Read Southern Kisi Āīsa̍yā 39 Bible Online

Āīsa̍yā 39 - Southern Kisi bible

Āīsa̍yā 39

¹Ndu̍yɛ̍ a̍ te̍le̍ŋ ko̍ŋ, Māsāa̍ Mɛ̄lōda̍chī Ba̍la̍dāŋ, po̍ Ba̍la̍dāŋ ndo̍, ndu̍ wa̍ māsāa̍ Ba̍bi̍lɔ̄ŋ ni̍. Mɛ̄ɛ̍ fi̍nyāa̍ ho̍ō tūēī māā Māsāa̍ Bɛ̍ndōo̍ Hɛ̄sɛ̄ki̍yā o̍ wa̍ a̍ nāa̍, ndu̍yɛ̍ mbo̍ sīāŋgū, mbo̍ pōōnyīāā yāu̍wo̍ mbo̍ kē ki̍i̍la̍a̍ ndūa̍a̍, lātūlu̍ a̍ nyɔ̄ɔ̍ŋ ŋ̄ ti᷄ŋ le̍ mā yōo̍ Māsāa̍ Hɛ̄sɛ̄ki̍yā.

²Ndu̍yɛ̍ mɛ̄ɛ̍ pūa̍a̍ ha̍ā ā fūūlu̍u̍, mi̍ Hɛ̄sɛ̄ki̍yā o̍ di̍mūl nda̍ a̍ cha̍a̍ hūnɔ̄ɔ̄ wo̍. O̍ ko̍ŋ kɔ̍ɔ̍lī, mi̍ Hɛ̄sɛ̄ki̍yā o̍ ba̍lū a̍ nda̍, mbo̍ chɔ̄m nda̍ nyɛ̄ o̍ nyɛ̄ o̍ nɔ̍ o̍ māsāle̍ ndɔ̄le̍ŋ ni̍ŋ, ka̍ni̍ŋ hu̍mbū ni̍, ŋ̄ko̍o̍līi̍ŋ ni̍, nyɛ̄m yɛ̍ yɛ̍ŋ nda̍ dūāū o̍ nyɛ̄ dīa̍a̍ wo̍ŋ ni̍, māsi̍ɛ̍ndīi̍ ni̍, wōlɔ̄ɔ̄lā chɔ̄ū ni̍, mbo̍ chɔ̄m pūa̍a̍ ha̍ā kpo̍u̍. Nyɛ̄ o̍ nyɛ̄ ndu̍ o̍o̍ nɔ̍ ō kɛ̄sīāā o̍ fo̍ndāŋndā ndu̍ o̍o̍ kɛ̍sī nyɛ᷅m ndɔ̄ɔ̍ŋ nda̍ŋ, a̍ nyɛ̄ o̍ nyɛ̄ ndu̍ o̍o̍ nɔ̍ o̍ māsāle̍ ndɔ̄le̍ŋ ni᷄ŋ, mbo̍ bālu̍ a̍ pūa̍a̍ ha̍ā mbo̍ chīī nda̍ mu̍ŋ chɔ̄m kpo̍u̍, ō pīlɛ̍ bɛ̍ɛ̍ ō mɛ̄i̍ le̍ nda̍ chɔ̄mndo̍ le̍.

³Mɛ̄ɛ̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā o̍ tu̍e̍ī a̍ pūa̍a̍ ha̍ā o̍kɔ̄ɔ̄, mbo̍ kūā nāa̍ Māsā Bɛ̍ndōo̍ Hɛ̄sɛ̄ki̍yā chu̍a̍, mbo̍ kɔ̍ nyu̍nā ndu̍ āā, “Kūɛ̍ɛ̍nɛ̍ pūa̍a̍ ha̍ā ā chɛ᷄ŋ yɛ̍? Ndu̍yɛ̍ ō yɛ̄ɛ̍nɛ̍ nda̍ hu᷄ŋ di̍mūl lɛ̄ nu̍m?” Mi̍ Hɛ̄sɛ̄ki̍yā o̍ di̍mūl ndu̍ āā, “Pūa̍a̍ ha̍ā ā fūla̍ lēvīl, o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ pɔ̍ nda̍ chɛ᷄ŋ ni̍.”

⁴Mi̍ Āīsa̍yā nyu̍nā ndu̍ āā, “Ō yɛ̄ɛ̍nɛ̍ kpɛ̍ nda̍ hu᷄ŋ chɔ᷅ yɛ̄ o̍ chīɛ̄ī nu̍m lēmāsāa̍ ni᷄ŋ?” Mi̍ Hɛ̄sɛ̄ki̍yā o̍ dīmūl ndu̍ āā, “Nyɛ̄ o̍ nyɛ̄ cho̍ chīɛ̄ī ni̍ŋ na̍nu᷄ŋ, ā chīi̍ chɔ̄. I̍ chɔ̍m nda̍ nyɛ̄ o̍ nyɛ̄ ya̍ I̍ nɔ̍ ō kɛ̄sīāā o̍ fo̍ndāŋndā nīla̍ ya̍ I̍ kɛ̍sī nyɔ̍ɔ̍ŋ nda̍ŋ. I̍ mɛ̍i̍ nyɛ᷅ o̍ nyɛ̄ le̍ nda̍ chɔ̄mndo̍ le̍.”

⁵Mi̍ Āīsa̍yā lo᷅ o̍ ko̍ŋ mbo̍ dīmūl ndu̍ āā, “Ya̍ŋ ndɔ̍ ni᷅la̍ŋ mā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ ō dīmi̍ wo̍. Ō dīmi̍ āā,

⁶‘Hɛ̄sɛ̄ki̍yā, nyɛ̄ o̍ nyɛ̄ ŋ̄ nɔ̄ ō kɛ̄sīāā o̍ chīɛ̄ī nu̍m lēmāsāa̍ ni᷄ŋ, nyɛ̄m nūm pi̍la̍ chu̍u̍ŋgi̍a̍a̍ wo̍ŋ ni̍, a̍ nyɛ̄m fi̍nyāā nūm a̍ ma̍māa̍ ā lo̍ chūūŋgi̍a̍a̍ ha̍a̍a̍ mbo̍ fūūlūū a̍ te̍le̍ŋ ndo̍ ho̍ō wo̍ŋ, te̍le̍ŋ cho̍ fūūlūū mī wāŋnda̍ Ba̍bi̍lɔ̄ŋ a̍ hu̍ŋ kɔ̍ndū mu̍ŋ kpo̍u̍ mā kūɛ̄nu᷄ŋ a̍ mu̍ŋ. Nyɛ̄ o̍ nyɛ̄ ŋ̄ nɔ̄ ō kɛ̄sīāā, ā chō mu̍ŋ hūnɔ̄ɔ̄ bāsɔ̄ɔ̄ tɛ̍ɛ̍, ō pīlɛ̍ bɛ̍ɛ̍ ā mɛ̍ī ni̍ŋ te̍.

⁷Pūa̍a̍ nu̍m ŋ̄ vēlū kɛ̍sɛ̍ kɛ̍sɛ̍ wa̍, ā chō hūnɔ̄ɔ̄ ā ti᷄ŋ bīū mā kūɛ̄ a̍ nda̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ. Ā chō nda̍ lākɔ̄ bōsīla̍ŋ pēsī ndu̍yɛ̍ mā sīīŋgu̍u̍ nda̍ wānāā wa̍lla̍ o̍ chīɛ̄ī lēmāsa̍ māsā bɛ̍ndōo̍ Ba̍bi̍lɔ̄ŋ ni᷄ŋ.’ ”

⁸Kɛ̍ mi̍ Māsāa̍ Bɛ̍ndōo̍ Hɛ̄sɛ̄ki̍yā o̍ yi̍ya᷄ŋ māā yōōŋgōo̍ ho̍ō ō chō yōōŋgū kɛ̄ndɛ̄, māā kɔ̄l nyūlōo̍ ō wā ni̍ŋ o̍ lɛ̄ŋnde̍ŋ ni᷄ŋ, ndu̍yɛ̍ mī wānā o̍ wānā o̍ wa̍ o̍ bā ndɔ̄ cho̍o̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̍nūŋ wa̍nā le̍, ha̍a̍a̍ a̍ te̍le̍ŋ o̍ cho̍ māsāa̍ wo̍. Mi̍ Hɛ̄sɛ̄ki̍yā lo᷅ o̍ ko̍ŋ mbo̍ di̍mūl wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā āā, “Yōōŋgū kɛ̄ndɔ̄ɔ̍ pi̍la̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ nu̍m ho̍ō le̍ ya̍ ni̍.”