Read Southern Kisi Āīsa̍yā 49 Bible Online

Āīsa̍yā 49 - Southern Kisi bible

Āīsa̍yā 49

¹Nya̍ wāŋnda̍ o̍ lɛ̄ŋīi̍ ho̍lnu̍ŋ pe̍e̍ mɛ̄ŋmā īhɛ᷄llo̍ ve̍ ni᷄ŋ, lā ya᷄ŋ ya̍ nīla̍ŋ, Lā tūe̍i̍ nyɛ᷅ ya̍ I̍ cho̍ dīmīo̍o̍ wo̍, nya̍ wāŋnda̍ o̍ lɛ̄ŋīī lēvīl bɛ̄ndūe̍i̍ ni᷄ŋ. Ya̍ i̍i̍ vi̍lu̍ŋ ndɔ̍ le̍, ya̍ A̍īsa̍ya̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ ya̍ le̍ mī sa̍a̍ŋgi̍a̍l ndu̍. I̍ wa̍ wɔ̄ o̍ dēmbōo̍ ni᷄ŋ pɔ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ve̍e̍lū ya̍ le̍ wa̍li̍ ndɔ̄ɔ̍.

²Ndu̍yɛ̍, dīōmndā o̍ du̍a̍ū ya̍ o̍ sōndō la̍ŋ, lūɛ̄īyɔ̄ɔ̍ mɛ̄ɛ̍ mūɛ̄ī fāŋnde̍ ī lūɛ̄ī nu̍a̍ā yɛ̍. Mbo̍ lō o̍ ko̍ŋ, mbo̍ kūmbū ya̍ bā ndɔ̄ɔ̍ chōo̍, le̍ ya̍ māndāa̍. Mbo̍ bɛ̄ɛ̄ndīāā ya̍, mɛ̄ɛ̍ nda̍ bɛ̄ɛ̄ndīāā nu̍a̍ā chīŋɔ̍le̍ŋ, mā sɛ̄ɛ̄mbi̍a̍a̍ le̍ŋ, mā dɔ̄ū le̍ŋ o̍ bɔ̄lɔ̍ māchīŋɔ̄ɔ̍ ni᷄ŋ yɛ̍.

³Mi̍ Mɛ̄lɛ̄ka̍ lō o̍ ko̍ŋ mbo̍ dīmī āā, “I̍sɔ̄lūɛ̄ī, bu̍ɛ̍ī nūu̍ ŋ̄ chō ni̍. O̍ nūm ni̍ŋ sa̍na̍a̍ wāŋnda̍ ā sāŋgālā ya̍ ni̍ŋ ni̍.”

⁴11Kɛ̍ mi̍ di̍mī a̍a̍, “Mbɔ̄ I̍ sa̍ŋga̍ŋ fu̍u̍. Yɔ̄kpā o̍ yɔ̄kpā ya̍ I̍ yɔ̍kpa̍, fo̍ndō fu̍u̍ ko̍ni̍ o̍ cho̍ ni̍. Kɛ̍ I̍ ma̍l nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ bā. I̍ si̍nā māā fāndā nūu̍ chō Mɛ̄lɛ̄ka̍ o̍ bā.”

⁵Mɛ̄lɛ̄ka̍ Ya̍a̍wɛ̄ɛ̍ to̍o̍si̍a̍a̍ ya̍ o̍ dēmbe̍ kāla̍ nūu̍ ni᷄ŋ ni̍, mbo̍ sīīŋgū ya̍ bu̍ɛ̍ī ndɔ̄. Te̍le̍ŋ ko̍ŋ o̍ hɛ̍li̍ ya̍ ni̍ le̍ mī to̍sa̍ mī yu̍ŋgu̍ Che̍kɔ̍pū wo̍ ō mīīŋgu̍ ndu̍ o̍ ībūŋ, le̍ mī I̍sɔ̄lūɛ̍i̍ya̍ ha̍ā, ā chūūŋgi̍āŋ mā mīīŋgu̍ ndu̍ o̍ ībūŋ. Ndu̍yɛ̍ ndu̍ Mɛ̄lɛ̄ka̍ Ya̍a̍wɛ̄ɛ̄ ō chō tōsā mī sɔ̄la̍ bɛ̄ɛ̄le̍. Ndu̍ cho̍ wāna̍ to̍sā mī sɔ̍la̍ dīāllūŋ kāla᷄ŋ ndo̍ ni̍.

⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ āā, “Bu̍ɛ̍ī nūu̍ ŋ̄ chō ni̍. Nu᷄m cho̍ tōsā ni̍ mī yu̍ŋgu̍ Che̍kɔ̍pū wo̍, wāŋnda̍ I̍sɔ̄lūɛ̄ī, a̍ tūa̍a̍ lo̍ ha̍ā yōōmū wa̍, mā mīīŋgu̍ vɛ̄lɛ̄ māā pāāndū. Ndu̍yɛ̍ ō ve᷅ ni̍ŋ bɛ̍ɛ̍ ko̍ ke̍ŋ te̍, I̍ ke̍ nu̍m ni̍ŋ wa̍li̍ che᷅le̍ŋ o̍ hi̍o̍ū ko̍ŋ ndo̍. I̍ cho̍ tōsā mā sīmnu᷄ŋ nyɛ᷅ wa̍wo̍ŋndo̍ le̍ lɛ̄ŋnde̍ kpo̍u̍, le̍ mā to̍sa̍ mī wāŋnda̍ o̍ chi̍e̍ēŋndo̍ ni᷄ŋ kpo̍u̍ mā tūēī a̍ mɛ̄ɛ̍ ya̍ I̍ ba̍ŋā wa᷅ŋndā chīe̍e̍ya̍ o̍kɔ̄ɔ̄.”

⁷Wāna̍ wāŋnda̍ ā kɛ̄ɛ̍ ho̍ō, ndu̍yɛ̍ mi̍ wāŋnda̍ o̍ lɛ̄ŋnde̍ ni᷄ŋ a̍ tu᷅l ndu̍ yɛ̄le̍ŋ tūl bɛ̄ndōo̍, o̍ ko̍ŋ kɔ̍ɔ̍lī, mbo̍ sīmnu᷄ŋ bu̍ɛ̍īyo̍ le̍ wānāa̍ cho̍ wāŋnda̍ chīla̍ŋnda̍ wo̍, Mɛ̄lɛ̄ka̍ Ya̍a̍wɛ̄ɛ̄, I̍sɔ̄lūɛ̍i̍ya̍ wānā nda̍ pīŋīa̍a̍, o̍ cho̍ Mɛ̄lɛ̄ka̍ dīāndāā I̍sɔ̄lūɛ̍i̍ya̍ wo̍, nyɛ̄ o̍ di̍mu̍l wānā ko̍ŋ ndo̍ cho̍ ho̍ō ni̍. Ō dīmi̍ āā, “Māsāā bɛ̍ndūa̍a̍ ā chō nu̍m hūnɔ̄ɔ̄ chɔ̄ mā chɛ᷄ŋ i̍si̍si̍ le̍ nu̍m bɛ̄ɛ̄le̍ŋ kīo̍o̍. Wānāā bɛ̄ndūa̍a̍ ā chā nu̍m ni̍ŋ mā tūndu᷄ŋ nu̍m lāchī le̍ nu̍m bɛ̄ɛ̄le̍ŋ kīo̍o̍.” He̍ī ī chō yɔ̄nɔ᷄ŋ, kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ wānā di̍mī i̍sɔ̍ɔ̍ mbō lo̍ lēcho̍ō wo̍ o̍ cho̍ ni̍. Ndu̍ Mɛ̄lɛ̄ka̍, I̍sɔ̄lūɛ̍i̍ya̍ Mɛ̄lɛ̄ka̍ ndā di̍a̍nda̍a̍ ndu̍ hɛ̍li̍ nu̍m ni̍.

⁸Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l wānāā ndūa̍a̍ wo̍ cho̍ ho̍ō ni̍. Ō dīmi̍ āā, “Tē te̍le̍ŋ ya̍ I̍ cha᷅ ni̍ŋ nya̍ nyi̍nā wo̍ ō fūūlu̍u̍ pɛ̍, Tē pāa̍le̍ ya̍ I̍ chi̍i̍ndīāā nya̍ ni̍ŋ nde̍ŋ lē fūūlu̍u̍ pɛ̍, I̍ cho̍ pīɛ̄īlē nyāle̍ŋ mūlī, I̍ cho̍ nya̍ mālā. I̍ cho̍ nya̍ māndā, ndu̍yɛ̍ mī to̍sa̍ mī lā wa̍ māā kpe̍ma̍ na̍a̍ tɛ̄ɛ̄ŋ na̍a̍ ŋ̄wāŋndā chīe̍e̍ kpo̍u̍. Nya̍ mi̍ŋgī ni̍ŋ lɛ᷅ŋndē I̍sɔ̄lūɛ̍i̍le̍ cho̍ le᷅ŋ pɔ̄mndo̍ le̍ŋ bɛ̄ɛ̄ndīāā ni̍, mī lā mīŋgi̍ le̍ŋ mɛ̄ɛ̍ le̍ wa̍ pāāndū yɛ̍, ndu̍yɛ̍ mī lā tōsa̍ mī wānāā lēlɛ̄ŋnda̍ ā mīīŋgu̍ mā cha᷄l lo̍ŋ.

⁹Lā chō hūnɔ̄ɔ̄ wānāa̍ cho̍ o̍ bīyɔ̄ɔ̍ ni᷄ŋ nda̍ dīmūl, māā, lā fūla̍ mī lā kūɛ̄nu᷄ŋ, ndu̍yɛ̍, mī lā dīmu̍l wānāā nda̍ dɔ̄ū o̍ chīɛ̄īlā mānyūmnda̍ŋ ni᷄ŋ nda̍ māā, lā fūla̍ na̍a̍ wa̍wo̍ŋ nda̍, lā kɔ̄ŋnu̍ŋ. Bōōndi̍i̍ nda̍ wā ni̍ŋ mi̍i̍ŋgōo̍ o̍ lɛ̄ŋndē ndāle̍ŋ ni᷄ŋ nde̍, ā wā ni̍ŋ nyɛ̍ dīa̍a̍ sɔ̄lāa̍ mɛ̄ɛ̍ sāa̍ ā wā nu̍a̍ā kɔ̄la̍ŋ a̍ bīllo̍ dīo̍o̍ o̍ pēmbo᷄ŋ chōo̍ yɛ̍.

¹⁰Yīmā nɛ̍ī lɛ̍ ni̍ŋ nda̍ le̍. Bo̍lōlā vēsā lɛ̍ ni̍ŋ nda̍ le̍. Pāa̍le̍ lo̍ō lɛ̍ ni̍ŋ nda̍ le̍, ndu̍yɛ̍ hāŋgu̍l bi̍ī lɛ̍ nda̍ le̍, kāni̍ fo̍ndōle̍, wāna̍ tu̍i̍i̍nūŋ nda̍ ni̍ŋ i̍nyi̍ɛ̍ɛ̍ yo̍, ndu̍ mānda̍ ni̍ŋ nda̍ o̍ kɔ̄la̍ŋ ni᷄ŋ ni̍, ndu̍yɛ̍ mbō kēēku̍ a̍ nda̍ o̍ pēēla̍ pɔ̄mbɔ̄la̍ŋ īkɛ̄i̍.

¹¹“I̍ cho̍ nɛ̄īyo̍ yāmbɔ̄ɔ̄ o̍ pēmbo᷄ŋ chōo̍, mī bɛ̍ɛ̍ndi̍a̍a̍ nɛ̄īla̍ŋ le̍ wānāā nīa̍a̍.

¹²Wānāā nīa̍a̍ ā fūlā ni̍ŋ o̍ lɛ̄ŋīī lēvīlle̍ ni᷄ŋ nāa̍ nda̍ chō wā mā hīŋ, ha̍ā fūlā ni̍ŋ o̍ lɛ̄ŋnde̍ cho̍ bā lūāŋndo̍ le̍ŋ ni̍ŋ, mī ha̍ā fūla̍ o̍ lɛ̄ŋnde̍ cho̍ bā pāa̍le̍ŋ lē chāŋndo̍ le̍ŋ ni᷄ŋ, ndu̍yɛ̍, mī ha̍ā fūla̍ o̍ būŋgɛ̄ī A̍si̍wa᷅ŋnde̍[12] ni᷄ŋ ba᷅ tōūwo̍.”

¹³Nya̍ cho̍ o̍ fo̍nda᷄ŋ Mɛ̄lɛ̄ka̍a̍ wa̍, lā sōli̍ cho̍ndo̍ŋ. Chi̍e̍ēŋndo̍ kpo̍u̍ lā dēŋi̍ cho̍o̍ cho̍o̍ a̍ kɔ̄l kɛ̄ndɔ̄ɔ̍. Nya̍ pēmbūŋ bɛ̄ndo̍ŋ kpo̍u̍, lā sōli̍ cho̍ndo̍ŋ cho̍o̍ cho̍o̍, kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ nyɔ̍ɔ̍lu̍ wānāā ndūa̍a̍ kɔ̄lta̍ŋ, ndu̍yɛ̍ ō chō wānāā ndūa̍a̍ nda̍ chō nyɛ̄ pālāa̍ tūsīo̍o̍ chōo̍ wa̍ īnyīɛ̍ɛ̍ tūīīnɔ᷄ŋ.

¹⁴Kɛ̍ mi̍ wāŋnda̍ Sa̍a̍yɔ̄ŋ chi̍e̍e̍ a̍ lo᷅ o̍ ko̍ŋ ma̍ dīmī āā, “Mbɔ̄ Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ na̍a̍ kɛ̄ɛ̄. Ō chīi̍ pūɛ̄ɛ̄nɔ᷄ŋ a̍ na̍a̍.”

¹⁵Kɛ̍ mūlī Mɛ̄lɛ̄ka̍ Ya̍a̍wɛ̄ɛ̄ o̍ nɔ̍ le̍ nda̍ wo̍ cho̍ ho̍ō ni̍. Ō dīmi̍ āā, “Wāŋnda̍ Sa̍a̍yɔ̄ŋ, ko̍msa̍ kūɛ̍ɛ̍nɛ̍ o̍ pu̍ɛ̍ɛ̍nūŋ yɛ̍ a̍ chɛ̄lɛ̄kpɛ̍ ndɔ̍ o̍ cho̍ wūɛ̄sīo̍o̍ wo̍? Ko̍msa̍ kūɛ̍ɛ̍nɛ̍ o̍ wa᷅ yɛ̍, ō nɔ᷅ i̍nyi̍ɛ̍ɛ̍ le̍ chūa̍ fu̍la̍ ndu̍ o̍ dēmbē wo̍ le̍? Ā yɔ̄ŋ bɛ̍ɛ̍ mī ko̍msa̍a̍ ō nɔ̄la̍ mbō pūɛ̄ɛ̄nu̍ŋ a̍ chɛ̄lɛ̍kpɛ̍ ndɔ̍ o̍ ve̍lū wo̍, kɛ̍ ya̍ I̍ pu̍ɛ̍ɛ̍nūŋ a̍ nya̍ le̍.

¹⁶Chūlu̍sɛ̄lɛ̄m, dīōlā nūmnda̍ŋ lā chō lā pōōnyīāā ya̍ o̍ bā kɔ̄llo̍, I̍ pu̍ɛ̍ɛ̍nūŋ a̍ nūm te̍. Sāāsāla̍ ba̍lu̍ nu̍m nda̍ŋ, le̍ te̍le̍ŋ o̍ te̍le̍ŋ I̍ cho̍ yīya᷄ŋndo̍ a̍ la̍ŋ o̍kɔ̄ɔ̄.”

¹⁷“Wānāa̍ mi̍ŋgī ni̍ŋ nu̍m ta̍ŋgūl la̍, a̍ chō hūnɔ̄ɔ̄ su̍ŋ su̍ŋ bɛ̍ndū, wānāa̍ mi̍ŋgi̍ nu̍m pɔ̄m nda̍, ā chō fūla̍ mā ma᷄l lɛ̄ŋnde̍ŋ.”

¹⁸“Chu̍a̍ wɔ̍ hɔ᷅lla̍ mā mɛ̍ɛ̍nda̍ŋ nu̍m ō bālāā. Wānāā nūmnda̍ ā chō chūūŋgi̍āŋndo̍ nāa̍ pi᷅lɛ̍ ma̍ wā mīīŋgōo̍ nāa̍ nūm chu̍a̍. Ndu̍yɛ̍ ya̍ Mɛ̄lɛ̄ka̍ Ya̍a̍wɛ̄ɛ̄ I̍ me̍na̍ŋ po̍, hūnɔ̄ɔ̄ wānāā nūmnda̍ ā chō wo̍, I̍ cho̍ tōsā mā na̍ŋ kɔ̄l a̍ nda̍, mɛ̄ɛ̍ wānā la̍nɔ̍ wa᷅ ho̍ō cha᷄lle̍ o̍ nɔ̄ɔ̍ ni᷄ŋ ndo̍ ō nāŋ nu̍a̍ā kɔ̄l a̍ nyɛ̄m ba̍āŋ kālāŋ o̍ pēndū le̍ bāāyīa̍ŋndo̍ wo̍ŋ yɛ̍.

¹⁹“Mi̍ chē bɛ̍ɛ̍ ma̍ pīāl nu̍m, ma̍ lō pɔ̄m, ndu̍yɛ̍ lɛ̄ŋndē ŋ̄ chō ni᷄ŋ nde̍ŋ bɛ̍ɛ̍ mī lē sīmnu᷄ŋ pɔ᷅mndo̍, kɛ̍ nūm Chūlu̍sɛ̄lɛ̄m ā chō vɛ̄lɛ̄ hūnɔ̄ɔ̄ pīɔ̄ cha̍ a̍ wāŋndā chīe̍e̍ya̍. Wāŋndā chīe̍e̍ya̍ ā wā ni̍ŋ ha̍a̍a̍, nūm Chūlu̍sɛ̄lɛ̄m a̍ ve᷅ ni̍ŋ fo̍ndā lētūu̍ le̍ nda̍ le̍. Ndu̍yɛ̍ wānāa̍ tɛ̍ɛ̍mbu̍u̍ nu̍m nda̍, ā chō hūnɔ̄ɔ̄ lākɔ̄ la̍nda̍ŋ a̍ nūm.

²⁰Bōōndi̍i̍ wānāā nūmnda̍ ā wa̍ o̍ nyāānɔ᷄ŋndo̍ ni᷄ŋ nde̍, chūāūwāā nda̍ vēlū lo̍ŋ nda̍, ā hūŋ ni̍ŋ mā hu᷄ŋ di̍mūl nu̍m āā, ‘Fo̍ndāa̍ ho̍ō ō chō bɔ̍ɔ̍ o̍ pɔ̍mbɔ̄ le̍ na̍a̍. To̍sa̍ mī ŋ̄ chɔ̄ɔ̄lu̍ fo̍ndāa̍ sɔ̄lā le̍ mī ŋ̄ cha᷄l.

²¹O̍ ko̍ŋ, mī nūm pi̍la̍ cha̍l mā nyu̍na̍ŋ o̍ kɔ̄l ni᷄ŋ māā, ō nɛ̄ɛ̍nɛ̍ vi̍lu̍l lɛ̄ ya̍ chūāūwa̍ ha̍ā kpo̍u̍? Nyɔ̄ɔ̍ ō pāla̍ ya̍, ndu̍yɛ̍ chūāūwāā nīa̍a̍ ā bɔ̄ɔ̍ bɔ̍ɔ̍ ma̍ dīū nda̍, ā tūa̍a̍ ma̍ kūā a̍ nda̍ o̍ bīyɔ̄ɔ̍ ni᷄ŋ. Ō fūla̍ o̍ ko̍ŋ kɔ̍ɔ̍lī, I̍ wa̍ o̍ bīyɔ̄ɔ̍ ni᷄ŋ, ndu̍yɛ̍ mi̍ wānā o̍ wānā o̍ kɛ̍ɛ̄ ya̍. Ō nɛ̄ɛ̍nɛ̍ ma̍nda̍l lɛ̄ ya̍ chūāūwa̍ ha̍ā? Wāŋnda̍ kpo̍u̍ ma̍ kɛ̄ɛ̄ ya̍, mi̍ lo᷅ ni᷅ŋ ya̍ pīlɛ̍ kpe̍. Kūɛ̍ɛ̍nɛ̍ chūāūwa̍ ha̍ā kpo̍u̍ nda̍ fūla̍ yɛ̍?’ ”

²²Mɛ̄lɛ̄ka̍ Ya̍a̍wɛ̄ɛ̍ kpu̍lu̍ŋgūma̍ bɛ̄ndo̍o̍ ō dīmi̍ āā, “I̍ cho̍ lɛ̄ŋīi̍ si̍nā he̍ī ya̍ Mɛ̄lɛ̄ka̍ le̍ ve̍ bāa̍ hēēlūl māā tāāmāsi̍, le̍ nda̍ dīmūllo̍ mā hīŋ a̍ chūāūwāā nūmnda̍. I̍ cho̍ tāāmāsi̍o̍o̍ hēēlū chōo̍ cho̍o̍ le̍ mī wāŋnda̍ kpo̍u̍ a̍ che᷅. O̍ ko̍ŋ, lɛ̄ŋnde̍ he̍ī, nda̍ pi̍la̍ kɛ̍sɛ̍ kɛ̍sɛ̍ a̍ cho̍ wānāā nūmnda̍ chūā ni̍, mā hīŋ a̍ nda̍ nāa̍ nūm chu̍a̍, ā chō hūnɔ̄ɔ̄ a̍ chūāā nūm a̍ wa᷅ŋ pīāāndūa̍a̍ o̍ lāchōŋgu̍, ndu̍yɛ̍ mā hīŋ a̍ chūāā nūm a̍ wa᷅ŋ lāāndūa̍a̍ o̍ ŋ̄kɛ̄su̍.

²³Māsāā bɛ̍ndūa̍a̍ ā wā ni̍ŋ ma̍wa̍ā māā fi̍nyāā nūm, ndu̍yɛ̍, mī lāāndāā māsāā bɛ̍ndūa̍a̍ ā wa̍ māā kālāā nu̍m. Nda̍ kpo̍u̍ ā chō hūnɔ̄ɔ̄ tūndɔ᷄ŋ nu̍m lāchī, ndu̍yɛ̍ mā ba᷄ŋ wūla̍ŋ nu̍m o̍ lābɛ̄ŋgu̍ ni̍ŋ mā fūūlu̍u̍ hɔ̄lla̍ lɛ̄ŋ ndi̍, le̍ nu̍m bɛ̄ɛ̄le̍ŋ kīo̍o̍. O̍ ko̍ŋ, mā si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, māā wānā o̍ wāna̍ ti̍i̍nda̍ŋ ya̍ le̍ ndu̍ mālāa̍ pɛ̍, māā si̍ɔ̍mbu̍la̍ bi̍ī wa̍nā ko̍ŋ te̍.”

²⁴Ā nɔ̄lā mā pu̍u̍ ku̍u̍ba̍nɔ̍ɔ̍ nyɛ̄m o̍ chɛ̍ŋ o̍ chɔ̄ūwo̍ wo̍ŋ o̍ bā? Tē so̍vɛ̄i̍nɔ̍ kɔ̄l vēsɛ̍i̍yo̍ ō bīī wāŋndo̍ pɛ̍, ā nɔ̄lā mā po̍o̍nda̍ ndu̍ o̍ ba̍?

²⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Kɛ̍, ke̍ŋ ya̍ I̍ hi᷅ŋ tōsāa̍ ni̍. Wānāā ku̍u̍ba̍a̍ ā bīī bɛ̍ɛ̍ ma̍ wā nda̍ o̍ bā wa̍, I̍ cho̍ nda̍ pōōndā, wānāā so̍vɛ̄i̍ya̍a̍ kɔ̄l vēsɛ̍i̍ya̍ ā bīī bɛ̍ɛ̍ wa̍, I̍ cho̍ nda̍ bāŋā. Wānā o̍ wāna̍ sɔ̍ŋga̍ a̍ nūm pɛ̄, ya̍ Mɛ̄lɛ̄ka̍ chō sɔ̍ŋga̍ a̍ ndu̍, ndu̍yɛ̍ mī lo̍ o̍ ko̍ŋ mī chi̍i̍ndi̍a̍a̍ chūāūwāā nūmnda̍.

²⁶Wānāa̍ cho̍ nu̍m nyɛ̄ kīndīlāa̍ hāndɔ̄ɔ̍ chōo̍ wa̍, I̍ cho̍ tōsā mā dīūwa᷅ŋ, ndu̍yɛ̍ mā dē dīāllūŋ ndāa̍ŋ nda̍ pi̍la̍ŋ. Ā chō kōo̍ma̍ ndā ma̍ nda̍ pi̍la̍ŋ kōlɔ̄ɔ̄, ndu̍yɛ̍ mī mā bīī nda̍ māā māmūɛ̄ī. O̍ ko̍ŋ, mī wāŋndā kpo̍u̍ a̍ si̍na̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, wāna̍ chi̍i̍ndi̍a̍a̍ nu̍m ndo̍, māā ya̍ Mɛ̄lɛ̄ka̍ kpāāyā bɛ̍ndōo̍, Mɛ̄lɛ̄ka̍ Che̍kɔ̍pū wo̍, māā ya̍ cho̍ wānā nu̍m pīŋīa̍a̍ ni̍.”