Read Southern Kisi Āīsa̍yā 37 Bible Online

Āīsa̍yā 37 - Southern Kisi bible

Āīsa̍yā 37

¹Mɛ̄ɛ̍ Māsā Bɛ̍ndōo̍ Hɛ̄sɛ̄ki̍yā o̍ tu̍e̍ī ko̍na̍ nda̍ dōūnu̍ŋ ndu̍ wo̍, mbo̍ tāmbū kɔ̄l. Mbo̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍, mbo̍ chūā nyɛ̄lā lābɛ̍kīla̍ŋ mbo̍ wōūnu᷄ŋ le̍ kɔ̄l ndɔ̄ ta̍mbɛ̍i̍yo̍ chɔ̄mndo̍. Mbo̍ cha̍ŋ mbo̍ kūā o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍.

²O̍ ko̍ŋ kɔ̍ɔ̍lī, mbo̍ sōlī Īlīa̍a̍kīm, wāna̍ wa̍ chīɛ̍i̍ lēmāsāa̍ bōlle̍ŋ ndo̍, a̍ Si̍ɛ̍bi̍nā, wānā po̍o̍nyi̍a̍a̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ, o̍ ko̍ŋ kɔ̍ɔ̍lī, a̍ wānāa̍ wa̍ wānāā sōlīāā lāsa̍lāa̍ bōlle̍ŋ nda̍, mbo̍ vīām nda̍ a̍ yōōŋgōo̍ nāa̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā chu̍a̍, po̍ E̍mɔ̍ɔ̍sī wo̍. Mi̍ wāŋnda̍ ha̍ā ā mālnu᷄ŋ ma̍ kūā nāa̍ Āīsa̍yā chu̍a̍. Ndu̍yɛ̍ mɛ̄ɛ̍ nda̍ wa̍ kɔ̄la̍ŋ, mi̍ wānā o̍ wānā wo̍u̍nu᷄ŋ nyɛ᷅lā lābɛ̍kīla̍ŋ le̍ kɔ̄l ndɔ̄ ta̍mbɛ̍i̍yo̍ chɔ̄mndo̍.

³Ma̍ kɔ̍ di̍mūl Āīsa̍yā āā, “Māsāa̍ Hɛ̄sɛ̄ki̍yā ve᷅m na̍a̍ nāa̍ nūm chu̍a̍ ni̍. Ō dīmi̍ māā na̍a̍ ŋ dīmu̍l nu̍m māā pāa̍le̍ kɔ̄l tāmbɛ̍i̍le̍ bɛ̍ndūle̍ŋ lē kōma̍l na̍a̍. Nyɛ̄ pālāā bɛ̄ndōo̍ hīŋ na̍a̍ tōlɔ̄ɔ̄ chōo̍, mī si̍ɔ̍mbu̍la̍ bɛ̄ndūla̍ŋ lā bīī na̍a̍. Ī yɔ̄nu̍ŋ ma̍yɔ̍ŋna᷄ŋ a̍ na̍a̍, mɛ̄ɛ̍ pūli̍i̍ vi̍a̍lɛ̄i̍ ī wā nu̍a̍ā wāna̍ yo᷄llo̍ nɛ̄īyo̍ mā sɔ̄ɔ̄ŋgu̍u̍ ndu̍ īkɛ̄i̍, kɛ̍ ō nɔ᷅ kpa̍a̍yā o̍ kpāāyā vi̍a̍lāā le̍ yɛ̍.

⁴Māsāa̍ Āsi̍i̍līāā o̍ bi̍ī mbo̍ vīām wāna̍ cho̍ pūa̍a̍ ndūa̍a̍ chɔ̄ūwa̍ bōlle̍ŋ ndo̍, mbo̍ hu᷄ŋ yi̍o̍ū Mɛ̄lɛ̄ka̍ nu᷄m cho̍ yōōmū wo̍ yīōūla̍ŋ pīla̍. Kɛ̄lɛ̄ŋgāā ō wa̍ bɛ̍ɛ̍ le̍ yīōūlā Māsāa̍ Āsi̍i̍līāā o̍ yi̍o̍u̍ la᷅ŋ Mɛ̄lɛ̄ka̍ la̍ŋ ni̍, mī Mɛ̄lɛ̄ka̍ tūēī yīōūlā lāŋ, mbō tūsi̍ Māsāa̍ Āsi̍i̍līāā nyɛ̄ pālāa̍ chōo̍. Le̍la̍ŋ pi̍ɛ̍i̍ Mɛ̄lɛ̄ka̍ le̍ na̍a̍ tūa̍a̍ lo̍ ha̍ā yōōmū wa̍, mī Mɛ̄lɛ̄ka̍ chīīndi̍a̍a̍ na̍a̍.”

⁵Mɛ̄ɛ̍ nda̍ dīmu̍l Āīsa̍yā yōōŋgū māsāa̍ ō yɔ̍ŋ ho̍ō wo̍,

⁶mi̍ Āīsa̍yā di̍mūl nda̍ āā, “Lā kɔ̍ mī lā kɔ̍ di̍mūl Māsāa̍ Hɛ̄sɛ̄ki̍yā, māā nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Mɛ̄lɛ̄ka̍ dīmi̍ āā, ‘Lā yɔ᷅ŋ īsīōōŋ le̍ dīōmndā kɔ̄ŋgɔ̄la᷄ŋnda̍ nya̍ tūēī mi̍ Māsāa̍ Āsi̍i̍līāā bu̍ɛ̍i̍yāā ndūa̍a̍ ā wā dīmīo̍o̍ a̍ ya̍ o̍kɔ̄ɔ̄ la̍ŋ te̍.

⁷I̍ cho̍ tōsā mī yōōŋgōo̍ kōma̍l Māsāa̍ Āsi̍i̍līāā māā ō nɔ̄ mbō mīīŋgu̍ chɔ̍chɔ̍ o̍ lɛ̄ŋndē ndɔ̄le̍ŋ ni᷄ŋ. Ndu̍yɛ̍ dīmīo̍o̍ nu̍a̍ā mī yōōŋgū kōŋ ō kōma̍l ndu̍, ō cho̍ kɛ̍si̍ŋ o̍ bā le̍. Yēēmɛ̍i̍ chō ndu̍ bīyɔ̄ɔ̄ mbō mīīŋgu̍. Ndu̍yɛ̍ tē ō mīīŋgu̍ pɛ̍, I̍ cho̍ tōsā mā kɔ̍ di̍ī ndu̍ a̍ mūɛ̄ī fāŋnde̍ o̍ lɛ̄ŋndē ndɔ̄le̍ŋ ni᷄ŋ.’ ”

⁸O̍ ko̍ŋ kɔ̍ɔ̍lī, mi̍ wāna̍ wa̍ pūa̍a̍ chɔ̄ūwa̍ Āsi̍i̍līāā bōlle̍ŋ ndo̍ ō tūɛ̄ī māā Māsāa̍ Āsi̍i̍līāā o̍ ma̍lnu̍ŋ La̍ki̍sī chi̍e̍e̍ mbo̍ kɔ̍ chi᷅ŋa̍la᷅ŋ wa᷅ŋnda̍ Li̍bi̍nāā a̍ sɔ̍ŋgɔ̄ɔ̍. O̍ ko̍ŋ, mbo̍ mālnu᷄ŋ mbo̍ kūā lo̍ŋ.

⁹Ndu̍yɛ̍ mi̍ ī yɔ̄nu᷄ŋ a̍ te̍le̍ŋ ko̍ŋ, ma̍ hu᷄ŋ di̍mūl Māsāa̍ Āsi̍i̍līāā māā Māsāa̍ Tāha̍kāā, o̍ cho̍ Īto̍o̍pīāā wo̍ ō chūa̍ pūa̍a̍ chɔ̄ūwa̍ I̍chi̍pī mbo̍ hu᷄ŋ chi᷅ŋa̍la᷅ŋ lɛ᷅ŋndē Āsi̍i̍līāāle̍ŋ a̍ sɔ̍ŋgɔ̄ɔ̍. Mɛ̄ɛ̍ Māsāa̍ Āsi̍i̍līāā o̍ tu̍e̍ī yōōŋgōo̍ ho̍ō, mbo̍ lō o̍ ko̍ŋ mbo̍ pōōnyīāl Māsāa̍ Hɛ̄sɛ̄ki̍yā yāu̍wo̍.

¹⁰Mbo̍ dīmūl ndu̍ o̍ yāu̍wo̍ ni᷄ŋ āā, “Tē Mɛ̄lɛ̄ka̍ nu᷄m ŋ̄ tīīŋnda̍ŋ ko̍ŋ ndo̍ ō chūe̍l nu̍m ībūŋgā pɛ̍ māā ō nɔ̄lā mbō chīīndi̍a̍a̍ Chūlu̍sɛ̄lɛ̄m, mbō tōsa̍ I̍ bi̍ī ndu̍ le̍, mɛ̄ɛ̍ hūīyo̍ ko̍ni̍ o̍ cho̍ nu̍m nī.

¹¹Nūm pi̍la̍ tu̍e̍ī ni᷅ŋ nyɛ̄ Māsāa̍ Āsi̍i̍līāā a̍ to̍sā a̍ lɛ̄ŋīī bɔ̍ɔ̍ bɔ̍ɔ̍ wo̍. Ā tūēī mɛ̄ɛ̍ nda̍ tɛ̄ɛ̄mbu̍u̍ lɛ̄ŋnde̍ o̍ sɔ̍ŋgɔ̍ɔ̍ ni᷄ŋ ma̍ pēsī ndi̍ wɔ̍ wɔ̍ yɛ̍. Le̍la̍ŋ, tē ā nɔ̄ yīya᷄ŋ ko̍ŋ pɛ̍, māā Mɛ̄lɛ̄ka̍ nūmndo̍ chō nu̍m chīīndīāā, mɛ̄ɛ̍ ā nɔ̄ŋnu᷄ŋ ndu̍ fu̍u̍.

¹²Chi̍o̍o̍ŋ mu᷅ŋ ki̍nɛ̍i̍, Ko̍sāŋ ni̍, a̍ Ha̍lūāŋ, a̍ Lu̍ɛ̍si̍fī, nūm pi̍la̍ tu̍e̍ī mɛ̄ɛ̍ fi̍nyāā nīa̍a̍ ma̍māa̍ ā tɛ̄ɛ̄mbu̍u̍ mu̍ŋ yɛ̍, ndu̍yɛ̍ ma̍ tūɛ̄ī vɛ̄lɛ̄ a̍ wāŋnda̍ Bɛ̍tɛ̍dɛ̄ŋ o̍kɔ̄ɔ̄, a̍ wa̍ Tɛ̄la̍sāā chi̍e̍e̍ wa̍, a̍ mɛ̄ɛ̍ nda̍ dīu̍ nda̍ yɛ̍. Vɛ᷅ ni̍ko̍ wāŋnda̍ ha̍ā mɛ̄lɛ̄ka̍a̍ ndāā ā nɔ̄la̍ mā chīīndi̍a̍a̍ yōōmūlā ndāla̍ŋ Māsāa̍ Āsi̍i̍līāā o̍ bā le̍?

¹³O̍ fūla̍ o̍ ko̍ŋ kɔ̍ɔ̍lī, chi̍o̍o̍ŋ mu᷅ŋ ki̍nɛ̍i̍, Ha̍ma̍tī ni̍, a̍ A̍pa̍a̍dī, a̍ Sɛ̄fa̍a̍vēm, a̍ Hɛ̍nā, a̍ I̍vāā, a̍ Māsāa̍ wa̍ lo̍ŋ nda̍ ki̍nɛ̍i̍, kūɛ̍ɛ̍nɛ̍ nda̍ chō yɛ̄ hāū?”

¹⁴Mɛ̄ɛ̍ Māsāa̍ Hɛ̄sɛ̄ki̍yā o̍ sɔ̍la̍ yāu̍wo̍ ho̍ō, mbo̍ tūɛ̄ī nyɛ̍ di̍mi̍ŋ le̍ni̍ŋ ndo̍, mbo̍ chūā yāu̍wo̍ ho̍ō mbo̍ kūā a̍ ndu̍ o̍ chīɛ̍i̍ Mɛ̄lɛ̄ka̍a̍, mbo̍ kɔ̍ kɛ̍sī ndu̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l ō tīmbīāā le̍nde̍.

¹⁵Mbo̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄ mbo̍ dīmī āā,

¹⁶“O̍o̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍, Mɛ̄lɛ̄ka̍ I̍sɔ̄lūɛ̍i̍ya̍, yāndi̍i̍ tu̍e̍i̍ pi̍ɛ̍īlē nīle̍ŋ nāa̍ ŋ̄ chō īchāli̍ o̍ kpe̍ŋgbe̍i̍ nu̍m lēmāsāa̍ chōo̍ o̍ nyāā lākūmba᷅ŋ nda̍ chōo̍ wa̍. Ō fūla̍ o̍ nūm kɔ̍ɔ̍lī, Mɛ̄lɛ̄ka̍ o̍ Mɛ̄lɛ̄ka̍ chēle̍ŋ ō cho̍ lɛ̍ le̍. Māsɛ̄i̍ o̍ chi̍e̍ēŋndo̍ chōo̍ kpo̍u̍, nu̍m o̍ bā bɛ̄ŋgu̍ i̍ cho̍ ni̍.

¹⁷O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ ya̍ŋ ni᷅la̍ŋ o̍ pīɛ̄īlē nīle̍ŋ, mā tūēī nyɛ̄ ya̍ I̍ cho̍ nu̍m dīmūllo̍. Ku̍mbi̍ hɔ̍ltā nūmnda̍ŋ Mɛ̄lɛ̄ka̍ nūu̍, mā chē nyɛ̄ yɔ̍nu̍ŋ a̍ na̍a̍ wo̍. Tu̍e̍i̍ yɔ̍ yi̍o̍ūlā Māsāa̍ Sɛ̄nāchɛ̍lu̍i̍bī o̍ yi̍o̍u̍ nu̍m nda̍ŋ, nūm Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍.

¹⁸Tōnya̍ kpe̍e̍kpe̍i̍ i̍ cho̍ ni̍ māā, mi̍ Māsāa̍ Āsi̍i̍līāā a̍ tɛ̍ɛ̍mbūū lɛ̄ŋīī bɔ̄ɔ̍ bɔ̍ɔ̍, ndu̍yɛ̍ ma̍ tōsā mi̍ lɛ̄ŋīī kēŋ ī sīmnu᷄ŋ pɔ᷅mnda̍ŋ.

¹⁹Ndu̍yɛ̍ nyɛ̄m lɛ̄ŋīī kēŋ ndi̍ i̍i̍ so̍o̍lūū māā mɛ̄lɛ̄ka̍a̍ ndā wo̍ŋ, ma̍ lūām mu̍ŋ kpo̍u̍. Wāŋnda̍ ha̍ā nyɛ̄m nda̍ wa̍ mu̍ŋ so̍o̍lūūwo̍ wo̍ŋ, ŋ̄ ve̍ Mɛ̍lɛ̄ka̍ kpe̍e̍kpe̍i̍ le̍. Nyɛ̄m wāŋnda̍ chīe̍e̍ya̍ tōōsi̍a̍a̍ a̍ yɔ̄mnde̍, ndu̍yɛ̍ a̍ pōūta̍ŋ ndo̍ŋ, mu̍ŋ nda̍ wa̍ sōōlūūwo̍ ni̍ māā mɛ̄lɛ̄ka̍a̍ nda̍.

²⁰O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ na̍a̍, yāndi̍i̍ pi̍ŋi̍ na̍a̍ mā so̍li̍ na̍a̍ Āsi̍i̍līāŋnda̍ o̍ bā, mī māsɛ̄i̍ o̍ chi̍e̍ēŋndo̍ ni᷄ŋ kpo̍u̍ i̍ si̍na̍ māā nūm Mɛ̄lɛ̄ka̍ Ya̍a̍wɛ̄ɛ̄, nu̍m pīlɛ̍ kpe̍ cho̍ Mɛ̄lɛ̄ka̍ ni̍.”

²¹O̍ ko̍ŋ kɔ̍ɔ̍lī, mi̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā o̍ yɔ᷅ŋ dīōmnde̍ŋ nāa̍ Māsāa̍ Hɛ̄sɛ̄ki̍yā chu̍a̍. Mbo̍ dīmūl ndu̍ āā, “Māsāa̍ Hɛ̄sɛ̄ki̍yā, pīɛ̄īlē ŋ̄ pīɛ̍i̍ a̍ Māsā Bɛ̍ndōo̍ Sɛ̄nāchɛ̍lu̍i̍bī ho̍ō Āsi̍i̍līāā o̍kɔ̄ɔ̄ le̍ŋ, nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō dīmi̍ a̍ ndu̍ o̍kɔ̄ɔ̄ wo̍ cho̍ ho̍ō ni̍.

²²Ō dīmi̍ māā, nūm Māsāa̍ Āsi̍i̍līāā, I̍ cho̍ tōsā mī wāŋnda̍ Chūlu̍sɛ̄lɛ̄m a̍ hu̍ŋ ma᷅m nu̍m, mā chūa̍ nu̍m chɔ̍dɔ̄.

²³Ō cho̍ wa᷅ŋnda̍ Chūlu̍sɛ̄lɛ̄m te̍ ŋ̄ yēi̍ ma̍ tɛ̄ɛ̄mbūū lābɛ̄ɛ̄ le̍, ya̍ Mɛ̄lɛ̄ka̍ dīāndāa̍, Mɛ̄lɛ̄ka̍ I̍sɔ̄lūɛ̍i̍ya̍ ŋ̄ tɛ̄ɛ̄nda̍ŋ ni̍ ma̍ yēī ya̍, ndu̍yɛ̍ ma̍ tɛ̄ɛ̄mbūū ya̍ lābɛ̄ɛ̄.

²⁴Ā bīī ma̍ yɔ̄ŋ ki̍i̍la̍a̍ nu̍mnda̍ ma̍ hu᷄ŋ tɛ̍ɛ̍mbūū ya̍ Ma̍sānɔ̄ɔ̍ Mɛ̄lɛ̄ka̍ lābɛ̄ɛ̄. Ma̍ lō o̍ ko̍ŋ ma̍ kīālū yōŋgāa̍ ma̍ dīmī māā, wāna̍ kpāāyā bɛ̍ndōo̍ ya̍ I̍ cho̍ ni̍. Pēmbūŋ Le̍ba̍nɔ̄ŋndo̍ŋ kpo̍u̍ mi̍ nɔ̍lā mi̍ bi̍ī mu̍ŋ. Būndɛ̍la̍ wa̍ o̍ pēmbūŋ mu᷅ŋ chōo̍ la̍ŋ, mi̍ chu̍ā pūa̍a̍ nīa̍a̍, a̍ nyɛ̄lā nīla̍ ka̍āku̍ūlā su̍a̍a̍ ā nāŋ nda̍ŋ, mi̍ he᷅l a̍ nda̍ o̍ pēmbūŋ mu᷅ŋ tūllo̍, mi̍ kɔ̍ pe̍sī pēsī la̍ŋ kpo̍u̍. Yɔ̄mīī si̍dāā vīlɛ̄ī bɛ̍ndūe̍i̍, a̍ yɔ̄mīī sa̍i̍pu̍lūɛ̄ɛ̄ kɛ̄ndɛ̄ kɛ̍ndɛ̄i̍, mi̍ ŋ̄ kīīŋūū ndi̍ kpo̍u̍. Bā o̍ bā būndɛ̍la̍ŋ nda᷅ŋ lā mɛ̄ɛ̄lu̍, mi̍ ŋ̄ fūūlūū lo̍ŋ di̍.

²⁵Lɛ̄ŋīi̍ cho̍ lɛ̄ŋīī nīle̍ ve̍, mi̍ tu̍a̍ā so̍o̍ŋnda̍ māmɛ̄ŋnda̍ŋ o̍ lɛ̄ŋīī kēŋ ni᷄ŋ, ndu̍yɛ̍ mi̍ wa᷅ mɛ̄ŋmā māŋ kōlɔ̄ɔ̍. Pēēla̍ŋ I̍chi̍pī kpo̍u̍, mi̍ ŋ̄ chīī la̍ŋ vēēlīāā a̍ ŋ̄pēlū, na̍a̍ so̍vɛ̄i̍ya̍a̍ nīa̍a̍.

²⁶“Kɛ̍ ndu̍yɛ̍ Māsāa̍ Āsi̍i̍līāā, mɛ̄ɛ̍ mā si̍na̍ pɛ̄ŋgu̍ māā ya̍ Mɛ̍lɛ̄ka̍ pīla̍ kɛ̍ɛ̍si̍a̍a̍ sīndɛ̄ pa̍ ni̍, māā mu᷅ŋ nɔ̄ mī ŋ̄ yɔ̄nu̍ŋ kpo̍u̍. Nyɛ̄ o̍ nyɛ̄ ya̍ I̍ kɛ̍ɛ̍si̍a̍a̍ sīndɛ̄ le̍ tōsāa̍, ndu̍ ya̍ I̍ to̍sa̍ ko̍ŋ ni̍. Chi̍e̍e̍ŋ lāsāāsāŋ ŋ̄ pēsi̍ mu̍ŋ ma̍ tōsā mi̍ ŋ̄ lō pɔ̄mnda̍ŋ ndo̍ŋ, ya̍ ke̍ nu̍m kpāāyā ko̍ŋ ni̍.

²⁷Wānāa̍ wa̍ o̍ chi̍e̍e̍ŋ mu̍ŋ ni᷄ŋ nda̍, ya̍ to̍sa̍ ni̍ mi̍ sīōōŋīī bɛ̄ndūe̍i̍ ī bīī nda̍ le̍ nya̍, mi̍ kɔ̄lta̍ŋ lā lāāsīa̍ŋ nda̍ ni᷄ŋ kpo̍u̍, ndu̍yɛ̍ mi̍ yōōmūa̍ŋ mā fūlā nda̍ po̍. Mi̍ to̍sā ā nɔ̄la̍ mā sīmu̍l nya̍ le̍. O̍ ko̍ŋ, mi̍ to̍sā mi̍ lā yām nda̍ bɛ̍ɛ̍ŋ bɛ̍ɛ̍ŋ. Mɛ̄ɛ̍ bīllo̍ ō wūl nu̍a̍ā o̍ chīɛ̍i̍ ni᷄ŋ, ɔ̄ɔ̄ o̍ chīɛ̄īyo̍ chōo̍, tē pāa̍le̍ŋ lē hīu̍ ndɔ̍ɔ̍ fūlāa̍ pɛ̍, ō vēsa̍ŋ yɛ̍, le̍nde̍ i̍ yɔ̍nu̍ŋ a̍ nda̍ ni̍.

²⁸“I̍ si̍nā nu̍m bāla̍ŋ a̍ bɛ̄ŋgu̍la̍ŋ kpo̍u̍, tē ā chɛ᷄ŋ kɔ᷅la̍ŋ pɛ̍, I̍ si̍nā, tē a̍ wa̍ mīīŋgōo̍ pɛ̍, I̍ si̍nā. Ndu̍yɛ̍ I̍ si̍nā mɛ̄ɛ̍ ŋ̄ dīmī di̍ōmndā wɔ̄ɔ̍ŋnda̍ŋ a̍ ya̍ o̍kɔ̄ɔ̄ yɛ̍.

²⁹Yōŋgā o̍ yōŋgā ŋ̄ sōō a̍ ya̍, ya̍ pi̍la̍ I̍ tu̍e̍ī. Ndu̍yɛ̍ le̍ sīmūl ŋ̄ sīmu̍l la̍ ko̍ŋ ma̍ sūāā sɔ̄ɔ̍ŋ yōŋgāŋ mu᷅ŋ ndo̍, I̍ cho̍ nu̍m hūnɔ̄ɔ̄ do̍li̍ŋi̍i̍ nīi̍ bāā o̍ mi᷄ŋndo̍, ndu̍yɛ̍ mī yi̍i̍ nu̍m nyɔ̄ɔ̍ o̍ sōndō mī ku̍ɛ̄ a̍ nūm o̍ lɛ̄ŋndē nūmnde̍ŋ ni᷄ŋ. Ndu̍yɛ̍ nɛ̄i̍ ŋ̄ kēēku̍ ma̍ hūŋ ndo̍, a̍ ndu̍ ya̍ I̍ cho̍ nu̍m mīŋgī ni̍.”

³⁰Mi̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā o̍ hi̍a̍ū lāchī a̍ sūɛ̍i̍, mbo̍ dīmūl Māsāa̍ Hɛ̄sɛ̄ki̍yā māā, I̍ chɔ᷅m ndɔ̍ nu̍m tāāmāsi̍o̍o̍ māā Mɛ̄lɛ̄ka̍ chō nu̍m bāŋā Āsi̍i̍līāŋnda̍ o̍ bā. Chɔ̍ŋ na̍ŋnde̍ē mbō kūɛ̄ a̍ nyīlāsīāŋ, tɔ̄lɔ̄ɔ̄ wāna̍ chi̍e̍e̍ o̍ to̍l te̍ wo̍, ndu̍ nya̍ wā ni̍ŋ di̍o̍o̍ ni̍. Kɛ̍ tē wɔ̄sīŋ mūu̍ŋ ndo̍ŋ mu᷅ŋ ŋ̄ hīōū pɛ̍, lā chō hūnɔ̄ɔ̄ wā wa̍lta̍ nyāla̍ ŋ̄chīɛ̄ɛ̄la̍ŋ tōsāa̍, mī lā kūāū ba̍a̍līi̍ŋ nyāa̍ŋ a̍ wi̍tīi̍ŋ nyāa̍ŋ, o̍ ko̍ŋ kɔ̍ɔ̍lī, mī lā tōsā kpe̍le̍la̍ nyāla̍ īyɔ̄mnda̍ŋ, ndu̍yɛ̍ mī lā dīā kɔ᷅mndē ndɔ̄le̍ŋ.

³¹Wānāā nyɛ̄ pālāa̍ ō kēēkū ni̍ŋ cho̍o̍ mā lō yōōmū o̍ lɛ̄ŋndē Chu̍dāle̍ŋ ni᷄ŋ nda̍, ā chō hūnɔ̄ɔ̄ sīmnɔ᷄ŋ wa̍nāā kpāāyāā bɛ̍ndū, ndu̍yɛ̍ mā hu᷄ŋ ku̍ī ta̍u̍ ta̍u̍. Wāŋnda̍ ha̍ā ā wā ni̍ŋ ma̍wa̍ā mɛ̄ɛ̍ yɔ̍m nɔ̍ ho̍ō pūūndu̍ŋ ndɔ̄ɔ̍ŋ ŋ̄ tūālāā lɛ̄ŋ di̍ di̍, mbō wa̍ kōmɔ̄ɔ̍ le̍ te̍le̍ŋ o̍ te̍le̍ŋ ndo̍ ō wā nu̍a̍ā yɛ̍.

³²Mi̍ chē bɛ̍ɛ̍ mi̍ nyɛ̄ pālāā bɛ̄ndōo̍ ō wā hūnɔ̄ɔ̄ Chūlu̍sɛ̄lɛ̄m tōlɔ̄ɔ̄ chōo̍ ni̍, kɛ̍ Chūlu̍sɛ̄lɛ̄m o̍ lo᷅ ni̍ŋ fo̍ndō le̍, wāŋnda̍ ā ti᷄ŋ ā lō ni̍ŋ yo̍o̍mū o̍ Pēmbīī Sa̍a̍yɔ̄ŋnde̍ chōo̍. Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō chīi̍ kɛ̄ɛ̄sīāā le̍ he̍ī tōsāa̍.

³³“Le̍la̍ŋ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ Māsāa̍ Āsi̍i̍līāā o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, ‘Māsāa̍ Āsi̍i̍līāā a̍ kpāāya̍ ndɔ̄ɔ̍ kpo̍u̍, kɛ̍ ō lu̍e̍ī Chūlu̍sɛ̄lɛ̄m a̍ sɔ̍ŋgɔ̍ɔ̍ le̍, kɛ̄lɛ̄ŋgāā ni᷅ŋ te̍, mbō nɔ̄la̍ mbō wūu̍ bɛ̍ɛ̍ chi̍ŋɔ̍le̍ŋ lē pīlɛ̍ kpe̍ Chūlu̍sɛ̄lɛ̄m. Mi̍ chē bɛ̍ɛ̍ mi̍ so̍vɛ̄i̍ya̍a̍ ndāa̍ ā nɔ̄ nyɛ̄lā kālā ka̍lāla̍ cho̍ māā bōo̍la̍ bɛ̍ndū le̍ so̍vɛ̄i̍ya̍ māndāa̍ o̍ sɔ̍ŋgɔ̍ɔ̍ ni᷄ŋ nda̍ŋ ni̍, kɛ̍ wāŋndo̍ ō pīlɛ̍ bɛ̍ɛ̍ ō sɔ̍ɔ̍ŋgūū ni̍ŋ Chūlu̍sɛ̄lɛ̄m īkɛ̄i̍ le̍. Ā yɔ̍ŋ bɛ̍ɛ̍ mā kɛ̄ɛ̄si̍a̍a̍ le̍ pūūlōo̍ dēŋgēlāa̍ o̍ sāāsāa̍ hōlnɔ᷄ŋndo̍, le̍ mā kēēku̍ lēcho̍ō mā kɔ̍ bi̍ī chi̍o̍o̍, ā nɔ̍lā ni̍ŋ te̍.

³⁴I̍ cho̍ tōsā Māsāa̍ Āsi̍i̍līāā o̍ lu̍e̍ī o̍ chi̍o̍o̍ ho̍ō ni᷄ŋ a̍ sɔ̍ŋgɔ̍ɔ̍ le̍. Nɛ̄i̍ o̍ ke̍e̍ku̍ mbo̍ hūŋ na̍nu᷄ŋ ndo̍, a̍ nɛ̄ī ko̍ŋ ko̍ni̍ o̍ cho̍ vɛ̄lɛ̄ kēī ni̍ mbō mīīŋgu̍ o̍ lɛ̄ŋndē ndɔ̄le̍ŋ ni᷄ŋ. Nyɛ̄ ya̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ ndu̍ cho̍ ko̍ŋ ni̍.

³⁵I̍ cho̍ chi̍o̍o̍ ho̍ō pīŋī ya̍a̍mɔ̍ɔ̍wa̍ o̍ bā, ndu̍yɛ̍ mī wa̍ ndu̍ māndāa̍ le̍ te̍le̍ŋ o̍ te̍le̍ŋ. I̍ cho̍ he̍ī tōsā le̍ mī dīōlā nīla̍ŋ lā sɔ̄la̍ bɛ̄ɛ̄le̍ŋ, ndu̍yɛ̍ a̍ le̍ būŋgɛ̄ī ya̍ I̍ chu̍e̍l bu̍ɛ̍ī nūu̍ Dēēve̍ ve̍.’ ”

³⁶Ndu̍yɛ̍ mi̍ ī yɔ̄nu̍ŋ i̍chɔ̍l kōŋ, mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō kūā o̍ dɔ̍ɔ̍ŋgɔ̍ so̍vɛ̄i̍ya̍ Āsi̍i̍līāā, mbo̍ kɔ̍ di̍ū so̍vɛ̄i̍ya̍ wāa̍la̍ŋ kɛ̄mɛ̄ a̍ be̍le̍ ŋɔ̄ma̍a̍ a̍ lā ŋūɛ̍ɛ̍nu̍ (185,000) nda̍ tɛ̄ɛ̄ŋ. Mɛ̄ɛ̍ so̍vɛ̄i̍ya̍ Āsi̍i̍līāā a̍ chɛ̍ŋ dīi̍mā ndɔ̄ɔ̍, ma̍ chā wāŋ vīlɛ̍i̍ya̍ īhīni̍ lɛ̍ɛ̍si̍ɛ̍ŋ.

³⁷O̍ ko̍ŋ, mi̍ sīōōŋnde̍ bīī Māsāa̍ Sɛ̄nāchɛ̍lu̍i̍bī, o̍ wa̍ Āsi̍i̍līāā wo̍, mbo̍ chūā so̍vɛ̄i̍ya̍a̍ ndūa̍a̍ ma̍ mīīŋgū Ni̍ni̍vɛ̄ɛ̄ chi̍e̍e̍.

³⁸Mi̍ ī yɔ̄nu̍ŋ pa̍a̍le̍ pi᷅lɛ̍, mɛ̄ɛ̍ Sɛ̄nāchɛ̍lu̍i̍bī o̍ ku̍ɛ̄ mɛ̄lɛ̄ka̍ ndɔ̄ɔ̍ I̍si̍lɔ̍chī sōōlūūwo̍ o̍ chīɛ̄ī ndu̍ o̍o̍ so̍o̍lūū ndu̍ wo̍ ni᷄ŋ, mi̍ pūa̍a̍ ndūa̍a̍ o̍ ve̍lū wa̍ ā ŋīɔ̍ɔ̍ŋ, nda̍ yɔ̍nūŋ ni̍ māā Ādūlūāmɛ̍lɛ̍kī, a̍ Sīālu̍ɛ̍sā, ma̍ kɔ̍ de᷅l ndu̍ chōo̍ a̍ mɔ̄ɔ̄ŋ ndāa̍ŋ fāŋndo̍ŋ, ma̍ dīī ndu̍. O̍ ko̍ŋ, ma̍ nyāānu᷄ŋ o̍ lɛ̄ŋndē Ālu̍a̍lu̍a̍tīle̍ŋ ni᷄ŋ. Ndu̍yɛ̍, mi̍ po̍ ndɔ̄ɔ̍ ō pīlɔ̍ɔ̍ dīōla̍ŋ āā Ɛ̄sāha̍di̍dɔ̄ŋ, o̍ mi̍i̍ŋgū māsāa̍ o̍ fōōfo̍ fi̍nyā ndɔ̄ wo̍.