Read Southern Kisi Āīsa̍yā 36 Bible Online

Āīsa̍yā 36 - Southern Kisi bible

Āīsa̍yā 36

¹Wɔ̄sī Māsā Bɛ̍ndōo̍ Hɛ̄sɛ̄ki̍yā o̍ wa̍ Chu̍dā wo̍ ō chīŋa̍ wɔ̄sīla̍ŋ tɔ̍ a̍ lā hīɔ̍ɔ̍lu̍ o̍ lēmāsā Chu̍dā wo̍, mi̍ Māsāa̍ Sɛ̄nāchɛ̍lu̍i̍bī, o̍ wa̍ Āsi̍i̍līāā wo̍, ō chūā pūa̍a̍ ndūa̍a̍ chɔ̄ūwa̍ ma̍ kɔ̍ chi᷅ŋa̍la᷅ŋ chi̍e̍e̍ŋ nɔ̍ sāāsāla̍ ka̍lā ka̍lālā bɛ̄ndūla̍ŋ lā bālāā o̍ lɛ̄ŋndē Chu̍dāle̍ŋ ni᷄ŋ ndo̍ŋ a̍ sɔ̍ŋgɔ̍ɔ̍, ndu̍yɛ̍ ma̍ bīī mu̍ŋ kpo̍u̍.

²O̍ ko̍ŋ kɔ̍ɔ̍lī, mi̍ māsā bɛ̍ndōo̍ Āsi̍i̍līāā o̍ vi̍ām wānā bɛ̍ndū pūa̍a̍ ndūa̍a̍ chɔ̄ūwa̍, a̍ pūa̍a̍ chɔ̄ūwa̍ ku̍ndā bɛ̄ndōo̍, chɔ̄nɔ᷄ŋndo̍ La̍ki̍sī chi̍e̍e̍, le̍ mā kūɛ̄ Chūlu̍sɛ̄lɛ̄m, nāa̍ Māsā Bɛ̍ndōo̍ Hɛ̄sɛ̄ki̍yā chu̍a̍. Mɛ̄ɛ̍ nda̍ fūūlu̍u̍ Chūlu̍sɛ̄lɛ̄m, ma̍ chūā nɛ̄ī bɛ̍ndu̍ ku̍ɛ̄ o̍ fo̍ndā tōōsīāā lākōlāa̍ wo̍, ma̍ sīm lo̍ŋ. Ku̍a̍tɛ̄i̍ nda̍ tōū o̍ nɛ̄ī ko̍ŋ mī mɛ̄ŋnda̍ŋ mā chāŋ o̍ pīo̍o̍ mālūāŋ mī mā kēēkū lo̍ŋ ndo̍, o̍ ku̍a̍tɛ̄i̍ ko̍ŋ īkɛ̄i̍ nda̍ si᷄m ni̍.

³Mi̍ Māsāa̍ Hɛ̄sɛ̄ki̍yā, o̍ lo᷅ o̍ ko̍ŋ mbo̍ vīām lāŋgba̍ā ndūāā ka᷅lla̍ ā yāa̍, Īlīa̍a̍kīm, po̍ Hɛ̄līka̍yā wo̍, o̍ wa̍ chīɛ̄ī lēmāsāa̍ bōlle̍ŋ ndo̍, a̍ Si̍ɛ̍bi̍nā, wānā po̍o̍nyīa̍a̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ, a̍ Cho̍wāā, po̍ A̍sa̍fī wo̍, wāna̍ ndu̍ o̍o̍ ma̍ndā sɔ̍ɔ̍ŋ lēlɛ̄ŋndo̍ŋ ndo̍, le̍ mā kōma̍l pūa̍a̍ chɔ̄ūwa̍ Āsi̍i̍līāā.

⁴O̍ ko̍ŋ kɔ̍ɔ̍lī, mi̍ bōllē pūa̍a̍ chɔ̄ūwāā Māsāa̍ Āsi̍i̍līāā o̍ ve᷅m nda̍ ō dīmūl pūa̍a̍ Māsāa̍ Hɛ̄sɛ̄ki̍yā o̍ ve᷅m ha̍ā wa̍ āā, “Lā kɔ̍ di̍mūl Hɛ̄sɛ̄ki̍yā māā nyɛ̄ Māsāa̍ Āsi̍i̍līāā o̍ di̍mi̍ wo̍ ndu̍ cho̍ ho̍ō ni̍. Ō dīmi̍ āā, ‘Hɛ̄sɛ̄ki̍yā, ō yɛ̄ɛ̍nɛ̍ ŋ̄ tīīnda̍ŋ yɛ̍, ma̍ kīālū yōŋgā wa̍ā nu̍a̍ā?

⁵Ā nɔ̄ o̍ kɔ̄l māā sōndō bɛ̄ndo̍o̍ ndu̍ cho̍ tāāsi̍o̍o̍ nɔ̄ɔ̍ a̍ kpāāyāa̍ le̍ chɔ̄ūwo̍ ni̍? Ō nɛ̄ɛ̍nɛ̍ ŋ̄ tīīnda̍ŋ yɛ̍ māā ō nɔ̄lā mbō māla̍ nu̍m, mā si̍mu̍l Āsi̍i̍līāŋnda̍ mā fu̍la̍ nda̍ o̍ bā bɛ̄ŋgu̍?

⁶Bāā I̍chi̍pi̍ ŋ̄ tīīnda̍ŋ le̍ nya̍ mālāa̍ ni̍? Lēlɛ̄ŋ o̍ lēlɛ᷄ŋ le̍ dɔ̍ū tīīnda᷄ŋndo̍ o̍ Māsāa̍ I̍chi̍pī ni̍ŋ le̍ ndu̍ mālāa̍ sɔ̄lāa̍ o̍ bā pɛ̍, lɛ̄ŋndē lēŋ lē hūīnu̍ŋ, fo̍ndōle̍, mɛ̄ɛ̍ wāŋndo̍ ō lō nu̍a̍ā kɔ̄la̍ŋ a̍ tīnda̍a̍ mī tīnda̍ ko̍ŋ ō yo᷄m ndu̍ o̍ bā mbō tɛ̄nda̍ ndu̍ bāa̍ yɛ̍, le̍nde̍ Māsāa̍ I̍chi̍pī o̍ cho̍ ni̍. Ō cho̍ wāna̍ wānā dɔ̍ū tīīnda᷄ŋ o̍ ndu̍ ni̍ŋ le̍ nu̍m mālā le̍.’ ”

⁷Mi̍ bōllē pūa̍a̍ chɔ̄ūwa̍ Āsi̍i̍līāā o̍ hi̍a̍ū lāchī a̍ sūɛ̍i̍, mbo̍ dīmī āā, “Yālāā nya̍ dīmūl la̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ Mɛ̄lɛ̄ka̍ nyāa̍ wo̍ māā ndu̍ nya̍ tīīnda̍ŋ le̍ nya̍ mālāa̍ ni̍, mɛ̄ɛ̍ lā hūīnu̍ŋ vɛ̍lɛ̄, kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ ko̍ŋ, sōōlu̍u̍la̍ ndɔ̄la̍ŋ a̍ ma̍āŋndā ndɔ̄la̍ŋ, la̍ŋ Hɛ̄sɛ̄ki̍yā o̍ tɛ̍ɛ̍mbu̍u̍ ni̍, mbo̍ dīmūl wāŋnda̍ Chu̍dā, ā wāŋnda̍ Chūlu̍sɛ̄lɛ̄m, māā o̍ ma̍āŋndo̍ Chūlu̍sɛ̄lɛ̄m ndu̍ pīlɛ̍ kpe̍ nda̍ nda̍ nɔ̄ ni᷅ŋ ni̍ mā sōōlu̍u̍.

⁸I̍ si̍m mi̍ ki̍a̍lū nya̍ īchīɛ̍ɛ̍ le̍ māsānɔ̍ nūu̍, Māsāa̍ Āsi̍i̍līāā. O̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ki̍nɛ̍i̍, te̍ lā nɔ̄ pɛ̍ pu̍a̍a̍ chɔ̄ūwa̍ sɔ̍ŋgā o̍ su̍a̍ā chōo̍ wa̍ wāa̍la̍ŋ lā tīɔ̍ɔ̍ŋ, I̍ nɔ̍lā mī ke̍ pūa̍a̍ chɔ̄ūwāā ka̍ŋ su̍a̍ā chɔ̄ūwa̍ wāa̍la̍ŋ lā tīɔ̍ɔ̍ŋ.

⁹Ā yɔ̍ŋ bɛ̍ɛ̍ mī lā chūūŋgi̍a̍a̍ pūa̍a̍ nyāa̍ chɔ̄ūwa̍ kpo̍u̍ na̍a̍ pi᷅lɛ̍, ku̍ndā pūa̍a̍ chɔ̄ūwāā māsānɔ̍ nūu̍, o̍ nɔ̍ bɛ̍ɛ̍ kpa̍a̍yā le̍ wo̍, lā nɔ̍lā mī lā sīmu̍l ndu̍, mī lā yēm ndu̍ le̍. Māsāa̍ I̍chi̍pī o̍ ke̍ nya̍ bɛ̍ɛ̍ nyɛ̍lā su̍a̍a̍ ā nāŋ nda̍ŋ, o̍ ko̍ŋ kɔ̍ɔ̍lī, mbō ke̍ nya̍ pūa̍a̍ chɔ̄ūwāa̍ sɔ̍ŋgā o̍ su̍a̍a̍ chōo̍ wa̍, lā nɔ̍lā mī lā yēm ku̍ndā pūa̍a̍ chɔ̄ūwa̍ nāa̍ nɔ̍ ko̍ŋ kpa̍a̍yā le̍ wo̍ le̍.

¹⁰Yīya᷄ŋ nyāa̍ cho̍ ni̍ māā a̍ kpāāya̍ nāa̍ na̍a̍ pi̍la̍a̍ na̍a̍ ŋ̄ hu᷄ŋ de᷅l lɛ̄ŋndē nyāle̍ŋ chōo̍ ni̍, mi̍ ŋ̄ tɛ̄ɛ̄mbu̍u̍ le̍ŋ, māā ō cho̍ Mɛ̄lɛ̄ka̍ Ya̍a̍wɛ̄ɛ̄ le̍ o̍ ke̍ na̍a̍ kpāāyā ko̍ŋ te̍? Lā sīna̍ pɛ̍ŋgu̍ māā Mɛ̄lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ ve᷅m na̍a̍ ni̍, le̍ mī ŋ̄ hu᷄ŋ de᷅l lɛ̄ŋndē nyāle̍ŋ chōo̍ mī ŋ̄ tɛ̄ɛ̄mbu̍u̍ le̍ŋ.”

¹¹O̍ ko̍ŋ, mi̍ Īlīa̍a̍kīm, a̍ Si̍ɛ̍bi̍nā a̍ Cho̍wāā, a̍ di̍mūl bōllē pūa̍a̍ chɔ̄ūwa̍ Āsi̍i̍līāā āā, “Yāndi̍i̍ fāllo̍, so̍o̍ nāa̍ na̍a̍ chūā o̍ Ālu̍a̍ma̍i̍kīi̍ye̍ ni᷄ŋ. Na̍a̍ bɛ̍ɛ̍ ŋ̄ tūɛ̄ī A̍lu̍a̍ma̍i̍kīi̍ye̍. Su̍a̍ā o̍ Hi̍būlūi̍ye̍ ni᷄ŋ te̍, yɔ̄ŋi̍ wānāa̍ cho̍ o̍ sāāsa̍ chi̍o̍o̍ chōo̍ wa̍ kpo̍u̍ ā tūe̍i̍ nyɛ᷅ ŋ̄ chō dīmīo̍o̍ wo̍.”

¹²Kɛ̍ mi̍ bōllē pūa̍a̍ chɔ̄ūwa̍ Āsi̍i̍līāā o̍ di̍mūl nda̍ āā, “Yīya᷄ŋ nyāa̍ cho̍ ni̍, māā nya̍ cho̍ ha̍ā na̍nu᷄ŋ nda̍ a̍ māsā nyāa̍, māā o̍ nya̍lo̍ ko̍ni̍ māsāa̍ ō vēm na̍a̍ ni̍ le̍ mī ŋ̄ hu᷄ŋ di̍mūl nya̍ dīōmnda̍ŋ nda̍ŋ? Ō cho̍ ko̍ o̍ nya̍lo̍ le̍ o̍ ve᷅m na̍a̍ le̍. Nya̍ ni̍, a̍ wānāa̍ cha̍l ha̍ā o̍ sāāsāa̍ chōo̍ wa̍, o̍ nya̍lo̍ kpo̍u̍ o̍ ve᷅m na̍a̍ ni̍ le̍ mī ŋ̄ hu᷄ŋ di̍mūl nya̍ dīōmnda̍ŋ nda᷅ŋ, mī wānā o̍ wānā fe̍e̍ o̍ tu̍e̍ī. Wānāa̍ cha̍l ka̍ŋ o̍ sāāsāa̍ chōo̍ wa̍ ni̍, nya̍ ni̍, te̍le̍ŋ cho̍ fūūlūū nya̍ kpo̍u̍ mī lā hu᷄ŋ di̍ō pōōlā nyāla̍ŋ, o̍ ko̍ŋ kɔ̍ɔ̍lī, mī lā ko᷄l tūīīli̍mā nyāa̍ŋ.”

¹³O̍ ko̍ŋ kɔ̍ɔ̍lī, mi̍ bōllē pūa̍a̍ chɔ̄ūwa̍ Āsi̍i̍līāā o̍ cha̍ŋ i̍si̍si̍, mbo̍ vēēlū wānāa̍ wa̍ o̍ sāāsa̍ chi̍o̍o̍ chōo̍ wa̍ chōo̍ cho̍o̍ o̍ Hi̍būlūi̍ye̍ ni᷄ŋ. Mbo̍ dīmūl nda̍ māā, lā ya᷄ŋ ni᷅la̍ŋ mī lā tūēī nyɛ̄ māsā bɛ̍ndōo̍ kpo̍u̍, o̍ cho̍ māsāa̍ le̍ Āsi̍i̍līāā wo̍ ō dīmi̍ wo̍.

¹⁴Māsāa̍ Āsi̍i̍līāā o̍ di̍mi̍ māā, lā chɛ᷅l mī Māsāa̍ Hɛ̄sɛ̄ki̍yā o̍ hu̍i̍ nya̍ le̍. Hɛ̄sɛ̄ki̍yā o̍ nɔ̍lā mbō pīŋi̍ nya̍ mbō sōli̍ nya̍ ya̍ o̍ bā le̍.

¹⁵Ō dīmu̍l nya̍ bɛ̍ɛ̍ māā, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ chīīndīāā, māā ō cho̍ chɛ̍lɔ̄ɔ̄ mī Māsāa̍ Āsi̍i̍līāā o̍ hu̍ŋ bi̍ī chi̍o̍o̍ ho̍ō le̍, lā la̍a̍la᷄ŋ a̍ nyɛ̄ o̍ di̍mi̍ wo̍ mī lā tīīnda̍ŋ Mɛ̄lɛ̄ka̍ Ya̍a̍wɛ̄ɛ̄ māā ō chō nya̍ chīīndīāā le̍.

¹⁶Nyɛ̄ o̍ nyɛ̄ Hɛ̄sɛ̄ki̍yā o̍ di̍mu̍l nya̍, lā ya᷅ŋ ndu̍ lānī le̍. Nyɛ̄ Māsāa̍ Āsi̍i̍līāā o̍ di̍mi̍ wo̍ ndu̍ cho̍ ho̍ō ni̍. Ō dīmi̍ māā, lā to̍sa̍ chɛ᷅la᷅ŋ kɔ̄l nyūlōo̍ a̍ ya̍, mī lā fūla̍ mī lā hu᷄ŋ yɔ̍ŋgu᷄ŋ o̍ ya̍lo̍. Tē lā chɛ᷄l pɛ̍ mī lā yɔ̄ŋgu᷄ŋ o̍ ya̍lo̍, I̍ cho̍ nya̍ mālɔ̄ɔ̄ mī wānā o̍ wānā o̍ de᷅ kpe̍le̍ ndɔ̍ mākīle̍pīi̍yo̍ a̍ kpe̍le̍ ndɔ̍ māfi̍kīi̍yo̍ tɔ̄nɔ̄, o̍ ko̍ŋ kɔ̍ɔ̍lī, so̍o̍ŋnda̍ nyāla̍ māmɛ̄ŋndā nya̍ tōū lāŋ, mī lā ko᷄l so̍o̍ŋnda̍ la̍ŋ. Lā lō ni̍ŋ lɛ̍ŋndē nyāle̍ŋ tɔ̄nɔ̄ɔ̍ dīo̍,

¹⁷ha̍a̍a̍ mbō lo̍ o̍ ko̍ŋ mī hu̍ŋ kɔ᷅ a̍ nya̍ o̍ lɛ̄ŋndē chēle̍ŋ ni᷄ŋ, lɛ̄ŋnde̍ ve̍la᷅ŋ na̍ŋɔ̄ɔ̍ a̍ lɛ̄ŋndē nyāle̍ŋ nde̍ŋ, lɛ̄ŋnde̍ nɔ̍ chīɔ̍ɔ̍ŋ le̍ nya̍ nyɛ̄ dīa̍a̍ kīo̍o̍, a̍ kpe̍le̍la̍ mākīle̍pīi̍la̍ŋ le̍ nya̍ mūɛ̄īmā sɛ̄nɛ̄īya̍ kīo̍o̍ le̍ŋ.

¹⁸“Nyɛ̄ o̍ nyɛ̄ Hɛ̄sɛ̄ki̍yā o̍ di̍mu̍l nya̍, lā ya᷅ŋ ndu̍ lānī le̍, fo̍ndōle̍ hūīyo̍ ko̍ni̍ o̍ cho̍ nya̍ ni̍, mbo̍ wā nya̍ chōōla̍ŋ dīmūllo̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ chīīndīāā. Lɛ̄ŋīi̍ ba̍lu̍ nya̍ he̍ī ve̍ ki̍nɛ̍i̍, lā chɔ᷄m ndɔ̍ ya̍ lɛ̄ŋndē mɛ̄lɛ̄ka̍ ndāa̍ ō chīīndi̍a̍a̍ ni᷅ŋ, mbo̍ sōlī nda̍ māsāa̍ Āsi̍i̍līāā o̍ bā le̍ŋ. Lɛ̄ŋndē lēŋ lē cho̍ le̍.

¹⁹Wāŋnda̍ Ha̍ma̍tī chi̍e̍e̍ ni̍, a̍ wāŋnda̍ A̍pa̍a̍dī chi̍e̍e̍, ō yɛ̄ɛ̍nɛ̍ yɔ̍nu̍ŋ yɛ̍ a̍ mɛ̄lɛ̄ka̍a̍ ndāa̍ bōōndi̍i̍ ya̍ I̍ ye᷅m chi̍e̍e̍ŋ ndāa̍ŋ mūu̍ŋ ndo̍ŋ mu᷅ŋ nde̍? Wāŋnda̍ Sɛ̄fa̍a̍vēm chi̍e̍e̍ kūɛ̍ɛ̍nɛ̍ mɛ̄lɛ̄ka̍a̍ ndāa̍ ā chō yɛ̄ hāū? Ō nɛ̄ɛ̍nɛ̍ nɔ̍la̍ yɛ̄ mbo̍ chīīndīāā Sāme̍e̍līāā, mbō sōlī ndu̍ ya̍ o̍ bā?

²⁰Mɛ̄lɛ̄ka̍a̍ cho̍ o̍ lɛ̄ŋīī yɛ̍ yɛ̍ ya̍ I̍ ye᷅m nde̍ ni᷄ŋ nda̍ ki̍nɛ̍i̍, lā chɔ᷄m ndɔ̍ ya̍ lɛ̄ŋnde̍ŋ lē pīlɛ̍ kpe̍, lē mɛ̄lɛ̄ka̍ ndāa̍ ō nɔ̄la̍ mbo̍ chīīndīāā nda̍ ya̍ o̍ bā le̍ŋ, tē lē chō pɛ̍. Mɛ̄ɛ̍ ɔ̍ɔ̄ le̍ sa̍bū nya̍ tīīndāŋ Mɛ̄lɛ̄ka̍ Ya̍a̍wɛ̄ɛ̄ māā ō chō Chūlu̍sɛ̄lɛ̄m chīīndīāā mbō sōli̍ ndu̍ ya̍ o̍ bā wo̍?”

²¹Kɛ̍ wānā o̍ wānā o̍ mu̍li̍ ndu̍ dīōm te̍, nda̍ kpo̍u̍ ma̍ mēī do̍ŋ ndo̍ŋ, fo̍ndōle̍, le̍nde̍ Māsāa̍ Hɛ̄sɛ̄ki̍yā ndu̍ o̍o̍ si̍la̍ nda̍ ni̍, māā wānā o̍ wānā o̍ su̍a̍ā nyɛ̄ o̍ nyɛ̄ le̍.

²²Īlīa̍a̍kīm ni̍, Si̍ɛ̍bi̍nā ni̍, a̍ Cho̍wāā, mɛ̄ɛ̍ nda̍ chīi̍ nyɛ̄ bōllē pūa̍a̍ chɔ̄ūwa̍ Āsi̍i̍līāā o̍ dīmi̍ wo̍ tūēīyɔ̄ɔ̄, nda̍ kpo̍u̍ ma̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍, ma̍ mīīŋgū ma̍ kɔ̍ do̍u̍nu᷄ŋ Māsāa̍ Hɛ̄sɛ̄ki̍yā ko̍na̍.