Read Southern Kisi Āīsa̍yā 41 Bible Online

Āīsa̍yā 41 - Southern Kisi bible

Āīsa̍yā 41

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Nya̍ wāŋnda̍ o̍ lɛ̄ŋīi̍ ho̍lnu̍ŋ pe̍e̍ mɛ̄ŋmā īhɛ᷄llo̍ wa̍, lā mēi̍ mī lā ya᷄ŋ ya̍ nīla̍ŋ. Wāŋnda̍ o̍ lɛ̄ŋnde̍ ni᷄ŋ ā mīīŋgu̍ yo̍o̍mūa̍ŋ sɔ̄lā. Ā hu᷄ŋ ti̍mbī sūɛ̍i̍ ndɛ̄i̍. Ŋ̍ bɔ̄ɔ̄ŋi̍āŋ mī ŋ̄ yāāsi̍āŋ sūɛ̍i̍ cho̍ na̍a̍ tɛ̄ɛ̄ŋ nde̍.

²“Ō nɛ̄ɛ̍nɛ̍ to̍sa̍ yɛ̍, mi̍ māsa̍ wa̍ bā pāa̍le̍ŋ le̍ chāŋndo̍ wo̍ ō yūsā kɔ̄llo̍ le̍ hūnɔ̄ɔ̍ sɔ̍ŋgɔ̄ɔ̍ a̍ lɛ̄ŋnde̍ŋ nde᷅ŋ? Ō nɛ̄ɛ̍nɛ̍ ke̍ yɛ̄ māsā ko̍ŋ kpāāyāa̍, bā o̍ bā o̍ ku̍ɛ̄ a̍ chɔ̄ūwo̍ pɛ̍ ō yēm? Wāna̍ hi᷅ŋ a̍ ndu̍ wo̍, ndu̍ ma̍l ndu̍ lɛ̄ŋīi̍ wa̍ ndu̍ lāchī ve̍ o̍ bā ni̍ mbo̍ yām ndi̍, a̍ māsāa̍ wa̍ o̍ lɛ̄ŋīī kēŋ ni᷄ŋ nda̍, mbo̍ nīɔ̄ū nda̍. A̍ mūɛ̄ī ndūɛ̍i̍ fāŋnde̍, mbo̍ tɛ̄ɛ̄mbūū māsāā ka̍ŋ, mbo̍ tōsā ma̍ yɔ̄nu᷄ŋ mɛ̄ɛ̍ chu̍ndo̍o̍ wā nu̍a̍ā lɛ̄ŋ yɛ̍. Mbo̍ sɛ̄ŋī nda̍ a̍ chīŋɔ̍ma̍ ndūa̍a̍ŋ mɛ̄ɛ̍ hūēīye̍ ī sɛ̄ŋī nu̍a̍ā pēī ve̍sɛ̍i̍ye̍ yɛ̍.

³Mɛ̄ɛ̍ nda̍ nyāānu̍ŋ, mbo̍ tīsā nda̍ kīlta̍ŋ kɔ̄ɔ̄lī, mbo̍ fūūlūū a̍ nda̍ tōūwɔ̄ɔ̍ o̍ fo̍ndāŋndā o̍ ku̍e̍ wɔ̍ bɛ̍ɛ̍ pa̍a̍ndū le̍ la̍ŋ, ndu̍yɛ̍ nyɛ̄ ō nyɛ̄ yɔ̄nu̍ŋ ndu̍ le̍.

⁴Ō nɛ̄ɛ̍nɛ̍ to̍sa̍ yɛ̄ mi̍ sɔ̄ɔ̍ŋ bɛ̍ndūŋ wāā nu̍a̍ā ŋ̄ yɔ̄nu᷄ŋ? Chɔ̍ŋ a̍ chi̍e̍ēŋndo̍ kāndɔ᷄ŋndo̍, sɔ̄ɔ̍ŋ yɔ̍nu̍ŋ ni᷅ŋ ki̍nɛ̍i̍ yo̍ŋ, ō nɛ̄ɛ̍nɛ̍ to̍sa̍ yɛ̄ mi̍ ŋ̄ yɔ̄nu᷄ŋ? Ya̍ Mɛ̄lɛ̄ka̍ Ya̍a̍wɛ̄ɛ̄ ya̍ to̍sa̍ ni̍ mi̍ ŋ̄ yɔ̄nu᷄ŋ. I̍ wa̍ na̍nu᷄ŋ o̍ kāndɔ᷄ŋndo̍, ndu̍yɛ̍ I̍ cho̍ vɛ̄lɛ̄ lō na̍nu᷄ŋ mī mɛ̄ɛ̄lu̍la̍ŋ lā fūūlu̍u̍.

⁵“Wānāa̍ cho̍ o̍ lɛ̄ŋīi̍ ho̍lnu̍ŋ pe̍e̍ mɛ̄ŋmā īhɛ᷄llo̍ ve̍ ni᷄ŋ nda̍ kpo̍u̍, ā chē nyɛ̄ ya̍ I̍ to̍sa̍ wo̍. Wāŋnda̍ o̍ chi̍e̍ēŋndo̍ ni᷄ŋ kpo̍u̍ sīōōŋīī bɛ̄ndūe̍i̍ bīī nda̍ ma̍ nyīīyā. Nda̍ kpo̍u̍ ā dīīnu᷄ŋ ku̍ndāa̍ ma̍ hūŋ.

⁶Ā chō māāli̍āŋndo̍ vēllāa̍ vēllē, mī wānā o̍ wānā dɛ̄ɛ̄ni̍a̍a̍ cha̍a̍ŋ ndɔ̍ kɔ̄llo̍ ni᷄ŋ āā, ‘Sɔ̍la̍ kɔ᷅l sīmūlāa̍.’

⁷Wānāa̍ cha̍ā nyɛ᷅ a̍ lābā wa̍, ā chō wānāa̍ to̍sā wa̍llo̍ a̍ ko̍o̍līi̍yo̍ŋ nda̍ kɔ̄lta̍ŋ dɛ̄ɛ̄nīa̍a̍, ndu̍yɛ̍, mi̍ wānāa̍ bɛ̍ɛ̍ndīāā chi̍li̍ŋndo̍ŋ a̍ ha̍mɛ̄i̍la̍ŋ mā kpɛ̄lɛ̄kīāā mu̍ŋ nda̍, ā wā dīōmndā kɛ̄ndɛ̄la̍ŋ sūɛ̍i̍ nāa̍ sūmnda̍ chūā, a̍ bɛ̍ɛ̍ndīāā nyɔ̍ɔ̍ŋ a̍ chīli̍ŋndo̍ŋ nda̍. Ā chō dīmu̍la᷅ŋndo̍ māā, wa̍li̍ ŋ̄chīli̍ŋndo̍ ho̍ō, wa̍li̍ kɛ̍ndɔ̄ɔ̍ pīla̍ o̍ cho̍ ni̍. Ndu̍yɛ̍, ma̍ wā nyɔ̄ɔ̍ŋ tōōsīa̍a̍ māā mɛ̄lɛ̄ka̍a̍ ndā, mā bēŋī mu̍ŋ a̍ lɔ̄ndīmɛ̄i̍yo̍ŋ yɔ̄ŋi̍ ŋ̍ de̍li̍.

⁸“Kɛ̍ nya̍ wāŋnda̍ I̍sɔ̄lūɛ̄ī, bu̍ɛ̍i̍yāā nīa̍a̍ nya̍ chō ni̍. Nya̍ yu̍ŋgu̍ Che̍kɔ̍pū wo̍, nya̍ fu̍la̍ ha̍ā o̍ pūlāle̍ E̍bīlāha᷅m cha̍a̍ŋ nīle̍ŋ chōo̍ wa̍, nya̍ cho̍ wānāā nīa̍a̍ ya̍ I̍ hɛ̍li̍ wa̍ ni̍.

⁹Lā wa̍ o̍ fo̍ndāŋndā lēvīlta̍ŋ o̍ chi̍e̍ēŋndo̍ mɛ̄ɛ̄lu̍la̍ŋ pɔ̍, mi̍ kɔ̍ chu̍ā nya̍ lo̍ŋ, mi̍ so̍lī nya̍ o̍ lɛ̄ŋndē lēŋ ni᷄ŋ mi̍ hu᷅ŋ a̍ nya̍. Mi̍ lo᷅ o̍ ko̍ŋ mi̍ di̍mūl nya̍ a̍a̍, ‘Bu̍ɛ̍i̍yāā nīa̍a̍ nya̍ chō ni̍.’ Wānāā nīa̍a̍ ya̍ I̍ hɛ̍li̍ wa̍ nya̍ chō ni̍, I̍ kɛ̍ɛ̄ nya̍ le̍.

¹⁰Le̍la̍ŋ lā yɔ᷅ŋ īsīōōŋ te̍, kāni̍ fo̍ndōle̍, I̍ cho̍ nya̍ kɔ̄ɔ̄lī. Lā ta̍mbū kɔ̄l te̍, ya̍ cho̍ Mɛ̄lɛ̄ka̍ nyāa̍ ni̍, I̍ cho̍ nya̍ dīāllūŋ kāla᷄ŋ kē, ndu̍yɛ̍ mī ma̍la̍ nya̍. I̍ cho̍ nya̍ bā nī kɛ̍ndɔ̄ɔ̍ hāndɔ̄ɔ̄ chōo̍, mī ma̍nda̍ nya̍, ndu̍yɛ̍ mī to̍sa̍ mī lā yēm ya̍a̍mɔ̍ɔ̍wa̍a̍ nyāa̍.

¹¹“Wānā o̍ wānā dɔ̍u̍nu᷄ŋ tu̍mbe̍ a̍ nya̍, si̍ɔ̍mbu̍la̍ŋ lā chō nda̍ hūnɔ̄ɔ̄ bīyɔ̄ɔ̄, ndu̍yɛ̍ mī wāŋnda̍ ā chūa̍ nda̍ nyɛ̄ fo̍ndō fu̍u̍. Wānāa̍ tu̍l nya̍ yɛ̄le̍ŋ nda̍, ā chō sīmnɔ᷄ŋ nyɛ᷅ fo̍ndō fu̍u̍ wa᷅ŋnda̍ o̍ hɔ̄l, ndu̍yɛ̍ mā sɔ̄la̍ pīɔ̍mndo̍.

¹²Lā kēēlā ni̍ŋ hɔ᷅lte̍ŋ le̍ ya̍a̍mɔ̍ɔ̍wa̍a̍ nyāa̍ chɔ̄ɔ̍, kɛ̍ ō pīlɛ̍ bɛ̍ɛ̍ lā se̍e̍lūŋ ni̍ŋ te̍. Wānā o̍ wāna̍ cho̍ sɔ̍ŋgɔ̄ɔ̍ a̍ nya̍, ā chō hūnɔ̄ɔ̄ chūū kpo̍u̍, ō pīlɛ̍ bɛ̍ɛ̍ ō lo᷅ ni̍ŋ te̍.

¹³Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, o̍ cho̍ nya̍ māndāa̍ wo̍ ni̍. I̍ di̍mu̍l nya̍ a̍a̍, ‘Lā yɔ᷅ŋ īsīōōŋ te̍. I̍ cho̍ nya̍ mālā.’ ”

¹⁴Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Nya̍ pɔ̄mbūa̍a̍ lo̍ ha̍ā yōōmū I̍sɔ̄lūɛ̄ī ya̍, mi̍ chē bɛ̍ɛ̍ lā nɔ̍ di̍a̍llūŋ kālā le̍ ni̍, kɛ̍ lā yɔ᷅ŋ īsīōōŋ te̍. Ya̍ pi̍la̍ I̍ cho̍ nya̍ mālā. Ya̍ Mɛ̄lɛ̄ka̍ dīāndāa̍, Mɛ̄lɛ̄ka̍ I̍sɔ̄lūɛ̍i̍ya̍, ya̍ chi̍i̍ndīāā nya̍ ni̍.

¹⁵Wāŋnda̍ I̍sɔ̄lūɛ̄ī, I̍ cho̍ tōsā mī lā wa̍ mɛ̄ɛ̍ nyɛ̄ sɛ̄nɛ̄ī lūāā ŋ̄wi̍tīi̍yo̍ ō wā nu̍a̍ā a̍ chīŋūŋ sɛ̄ɛ̄mbīa̍ŋ ta̍u̍ ta̍u̍ yɛ̍. Lā kēēkū ni̍ŋ o̍ pēmbo᷄ŋ chōo̍, mī lā tɛ̄ɛ̄mbu̍u̍ mu̍ŋ. Pēmbūŋ pɔ̄mbɔ᷄ŋ kpo̍u̍ lā chō tōsā mī ŋ̄ yɔ̄nu̍ŋ mɛ̄ɛ̍ tɛ̄fɛ̍la̍ŋ lā wā nu̍a̍ā yɛ̍.

¹⁶Lā chō mu̍ŋ hūnɔ̄ɔ̄ wūū o̍ hūēīye̍ ni᷄ŋ, ndu̍yɛ̍ mī hūēīye̍ ī hu᷄ŋ hi̍o̍ū a̍ mu̍ŋ. Hūēīyīī fēlēŋfēle̍ŋnde̍ ī chō mu̍ŋ hūnɔ̄ɔ̄ sāŋɔ̄ɔ̄. O̍ ko̍ŋ, mī ya̍ Mɛ̄lɛ̄ka̍ nyāa̍ tōsa̍ mī lā dɔ̄ɔ̄nu᷄ŋ nya̍a̍le̍, o̍ ko̍ŋ kɔ̍ɔ̍lī, mī lā sāŋga̍la̍ ya̍ Mɛ̄lɛ̄ka̍ dīāndāa̍, Mɛ̄lɛ̄ka̍ I̍sɔ̄lūɛ̍i̍ya̍.

¹⁷“Wānāā tāmbɛ̍i̍ya̍, a̍ wānāā bāhāvɛ̍i̍ya̍, kōlɔ̄ɔ̍ bīī nda̍ ni̍ŋ, ma̍ wā mɛ̄ŋnda̍ŋ nūūwāa̍, kɛ̍ ā se̍e̍lūŋ ni̍ŋ ma̍ŋ te̍. Bo̍lōla̍ŋ lā chō nda̍ wā lā vēsɛ̍i̍ sɛ̍ɛ̍ŋ a̍ kōlɔ̄ɔ̄ īyēēma̍a̍, ā sɔ̍lā ni̍ŋ ma̍mɛ̍ŋ te̍. Kɛ̍ ya̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ pīɛ̄īlē ndāle̍ŋ mūlī. Ya̍ Mɛ̄lɛ̄ka̍ I̍sɔ̄lūɛ̍i̍ya̍ I̍ me᷅l nda̍ le̍.

¹⁸I̍ cho̍ tōsā mī mɛ̄ŋnda̍ŋ mā pīɔ̍l o̍ pēmbūŋ vēsɛ̍i̍yo̍ŋ le̍ nda̍, ndu̍yɛ̍ mī to̍sa̍ mī pēēla̍ pɔ̍mbɔ̄la̍ŋ lā tīu̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ. I̍ cho̍ tōsā mī so̍o̍ŋnda̍ māmɛ̄ŋnda̍ŋ lā tīu̍ o̍ lɛ̄ŋndē po̍lte̍ŋ ni᷄ŋ si̍lɔ̍, ndu̍yɛ̍ mī to̍sa̍ mī lɛ̄ŋndē vēsɛ̍i̍le̍ŋ lē sīmnu᷄ŋ fo̍ndāŋ pēēla̍ pɔ̍mbɔ̄.

¹⁹I̍ cho̍ tōsā mī yɔ̄mīī si̍dāāve̍, a̍ yɔ̄mīī āke̍e̍sīāāve̍, a̍ yɔ̄mīī ma̍tɔ̄ɔ̄ve̍, a̍ yɔ̄mīī ɔ̄li̍fīi̍ve̍ ī vīl o̍ lɛ̄ŋndē po̍lte̍ŋ ni᷄ŋ. I̍ cho̍ yɔ̄mīī pa᷅ŋnde̍, a̍ yɔ̄mīī chu̍ni̍pāve̍, a̍ yɔ̄mīī sa̍i̍pu̍lūɛ̄ɛ̄ve̍ dɔ̄wɔ̄ɔ̄ nāa̍ pi᷅lɛ̍ o̍ lɛ̄ŋndē po̍lte̍ŋ ni᷄ŋ.

²⁰Wāŋnda̍ chō sɔ̄ɔ̍ŋ mu᷅ŋ chɔ̄ mā sɔ̄la̍ sīnā pɛ̄ŋgo̍o̍. Ā chō īchāli̍ mā yīya̍ŋ nyɛ᷅ kɛ̄ndɛ̄ kɛ̍ndɛ̄ a̍ mu̍ŋ o̍kɔ̄ɔ̄, mā sīna̍ māā ya̍ Mɛ̄lɛ̄ka̍ Ya̍a̍wɛ̄ɛ̄, kpāāya̍ nūu̍ to̍sa̍ mu̍ŋ ni̍, māā I̍sɔ̄lūɛ̍i̍ya̍, Mɛ̄lɛ̄ka̍ ndā di̍a̍ndāa̍ to̍sa̍ sɔ̄ɔ̍ŋ mu᷅ŋ ni̍.”

²¹Mɛ̄lɛ̄ka̍ Ya̍a̍wɛ̄ɛ̄, o̍ cho̍ māsā bɛ̍ndōo̍ le̍ yu̍ŋgo̍o̍ I̍sɔ̄lūɛ̄ī yo̍, ō dīmi̍ āā, “Lā hu᷄ŋ a̍ sūɛ̍i̍ nyɛ̄i̍ o̍ fo̍ndāŋ kɔ̍ɔ̍sɔ̍ɔ̍. Lā hu᷄ŋ ti̍mbī sūɛ̍i̍ nyɛ̄i̍, mī lā chɔ᷄m fūlā kɔ̄ɔ̄līo̍o̍.

²²Nya̍ mɛ̄lɛ̄ka̍a̍ ha̍ā, lā hu᷄ŋ a̍ sūɛ̍i̍ nyɛ̄i̍, ndu̍yɛ̍ mī lā chɔ᷄m na̍a̍ nyɛ̍ nɔ̍ le̍ yɔ̄nɔ᷄ŋndo̍ wo̍. Lā chɔ᷄m na̍a̍ sɔ̍ɔ̍ŋ nya̍ dīmi̍ ni᷅ŋ o̍ pāāndōo̍ ni᷄ŋ mi̍ ŋ̄ yɔ̄nu᷄ŋ ndo̍ŋ. Tē lā dīmu̍l na̍a̍ pɛ̍, ŋ̄ yīya̍ŋ a̍ mu̍ŋ o̍kɔ̄ɔ̄. Ɔ̄ɔ̄ lā chɔ᷄m ndɔ̍ na̍a̍ sɔ̄ɔ̍ŋ nɔ̍ le̍ yɔ̄nɔ᷄ŋndo̍ o̍ sīɔ̄dīi̍ lāchīo̍o̍ ni᷄ŋ ndo̍ŋ.

²³Lā chɔ᷄m ndɔ̍ na̍a̍ nyɛ̍ nɔ̍ le̍ hūnɔ̄ɔ̍ yɔ̄nɔ᷄ŋndo̍ o̍ sīɔ̄dīi̍ lāchīo̍o̍ ni᷄ŋ ndo̍. Tē ō yɔ̄nu̍ŋ dɔ̍ɔ̍ pɛ̍ mɛ̄ɛ̍ nya̍ dīmi̍ yɛ̍, ŋ̄ sīna̍ dɔ̍ɔ̍ māā mɛ̄lɛ̄ka̍a̍ lēkɛ̍ndɛ̍ī nya̍ chō ni̍. Lā tōsa̍ wɔ̍ i̍sɔ̍ɔ̍, ō wa̍ su̍ɛ̍i̍ kɛ̍ndɛ̍ ō wa̍ su̍ɛ̍i̍ wɔ̍ɔ̍ŋ, i̍ to̍sā mī kɔ̄lta̍ŋ lā hīīlu̍ŋ na̍a̍, mī sīōōŋīī bɛ̄ndūe̍i̍ ī bīī na̍a̍ ve̍.

²⁴Nya̍ mɛ̄lɛ̄ka̍a̍ ha̍ā, nyɛ̄ fo̍ndō fu̍u̍ nya̍ chō ni̍. Lā nɔ̍lā mī lā tōsa̍ nyɛ̄ o̍ nyɛ̄ le̍. Ndu̍yɛ̍ wānāa̍ cho̍ nya̍ sōōlūūwo̍ wa̍ ki̍nɛ̍i̍, I̍ tu̍l nda̍ yɛ̄le̍ŋ.

²⁵“I̍ to̍sa̍ mi̍ wāna̍ cho̍ bā lūāŋndo̍ wo̍ ō yūsā kɔ̄llo̍, le̍ hūnɔ̄ɔ̍ sɔ̍ŋgɔ̍ɔ̍ a̍ lɛ̄ŋnde̍. I̍ hɛ̍li̍ wāna̍ cho̍ ko̍ŋ ba᷅ pāa̍le̍ŋ lē chāŋndo̍ wo̍, le̍ mbō hu᷄ŋ sɔ̍ŋgā a̍ lɛ̄ŋnde̍. Ndu̍yɛ̍ wānā ka̍lāa̍, ō kē ya̍ ni̍ŋ bɛ̍ɛ̄le̍ŋ. Ō hūŋ ni̍ŋ mbō hu᷄ŋ yo᷅m wānāa̍ cho̍ lɛ̄ŋnde̍ chīla̍ŋnda̍, mbo̍ fūli̍ nda̍ māā lōōlī, mɛ̄ɛ̍ wānā chu̍a̍u̍wāā ŋ̄kpɛ̍ɛ̍nɔ̍ɔ̍ ō nīɔ̄ū nu̍a̍ā pūūlōo̍ le̍ kpɛ̍ɛ̍nɔ̍ŋ chɔ̄ūwɔ̄ɔ̍ yɛ̍.

²⁶Nya̍ mɛ̄lɛ̄ka̍a̍ ha̍ā ki̍nɛ̍i̍, o̍ kāndɔ᷄ŋndo̍ bɛ̍ɛ̍ ō nɛ̄ɛ̍nɛ̍ nɔ̍la̍ yɛ̄, mbo̍ dīmūl wāŋnda̍ māā sūɛ̍i̍ wa̍ā nu̍a̍ā ī chō yɔ̄nɔ᷄ŋ? Ō nɛ̄ɛ̍nɛ̍ di̍mu̍l lɛ̄ wāŋnda̍ māā sɔ̄ɔ̍ŋ wa̍ā nu̍a̍ā ŋ̄ chō hūnɔ̄ɔ̄ yɔ̄nɔ᷄ŋ o̍ sīɔ̄dīi̍ lāchīo̍o̍ ni᷄ŋ? Nya̍ ki̍nɛ̍i̍, wānā o̍ wānā chɛ̍l ndi̍ māā ī chō tōnya̍ le̍. Ŋ̄ tūi̍ mī wānā o̍ wānā di̍mi̍ a̍ ndi̍ o̍kɔ̄ɔ̄ le̍.

²⁷Ya̍ Mɛ̄lɛ̄ka̍ Ya̍a̍wɛ̄ɛ̄, ya̍ wa̍ wāna̍ tāso̍o̍ le̍ wāŋnda̍ Sa̍a̍yɔ̍ŋ yōōŋgōo̍ ho̍ō dīmūllo̍ ni̍. Mi̍ vi̍ām ki̍i̍la̍nɔ̍ɔ̍ Chūlu̍sɛ̄lɛ̄m, mi̍ di̍mu̍l wāŋnda̍ Chūlu̍sɛ̄lɛ̄m ma̍a̍, Wānāā nyāa̍ ā chō hūnɔ̄ɔ̍, ā chō mīīŋgōo̍ o̍ nda̍lo̍ chi̍e̍e̍.

²⁸I̍ mɛ̍ɛ̍nda̍ŋ mɛ̍lɛ̄ka̍a̍ tɛ̄ɛ̄ŋ ki̍nɛ̍i̍, ō pīlɛ̍ bɛ̍ɛ̍ cho̍ mbō mūli̍ nyūnā o̍ nyūnā le̍. Ō pīlɛ̍ bɛ̍ɛ̍ cho̍ mbō yɔ̄ŋgu̍ sīlā le̍. Ō pīlɛ̍ bɛ̍ɛ̍ nɔ̍lā mbō mūli̍ nyūūnīāālā nīla̍ŋ te̍.

²⁹Mī di̍mu̍l nya̍ wāŋnda̍ I̍sɔ̄lūɛ̄ī, mɛ̄lɛ̄ka̍a̍ ha̍ā ki̍nɛ̍i̍, mɛ̄lɛ̄ka̍a̍ fo̍ndūa̍a̍ fu̍u̍ nda̍ chō ni̍. Ā nɔ̍lā mā tōsa̍ nyɛ̄ o̍ nyɛ̄ le̍. Nyɛ̄ o̍ nyɛ̄ wāŋnda̍ sīmi̍ māā mɛ̄lɛ̄ka̍ā ndā, nyɛ̄ fo̍ndō fu̍u̍ o̍ cho̍ ni̍, mɛ̄ɛ̍ hūēīye̍ ī chō nu̍a̍ā yɛ̄.”