Read Southern Kisi Āīsa̍yā 35 Bible Online

Āīsa̍yā 35 - Southern Kisi bible

Āīsa̍yā 35

¹Lɛ̄ŋndē po̍lte̍ŋ lē dūāūnūŋ ni̍ŋ nya̍a̍le̍, ndu̍yɛ̍ mī bīltā pe̍e̍ŋge̍la̍ŋ lā vīl lēcho̍ō mī lā sōli̍ pe̍e̍ŋge̍la̍ŋ.

²Lɛ̄ŋndē po̍lte̍ŋ lē chō nya̍a̍le̍ dɔ̍u̍nɔ᷄ŋ, ndu̍yɛ̍ lē lō ni̍ŋ ko̍ bɛ̍ɛ̍ mī lē sōli̍ chōnde̍i̍ a̍ kɔ̄l kɛ̄ndɛ̄ bɛ̄ndōo̍. Lē chō hūnɔ̄ɔ̄ yɔ̄nɔ᷄ŋ mɛ̄ɛ̍ pēmbūŋ Le̍ba̍nɔ̄ŋndo̍ŋ ŋ̄ chō nu̍a̍ā yɛ̍, a̍ nāŋɔ̄ɔ̍. Mɛ̄ɛ̍ lɛ̄ŋnde̍ŋ o̍ Pēmbīī Ka̍mɛ̄lve̍ chōo̍, a̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Si̍a̍lɔ̄ŋ, i̍ chō nu̍a̍ā lɛ̄ŋīī tɔ̄lɔ̄ɔ̄la̍ŋ lā nāŋ nde̍ yɛ̍, le̍nde̍ le̍ wa᷅ ni̍ŋ ni̍. Wānā o̍ wānā cho̍ hūnɔ̄ɔ̄ chɔ̄ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ wāna̍ lēbɛ̄ɛ̄ bɛ̍ndū yɛ̍, ndu̍yɛ̍ ā chō hūnɔ̄ɔ̄ chɔ̄ mɛ̄ɛ̍ Mɛ̄lɛ̄ka̍ nāa̍ ō chō wāna̍ kpāāyā bɛ̍ndū yɛ̍.

³Lā māla̍ wa̍nāa̍ nɔ̍ kpa̍a̍yā o̍ kpāāyā le̍ wa̍, mī lā lūe̍i̍ nda̍ yōōmūa̍ŋ. Wānāa̍ nɔ̍ dīāllūŋ kālā le̍ wa̍, lā māla̍ nda̍ mī lā tōsa̍ mā si᷄m yi̍.

⁴Lā dīmu̍l wa̍nāa̍ nɔ̍ kɔ̄ltā īsīōōŋnda̍ŋ nda̍ āā, “Lā sīmu̍l kɔ᷅lta̍ŋ, lā yɔ᷅ŋ ndɛ̄ īsīōōŋ te̍. Mɛ̄lɛ̄ka̍ nyāa̍ ō chō hūnɔ̄ɔ̄ mbō hu᷄ŋ pi̍ŋī nya̍. Ō chō hūnɔ̄ɔ̄ mbō hu᷄ŋ mi̍ŋgūl ya̍a̍mɔ̍ɔ̍wa̍a̍ nyāa̍ māa̍. Ō chō tōsā mā hu᷄ŋ sɔ̍lā dɛ̍nɛ̍ pa̍lāa̍ le̍ nyɛ̄ nda̍ tōsa̍ wo̍.”

⁵O̍ ko̍ŋ, wānāa̍ cho̍ ā sūmɛ̍i̍ya̍ ā chō hūnɔ̄ɔ̄ chɔ̄, ndu̍yɛ̍ mī wānāā nīlā bāŋu̍lɛ̍i̍ya̍ ā nɔ̄la̍ mā tūēī.

⁶Wānāā bɛ̄vɛ̍i̍ya̍ chō chɔ̄nɔ᷄ŋ o̍ pēlūŋ ndāa̍ŋ chōo̍ mā hūūlu̍, mā yē, o̍ ko̍ŋ kɔ̍ɔ̍lī, mī bo̍bu̍a̍a̍ ā so̍ō mā sōli̍ chōndo̍ŋ a̍ nya̍a̍lo̍o̍. Mɛ̄ŋnda̍ŋ mā chō hūnɔ̄ɔ̄ pīɔ̄l lɛ̄ŋ, o̍ lɛ̄ŋndē po̍lte̍ŋ ni᷄ŋ, mī mā sīmnu᷄ŋ pe̍ēla̍ pɔ̍mbɔ̄la̍ŋ.

⁷Lɛ̄ŋndē po̍lte̍ tu̍ūlē bɛ̍ndūle̍ŋ lē chō hūnɔ̄ɔ̄ sīmnɔ᷄ŋ fo̍ndāŋ so̍o̍ŋnda̍ māmɛ̄ŋ. Lɛ̄ŋndē vēsɛ̍i̍le̍ bɛ̍ndūle̍ŋ lē chō hūnɔ̄ɔ̄ sīmnɔ᷄ŋ fo̍ndāŋ pēēla̍ pɔ̍mbɔ̄la̍ŋ lā wā lā ti̍u̍wāā wo̍. Fo̍ndāŋ vēsɛ̍i̍ bɛ̍ndōo̍, nāa̍ tūŋāā yōndūa̍a̍[10] ā wānu̍ŋ nda̍, ō chō hūnɔ̄ɔ̄ sīmnɔ᷄ŋ mɛ̄ɛ̍ hūŋndo̍ ō wā nu̍a̍ā yɛ̍, ō chō sīmnɔ᷄ŋ fo̍ndāŋ bīllo̍ a̍ pɔ̄mbīa̍ŋ mā wūl lo̍.

⁸Ndu̍yɛ̍ nɛ̄ī bɛ̍ndōo̍ ō wā ni̍ŋ o̍ fo̍ndāa̍ ho̍ō. Nɛ̄ī Bɛ̍ndōo̍ ho̍ō ā vēēlū ndu̍ ni̍ŋ āā, “Nɛ̄ī Di̍a̍ndāa̍ Mɛ̄lɛ̄ka̍a̍.” Ndu̍yɛ̍ nɛ̄īyo̍ ho̍ō wānāa̍ cho̍ a̍ di̍a̍ndāā Mɛ̄lɛ̄ka̍ o̍ hɔ̄l te̍ wa̍ ki̍nɛ̍i̍, ā ku̍ē le̍cho̍ō le̍. Ā yɔ᷄ŋ bɛ̍ɛ̍ āā dīɔ̄mnda̍ ni̍, tē ā kūɛ̄ o̍ nɛ̄ī yo̍ ho̍ō pɛ̍, ā la̍a̍sīāŋ te̍.

⁹Kpɔ̍kūŋnda̍ ni̍, a̍ vīsīāā bīyāā wɔ̄ɔ̍ŋāā chēle̍ŋnda̍, ā ve᷅ ni̍ŋ o̍ nɛ̄īyo̍ ho̍ō le̍. Wānāā Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndi̍a̍a̍ wa̍, nda̍ ko̍ni̍ ke̍e̍kū ni̍ŋ a̍ nɛ̄īyo̍ ho̍ō ni̍.

¹⁰Wānāā Mɛ̄lɛ̄ka̍ Ya̍a̍wɛ̄ɛ̄ o̍ ba̍ŋa̍ wa̍, nda̍ ke̍e̍kū ni̍ŋ o̍ nɛ̄īyo̍ ho̍ō ni̍, mā mīīŋgu̍ o̍ nda̍lo̍. Wāŋnda̍ ha̍ā ā lūɛ̄ī ni̍ŋ Chūlu̍sɛ̄lɛ̄m a̍ chōndu̍ŋ nya̍a̍lo̍ŋ, ndu̍yɛ̍ mā wa̍ a̍ kɔ̄l kɛ̄ndɛ̄. Ndu̍yɛ̍ kɔ̄l ndā kɛ̍ndɔ̄ɔ̍ ō wā ni̍ŋ le̍ fɛ̍ɛ̍ŋ a̍ fɛ̍ɛ̍ŋ. Ā dūāūnūŋ ni̍ŋ nya̍a̍le̍, ndu̍yɛ̍ mā wa̍ a̍ kɔ̄l kɛ̄ndɛ̄ ta̍u̍ ta̍u̍. Kɔ̄l ndā ta̍mbɛ̍i̍yo̍, a̍ mɔ̍nɛ̍i̍ cho̍ o̍ kɔ̄ltā ndāle̍ŋ ni᷄ŋ nde̍, ī chō hūnɔ̄ɔ̄ chūwɔ̄ɔ̄.