Read Southern Kisi Āīsa̍yā 44 Bible Online

Āīsa̍yā 44 - Southern Kisi bible

Āīsa̍yā 44

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Lā ya᷄ŋ nīla̍ŋ, nya̍ bu̍ɛ̍i̍yāā nīa̍a̍, nya̍ yu̍ŋgu̍ Che̍kɔ̍pū wo̍, nya̍ wāŋnda̍ I̍sɔ̄lūɛ̄ī, wānāā ya̍ pīla̍ hɛ̄li̍ wa̍.

²Ya̍ Mɛ̄lɛ̄ka̍ Ya̍a̍wɛ̄ɛ̄, ya̍ to̍o̍si̍a̍a̍ nya̍ ni̍. Ya̍ tu̍u̍la̍ nya̍ o̍ dēmbōo̍ ni᷄ŋ ni̍, lɔ̍ɔ̍pa̍ bɛ̍ɛ̍ mi̍ lā vīālu᷄ŋ, ndu̍yɛ̍ I̍ cho̍ nya̍ mālā. Lā yɔ᷅ŋ īsīōōŋ te̍ bu̍ɛ̍i̍yāā nīa̍a̍, nya̍ yu̍ŋgu̍ Che̍kɔ̍pū wo̍, nya̍ yɔ̍nūŋ māā wāŋnda̍ I̍sɔ̄lūɛ̄ī ni̍, wānāā ya̍ I̍ hɛ̍li̍ wa̍.

³“I̍ cho̍ mɛ̄ŋnda̍ŋ tālā o̍ lɛ̄ŋnde̍ cho̍ le᷅ŋ a̍ mɛ̄ŋmā īyēēma̍ŋ nde̍ŋ chōo̍, ndu̍yɛ̍ mī to̍sa̍ mī pēēla̍ pɔ̍mbɔ̄la̍ŋ lā hīni̍ o̍ lɛ̄ŋnde̍ cho̍ le᷅ŋ lē vēsɛ̍i̍le̍ŋ ni᷄ŋ. I̍ cho̍ tōsā mī nyi̍nā nūu̍ ō tōl chūāūwāā nyāa̍ kɔ̄ɔ̄lī, ndu̍yɛ̍ mī dɔ̍ū wānāa̍ fu̍lā ni̍ŋ o̍ pūlālē nyāle̍ŋ chōo̍ wa̍ sa̍lā.

⁴Mɛ̄ɛ̍ bi᷄l wa᷅ ho̍ō mɛ̄ŋnda̍ŋ sɔ̄lāa̍ le̍ te̍le̍ŋ o̍ te̍le̍ŋ, mbō pūī tɛ̍ɛ̍ tɛ̍ɛ̍ wo̍ ō wā nu̍a̍ā yɛ̍, le̍nde̍ chūāūwāā nyāa̍ ā wā ni̍ŋ ni̍. Ā wā ni̍ŋ ma̍wa̍ā mɛ̄ɛ̍ yɔ̄mīī wa᷅ he̍ī o̍ pēē pɔ̍mbɔ̄ɔ̍ kɔ̄ŋgɔ̍ ve̍ ī wa̍ nu̍a̍ā yɛ̍.

⁵“Ō pīlɛ̍ ō sīm ni̍ŋ mbō dīmi̍ āā, ‘Na̍a̍ ŋ̍ cho̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ ni̍.’ Mi̍ ho̍ō ō di̍mi̍ āā, ‘Na̍a̍ ŋ̍ fu̍la̍ o̍ pūlāle̍ Che̍kɔ̍pūle̍ŋ chōo̍ ni̍.’ Ā pu᷄m ā pōōnyīāŋ ni̍ŋ o̍ bālā ndāla̍ŋ āā, ‘Wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍’ o̍ ko̍ŋ kɔ̍ɔ̍lī, mī ā pu̍m ā chūa̍ dīōla̍ŋ āā I̍sɔ̄lūɛ̄ī.”

⁶Mɛ̄lɛ̄ka̍ Ya̍a̍wɛ̄ɛ̄, I̍sɔ̄lūɛ̍i̍ya̍ Māsa̍ ndā bɛ̍ndōo̍, Wāna̍ chi̍i̍ndīāā I̍sɔ̄lūɛ̄ī yo̍, ndu̍ yɔ̍nūŋ ni̍ māā Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, nyɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Ya̍ cho̍ wāna̍ tāso̍o̍ ni̍, ndu̍yɛ̍ ya̍ cho̍ wānā mɛ̍ɛ̍lāa̍ ni̍. Ō fūla̍ o̍ ya̍ kɔ̍ɔ̍lī, mɛ̄lɛ̄ka̍ o̍ mɛ̄lɛ̄ka̍ chēle̍ŋ ō cho̍ lɛ̍ le̍.

⁷Ō nɛ̄ɛ̍nɛ̍ che᷅le̍ŋ cho̍ yɛ̄ māā ya̍ Mɛ̍lɛ̄ka̍? Wānā ko̍ŋ ō fūla̍ wɔ̍ mbō sɔ̄lɔ̍la̍ŋ, ndu̍yɛ̍ mbō chɔ᷄m māā mɛ̄lɛ̄ka̍ o̍ cho̍ ni̍. Wānā ko̍ŋ ō chɔ᷄m ndɔ̍ ya̍, nyɛ̄ o̍ nyɛ̍ yɔ̍nu̍ŋ, chɔ̍ŋ a̍ te̍le̍ŋ māsīndɛ̄ si̍ndɔ̄ɔ̍, mbo̍ bīī a̍ te̍le̍ŋndo̍ ho̍ō, ndu̍yɛ̍ mbō chɔ᷄m nyɛ̍ nɔ̍ le̍ yɔ̄nɔ᷄ŋndo̍ o̍ sīɔ̄dīi̍ lāchīo̍o̍ ni᷄ŋ ndo̍.

⁸Wāŋnda̍ I̍sɔ̄lūɛ̄ī, lā wo᷅ le̍. Lā yɔ᷅ŋ īsīōōŋ te̍. Nyɛ̄ o̍ nyɛ̍ cho̍ yɔ̍nɔ᷄ŋndo̍, lā sīnā māā I̍ di̍mu̍l nya̍ fɛ̍lɛ̍ŋ a̍ mu̍ŋ o̍kɔ̄ɔ̄ sīndɛ̄ pa̍, ma̍lāŋ ŋ̍ yɔ̍nūŋ. Nya̍ cho̍ se̍i̍yāā nīa̍a̍ ni̍. Ō fūla̍ o̍ ya̍ kɔ̍ɔ̍lī, Mɛ̄lɛ̄ka̍ chēle̍ŋ ō cho᷄? Mɛ̄lɛ̄ka̍ o̍ Mɛ̄lɛ̄ka̍ chēle̍ŋ cho̍, ō wāŋnda̍ tīīndāŋ māā pōū kpo̍o̍wa̍ bɛ̍ndū le̍ nda̍ māndāa̍ wo̍ le̍. I̍ se̍e̍lu̍ŋ ndɔ̍ ndu̍ le̍.”

⁹Wānāa̍ to̍o̍sīāā nyɔ̍ɔ̍ŋ māā mɛ̄lɛ̄ka̍a̍ ndā wa̍, nda̍ kpo̍u̍ wānāā fo̍ndūa̍a̍ nda̍ chō ni̍. Ndu̍yɛ̍ nyɛ̄m ndāa̍ŋ nda̍ chu̍a̍ mu̍ŋ māā nyɛ̄m kpe̍e̍kpe̍i̍ yo̍ŋ, ŋ̄ nɔ̍ tɔ̍nɔ̄ o̍ tɔ̄nɔ̄ le̍. Nyɔ̄ɔ̍ŋ mu᷅ŋ, wānāa̍ cho̍ se̍īya̍ le̍ mu̍ŋ, mā sūāā le̍ mu̍ŋ nda̍, wānāā sūmɛ̍i̍ya̍ kpe̍e̍kpe̍i̍ nda̍ chō ni̍. Ā si̍nā nyɛ᷅ o̍ nyɛ̄ le̍, ndu̍yɛ̍ si̍ɔ̍mbu̍la̍ŋ lā chō nda̍ hūnɔ̄ɔ̄ bīyɔ̄ɔ̄.

¹⁰Wāna̍ kɔ̄l kālu̍ kūɛ̍ɛ̍nɛ̍ o̍ to̍o̍sīāā yɛ̄ nyɔ̄ɔ̍, ɔ̄ɔ̄ mbō tēēŋgi̍a̍a̍ chīli̍ŋnde̍, mbō chɔ̄ū nyɔ̄ɔ̍ a̍ ndi̍ māā mɛ̄lɛ̄ka̍ ndɔ̄, kɛ̍ mɛ̄lɛ̄ka̍ ndɔ̄ ko̍ŋ ō ma̍lā ndu̍ le̍?

¹¹Kɛ̍ ndu̍yɛ̍ wānāa̍ so̍o̍lūū nyɔ̍ɔ̍ŋ mu᷅ŋ nda̍ ki̍nɛ̍i̍, si̍ɔ̍mbu̍la̍ŋ lā chō nda̍ hūnɔ̄ɔ̄ bīyɔ̄ɔ̄. Mɛ̄lɛ̄ka̍a̍ ndāa̍ ha̍ā, wāŋndā chīe̍e̍ya̍ to̍o̍si̍a̍a̍ nda̍ a̍ lābā ni̍. Wāŋnda̍ ha̍ā, nda̍ kpo̍u̍, ā hu᷄ŋ ndɔ̍ ni̍ko̍ mī ŋ̄ hu᷄ŋ kɔ̍ɔ̍sāŋ na̍a̍ nda̍ā, si̍ɔ̍mbu̍la̍ŋ lā chō nda̍ bīyɔ̄ɔ̄, ndu̍yɛ̍ mī sīōōŋīī bɛ̄ndūe̍i̍ ī bīī nda̍.

¹²Nyɔ̄ɔ̍ŋ mu᷅ŋ nyɛ̄m wāŋndā chīe̍e̍ya̍ ā tōōsīāā a̍ bālā ndāla̍ŋ ndo̍ŋ ŋ̍ cho̍ ni̍. Tē sūmnɔ̄ɔ̍ ō bīī pɛ̍, ō chūa̍ chīli̍ŋnde̍ ō wōu̍ o̍ yīŋ, ō chūa̍ ku̍ndūwa̍ ndɔ̄ɔ̍, ō lɔ̄ɔ̄ ndi̍ a̍ kpāāya̍ ndɔ̄ɔ̍ kpo̍u̍, ō bɛ̄ɛ̄ndi̍a̍a̍ ndi̍ mɛ̄ɛ̍ i̍ nɔ̍ le̍ wāa̍ yɛ̍. O̍ nyɔ̄ɔ̍ ho̍ō tōōsīa̍a̍ ni᷄ŋ, mī yīa̍a̍ŋ mā nɛ̄i̍ ndu̍, ndu̍yɛ̍ mī kōlɔ̄ɔ̍ ō bīī ndu̍, mbō sāŋga̍ yɔ᷅kɔ̍ɔ̄ bɛ̄ndū.

¹³Ka̍a̍pi̍ndɛ̄i̍nɔ̍ɔ̍ ndu̍, tē ō bīī pɛ̍, ō tūu̍ yɔ̄mndo̍ a̍ yōōlē ndɔ̄le̍ tu̍wāāle̍ŋ. O̍ ko̍ŋ kɔ̍ɔ̍lī, ō chūa̍ pɔ̄u̍ hu̍mbo̍o̍ ō tūūla̍ wūndu̍le̍ wāna̍ chi̍o̍o̍ o̍ yɔ̄m kōŋ chōo̍. Ō chūa̍ nyɛ̄m ndɔ̄ɔ̄ŋ pi̍a̍a̍ndo᷄ŋ, ō sɛ̄l yɔ̄m kōŋ, ō bɛ̄ɛ̄ndi̍a̍a̍ nyɔ̄ɔ̍ māā wāna̍ chi̍e̍e̍ nyɛ̍ kɛ̄ndɛ̄ kɛ̍ndɛ̄. O̍ ko̍ŋ kɔ̍ɔ̍lī, ā chūa̍ ndu̍ ā kɔ̍ kɛ̍sī ndu̍ o̍ chīɛ̄ī sōōlāa̍ ni᷄ŋ.

¹⁴Nāa̍ pu̍m yɔ̄mīī si̍dāāve̍, tē ko̍ŋ te̍, yɔ̄mīī sa̍i̍pu̍lūɛ̄ɛ̄ve̍, ɔ̄ɔ̄ yɔ̄mīī ɔ̍kū ve̍ ndi̍ o̍ ki̍āŋ ni̍, mbō bɛ̄ɛ̄ndi̍a̍a̍ nyɔ̄ɔ̍ŋ mu᷅ŋ. Ɔ̄ɔ̄ tē ko̍ŋ te̍, ndu̍ pi̍la̍ tɔ᷅l yɔ̄mīī pa᷅ŋnde̍ o̍ būndɔ̍ɔ̍ ni᷄ŋ, pīɔ̍ɔ̍ tōsa̍ yɔ̄mīī kēŋ ī hīndū, ī fūūlu̍u̍ te̍le̍ŋ o̍ ye̍e̍ma̍ le̍ kpe̍ko̍o̍ sōli᷄ŋndo̍ a̍ ndi̍ wo̍.

¹⁵Yɔ̄m o̍ cho̍ ho̍ō kīo̍ŋndo̍, ō ti᷄ŋ ndu̍ wāŋnda̍ chō chūā ni̍ mā dɔ̄ū o̍ yīŋ. Ndu̍ wāŋnda̍ ā tīŋgū ni̍, le̍ kɔ̄la̍ŋ dɔ̄wɔ̄ɔ̍ o̍ yīŋ mā hāŋgu̍. Ndu̍ nda̍ dūāū o̍ yīŋ ni̍, le̍ bēe̍dīi̍yo̍ tōōsīa̍a̍. Yɔ̄m nda̍ chō ko̍ŋ lɛ̍u̍wūŋ ndɔ̍ŋ tīŋgɔ̄ɔ̄ le̍ dɔ̄wɔ̄ɔ̍ o̍ yīŋ ndo̍, yɔ̄m pīlɛ̍ kōŋ o̍ si̍āl nyɛ᷅ nda̍ sōōlūū māā mɛ̄lɛ̄ka̍ ndā wo̍ ni̍, mbō ba᷄ŋ ndu̍ wūla̍ŋ o̍ lābɛ̄ŋgu̍ ni᷄ŋ le̍ ndu̍ sōōlūūwo̍.

¹⁶Yɔ̄mndo̍ ho̍ō, ō ti᷄ŋ a̍ ndu̍ o̍ cho̍ yīŋnde̍ŋ kīīsūū ni̍. O̍ yīŋndē lēŋ chōo̍ o̍ cho̍ vīsīo̍ŋ tūɛ̄īyɔ̄ɔ̄ ni̍ mbō dē, mbō hīni̍ kɔ̄l. Tē hūēīye̍ wa̍ ndu̍ lēkɔ̄ɔ̍ pɛ̍, yīŋndē le̍ŋ o̍ cho̍ hāŋgɔ̄ɔ̄ ni̍. Tē ō hāŋgu̍ pɛ̍ mī hūēīye̍ kīōlu̍ ndu̍ lēkɔ̄ɔ̍, ō dīmi̍ āā, “I̍ tu̍u̍lu̍ ni᷅ŋ nyɛ̄ kɛ̄ndɛ̍ī. Yīŋnde̍ŋ lē na᷄ŋ bɔ̄ɔ̍ fɔ̍.”

¹⁷Yɔ̄m tɔ᷄ cho̍ lō wo̍, ndu̍ o̍ cho̍ sīɔ̄lɔ̄ɔ̄ ni̍, mbō tōōsi̍a̍a̍ nyɔ̄ɔ̍ māā mɛ̄lɛ̄ka̍ ndɔ̄, mbō ba᷄ŋ ndu̍ wūla̍ŋ o̍ lābɛ̄ŋgu̍ ni̍ŋ le̍ ndu̍ sōōlūūwo̍. Ndu̍ o̍ pi̍ɛ̍ī ni̍, mbō dīmūl ndu̍ āā, “Nu᷄m cho̍ mɛ̄lɛ̄ka̍ nūu̍ ni̍. Chi̍i̍ndi̍a̍a̍ ya̍ fɔ̍.”

¹⁸Wānāa̍ so̍o̍lūū mɛ̍lɛ̄ka̍a̍ ha̍ā wa̍, dīɔ̄mnda̍ nda̍ chō ni̍, ā nɔ̍ si̍nā pɛ̄ŋgu̍ le̍. Wāŋnda̍ ha̍ā, ā kīnda̍ hɔ̄ltā ndāla̍ŋ, ā nɔ̍lā mā chē le̍. Hūlmā ndāa̍ŋ mā hīīlu̍ŋ, ā nɔ̍lā mā sīna̍ nyɛ̄ o̍ nyɛ̄ pɛ̄ŋgu̍ le̍.

¹⁹Wānāa̍ to̍o̍sīāā mɛ̍lɛ̄ka̍a̍ ha̍ā wa̍, ō pīlɛ̍ bɛ̍ɛ̍ ō nɔ̍lā mbō cha᷄l mbō yīya̍ŋ a̍ sūɛ̍i̍ he̍ī o̍kɔ̄ɔ̄ le̍. Le̍ ō pīlɛ̍ nɔ᷅ ta̍āsi̍o̍o̍, ɔ̄ɔ̄ kɔ̄l kālo̍o̍ mbō dīmi̍ āā, “Yɔ̄m pīlɔ̍ɔ̍ ho̍ō ndu̍ ko̍ni̍ ya̍ I̍ ti̍ŋgū ni̍ mī du̍a̍ū o̍ yīŋ, o̍ dɛ̄ŋgūltā ndɔ̄la̍ŋ chōo̍ ya̍ I̍ to̍o̍si̍a̍a̍ bēe̍dīi̍ nūu̍ ni̍, lēcho̍ō ya̍ I̍ tu̍ɛ̍ī vīsīo̍ŋ ni̍ mi̍ di̍ā. Yɔ̄m pīlɛ̍ kōŋ, ndu̍ ko̍ni̍ ya̍ I̍ to̍o̍sīāā vɛ̍lɛ̄ nyɔ̄ɔ̍, ō Mɛ̄lɛ̄ka̍ tūl yɛ᷅le̍ŋ tūl bɛ̄ndōo̍ wo̍, mī so̍o̍lūū ndu̍, māā Mɛ̄lɛ̄ka̍ nī. Yɔ̄m fo̍ndōo̍ fu̍u̍ ya̍ I̍ cho̍ ho̍ō sōōlūūwo̍ ni̍.” Ō pīlɛ̍ bɛ̍ɛ̍ ō nɔ᷅ ta̍āsi̍ kōŋ, kɛ̄lɛ̄ŋgāā kɔ̄l kālu̍ ko̍ŋ mbō dīmi̍ le̍nde̍ le̍.

²⁰Dīɔ̄mnde̍ kpe̍e̍kpe̍i̍ i̍ cho̍ he̍ī ni̍, ō chō māchūāā mɛ̄ɛ̍ wāŋndo̍ dīā nu̍a̍ā pūlta̍ŋ yɛ̍. Wānāa̍ so̍o̍lūū mɛ̍lɛ̄ka̍a̍ ha̍ā wa̍, dīɔ̄mnde̍ bīī mi̍ ī fāŋā nda̍ o̍ nɛ̄ī kpe̍e̍kpe̍i̍yo̍ chōo̍, ā nɔ̍lā lɛ̍ mā sɔ̄la̍ mālā o̍ mālā le̍. Ā nɔ̍lā mā chɛ᷄l ndi̍ tōnya̍, māā nyɛ̄ nda̍ chō kēlāa̍ o̍ lābā māā mɛ̄lɛ̄ka̍ ndā wo̍, māā ō cho̍ mɛ̄lɛ̄ka̍ kpe̍e̍kpe̍i̍ le̍ o̍ cho̍ le̍ le̍.

²¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Nya̍ yu̍ŋgu̍ Che̍kɔ̍pū wo̍, I̍ ye̍e̍ma̍ nya̍ mī lā lōōnu̍ŋ he̍ī. Nya̍ wāŋnda̍ I̍sɔ̄lūɛ̄ī, lā lōōnu̍ŋ māā bu̍ɛ̍i̍yāā nīa̍a̍ nya̍ chō ni̍. Ya̍ to̍o̍si̍a̍a̍ nya̍ ni̍, ndu̍yɛ̍ mi̍ si̍i̍ŋgūū nya̍ bu̍ɛ̍i̍yāā ni̍. Le̍ he̍ī, I̍ nɔ̍lā mī pu̍ɛ̍ɛ̍nu̍ŋ a̍ nya̍ le̍ wāŋnda̍ I̍sɔ̄lūɛ̄ī.

²²Yɔ̄ŋndā nyāla̍ wɔ̍ɔ̍ŋnda̍ŋ, mɛ̄ɛ̍ ha̍la̍ hūmbōo̍ ō hīāū nu̍a̍ā wānā chi᷅ lɛ̍ ndu̍ le̍ yɛ̍, le̍nde̍ ya̍ I̍ chi̍i̍ a̍ la̍ŋ ni̍. Mɛ̄ɛ̍ mɔ᷄mndo̍ ō lō nu̍a̍ā pɛ̍ yɛ̍, le̍nde̍ ya̍ I̍ chi̍i̍ a̍ la̍ŋ ni̍. Lā mīīŋgu̍ ya̍ o̍ ībūŋ, fo̍ndōle̍, ya̍ Mɛ̄lɛ̄ka̍ ya̍ ba̍ŋa̍ nya̍ ni̍.”

²³Nya̍ nyɛ̄ o̍ nyɛ̍ cho̍ o̍ ha̍la̍a̍ ni᷄ŋ cho̍o̍ cho̍o̍, lā dēŋi̍ cho̍o̍ cho̍o̍ a̍ nya̍a̍lo̍o̍, fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndū. Nya̍ nyɛ̄ o̍ nyɛ̍ cho̍ a̍ fo̍ndāŋndā yīŋgi̍lɛ̍i̍la̍ bɛ̄ndūla̍ŋ o̍ chi̍e̍ēŋndo̍ ni᷄ŋ, lā dēŋi̍ cho̍o̍ cho̍o̍ a̍ kɔ̄l kɛ̄ndɔ̄ɔ̍. Nya̍ pēmbūŋ bɛ̄ndo᷄ŋ a̍ būndɛ̍la̍ŋ, a̍ yɔ̄mīi̍ cho̍ lēni᷄ŋ nde̍, lā sōli̍ cho̍ndo̍ŋ chōo̍ cho̍o̍, fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndi̍a̍a̍ yu̍ŋgu̍ Che̍kɔ̍pū wo̍, ndu̍yɛ̍ I̍sɔ̄lūɛ̄ī o̍ cho̍ ndu̍ sāŋgālā.

²⁴Mɛ̄lɛ̄ka̍ Ya̍a̍wɛ̄ɛ̄, wāna̍ nyā pi̍ŋīa̍a̍, o̍ tu̍u̍li̍a̍a̍ nya̍ o̍ dēmbōo̍ ni᷄ŋ ndo̍, nyɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Ya̍ Mɛ̄lɛ̄ka̍ Ya̍a̍wɛ̄ɛ̄, ya̍ to̍o̍si̍a̍a̍ nyɛ̄ o̍ nyɛ̄ ni̍. Ya̍ pīlɛ̍ kpe̍, mi̍ lo᷅ o̍ ko̍ŋ, mi̍ pɛ̍ŋgɛ̄lā ha̍la̍a̍ chōo̍ cho̍o̍ a̍ nyɛ̄ o̍ nyɛ̍ cho̍ lēni᷄ŋ, ndu̍yɛ̍ mi̍ pɛ̍ŋgɛ̄lā vɛ̄lɛ̄ chi̍e̍ēŋndo̍ ho̍ō. Bōōndi̍i̍ ya̍ I̍ wa̍ nyɔ̄ɔ̍ŋ mu᷅ŋ tōōsīa̍a̍ ve̍, ō nɛ̄ɛ̍nɛ̍ wa̍ yɛ̄ ya̍ īkɛ̄i̍?

²⁵Wānāa̍ di̍mi̍ sɔ̍ɔ̍ŋ wa̍ā lāchīo̍ŋ nda̍, ya̍ chɔ̍ɔ̍mūū nda̍ ni̍ mī wāŋnda̍ chē nda̍ wānāā lāchōōwā. Wānāā vīāmāā lāyāwāa̍, mī to̍sa̍ mī wāŋnda̍ chē nda̍ māā lādīɔ̄m. Wānāa̍ chu̍a̍nu̍ŋ māā wānāā kɔ̄l kālu̍a̍a̍ bɛ̍ndūa̍a̍ nda̍ chō ni̍ wa̍, mī la̍a̍si̍a̍a̍ kɔ̄l kālu̍la̍ ndāla̍ŋ mī to̍sa̍, nyɛ̄ o̍ nyɛ̄ nda̍ sīlā wa᷅ŋnda̍, dīɔ̄mnde̍ ko̍ni̍ o̍ wa᷅ ni̍.

²⁶Kɛ̍ bu̍ɛ̍i̍yāā nīa̍a̍ su̍a̍ā le̍ ya̍ wa̍ nda̍, nyɛ̄ o̍ nyɛ̍ nda̍ dīmu̍l pɛ̍ wa᷅ŋnda̍ māā ō chō yɔ̄nɔ᷄ŋ, tōsāa̍ ya̍ I̍ to̍sā ni̍ mbō yɔ̄nu̍ŋ. Yōōŋgū o̍ yōōŋgū ki̍i̍la̍a̍ nīa̍a̍ ā dīmu̍l wāŋnda̍ pɛ̍, tōsāa̍ ya̍ I̍ to̍sā ni̍ mbō chīŋa̍ lāsōndō. I̍ di̍mu̍l Chūlu̍sɛ̄lɛ̄m māā wāŋnda̍ ā chō vɛ̄lɛ̄ mīīŋgū mā cha᷄l lo̍ŋ. Ndu̍yɛ̍ mi̍ di̍mūl chi̍o̍o̍ŋ Chu̍dā māā ŋ̄ chō vɛ̄lɛ̄ mīīŋgū tāŋgūlɔ᷄ŋ. Chi̍e̍e̍ŋ lo̍ pɔ̄mnda̍ŋ ndo̍ŋ kpo̍u̍, mi̍ di̍mī māā I̍ cho̍ tōsā mī ŋ̄ mīīŋgu̍ mī ŋ̄ si᷄m.

²⁷I̍ nɔ̍lā mī di̍mu̍l pe̍e̍ mɛ̄ŋmā īhɛ᷄llo̍, a̍ pēēla̍ ndɔ̄la̍ pɔ̍mbɔ̄la̍ŋ māā lā ve̍la̍, ndu̍yɛ̍ mī lā vēla̍.

²⁸Mi̍ di̍mūl Māsāa̍ Sa̍i̍lɔ̄ɔ̄ a̍a̍, ‘Nu᷄m cho̍ wā wānāā nīa̍a̍ chīla̍ŋ ni̍, māā wānā ma̍ndāā lāsāa̍. Ndu̍yɛ̍ nyɛ̄ o̍ nyɛ̄ ya̍ I̍ kɛ̍ɛ̍si̍a̍a̍ le̍ tōsāa̍, nu᷄m cho̍ ndu̍ tōsā kpo̍u̍ ni̍. Nu᷄m cho̍ dīmī ni̍ māā Chūlu̍sɛ̄lɛ̄m o̍ mi̍i̍ŋgu̍ tāŋgūlɔ᷄ŋ, ndu̍yɛ̍ mā dīmi̍ māā chīyīī chīɛ̍i̍ Mɛ̄lɛ̄ka̍ ī kīla̍ŋ.’ ”