Read Southern Kisi Āīsa̍yā 52 Bible Online

Āīsa̍yā 52 - Southern Kisi bible

Āīsa̍yā 52

¹Chɔ̍ŋ Chūlu̍sɛ̄lɛ̄m, chi̍e̍e̍ kāsi̍ Mɛ̄lɛ̄ka̍a̍, chɔ̍ŋ mā si̍m mā sɔ̄la̍ dīāllūŋ kāla᷄ŋ. Mi̍ŋgi̍ŋ vɛ̍lɛ̄ dōmā nu̍m lēbīɔ̍ɔ̍ lēkɔ̄ɔ̍ Chūlu̍sɛ̄lɛ̄m. Wānāa̍ si̍nā ha̍ā Mɛ̄lɛ̄ka̍ le̍ wa̍, a̍ cho̍ ha̍ā ā nɔ̄ɔ̄lɛ̍i̍ Mɛ̄lɛ̄ka̍ o̍ hɔ̄l la̍, fɛ̍ɛ̍ŋ a̍ fɛ̍ɛ̍ŋ ā lu̍e̍ī lɛ̍ na̍nu᷄ŋ te̍.

²Chūlu̍sɛ̄lɛ̄m, a̍ wa̍ o̍ bīyɔ̄ɔ̍ ni᷄ŋ, kɛ̍ a̍ sɔ̍la̍ bāŋa᷄ŋndo̍, chɔ̍ŋ mā kōŋ chu̍ndo̍o̍. Nya̍ wānāā nda̍ bīī Chūlu̍sɛ̄lɛ̄m nda̍, lā tīmbi̍ yɔ̍lɔ᷄ŋ nda̍ bāāyi̍a̍a̍ nya̍ o̍ lābo̍lō le̍ kɔ̄la̍ŋ a̍ nya̍ o̍ bīyɔ̄ɔ̍ ni᷄ŋ ndo̍ŋ.

³Nyɛ̄ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̍ndōo̍ o̍ di̍mi̍ wo̍ cho̍ ho̍ō ni̍. Ō dīmi̍ āā, “Kɔ̄lā nda̍ kūɛ̄ a̍ nya̍ o̍ bīyɔ̄ɔ̍ ni᷄ŋ nda̍ŋ wāŋnda̍ I̍sɔ̄lūɛ̄ī, ō cho̍ a̍ nyɛ̄ sɔ̄lāā le̍ nda̍ pēndū nya̍ ma̍ kūā a̍ nya̍ le̍. Ndu̍yɛ̍ bāŋa᷄ŋ nya̍ chō vɛ̄lɛ̄ sɔ̄lā wo̍, ō cho̍ a̍ nyɛ̍ sɔ̄lāā le̍ nya̍ chō ndu̍ sɔ̄lā le̍.”

⁴Māsānɔ̄ɔ̍ Mɛ̄lɛ̄ka̍ dīmi̍ āā, “Kɔ̄lā wānāā nīa̍a̍ ā kūɛ̄ sīndɛ̄ I̍chi̍pī la̍ŋ, nda̍ pi̍la̍ ku̍ɛ̄ ni̍ le̍ mā kɔ̍ cha᷅l lo̍ŋ māā lāmīāl. Ke̍ŋ hi̍o̍u̍wɔ̄ɔ̍, mi̍ Āsi̍i̍līāŋnda̍ ā hu̍ŋ de᷅l nda̍ chōo̍ ma̍ kūā a̍ nda̍ o̍ bīyɔ̄ɔ̍ ni᷄ŋ a̍ ka̍ka̍, ā pāāwā nyɛ᷅ o̍ nyɛ̄ le̍ nda̍ le̍.

⁵Nyɛ̄ pīlɛ̍ kōŋ, ndu̍ ko̍ni̍ yɔ̍nu̍ŋ vɛ̍lɛ̄ ho̍ō ni̍. Lɛ̄ŋndē chēle̍ŋ lē hu᷄ŋ de᷅l vɛ̄lɛ̄ wānāā nīa̍a̍ chōo̍ ma̍ kūā a̍ nda̍ o̍ bīyɔ̄ɔ̍ ni᷄ŋ a̍ ka̍ka̍, ā pāāwa̍ nyɛ᷅ o̍ nyɛ̄ le̍ nda̍ le̍. Wānāa̍ ku̍ɛ̄ ha̍ā a̍ nda̍, ma̍ wā nda̍ māsāa̍ chōo̍ wa̍, ā chō ya̍ bɛ̄ɛ̄la̍ŋ tɛ̄ɛ̄mbūūwo̍ kpe̍e̍kpe̍i̍. Le̍ īdīi̍ a̍ īchɔ̄l, wāŋnda̍ ha̍ā ā chō dīōmndā wɔ̄ɔ̍ŋnda̍ŋ sūɛ̍i̍ a̍ ya̍ o̍kɔ̄ɔ̄.

⁶Te̍le̍ŋ cho̍ fūūlūū, wānāā nīa̍a̍ ā chō sīnā wāna̍ ya̍ I̍ cho̍ wo̍. Ā chō sīnā māā ya̍ Mɛ̄lɛ̄ka̍, ya̍ so̍ō ni̍ mi̍ di̍mī māā I̍ cho̍ na̍nu᷄ŋ.”

⁷Ī chō bɔ̍ɔ̍ su̍ɛ̍i̍ kɛ̍ndɛ̄ī bɛ̄ndū, le̍ ki̍i̍la̍nɔ̍ɔ̍ chɔ̄ɔ̍ hūnɔ̄ɔ̍ a̍ kīlta̍ŋ, pēmbo᷄ŋ tōlɔ̄ɔ̍ mbō hēl, le̍ hūnɔ̄ɔ̍ a̍ yōōŋgū kɔ̄l kɛ̄ndɔ̄ɔ̍, yōōŋgu̍ cho̍ a̍ kɔ̄l nyūlōo̍ o̍kɔ̄ɔ̄ wo̍. Ki̍i̍la̍nɔ̍ɔ̍ hīŋ a̍ yōōŋgū kɛ̄ndɔ̄ɔ̍. Ō hīŋ le̍ mbō yōnda̍l wāŋnda̍ a̍ chīndā wāŋnda̍ ā sɔ̄lā ni̍ŋ ndo̍ o̍kɔ̄ɔ̄. Ō hīŋ le̍ mbō dīmu̍l Sa̍a̍yɔ̄ŋ māā, Mɛ̄lɛ̄ka̍ nūmndo̍ ndu̍ cho̍ māsā bɛ̄ndo̍o̍ ni̍.

⁸Lā ya᷄ŋ ndɔ̍ ni᷅la̍ŋ mī lā tūēī. Wānāā nyāā mɛ̍ŋgɛ̄lāa̍ ā chō dēŋīo̍o̍ chōo̍ cho̍o̍ kpe̍e̍kpe̍i̍ a̍ kɔ̄l kɛ̄ndɔ̄ɔ̍. Ā chō dēŋīo̍o̍ chōo̍ cho̍o̍ di̍ōmndo̍ ō pīlɛ̍ a̍ nya̍a̍lo̍o̍. Nda̍ kpo̍u̍, ā chā ni̍ŋ a̍ hɔ̄ltā ndāla̍ŋ pɛ̍ɛ̍ŋ, bōōndi̍i̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ ni̍ŋ mi̍i̍ŋgōo̍ Sa̍a̍yɔ̄ŋnde̍.

⁹Lā dēŋi̍ cho̍o̍ cho̍o̍ a̍ nya̍a̍lo̍o̍, nya̍ cho̍ o̍ pɔ̄mndo̍ ni᷄ŋ Chūlu̍sɛ̄lɛ̄m nda̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ chi̍e̍e̍ ndɔ̄ɔ̍ pīŋī, ndu̍yɛ̍ mbō nyɔ̄ɔ̄lu̍ wānāā ndūa̍a̍ kɔ̄lta̍ŋ.

¹⁰Mɛ̄lɛ̄ka̍ Ya̍a̍wɛ̄ɛ̄ o̍ cho̍ lɛ̄ŋnde̍ kpo̍u̍ kpa̍āya̍ ndɔ̍ kāsīo̍o̍ chɔ᷄m. Ō chō wānāā ndūa̍a̍ chīīndīāā, ndu̍yɛ̍ mī chi̍e̍ēŋndo̍ kpo̍u̍ a̍ che᷅.

¹¹Lā fūla̍, wāŋnda̍, lā fūla̍ Ba̍bi̍lɔ̄ŋ. Nya̍ wānāa̍ ku̍ā a̍ nyɛ̄m kpe̍ku̍ŋ cho̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ ndo̍ŋ nda̍ ki̍nɛ̍i̍, lā fūla̍. Lā pi̍la᷄ŋ nyɛ᷅ o̍ nyɛ̍ cho̍ ō nɔ̄ɔ̄lɛ̍i̍ Mɛ̄lɛ̄ka̍ o̍ hɔ̄l te̍. Lā fūla̍ lo̍ŋ yɛ̍lɛ̍kɛ̍lɛ̍ɛ̍, mī lā wa̍ wānāā kāsī Mɛ̄lɛ̄ka̍ o̍ hɔ̄l.

¹²Kɛ̍ te̍le̍ŋndo̍ ho̍ō ndu̍, lā cho̍ fu̍lā a̍ lākīl te̍. Lā cho̍ hu̍nɔ̄ɔ̄ ki̍ndī kīndī le̍ mī lā hɛ̄lu᷄ŋ mī lā nyāānu̍ŋ te̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, ndu̍ cho̍ nya̍ īsīsi̍ la̍chi̍ ni̍ le̍ kɔ̄la̍ŋ a̍ nya̍, ndu̍yɛ̍ ndu̍ Mɛ̄lɛ̄ka̍ I̍sɔ̄lūɛ̍i̍ya̍, ndu̍ ko̍ni̍ cho̍ vɛ̄lɛ̄ nya̍ īsīsi̍ kɔ̍ɔ̍lī ni̍, le̍ nya̍ māndāa̍.

¹³Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Bu̍ɛ̍ī nūu̍, dɛ̍nɛ̍ kɛ̍ndɛ̄ bɛ̄ndōo̍ ō wā ni̍ŋ le̍ ndu̍ o̍ kpe̍ku̍ cho̍ ndu̍ ō kēna᷄ŋ le̍ sōlīo̍o̍ wo̍ ni᷄ŋ. Wāŋnda̍ chō ndu̍ bɛ̄ɛ̄le̍ŋ kē ta̍u̍ ta̍u̍, ndu̍yɛ̍ mā hēēlu̍ dīōlā ndɔ̄la̍ŋ te̍mā.

¹⁴Wānāā bɔ̄ɔ̍ bɔ̍ɔ̍ mɛ̄ɛ̍ nda̍ chē ndu̍, mi̍ kɔ̄ndɔ̄fi̍llo̍ bīī nda̍, a̍ mɛ̄ɛ̍ o̍ wa̍ yɛ̍. Mi̍ kɔ̄ɔ̍le̍ŋ lē mūli᷄ŋ ndu̍ be̍lu᷄ŋ, a̍ wa̍li̍ nda̍ tōsa̍ a̍ ndu̍ wo̍, wānā a̍a̍ si̍nā bɛ̍ɛ̍ māā wāna̍ chi̍e̍e̍ le̍ o̍ cho̍ le̍. Wānā a̍a̍ che᷅ ndu̍ pɛ̍, nūm o̍o̍ de᷅l bɛ̍ɛ̍ kɔ᷅l māā wāna̍ chi̍e̍e̍ le̍ o̍ cho̍ le̍.

¹⁵Kɛ̍ ō chō tōsā mī kɔ̄ndɔ̄fi̍llo̍ ō hu᷄ŋ bi̍ī lɛ̄ŋīī bɔ̄ɔ̍ bɔ̍ɔ̍ a̍ ndu̍ o̍kɔ̄ɔ̄. Kɔ̄ndɔ̄fi̍llo̍ ō chō māsāā bɛ̍ndūa̍a̍ bīyɔ̄ɔ̄ a̍ ndu̍ o̍kɔ̄ɔ̄, ba̍kō bɛ̍ɛ̍ ā nɔ̍lā ni̍ŋ mā sōō le̍. Sɔ̄ɔ̍ŋ nda̍ tūi̍ yɔ̍ bɛ̍ɛ̍ pa̍a̍ndū le̍ wo̍ŋ, ā chō mu̍ŋ hūnɔ̄ɔ̄ chɔ̄. Ā chō hūnɔ̄ɔ̄ sɔ̄ɔ̍ŋ bɔ̍ɔ̍ bɔ̍ɔ̍ si̍nā pɛ̄ŋgu̍, sɔ̄ɔ̍ŋ nda̍ dīmu̍l lɔ̍ nda̍ bɛ̍ɛ̍ ka̍ni̍ bɛ̍ɛ̍ le̍ wo̍ŋ.”