Read Southern Kisi Āīsa̍yā 53 Bible Online

Āīsa̍yā 53 - Southern Kisi bible

Āīsa̍yā 53

¹Ō nɛ̄ɛ̍nɛ̍ la̍a̍la̍ŋ yɛ̍ yōōŋgū na̍a̍ ŋ̄ dīmi̍ wo̍? Ō nɛ̄ɛ̍nɛ̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m yɛ̄ kpāāya̍ ndɔ̄ɔ̍?

²Bu̍ɛ̍īyo̍ ho̍ō, mɛ̄ɛ̍ tɔ̄lɔ̄ɔ̍ ō wūl nu̍a̍ā o̍ lɛ̄ŋndē kālā ka̍lāle̍ŋ chōo̍, mbō lo̍ fāfa̍la̍a̍ mbō fūla̍ lēni᷄ŋ yɛ̍, le̍nde̍ o̍ hi̍ndū Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l ni̍. Bu̍ɛ̍īyo̍ ho̍ō, ndu̍ o̍o̍ ni̍ŋ na̍ŋɔ̄ɔ̍ to̍sā mī na̍a̍ ŋ̍ mu̍li̍ lāhɔ̄l o̍ ndu̍ lo̍ le̍, ndu̍yɛ̍ ō ve̍ vɛ̍lɛ̄ wā kōŋ te̍. Nyɛ̄ o̍ nyɛ̄ ve̍ a̍ ndu̍ o̍kɔ̄ɔ̄ ō ndu̍ o̍o̍ to̍sā mī na̍a̍ ŋ̍ hɛ̍na̍ŋ a̍ sūɛ̍i̍ ndūɛ̍i̍ yo̍ le̍.

³Mi̍ wānā o̍ wānā pɛ̍ɛ̍sā ndu̍, ndu̍yɛ̍ mi̍ ŋ̄ kɛ̄ɛ̄ ndu̍. Mbo̍ sɔ̄lā sāŋgāa̍ ta̍u̍ ta̍u̍, ndu̍yɛ̍ a̍ nyɛ̄ nɛ̄īyāa̍. Mi̍ wānā o̍ wānā o̍ mu̍lūl ndu̍ kɔ̄ɔ̍, ndu̍yɛ̍ mi̍ ŋ̄ pɛ̄ɛ̄sā ndu̍. Wānā o̍ wānā ndu̍ o̍o̍ bu̍u̍la̍ŋ bɛ̍ɛ̍ a̍ ndu̍ le̍.

⁴Kɛ̍ sāŋgā o̍ sāŋgā na̍a̍ ŋ̍ nɔ̍ le̍ sɔ̄lāa̍, ndu̍yɛ̍ a̍ nyɛ̄ nɛ̄īyāā o̍ nyɛ̄ nɛ̄īyāā ndu̍ o̍o̍ nɔ̍ mī ndu̍ o̍o̍ ke̍e̍ku̍ na̍a̍ chōo̍, mbo̍ chɛ̄l mbo̍ sɔ̄lā sāŋgā kōŋ, ndu̍yɛ̍ mbo̍ bīūnu̍ŋ vɛ̍lɛ̄ nyɛ᷅ nɛ̄īyāā kōŋ le̍ na̍a̍. Kɛ̄ mi̍ ŋ̄ yīya᷄ŋ māā sāŋgā o̍ sāŋgā o̍ sɔ̍la̍, māā le̍ yɔ̄ŋ ndɔ̄ wɔ̍ɔ̍ŋndo̍ o̍ sɔ̍la̍ ndu̍ ni̍, māā Mɛ̄lɛ̄ka̍ tu̍si̍ ndu̍ nyɛ̄ pālāa̍ kōŋ chōo̍ ni̍.

⁵Kɛ̍ bōōlɔ᷄ŋnda̍ o̍ sɔ̍la̍ la̍ŋ, le̍ yɔ̄ŋndā nāāla̍ wɔ̍ɔ̍ŋnda̍ŋ o̍ sɔ̍la̍ la̍ŋ ni̍. Lɔ̄ɔ̄ nda̍ lɔ̄ɔ̄ ndu̍ wo̍, le̍ dɛ̍nɛ̍ wɔ̍ɔ̍ŋ na̍a̍ ŋ̄ tōsa̍ wo̍ nda̍ lɔ̄ɔ̄ ndu̍ ni̍. Dɛ̍nɛ̍ pa̍lāā o̍ sɔ̍la̍ wo̍, lēni᷄ŋ na̍a̍ ŋ̄ sɔ̄la̍ sīōŋgɔ̄ɔ̍ ni̍. Lɔ̄ɔ̄ nda̍ lɔ̄ɔ̄ ndu̍ wo̍, o̍ lɔ̄ɔ̄ kōŋ ni᷄ŋ na̍a̍ ŋ̄ sɔ̄la̍ sīōŋgɔ̄ɔ̍ ni̍.

⁶Na̍a̍ kpo̍u̍, mɛ̄ɛ̍ sāa̍ ō lāāsīāŋ nu̍a̍ā yōndōo̍ ni᷄ŋ yɛ̍, le̍nde̍ na̍a̍ ŋ̄ wa̍ ā lāāsīa̍ŋnda̍ ni̍. Bā wānā o̍ wānā ndu̍ o̍o̍ ye̍e̍ma̍ le̍ wānɔ᷄ŋndo̍ chōo̍ wo̍ ko̍ni̍ ndu̍ o̍o̍ wa̍ŋnūŋ ni̍. Kɛ̍ dɛ̍nɛ̍ pa̍lāā na̍a̍ kpo̍u̍, na̍a̍ ŋ̍ nɔ̍ le̍ sɔ̄lāa̍ le̍ yɔ̄ŋndā nāāla̍ wɔ̍ɔ̍ŋnda̍ŋ ndo̍, mi̍ Mɛ̄lɛ̄ka̍ Ya̍a̍wɛ̄ɛ̄ hāndū ndu̍ bu̍ɛ̍īyo̍ ho̍ō chōo̍.

⁷Ma̍ tūsī ndu̍ nyɛ̄ pālāa̍ chōo̍, ndu̍yɛ̍ ma̍ tōsā sɔ̄ɔ̍ŋ wɔ̍ɔ̍ŋ ŋ̄ bɔ̄ɔ̍ bɔ̍ɔ̍ a̍ ndu̍. Kɛ̍ ō sūu̍ nyɛ᷅ o̍ nyɛ̄ le̍. Mɛ̄ɛ̍ nda̍ wā nu̍a̍ā kɔ̄la̍ŋ a̍ sāa̍ fɔ̍ŋndɔ̍ɔ̍ le̍ ndu̍ dīyɔ̄ɔ̍, kɛ̄lɛ̄ŋgāā mɛ̄ɛ̍ nda̍ wā sa̍a̍ yīīŋnde̍ kīlīo̍o̍ ō su̍ū le̍ yɛ̍, le̍nde̍ ko̍ni̍, mbō mēī do̍ŋ, ō sūu̍ nyɛ᷅ o̍ nyɛ̄ le̍.

⁸Ma̍ bīī ndu̍, ndu̍yɛ̍ ma̍ kīlūl ndu̍ yāmɛ̍i̍ le̍ ndu̍ dīyɔ̄ɔ̍, ma̍ kūā a̍ ndu̍ le̍ mā kɔ̍ di̍ī ndu̍. Ma̍ fāŋā yōōmū ndɔ̄ɔ̍ o̍ chi̍e̍ēŋndo̍ chōo̍. Ndu̍yɛ̍ wānā o̍ wānā ndu̍ o̍o̍ bu̍u̍la̍ŋ bɛ̍ɛ̍ a̍ pīɔ̍m ndɔ̄ɔ̍ o̍kɔ̄ɔ̄ le̍. Le̍ dɛ̍nɛ̍ wɔ̍ɔ̍ŋ wānāā nīa̍a̍, ma̍ tūsī ndu̍ nyɛ̄ pālāa̍ chōo̍ ma̍ dīī ndu̍.

⁹Ō tōsa̍ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ te̍. Lē pīlɛ̍ bɛ̍ɛ̍ ō dīmi̍ la̍cho̍o̍wā le̍. Ma̍ chɔ̄ ndu̍ mɛ̄ɛ̍ nda̍ chɔ̄ wa̍nāā dɛ̍nɛ̍ wɔ̍ɔ̍ŋnda̍ yɛ̍. Ndu̍yɛ̍ ma̍ chɔ̄ ndu̍ o̍ sɛ̄i̍ wānāā sūlāa̍ ni᷄ŋ.

¹⁰Kɛ̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ kɛ̍ɛ̍si̍a̍a̍ ni̍ māā ō nɔ̄ mbō sɔ̄la̍ bōōlūūwo̍, ndu̍yɛ̍ mbō bīī mɔ̍nɛ̍i̍ ta̍u̍ ta̍u̍. Le̍ mɛ̄ɛ̍ o̍ yɔ̍ŋgu̍ ndu̍ pi̍la̍ māā sa̍lā le̍ yɔ̄ŋndā wɔ̄ɔ̍ŋndā wāŋnda̍ ā tōsa̍ la̍ŋ yɛ̍, ō chō vīōūwɔ̄ɔ̄ yōōmū ta̍u̍ ta̍u̍, mbō chē chūāā ndūāā ma̍māa̍. Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ ye̍e̍ma̍ mbō tōsa̍ŋ, sa̍na̍a̍ a̍ ndu̍ ni̍ŋ o̍ cho̍ tōsa᷄ŋ kpo̍u̍ ni̍.

¹¹Tē yōōmū ndɔ̄ɔ̍ ō kēēku̍ o̍ sāŋgā bɛ̄ndōo̍ ni᷄ŋ pɛ̍, ō chō hūnɔ̄ɔ̄ vɛ̄lɛ̄ kɔ̄l nāŋɔ̄ɔ̄. Ō chō hūnɔ̄ɔ̄ sīnā māā sāŋgā ndɔ̄ɔ̍ ō kūēnu̍ŋ fo̍ndō fu̍u̍ le̍. Bu̍ɛ̍ī ni̍ yɔ̍ŋgu̍ŋ o̍ ya̍ lo̍, ndu̍yɛ̍ mi̍ hi̍nī kɔ̄l a̍ ndu̍ wo̍, ō tōsā ni̍ŋ mī wānāā bɔ̄ɔ̍ bɔ̍ɔ̍ a̍ si̍mnu᷄ŋ a̍ kɛ̍ndɛ̄ ya̍ o̍ hɔ̄l, fo̍ndōle̍, ndu̍ chu̍ā ni̍ŋ yɔ̍ŋndā ndāla̍ wɔ̍ɔ̍ŋnda̍ŋ kpo̍u̍ ni̍, mbō fāŋa̍ nda̍ la̍ŋ chōo̍.

¹²Le̍ he̍ī, I̍ cho̍ ndu̍ fo̍ndāa̍ kē wānāā kpāāyāā bɛ̄ndūa̍a̍ tɛ̄ɛ̄ŋ. I̍ cho̍ tōsā mbō sīmnu᷄ŋ wa᷅na̍ kpāāyāā, wānāā kpāāyāa̍ tɛ̄ɛ̄ŋ, fo̍ndōle̍, le̍ mɛ̄ɛ̍ o̍ chɛ̍l mbo̍ yɔ̄ŋgū yōōmū ndɔ̄ɔ̍, mbo̍ sɔ̄lā pīɔ̍mndo̍ yɛ̍, le̍ mɛ̄ɛ̍ o̍ chɛ̍l ma̍ chūā ndu̍ māā wānā wɔ̍ɔ̍ŋndo̍ o̍ pīlɛ̍ o̍ cho̍ ni̍ yɛ̍. Mbo̍ chɛ̄l mbo̍ yɔ̄ŋgū yōōmū ndɔ̄ɔ̍ le̍ yɔ̄ŋndā wɔ̄ɔ̍ŋndā wānāā bɔ̄ɔ̍ bɔ̍ɔ̍, ndu̍yɛ̍ mbo̍ nyūnā ya̍ Mɛ̄lɛ̄ka̍, le̍ mī ma̍l wāŋnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ.