Read Southern Kisi Āīsa̍yā 42 Bible Online

Āīsa̍yā 42 - Southern Kisi bible

Āīsa̍yā 42

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Bu̍ɛ̍ī nūu̍ cho̍ ho̍ō ni̍, ō ya̍ I̍ cho̍ pāālē ndɔ̄le̍ kɔ̍ɔ̍lī le̍ŋ ndo̍. Ndu̍ ya̍ I̍ hɛ̍li̍ ni̍, ndu̍yɛ̍ I̍ hi̍ni̍ kɔ̄l a̍ ndu̍. I̍ to̍sa̍ mi̍ nyi̍nā nūu̍ ō tūāl ndu̍ kɔ̄ɔ̄lī, ndu̍yɛ̍ ō tōsā ni̍ŋ mī sa̍kpōyɛ̍i̍ ī tīu̍ o̍ lɛ̄ŋnde̍ ni᷄ŋ kpo̍u̍ o̍ chi̍e̍ēŋndo̍ chōo̍.

²Ō ve᷅ ni̍ŋ wa᷅na̍ si̍m o̍ nɛ̄īla̍ bɛ̍ndū chōo̍ mbō yōnda̍, ɔ̄ɔ̄ mbō dēŋi̍, ɔ̄ɔ̄ mbō sōō chōo̍ cho̍o̍ kpe̍le̍ŋ te̍.

³Ndu̍yɛ̍ ā yɔ᷄ŋ bɛ̍ɛ̍ āā bīlte̍ na̍ŋgu̍ŋ ni᷅ŋ le̍ kēndi᷄ŋndo̍ le̍ŋ ni̍, ō ke̍ndī le̍ŋ ni̍ŋ te̍, kɛ̄lɛ̄ŋgāā ni᷅ŋ te̍, mbō nyūmi̍ yīŋnde̍ hi᷅ŋ ni᷅ŋ le̍ nyūmndo̍ le̍ŋ. Ō wā ni̍ŋ wa᷅na̍ cho̍ sa̍kpō, ndu̍yɛ̍ mbō tōsa̍ mī sa̍kpōyɛ̍i̍ ī wa̍ wāŋnda̍ tɛ̄ɛ̄ŋ.

⁴Ō ve᷅ ni̍ŋ wa᷅na̍ de̍ma̍ le̍, kɛ̄lɛ̄ŋgāā ni᷅ŋ te̍ mbō tāmbu̍ kɔ̄l mbō ma᷄l, ha̍a̍a̍ mbō lo̍ o̍ ko̍ŋ, mbō tōsa̍ mī sa̍kpōyɛ̍i̍ ī tīu̍ o̍ chi̍e̍ēŋndo̍ chōo̍. Ndu̍yɛ̍ lɛ̄ŋīi̍ ho̍lnu̍ŋ pe̍e̍ mɛ̄ŋmā īhɛ᷄llo̍ ve̍, ī wā ni̍ŋ chu᷅mndo̍ le̍ pɛ̄ɛ̄kūlā ndɔ̄la̍ŋ.”

⁵Mɛ̄lɛ̄ka̍ to̍o̍si̍a̍a̍ ha̍la̍a̍ a̍ nyɛ̄ o̍ nyɛ̍ cho̍ chōo̍ cho̍o̍ ni̍, mbo̍ pɛ̄ŋgɛ̄lā ndu̍ le̍nde̍. Ndu̍ pɛ̍ŋgɛ̍la̍ chi̍e̍ēŋndo̍ ho̍ō a̍ nyɛ̄ o̍ nyɛ̍ cho̍ lēni᷄ŋ ni̍. Ndu̍ ke̍ wāŋndā chīe̍e̍ya̍ o̍ chi̍e̍ēŋndo̍ ni᷄ŋ kpe̍de̍ yo̍o̍mōo̍ ni̍. Wānā o̍ wāna̍ cho̍ bālɔ̄ɔ̍ o̍ chi̍e̍ēŋndo̍ chōo̍, ndu̍ dɔ̍ū nda̍ yōōmōo̍ o̍ mīli̍ŋ ni̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ kōŋ, o̍ di̍mu̍l bu̍ɛ̍ī ndɔ̄ɔ̍ āā,

⁶“Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, ya̍ ve̍e̍lu̍ nu̍m ni̍ le̍ mā hīŋ a̍ sa̍kpōyɛ̍i̍ wāŋnda̍ tɛ̄ɛ̄ŋ. I̍ ke̍ nu̍m kpāāyāa̍, ndu̍yɛ̍ mi̍ wa᷅ nu̍m māndāa̍. Nu᷄m cho̍ wā tāāmāsi̍o̍o̍ ni̍ le̍ kpe̍ma̍ ya̍ I̍ yi̍i̍ a̍ wāŋnda̍ wo̍. Nu᷄m cho̍ nyɛ̄ wa̍wo̍ŋ di̍a̍ndū ni̍ŋ le̍ lɛ̄ŋnde̍ kpo̍u̍ wo̍ ni̍.

⁷Nu᷄m to̍sā ni̍ŋ ni̍ mī wānāā sūmɛ̍i̍ya̍ ā chē, wānāa̍ cho̍ o̍ chīɛ̄ī mānyūmndo̍ ni᷄ŋ nda̍, mā to̍sa̍ mā sɔ̄la̍ bāŋa᷄ŋndo̍, mā so̍li̍ nda̍ o̍ nyūmmā māŋ ni᷄ŋ.

⁸“Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Dīōlā nīla̍ŋ la̍ cho̍ la̍ŋ ni̍. I̍ pi̍ɔ̍ūwa᷅ŋ na̍ŋɔ̄ɔ̍ cho̍ le̍ ya̍ wo̍ a̍ wānā o̍ wānā le̍. Sāŋgālā wāŋndā chīe̍e̍ya̍ ā nɔ̄ mā ke̍ ya̍ wo̍, I̍ chɛ᷅l, mā ke᷄ mɛ̄lɛ̄ka̍a̍ chēle̍ŋnda̍ sāŋgālā kōŋ te̍.

⁹Nyɛ̄ o̍ nyɛ̄ ya̍ i̍i̍ di̍mu̍l nya̍ māā ō chō yɔ̄nɔ᷄ŋ, ō chūū yɔ̄nɔ᷄ŋ. Sɔ̄ɔ̍ŋ sɛ̍nɛ̍ŋ nɔ̍ le̍ yɔ̄nɔ᷄ŋndo̍ wo̍ŋ, mu̍ŋ ya̍ I̍ cho̍ nya̍ mu᷅ŋ vɛ̄lɛ̄ dīmūllo̍ ni̍. I̍ cho̍ nya̍ mu̍ŋ pɔ̍ɔ̍ dīmūl, lɔ̍ɔ̍pa̍ mī ŋ̄ hu᷄ŋ yɔ̄nu᷄ŋ.”

¹⁰Lā sōlu̍l Mɛ̄lɛ̄ka̍ Ya̍a̍wɛ̄ɛ̄ chōndu̍ŋ sɛ̍nɛ̄īyo̍ŋ. Lā sāŋga̍la̍ ndu̍ o̍ chōndo̍ŋ ni᷄ŋ o̍ chi̍e̍ēŋndo̍ ni᷄ŋ kpo̍u̍. Nya̍ ku̍ā o̍ Pēe̍ Mɛ̄ŋmā Īhɛ᷄llo̍ chōo̍ wa̍, a̍ nya̍ nyɛ̄ o̍ nyɛ̄ yōōmāa̍ cho̍ o̍ Pēe̍ Mɛ̄ŋmā Īhɛ᷄llo̍ ni̍ŋ, lā sāŋga̍la̍ ndu̍. Nya̍ lɛ̄ŋīi̍ ho̍lnu̍ŋ pe̍e̍ mɛ̄ŋmā īhɛ᷄llo̍ ve̍, a̍ wānā o̍ wāna̍ cho̍ o̍ lɛ̄ŋīī kēŋ ni᷄ŋ, lā sāŋga̍la̍ ndu̍ o̍ chōndo̍ŋ ni᷄ŋ.

¹¹Wāŋnda̍ o̍ lɛ̄ŋīī po̍lle̍ ni᷄ŋ, a̍ o̍ chi̍o̍o̍ŋ kpo̍u̍ o̍ lɛ̄ŋīī kēŋ ni᷄ŋ, lā sāŋga̍la̍ ndu̍. Wāŋnda̍ o̍ sɔ̄ndɔ̄kɔ̍lta̍ŋ Kɛ̍dāā kpo̍u̍, lā sōli̍ cho̍ndu̍ŋ nya̍a̍lo̍ŋ le̍ ndu̍ sāŋgālāa̍. Wānāa̍ cho̍ Sɛ̍lā chi̍e̍e̍ wa̍ lā sōli̍ cho̍ndu̍ŋ kɔ̄l kɛ̄ndɔ̍ŋ le̍ ndu̍ sāŋgālāa̍. Lā he᷄l o̍ pēmbūŋ bɛ̄ndo̍ŋ tūllo̍ mī lā sōli̍ chōndo̍ŋ chōo̍ cho̍o̍.

¹²Lā līsa̍ Mɛ̄lɛ̄ka̍ Ya̍a̍wɛ̄ɛ̄ le̍ nāŋɔ̄ɔ̄ ndɔ̄ bɛ̍ndo̍o̍. Wānāa̍ cho̍ o̍ lɛ̄ŋīi̍ ho̍lnu̍ŋ pe̍e̍ mɛ̄ŋmā īhɛ᷄llo̍ ve̍ ni᷄ŋ nda̍, lā sāŋga̍la̍ Mɛ̄lɛ̄ka̍.

¹³Mɛ̄lɛ̄ka̍ Ya̍a̍wɛ̄ɛ̄ o̍ cho̍ ya̍a̍mɔ̍ɔ̍wa̍a̍ ndūa̍a̍ fūlālāl le̍ sɔ̍ŋgɔ̍ɔ̍, mɛ̄ɛ̍ ku̍u̍ba̍nɔ̍ chɔ̄ūwo̍ ō fūlā nu̍a̍ā o̍ dōvīa̍ŋ le̍ sɔ̍ŋgɔ̍ɔ̍ yɛ̍. Ō chō ō bɛ̄ɛ̄ndīa̍ŋ nyɛ̍ kɛ̄ndɛ̄ kɛ̍ndɛ̄, ndu̍yɛ̍ mbo̍ wā a̍ yēēmɛ̍i̍ kpe̍e̍kpe̍i̍ le̍ sɔ̍ŋgɔ̍ɔ̍. Ō chō dēŋī chōo̍ cho̍o̍ kpe̍le̍ŋ de̍ŋī chɔ̄ūwo̍. Ō chō kpāāya̍ ndɔ̄ bɛ̍ndōo̍ chɔ̄m a̍ mɛ̄ɛ̍ o̍ chi᷅ŋa̍la᷅ŋ ni̍ŋ ya̍a̍mɔ̍ɔ̍wa̍a̍ ndūa̍a̍ yɛ̍.

¹⁴Mɛ̄lɛ̄ka̍ dīmi̍ āā, “Le̍ te̍le̍ŋ vi̍lɛ̄ī I̍ wa̍ ō mēīyāā kpi᷅li̍. Mi̍ me̍ī do̍ŋ, I̍ mu̍li̍ wa̍nā o̍ wānā di̍ōm te̍, kɛ̍ I̍ hi᷅ŋ ni᷅ŋ īsɔ̄ɔ̍ to̍sā. I̍ cho̍ cha᷄ŋ. Mɛ̄ɛ̍ pūli̍i̍ vi̍a̍lɛ̄i̍ ī wā nu̍a̍ā wāna̍ yo᷄llo̍ nɛ̄īyo̍ mbō wa̍ cha᷄ŋndo̍, mbō nyūūmbūŋ a̍ nyɛ̄ nɛ̄īyāa̍ yɛ̍, le̍nde̍ ya̍ I̍ cha᷅ŋ ni̍ŋ ni̍.

¹⁵I̍ cho̍ pēmbūŋ bɛ̄ndo᷄ŋ, a̍ pēmbūŋ pɔ̄mbɔ᷄ŋ kpo̍u̍ tɛ̍ɛ̍mbūū, ndu̍yɛ̍ nyɛ̄ o̍ nyɛ̍ cho̍ o̍ pēmbūŋ mu᷅ŋ chōo̍, bīl ni̍, yɔ̄m ni̍, kpo̍u̍, mī to̍sa̍ mbō vēsa̍. I̍ cho̍ hūŋnda̍ŋ vēēsīāā, mī lā sīmnu᷄ŋ lɛ᷅ŋndē vēsɛ̍i̍ le̍ŋ.

¹⁶“Wānāā nīa̍a̍ cho̍ ha̍ā ā sūmɛ̍i̍ya̍, I̍ cho̍ kēēkū a̍ nda̍ a̍ nɛ̄i̍ nda̍ si̍nā bɛ̍ɛ̍ le̍ wo̍, mī mi̍i̍ŋgu̍ a̍ nda̍. Nɛ̄i̍ nda̍ kēēku̍ wɔ̍ bɛ̍ɛ̍ pa̍a̍ndū le̍ wo̍, a̍ nɛ̄ī ko̍ŋ ya̍ I̍ ke̍e̍kū ni̍ŋ a̍ nda̍ ni̍, mī chɔ̍m nda̍ nɛ̄īyo̍. I̍ cho̍ nyūmmā nda̍ chō lēni᷄ŋ nda̍ŋ sīīŋgūū nyɛ᷅ wa̍wo̍ŋ. Ndu̍yɛ̍ fo̍ndāŋndā wɔ̄ɔ̍ŋnda̍ cho̍ nda̍ lāchī la̍ŋ, mī bɛ̍ɛ̍ndi̍a̍a̍ la̍ŋ nyɛ̄ kɛ̄ndɛ̄ tɛ̍lɛ̍lɛ̍. Sɔ̄ɔ̍ŋ mu᷅ŋ ki̍nɛ̍i̍ ya̍ I̍ chu̍e̍l nda̍ būŋgɛ̄i̍ ni̍, le̍ mī to̍sa̍l nda̍ mu̍ŋ. I̍ me᷅l ni̍ŋ nda̍ le̍.

¹⁷Kɛ̍ wānāa̍ dɔ̍ū tīīnda᷄ŋndo̍ o̍ nyɛ̄m nda̍ tōōsi̍a̍a̍ māā mɛ̄lɛ̄ka̍ā ndā wo̍ŋ ni᷄ŋ nda̍ ki̍nɛ̍i̍, a̍ chu̍a̍ nyɛ̄m mu᷅ŋ māā Mɛ̄lɛ̄ka̍a̍ wa̍, ā chō hūnɔ̄ɔ̄ wā ā kɛ̄yāā, ndu̍yɛ̍ mī si̍ɔ̍mbu̍la̍ bɛ̄ndūla̍ŋ lā bīī nda̍.”

¹⁸Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Nya̍ wānāā nīlā bāŋu̍lɛ̍i̍ya̍ ha̍ā, lā ya᷄ŋ ya̍ nīla̍ŋ. Nya̍ wānāā sūmɛ̍i̍ya̍ lā tōfa̍ nyɛ᷅ kɛ̄ndɛ̍ī mī lā chē.

¹⁹I̍ chi̍ wɔ̍ wa᷅ŋndo̍ mbō sūma̍ māā I̍sɔ̄lūɛ̄ī bu̍ɛ̍ī nī le̍. I̍ chi̍ wɔ̍ wa᷅na̍ nīlā bāŋu̍lɛ̍i̍ māā ki̍i̍la̍nɔ̍ ni̍ ya̍ I̍ ve᷅m ndo̍ le̍. Wāŋndo̍ sūma̍ wɔ̍ mbō sūla᷅ŋ māā wāna̍ yɔ̍ŋgu̍ŋ ho̍ō o̍ ya̍ lo̍ wo̍ le̍. I̍ chi̍ wɔ̍ wa᷅ŋndo̍ mbō sūma̍ māā bu̍ɛ̍i̍ ya̍ Mɛ̄lɛ̄ka̍ Ya̍a̍wɛ̄ɛ̄ wo̍ le̍.

²⁰Ō chē sɔ̄ɔ̍ŋ fa̍ŋā, kɛ̍ ō sīna̍ mu̍ŋ pɛ̄ŋgu̍ le̍, ō nɔ̄ nīla̍ŋ le̍ tūēīyɔ̄ɔ̍ kɛ̍ ō tu̍i̍ī le̍.”

²¹Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ tōnya̍a̍ o̍ cho̍ ni̍. Le̍ he̍ī, mbo̍ tōsā mi̍ sāwāla̍ ndɔ̄la̍ŋ lā wā sāwāla̍ kpāāyā bɛ̍ndū, ndu̍yɛ̍ mi̍ lā wā sāwāla̍ kɛ̍ndɛ̄ bɛ̄ndū.

²²Kɛ̍ mi̍ ya̍a̍mɔ̍ɔ̍wa̍ ā hu᷄ŋ de᷅l wānāā ndūa̍a̍ chōo̍ ma̍ pūŋgā nyɛ̄m ndāa̍ŋ kpo̍u̍. Ma̍ bīu̍ wānāā ndūa̍a̍ kpo̍u̍ ma̍ dūāū nda̍ o̍ so̍o̍ŋnda̍ŋ ni̍ŋ ma̍ kīīndīāā nda̍ lo̍ŋ. Ma̍ vīŋī nda̍ o̍ chīɛ̄īlā mānyūmnda̍ŋ ni᷄ŋ. Ndu̍yɛ̍ wānā o̍ wānā ve̍ mbō chīīndi̍a̍a̍ nda̍ mbō sōli̍ nda̍ ya̍a̍mɔ̍ɔ̍wa̍a̍ ka̍ŋ o̍ bā le̍. Nyɛ̄ o̍ nyɛ̄ nda̍ nɔ̄, mi̍ ya̍a̍mɔ̍ɔ̍wa̍ pūŋgā mu̍ŋ kpo̍u̍, ā sɔ̄la̍ wa̍nā o̍ wānā mbō māla̍ nda̍ mbō chīīndi̍a̍a̍ nyɛ̄m ndāa̍ŋ ya̍a̍mɔ̍ɔ̍wa̍ o̍ bā le̍.

²³Wāŋnda̍ I̍sɔ̄lūɛ̄ī, nya̍ tɛ̄ɛ̄ŋ ki̍nɛ̍i̍, ō nɛ̄ɛ̍nɛ̍ o̍ ya᷅ŋ yɛ̍ ya̍ ni᷅ŋ nīla̍ŋ mbō tūēī nyɛ̄ ya̍ I̍ cho̍ dīmīo̍o̍ wo̍? Ō nɛ̄ɛ̍nɛ̍ nɔ̍lā yɛ̍ ni᷅ŋ mbō ya᷄ŋ nīla̍ŋ nyɛ̄ kɛ̄ndɛ̍ī, le̍ mbō tūēī nyɛ̍ nɔ̍ le̍ yɔ̄nɔ᷄ŋndo̍ o̍ sīɔ̄dīi̍ lāchīo̍o̍ ni᷄ŋ ndo̍?

²⁴Ō nɛ̄ɛ̍nɛ̍ ma̍l lɛ̄ yu̍ŋgu̍ Che̍kɔ̍pū wo̍ wānāā tɛ̍ɛ̍mbāa̍ o̍ bā? Ō nɛ̄ɛ̍nɛ̍ to̍sa̍ yɛ̄ mi̍ ya̍a̍mɔ̍ɔ̍wa̍ hu᷄ŋ pu̍ŋgā I̍sɔ̄lūɛ̄ī? Mɛ̄lɛ̄ka̍ Ya̍a̍wɛ̄ɛ̄ chɛ̍l ni̍, mi̍ he̍ī ī yɔ̄nu᷄ŋ, fo̍ndōle̍, le̍ mɛ̄ɛ̍ na̍a̍ ŋ̄ tōsa̍ yɔ̄ŋ wɔ̄ɔ̍ŋndo̍ a̍ ndu̍ yɛ̍. Nɛ̄i̍ o̍ ye̍e̍ma̍ na̍a̍ mī ŋ̄ wa̍ lēcho̍ō wo̍, ŋ̄ chɛ᷄l mī ŋ̄ kūɛ̄ lēcho̍ō le̍. Sāwāla̍ ndɔ̄la̍ŋ mi̍ ŋ̄ kɛ̄ɛ̄ le̍ la̍ŋ chūa̍a̍.

²⁵Nyɛ̄ ko̍ŋ to̍sa̍ ni̍ mbo̍ dūāūnu᷄ŋ tu̍mbe̍ a̍ na̍a̍ o̍ kālā ka̍lā, mbo̍ tōsā mi̍ chɔ̄ūlā wɔ̄ɔ̍ŋ wɔ̍ɔ̍ŋnda̍ŋ lā kōmāl na̍a̍. Tu̍mbe̍ ndɔ̄ɔ̍, mɛ̄ɛ̍ yīŋnde̍ŋ lē nɛ̄ī nu̍a̍ā yɛ̍, le̍nde̍ o̍ wa̍ ni̍, ndu̍yɛ̍ mbo̍ pɛ̄ŋgɛ̄la᷄ŋ lɛ᷅ŋndē I̍sɔ̄lūɛ̍i̍le̍ŋ chōo̍ kpo̍u̍, mɛ̄ɛ̍ yīŋnde̍ŋ lē kūā nu̍a̍ā a̍ pɛ̄ŋgɛ̄la᷄ŋndo̍ yɛ̍. Kɛ̍ ŋ̄ sīna̍ ndi̍ bɛ̍ɛ̍ sa̍la̍ke̍lē le̍. A̍ nyɛ̍ yɔ̍nu̍ŋ ko̍ŋ ndo̍ kpo̍u̍, ŋ̄ chūe̍ ndi̍ bɛ̍ɛ̍ māā īsɔ̄ɔ̍ le̍.