Read Southern Kisi Āīsa̍yā 45 Bible Online

Āīsa̍yā 45 - Southern Kisi bible

Āīsa̍yā 45

¹Mɛ̄lɛ̄ka̍ Ya̍a̍wɛ̄ɛ̄ ndu̍ hɛ̍li̍ Sa̍i̍lɔ̄ɔ̄ le̍ mbō sīmnu᷄ŋ ma̍sā bɛ̍ndōo̍ ni̍. Ndu̍yɛ̍ Mɛ̄lɛ̄ka̍ ke᷅ ndu̍ kpāāyāa̍, le̍ mbō yēm lɛ̄ŋīi̍ cho̍ ndu̍ lāchī ve̍, ndu̍yɛ̍ mbō pōōndi̍a̍a̍ māsāā bɛ̍ndūa̍a̍ kpāāyāla̍ŋ o̍ bā. Chi̍e̍e̍ŋ lāsāāsa᷄ŋ cho̍ ndu̍ lāchī a̍ dīōlā sāāsāla̍ŋ lā kīīndīāā wo̍ŋ, ō chō dīōlā sāāsāla̍ la̍ŋ kūūmbūū kpo̍u̍. Dīō sāāsā o̍ dīō sāāsā o̍ ve᷅ ni̍ŋ o̍ ki̍ndāā ndu̍ lāchī le̍. Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Sa̍i̍lɔ̍ɔ̍ wo̍ cho̍ ho̍ō ni̍. Ō dīmu̍l ndu̍ āā,

²“Sa̍i̍lɔ̄ɔ̄, ya̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ cho̍ nu̍m īsīsi̍ la̍chi̍, mī ku̍ɛ̄ a̍ nu̍m nɛ̄īyo̍ bɛ̄ɛ̄ndīa̍a̍ lāchī. Pēmbūŋ bɛ̄ndo᷄ŋ kpo̍u̍, I̍ cho̍ mu̍ŋ mīŋgī dɛ̍ŋgbɛ̍la̍ŋ nu̍m lāchī. Sāāsāla̍ cho̍ nu̍m lāchī la̍ŋ, dīōlā chīli̍ŋu̍ŋ būlɔ᷄ŋsīi̍ la̍ cho̍ o̍ sāāsāla̍ la̍ŋ nda̍ŋ, I̍ cho̍ la̍ŋ pēsī pēsī kpo̍u̍. Su̍lu̍ku̍lā ŋ̄chīli̍ŋnda̍ cho̍ o̍ dīōlā lāŋ le̍ la̍ŋ kīīndīa̍a̍ la̍ŋ, I̍ cho̍ la̍ŋ kīlī kīlī mī ku̍mbi̍ nɛ̄īyo̍ nu̍m lāchī.

³Nyɛ̄m sūlāŋ wāŋnda̍ vīŋi̍ wo̍ŋ, a̍ nyɛ̄m sūlāŋ nda̍ kɛ̄si̍ o̍ fo̍ndāŋndā sɔ̍ɔ̍ sɔ̍ɔ̍ la̍ŋ ndo̍ŋ, I̍ cho̍ nu̍m mu̍ŋ kē kpo̍u̍. I̍ cho̍ he̍ī tōsā le̍ mā si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, māā ya̍ Mɛ̄lɛ̄ka̍ I̍sɔ̄lūɛ̍i̍ya̍ ya̍ hɛ̍li̍ nu̍m ni̍.

⁴I̍ hɛ̍li̍ nu̍m le̍ mā ma̍la̍ yu̍ŋgu̍ Che̍kɔ̍pū wo̍, bu̍ɛ̍i̍yāā nīa̍a̍, wāŋnda̍ I̍sɔ̄lūɛ̄ī, wānāā nīa̍a̍ ya̍ I̍ hɛ̍li̍ wa̍. Ndu̍yɛ̍ mi̍ lo᷅ o̍ ko̍ŋ mi̍ ke᷅ nu̍m dīōlā lēbɛ̄ɛ̄lā bɛ̄ndūla̍ŋ, mi̍ chē bɛ̍ɛ̍ a̍ si̍nā ya̍ le̍ ni̍.

⁵“Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Ndu̍yɛ̍ mɛ̄lɛ̄ka̍ o̍ mɛ̄lɛ̄ka̍ che̍le̍ŋ cho̍ o̍ ya̍ kɔ̄ɔ̄lī le̍. Mi̍ chē bɛ̍ɛ̍ a̍ si̍nā ya̍ le̍ ni̍, kɛ̍ I̍ cho̍ nu̍m kpāāyāa̍ ke̍,

⁶mī wāŋnda̍ o̍ chi̍e̍ēŋndo̍ ni᷄ŋ kpo̍u̍, chɔ̍ŋ ba᷅ pāa̍le̍ŋ lē chāŋndo̍, mbō kūɛ̄ bā pāa̍le̍ŋ lē dēl lo̍, mā sīna̍ māā wānā o̍ wānā cho̍ māā ya̍ Mɛ̄lɛ̄ka̍ le̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, ndu̍yɛ̍ mɛ̄lɛ̄ka̍ o̍ mɛ̄lɛ̄ka̍ che̍le̍ŋ cho̍ o̍ ya̍ kɔ̄ɔ̄lī le̍.

⁷Ya̍ to̍o̍si̍a̍a̍ nyɛ̄ wa̍wo̍ŋndo̍ a̍ nyūmnda̍ŋ ni̍. Ya̍ to̍sā ni̍ mī sūɛ̍i̍ kɛ̍ndɛ̄i̍ ī wa̍, ndu̍yɛ̍ ya̍ to̍sā ni̍ mī sūɛ̍i̍ wɔ̍ɔ̍ŋnde̍ ī wa̍. Ya̍ Mɛ̄lɛ̄ka̍ Ya̍a̍wɛ̄ɛ̄ to̍sā nyɔ̍ɔ̍ŋ mu᷅ŋ kpo̍u̍ ni̍.

⁸O̍o̍ ha̍la̍a̍, tu̍si̍ kpāāyā ya̍māa̍ o̍ chi̍e̍ēŋndo̍ chōo̍ mɛ̄ɛ̍ pīɔ̍ɔ̍ ō tūāl nu̍a̍ā yɛ̍. Lɛ̄ŋnde̍ŋ ku̍mbi̍ŋ, mī kpāāyā ya̍māa̍ ho̍ō ō tōl o̍ lɛ̄ŋnde̍ŋ bɛ̄ŋgu̍, le̍ mī bāŋa᷄ŋndo̍ ō vīl o̍ chi̍e̍ēŋndo̍ chōo̍ lātūlu̍ a̍ sa̍kpōyɛ̍i̍. Ya̍ Mɛ̄lɛ̄ka̍ Ya̍a̍wɛ̄ɛ̄, ya̍ to̍sa̍ ni̍ mi̍ he̍ī yɔ̄nu̍ŋ.”

⁹Wānāa̍ si̍mu̍l ha̍ā wāna̍ to̍o̍si̍a̍a̍ nda̍ wo̍ a̍ kɔ̍ɔ̍sɔ̍ɔ̍ wa̍, dɛ̍nɛ̍ pālāa̍ ō wā ni̍ŋ le̍ nda̍. Wāŋnda̍ ha̍ā, ā chō māchūāā mɛ̄ɛ̍ kpɛ̍ɛ̍nɛ̍i̍ pūūlūe̍i̍ ī wā nu̍a̍ā kpɛ̍ɛ̍nɔ̍ŋ ŋ̄ pīlɔ̍ŋ tɛ̄ɛ̄ŋ yɛ̍. Pūūlu̍ nda̍ chūāū kpɛ̍ɛ̍nɔ̍ŋ ndo̍, ō nyūnā wa᷅nā chu̍a̍u̍wāā ŋ̄kpɛ̍ɛ̍nɔ̍ɔ̍ māā, ō yɛ̄ɛ̍nɛ̍ ŋ̄ chō yɛ̄ ho̍ō tōōsīa̍a̍? Ɔ̄ɔ̄ ō nyūnā wa᷅na̍ chu̍a̍u̍wāā ŋ̄kpɛ̍ɛ̍nɔ̍ɔ̍ māā, vɛ᷅ a̍ he̍ndu̍ kpi̍ɔ̍ɔ̍ŋ o̍ kpɛ̍ɛ̍nɛ̍i̍ le̍ le̍?

¹⁰Dɛ̍nɛ̍ pa̍lāa̍ chō le̍ wāŋndo̍ ho̍ō, wāna̍ nyu̍nā ho̍ō fi̍nyā ndɔ̍ āā, “Vɛ᷅ ma̍ vīālū ya̍ nu̍a̍ā?” Ɔ̄ɔ̄ mbō nyūna̍ kāla̍ ndɔ̍ āā, “Vɛ᷅ ma̍ vīālū ya̍ nu̍a̍ā?”

¹¹Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ Dīāndāa̍ I̍sɔ̄lūɛ̄ī, o̍ to̍o̍si̍a̍a̍ I̍sɔ̄lūɛ̍i̍ yo̍, nyɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Lā nɔ̄ di̍ mī lā nyūna̍ ya̍ le̍ nyɛ̄ ya̍ I̍ to̍sā le̍ chūāūwāā nīa̍a̍ wo̍? Ɔ̄ɔ̄ lā nɔ̄ di̍ mī lā dīmu̍l la̍ nyɛ̄ ya̍ I̍ le̍ tōsāa̍ wo̍?

¹²Ya̍ to̍o̍si̍a̍a̍ chi̍e̍ēŋndo̍ ni̍, ndu̍yɛ̍ mi̍ to̍o̍sīāā wāŋndā chīe̍e̍ya̍a̍ cho̍ lēni᷄ŋ nda̍. Bālā nīla̍ŋ la̍ pɛ̍ŋgɛ̍la̍ ha̍la̍a̍ chōo̍ cho̍o̍ a̍ nyɛ̄ o̍ nyɛ̄ cho̍ lēni᷄ŋ ni̍. Ndu̍yɛ̍ lōōŋ ka̍āku̍u̍ŋ cho̍ o̍ ha̍la̍a̍ ni᷄ŋ ndo̍ŋ kpo̍u̍, o̍ kpāāya̍ nūu̍ bɛ̄ŋgu̍ ŋ̍ cho̍ ni̍.

¹³I̍ kpe̍e̍ŋi̍a̍a̍ Sa̍i̍lɔ̍ɔ̍ kɔ̄llo̍ ni᷄ŋ le̍ mbō tōsa̍ īsɔ̄ɔ̍, le̍ mbō tōsa̍ nyɛ̄ ya̍ I̍ kɛ̍ɛ̍si̍a̍a̍ le̍ tōsāa̍ wo̍, ndu̍yɛ̍ mbō mīŋgi̍ sɔ̄ɔ̍ŋ o̍ nɛ̄ī sa̍kpō. Ndu̍yɛ̍ I̍ bɛ̍ɛ̍ndīāl ndu̍ ni̍ŋ nɛ̍īyo̍ lāchī mī nyɛ̄ o̍ nyɛ̄ wa̍ ndu̍ o̍ hɔ̄l sa̍kpō. Ndu̍ mi̍ŋgī ni̍ŋ Chūlu̍sɛ̄lɛ̄m, chi̍e̍e̍ nūu̍ tāŋgūl ni̍, ndu̍yɛ̍ mbō tōsa̍ mī wānāā nīa̍a̍ cho̍ o̍ bīyɔ̄ɔ̍ ni᷄ŋ nda̍ ā sɔ̄la̍ bāŋa᷄ŋndo̍. Ndu̍yɛ̍ fo̍ndō o̍ to̍sā ni̍ŋ su̍ɛ̍i̍ he̍ī ni̍, ō ve᷅ ni̍ŋ le̍ pāāwā le̍, kɛ̄lɛ̄ŋgāāle̍ mbō sɔ̄la̍ fāndā.” Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍, nyɛ̄ o̍ so̍ō wo̍ cho̍ ko̍ŋ ni̍.

¹⁴Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Sūl o̍ su᷄l cho̍ I̍chi̍pī, ndu̍yɛ̍ a̍ nyɛ̄ o̍ nyɛ̄ cho̍ nyɛ̄ lēyākō Īto̍o̍pīāā, le̍ nya̍ la̍ wa᷅ ni̍ŋ kpo̍u̍ ni̍. O̍ ko̍ŋ kɔ̍ɔ̍lī, pūa̍a̍ Si̍ɛ̍bā, a̍ ba̍ndu̍ bāndi̍i̍ bɛ̍ndūe̍i̍ ya̍, nda̍ kpo̍u̍ ā chō hūnɔ̄ɔ̄ sīmnɔ᷄ŋ chi̍a̍ā nyā. Ā wā ni̍ŋ nya̍ hūnɔ̄ɔ̍ kɔ̄ɔ̄lī o̍ yɔ̄lɔ᷄ŋ. Ā chō tūndɔ᷄ŋ nya̍ lāchī, mi̍ nda̍ pi̍la̍ sōli̍ŋ o̍ sōndō, mā dīmi̍ āā, ‘Tōnya̍ kpe̍e̍kpe̍i̍, Mɛ̄lɛ̄ka̍ chō nya̍ kɔ̄ɔ̄lī. Ndu̍yɛ̍ mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ ndu̍ kɔ̍ɔ̍lī le̍, ndu̍ pīlɛ̍ kpe̍ cho̍ Mɛ̄lɛ̄ka̍ ni̍’ ”

¹⁵O̍o̍ Mɛ̄lɛ̄ka̍ I̍sɔ̄lūɛ̍i̍ya̍, wānā na̍a̍ pīŋīa̍a̍, tōnya̍ kpe̍e̍kpe̍i̍ ī cho̍ ni̍, a̍ cho̍ Mɛ̄lɛ̄ka̍ wānā che᷅ a̍ lēhɔ̄l te̍.

¹⁶Wānāa̍ to̍o̍sīāā nyɔ̍ɔ̍ŋ māā mɛ̄lɛ̄ka̍a̍ nda̍ wa̍, nda̍ kpo̍u̍ si̍ɔ̍mbu̍la̍ bɛ̄ndūla̍ŋ lā chō nda̍ hūnɔ̄ɔ̄ bīyɔ̄ɔ̄. Ā chō hūnɔ̄ɔ̄ bɛ̄ɛ̄la̍ŋ tāmbu̍, mā yɔ̄nu̍ŋ la̍a̍sī la̍a̍sī.

¹⁷Kɛ̍ I̍sɔ̄lūɛ̍i̍ya̍ nda̍, Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ nda̍ chīīndīāā. Ndu̍yɛ̍ chīīndīāā o̍ chi̍i̍ndi̍a̍a̍ nda̍ wo̍, le̍ fɛ̍ɛ̍ŋ a̍ fɛ̍ɛ̍ŋ o̍ chi̍i̍ndi̍a̍a̍ nda̍ ni̍. Le̍ fɛ̍ɛ̍ŋ a̍ fɛ̍ɛ̍ŋ, si̍ɔ̍mbu̍la̍ bi̍ī lɛ̍ I̍sɔ̄lūɛ̍i̍ya̍ le̍, kɛ̄lɛ̄ŋgāā ni᷅ŋ te̍, mā tāmbu̍ lābɛ̄ɛ̄.

¹⁸Mɛ̄lɛ̄ka̍ Ya̍a̍wɛ̄ɛ̍ to̍o̍si̍a̍a̍ ha̍la̍a̍ chōo̍ cho̍o̍ a̍ nyɛ̄ o̍ nyɛ̍ cho̍ lēni᷄ŋ ni̍. Ndu̍ tu̍u̍la̍ chi̍e̍ēŋndo̍ ho̍ō mɛ̄ɛ̍ o̍ nɔ̍ le̍ wāa̍ yɛ̍ ni̍, ndu̍ pīlɛ̍ kpe̍ cho̍ Mɛ̄lɛ̄ka̍ ni̍. Ō tōōsi̍a̍a̍ ndu̍ le̍ mbō wa̍ fo̍ndā la̍ka̍sī la̍ka̍sī le̍. Kɛ̍ ō tōōsi̍a̍a̍ ndu̍ le̍ mī wāŋnda̍ chīe̍e̍ya̍ ā wa̍ lēni᷄ŋ. Ndu̍ Mɛ̄lɛ̄ka̍ kōŋ ō dīmi̍ āā, “Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Ndu̍yɛ̍ mɛ̄lɛ̄ka̍ o̍ mɛ̄lɛ̄ka̍ chēle̍ŋ ō cho̍ o̍ ya̍ kɔ̍ɔ̍lī le̍.

¹⁹I̍ su̍u̍ o̍ vīōŋnɔ᷄ŋ ni᷄ŋ, ɔ̄ɔ̄ mī ku̍ɛ̄ o̍ fo̍ndāŋ nyūmnda̍ŋ mā chō wo̍ mī kɔ̍ so̍ō lo̍ŋ te̍. I̍ di̍mu̍l wa᷅ŋnda̍ I̍sɔ̄lūɛ̄ī le̍ mā kūɛ̄ ya̍ nūūwā o̍ fo̍ndāŋ la̍ka̍sī la̍ka̍sī le̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, sūɛ̍i̍ tōnyɛ̍i̍, ndi̍ ya̍ I̍ di̍mī ni̍. Nyɛ̄ ya̍ I̍ di̍mī wo̍, tōnya̍a̍ o̍ wa᷅ ni̍.”

²⁰Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Lā chūūŋgi̍āŋ na̍a̍ pi᷅lɛ̍ mī lā kōma̍l la̍, nya̍ wāŋnda̍ o̍ lɛ̄ŋnde̍ ni᷄ŋ, nya̍ hɛ̍lu᷄ŋ mi̍ lā lō yōōmū wa̍. Wānāa̍ ba̍lū a̍ nyɛ̄m nda̍ tōōsīāā a̍ yɔ̄mnde̍, ndu̍yɛ̍ mā pīɛ̄ī mu̍ŋ māā mɛ̄lɛ̄ka̍a̍ nda̍, mɛ̄lɛ̄ka̍a̍ nɔ̍lā mā chīīndi̍a̍a̍ nda̍ le̍ wa̍, ā nɔ̍ si̍nā pɛ̄ŋgu̍ o̍ sīnā pɛ̄ŋgu̍ le̍.

²¹Wāŋnda̍ ha̍ā ā hu᷄ŋ ndɔ̍ mā hu᷄ŋ ti̍mbī sūɛ̍i̍ ndɛ̄i̍, mā chɔ᷄m tōnya̍ cho̍ lēni᷄ŋ ndo̍. Nda̍ pi̍la̍ ā cha᷄l lɔ̍ mā sūūki̍āŋ a̍ sɔ̄ɔ̍ŋ mu᷅ŋ o̍kɔ̄ɔ̄. Nyɛ̄ o̍ nyɛ̍ yɔ̍nu̍ŋ, lɔ̍ɔ̍ pa̍ bɛ̍ɛ̍ mbo̍ yɔ̄nu᷄ŋ, ō nɛ̄ɛ̍nɛ̍ di̍mi̍ yɛ̄ a̍ ndu̍ o̍kɔ̄ɔ̄ māā ō nɔ̄ le̍ yɔ̄nɔ᷄ŋndo̍? Ō nɛ̄ɛ̍nɛ̍ di̍mi̍ yɛ̄ sīndɛ̄ pa̍ māā sɔ̄ɔ̍ŋ mu᷅ŋ ŋ̄ nɔ̄ le̍ yɔ̄nɔ᷄ŋndo̍? Ō cho̍ ya̍ Mɛ̄lɛ̄ka̍ Ya̍a̍wɛ̄ɛ̄ le̍ so̍ō a̍ mu̍ŋ o̍kɔ̄ɔ̄ māā ŋ̄ nɔ̄ le̍ yɔ̄nɔ᷄ŋndo̍ le̍? Mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ ya̍ kɔ̍ɔ̍lī le̍. Ya̍ Mɛ̄lɛ̄ka̍ ya̍ to̍sā sɔ̍ɔ̍ŋ tōnya̍ŋ ni̍, ndu̍yɛ̍ mi̍ wa᷅ wānā pi̍ŋīa̍a̍. Mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ ya̍ kɔ̍ɔ̍lī le̍.

²²“Nya̍ wāŋnda̍ o̍ chi̍e̍ēŋndo̍ ni᷄ŋ kpo̍u̍, lā mūli̍ŋ nāa̍ ya̍ chu̍a̍, mī lā sɔ̄la̍ chīndāa̍. Ya̍ pīlɛ̍ kpe̍ cho̍ Mɛ̄lɛ̄ka̍ ni̍, mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ ya̍ kɔ̍ɔ̍lī le̍.

²³Ya̍ Mɛ̄lɛ̄ka̍ I̍ chu̍a̍ būŋgɛ̄i̍ mi̍ me̍na᷄ŋ po̍. Ndu̍yɛ̍ nyɛ̄ ya̍ I̍ di̍mi̍ wo̍, tōnya̍ o̍ cho̍ ni̍, I̍ fe̍ŋāŋ o̍ dīōm nūu̍ chōo̍ le̍. Wānā o̍ wānā cho̍ wūla̍ŋ bāŋɔ̄ɔ̄ ya̍ o̍ lābɛ̄ŋgu̍ ni᷄ŋ mbō sōōlu̍u̍ ya̍, ndu̍yɛ̍, mī wānā o̍ wānā o̍ chu̍a̍ būŋgɛ̄i̍ māā le̍ ya̍ o̍ cho̍ ni̍.

²⁴“Wāŋnda̍ dīmī ni̍ŋ a̍ ya̍ o̍kɔ̄ɔ̄, māā ya̍ Mɛ̄lɛ̄ka̍ Ya̍a̍wɛ̄ɛ̄, ya̍ pīlɛ̍ kpe̍ to̍sā ni̍ mi̍ tōnya̍a̍ wa̍ wāŋnda̍ tɛ̄ɛ̄ŋ, ndu̍yɛ̍ mā sɔ̄la̍ kpāāyāa̍.” Wānā o̍ wāna̍ tu̍l Mɛ̄lɛ̄ka̍ yɛ̄le̍ŋ, nda̍ kpo̍u̍ ā chō hūnɔ̄ɔ̄ nāa̍ ndu̍ chu̍a̍, ndu̍yɛ̍ mī si̍ɔ̍mbu̍la̍ŋ lā hu᷄ŋ bi̍ī nda̍.

²⁵Kɛ̍ wāŋnda̍ I̍sɔ̄lūɛ̄ī nda̍, Mɛ̄lɛ̄ka̍ Ya̍a̍wɛ̄ɛ̄ cho̍ tōsā mā yēm, ndu̍yɛ̍ mā sāŋgāla̍ ya̍.