Read Southern Kisi Āīsa̍yā 43 Bible Online

Āīsa̍yā 43 - Southern Kisi bible

Āīsa̍yā 43

¹Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nya̍ yu̍ŋgu̍ Che̍kɔ̍pū wo̍ wo̍ ndu̍ cho̍ ho̍ō ni̍, wāna̍ to̍o̍si̍a̍a̍ nya̍ wo̍, nya̍ yɔ̍nūŋ māā wāŋnda̍ I̍sɔ̄lūɛ̄ī. Ō dīmi̍ āā, “Lā yɔ᷅ŋ īsīōōŋ te̍, fo̍ndōle̍, I̍ chi̍i̍ nya̍ pīŋī. I̍ chi̍i̍ nya̍ vēēlū le̍ mī lā wa̍ wānāā ni̍. Ndu̍yɛ̍ le̍ ya̍ nya̍ chō ni᷅ŋ ni̍.

²Ā yɔ̍ŋ bɛ̍ɛ̍ mī lā kēēku̍ o̍ mɛ̄ŋmā yīŋgi̍lɛ̍i̍ya̍ŋ ni᷄ŋ, I̍ wa᷅ ni̍ŋ a̍ nya̍ lātūlu̍. Lā kēēku̍ bɛ̍ɛ̍ o̍ mɛ̄ŋnda̍ŋ ni᷄ŋ le̍ pēēla̍ŋ tāŋɔ̄ɔ̍, wānā pi᷅lɛ̍ bɛ̍ɛ̍ ō lo᷅ ni̍ŋ o̍ pēēlo̍ le̍. Lā kēēku̍ bɛ̍ɛ̍ o̍ yīŋnde̍ŋ ni᷄ŋ lā ŋu̍ē le̍, yīŋnde̍ŋ lē tɛ̍ɛ̍mbūū nya̍ le̍,

³kāni̍ fo̍ndōle̍, ya̍ Mɛ̄lɛ̄ka̍ Ya̍a̍wɛ̄ɛ̄, ya̍ cho̍ Mɛ̄lɛ̄ka̍ nyāa̍ ni̍, nya̍ I̍sɔ̄lūɛ̍i̍ya̍ Mɛ̄lɛ̄ka̍ nyā di̍a̍ndāa̍, o̍ pi̍ŋī nya̍ wo̍. I̍ cho̍ lɛ̄ŋndē I̍chi̍pīle̍ŋ mālɔ̄ɔ̄ ya̍a̍mɔ̍ɔ̍wa̍ o̍ bā, le̍ hāli̍ kpe̍ŋ mī pi̍ŋi̍ yōōmūlā nyāla̍ŋ. I̍ cho̍ lɛ̄ŋndē Īto̍o̍pīāāle̍ŋ, a̍ lɛ̄ŋndē Sɛ̍bāle̍ŋ mālɔ̄ɔ̄ ya̍a̍mɔ̍ɔ̍wa̍ o̍ bā sɔ̍ŋgɔ̍ nyāa̍.

⁴I̍ cho̍ wānāā chēle̍ŋ yɔ̄ŋgū sɔ̍ŋgɔ̍ nyāa̍, le̍ yōōmūlā nyāla̍ŋ pīŋīo̍o̍. I̍ cho̍ lɛ̄ŋīī chēle̍ŋ yɔ̄ŋgū sɔ̍ŋgɔ̍ ko̍ŋ, fo̍ndōle̍, lā chō wānāā kpe̍e̍kpe̍i̍ ya̍ o̍ hɔ̄l, I̍ nɔ̍ bɛ̄ɛ̄le̍ŋ le̍ nya̍, ndu̍yɛ̍ mi̍ ka̍a̍lā nya̍.

⁵Lā yɔ᷅ŋ īsīōōŋ te̍, fo̍ndōle̍, I̍ cho̍ a̍ nya̍ lātūlu̍. “Nya̍ ni̍, chūāūwāā nyāa̍ ni̍, I̍ so̍li̍ ni̍ŋ nya̍ o̍ bīyɔ̄ɔ̍ ni᷄ŋ ba᷅ pāa̍le̍ŋ lē chāŋndo̍, a̍ bā pāa̍le̍ŋ lē dēl lo̍, mī chu̍u̍ŋgi̍a̍a̍ nya̍ nāa̍ pi᷅lɛ̍, mī mi̍ŋgi̍ nya̍ o̍ lɛ̄ŋndē nyāle̍ŋ ni᷄ŋ.

⁶I̍ cho̍ wānāa̍ cho̍ bā lūāŋndo̍ wa̍ dīmūl ma̍a̍, lā ma᷄l wa̍nāā nīa̍a̍, o̍ ko̍ŋ kɔ̍ɔ̍lī, mī di̍mu̍l wānāa̍ cho̍ bā tōūwo̍ wa̍ ma̍a̍, lā ku̍u̍na᷄ŋ wa̍nāā nīa̍a̍ chōo̍ le̍. Lā sōli̍ pu̍a̍a̍ nīa̍a̍, a̍ chūāūwāā nīāā wa᷅ŋ lāāndūa̍a̍, nāa̍ nda̍ chō o̍ lɛ̄ŋīī lēvīlle̍ ni᷄ŋ, o̍ chi̍e̍ēŋndo̍ mɛ̄ɛ̄lu̍la̍ŋ pɔ̍ wa̍ mī lā hīŋ a̍ nda̍.

⁷Wānā o̍ wāna̍ cho̍ wāna̍ ni̍, ma̍ wā o̍ lɛ̄ŋnde̍ ni᷄ŋ, lā hu᷄ŋ a̍ nda̍ kpo̍u̍, nda̍ yɔ̍nūŋ ni̍ māā wānāā nīa̍a̍ ya̍ I̍ to̍o̍si̍a̍a̍ ha̍ā le̍ mā chɔ᷄m nāŋɔ̄ɔ̄ nī bɛ̍ndōo̍ wa̍, wānāā ya̍ I̍ tu̍u̍li̍a̍a̍ ha̍ā a̍ bālā nīla̍ŋ mi̍ to̍o̍sīāā nda̍ wa̍.”

⁸Mɛ̄lɛ̄ka̍ dīmi̍ āā, “Lā vēēlu̍ wa̍nāā nīa̍a̍ nāa̍ pi᷅lɛ̍, a̍ nɔ̍ ha̍ā hɔ̄lta̍ŋ kɛ̍ ā chi᷅ le̍ wa̍, a̍ nɔ̍ ha̍ā nīla̍ŋ kɛ̍ ā tu̍i̍ī le̍ wa̍.

⁹Lā dīmu̍l lɛ᷅ŋnde̍ kpo̍u̍ ī chūūŋgi̍āŋ na̍a̍ pi᷅lɛ̍. Lā dīmu̍l wa᷅ŋnda̍ kpo̍u̍ ā dɔ̄ɔ̄nu̍ŋ na̍a̍ pi᷅lɛ̍. Lɛ̄ŋnde̍ he̍ī ki̍nɛ̍i̍, lɛ̄ŋnde̍ kūɛ̍ɛ̍nɛ̍ nɔ̍la̍ yɛ̄ mi̍ lē dīmūl na̍a̍ sɔ̄ɔ̍ŋ wa̍ā lāchīo̍ŋ a̍ sɔ̄ɔ̍ŋ ya̍ I̍ cho̍ mu᷅ŋ dīmīo̍o̍ wo̍ŋ o̍kɔ̄ɔ̄? Lɛ̄ŋnde̍ kūɛ̍ɛ̍nɛ̍ nɔ̍la̍ yɛ̍ mi̍ lē chɔ̄m wāŋnda̍ sɔ̄ɔ̍ŋ yɔ̍nu̍ŋ pāāndū wo̍ŋ, lɔ̍ɔ̍pa̍ mi̍ ŋ̄ yɔ̄nu᷄ŋ? Ā hu᷄ŋ ndɔ̍ a̍ se̍īya̍ a̍ chɔ᷅m māā ā dīmu̍l wāŋnda̍ sɔ̄ɔ̍ŋ wa̍ā lāchīo̍ŋ a̍ sɔ̄ɔ̍ŋ mu᷅ŋ o̍kɔ̄ɔ̄ ma̍lāŋ ŋ̍ yɔ̍nūŋ nda̍. Ō nɛ̄ɛ̍nɛ̍ nɔ̍lā yɛ̍ mbō tɛ̄nda̍ se̍īle̍ŋ māā mi̍ nda̍ a̍a̍ di̍mī tōnya̍a̍?”

¹⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wāŋnda̍ I̍sɔ̄lūɛ̄ī, nya̍ cho̍ se̍i̍yāā nīa̍a̍ ni̍, ndu̍yɛ̍ nya̍ cho̍ bu̍ɛ̍i̍yāā nīa̍a̍ ya̍ I̍ hɛ̍li̍ wa̍ ni̍. I̍ hɛ̍li̍ nya̍ le̍ mī lā sīna̍ ya̍, ndu̍yɛ̍ mī lā lāāla̍ŋ a̍ ya̍, o̍ ko̍ŋ kɔ̍ɔ̍lī, mī lā sɔ̄la̍ sīnā pɛ̄ŋgo̍o̍ māā ya̍ pīlɛ̍ kpe̍ cho̍ Mɛ̄lɛ̄ka̍ ni̍. Ō fūla̍ o̍ ya̍ kɔ̍ɔ̍lī, mɛ̄lɛ̄ka̍ o̍ mɛ̄lɛ̄ka̍ kpe̍e̍kpe̍i̍ che᷅le̍ŋ ō cho̍ le̍, o̍ pāāndōo̍ ni᷄ŋ ni̍, a̍ sīɔ̄dīi̍yo̍ ni᷄ŋ bɛ̍ɛ̍.

¹¹“Ya̍ pīlɛ̍ kpe̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Ndu̍yɛ̍ ō fūla̍ o̍ ya̍ kɔ̍ɔ̍lī, mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ chi̍i̍ndīāā nya̍ wo̍ le̍.

¹²Lɔ̍ɔ̍pa̍ bɛ̍ɛ̍ mi̍ sɔ̄ɔ̍ŋ mu᷅ŋ ŋ̄ yɔ̄nu᷄ŋ, I̍ di̍mu̍l nya̍ fɛ̍lɛ̍ŋ a̍ mu̍ŋ o̍kɔ̄ɔ̄. I̍ chɔ̍m nya̍ fɛ̍lɛ̍ŋ nyɛ̍ wa̍ hūnɔ̄ɔ̄ yɔ̄nɔ᷄ŋndo̍ wo̍, ndu̍yɛ̍ mɛ̄ɛ̍ o̍ yɔ̍nu̍ŋ, mi̍ lo᷅ o̍ ko̍ŋ mi̍ chi̍i̍ndīāā nya̍. Ō cho̍ mɛ̄lɛ̄ka̍a̍ chēle̍ŋāa̍ cho̍ nya̍ tɛ̄ɛ̄ŋ nda̍ le̍ a̍ to̍sa̍ he̍ī le̍, ya̍ to̍sa̍ ni̍. Nya̍ cho̍ se̍i̍yāā nīa̍a̍ ni̍.

¹³Mi̍ Mɛ̍lɛ̄ka̍ hīāū lāchī a̍ sūɛ̍i̍ mbo̍ dīmī māā, ya̍ cho̍ Mɛ̄lɛ̄ka̍ ni̍, ndu̍yɛ̍ le̍ te̍le̍ŋ o̍ te̍le̍ŋ I̍ cho̍ wā Mɛ̄lɛ̄ka̍. Wānā o̍ wānā nɔ̍lā mbō sōli̍ wāŋnda̍ o̍ kpāāya̍ nūu̍ bɛ̄ŋgu̍ le̍. Tē I̍ to̍sa̍ īsɔ̄ɔ̍ o̍ īsɔ̄ɔ̍ pɛ̍, wānā o̍ wānā nɔ̍lā mbō fa̍ŋa̍ ndi̍ o̍ bā kōŋ chōo̍ le̍.”

¹⁴Mɛ̄lɛ̄ka̍ Ya̍a̍wɛ̄ɛ̄, I̍sɔ̄lūɛ̍i̍ya̍ Mɛ̄lɛ̄ka̍ ndā di̍a̍ndāa̍, o̍ cho̍ wānā na̍a̍ pīŋīa̍a̍ wo̍, nyɛ̄ ō dīmi̍ wo̍ cho̍ ho̍ō ni̍. Ō dīmi̍ āā, “Le̍ sa̍bū nyāa̍, I̍ cho̍ so̍vɛ̄i̍ya̍ vīōmɔ̄ɔ̄ mā kɔ̍ de᷅l Ba̍bi̍lɔ̄ŋ chōo̍, ndu̍yɛ̍ mī to̍sa̍ mā pēsi̍ pe̍si̍ dīōlā sāāsa̍ ndāa̍ kpo̍u̍. Bɔ̄ɔ̄lūū kɔ̄l kɛ̄ndɛ̄ bɛ̄ndu̍ su̍a̍ā Ba̍bi̍lɔ̄ŋ ndo̍, ō chō hūnɔ̄ɔ̄ sīmnɔ᷄ŋ cha̍ŋnda̍ īmɔ̍nɛ̍.

¹⁵Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, Mɛ̄lɛ̄ka̍ nyā di̍a̍ndāa̍. Ya̍ to̍o̍si̍a̍a̍ nya̍ ni̍ wāŋnda̍ I̍sɔ̄lūɛ̄ī, ndu̍yɛ̍ ya̍ cho̍ Māsa̍ nyā Bɛ̍ndōo̍ ni̍.”

¹⁶Mɛ̄lɛ̄ka̍ Ya̍a̍wɛ̄ɛ̍ pi̍ɔ̍u̍ sīndɛ̄ Pēe̍ Mɛ̄ŋmā Īhɛ᷄llo̍ tɛ̄ɛ̄ŋ ni̍, mbo̍ yāmbū nɛ̄īyo̍ o̍ mɛ̄ŋmā kpāāyāma̍ bɛ̄ndūa̍ŋ tɛ̄ɛ̄ŋ kpa̍la̍ŋ.

¹⁷O̍ ko̍ŋ kɔ̍ɔ̍lī, mbo̍ hūŋ a̍ so̍vɛ̄i̍ya̍ I̍chi̍pī, a̍ ku̍u̍ba̍a̍ ndāa̍ lātūlu̍, a̍ su̍a̍ā ndāa̍, ndu̍yɛ̍ a̍ nyɛ̄lā ndāla̍ chɔ̄ūlā su̍a̍ā ā nāŋ nda̍ŋ, mbo̍ hu᷄ŋ chi̍ī nda̍ o̍ pēēlo̍ lo̍ŋ. Lo̍ŋ nda̍ hu᷄ŋ lo᷅ o̍ pēēlo̍ ni̍, ā nɔ̄la̍ lɛ̍ mā fūla̍ le̍. Mi̍ yōōmūlā ndāla̍ŋ lā hu᷄ŋ nyu᷅m o̍ lēpīlɛ̍ ni᷄ŋ, mɛ̄ɛ̍ la̍mbūi̍yo̍ ō nyūm nu̍a̍ā yɛ̍.

¹⁸Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Lā pūɛ̄ɛ̄nu᷄ŋ a̍ sɔ̄ɔ̍ŋ pa̍a̍ndu᷄ŋ yɔ̍nu̍ŋ ndo̍ŋ. Lā yi̍ya̍ŋ ndɛ̍ a̍ sɔ̄ɔ̍ŋ pa̍a̍ndu᷄ŋ hi̍o̍ū wo̍ŋ te̍.

¹⁹Lā tōfa̍ ni᷅ŋ sūɛ̍i̍ sɛ̍nɛ̄ī chēle̍ŋ ya̍ I̍ cho̍ tōsā ve̍. Ndu̍yɛ̍ ī kāndu̍ŋ ni᷅ŋ bɛ̍ɛ̍. Bāā lā chi᷄ wɔ̍ le̍? I̍ cho̍ nɛ̄i̍ wāŋndā chīe̍e̍ya̍ ā kēīyo̍ yāmbɔ̄ɔ̄ o̍ lɛ̄ŋndē po̍lte̍ŋ ni᷄ŋ, ndu̍yɛ̍ mī to̍sa̍ mī lā sɔ̄la̍ pēēla̍ŋ o̍ lɛ̄ŋndē po̍lte̍ŋ ni᷄ŋ.

²⁰Vīsīāā yōndūa̍a̍ bɛ̍ɛ̍ ā kē ya̍ ni̍ŋ bɛ̍ɛ̄le̍ŋ. Tūŋāā yōndūa̍a̍, a̍ ɔ̍si̍lu̍i̍chīi̍ya̍[11] ā mēl lā ni̍ŋ ba̍li̍ka̍a̍, fo̍ndōle̍, le̍ mɛ̄ɛ̍ ya̍ I̍ to̍sā ni̍ŋ mī mɛ̄ŋnda̍ŋ mā wa̍ o̍ lɛ̄ŋndē po̍lte̍ŋ ni᷄ŋ yɛ̍, le̍ mɛ̄ɛ̍ ya̍ I̍ to̍sā ni̍ŋ mī pēēla̍ŋ lā wa̍ o̍ lɛ̄ŋndē vēsɛ̍i̍le̍ŋ bɛ̍ndūle̍ŋ ni᷄ŋ, le̍ mī wānāā nīa̍a̍ ya̍ I̍ hɛ̍li̍ wa̍ ā sɔ̄la̍ mɛ̄ŋmā kōla̍ŋ yɛ̍.

²¹Wānāā ya̍ I̍ to̍o̍si̍a̍a̍ le̍ mā wa̍ le̍ ya̍ wa̍ nda̍ chō ni̍. Ndu̍yɛ̍ ā sāŋgālā ni̍ŋ ya̍.”

²²Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Kɛ̍ nya̍ yu̍ŋgu̍ Che̍kɔ̍pū wo̍, ndu̍ yɔ̍nūŋ māā nya̍ wāŋnda̍ I̍sɔ̄lūɛ̄ī ni̍, mi̍ lā lō o̍ ko̍ŋ mi̍ lā sāŋgā a̍ ya̍. Mi̍ lā pɛ̄ŋgī ya̍ sōōlūūwo̍.

²³Lā hi᷄ŋ a̍ sāa̍ nyāa̍ nāa̍ mī lā sōli̍ nda̍ sa̍lālā lūāmāāla̍ŋ o̍ ya̍lo̍ le̍, kɛ̄lɛ̄ŋgāā ni᷅ŋ te̍ mī lā sōli̍ lāsa̍lā nāa̍ ya̍ chu̍a̍ le̍ ya̍ lēbɛ̄ɛ̄ ke᷅. I̍ he̍ndu̍ nya̍ wōlɔ̄ɔ̄lā lūsu̍lɛ̍i̍ o̍ lēbōl, mī di̍mi̍ māā mɛ̄ɛ̍ mī lā chūū ya̍ nyɔ̄ɔ̍ŋ māā lākē le̍. I̍ he̍ndu̍ nya̍ sāŋgā chōo̍ mī di̍mi̍ māā mɛ̄ɛ̍ mī lā wa̍ nyɛ̄m chūŋ kɛ̄ndɔ᷄ŋ lōmɔ̄ɔ̍ nāa̍ ya̍ chu̍a̍ le̍.

²⁴Lā pīndu̍ nyɛ᷅m chūŋ kɛ̄ndɛ̄ a̍ nyɛ̄ nyā sɔ̄lāā le̍ ya̍ le̍. Lā chūū wɔ̍ ya̍ chūɛ̄īmā chɔ̄lūāā nyā le̍ ya̍ kɔ̄l nɛ̄ŋī le̍. Nya̍ ko̍ni̍ ha̍ndu̍ ya̍ wōlɔ̄ɔ̄lā lūsu̍lɛ̍i̍la̍ŋ o̍ lēbōl a̍ yɔ̄ŋndā wɔ̄ɔ̍ŋndā nya̍ chō tōsāa̍ la̍ŋ ni̍. Nya̍ ko̍ni̍ sa̍a̍ŋgi̍a̍a̍ kɔ̄l nūu̍ a̍ sɔ̄ɔ̍ŋ dɛ̍nɛ̍ wɔ̍ɔ̍ŋ nya̍ chō tōsāa̍ wo̍ŋ ni̍.

²⁵Kɛ̍ a̍ ko̍ŋ kpo̍u̍, ya̍ Mɛ̄lɛ̄ka̍, ya̍ cho̍ wāna̍ ma᷅l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ ndo̍ ni̍. Le̍ mɛ̄ɛ̍ ya̍ I̍ cho̍ Mɛ̄lɛ̄ka̍ yɛ̍, le̍la̍ŋ ya̍ I̍ to̍sā he̍ī ni̍. Ndu̍yɛ̍ tē I̍ ma̍l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ pɛ̍, le̍ fɛ̍ɛ̍ŋ a̍ fɛ̍ɛ̍ŋ, I̍ yi̍yāŋ ndɛ̍ a̍ la̍ŋ o̍ o̍kɔ̄ɔ̄ le̍.

²⁶“Lā yīya̍la̍ŋ ndɔ̍ ya̍ a̍ sɔ̄ɔ̍ŋ pa̍a̍ndūŋ nya̍ tōsa̍ a̍ ya̍ wo̍ŋ o̍kɔ̄ɔ̄. Lā hu᷄ŋ a̍ sūɛ̍i̍ nyɛ̄i̍ mī ŋ̄ kɔ̄ɔ̄sa᷅ŋ na̍a̍ nya̍ā. Lā chɔ᷄m nyɛ᷅ o̍ nyɛ̄ nya̍ tōsa̍, ndu̍yɛ̍ mī lā chɔ᷄m di̍ nyāa̍.

²⁷Fi̍nyāā nyāā ma̍māa̍, nda̍ fɛ̍lɛ̍ŋ a̍ to̍sa̍ yɔ̄ŋ wɔ̄ɔ̍ŋndo̍ a̍ ya̍. Wānāā nyāa̍ wa̍ nya̍ chīla̍ŋ nda̍, ma̍ lō o̍ ko̍ŋ, ma̍ sīmūl la̍.

²⁸Nyɛ̄ ko̍ŋ to̍sa̍ ni̍, mi̍ tɛ̍ɛ̍mbūū wānāā nyāā bɛ̍ndūa̍a̍ to̍sā wa̍llo̍ o̍ fo̍ndā ni̍ di̍a̍ndāa̍ wa̍ lābɛ̄ɛ̄. Mi̍ lo᷅ o̍ ko̍ŋ mi̍ fa̍ŋā yu̍ŋgu̍ Che̍kɔ̍pū wo̍ bāa̍ chōo̍. O̍ ko̍ŋ, mi̍ to̍sā ma̍ tɛ̄ɛ̄mbūū I̍sɔ̄lūɛ̍i̍ya̍ ha̍ā. Mi̍ to̍sā mi̍ wāŋnda̍ tɛ̄ɛ̄mbūū wānāā nīa̍a̍ ha̍ā lābɛ̄ɛ̄.”