Read Southern Kisi Āīsa̍yā 48 Bible Online

Āīsa̍yā 48 - Southern Kisi bible

Āīsa̍yā 48

¹Lā ya᷄ŋ ya̍ nīla̍ŋ, nya̍ yu̍ŋgu̍ Che̍kɔ̍pū wo̍, nya̍ wāŋnda̍ I̍sɔ̄lūɛ̄ī, wānāa̍ fu̍la̍ o̍ pūlāle̍ Chu̍dāle̍ŋ chōo̍ wa̍. Lā chō mēna᷄ŋndo̍ o̍ dīōlā Mɛ̄lɛ̄ka̍ Ya̍a̍wɛ̄ɛ̄ la̍ŋ, ndu̍yɛ̍ mī lā dīmī a̍ sōndōlā nyāla̍ŋ māā Mɛ̄lɛ̄ka̍ I̍sɔ̄lūɛ̍i̍ya̍, māā ndu̍ nya̍ chō sōōlūūwo̍ ni̍. Kɛ̍ ndu̍yɛ̍ a̍ sōndōlā nyāla̍ŋ ko̍ni̍ nya̍ chō ndu̍ sōōlūūwo̍ ni̍, lā cho̍ ndu̍ sōōlūū o̍ nɛ̄i̍ tōnya̍ chōo̍ le̍, kɛ̄lɛ̄ŋgāāle̍, mī lā tōsa̍ nyɛ̍ bɛ̍nda̍ le̍ tōsāa̍ wo̍.

²Ndu̍yɛ̍ a̍ ko̍ŋ kpo̍u̍, mi̍ lā wā hēēlɔ᷄ŋndo̍ mī lā dīmī māā nya̍ cho̍ pi̍la̍ chi̍e̍e̍ya̍ o̍ chi̍e̍e̍ di̍a̍ndāa̍ Mɛ̄lɛ̄ka̍a̍ ni̍, ndu̍yɛ̍ māā Mɛ̄lɛ̄ka̍ I̍sɔ̄lūɛ̍i̍ya̍, o̍ nɔ̍ dīōla̍ŋ āā Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ wo̍, māā o̍ ndu̍ ni̍ŋ nya̍ dɔ̄ū tīīnda᷄ŋ nyāa̍ ni̍.

³Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l wāŋnda̍ I̍sɔ̄lūɛ̄ī āā, “Sɔ̄ɔ̍ŋ mu̍ŋ nɔ̍ le̍ hūnɔ̄ɔ̄ yɔ̄nɔ᷄ŋndo̍ wo̍ŋ, sīndɛ̄ pa̍ ya̍ I̍ di̍mu̍l nya̍ a̍ mu̍ŋ o̍kɔ̄ɔ̄ ni̍. Ŋ̄ wa̍ la̍nda̍ŋ le̍ yɔ̄nɔ᷄ŋndo̍ mi̍ su̍a̍ā a̍ mu̍ŋ o̍kɔ̄ɔ̄, ndu̍yɛ̍ mi̍ chɔ᷅m nya̍ mu̍ŋ. Ndu̍yɛ̍ o̍ lēpīlɛ̍ ni᷄ŋ kpe̍, mi̍ to̍sā mi̍ ŋ̄ yɔ̄nu᷄ŋ.

⁴Mi̍ si̍nā kɛ̍sɛ̍ kɛ̍sɛ̍ māā wānāā bōlīī kālāa̍ nya̍ chō ni̍. Mi̍ si̍nā māā ō cho̍ wa̍nāā wānā nɔ̍la̍ nāŋɔ̄ɔ̄ le̍ nya̍ chō le̍, bōlle̍ nya̍ ī kālā pe᷅ŋ māā ŋ̄chīli̍ŋ.

⁵Nyɛ̄ kōŋ ya̍ I̍ di̍mu̍l nya̍ a̍ sɔ̄ɔ̍ŋ mu᷅ŋ o̍kɔ̄ɔ̄ sīndɛ̄ pa̍ ni̍, lɔ̍ɔ̍ pa̍ bɛ̍ɛ̍ ŋ̍ yɔ̍nūŋ. Ŋ̍ wa̍ wɔ̄ la̍nda̍ŋ le̍ yɔ̄nɔ᷄ŋndo̍ mi̍ su̍a̍ā a̍ mu̍ŋ o̍kɔ̄ɔ̄, yɔ̄ŋi̍ nya̍ a̍a̍ hu̍ŋ di̍mī māā, Mɛ̄lɛ̄ka̍ā na̍a̍ to̍sa̍ sɔ̄ɔ̍ŋ mu̍ŋ ni̍. Mɛ̄lɛ̄ka̍ā nāa̍ na̍a̍ ŋ̄ tōōsi̍a̍a̍ a̍ yɔ̄mnde̍, ndu̍yɛ̍ a̍ chīli̍ŋnde̍ wa̍, nda̍ to̍sa̍ ni̍ mi̍ sɔ̄ɔ̍ŋ mu᷅ŋ yɔ̄nu᷄ŋ.

⁶“Nyɛ̄ o̍ nyɛ̍ yɔ̍nu̍ŋ lā tūēī fɛ̍lɛ̍ŋ a̍ ndu̍ o̍kɔ̄ɔ̄, ndu̍yɛ̍ mi̍ lā chā ndu̍ o̍ yɔ̄nɔ᷄ŋndo̍. I̍ che᷅ māā lā nɔ̄ ni᷅ŋ mī lā chɛ᷄l ndi̍ a̍ tōnya̍ māā nyɛ̄ ya̍ I̍ di̍mi̍ wo̍ ō yɔ̄nu̍ŋ a̍ tōnya̍. I̍ cho̍ nya̍ vɛ̄lɛ̄ sɔ̄ɔ̍ŋ sɛ̍nɛ̄ī ŋ̄ chēle̍ŋ dīmūl a̍ te̍le̍ŋndo̍ ho̍ō, sɔ̄ɔ̍ŋ nɔ̍ le̍ hūnɔ̄ɔ̄ yɔ̄nɔ᷄ŋndo̍ wo̍ŋ. Sɔ̄ɔ̍ŋ ya̍ I̍ cho̍ nya̍ dīmūl a̍ mu̍ŋ o̍kɔ̄ɔ̄ wo̍ŋ, sɔ̄ɔ̍ŋ ŋ̄sūmīāllo̍ŋ ŋ̍ cho̍ a̍ nya̍ ni̍, kāni̍ bɛ̍ɛ̍ lā tūi̍ yɔ̍ a̍ mu̍ŋ o̍kɔ̄ɔ̄ le̍.

⁷Su̍ŋ su̍ŋ ko̍ni̍ ya̍ I̍ to̍sa̍ ni̍ mi̍ sɔ̄ɔ̍ŋ mu᷅ŋ ŋ̄ wā yɔ̄nɔ᷄ŋndo̍, ŋ̄ ve̍ kāni̍ bɛ̍ɛ̍ le̍. Lā tūi̍ yɔ̍ a̍ mu̍ŋ o̍kɔ̄ɔ̄ kāni̍ bɛ̍ɛ̍ le̍, mɛ̄ɛ̍ hāū mi̍ wa᷅ nya̍ dīmūllo̍ a̍ mu̍ŋ o̍kɔ̄ɔ̄. Ko̍ŋ to̍sā ni̍, lā nɔ̍lā mī lā dīmi̍ māā lā sīna̍ ni᷅ŋ a̍ mu̍ŋ o̍kɔ̄ɔ̄ le̍.

⁸Mi̍ si̍nā kɛ̍sɛ̍ kɛ̍sɛ̍ māā lā cho̍ wa̍nāā wānā nɔ̍la̍ mā ti̍i̍nda̍ŋ te̍, māā chɔ̍ŋ a̍ vīōlɔ᷄ŋ nyāa̍, wānāa̍ si̍mu̍l la̍ wa̍ nya̍ chō ni̍. Nyɛ̄ ko̍ŋ to̍sa̍ ni̍, mi̍ to̍sā le̍pi᷅lɛ̍ bɛ̍ɛ̍ lā tūi̍ a̍ sɔ̄ɔ̍ŋ mu̍ŋ o̍kɔ̄ɔ̄ le̍. Chɔ̍ŋ bɛ̍ɛ̍ a̍ pa̍lɛ̍i̍ māsīndɛ̄i̍, nīlā nyāla̍ŋ lā nɔ̄lā mī lā tūēī a̍ sɔ̄ɔ̍ŋ mu᷅ŋ o̍kɔ̄ɔ̄ lē.

⁹“Kɛ̍ le̍ mī wāŋnda̍ ke̍ dīōlā nīla̍ŋ bɛ̄ɛ̄le̍ŋ, I̍ cho̍ kɔ̄l nūu̍ bīyɔ̄ɔ̄, I̍ tu̍u̍lū kɔ᷅llo̍ a̍ nya̍ le̍. Le̍ mī wāŋnda̍ ā sāŋga̍la̍ ya̍, I̍ cho̍ kɔ̄l nūu̍ bā tīū, I̍ do̍u̍nūŋ tu̍mbe̍ a̍ nya̍, mī tɛ̄ɛ̄mbu̍u̍ nya̍ le̍.

¹⁰I̍ to̍sa̍ mi̍ lā sīmnu᷄ŋ a̍ di̍a̍ndāā. Kɛ̍ ndu̍yɛ̍, dīndī nya̍ sɔ̄la̍ wo̍, ō cho̍ mɛ̄ɛ̍ nda̍ dīndī nu̍a̍ā ka̍ni̍i̍ hu̍mbūe̍i̍ a̍ yīŋnde̍ŋ yɛ̍ le̍. Mi̍ lo᷅ o̍ ko̍ŋ, mi̍ tu̍sī nya̍ nyɛ̄ pālāa̍ chōo̍ le̍ nya̍ tōfāa̍ mī si̍na̍ wānāā su̍u̍wa̍a̍ nya̍ chō wa̍.

¹¹Le̍ yɔ̄ŋi̍ wāŋnda̍ ā tɛ̄ɛ̄mbu̍u̍ di̍o̍la̍ nīla̍ŋ lābɛ̄ɛ̄, nyɛ̄ ko̍ŋ ya̍ I̍ bi̍ī kɔ̄l nūu̍ ni̍, mi̍ to̍sā ke̍ŋ. Ya̍ Mɛ̄lɛ̄ka̍, I̍ chɛ᷅l mī wāŋnda̍ ā tɛ̄ɛ̄mbu̍u̍ dīōlā nīla̍ŋ lābɛ̄ɛ̄ le̍. Ndu̍yɛ̍ bɛ̄ɛ̄le̍ cho̍ le̍ ya̍ le̍ŋ, le̍ ya̍ pīlɛ̍ kpe̍ le̍ nɔ̍ ni̍ mī le̍ wa̍.”

¹²Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Lā ya᷄ŋ ya̍ nīla̍ŋ, nya̍ yu̍ŋgu̍ Che̍kɔ̍pū wo̍, nya̍ wāŋnda̍ I̍sɔ̄lūɛ̄ī, wānāā ya̍ I̍ hɛ̍li̍ wa̍. Ya̍ cho̍ Mɛ̄lɛ̄ka̍ ni̍. Ndu̍yɛ̍ ya̍ cho̍ wāna̍ tāso̍o̍ ni̍, ya̍ cho̍ vɛ̄lɛ̄ wānā mɛ̍ɛ̍lāa̍ ni̍.

¹³A̍ bālā nīla̍ŋ ya̍ I̍ ki̍la̍ chīyīī chi̍e̍ēŋndo̍ ho̍ō ō si᷄m chōo̍ ve̍ ni̍, ndu̍yɛ̍ bā nī kɛ̍ndɔ̄ɔ̍, ndu̍ pɛ̍ŋgɛ̍la̍ ha̍la̍a̍ chōo̍ cho̍o̍ ni̍. Ndu̍yɛ̍ chi̍e̍ēŋndo̍ ni̍, ha̍la̍a̍ ni̍, mɛ̄ɛ̍ ya̍ I̍ ve̍e̍lu̍ nda̍, ma̍ fūlā.”

¹⁴“Lā chūūŋgi̍āŋ mɛ̄ɛ̍ nya̍ chō kpo̍u̍, mī lā hu᷄ŋ ya᷅ŋ nīla̍ŋ. Mɛ̄lɛ̄ka̍ā nyāa̍ ki̍nɛ̍i̍, o̍ kūɛ̍ɛ̍nɛ̍ nɔ̍la̍ yɛ̄ mbo̍ chɔ̄m nya̍ sūɛ̍i̍ cho̍ he̍ī hūnɔ̄ɔ̄ yɔ̄nɔ᷄ŋ nde̍? Wāna̍ cho̍ hūnɔ̄ɔ̄ nyɛ̄ ya̍ I̍ kɛ̍ɛ̍si̍a̍a̍ le̍ tōsāa̍ a̍ Ba̍bi̍lɔ̄ŋ ndo̍ tōsā wo̍, I̍ ka̍a̍la̍ ndu̍. Ō chō hūnɔ̄ɔ̄ Ba̍bi̍lɔ᷄ŋ chīŋa̍la᷅ŋ, ndu̍yɛ̍ mbō tɛ̄ɛ̄mbu̍u̍ ndu̍ kpo̍u̍.”

¹⁵“Ya̍ Mɛ̄lɛ̄ka̍, ya̍ so̍ō ni̍. I̍ ve̍e̍lu̍ ndu̍ le̍ mbō hīŋ. I̍ cho̍ hūnɔ̄ɔ̄ a̍ ndu̍ mī ke̍ ndu̍ kpāāyāa̍, mbō tōsa̍ nyɛ̄ o̍ nɔ̍ le̍ tōsāa̍ wo̍.

¹⁶Lā sɔ̄ɔ̄ŋgu̍u̍ ya̍ īkɛ̄i̍ mī lā tūēī nyɛ̄ ya̍ I̍ nɔ̍ le̍ dīmīo̍o̍ wo̍. Chɔ̍ŋ a̍ kāndɔ᷄ŋndo̍ mbo̍ bīī a̍ te̍le̍ŋndo̍ ho̍ō, kpe̍nde̍ke̍le̍ ya̍ I̍ so̍ō nāa̍ nya̍ chūā ni̍, I̍ su̍u̍ o̍ vīōŋnɔ᷄ŋ ni̍ŋ te̍. Ndu̍yɛ̍ te̍le̍ŋ sɔ̄ɔ̍ŋ mu᷅ŋ ŋ̄ ka̍ndu̍ yɔ̄nɔ᷄ŋndo̍ wo̍, I̍ wa̍ lo̍ŋ.” “Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̍ndōo̍ ō tōsa̍ mi̍ nyi̍nā ndɔ̄ɔ̍ ō tūāl ya̍ A̍īsa̍ya̍ kɔ̄ɔ̄lī, ndu̍yɛ̍ mbo̍ vīām ya̍.”

¹⁷Mɛ̄lɛ̄ka̍ Ya̍a̍wɛ̄ɛ̄, o̍ cho̍ wāna̍ nyā pi̍ŋīa̍a̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndā di̍a̍ndāa̍, nyɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍. Le̍ te̍le̍ŋ o̍ te̍le̍ŋ nyɛ̍ bɛ̍ndā le̍ tōsāa̍ wo̍, ndu̍ ya̍ I̍ pɛ̍ɛ̍kū nya̍ ni̍, ndu̍yɛ̍ mī chɔ̍m nya̍ nɛ̄i̍ nya̍ nɔ̄ le̍ kɔ̄la̍ŋ chōo̍ wo̍.

¹⁸Tē nya̍ a̍a̍ tu̍e̍ī ya̍ dīōm pɛ̍, mī nya̍ a̍a̍ to̍sa̍ nyɛ̄ ya̍ I̍ di̍mu̍l nya̍ wo̍, sa̍lā bɛ̄ndōo̍ ō wa̍ wā nya̍ chōo̍, ndu̍yɛ̍ mī ndu̍ o̍o̍ wa̍ nya̍ chōo̍ le̍ fɛ̍ɛ̍ŋ a̍ fɛ̍ɛ̍ŋ, mɛ̄ɛ̍ pīo̍o̍ ō hīāū nu̍a̍ā ō ve̍lā le̍ yɛ̍. Mɛ̄ɛ̍ mɛ̄ŋnda̍ŋ o̍ Pēe̍ Mɛ̄ŋmā Īhɛ᷄llo̍ mā hūŋ nu̍a̍ā a̍ kpāāyā bɛ̍ndōo̍ yɛ̍, le̍nde̍ dɛ̍nɛ̍ nyā kɛ̍ndɔ̄ɔ̍ ndu̍ o̍o̍ hu᷅ŋ ni̍ŋ a̍ kpāāyāa̍ kɔ̄ɔ̄lī ni̍.

¹⁹Chūāā nyāā ma̍māa̍, mɛ̄ɛ̍ si̍o̍ōŋnde̍ ī wā nu̍a̍ā o̍ pīo̍o̍ kɔ̄ŋgɔ̍ yɛ̍, le̍nde̍ nda̍ a̍a̍ wa᷅ ni̍ŋ ni̍, nda̍ a̍a̍ chu̍ū ni̍ŋ chɔ᷅m te̍. Ndu̍yɛ̍ I̍ wa̍ tōsā, nda̍ a̍a̍ chu̍ū ni̍ŋ, mī pūlālē ndāle̍ŋ le̍e̍ ki̍o̍lu̍ ya̍ o̍ hɔ̄l te̍.”

²⁰Wānāā nīa̍a̍ lā fūla̍ Ba̍bi̍lɔ̄ŋ. Lā hīɔ̄lu̍ŋ wa᷅ŋnda̍ Ba̍bi̍lɔ̄ŋ mī lā nyāānu̍ŋ. Lā bālu̍ a̍ yōōŋgū kɛ̄ndɔ̄ɔ̍ ho̍ō yōndāa̍ a̍ kɔ̄l kɛ̄ndɛ̄ bɛ̄ndo̍o̍. Lā sɛ̄ŋi̍ ndu̍ o̍ chi̍e̍ēŋndo̍ ni᷄ŋ kpo̍u̍. Lā dīmu̍l wa᷅ŋnda̍ āā, “Mɛ̄lɛ̄ka̍ Ya̍a̍wɛ̄ɛ̄, o̍ chi̍i̍ndi̍a̍a̍ bu̍ɛ̍ī ndɔ̄ɔ̍, yu̍ŋgu̍ Che̍kɔ̍pū wo̍.”

²¹Bōōndi̍i̍ Mɛ̄lɛ̄ka̍ Ya̍a̍wɛ̄ɛ̄ o̍ so̍li̍ wānāā ndūa̍a̍ I̍chi̍pī mbo̍ wā kēēkōo̍ a̍ nda̍ o̍ lɛ̄ŋndē po̍lte̍ŋ ni᷄ŋ nde̍, ō me᷄l nda̍ mā wa̍ a̍ bo̍lōlā vēsɛ̍i̍ le̍. Mbo̍ tōsā mi̍ mɛ̄ŋnda̍ŋ mā fūlā o̍ pōūwo̍ ni᷄ŋ, le̍ mā ko᷄l. Mbo̍ tɛ̄ndā pōūwo̍, mi̍ mɛ̄ŋnda̍ŋ mā pīɔ̄l o̍ pōū kōŋ ni᷄ŋ.

²²“Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ wānāā dɛ̍nɛ̍ wɔ̍ɔ̍ŋnda̍ o̍kɔ̄ɔ̄ wo̍ cho̍ ho̍ō ni̍. Ō dīmi̍ māā, wānāā dɛ̍nɛ̍ wɔ̍ɔ̍ŋnda̍, a̍ sɔ̍lā kɔ᷅l nyūlū o̍ kɔ̄l nyūlū le̍.”