Read Southern Kisi Āīsa̍yā 46 Bible Online

Āīsa̍yā 46 - Southern Kisi bible

Āīsa̍yā 46

¹Wāŋnda̍ Ba̍bi̍lɔ̄ŋ, mɛ̄lɛ̄ka̍a̍ ndāa̍, nda̍ yɔ̍nūŋ māā Ba̍āl, nda̍ Ni̍bɔ̄ ni̍, ā chō lɛ̄ŋ. Ā dōvi̍ mu̍ŋ chɔ̄lūa̍a̍ o̍ lākɔ̄ɔ̄ mā kūā a̍ mu̍ŋ. Nyɛ̄m wāŋnda̍ chō mu᷅ŋ bālɔ̄ɔ̄ a̍ mu̍ŋ māā mɛ̄lɛ̄ka̍a̍ ndā wo̍ŋ, wōlɔ̄ɔ̄lā lūsu̍lɛ̍i̍la̍ŋ ko̍ni̍ nda̍ chō chɔ̄lūa̍a̍ hāndɔ̄ɔ̍ o̍ lākɔ̄ɔ̄ ni̍, mī chɔ̄lūa̍a̍ bɛ̄pɛ̄lā le̍bɛ̍ŋgu̍.

²Nyɛ̄m ndāāŋ mu̍ŋ ni̍, nda̍ pi̍la̍ ni̍, kpo̍u̍ a̍ tūndu᷄ŋ. Mɛ̄lɛ̄ka̍ā ndāa̍ ha̍ā, ā nɔ̍lā mā chīīndi̍a̍a̍ wānāa̍ cho̍ o̍ wōlɔ̄ɔ̄lā ndāla̍ lu̍su̍lɛ̍i̍la̍ŋ nda᷅ŋ bɛ̄ŋgu̍ wa̍ le̍. Nda̍ pi̍la̍ bɛ̍ɛ̍ ā chō lākɔ̄ a̍ nda̍ o̍ bīyɔ̄ɔ̍ ni᷄ŋ.

³Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Lā ya᷄ŋ ya̍ nīla̍ŋ, nya̍ yu̍ŋgu̍ Che̍kɔ̍pū wo̍. Nya̍ wānā o̍ wāna̍ lo̍ yōōmū I̍sɔ̄lūɛ̄ī, lā tūe̍i̍ nyɛ᷅ ya̍ I̍ cho̍ dīmīo̍o̍ wo̍. Nda̍ a̍a̍ vi̍lu̍ wɔ̍ nya̍ le̍ mi̍ kāndū nya̍ māndāa̍. Ndu̍yɛ̍ chɔ̍ŋ a̍ te̍le̍ŋ nya̍ vēlu᷄ŋ ndo̍ mbo̍ bīī a̍ pāa̍le̍ hāūle̍ŋ nde᷅ŋ, ya̍ cho̍ nya̍ māndāa̍ ni̍.

⁴Ndu̍yɛ̍ mɛ̄ɛ̍ ya̍ I̍ cho̍ a̍ nya̍ pāa̍le̍ hāūle̍ŋ nde᷅ŋ yɛ̍, le̍nde̍ ya̍ I̍ lo᷅ ni̍ŋ ni̍, ha̍a̍a̍ a̍ yu̍wɛ̍i̍ nyɛ̄i̍ bɛ̍ɛ̍. I̍ lo᷅ ni̍ŋ nya̍ māndāa̍ ha̍a̍a̍ mī bōlle̍ dēndū nya̍ fo̍ a̍ yūlu̍ŋnde̍. Ya̍ to̍o̍si̍a̍a̍ nya̍ ni̍, ndu̍yɛ̍ I̍ hi̍a̍ū ni̍ŋ la̍chi̍ a̍ nya̍ māndāa̍. I̍ cho̍ nya̍ māndā ndu̍yɛ̍ mī chi̍i̍ndi̍a̍a̍ nya̍.

⁵“Ya̍ Mɛ̄lɛ̄ka̍, a̍ nɛ̄ɛ̍nɛ̍ wānā tu̍ū yɛ̍ ya̍?” “Na̍a̍ nɛ̄ɛ̍nɛ̍ si̍i̍ma᷅ŋ yɛ̍ mī wānā tu̍u̍ ya̍ a̍ ndu̍?”

⁶Wānā tu̍ū ya̍ a̍ mɛ̄lɛ̄ka̍ nda̍ tōōsīāā a̍ ko̍o̍līi̍ye̍ wo̍ le̍. Wāŋnda̍ mā sōli̍ ko̍o̍līi̍yo̍ŋ o̍ bɔ̄lɔ̄la̍ ndāla̍ŋ ni᷄ŋ mā dīī mu̍ŋ ku̍ndāa̍. Mā chu̍a̍ ka̍ni̍ŋ ndāŋ hu̍mbo̍ŋ mā kɔ̍ ha̍ndū mu̍ŋ o̍ sēke̍lēi̍yo̍ chōo̍ le̍ mā sīna̍ lūsu̍l ndɔ̄ɔ̍. Ndu̍yɛ̍ mā dīmu̍l wāna̍ to̍sā wa̍llo̍ a̍ ko̍o̍līi̍yo̍ŋ ndo̍, le̍ mbō tōōsi̍a̍l nda̍ mɛ̄lɛ̄ka̍a̍. O̍ ko̍ŋ kɔ̍ɔ̍lī, mā tūndu᷄ŋ mɛ̍lɛ̄ka̍ kōŋ o̍ lābɛ̄ŋgu̍ ni̍ŋ mā sōōlūū ndu̍.

⁷Tē ā chi̍i̍ nda̍ ndu̍ tōōsīāl pɛ̍ kpo̍u̍, ā chūa̍ ndu̍ o̍ lāchōŋgu̍ ā kūɛ̄ a̍ ndu̍ ā kɔ̍ kɛ̍sī ndu̍ nāa̍ o̍ nɔ̍ le̍ wāa̍ wa̍. Nāa̍ nda̍ chō ndu̍ sīmī wa̍, lo̍ŋ o̍ wa᷅ i̍si̍si̍ ni̍, ō nɔ̍lā mbō fāŋa̍ŋ o̍ fōōfō ko̍ŋ mbō kūɛ̄ īnɛ̍ le̍. Mī wāŋnda̍ cha᷄ŋ nāa̍ ndu̍ chu̍a̍ le̍ mālāa̍, kɛ̍ ō mu̍lī nda̍ dīōm te̍, ō so̍lī nda̍ o̍ dɛ̍nɛ̍ pa̍lāā nda̍ wā ni̍ŋ ndo̍ le̍.

⁸Nya̍ wānāā yɔ̄ŋ wɔ̄ɔ̍ŋnda̍ ha̍ā, I̍ ye̍e̍ma̍ nya̍ mī lā lōōnu̍ŋ he̍ī. Lā pu̍ɛ̍ɛ̍nu̍ŋ ndi̍ le̍, Ī wa̍ nya̍ o̍ lākɔ̄l lɔ̍ɔ̍ lɔ̍ɔ̍.

⁹Lā lōōnu̍ŋ ndɔ̍ a̍ sɔ̄ɔ̍ŋ ya̍ I̍ to̍sa̍ pāāndū wo̍ŋ, sɔ̄ɔ̍ŋ yɔ̍nu̍ŋ si̍ndɛ̄ wo̍ŋ. Ya̍ pīlɛ̍ kpe̍ cho̍ Mɛ̄lɛ̄ka̍ ni̍, mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ ya̍ kɔ̍ɔ̍lī le̍. Ya̍ Mɛ̄lɛ̄ka̍, wānā o̍ wānā cho̍ māā ya̍ le̍.

¹⁰O̍ kāndɔ᷄ŋndo̍ mi̍ di̍mūl nya̍ nyɛ̍ nɔ̍ le̍ yɔ̄nɔ᷄ŋndo̍ o̍ mɛ̄ɛ̄lu̍la̍ŋndo̍, lɔ̍ɔ̍pa̍ bɛ̍ɛ̍ mi̍ ī yɔ̄nu᷄ŋ. Sɔ̄ɔ̍ŋ nɔ̍ le̍ hūnɔ̄ɔ̄ yɔ̄nɔ᷄ŋndo̍ wo̍ŋ, mi̍ di̍mūl nya̍ a̍ mu̍ŋ o̍kɔ̄ɔ̄ sīndɛ̄ pa̍. Ya̍ Mɛ̄lɛ̄ka̍, nyɛ̄ o̍ nyɛ̄ ya̍ I̍ tu̍u̍ pɛ̍, yɔ̄nɔ᷄ŋndo̍ o̍ yɔ̍nūŋ ni̍. Nyɛ̄ ya̍ I̍ ye̍e̍mā le̍ tōsāa̍ wo̍, ndu̍ ya̍ I̍ to̍sā ni̍.

¹¹I̍ cho̍ wāŋndo̍ sōlī bā pāa̍le̍ŋ lē chāŋndo̍ mī hīŋ a̍ ndu̍, le̍ mbō hu᷄ŋ to̍sā nyɛ̄ ya̍ I̍ kɛ̍ɛ̍si̍a̍a̍ le̍ tōsāa̍ wo̍. Mɛ̄ɛ̍ si̍a̍āŋndo̍ ō tūāl na̍a̍ū su̍lūlū le̍ sɔ̄ɔ̍ chūa̍a̍ yɛ̍, le̍nde̍ o̍ hu᷅ŋ ni̍ŋ ni̍. Nyɛ̄ ya̍ I̍ di̍mi̍ māā ō chō yɔ̄nɔ᷄ŋ ndo̍, mɛ̄ɛ̍ mī to̍sa̍ mbō yɔ̄nu̍ŋ. Nyɛ̄ ya̍ I̍ kɛ̍ɛ̍si̍a̍a̍ le̍ tōsāa̍ wo̍, mɛ̄ɛ̍ mī to̍sa̍ ndu̍.

¹²“Lā ya᷄ŋ ya̍ nīla̍ŋ, nya̍ wānāā bōlīī kālāa̍ ha̍ā, nya̍ ba̍ŋa᷄ŋndo̍ chō ha̍ā la̍nda̍ŋ a̍ nya̍ wa̍.”

¹³“Ō bēndu̍ lɛ̍ a̍ ti᷅ŋ te̍, mī to̍sa̍ mī wāŋnda̍ ā sɔ̄la̍ bāŋa᷄ŋndo̍, te̍le̍ŋ ko̍ŋ ō chō ni᷅ŋ kpɛ̍ɛ̍lūŋ. Ndu̍yɛ̍ te̍le̍ŋ ya̍ I̍ chi̍i̍ndīāā ni̍ŋ wa᷅ŋnda̍ wo̍ ō bēndu̍ lɛ̍ le̍, ō chō ni᷅ŋ kpɛ̍ɛ̍lūŋ. I̍ cho̍ Chūlu̍sɛ̄lɛ̄m chīīndīāā, mī to̍sa̍ mī wāŋnda̍ chē nāŋɔ̄ɔ̄ nī bɛ̍ndōo̍ I̍sɔ̄lūɛ̄ī.”