ nyāa̍ dīū bɛ̄ndōo̍, o̍ ko̍ŋ kɔ̍ɔ̍lī, mā pēsi̍ fo̍ndāŋndā ndāla̍ ka̍lā ka̍lā la̍ŋ nde̍, mɛ̄ŋnda̍ŋ mā chō pīɔ̄l o̍ lūāŋūŋ bɛ̄ndo᷄ŋ, ndu̍yɛ̍ a̍ o̍ pēmbūŋ pɔ̄mbɔ᷄ŋ, mī mā sīmnu᷄ŋ pe̍ēla̍ hi̍a̍u̍wāā.

²⁶Pāŋge̍i̍ ī dīāndū ni̍ŋ mɛ̄ɛ̍ pāa̍le̍ŋ lē chō nu̍a̍ā yɛ̍. O̍ ko̍ŋ kɔ̍ɔ̍lī, mī pāa̍le̍ŋ lē dēndū mī lē hīōū mɛ̄ɛ̍ le̍ di̍a̍ndū pa̍a̍ndū yɛ̍ sālā ŋɔ᷄mmɛ̍ū, nu̍a̍ā ŋ̄ āā pālɛ̍i̍ ī ŋɔ᷄mmɛ̍ū dɔ̍u̍nu᷄ŋ na̍a̍ pi᷅lɛ̍ ni̍. Yɔ̄ŋūl Mɛ̄lɛ̄ka̍ Ya̍a̍wɛ̄ɛ̄ o̍ yɔ̍ŋu̍l wānāā ndūa̍a̍ wo̍, bōōndi̍i̍ o̍ chi̍ɔ̍u̍ ni̍ŋ nda̍ pāūvīī kēŋ mbo̍ sīŋgi̍ nda̍ ve̍, a̍ bōōndi̍i̍ ke̍ŋ sɔ̄ɔ̍ŋ mu᷅ŋ ŋ̄ yɔ̄nūŋ ni̍ŋ ni̍.

²⁷Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ cho̍ chɔ̄nɔ᷄ŋndo̍ la̍nda̍ŋ mbo̍ wā hūnɔ̄ɔ̍. Ō chō hūnɔ̄ɔ̍ a̍ yīŋnde̍ŋ ndu̍yɛ̍ a̍ kūmi̍i̍ kpu̍ŋgbɛ̄ī bɛ̄ndūe̍i̍, le̍ chɔ̄mndo̍ māā ō dɔ̄ɔ̄nu᷄ŋ tu̍mbe̍. Tu̍mbe̍ o̍ dɔ̍u̍nu̍ŋ ndo̍, o̍ chɔ̄chɔ᷄ŋ ndɔ̄ɔ̍ŋ wānā cha᷅ ndu̍ ni̍. Tē wānā che᷅ ndu̍ dīɔ̄ɔ̄mūle̍ŋ pɛ̍, nu̍a̍ā ŋ̄ chā āā yīŋndē to̍ndo̍le̍ŋ ni̍.

²⁸Tē ō yōōmu̍ pɛ̍, hūēīyīī kēŋ kɔ̄la̍ŋ ndu̍ lāchī mɛ̄ɛ̍ mɛ̄ŋmā hūna᷄ŋ mā hūŋ nu̍a̍ā o̍ pēēlo̍ mī mā bīī wānā o̍ bo̍lōla̍ŋ kpe̍ŋ yɛ̍. Hūēīyīī ndūɛ̄ī ke̍ŋ chō lɛ̄ŋnde̍ tɛ̄ɛ̄mbūū mī ī bāsu̍ ndi̍ tɛ̍ɛ̍, ndu̍yɛ̍ mī ī tōsa̍ mī tūūlā ndāla̍ dɛ̍nɛ̍ wɔ̄ɔ̍ŋnda̍ŋ lā mɛ̄ɛ̄lu̍. Mɛ̄ɛ̍ nda̍ bāā nu̍a̍ā sōfɛ̍lɔ̍ɔ̍ chīli̍ŋnde̍ o̍ sōndō, le̍ kɔ̄la̍ŋ a̍ ndu̍ yɛ̍, le̍nde̍ o̍ ku̍ā ni̍ŋ a̍ wāŋnda̍ ha̍ā le̍ nda̍ tɛ̄ɛ̄mbūūwo̍ ni̍.

²⁹Kɛ̍ nya̍ cho̍ Mɛ̄lɛ̄ka̍ wānāā ndūa̍a̍ wa̍, lā chō hūnɔ̄ɔ̄ kɔ̄l nāŋɔ̄ɔ̄, mī lā sōli̍ chōndu̍ŋ kɔ̄l kɛ̄ndɔ᷄ŋ, mɛ̄ɛ̍ nya̍ nɔ̄ nu̍a̍ā bɔ̄ŋa᷅ŋ bɛ̄ndōo̍ mī lā wa᷄ kɔ̄l kɛ̄ndɛ̄ bɛ̄ndōo̍ tōsāa̍ īchɔ̄l kōŋ yɛ̍. Mɛ̄ɛ̍ wāŋnda̍ wā nu̍a̍ā kɔ̄la̍ŋ o̍ pēmbīi̍ Mɛ̄lɛ̄ka̍ Ya̍a̍wɛ̄ɛ̄ ve̍, I̍sɔ̄lūɛ̍i̍ya̍ wāna̍ ma̍ndā nda̍ wo̍, mā wa̍ kɔ̄la̍ŋ a̍ nda̍ sɛ̄ŋnde̍ hɔ̄ŋndo̍ kɔ̄ɔ̄lī, mā kūā a̍ kɔ̄l kɛ̄ndɛ̄ bɛ̄ndōo̍ yɛ̍, le̍nde̍ nya̍ wa̍ ni̍ŋ a̍ kɔ̄l kɛ̄ndɛ̄ bɛ̄ndōo̍ ni̍.

³⁰Mɛ̄lɛ̄ka̍ Ya̍a̍wɛ̄ɛ̄ o̍ chō tōsā mī wāŋnda̍ tūēī dīōm ndɔ̍ kpāāyā bɛ̍ndōo̍ sūɛ̍i̍, ndu̍yɛ̍ mā chē bā ndɔ̍ kpāāyā bɛ̍ndōo̍, bā ndɔ̍ o̍ su̍āŋ ni̍ŋ ya̍a̍mɔ̍ɔ̍wa̍ a̍ tu̍mbe̍ bɛ̍ndōo̍ le̍ nda̍ nyɛ̄ pālāā bɛ̄ndōo̍ tūsīo̍o̍ chōo̍ wo̍. Yīŋndē wūle̍ wu᷅le̍le̍ bɛ̍ndūle̍ŋ lē wā ni̍ŋ sa̍nde̍i̍, ndu̍yɛ̍ mī hūēīyīī tɔ̍ɔ̍mɛ̍i̍ bɛ̄ndūe̍i̍ ī wā hɔ̄ŋndo̍, o̍ ko̍ŋ kɔ̍ɔ̍lī, mī pīɔ̄ɔ̄ bɛ̄ndū bɛ̍ndōo̍ ō wa̍ sīa̍a̍, lātūlu̍ a̍ lōōŋ kpu̍ŋgbāŋ bɛ̄ndo᷄ŋ.

³¹Wāŋnda̍ Āsi̍i̍līāā a̍ cho̍ hūnɔ̄ɔ̄ dīōm bɛ̄ndu̍ Mɛ̄lɛ̄ka̍ Ya̍a̍wɛ̄ɛ̄ wo̍ tūēīyɔ̄ɔ̍, mī sīōōŋīī bɛ̄ndūe̍i̍ ī bīī nda̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ ndā hūnɔ̄ɔ̄ sōŋɔ̄ɔ̍ a̍ yɔ̄m bīŋgi̍ cho̍ ndu̍ o̍ bā wo̍.

³²Ndu̍yɛ̍ tē Mɛ̄lɛ̄ka̍ Ya̍a̍wɛ̄ɛ̄ o̍ hu̍ŋ wa᷅ nda̍ sɔ᷄ŋnde̍ a̍ yɔ̄m bīŋgi̍ cho̍ ndu̍ o̍ bā wo̍ pɛ̍, bōōndi̍i̍ nda̍ wā ni̍ŋ o̍ kɔ̄l kɛ̄ndɛ̄ bɛ̄ndōo̍ chōo̍, mā wa̍ tōwāla̍ŋ a̍ nyɛ̄m chāāŋ īyōōwo̍ŋ ŋ̄ pīlɔ̍ŋ lɔ̄ɔ̍ ve̍, a̍ bōōndi̍i̍ ke̍ŋ o̍ wa᷅ ni̍ŋ nda̍ sɔ̍ŋgɔ̄ɔ̍ ni̍. Bōōndi̍i̍ ke̍ŋ o̍ cho̍ nda̍ chīŋa̍la᷅ŋ, mbō wa᷄ nda̍ sɔ̍ŋgɔ̍ɔ̍ a̍ wōlɔ̄ɔ̄lā ndɔ̄la̍ chɔ̄ūlā kpāāyāla̍ŋ ni̍.

³³Ā chīi̍ ni᷅ŋ fo̍ndāa̍ bɛ̄ɛ̄ndīāā sīndɛ̄ pa̍ le̍ Māsāa̍ Āsi̍i̍līāā hūnɔ̄ɔ̍ lōmɔ̄ɔ̍ lo̍ŋ o̍ yīŋndē bɛ̍ndūle̍ŋ ni᷄ŋ. Ā yīŋgi̍la̍ fo̍ndāa̍ ho̍ō yi̍ŋgo̍lo̍ŋ, ndu̍yɛ̍ mā kūmbī ndu̍ lēni᷄ŋ wa̍kpā, o̍ ko̍ŋ kɔ̍ɔ̍lī, mā dēŋgēlā yɔ̄mīī vēsɛ̍i̍ye̍ lo̍ŋ, ma̍ pēī ndi̍ cha̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ yōōmū fu̍ū, mī hūēīyīī kēŋ ī sīmnu᷄ŋ yi᷅ŋndē to̍ndo̍le̍ bɛ̍ndūle̍ŋ le̍ mī lē bīī o̍ yɔ̄mnde̍ he̍ī.