Read Southern Kisi Āīsa̍yā 40 Bible Online

Āīsa̍yā 40 - Southern Kisi bible

Āīsa̍yā 40

¹Mɛ̄lɛ̄ka̍ nyāa̍ ō dīmi̍ āā, “Lā nyɔ̄ɔ̄lu̍ wānāa̍ nīa̍a̍ kɔ̄lta̍ŋ ni᷄ŋ. Lā nyɔ̄ɔ̄lu̍ nda̍ kɔ̄lta̍ŋ.

²Lā dɛ̄ɛ̄ni̍a̍a̍ wa᷅ŋnda̍ Chūlu̍sɛ̄lɛ̄m kɔ̄lta̍ŋ. Lā dīmu̍l nda̍ māā sāŋgā bɛ̄ndū nda̍ wa̍ wo̍ ō chūū, māā yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍, I̍ ma̍l nda̍ le̍ ndu̍. Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍, ya̍ Mɛ̄lɛ̄ka̍ Ya̍a̍wɛ̄ɛ̄, mi̍ tu̍sī nda̍ dɛ̍nɛ̍ pa̍lāa̍ chōo̍ le̍ ndu̍ bɛ̄mbɔ̄ɔ̍ lēdīi̍ŋ.”

³Wāŋndo̍ chō yōndāa̍ chōo̍ cho̍o̍ āā, “Lā tōōsi̍a̍a̍ nɛ̍īyo̍ o̍ po̍llo̍ ni᷄ŋ Mɛ̄lɛ̄ka̍ Ya̍a̍wɛ̄ɛ̍ lāchī. Lā tōōsi̍a̍a̍ ndu̍ mbō wa̍ nyɛ̄ kɛ̄ndɛ̄ sa̍kpō Mɛ̄lɛ̄ka̍ nāa̍ lāchī.

⁴Dɛ̍ŋgbɛ̍la̍ŋ o̍ pēmbo᷄ŋ tɛ̄ɛ̄ŋ kpe̍nde̍ lā pēēlu̍ la̍ŋ, pēmbo᷄ŋ kpo̍u̍ lā pēsī pe̍si̍ mu̍ŋ, mī ŋ̄ yɔ̄nu̍ŋ dɛ̍ŋgbɛ̍la̍ŋ. Nɛ̄īla̍ do̍ŋgīli̍ dōŋgīlīla̍ŋ kpo̍u̍, lā tōsa̍ mī lā yɔ̄nu̍ŋ tɛ̍lɛ̍lɛ̍. Nɛ̄īla̍ wɔ̍ɔ̍ŋnda̍ŋ lā tōsa̍ mī lā sīmnu᷄ŋ nyɛ᷅ kɛ̄ndɛ̄ tɛ̍lɛ̍lɛ̍.

⁵O̍ ko̍ŋ kɔ̍ɔ̍lī, nāŋɔ̄ɔ̄ bɛ̄ndu̍ Mɛ̄lɛ̄ka̍ Ya̍a̍wɛ̄ɛ̄ wo̍ ō wā ni̍ŋ o̍ chɔ̍mna᷄ŋ kpe̍nde̍ke̍le̍. Ndu̍yɛ̍, ŋ̄wāŋndā chīe̍e̍ kpo̍u̍, ā chā ni̍ŋ na̍ŋɔ̄ɔ̄ ndɔ̄ bɛ̍ndōo̍ ho̍ō. He̍ī ī chō yɔ̄nɔ᷄ŋ, fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ sōndō dīōmnda̍ŋ nda᷅ŋ lā fūla̍ ni̍.”

⁶Wāŋndo̍ chō yōndāa̍ chōo̍ cho̍o̍ āā, “Yo̍nda̍ yo̍o̍ŋgōo̍ ho̍ō.” Mi̍ nyu̍nā wāŋndo̍ ho̍ō a̍a̍, “Yōōŋgū yɛ̄ɛ̍nɛ̍ ya̍ I̍ yo̍nda̍ yɛ̍?” Mbo̍ dīmūl la̍ māā ya̍ I̍ yo̍nda̍ āā, “Wāŋndā chīe̍e̍ya̍ kpo̍u̍ ā chō māchūāā mɛ̄ɛ̍ bīllo̍ ō chō nu̍a̍ā yɛ̍. Ndu̍yɛ̍ nāŋɔ̄ɔ̄ ndāa̍ kpo̍u̍, mɛ̄ɛ̍ bīl lāpe̍e̍ŋgo̍o̍ ō kēlēŋā nu̍a̍ā tāmbe̍i̍ yɛ̍, le̍nde̍ o̍ ke̍lēŋā ta̍mbe̍i̍ ni̍.

⁷Bīllo̍, tē Mɛ̄lɛ̄ka̍ Ya̍a̍wɛ̄ɛ̄ o̍ yɔ̍ŋ dɔ̍ɔ̍ hūēīyīī ndūɛ̍i̍ pɛ̍, vēsāa̍ o̍ lēpīlɛ̍ ni᷄ŋ kpe̍. O̍ ko̍ŋ kɔ̍ɔ̍lī, pe̍e̍ŋge̍la̍ŋ bɛ̍ɛ̍ mī lā nyāma̍la̍ mī lā dēli̍. Mɛ̄ɛ̍ bīllo̍ ō chō nu̍a̍ā yɛ̍, le̍nde̍ ko̍ni̍ wāŋndā chīe̍e̍ya̍ ā chō ni̍, ā nɛ̍ī a̍ wu̍ le̍.

⁸Bīllo̍ mbō vēsa̍, o̍ ko̍ŋ kɔ̍ɔ̍lī, pe̍e̍ŋge̍la̍ŋ bɛ̍ɛ̍ mī lā nyāma̍la̍, kɛ̍ Mɛ̄lɛ̄ka̍ ndu̍ dīōm ndɔ̄ɔ̍ ō chō le̍ fɛ̍ɛ̍ŋ a̍ fɛ̍ɛ̍ŋ.”

⁹Sa̍a̍yɔ̄ŋ, ā nɔ̄ yōōŋgū kɛ̄ndɔ̄ɔ̍ lē wāŋnda̍ dīmūllo̍. He̍l o̍ pēmbīī vīlɛ̄īye̍ chōo̍ le̍ mā di̍mu̍l wāŋnda̍ ndu̍. Chūlu̍sɛ̄lɛ̄m, ā nɔ̄ yōōŋgū kɛ̄ndɔ̄ɔ̍ o̍ sōndō, le̍ dīmīo̍o̍. Yo̍nda̍ yo̍o̍ŋgū kɛ̄ndɔ̄ɔ̍ ho̍ō chōo̍ cho̍o̍ kpe̍le̍ŋ. Yo̍nda̍ ndu̍ chōo̍ cho̍o̍ kpe̍le̍ŋ, sīōōŋīī bi̍ī nu̍m te̍. Di̍mu̍l chi̍o̍o̍ŋ Chu̍dā āā, “Lā tōfa̍ wɔ̍, Mɛ̄lɛ̄ka̍ nyāa̍ chō hūnɔ̄ɔ̍!”

¹⁰Lā tōfa̍ wɔ̍, Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ Bɛ̄ndōo̍ ō chō hūnɔ̄ɔ̍ a̍ kpāāyā bɛ̍ndōo̍. Ō chō hūnɔ̄ɔ̍ le̍ wāa̍ Māsāa̍ ŋ̄wāŋndā chīe̍e̍ kpo̍u̍ cho̍o̍, a̍ kpāāya̍ ndɔ̄ bɛ̍ndōo̍. Ō chō hūnɔ̄ɔ̍ a̍ wāŋnda̍ o̍ bā māā fāndā, wānāā o̍ ba̍ŋa̍ wa̍ ā chō ndu̍ kɔ̄la̍ŋ lāchī.

¹¹Ō chō hūnɔ̄ɔ̄ wānāā ndūa̍a̍ māndā mɛ̄ɛ̍ wānā ma̍ndāā lāsāa̍ ō māndā nu̍a̍ā sāa̍ ndūa̍a̍ yɛ̍. A̍ cho̍ māā sāā fɔ̍ŋndɔ̍ wā, ō chō nda̍ hūnɔ̄ɔ̄ chu̍u̍ŋgi̍a̍a̍ nāa̍ pi̍lɛ̍, ndu̍yɛ̍ mbō nāŋnu̍ŋ nda̍ īkɛ̄i̍, kālāa̍ ndāa̍ mbō bīī nda̍ nyɛ̄ kɛ̄ndɛ̄ kɛ̍ndɛ̄.

¹²Kāni̍ bɛ̍ɛ̍, ō nɛ̄ɛ̍nɛ̍ nɔ̍la̍ yɛ̄ ni᷅ŋ, mbo̍ kūāndū mɛ̄ŋnda̍ŋ o̍ Pēe̍ Mɛ̄ŋmā Īhɛ᷄llo̍ a̍ bā le̍ ma̍ŋ tūūwo̍? Ō nɛ̄ɛ̍nɛ̍ tu̍u̍ yɛ̄ ni᷅ŋ ha̍la̍a̍ chōo̍ cho̍o̍ a̍ bā le̍ mbō sīna̍ mɛ̄ɛ̍ kpɛ̍ o̍ to̍ŋgū yɛ̍? Ō nɛ̄ɛ̍nɛ̍ nɔ̍la̍ yɛ̄ ni᷅ŋ mbo̍ chu̍u̍ŋgi̍a̍a̍ chu̍ndo̍o̍ kpo̍u̍ nāa̍ pi᷅lɛ̍, mbo̍ tūū ndu̍ o̍ nyɛ̄ ni᷄ŋ le̍ mbō sīna̍ mɛ̄ɛ̍ o̍ cho̍ bōllē pīlɛ̍ yɛ̍? Ō nɛ̄ɛ̍nɛ̍ nɔ̍la̍ yɛ̄ ni᷅ŋ mbo̍ hāndū lūāŋūŋ bɛ̄ndo᷄ŋ a̍ pēmbo᷄ŋ o̍ sēke̍lēi̍yo̍ chōo̍, le̍ mbō sīna̍ mɛ̄ɛ̍ kpɛ̍ ŋ̍ cho̍ lūsu̍llo̍ yɛ̍?

¹³Ō nɛ̄ɛ̍nɛ̍ nɔ̍la̍ yɛ̄ ni᷅ŋ, mbo̍ sīnā nyɛ̍ cho̍ Mɛ̄lɛ̄ka̍ Ya̍a̍wɛ̄ɛ̄ o̍ kɔ̄llo̍? Ō nɛ̄ɛ̍nɛ̍ nɔ̍lā yɛ̍ mbō pɛ̄ɛ̄ku̍ Mɛ̄lɛ̄ka̍ ɔ̄ɔ̄ mbō sīla̍ ndu̍?

¹⁴Ō nɛ̄ɛ̍nɛ̍ Mɛ̄lɛ̄ka̍ nyūna̍ yɛ̄ ni᷅ŋ le̍ sīlāa̍? Ō nɛ̄ɛ̍nɛ̍ pɛ̍ɛ̍ku̍ yɛ̄ ndu̍ le̍ mɛ̄ɛ̍ o̍ to̍sā sɔ̍ɔ̍ŋ o̍ nɛ̄i̍ tōnya̍a̍ chōo̍ yɛ̍? Ō nɛ̄ɛ̍nɛ̍ ke̍ yɛ̄ ndu̍ kɔ̄l kālo̍o̍, ndu̍yɛ̍ mbo̍ chɔ̄m ndu̍ mɛ̄ɛ̍ o̍ si̍nā sɔ̍ɔ̍ŋ pɛ̄ŋgu̍ yɛ̍?

¹⁵Lɛ̄ŋnde̍ kpo̍u̍ ī chō māchūāā Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l māā nyɛ̄ pɔ̄mbu̍i̍i̍ni̍i̍, ī chō māchūāā mɛ̄ɛ̍ mɛ̄ŋnde̍ŋ lē dēl nu̍a̍ā tu̍e̍ o̍ ba̍a̍wa̍a̍ ni᷄ŋ yɛ̍. Mɛ̄ɛ̍ wāŋndo̍ ō chu̍u̍ŋgi̍a̍a̍ dɔ̍ɔ̍ nu̍a̍ā chu̍ndu̍ fo̍ndōo̍ lɛ̄ŋ, mbō lāndu̍ ndu̍ o̍ sēke̍lēi̍yo̍ yɛ̍, le̍nde̍ i̍ cho̍ ndu̍ o̍ hɔ̄l ni̍. Lɛ̄ŋīi̍ cho̍ ī bālāā a̍ mɛ̄ŋnda̍ŋ nde̍, ō chūa̍ ndi̍ bɛ̍ɛ̍, fe̍fe̍le̍ ko̍ni̍ i̍ wa᷅ ndu̍ o̍ bā ni̍ māā chu̍ndu̍.

¹⁶Yɔ̄mnde̍ o̍ būndɛ̍la̍ŋ ni᷄ŋ Le̍ba̍nɔ̄ŋ kpo̍u̍, ī cho̍ i̍ bɔ̍ɔ̍ le̍ yīŋnde̍ŋ kīīsūūwo̍ o̍ ma̍āŋndo̍ ndɔ̄ɔ̍ chōo̍ le̍, ndu̍yɛ̍ vīsīa̍a̍ cho̍ bɛ̍ɛ̍ o̍ būndɛ̍la̍ŋ nda᷅ŋ ni᷄ŋ nda̍, ā cho̍ le̍tu̍u̍ le̍ sa̍lā lūāmāa̍ sōlīo̍o̍ o̍ Mɛ̄lɛ̄ka̍ nāa̍ lo̍ le̍.

¹⁷Lɛ̄ŋnde̍ o̍ chi̍e̍ēŋndo̍ ni̍ŋ kpo̍u̍, ī cho̍ nyɛ᷅ o̍ nyɛ̄ Mɛ̄lɛ̄ka̍ o̍ hɔ̍l te̍. Ō chi̍ ndi̍ nyɛ̄ o̍ nyɛ̄ le̍.

¹⁸Nyɛ̄ o̍ nyɛ̄ chō mī wānā tu̍u̍ ndu̍ a̍ Mɛ̄lɛ̄ka̍? Wānā tu̍ū Mɛ̍lɛ̄ka̍ a̍ nyɛ̄ o̍ nyɛ̄ mā di̍mi̍ māā, a̍ nyɔ̄ɔ̍ ho̍ō o̍ ve̍la᷅ŋ ni̍?

¹⁹Wānā tu̍ū ndu̍ a̍ mɛ̄lɛ̄ka̍ā wāŋnda̍ tōōsīāā wa̍ le̍, fo̍ndōle̍, mɛ̄lɛ̄ka̍a̍ ha̍ā nyɛ̄ wānā cha̍ā nyɛ̄ a̍ lābā wo̍ ō tōōsīāā a̍ lābā wo̍ nda̍ chō ni̍. Tē ā to̍o̍si̍a̍a̍ nda̍ pɛ̍, ā kūmbū nda̍ a̍ ko̍o̍līi̍yo̍ŋ kpo̍u̍, ā tōōsi̍a̍l nda̍ yɔ̄lɔ̍ŋ a̍ ka̍ni̍i̍ hu̍mbūe̍i̍.

²⁰Wānā ta̍mbɛ̍i̍ cho̍ ō nɔ̍lā mɛ̍lɛ̄ka̍a̍ wāā le̍nde̍ sɔ̍lā le̍ wo̍, tē ō bīī pɛ̍, ō nūūwa̍ yɔ̄m kālā ka̍la̍ se᷅ le̍ wo̍, o̍ ko̍ŋ kɔ̍ɔ̍lī, ō nūūwa̍ wāna̍ cha̍ā nyɛ᷅ a̍ lābā wo̍, ō se᷄l ndu̍ mɛ̄lɛ̄ka̍a̍ ha̍ā ō pīlɛ̍ nyɛ̄ kɛ̄ndɛ̄ kɛ̍ndɛ̄, ō sīmi̍ ndu̍ bɛ̍ɛ̍ o̍ de᷅l te̍.

²¹Bāā lā sīna̍ wɔ̍ sɔ̍ɔ̍ŋ mu᷅ŋ pɛ̄ŋgu̍ le̍? Bāā lā tūi̍ yɔ̍ a̍ mu̍ŋ o̍kɔ̄ɔ̄ le̍? Ā di̍mu̍l nya̍ a̍ mu̍ŋ o̍kɔ̄ɔ̄ o̍ kāndɔ᷄ŋndo̍ le̍? Lā si̍nā mɛ̄ɛ̍ chi̍e̍ēŋndo̍ ho̍ō ō tōōsi̍a̍ŋ yɛ̍ le̍?

²²Mɛ̄lɛ̄ka̍ chō īchāli̍ o̍ kpe̍ŋgbe̍i̍ ndɔ̍ lēmāsāa̍ chōo̍, o̍ ha̍la̍a̍ kɔ̄ɔ̄lī. Wāŋndā chīe̍e̍ya̍ kpo̍u̍, ā chō māchūāā ndu̍ o̍ hɔ̄l mɛ̄ɛ̍ kāmbālla̍ ā chō nu̍a̍ā yɛ̍. Ndu̍ pɛ̍ŋgɛ̍la̍ ha̍la̍a̍, a̍ nyɛ̄ o̍ nyɛ̍ cho̍ chōo̍ cho̍o̍ ni̍, mɛ̄ɛ̍ nda̍ pɛ̄ŋgɛ̄lā nu̍a̍ā kōlāa̍ yɛ̍. Mɛ̄ɛ̍ nda̍ tūāndū nu̍a̍ā tɛ̍ndīi̍yo̍ le̍ cha᷄lle̍ lēni᷄ŋ yɛ̍, le̍nde̍ o̍ to̍ndū ha̍la̍a̍ chōo̍ cho̍o̍ ni̍.

²³Wānāā bɛ̄ndūa̍a̍ o̍ chi̍e̍ēŋndo̍ ni᷄ŋ, mbō tōsa̍ mā sīmnu᷄ŋ nyɛ᷅ fo̍ndō fu̍u̍. Wānāa̍ cho̍ chi̍e̍ēŋndo̍ ho̍ō kpo̍u̍ chi᷅la̍ŋ nda̍, mbō tōsa̍ mā mīīŋgu̍ nyɛ̄ fo̍ndō fu̍u̍.

²⁴Mɛ̄ɛ̍ nda̍ tūāl nu̍a̍ā tɔ̄lɔ̄ɔ̍, ɔ̄ɔ̄ mɛ̄ɛ̍ nda̍ sāŋ nu̍a̍ā ku̍lu̍la̍ tɔ̄lɔ̄ɔ̍ lɛ̄ŋ, dīmīo̍o̍ nu̍a̍ā mī lā vīl, te̍le̍ŋ pūūndo̍ŋ ŋ̄ hūŋ nu̍a̍ā le̍ lɛ̄ŋnde̍ŋ sāa̍ nyɛ̄ kɛ̄ndɛ̍ī yo̍, Mɛ̄lɛ̄ka̍ yɔ̍ŋ hūēīyīī tūū ve̍, mī ī hu᷄ŋ ve̍e̍sīāā ndu̍ kpo̍u̍, ndu̍yɛ̍, mbō yɔ̍ŋ hūēīyīī fēlēŋfēle̍ŋnde̍ mī ī hu᷄ŋ ba̍sū ndu̍ tɛ̍ɛ̍ māā lātɛ̄fɛ̍.

²⁵Mɛ̄lɛ̄ka̍ dīāndāa̍ ō lo̍ o̍ ko̍ŋ mbo̍ nyūnā āā, “A̍ nɛ̄ɛ̍nɛ̍ wānā nɔ̍lā yɛ̍ mā tu̍u̍ ya̍ Mɛ̄lɛ̄ka̍? Ō nɛ̄ɛ̍nɛ̍ cho̍ yɛ̄ mi̍ ŋ̄ sīīma᷅ŋ na̍a̍ ndu̍?”

²⁶Lā hēēlu̍ wɔ̍ hɔ᷅lla̍ mī lā tōfa̍ o̍ ha̍la̍a̍ ni᷄ŋ cho̍o̍ cho̍o̍. Ō nɛ̄ɛ̍nɛ̍ to̍o̍si̍a̍a̍ yɛ̄ nyɔ̄ɔ̍ŋ mu᷅ŋ kpo̍u̍ o̍ ha̍la̍a̍ ni᷄ŋ? Mɛ̍lɛ̄ka̍ to̍o̍si̍a̍a̍ mu̍ŋ ni̍, mbo̍ ha̍ndu̍ mu̍ŋ o̍ ha̍la̍a̍ ni᷄ŋ cho̍o̍ cho̍o̍ ŋ̍ pi̍lɛ̍ŋ pi̍lɛ̍ŋ, mɛ̄ɛ̍ nda̍ sīmī nu̍a̍ā pūa̍a̍ chɔ̄ūwa̍ yɛ̍. Ō si̍nā mu̍ŋ mɛ̄ɛ̍ ŋ̍ cho̍ bōllē pīlɛ̍ yɛ̍ kpo̍u̍, ndu̍yɛ̍ ō nɔ̄lā mbō vēēlu̍ mu̍ŋ dīōla̍ ŋ̄ pīlɛ̍ŋ pi̍lɛ̍ŋ. A̍ kpāāya̍ ndɔ̄ bɛ̍ndōo̍, ndu̍yɛ̍ a̍ dīāllūŋ ndɔ̄ɔ̍ŋ ka̍la̍ŋ, mbo̍ kɛ̄sī mu̍ŋ chōo̍ cho̍o̍ lo̍ŋ, ī pīlɛ̍ bɛ̍ɛ̍ ī fe̍ŋāŋ le̍cho̍o̍ le̍.

²⁷Nya̍ yu̍ŋgu̍ Che̍kɔ̍pū wo̍, vɛ᷅ mi̍ lā wā ŋɔ̄ɔ̄chīa̍ŋndo̍? Wāŋnda̍ I̍sɔ̄lūɛ̄ī, vɛ᷅ mī lā wā dīmīo̍o̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ chɔ᷅ nyɛ̍ cho̍ yɔ̄nɔ᷄ŋndo̍ a̍ nya̍ wo̍ le̍, māā ō būūla̍ŋ bɛ̍ɛ̍ le̍ mbō sīna̍ māā tē ā chō nya̍ lāka̍fā tōsāl te̍?

²⁸Bāā lā sīna̍ wɔ̍ sɔ̍ɔ̍ŋ mu᷅ŋ pɛ̄ŋgu̍ le̍? Bāā lā tūi̍ yɔ̍ a̍ mu᷅ŋ o̍kɔ̄ɔ̄ le̍? Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍. Ndu̍ to̍o̍si̍a̍a̍ chi̍e̍ēŋndo̍ ho̍ō kpo̍u̍ ni̍. Ō sa̍ŋgā lē, kɛ̄lɛ̄ŋgāāle̍, mbō yēēma̍ pɛ̄ŋgī. Wānā o̍ wānā nɔ̍lā mā si̍na̍ yi̍ya᷄ŋ ndɔ̄ɔ̍ le̍.

²⁹Wānāa̍ cho̍ ā yɔ̄kpɛ̍i̍ ya̍, mbō ke̍ nda̍ dīāllūŋ kālāŋ sɛ̄nɛ̄īyo̍ŋ, ndu̍yɛ̍ wānāa̍ nɔ̍ kpa̍a̍yā o̍ kpāāyā le̍ wa̍, mbō ke̍ nda̍ kpāāyāa̍ ta̍u̍ ta̍u̍.

³⁰Fe̍le̍ŋgu̍a̍a̍ bɛ̍ɛ̍ mā sāŋga̍, ndu̍yɛ̍ mā yēēma̍ pɛ̄ŋgīo̍o̍. Chūāā pīāāndūa̍a̍ bɛ̍ɛ̍ mā sāŋga̍, ndu̍yɛ̍ mā de᷄l.

³¹Kɛ̍ wānāa̍ dɔ̍ū tīīnda᷄ŋ ndāa̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ nda̍, ā chō hūnɔ̄ɔ̄ dīāllūŋ kālāŋ sɛ̄nɛ̄īyo̍ŋ sɔ̄lā. Ā chō hūnɔ̄ɔ̄ dīāllūŋ kāla᷄ŋ sɔ̄lā, mɛ̄ɛ̍ kōvi̍a̍a̍ ā nɔ̄ nu̍a̍ā dīāllūŋ kāla᷄ŋ le̍ bālɔ̄ɔ̍ o̍ hūēīye̍ ni᷄ŋ cho̍o̍ cho̍o̍ yɛ̍. Ā nyāānūŋ ni̍ŋ ā sa̍ŋgā le̍, ndu̍yɛ̍ mā bālu̍ bālɔ̄ɔ̍ pi̍la̍ kɛ̍ ā yɔ̍kpā le̍.