Read Southern Kisi Āīsa̍yā 47 Bible Online

Āīsa̍yā 47 - Southern Kisi bible

Āīsa̍yā 47

¹Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “O̍o̍ chi̍e̍e̍ bɛ̍ndo̍o̍ Ba̍bi̍lɔ̄ŋ, chi̍e̍e̍ wa̍ ho̍ō māā yūfu̍a̍a̍nɔ̍ wo̍, māsāle̍ nu̍mnde̍ŋ lē mɛ̄ɛ̄lu̍. To̍l o̍ kpe̍ŋgbe̍i̍ nu̍m lēmāsāa̍ chōo̍, mā cha̍l lɛ̄ŋ o̍ chu̍ndo̍o̍ ni᷄ŋ. Le̍ fɛ̍ɛ̍ŋ a̍ fɛ̍ɛ̍ŋ wāŋnda̍ ve̍e̍lū lɛ̍ nu̍m āā mɔ̄sɔ̄lɔ̄ɔ̄ le̍, kɛ̄lɛ̄ŋgāā le̍, mā vēēlu̍ nu̍m āā nāŋɔ̄ɔ̄.

²Ka̍ndu̍ ko̍lo̍ bēe̍dīi̍yo̍ tōōsīa̍a̍ a̍ bā nūm. Chu̍a̍ po̍u̍tā nda̍ chūī ko̍lo̍ bēe̍dīi̍yo̍ la̍ŋ, mā ka̍ndu̍ kōlo̍ bēe̍dīi̍yo̍ chūīyo̍. Fa̍ŋa̍ ko̍lo̍ cho̍ nu̍m o̍ hɔ̄l le̍ nu̍m hɔ̄lla̍ kūmbɔ̄ɔ̍ wo̍, ndu̍yɛ̍ dōmā vi̍lɛ̄ī kɛ̄ndɛ̄ kɛ̍ndɛ̍ cho̍ nu̍m lēkɔ̄ɔ̍ wo̍ mā sōli̍. He̍e̍lu̍ ko̍lāa̍, lɔ̄lūla̍ŋ kpo̍u̍ mī lā lo̍ nu̍m fo̍ndō, le̍ pēēla̍ ŋ̄ chō wā tāŋɔ̄ɔ̍ la̍ŋ.

³Ā chō hūnɔ̄ɔ̄ lō fo̍ndō, nyɛ̄ o̍ nyɛ̄ ve᷅ nu̍m lēkɔ̄ɔ̍ le̍, ndu̍yɛ̍ mī wānā o̍ wānā che᷅ nu̍m fo̍ndō. Wāŋnda̍ chō nu̍m chɔ̄ nāa̍ ŋ̄ nɔ̍ le̍ wā le̍ wa̍, mī si̍ɔ̍mbu̍la̍ŋ lā bīī nu̍m. Nyɛ̄ o̍ nyɛ̄ ŋ̄ tōsa̍, I̍ cho̍ nu̍m hūnɔ̄ɔ̄ māa̍ ko̍ŋ mīŋgūl, ndu̍yɛ̍ wāŋndo̍ ō pīlɛ̍ bɛ̍ɛ̍ I̍ tu̍i̍i̍nūŋ ni̍ŋ i̍nyi̍ɛ̍ɛ̍ le̍.”

⁴Na̍a̍ I̍sɔ̄lūɛ̍i̍ya̍, Mɛ̄lɛ̄ka̍ nāā di̍a̍ndāa̍ ndu̍ cho̍ wānā na̍a̍ pīŋīa̍a̍ ni̍. Mɛ̄lɛ̄ka̍ kōŋ, dīōlā ndɔ̄la̍ŋ la̍ cho̍ ni̍ āā, Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍.

⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Ba̍bi̍lɔ̄ŋ, cha̍l o̍ nyūmnda̍ŋ ni᷄ŋ o̍ me̍i̍yāā kpu᷅li̍, ba̍kō bɛ̍ɛ̍ su̍a̍ā le̍. Le̍ fɛ̍ɛ̍ŋ a̍ fɛ̍ɛ̍ŋ, wāŋnda̍ ve̍e̍lū lɛ̍ nu̍m āā, ‘Māsā la̍a̍ndu̍ cho̍ lɛ̄ŋnde̍ bōlle̍ŋ ndo̍’ le̍.

⁶Ō wa̍ a̍ te̍le̍ŋ pu̍m, mi̍ du̍a̍u̍nu᷄ŋ tu̍mbe̍ a̍ wānāā nīa̍a̍. Wānāā nīa̍a̍ cho̍ ha̍ā māā nyɛ̄m ni̍ ŋ̄kɛ᷅ wa̍, mī lo᷅ o̍ ko̍ŋ mi̍ chu̍ā nda̍ nu̍a̍ā ŋ̄ chā māā ā cho̍ lɛ̍ wānāā nī le̍. O̍ ko̍ŋ, mi̍ ma᷅l nda̍ nu̍m o̍ bā. Kɛ̍ īnyīɛ̍ɛ̍ bɛ̍ɛ̍ a̍ tu̍i̍i̍nu̍ŋ nda̍ mā cha̍a̍ nda̍ bīyɔ̄ɔ̄ le̍. Bɛ̄ndūāā yūvɛ̍i̍ya̍a̍ wa̍ nda̍ tɛ̄ɛ̄ŋ nda̍ bɛ̍ɛ̍, ma̍ kīndīlā nda̍ kīndīlāa̍ pīla̍.

⁷Ma̍ lō o̍ ko̍ŋ ma̍ dīmī āā, ‘Ya̍ cho̍ wā wānā la̍nɔ̍ māsāa̍ lɛ̄ŋnde̍ chōo̍ le̍ fɛ̍ɛ̍ŋ a̍ fɛ̍ɛ̍ŋ ni̍.’ O̍ ko̍ŋ, ma̍ wā sɔ̄ɔ̍ŋ tōsāa̍, yīya̍ŋ bɛ̍ɛ̍ nūm o̍o̍ yi̍ya̍ŋ te̍, kɛ̄lɛ̄ŋgāāle̍, mī nūm o̍o̍ yi̍ya̍ŋ bɛ̍ɛ̍ mɛ̄ɛ̍ mɛ̄ɛ̄lu̍la̍ ndāla̍ŋ la̍a̍ wa᷅ ni̍ŋ yɛ̍.”

⁸“Le̍la̍ŋ ya̍ŋ ni̍la̍ŋ mā tūēī, nu᷄m ka̍a̍la̍ ho̍ō yōōmū chōōvɛ̍i̍yo̍ kāālā bɛ̄ndōo̍ wo̍. A̍ yi̍ya̍ŋ māā yōōmū nūmndo̍ ō chōnu᷄ŋ yɛ̍lɛ̍kɛ̍lɛ̍ɛ̍, ndu̍yɛ̍ ma̍ wānu᷄ŋ o̍ bā nūmndo̍ chōo̍, māā nyɛ̄ o̍ nyɛ̄ yɔ̍nūŋ a̍ nūm te̍. Ma̍ lō o̍ ko̍ŋ ma̍ dīmī o̍ kɔ̄l ni᷄ŋ āā, ‘Ya̍ cho̍ ya̍ ni̍, wānā o̍ wānā che᷅le̍ŋ ō cho̍ o̍ ya̍ kɔ̍ɔ̍lī le̍. Le̍ fɛ̍ɛ̍ŋ a̍ fɛ̍ɛ̍ŋ, I̍ ve᷅ vi̍i̍ nɔ̍ lɛ̍ pɔ̍nɔ̍ le̍ wo̍ le̍, kɛ̄lɛ̄ŋgāāle̍, mī vi̍i̍ku̍u̍ chūāā nīa̍a̍.’

⁹Kɛ̍ ndu̍yɛ̍ mī di̍mu̍l nu̍m, o̍ te̍le̍ŋ bi᷅ŋgi̍i̍ni̍i̍ bɛ̍ŋgu̍, o̍ pāa̍le̍ŋ lē pīlɛ̍ ni᷄ŋ kpe̍, sɔ̄ɔ̍ŋ sa̍lā tīɔ̍ɔ̍ŋndo̍ŋ mu᷅ŋ ŋ̄ chō nu̍m yɔ̄nɔ᷄ŋ. Ā chō pɔ̍nɔ̍ɔ̍ vīīkūū, ndu̍yɛ̍ mā vi̍i̍ku̍u̍ vɛ̄lɛ̄ chūāūwa̍. Mi̍ chē bɛ̍ɛ̍ ma̍ wā wānā vi̍a̍māā lāyāwā ni̍, ndu̍yɛ̍ ma̍ nɔ̄ kpāāyāa̍ le̍ sɔ̄ɔ̍ŋ mānyūmndo̍ŋ tōsāa̍, kɛ̍ sɔ̄ɔ̍ŋ sa̍lā tīɔ̍ɔ̍ŋndo̍ŋ mu᷅ŋ mɛ̄ɛ̍ mī ŋ̄ yɔ̄nu̍ŋ a̍ nūm.”

¹⁰“A̍ dɛ̍nɛ̍ wɔ̍ɔ̍ŋ ŋ̄ chō tōsāa̍ wo̍ kpo̍u̍, ma̍ yīya̍ŋ māā yōōmū nūmndo̍ ō chōnu᷄ŋ yɛ̍lɛ̍kɛ̍lɛ̍ɛ̍. Ma̍ wā yīya᷄ŋndo̍ māā nyɛ̄ o̍ nyɛ̄ ŋ̄ chō tōsāa̍, māā wānā o̍ wānā cho̍ nu̍m chɔ̄ le̍. Tāāsi̍o̍o̍ a̍ kɔ̄l kālu̍ ŋ̄ nɔ̄ ko̍ŋ ndo̍, ō hūi̍ nu̍m. Ma̍ lō o̍ ko̍ŋ ma̍ wa̍ yōŋgāa̍ kīōlɔ̄ɔ̍, mā dīmī māā, ya̍ cho̍ ya̍ ni̍, wānā o̍ wānā che᷅le̍ŋ cho̍ o̍ ya̍ kɔ̍ɔ̍lī le̍.

¹¹Kɛ̍ ndu̍yɛ̍ dɛ̍nɛ̍ pa̍lāā bɛ̄ndōo̍ ō chō nu̍m hūnɔ̄ɔ̄ tōlɔ̄ɔ̄ chōo̍, ndu̍yɛ̍ a̍ nɔ̍lā ni̍ŋ mā kpɛ̍kpɛ̍la̍ ndu̍ a̍ mānde̍lē nūmnde̍ŋ te̍. Kpūndɛ̍ bɛ̄ndōo̍ ō chō nu̍m kōmāl, ndu̍yɛ̍ a̍ nɔ᷅ ni̍ŋ kpa̍a̍yā o̍ kpāāyā mā fa̍ŋa̍ŋ ndu̍ chōo̍ le̍. Nyɛ̄ pālāā bɛ̍ndu̍ tɛ̍ɛ̍mbūū ni̍ŋ nu̍mndo̍ ō chō nu̍m hūnɔ̄ɔ̄ tōlɔ̄ɔ̄ chōo̍ o̍ lēpīlɛ̍ ni᷄ŋ kpe̍. Ndu̍yɛ̍ a̍ chi᷅ ndu̍ ni̍ŋ bɛ̍ɛ̍ o̍ hūnɔ̄ɔ̄ le̍.

¹²Hi̍o̍u̍ la̍chi̍ a̍ māŋgālālā nūmnda̍ŋ tōsāa̍ kpe̍e̍kpe̍i̍, ndu̍yɛ̍ a̍ sɔ̄ɔ̍ŋ nu̍m mānyūmndo̍ŋ, wa̍li̍ nu̍m ŋ̄ kāndu̍ o̍ chūāāmbɔ̄yɛ̍ī nūmnde̍ ni᷄ŋ ndo̍. Kɛ̄lɛ̄ŋgāā dɔ̍ɔ̍ mā sɔ̍la̍ mālāa̍ lēni᷄ŋ. Kɛ̄lɛ̄ŋgāā dɔ̍ɔ̍ mā nɔ̍la̍ mā to̍sa̍ mī sīōōŋnde̍ bīī ya̍a̍mɔ̍ɔ̍wa̍a̍ nu̍mnda̍.

¹³A̍ sīlālā wāŋnda̍ ā sīla̍ nu̍m ki̍nɛ̍i̍ la̍ŋ, kpāāyā o̍ kpāāyā a̍ sɔ̍la̍ le̍ni̍ŋ te̍. Le̍la̍ŋ nyu̍na̍ vɛ̍lɛ̄ wānāa̍ pɛ̍ɛ̍ku̍ a̍ nyɔ̄ɔ̍ŋ o̍ ha̍la̍a̍ ni᷄ŋ o̍kɔ̄ɔ̄ wa̍, wānāa̍ mɛ̍ɛ̍ndāŋ lo̍o̍ŋ, ndu̍yɛ̍ a̍ pāŋgu̍ŋ sɛ̍nɛ̄īyo̍ŋ mā chɔ̄m nyɛ᷅ wa᷅ hu̍nɔ̄ɔ̄ yɔ̄nɔ᷄ŋndo̍ wa̍. Nyu̍na̍ nda̍ mā chɔ᷄m nu̍m nyɛ̍ nɔ̍ le̍ yɔ̄nɔ᷄ŋndo̍ a̍ nūm, īpāŋgu̍ o̍ īpāŋgu̍ wo̍ mā chīīndi̍a̍a̍ nu̍m.”

¹⁴“Kɛ̍ ndu̍yɛ̍ wānāā kāŋ bɛ̍ɛ̍, mɛ̄ɛ̍ bīl vēsɛ̍i̍ fo̍ndō fu̍u̍ wo̍ ō wā nu̍a̍ā yɛ̍, le̍nde̍ nda̍ chō ni̍, ā nɔ̍lā mā māla̍ nya̍ le̍. Ndu̍yɛ̍ yīŋnde̍ŋ lē chō nda̍ hūnɔ̄ɔ̄ bāsɔ̄ɔ̄ tɛ̍ɛ̍. Ō cho̍ wɔ̍ le̍ nu᷄m chīīndīa̍a̍ le̍, kɛ̍ nda̍ pi̍la̍ bɛ̍ɛ̍ ā nɔ̍lā ni̍ŋ mā chīīndi̍a̍a̍ yōōmūlā ndāla̍ŋ te̍. Ā nɔ̍lā ni̍ŋ mā chīīndi̍a̍a̍ nda̍ pi̍la̍ o̍ yīŋndē lēŋ ni᷄ŋ te̍. Ā chō hūnɔ̄ɔ̄ yɔ̄nɔ᷄ŋ mɛ̄ɛ̍ dɛ̄ŋgūltā wānā nɔ̍lā mā ha̍ŋgu̍ le̍ la̍ŋ lā wā nu̍a̍ā yɛ̍, mɛ̄ɛ̍ yīŋndē wānā nɔ̍lā bɛ̍ɛ̍ mā cha̍l īkɛ̄i̍ le̍ le̍ŋ lē wā nu̍a̍ā yɛ̍.

¹⁵Māndi̍a̍a̍ nūm a̍a̍ nya̍ wa̍ ka̍ŋ wa̍llo̍ nya̍ nda̍ā, chɔ̍ŋ o̍ chūāāmbɔ̄yɛ̍ī nūmnde̍ ni᷄ŋ, ha̍a̍a̍ mbo̍ bīī a̍ te̍le̍ŋndo̍ ho̍ō wa̍, nda̍ kpo̍u̍ ā chō hūnɔ̄ɔ̄ sɛ̄ŋi᷄ŋ, mī wānā o̍ wānā chu̍a̍ nɛ̄i̍ ndɔ̄. Nda̍ ki̍nɛ̍i̍, wānā o̍ wānā nɔ̍lā ni̍ŋ mbō chīīndi̍a̍a̍ nu̍m te̍.”