Read Southern Kisi Āīsa̍yā 4 Bible Online

Āīsa̍yā 4 - Southern Kisi bible

Āīsa̍yā 4

¹A̍ te̍le̍ŋ ko̍ŋ, wāŋ lāāndūa̍a̍ ā ŋɔ᷄mmɛ̍ū ā kōmāl ni̍ŋ po̍o̍ ō pīlɛ̍, mā nyɔ̄ɔ̄lu̍ ndu̍ āā, “Yāndi̍i̍, chu̍a̍ na̍a̍ o̍ nɔ̄ɔ̍ ni᷄ŋ. Tē ō wa̍ le̍ nyɛ̄ dīāā nāa̍ pɛ̍, a̍ nyɛ̄ na̍a̍ ŋ̄ chūɛ̄ɛ̄nūŋ ndo̍, na̍a̍ pi̍la̍ ŋ̄ chō nūūvīāā. Kɛ̍ hāli̍ tu̍ŋ mā fa̍ŋa̍ na̍a̍ si̍ɔ̍mbu̍la̍ŋ nda᷅ŋ mī ŋ̄ nɔ̄ dīōla̍ŋ āā lāāndāa̍ fi̍nyɛ̄ wa̍.”

²Te̍le̍ŋ cho̍ fūūlūū, lɛ̄vīi̍ Mɛ̄lɛ̄ka̍ Ya̍a̍wɛ̄ɛ̄ ve̍ ī sīmnūŋ ni̍ŋ lɛ̍vīī nāŋāā bɛ̄ndū, ndu̍yɛ̍ mī ī sīmnu᷄ŋ vɛ̍lɛ̄ lɛ̄vīī bɛ̄ndū bɛ̍ndū. Wānāa̍ lo᷅ ni̍ŋ yo̍o̍mū o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ nda̍, ā chō hūnɔ̄ɔ̄ kɔ̄l nāŋɔ̄ɔ̄, ndu̍yɛ̍ mā kēlū yōŋgāa̍ a̍ lɛ̄ŋndē ndāle̍ŋ, fo̍ndōlē, a̍ kɔ̄mndē kɛ̄ndɛ̄lē lɛ̄ŋndē I̍sɔ̄lūɛ̍i̍le̍ŋ lē wā ni̍ŋ yɔ̄ŋgōo̍ le̍ŋ.

³Wānā o̍ wāna̍ lo᷅ ni̍ŋ yo̍o̍mū Sa̍a̍yɔ̄ŋ, ndu̍ yɔ̍nūŋ māā Chūlu̍sɛ̄lɛ̄m ni̍, wāŋnda̍ chō nda̍ hūnɔ̄ɔ̄ vēēlū āā Wānāa̍ cho̍ ā dīāndāā wa̍. Ndu̍yɛ̍ wānāa̍ lo᷅ ni̍ŋ ha̍ā yōōmū wa̍, nda̍ wa᷅ ni̍ŋ wa̍nāā Mɛ̄lɛ̄ka̍ yūlū le̍ mā lo̍ Chūlu̍sɛ̄lɛ̄m nda̍ ni̍.

⁴Nyɛ̄ o̍ nyɛ̄ wāŋ lāāndūa̍a̍ Sa̍a̍yɔ̄ŋ a̍ to̍sa̍ ma̍ sīmnu᷄ŋ a̍ nɔ̍ɔ̍lɛ̍i̍, Mɛ̄lɛ̄ka̍ Ya̍a̍wɛ̄ɛ̄ cho̍ ndu̍ hūnɔ̄ɔ̄ tɔ̄ɔ̄ fo̍, mbō tōsa̍ mā sīmnu᷄ŋ a̍ di̍a̍ndāā ndu̍ o̍ hɔ̄l. Mɛ̄lɛ̄ka̍ chō kōo̍ma̍ wāŋndā chīe̍e̍ma̍ ta̍la̍ Chūlu̍sɛ̄lɛ̄m nda̍ŋ tɔ̄ɔ̄, sa̍na̍a̍ a̍ nyi̍nā ndɔ̍ ki̍lūl wa᷅ŋnda̍ yāmɛ̍i̍ le̍ nda̍ nyɛ̄ pālāa̍ tūsīo̍o̍ chōo̍ wo̍, ndu̍yɛ̍ a̍ nyi̍na̍ ndɔ̍ lēyīŋndo̍ mbō dīndi̍ Chūlu̍sɛ̄lɛ̄m fo̍.

⁵O̍ ko̍ŋ kɔ̍ɔ̍lī, nāŋɔ̄ɔ̍ bɛ̄ndu̍ Mɛ̄lɛ̄ka̍a̍ ō kūmbū ni̍ŋ chi̍o̍o̍ kpo̍u̍, mbō wa̍ chi̍o̍o̍ māndāa̍. Īpāla̍ ki̍nɛ̍i̍, yu̍mbu̍ yu̍mbu̍ ndɔ̄ɔ̍ ō wā ni̍ŋ o̍ ki̍nda᷄ŋ tu̍a̍ŋ o̍ Pēmbīī Sa̍a̍yɔ̄ŋnde̍ chōo̍, mɛ̄ɛ̍ ku᷄mnde̍ ī kīndūŋ nu̍a̍ā yɛ̍, mbō kūmbū wānāa̍ chu̍u̍ŋgi̍āŋ lo̍ŋ nda̍ kpo̍u̍. O̍ ko̍ŋ kɔ̍ɔ̍lī, īchɔ̄l ki̍nɛ̍i̍, pa̍ŋgēle̍ lēyīŋndo̍ ō hu᷄ŋ ku̍mbū chi̍o̍o̍ kpo̍u̍.

⁶Nāŋɔ̄ɔ̄ ndɔ̄ bɛ̍ndu̍ ku̍mbū ni̍ŋ chīo̍o̍ wo̍, ndu̍ to̍sā ni̍ŋ ni̍, pāa̍le̍ lo̍ō wa̍nā lo̍ŋ te̍, nyɛ̄ o̍ nyɛ̄ yɔ̍nūŋ wa̍nā lo̍ŋ te̍, pīɔ̍ɔ̍ se᷅ wa̍nā cho̍o̍ le̍, o̍ ko̍ŋ kɔ̍ɔ̍lī, hūēīyīī bɛ̍ndūī ī hɔ᷅ŋ vɛ̍lɛ̄ lo̍ŋ te̍.