Read Southern Kisi Āīsa̍yā 34 Bible Online

Āīsa̍yā 34 - Southern Kisi bible

Āīsa̍yā 34

¹Lā sɔ̄ɔ̄ŋgu̍u̍ kpɛ̍ɛ̍lūŋ, nya̍ wāŋnda̍ o̍ lɛ̄ŋnde̍ ni᷄ŋ kpo̍u̍ mī lā ya᷄ŋ nīla̍ŋ. Nya̍ wāŋnda̍ kpo̍u̍ lā ya᷄ŋ ni᷅la̍ŋ nyɛ̄ kɛ̄ndɛ̄ kɛ̍ndɛ̄. Chi̍e̍ēŋndo̍ kpo̍u̍, a̍ nyɛ̄ o̍ nyɛ̄ yōōmāa̍ cho̍ lēni᷄ŋ, lā tūe̍i̍ nyɛ᷅ cho̍ dīmi᷄ŋndo̍ wo̍.

²Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ tu̍mbe̍ a̍ lɛ̄ŋnde̍ kpo̍u̍. Ndu̍yɛ̍ ō dɔ̄ɔ̄nu᷄ŋ vɛ̍lɛ̄ tu̍mbe̍ o̍ ka̍lā ka̍lā a̍ lɛ̄ŋīī kēŋ ya̍a̍mɔ̍ɔ̍wa̍a̍ ndāa̍. Ō chō nda̍ hūnɔ̄ɔ̄ tɛ̄ɛ̄mbūū vēllāa̍ vēllē kpo̍u̍. Ō chō nda̍ hūnɔ̄ɔ̄ mālɔ̄ɔ̄ ya̍a̍mɔ̍ɔ̍wa̍ o̍ bā mā dīu̍ nda̍.

³Ndu̍yɛ̍ wānāā nda̍ dīū ni̍ŋ ki̍nɛ̍i̍ ya̍, ā sɔ̍lā ni̍ŋ chɔ᷅ o̍ chɔ̄ le̍, vīōūwɔ̄ɔ̍ nda̍ vīāū ni̍ŋ nda̍ ni̍. Kōo̍ma̍ ndāa̍ŋ mā wā ni̍ŋ kɔ᷅la̍ŋ kōŋgi̍la̍ŋ o̍ pēmbo᷄ŋ chōo̍. Dīāllūŋ ndāa̍ŋ ŋ̄ chō wā ŋ̄ mɛ̄līāā lɛ̄ŋ ŋ̄ sīōvɛ̍i̍yo̍ŋ, mī ŋ̄ fūlā chu᷅ŋ.

⁴Nyɛ̄ o̍ nyɛ̍ cho̍ o̍ ha̍la̍a̍ ni̍ŋ cho̍o̍ cho̍o̍, pāa̍le̍ŋ ni̍, a̍ pāŋge̍i̍, a̍ lōo̍ŋ, ŋ̄ chō hūnɔ̄ɔ̄ tēŋga̍. Ha̍la̍a̍ chō hūnɔ̄ɔ̄ sīmbūlɔ᷄ŋ mɛ̄ɛ̍ nda̍ sīmbūl nu̍a̍ā yāu̍wo̍ yɛ̍. Mɛ̄ɛ̍ pēī ve̍sɛ̍i̍ mākīle̍pīi̍ye̍, ɔ̄ɔ̄ pēi̍ māfi̍kīi̍ye̍ ī dēlī nu̍a̍ā yɛ̍, le̍nde̍ lōo̍ŋ o̍ ha̍la̍a̍ ni᷄ŋ ŋ̍ wa᷅ ni̍ŋ de̍līo̍o̍ ni̍.

⁵Mɛ̄lɛ̄ka̍ Ya̍a̍wɛ̄ɛ̄ o̍ bɛ̍ɛ̍ndi̍a̍a̍ mūɛ̄ī ndūɛ̍i̍ fāŋnde̍ chōo̍ cho̍o̍. Ō chō kāndɔ̄ɔ̄ wāŋnda̍ I̍dɔ̄m tɛ̄ɛ̄mbūūwo̍ a̍ ndi̍, wānāā o̍ chi̍i̍ ni᷅ŋ ha̍ā yāmɛ̍i̍ kīlūl le̍ nda̍ tɛ̄ɛ̄mbūūwo̍ wa̍.

⁶Mūɛ̄ī fāŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍, ī chō hūnɔ̄ɔ̄ dīūwɔ̄ɔ̄ wa᷅ŋ a̍ kōo̍ma̍ wāŋnda̍ chīe̍e̍ya̍. Chūɛ̄īmā wāŋndā chīe̍e̍ya̍ mā chō ndi̍ hūnɔ̄ɔ̄ kūmbɔ̄ɔ̄ kpo̍u̍. Mɛ̄ɛ̍ nda̍ dīū nu̍a̍ā sāā fɔ̍ŋndu̍a̍a̍ a̍ chūīŋnda̍ le̍ sa̍lāla̍ŋ sōlīo̍o̍ mī kōo̍ma̍ ndāa̍ŋ a̍ chūɛ̄īmā ndāa̍ŋ mā sūīīnu̍ŋ o̍ mūɛ̍i̍ kpo̍u̍ yɛ̍, le̍nde̍ mūɛ̍i̍ Mɛ̄lɛ̄kɛ̍i̍ ī wā ni̍ŋ ni̍. Bɔ̍si̍lūā chi̍e̍e̍, lo̍ŋ Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̄ sa̍lāa̍ ho̍ō sōlī ni̍. O̍ lɛ̍ŋndē I̍dɔ̄mnde̍ŋ nde᷅ŋ ni᷄ŋ o̍ di̍ū ni̍ŋ wa᷅ŋndā chīe̍e̍ya̍ dīū bɛ̄ndōo̍ ho̍ō ni̍.

⁷Chi̍ya̍a̍ bɛ̍ndūa̍a̍ ā chō hūnɔ̄ɔ̄ pīɔ̍mndo̍ sɔ̄lā. Nāūwāā fɔ̍ŋndu̍a̍a̍, a̍ nāūwāā tōōyīāā kpāāyāā bɛ̄ndūa̍a̍, ā chō hūnɔ̄ɔ̄ wu᷄. Kōo̍ma̍ ndāa̍ŋ mā chō lākɔ̄ kōŋgi̍la̍ŋ, mī mā pɔ̄ɔ̄li̍a̍a̍ lɛ̄ŋnde̍ŋ. Chūɛ̄īmā ndāa̍ŋ mā pɔ̄ɔ̄li̍a̍a̍ ni̍ŋ chu̍ndo̍o̍ lɛ̄ŋ.

⁸Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ pāa̍le̍ o̍ mi̍ŋgūl ni̍ŋ ya̍a̍mɔ̍ɔ̍wa̍a̍ wānāā ndūa̍a̍ māa̍ le̍ŋ. Ō hɛ̄li̍ wɔ̄sī o̍ mi̍ŋgūl ni̍ŋ ya̍a̍mɔ̍ɔ̍wa̍ māa̍, le̍ nyɛ̄ nda̍ tōsa̍ a̍ Sa̍a̍yɔ̄ŋ ndo̍.

⁹Pēēla̍ŋ I̍dɔ̄m la̍ cho̍ sīmnɔ᷄ŋ ko̍ōtɛ̍ī, mī pūūlōo̍ I̍dɔ̄m o̍ si̍mnu᷄ŋ po̍u̍tā īhɛ᷄l. Ndu̍yɛ̍ lɛ̄ŋndē I̍dɔ̄mnde̍ŋ kpo̍u̍, lē wā ni̍ŋ sa̍nde̍i̍ mɛ̄ɛ̍ kōtɛ̍īyo̍ ō sāndū nu̍a̍ā yɛ̍.

¹⁰Le̍ īdīi̍ a̍ īchɔ̄l, lē wā ni̍ŋ sa̍nde̍i̍, lē nyu᷅m te̍. Ku᷄mnde̍ wā ni̍ŋ chɔ̍nɔ᷄ŋndo̍ I̍dɔ̄m mī ī hēl cho̍o̍ cho̍o̍ le̍ fɛ̍ɛ̍ŋ a̍ fɛ̍ɛ̍ŋ. Lɛ̄ŋndē I̍dɔ̄mnde̍ŋ lē chō tāmbu̍, mī lē lo̍ fo̍ndō, le̍ wɔ̄sīlā fāŋgā fa̍ŋgā. Wānā o̍ wānā nɔ̍lā ni̍ŋ mbō kēēku̍ lɛ̄ o̍ lɛ̄ŋndē I̍dɔ̄mnde̍ŋ ni᷄ŋ te̍.

¹¹Lē chō hūnɔ̄ɔ̄ sīmnɔ᷄ŋ fo̍ndāŋ hu̍a̍a̍ a̍ sɛ̄īya̍ ā wā wo̍. Lo̍ŋ hu̍a̍a̍ bɛ̄ndūa̍a̍ a̍ bāsa̍bāsa̍kūēndi̍a̍a̍ ā wānūŋ ni̍ŋ ni̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mī lɛ̄ŋndē I̍dɔ̄mnde̍ŋ lē tāmbu̍ mī lē sīmnu᷄ŋ mɛ̄ɛ̍ lɛ̄ŋndē vēsɛ̍i̍le̍ bɛ̍ndūle̍ŋ lē wā nu̍a̍ā yɛ̍.

¹²Wāŋnda̍ vēēlū ni̍ŋ lɛ᷅ŋndē I̍dɔ̄mnde̍ŋ āā, “Lɛ̄ŋnde̍ nɔ̍ le̍ma̍sā le̍ le̍ŋ.” Wāŋ bɛ̄ndūāā lēlɛ̄ŋnda̍ kpo̍u̍, ā chō hūnɔ̄ɔ̄ chūū.

¹³Fo̍ndāŋndā kālā ka̍lālā nda̍ tāŋgu̍l le̍ nda̍ māndāa̍ la̍ŋ, lā chō hūnɔ̄ɔ̄ sīmnɔ᷄ŋ fo̍ndāŋndā ŋ̄yɔ̄. Chi̍e̍e̍ŋ lāsāāsāŋ bɛ̄ndo᷄ŋ ŋ̄ chō hūnɔ̄ɔ̄ sīmnɔ᷄ŋ yo̍ndōla̍ŋ kpo̍so̍ŋ. Ŋ̄ chō hūnɔ̄ɔ̄ sīmnɔ᷄ŋ fo̍ndāŋndā tūŋāā yōndūa̍a̍[9] a̍ hu̍a̍a̍ bɛ̄ndūa̍a̍ ā kūā hi̍ni̍ŋnda̍ŋ nda̍ŋ.

¹⁴Lo̍ŋ vīsīāā yōndūa̍a̍, a̍ tūŋāā yōndūa̍a̍ ā wa̍ ni̍ŋ bɔ̍ɔ̄ŋi̍āŋndo̍ ni̍. Lo̍ŋ chūīŋāā yōndūa̍a̍ ā wa̍ ni̍ŋ ve̍ēla᷅ŋndo̍ ni̍. Nyi̍nāa̍ ba̍lū i̍chɔ᷅l la̍, lo̍ŋ nda̍ kūā ni̍ŋ na̍a̍ pɛ̍ŋgīa̍a̍ nūūwāa̍ ni̍.

¹⁵Hu̍a̍a̍ ā tāŋgūl ni̍ŋ wa̍a̍ŋnde̍ lo̍ŋ, mā dɔ̄ū pēlta̍ŋ mā tɛ̄ɛ̄ndu̍u̍, ndu̍yɛ̍ mā mānda̍ chūāūwāā ndāā ka̍ŋ lo̍ŋ. Yi̍bɛ̍i̍ya̍ ā wā ni̍ŋ chūūŋgi̍āŋndo̍ lo̍ŋ, ā lāāndūa̍a̍ a̍ ā pīāāndūa̍a̍.

¹⁶Lā mɛ̄ɛ̄nda̍ŋ ndɔ̍ o̍ yāu̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ mī lā chē mɛ̄ɛ̍ i̍ cho̍ ī pōōnyīāā lo̍ŋ yɛ̍. Ī chō ī pōōnyīāā lo̍ŋ āā, “Nyāā yōōmāa̍ ha̍ā ki̍nɛ̍i̍, ō pīlɛ̍ bɛ̍ɛ̍ ō fe̍ŋāŋ le̍cho̍ō le̍. Ō pīlɛ̍ bɛ̍ɛ̍ ō ve᷅ ni̍ŋ ndu̍ pīlɛ̍, mbō kɛ̄ɛ̍ wā ō pīāāndōo̍ a̍ ō lāāndōo̍ le̍. Mɛ̄lɛ̄ka̍ Ya̍a̍wɛ̄ɛ̄ pi̍la̍ di̍mi̍ ni̍ māā he̍ī ī nɔ̄ mī ī yɔ̄nu̍ŋ nu̍a̍ā. Nyi̍nā ndɔ̄ɔ̍ cho̍ nyāā yōōmāa̍ ha̍ā chūūŋgīāā nāa̍ pi᷅lɛ̍ ni̍.”

¹⁷Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ nda̍ lɛ̄ŋnde̍ŋ pīɔ̄ū pīɔ̄ū, mbo̍ kē nda̍ fo̍ndāŋnda̍ŋ kpɛ̍ kpɛ̍. Ndu̍yɛ̍ ā wa̍ ni̍ŋ ndo̍ŋ le̍ wɔ̄sīlā fāŋgā fa̍ŋgā. Le̍ nda̍ lɛ̄ŋnde̍ŋ nde᷅ŋ le̍ wā ni̍ŋ le̍ fɛ̍ɛ̍ŋ a̍ fɛ̍ɛ̍ŋ ni̍.