Read Southern Kisi Āīsa̍yā 38 Bible Online

Āīsa̍yā 38 - Southern Kisi bible

Āīsa̍yā 38

¹Ō wa᷄ a̍ te̍le̍ŋ pi᷅lɛ̍, mi̍ Māsāa̍ Bɛ̍ndōo̍ Hɛ̄sɛ̄ki̍yā o̍ na̍ā nāa̍ pīla̍, ndu̍ o̍o̍ lo̍ ni᷅ŋ cho̍be̍ mī ndu̍ o̍o̍ vi᷅. O̍ ko̍ŋ, mi̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā, po̍ E̍mɔ̍ɔ̍sī wo̍ ō mālnu᷄ŋ mbo̍ kūā nāa̍ Hɛ̄sɛ̄ki̍yā chu̍a̍ a̍ yōōŋgū Mɛ̄lɛ̄ka̍ ke̍ ndu̍ wo̍. Mi̍ Āīsa̍yā di̍mūl Hɛ̄sɛ̄ki̍yā āā, “Mɛ̄lɛ̄ka̍ Ya̍a̍wɛ̄ɛ̄ o̍ ve᷅m ya̍ nāa̍ nūm chu̍a̍. Ō dīmi̍ māā ya̍ i̍ di̍mu̍l nu̍m māā nāā ŋ̄ chō ho̍ō wo̍, a̍ cho̍ chi̍ndā a̍ ndu̍ le̍. Le̍la̍ŋ chōŋgɔ᷄ŋ o̍ chōŋgɔ᷄ŋ ŋ̄ nɔ̄ pɛ̍ le̍ chīɛ̄ī nūmndo̍, āā nūm cho̍ŋgu̍ŋ.”

²Mɛ̄ɛ̍ Hɛ̄sɛ̄ki̍yā o̍ tu̍e̍ī yōōŋgōo̍ ho̍ō, mbo̍ mūlī hɔ̄lla̍ o̍ chīɛ̄īyo̍, mbo̍ kāndū Mɛ̄lɛ̄ka̍ Ya̍a̍wɛ̄ɛ̄ pīɛ̄īyo̍. Mbo̍ dīmī āā,

³“O̍o̍ Mɛ̄lɛ̄ka̍ Ya̍a̍wɛ̄ɛ̄, ā sīnā māā le̍ te̍le̍ŋ o̍ te̍le̍ŋ I̍ cho̍ nyɛ̄ ŋ̄ dīmūl la̍ wo̍ tōsāa̍ a̍ kɔ̄l nūu̍ kpo̍u̍. Pāa̍le̍ pi᷅lɛ̍ bɛ̍ɛ̍ I̍ so̍li̍ wɔ̍ nu̍m dīōm te̍.” O̍ ko̍ŋ kɔ̍ɔ̍lī, mi̍ Māsāa̍ Hɛ̄sɛ̄ki̍yā o̍ cha᷅ŋ cha᷄ŋndo̍ pīla̍.

⁴Mɛ̄ɛ̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā o̍ ma̍l le̍ mīīŋgōo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ndu̍ chu̍a̍, mbo̍ dīmūl ndu̍ āā,

⁵“Mi̍i̍ŋgu̍ mā kɔ̍ di̍mūl Hɛ̄sɛ̄ki̍yā, māā Mɛ̄lɛ̄ka̍ Ya̍a̍wɛ̄ɛ̄, ō Dēēve̍ fi̍nyā ndɔ̄ ma̍mā ndu̍ o̍o̍ pi̍ɛ̍ī yo̍, nyɛ̄ o̍ di̍mi̍ wo̍ cho̍ ho̍ō ni̍. Ō dīmi̍ māā, Hɛ̄sɛ̄ki̍yā, I̍ tu̍e̍ī pīɛ̄īlē nūmnde̍ŋ, ndu̍yɛ̍ mi̍ cha᷅ mɛ̍mɛ̍ma̍ nu̍mnda̍ŋ. Le̍la̍ŋ a̍ cho̍ wu̍ le̍. Ndu̍yɛ̍ I̍ cho̍ tōsā mā hīōū lāchī a̍ wāa̍ yōōmū le̍ wɔ̄sīla̍ŋ tɔ̍ a̍ lā ŋūɛ̍ɛ̍nu̍ vɛ̍lɛ̄.

⁶I̍ cho̍ nu̍m chīīndīāā, ndu̍yɛ̍ mī pi̍ŋi̍ chi̍o̍o̍ ho̍ō mī so̍li̍ ndu̍ Āsi̍i̍līāŋnda̍ o̍ bā, ndu̍yɛ̍ mī hi̍o̍ū lāchī a̍ ndu̍ māndāa̍.”

⁷O̍ ko̍ŋ kɔ̍ɔ̍lī, mi̍ Āīsa̍yā o̍ mi̍i̍ŋgū mbo̍ kɔ̍ di̍mūl Hɛ̄sɛ̄ki̍yā nyɛ̄ Mɛ̄lɛ̄ka̍ ō dīmu̍l ndu̍ wo̍, ndu̍yɛ̍ mbo̍ dīmūl ndu̍ māā, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m tāāmāsi̍o̍o̍ chɔ̄m, o̍ cho̍ nu̍m chɔ̄m māā nyɛ̄ o̍ di̍mi̍ ho̍ō wo̍ ō chō yɔ̄nɔ᷄ŋ a̍ tōnya̍ wo̍.

⁸Ō dīmi̍ māā ō chō tōsā, nyɛ̄ Māsāa̍ E̍ha̍a̍sī ndu̍ o̍o̍ to̍o̍si̍a̍a̍ le̍ pāa̍le̍ŋ tūūwo̍ wo̍, wūndu̍le̍ nyɛ̄ kōŋ lē wa̍ bɛ̍ɛ̍ le̍ vi̍lɛ̄ī, lē chō mīīŋgu̍ a̍ mākɔ̄ɔ̄ le̍ nɛ̄īyo̍ tɔ̍. Ndu̍yɛ̍ mi̍ ī yɔ̄nu̍ŋ mɛ̄ɛ̍ Mɛ̄lɛ̄ka̍ ō dīmi̍ yɛ̍. Nyɛ̄ Māsā Bɛ̍ndōo̍ E̍ha̍a̍sī o̍ to̍o̍si̍a̍a̍ le̍ pāa̍le̍ŋ tūūwo̍ wo̍, mi̍ Mɛ̄lɛ̄ka̍ tōsā mi̍ wūndu̍le̍ nyɛ̄ kōŋ lē mīīŋgū a̍ mākɔ̄ɔ̄ le̍ nɛ̄īyo̍ tɔ̍.

⁹Mɛ̄ɛ̍ Māsāa̍ Hɛ̄sɛ̄ki̍yā o̍ se̍ŋgū, mbo̍ lō o̍ ko̍ŋ, mbo̍ pōōnyīāā dīōmnda̍ŋ nda᷅ŋ. Mbo̍ dīmī māā,

¹⁰ya̍ i̍i̍ yi̍ya̍ŋ ni᷅ŋ māā yōōmū nūu̍, fūūlūūwo̍ tɛ̄ɛ̄ŋ ki̍nɛ̍i̍ mbo̍ hūŋ chūwɔ̄ɔ̍, mi̍ wa᷅ kɔ̄la̍ŋ o̍ wāŋ vīlɛ̍i̍ya̍ lo̍ chi̍e̍e̍, māā I̍ nɔ̍la̍ mī chi̍i̍ te̍le̍ŋ nūu̍ o̍ chi̍e̍ēŋndo̍ chōo̍ le̍.

¹¹Mi̍ yi̍ya᷄ŋ ni᷅ŋ māā I̍ chi᷅ lɛ̍ ni̍ŋ Mɛ̄lɛ̄ka̍ Ya̍a̍wɛ̄ɛ̄ o̍ chi̍e̍ēŋndo̍ ho̍ō chōo̍ le̍. Ndu̍yɛ̍ māā I̍ chi᷅ lɛ̍ ni̍ŋ wa᷅na̍ chi̍e̍e̍ yo̍o̍māa̍ a̍ lēhɔ̄l te̍, kɛ̄lɛ̄ŋgāā ni᷅ŋ te̍, mī wa̍ wāŋndā chīe̍e̍ya̍a̍ yo̍o̍māa̍ tɛ̄ɛ̄ŋ o̍ chi̍e̍ēŋndo̍ chōo̍,

¹²kāni̍, yōōmū nūu̍ ndu̍ o̍o̍ ki̍o̍lu̍ ni᷅ŋ lēpīlɛ̍ so̍, mbo̍ mɛ̄ɛ̄lū. Mɛ̄ɛ̍ wānāā māndāā lāsāa̍ ō pūūsīāā nu̍a̍ā tɛ̍ndɛ̄i̍yo̍ o̍ fo̍ndāa̍, wānā chi᷅ lɛ̍ ndu̍ le̍ yɛ̍, le̍nde̍ yōōmū nūu̍ ndu̍ o̍o̍ lo̍ ni᷅ŋ ni̍. Mɛ̄ɛ̍ wānā lu̍a̍ā kōlāa̍ ō sīmbūlū nu̍a̍ā kōla̍ ndɔ̄ɔ̍ o̍ lɔ̄ɔ̍ ni᷄ŋ, mbō kēlū ndu̍ o̍ kpa̍kpa̍a̍ yɛ̍, le̍nde̍ yōōmū nūu̍ ō wa̍ ni᷅ŋ ō kīālāā ni̍. O̍ pāa̍le̍ŋ lē pīlɛ̍ ni̍ŋ kpe̍, mi̍ Mɛ̄lɛ̄ka̍ chīī a̍ yōōmū nūu̍.

¹³Tē nyūmnda̍ŋ ma̍ a̍a̍ to᷅l īchɔ̄l pɛ̍, mī lɔ̍ɔ̍lu̍ cha᷄ŋndo̍ a̍ nyɛ̄ nɛ̄īyāa̍ pi̍i̍ pi̍i̍ le̍ mālāa̍. Mi̍ pāāla̍ŋ lā yɔ̄nu᷄ŋ ya̍ wānā a̍a̍ che᷅ pɛ̍ āā kpɔ̍kūŋndo̍ pe̍si̍ pe̍si̍ ya̍ pāāla̍ŋ ni̍. O̍ pāa̍le̍ŋ lē pīlɛ̍ ni̍ŋ kpe̍, mi̍ Mɛ̄lɛ̄ka̍ chīī a̍ yōōmū nūu̍.

¹⁴Mɛ̄ɛ̍ ya̍ cha̍ŋ ni᷅ŋ te̍i̍, mi̍ dīōmndo̍ hāū ya̍, ndu̍yɛ̍ cha᷄ŋ ka̍lāa̍ bɛ̍ɛ̍ I̍ ve̍ lɛ̍ ndu̍ nɔ̄lā le̍. Mɛ̄ɛ̍ pīīŋndo̍ ō chāŋ nu̍a̍ā yɛ̍, le̍nde̍ ya̍ I̍ wa̍ ni᷅ŋ cha᷄ŋ īmɔ̍nɔ̍ɔ̍ ni̍. Mɛ̄ɛ̍ ya̍ I̍ to̍fa̍ ni᷅ŋ chōo̍ cho̍o̍ te̍i̍ nāa̍ Mɛ̄lɛ̄ka̍ chūā le̍ mālāa̍, mi̍ hɔ̄lta̍ŋ lā sāŋgā ya̍. O̍o̍ Māsānɔ̄ɔ̍ Mɛ̄lɛ̄ka̍, dɛ̍nɛ̍ pa̍lāā bɛ̄ndōo̍ ō kōma̍l la̍, yāndi̍i̍ ma̍la̍ ya̍ fɔ̍.

¹⁵Kɛ̍ mī vɛ̄ɛ̄ ya̍ I̍ di̍mi̍ yɛ̄ o̍ he̍ī ni᷄ŋ? Mɛ̄lɛ̄ka̍ Ya̍a̍wɛ̄ɛ̄ o̍ so̍ō fɛ̍lɛ̍ŋ nāa̍ ya̍ chu̍a̍, mbo̍ dīmūl la̍ māā he̍ī ī chō yɔ̄nɔ᷄ŋ. Ndu̍yɛ̍ ndu̍ pi̍la̍ kɛ̍sɛ̍ kɛ̍sɛ̍ to̍sa̍ ndi̍ ni̍. Kɔ̄l nūu̍ ō tāmbu̍ ō bɔ̄ɔ̍. Lūa̍a̍ŋ bɛ̍ɛ̍ I̍ nɔ̍lā mi̍ lɔ̍l o̍ wāla̍ chōo̍ le̍.

¹⁶Māsānɔ̄ɔ̍ Mɛ̄lɛ̄ka̍, sɔ̄ɔ̍ŋ ŋ̄ tōsā mu᷅ŋ ndo̍ŋ, mu̍ŋ to̍sā ni̍ mī wāŋndā chīe̍e̍ya̍ ā wa̍ yōōmū. Ndu̍yɛ̍ ya̍ bɛ̍ɛ̍, sɔ̄ɔ̍ŋ nu̍mndo̍ŋ mu᷅ŋ, ŋ̄ chō tōsā mī nyi̍nā nūu̍ ō hīōū lāchī a̍ wāa̍ yōōmū. O̍o̍ Mɛ̄lɛ̄ka̍ nūu̍, si̍ŋgi̍ ya̍ mī hi̍o̍ū lāchī a̍ wāa̍ yōōmū.

¹⁷I̍ si̍nā māā le̍ mī sɔ̍la̍ dɛ̍nɛ̍ kɛ̍ndɔ̄ɔ̍ ŋ̄ chɛ᷄l ni̍ mi̍ sa̍ŋgā sāŋgāa̍ ho̍ō. Le̍ kāālā bɛ̄ndū ŋ̄ kāāla̍ ya̍ wo̍, a̍ chɛ̍l la̍ mī to᷅l o̍ so̍o̍ŋ dīāllūŋ nūu̍ŋ mu̍ŋ wa̍ ni̍ŋ ŋ̍ tɛ̍ɛ̍mbāā wo̍ ni᷄ŋ te̍. Ma̍ lō o̍ ko̍ŋ ma̍ māl la̍ le̍ yɔ̄ŋndā wɔ̄ɔ̍ŋndā ya̍ I̍ to̍sa̍ la̍ŋ kpo̍u̍.

¹⁸Wānāa̍ cho̍ chi̍e̍e̍ pīɔ̍m nda̍ ā nɔ̍lā mā sāŋga̍la̍ nu̍m te̍. Wānāa̍ vi᷅ wa̍, ā nɔ̍lā mā sōli̍ chōndo̍ŋ le̍ nu̍m sāŋgālāa̍ le̍, wānāa̍ vi᷅ ni᷅ŋ nda̍, ā si̍nā lɛ̍ mɛ̄ɛ̍ ŋ̄ chō wānā sa̍kpō yɛ̍ le̍.

¹⁹Wānāa̍ cho̍ yōōmū wa̍, nda̍ nɔ̍lā ni̍ mā sāŋga̍la̍ nu̍m, mɛ̄ɛ̍ ya̍ I̍ cho̍ nu̍m nu̍a̍ā sāŋgālāa̍ pāa̍le̍ hāūle̍ŋ nde᷅ŋ yɛ̍. Kālāa̍ ŋ̄chūāūwa̍, ā chō chūāūwāā ndāa̍ dīmūllo̍ a̍ mɛ̄ɛ̍ ŋ̄ chō wānā sa̍kpō yɛ̍.

²⁰Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ ya̍ chīīndīāā. Le̍ he̍ī, ŋ̄ wā ni̍ŋ ndu̍ sāŋgālāa̍ o̍ chōndo̍ŋ ni᷄ŋ a̍ tōwāla̍ŋ lɔ̄ɔ̍, mī ŋ̄ sāŋga̍la̍ ndu̍ o̍ chīɛ̍i̍ Mɛ̄lɛ̄ka̍ ni᷄ŋ, ha̍a̍a̍ a̍ mɛ̄ɛ̄lu̍la̍ yōōmūlā nāāla̍ŋ.

²¹A̍ bōōndi̍i̍ Āīsa̍yā mi̍i̍ŋgu̍ nāa̍ Māsāa̍ Hɛ̄sɛ̄ki̍yā chu̍a̍ le̍ mbō kɔ̍ di̍mūl ndu̍ māā ō chō sīōŋgɔ̄ɔ̍ sɔ̄lā ve̍, mi̍ Āīsa̍yā o̍ di̍mūl bu̍ɛ̍i̍ya̍a̍ Hɛ̄sɛ̄ki̍yā wa̍ māā ā līnda̍ fi̍kīi̍ya̍ŋ, mā ho᷄l Hɛ̄sɛ̄ki̍yā o̍ hīndɔ̄ɔ̍ wa̍ ndu̍ wo̍, māā tē ā ho᷄l pɛ̍, ō chō sīōŋgɔ̄ɔ̄.

²²A̍ te̍le̍ŋ ko̍ŋ Māsāa̍ Bɛ̍ndōo̍ Hɛ̄sɛ̄ki̍yā o̍ nyu̍nā Āīsa̍yā āā, “Chɔ̍m ndɔ̍ ya̍ tāāmāsi̍o̍o̍, o̍ chɔ᷅m ya̍ māā I̍ cho̍ vɛ̄lɛ̄ nɔ̄lā mī ku̍ɛ̄ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍.”