Read Southern Kisi Āīsa̍yā 33 Bible Online

Āīsa̍yā 33 - Southern Kisi bible

Āīsa̍yā 33

¹Dɛ̍nɛ̍ pa̍lāā bɛ̄ndōo̍ chō le̍ nya̍, nya̍ cho̍ ha̍ā wāŋnda̍ tɛ̄ɛ̄mbūūwo̍, kɛ̍ nya̍ nya̍, ā tɛ̄ɛ̄mbūū nya̍ le̍ wa̍. Nyɛ̄ pālāā bɛ̄ndōo̍ chō le̍ nya̍ wāŋnda̍ ha̍ā, nya̍ cho̍ ha̍ā wāŋnda̍ ka̍fāla̍ŋ tōsāllo̍, kɛ̍ nya̍ kāni̍ bɛ̍ɛ̍ ā tōsa̍l lɔ̍ nya̍ lāka̍fā le̍ wa̍. Bōōndi̍i̍ nya̍ chō pɛ̄ŋgī wāŋnda̍ tɛ̄ɛ̄mbūūwo̍ ve̍, bōōndi̍i̍ ke̍ŋ nya̍ bɛ̍ɛ̍ ya̍a̍mɔ̍ɔ̍wa̍ chō nya̍ hūnɔ̄ɔ̄ tɛ̄ɛ̄mbūū ni̍. Bōōndi̍i̍ nya̍ chō pɛ̄ŋgī a̍ wāŋnda̍ ka̍fāla̍ŋ tōsāllo̍ ve̍, bōōndi̍i̍ ke̍ŋ nya̍ bɛ̍ɛ̍ nda̍ chō nya̍ hūnɔ̄ɔ̄ ka̍fāla̍ŋ tōsāl ni̍.

²O̍o̍ Mɛ̄lɛ̄ka̍ Ya̍a̍wɛ̄ɛ̄, tūīīnu̍ŋ na̍a̍ īnyīɛ̍ɛ̍ fɔ̍. Nāa̍ nūm chu̍a̍ na̍a̍ ŋ̄ chō tōfāa̍ le̍ mālāa̍ ni̍. Ma̍nda̍ na̍a̍ le̍ te̍le̍ŋ o̍ te̍le̍ŋ. Tē dɛ̍nɛ̍ pa̍lāā kōma̍l na̍a̍ pɛ̍, yāndi̍i̍ chi̍i̍ndi̍a̍a̍ na̍a̍ mā so̍li̍ na̍a̍ lēni᷄ŋ.

³Dīōm nūmndo̍ mɛ̄ɛ̍ ta᷅ŋnde̍ŋ lē dēŋī nu̍a̍ā yɛ̍, le̍nde̍ o̍ fu̍lā ni̍. Tē ā sōō pɛ̍, ya̍a̍mɔ̍ɔ̍wa̍ si̍o̍ōŋnde̍ bi̍ī nda̍ ni̍ mā nyāānu̍ŋ. Tē a̍ bɛ̍ɛ̍ndi̍a̍ŋ le̍ sɔ̍ŋgɔ̍ɔ̍ pɛ̍, lɛ̄ŋnde̍ pīɔ̄llo̍ mī ī sɛ̄ŋi̍ŋ.

⁴Nya̍ lɛ̄ŋīi̍ de̍l wāŋnda̍ chōo̍ ve̍, nyɛ̄ o̍ nyɛ̄ nya̍ pūŋga̍ wānāā kāŋ o̍ lābā mi̍ lā chūūŋgīāā mu̍ŋ, ya̍a̍mɔ̍ɔ̍wa̍a̍ nyāa̍ chō hūnɔ̄ɔ̄ o̍ lēpīlɛ̍ ni᷄ŋ, mɛ̄ɛ̍ so̍o̍nu̍a̍a̍ ā hūŋ nu̍a̍ā yɛ̍, mā hu᷄ŋ de᷅l nya̍ chōo̍ mā pūŋga̍ nyɛ̄m mu᷅ŋ nya̍ o̍ lābā kpo̍u̍. Mɛ̄ɛ̍ so̍o̍nu̍a̍a̍ ā hūŋ nu̍a̍ā ku̍ndā bɛ̄ndōo̍ yɛ̍, le̍nde̍ nda̍ hūŋ ni̍ŋ ni̍, mā hu᷄ŋ de᷅l nyɛ̄m mu᷅ŋ chōo̍.

⁵Mɛ̄lɛ̄ka̍ Ya̍a̍wɛ̄ɛ̄ o̍ cho̍ ō bɛ̄ndū. Ō chō īchāli̍ o̍ fo̍ndā ndɔ̍ lēmāsāa̍ chōo̍ cho̍o̍. Ō chō tōsā mī sa̍kpōyɛ̍i̍ a̍ tōnya̍a̍ ŋ̄ tīu̍ wāŋnda̍ tɛ̄ɛ̄ŋ kpo̍u̍ Chūlu̍sɛ̄lɛ̄m.

⁶Ō chō tōsā o̍ te̍le̍ŋ nya̍a̍ bɛ̄ŋgu̍, nya̍ wāŋnda̍ Chūlu̍sɛ̄lɛ̄m, mī lɛ̄ŋnde̍ŋ lē wa̍ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̍nūŋ a̍ wānā o̍ wānā le̍. Ndu̍ chi̍i̍ndīāā wa̍nāā ndūa̍a̍ ni̍, ndu̍yɛ̍ mbō ke̍ nda̍ kɔ̄l kālo̍o̍ a̍ sīnā pɛ̄ŋgo̍o̍. Wānāa̍ ke᷅ Mɛ̍lɛ̍ka̍ Ya̍a̍wɛ̄ɛ̄ bɛ̄ɛ̄le̍ŋ nda̍, le̍ te̍le̍ŋ o̍ te̍le̍ŋ nyɛ̄m kɛ̄ndɔ᷄ŋ mu᷅ŋ mu̍ŋ cho̍ le̍ nda̍ ni̍.

⁷Pūa̍a̍ chɔ̄ūwāā kɔ̄ltā sīmūlāa̍ kpo̍u̍, ā chō cha᷄ŋndo̍ o̍ bɛ̍ɛ̄la̍ŋ le̍ mālāa̍. Wānāā nda̍ vēm le̍ kɔ̄l nyūlōo̍ tōōsīa̍a̍ wa̍ bɛ̍ɛ̍, ā chō cha᷄ŋnda̍ kɔ̄ltā tāmbɛ̍i̍la̍ kpe̍e̍kpe̍i̍.

⁸Nɛ̄īla̍ bɛ̄ndūla̍ŋ kpo̍u̍ lā lo̍ fo̍ndō. Wānā hīāūwa᷄ŋnda̍ ō pīlɛ̍ bɛ̍ɛ̍ wānā chi᷅ hi̍o̍u̍wɔ̄ɔ̍ lo̍ŋ te̍. Chɛ̄la᷅ŋndā kɔ̄ltā nyūlūla̍ wa̍ wāŋnda̍ tɛ̄ɛ̄ŋ nda̍ŋ lā tāmbu̍. Wānāā nda̍ lɔ̄ɔ̄ bɛ̍ɛ̍ se̍īle̍ŋ o̍ chɛ̄la᷅ŋndā lāŋ tōsāa̍ ni᷄ŋ nda̍, wāŋnda̍ lāāla̍ŋ a̍ se̍īlē ndāle̍ŋ te̍. Wānā o̍ wānā nɔ̍ lɛ̍ lēbɛ̄ɛ̄ le̍ wānā o̍ wānā le̍.

⁹Lɛ̄ŋnde̍ŋ kpo̍u̍ lē chō o̍ sāŋgāa̍ ni᷄ŋ, mi̍ lē wā mɔ̍nɛ̍i̍ bīyɔ̄ɔ̍. Būndɛ̍la̍ŋ Le̍ba̍nɔ̄ŋ bɛ̍ɛ̍, lā vēsa̍ mī lā tāmbū. Lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Si̍a̍lɔ̄ŋ, nāa̍ tɔ̄lɔ̄ɔ̄la̍ŋ lā nāŋ na̍ŋɔ̄ɔ̄ bɛ̄ndōo̍ wa̍, lē sīmnu᷄ŋ mɛ̄ɛ̍ po̍llo̍ ō wā nu̍a̍ā yɛ̍. Yɔ̄mnde̍ o̍ lɛ̄ŋndē Ba̍sīāŋnde̍ŋ ni᷄ŋ, a̍ o̍ Pēmbīī Ka̍mɛ̄lve̍ chōo̍ kpo̍u̍, pēi̍ ndūɛ̍i̍ ī chūū chīɛ̄ɛ̄lɔ᷄ŋ mi̍ ī vēsā.

¹⁰Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ ho̍ō ni̍. Ō dīmi̍ āā, “I̍ bɛ̍ɛ̍ndi̍a̍ŋ ni᷅ŋ le̍ mī to̍sa̍ īsɔ̄ɔ̍, I̍ bɛ̍ɛ̍ndi̍a̍ŋ ni᷅ŋ le̍ mī chɛ̍ŋ, I̍ bɛ̍ɛ̍ndi̍a̍ŋ le̍ mī he̍e̍lu̍ dīōlā nīla̍ŋ te̍mā.

¹¹Nyɛ̄ o̍ nyɛ̄ nya̍ tūū le̍ tōsāa̍, ō chō māchūāā mɛ̄ɛ̍ tɛ̄fɛ̍la̍ŋ lā wā nu̍a̍ā yɛ̍. Ndu̍yɛ̍ mɛ̄ɛ̍ bīl vēsɛ̍i̍yo̍ ō wā nu̍a̍ā yɛ̍, le̍nde̍ nyɛ̄ o̍ nyɛ̄ nya̍ chō tōsāa̍ ō chō ni̍. Nya̍ pi̍la̍, hūēīyīī fu̍lā nya̍ o̍ lāmīli̍ŋ nde̍, ndi̍ cho̍ hūnɔ̄ɔ̄ sīmnɔ᷄ŋ yi᷅ŋnde̍ŋ ni̍, ndu̍yɛ̍ mī lē tɛ̄ɛ̄mbu̍u̍ nya̍.

¹²Wāŋndā chīe̍e̍ya̍ chō hūnɔ̄ɔ̄ ŋɔ̄ mu̍ɛ̍ɛ̍ŋ, mā sīmnu᷄ŋ pu᷅lta̍ŋ. Mɛ̄ɛ̍ bɔ̄ɔ̄ ŋ̄yɔ̄ɔ̍ŋ ō ŋūā nu̍a̍ā mbō sīmnu᷄ŋ pu᷅lta̍ŋ yɛ̍, le̍nde̍ nda̍ ŋūā ni̍ŋ ni̍.

¹³Nya̍ wānāa̍ cho̍ la̍nda̍ŋ la̍nda̍ŋ nda̍, lā ya᷄ŋ ni᷅la̍ŋ mī lā tūēī a̍ nyɛ̄ ya̍ I̍ to̍sa̍ wo̍ o̍kɔ̄ɔ̄. Nya̍ wānā o̍ wa̍nā cho̍ māchɛ̄lū, lā chɛ᷅l ndi̍ a̍ tōnya̍ māā kpāāya̍ nūu̍ to̍sa̍ he̍ī ni̍.”

¹⁴Wānāā yɔ̄ŋ wɔ̄ɔ̍ŋnda̍ Sa̍a̍yɔ̄ŋ chi̍e̍e̍, sīōōŋīī bɛ̄ndūe̍i̍ ī bīī nda̍. Wānāa̍ kɛ̍ɛ̍ Mɛ̄lɛ̄ka̍ wa̍ ā chō nyīīyāa̍ kpa̍kpā. Nda̍ kpo̍u̍ ā chō dīmīo̍o̍ āā, “Tu̍mbe̍ Mɛ̄lɛ̄ka̍ ō dɔ̄ɔ̄nu᷄ŋ a̍ na̍a̍ wo̍, mɛ̄ɛ̍ yīŋnde̍ŋ lē wā nu̍a̍ā le̍ nyu᷅m te̍ yɛ̍, le̍nde̍ o̍ cho̍ ni̍. Na̍a̍ ki̍nɛ̍i̍, ō nɛ̄ɛ̍nɛ̍ nɔ̍lā yɛ̍ mbō wa̍ o̍ yīŋndē wāā le̍nde̍ ni̍ŋ mbō chīndā?”

¹⁵Kɛ̍ ndu̍yɛ̍, mūlī ya̍ I̍ nɔ̍ le̍ nya̍ wāŋnda̍ ha̍ā wo̍ ndu̍ cho̍ ho̍ō ni̍. Wānāa̍ to̍sā sɔ̍ɔ̍ŋ o̍ nɛ̄i̍ tōnya̍a̍ cho̍o̍, ndu̍yɛ̍ mā dīmī to᷅nya̍a̍, ō ko̍ŋ kɔ̍ɔ̍lī, ā to̍sāl wa̍nā la̍ka̍fā le̍ nyɛ̄ pi̍la̍ dīo̍ a̍ lēdīɔ̄ɔ̄mū le̍, ā bi̍ī lu̍ɛ̍īyɔ̄ɔ̄ ni᷄ŋ te̍, ā wo̍ū la̍ba̍ o̍ de̍fe̍ yi̍yāā ni᷄ŋ, le̍ wānā i̍wɔ̍ɔ̍ŋ tōsāl te̍, a̍ wānāa̍ kɛ̍ɛ̄ ha̍ā le̍ dɛ̍nɛ̍ wɔ̍ɔ̍ŋndo̍ tōsāa̍ wa̍,

¹⁶wāŋnda̍ ha̍ā nda̍ chi̍ndā ni̍ŋ ni̍. Wānāā wāā nu̍a̍ā, mɛ̄ɛ̍ chi̍o̍o̍ ō wā nu̍a̍ā o̍ pēmbēi̍ chōo̍, ō bālāā kpɔ̍kɔ̍su̍ a̍ sāāsāla̍ ka̍lā ka̍lālā bɛ̍ndūla̍ŋ le̍ ndu̍ māndāa̍ ya̍a̍mɔ̍ɔ̍wa̍ o̍ bā yɛ̍, le̍nde̍ nda̍ wā a̍ ma̍ndāā ni̍. Wānāā wāā nu̍a̍ā, le̍ te̍le̍ŋ o̍ te̍le̍ŋ nyɛ̄ dīa̍a̍ ō ve᷅ nda̍ lēpɛ̄ŋ te̍, ndu̍yɛ̍ mɛ̄ŋnda̍ŋ bɛ̍ɛ̍ mā bi̍ī nda̍ lēpɛ̄ŋ te̍.

¹⁷Te̍le̍ŋ cho̍ fūūlūū mī lā hu᷄ŋ chɔ᷅ māsā bɛ̍ndōo̍ a̍ hɔ̄ltā nyāla̍ŋ pɛ̍ɛ̍ŋ o̍ nāŋɔ̄ɔ̄ ndɔ̄ɔ̍ ni᷄ŋ. Ndu̍yɛ̍, lā chā ni̍ŋ lɛ᷅ŋndē o̍ wa᷅ ni̍ŋ ma̍sāa̍ chōo̍ le̍ŋ, mī lē kūɛ̄ a̍ pɛ̄ŋgɛ̄la᷄ŋndo̍ la̍nda̍ŋ la̍nda̍ŋ.

¹⁸Lā hūŋ ni̍ŋ mī lā hu᷄ŋ yi̍ya᷄ŋ a̍ sīōōŋīī bɛ̄ndūi̍i̍ bi̍ī nya̍ te̍le̍ŋ ko̍ŋ nde̍, mī lā nyūūni̍āŋ māā, ɔ̍ɔ̄ wānā bɛ̍ndū wa̍ na̍a̍ ko̍ŋ cho̍o̍ a̍ te̍le̍ŋ ko̍ŋ ndo̍? Kūɛ̍ɛ̍nɛ̍ wānā bɛ̍ndū ndu̍ o̍o̍ bi̍ī ko̍ŋ pa̍a̍wāla̍ŋ na̍a̍ o̍ lābā wo̍ ō chō yɛ̍ ni᷅ŋ? Ɔ̍ɔ̄ wānā bɛ̍ndu̍ wa̍ ko̍ŋ fo̍ndāŋndā kālā ka̍lāla̍ wa̍ le̍ na̍a̍ māndāa̍ la̍ŋ bōlle̍ŋ ndo̍?

¹⁹Wānāā lēka̍a̍wa̍a̍ nɔ̍ ha̍ā yōŋgāa̍, ā su̍a̍ā ha̍ā lā tu̍i̍ī bɛ̍ɛ̍ su̍ɛ̍i̍ ndɛ̄i̍ ma̍ŋgālɛ̄i̍ le̍ wa̍, te̍le̍ŋ cho̍ fūūlūū lā chi᷅ lɛ̍ ni̍ŋ nda̍ le̍ fɛ̍ɛ̍ŋ a̍ fɛ̍ɛ̍ŋ te̍.

²⁰Lā tōfa̍ wɔ̍ Sa̍a̍yɔ̄ŋ, chi̍e̍e̍ na̍a̍ ŋ̄ bīī bɔ᷅ŋa᷅ŋndā nāāla̍ di̍a̍ā nyɛ̄ dīāā bɛ̄ndūla̍ŋ ndo̍. Lā chō hūnɔ̄ɔ̄ Chūlu̍sɛ̄lɛ̄m chɔ̄, ō wā ni̍ŋ fo̍ndāŋ wānā wānūŋ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ ō yɔ̍nūŋ nu̍m te̍ wo̍. Chūlu̍sɛ̄lɛ̄m o̍ wa᷅ ni̍ŋ ko̍ mɛ̄ɛ̍ tɛ̍ndīi̍ hūēīye̍ ī nɔ̍lā ho̍ō hīīlūū le̍ wo̍ ō wā nu̍a̍ā yɛ̍, tɛ̍ndīi̍ nda̍ kīndū ho̍ō a̍ pɛ̍ɛ̍kīi̍ŋ wānā nɔ̍lā su̍ŋgɔ̄ɔ̄ le̍ wo̍ŋ ndo̍, ō yūēī ndūɛ̍i̍ ī ki̍o̍lū ho̍ō le̍ wo̍.

²¹Lo̍ŋ Mɛ̄lɛ̄ka̍ Ya̍a̍wɛ̄ɛ̄, o̍ chɔ᷅m ni̍ŋ kpa̍āya̍ ndɔ̄ bɛ̍ndōo̍ ni̍. Fo̍ndāŋ kōŋ ō wā ni̍ŋ fo̍nda᷄ŋ nɔ̍ pēēla̍ bɛ̍ndūla̍ŋ, a̍ pēēla̍ pɔ̍mbɔ̄la̍ŋ ndo̍. Kɛ̍ dɛ̄ndɛ̄la̍ ya̍a̍mɔ̍ɔ̍wa̍ ō pīlɛ̍ bɛ̍ɛ̍ wānā chi᷅ ni̍ŋ o̍ pēēla̍ŋ nda᷅ŋ chōo̍ le̍. Dɛ̄ndɛ̄la̍ kpāāyāla̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ, ō pīlɛ̍ bɛ̍ɛ̍ wānā chi᷅ ni̍ŋ ndu̍ bālɔ̄ɔ̍ o̍ pēēla̍ŋ nda᷅ŋ chōo̍ le̍,

²²kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄, ndu̍ cho̍ Māsa̍ nāā ki̍a̍lāā īyāma̍a̍ ni̍. Mɛ̄lɛ̄ka̍ Ya̍a̍wɛ̄ɛ̄ cho̍ wāna̍ cho̍ na̍a̍ chīla̍ŋndo̍ ni̍. Ndu̍ cho̍ Māsa̍ nāā bɛ̍ndo̍o̍ ni̍. Ō chō na̍a̍ chīīndīāā.

²³Nya̍ wānāa̍ ku̍ā a̍ dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ wa̍,[8] lā ya᷄ŋ ya̍ nīla̍ŋ. Yūe̍i̍ o̍ dɛ̄ndɛ̄la̍ nyāla̍ bɛ̄ndūla̍ŋ kpo̍u̍, ī chō ī tīīmbāā mi̍ ī wā ī lɛ̄ɛ̄ndāā le̍nde̍. Yɔ̄mīī vīlɛ̄i̍ cho̍ ī sīmīāā o̍ dɛ̄ndɛ̄la̍ŋ tɛ̄ɛ̄ŋ mī lā kīndū ndi̍ a̍ yūēī kēŋ nde̍, ī chō le̍nde̍ ī si̍mīāā, ō pīlɛ̍ bɛ̍ɛ̍ o̍ cho̍ o̍ ki̍ndāā le̍. Kōlāla̍ nɔ̍ mī lā wa̍ lā tūāndāā o̍ dɛ̄ndɛ̄la̍ŋ le̍ dɛ̄ndɛ̄la̍ŋ mālāa̍ le̍ kɔ̄la̍ŋ nda̍ŋ, ō pīlɛ̍ bɛ̍ɛ̍ cho̍ o̍ tu̍a̍ndāā le̍. Ndu̍yɛ̍, sūltā nyāla̍ bɛ̄ndūla̍ŋ kpo̍u̍, Mɛ̄lɛ̄ka̍ wānāā ndūa̍a̍ ā chō la̍ŋ hūnɔ̄ɔ̄ pīɔ̄ūvi̍āŋ. Sūltā nyāla̍ nda̍ chūā ni̍ŋ nda̍ŋ, lā wā ni̍ŋ ha̍a̍a̍ wānāā bɛ̄vɛ̍i̍ya̍a̍ cho̍ nda̍ tɛ̄ɛ̄ŋ nda̍ bɛ̍ɛ̍, ā chō nyɔ̄ɔ̍ŋ ŋ̍ nda̍a̍ŋ sɔ̄lā lēni᷄ŋ.

²⁴Ndu̍yɛ̍, Sa̍a̍yɔ̄ŋ kpo̍u̍, wāŋndo̍ bɛ̍ɛ̍ dīmi̍ ni̍ŋ māā nyɛ̄ wāā nu̍a̍ā ō chō ndu̍ nɛ̄ī le̍. O̍ ko̍ŋ kɔ̍ɔ̍lī, wānā o̍ wāna̍ cho̍ Sa̍a̍yɔ̄ŋ, Mɛ̄lɛ̄ka̍ chō nda̍ mālɔ̄ɔ̄ le̍ yɔ̄ŋndā ndāla̍ wɔ̍ɔ̍ŋnda̍ŋ kpo̍u̍.