Read Southern Kisi Āīsa̍yā 54 Bible Online

Āīsa̍yā 54 - Southern Kisi bible

Āīsa̍yā 54

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ māā, Chūlu̍sɛ̄lɛ̄m, a̍ wa̍ māwāā mɛ̄ɛ̍ wānā la̍nɔ̍ nɔ̍ chu̍ā o̍ chūā le̍ wo̍ ō wā nu̍a̍ā yɛ̍. Mɛ̄ɛ̍ wānā la̍nɔ̍ pūli̍i̍ vīālāā ī nɛ̄i̍ yɔ̍ ka̍ni̍ bɛ̍ɛ̍ le̍ wo̍ ō wā nu̍a̍ā yɛ̍, le̍nde̍ ŋ̄ wa̍ ni̍. Kɛ̍, so̍li̍ cho̍ndu̍ŋ kɔ̄l kɛ̄ndɔ᷄ŋ. So̍li̍ cho̍ndo̍ŋ mā dēŋī chōo̍ cho̍o̍ a̍ nya̍a̍lo̍o̍, fo̍ndōle̍, ā hīŋ chūāūwa̍ sɔ̄lā ta̍u̍ ta̍u̍ mbō hīōū bɛ̍ɛ̍ wa᷅ŋ lāāndūa̍a̍ cho̍ o̍ nɔ̄la̍ŋ nda̍.

²Chɔ̍ɔ̍lu̍ tɛ̍ndīi̍ nu̍m mālɔ̄ɔ̍ kūmbī. Chɔ̍ɔ̍lu̍ ndu̍ tīmbī mbō kūmbi̍ŋ nyɛ᷅ kɛ̄ndɛ̄ kɛ̍ndɛ̄, cha᷅l te̍. Chɔ̍ɔ̍lu̍ yu̍e̍ī tɛ̍ndīi̍ nu̍mnde̍ bɛ̄ndī, ndu̍yɛ̍ mā chɔ̍ɔ̍lu̍ pɛ̍ɛ̍kīi̍ye̍ lūēī lɛ̄ŋ nyɛ̄ kɛ̄ndɛ̄ kɛ̍ndɛ̄.

³Kāni̍ fo̍ndōle̍, ā chō hūnɔ̄ɔ̄ chɔ̄ɔ̄lɔ᷄ŋndo̍ sɔ̄lā, ā chɔ̄ɔ̄lūŋ ni̍ŋ ku̍mbū bā kɛ̄ndɔ̄ɔ̍, ndu̍yɛ̍ mā chɔ̍ɔ̍lu̍ŋ ku̍mbū bā mīāllo̍. Chūāūwāā nūmnda̍ ā hūŋ ni̍ŋ mā hu᷄ŋ chu̍ā lɛ̄ŋīī chēle̍ŋ, ndu̍yɛ̍, chi̍e̍e̍ŋ ŋ̍ cho̍ mu᷅ŋ hāū pɔ᷅mnda̍ŋ ndo̍ŋ, mā cha᷄l o̍ chi̍e̍e̍ŋ mu̍ŋ ni᷄ŋ.

⁴Le̍la̍ŋ sīōōŋīī bi̍ī nu̍m te̍, fo̍ndōle̍, a̍ cho̍ lɛ̍ lāsi̍ɔ̍mbu̍ to̍lnɔ᷄ŋ te̍. Bu̍u̍la̍ŋ te̍, fo̍ndōle̍, wānā o̍ wānā o̍ tu̍sī lɛ̍ ni̍ŋ nu̍m lāsi̍ɔ̍mbu̍ le̍. Si̍ɔ̍mbu̍la̍ ŋ̄ tūl o̍ chūā lāāndūyɛ̍ī nūmnde̍ ni᷄ŋ nda̍ŋ, ā chō hūnɔ̄ɔ̄ pūɛ̄ɛ̄nɔ᷄ŋ a̍ la̍ŋ pɔ̍lī. Bōōndi̍i̍ pɔ̍nɔ̍ nu̍m vī ma̍ lō nu̍m pīlɛ̍ kpe̍e̍le̍ ve̍, kɔ̄l tāmbɛ̍i̍ ko̍ma̍l nu̍m a̍ bōōndi̍i̍ ke̍ŋ ndo̍, ā chō pūɛ̄ɛ̄nɔ᷄ŋ a̍ ndu̍ pɔ̍lī, a̍ yi̍yāŋ ndɛ̍ bɛ̍ɛ̍ a̍ ndu̍ o̍kɔ̄ɔ̄ le̍.

⁵Wāna̍ To̍o̍si̍a̍a̍ nu̍mndo̍ ō chō sīmnɔ᷄ŋ māā pɔ̍nɔ̍ nu̍m. Wānā ko̍ŋ dīōlā ndɔ̄la̍ŋ āā Mɛ̄lɛ̄ka̍ Ya̍a̍wɛ̄ɛ̍, nɔ̍ kpāāyāa̍ kpo̍u̍ wo̍. I̍sɔ̄lūɛ̍i̍ya̍ Mɛ̄lɛ̄ka̍ ndā kāsīo̍o̍, ndu̍ cho̍ wānā nu̍m pīŋīa̍a̍ ni̍. Ndu̍yɛ̍ ndu̍ cho̍ Mɛ̄lɛ̄ka̍ le̍ chi̍e̍ēŋndo̍ ho̍ō kpo̍u̍ ni̍.

⁶A̍ chō māchūāā mɛ̄ɛ̍ wānā la̍nɔ̍ pɔ̍nɔ̍ɔ̍ ō kɛ̄ɛ̄ ho̍ō, mbō wa̍ a̍ kɔ̄l tāmbɛ̍i̍ bɛ̍ndo̍o̍ wo̍ ō wā nu̍a̍ā yɛ̍. Mɛ̄ɛ̍ chūā lāāndōo̍ ō sɔ̄lā nu̍a̍ā pɔ̍nɔ̍ɔ̍, kɛ̍ mī pɔ̍nɔ̍ ko̍ŋ ō ma᷄l ndu̍ yɛ̍, le̍nde̍ ŋ̄ chō ni̍. Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m mīŋgī chūā, mā wa̍ vɛ̄lɛ̄ mīāl ndɔ̄.

⁷Mɛ̄lɛ̄ka̍ dīmi̍ āā, “Ya̍ i̍i̍ ma̍l nu̍m le̍ te̍le̍ŋ bi̍ŋgī. Kɛ̍ I̍ cho̍ nu̍m īnyīɛ̍ɛ̍ tūīīnɔ᷄ŋ mī mi̍ŋgi̍ nu̍m chūā.

⁸Ya̍ i̍i̍ dɔ̍ɔ̍nu᷄ŋ tu̍mbe̍ a̍ nūm ta̍u̍, mi̍ fāŋā hɔ̄lāā nīa̍a̍ o̍ nūmndo̍ le̍ te̍le̍ŋ ti̍ŋ. Kɛ̍ I̍ cho̍ nu̍m īnyīɛ̍ɛ̍ tūīīnɔ᷄ŋ, ndu̍yɛ̍ mī ka̍a̍la̍ nu̍m le̍ fɛ̍ɛ̍ŋ a̍ fɛ̍ɛ̍ŋ.” Mɛ̄lɛ̄ka̍ Ya̍a̍wɛ̄ɛ̄, o̍ chi̍i̍ndīāā nu̍mndo̍ nyɛ̄ ō dīmi̍ wo̍ ndu̍ cho̍ ko̍ŋ ni̍.

⁹“I̍ chu̍a̍ te̍le̍ŋndo̍ ho̍ō mɛ̄ɛ̍ ya̍ I̍ chu̍a̍ te̍le̍ŋ Nu̍u̍wā wo̍ yɛ̍. Mɛ̄ɛ̍ ya̍ I̍ chu̍e̍l Nu̍u̍wa̍ būŋgɛ̄i̍ sīndɛ̄ mi̍ me̍na̍ŋ māā fɛ̍ɛ̍ŋ a̍ fɛ̍ɛ̍ŋ I̍ tɛ̍ɛ̍mbūū lɛ̍ chi̍e̍ēŋndo̍ a̍ mɛ̄ŋmā hūna᷄ŋ te̍ yɛ̍, le̍nde̍ ya̍ I̍ chu̍e̍l nu̍m būŋgɛ̄i̍ ni̍, māā fɛ̍ɛ̍ŋ a̍ fɛ̍ɛ̍ŋ I̍ do̍o̍nūŋ ndɛ̍ tu̍mbe̍ a̍ nūm te̍, kɛ̄lɛ̄ŋgāāle̍ mī tu̍si̍ nu̍m nyɛ̄ pālāa̍ chōo̍ le̍ nyɛ̄ ŋ̄ tōsa̍ wo̍.

¹⁰Pēmbūŋ bɛ̄ndo᷄ŋ a̍ pēmbūŋ pɔ̄mbɔ᷄ŋ mī ŋ̄ hīīlu̍ŋ, ndu̍yɛ̍ mī ŋ̄ fāŋa̍ŋ o̍ fo̍ndāŋndā ndāla̍ŋ, kɛ̍ kāālā ya̍ I̍ nɔ̍ le̍ nūm ndo̍, ō fe̍ŋāŋ le̍cho̍o̍ le̍, kāāla̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍. Kpe̍ma̍ ya̍ I̍ yi̍i̍ a̍ nūm mi̍ chu̍e̍l nu̍m būŋgɛ̄i̍ le̍ nu̍m kɔ̄l nyūlōo̍ kīo̍o̍ wo̍, I̍ fe̍ŋāŋ o̍ kpe̍ma̍ ko̍ŋ chōo̍ le̍.” Ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ tu̍i̍i̍nūŋ nu̍m īnyīɛ̍ɛ̍ yo̍, nyɛ̄ ya̍ I̍ di̍mi̍ wo̍ cho̍ ko̍ŋ ni̍.

¹¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “O̍o̍ Chūlu̍sɛ̄lɛ̄m, chi̍e̍e̍ cho̍ ho̍ō o̍ sa̍ŋgāa̍ ni᷄ŋ ndo̍, chi̍e̍e̍ hūēīyīī kpāāyɛ̄ī bɛ̄ndūe̍i̍ ī hi᷄ŋ ho̍ō, ō nɔ̍ wa̍nā o̍ wāna̍ nyɔ̍ɔ̍lu̍ ndu̍ le̍ wo̍, I̍ cho̍ nu̍m hūnɔ̄ɔ̄ mīŋgī tāŋgūl a̍ pōūtā ba̍ā kālālā bɛ̄ndūla̍ŋ. Chīyīī ŋ̄ tāŋgūlūŋ ni̍ŋ cho̍o̍ ve̍, a̍ pōūtā sāfa̍lūɛ̄lā ba̍ā kālālā bɛ̄ndūla̍ŋ ya̍ I̍ ki̍lā ni̍ŋ ndi̍ ni̍.

¹²Chīɛ̄īlā nūmnda̍ vi̍lɛ̄īlā bɛ̄ndūla̍ŋ kpo̍u̍, a̍ pōūtā a̍ka̍tīla̍ ba̍ā kālāla̍ŋ la̍ wa᷅ ni̍ŋ la̍ ta̍ŋgūlāā ni̍. O̍ ko̍ŋ kɔ̍ɔ̍lī, sāāsa̍ wa᷅ ni̍ŋ nu̍m ō bālāā wo̍, a̍ pōūtā ŋɛ̄lɛ̄ŋgi̍ ŋɛ̍lɛ̄ŋgi̍la̍ŋ wa᷅ ni̍ŋ o̍ ta̍ŋgūlāā ni̍. Sāāsāla̍ nu̍mnda̍ŋ kpo̍u̍, a̍ pōūtā ba̍ā kālālā bɛ̄ndūla̍ŋ la̍ wa᷅ ni̍ŋ la̍ ta̍ŋgūlāā ni̍.”

¹³“Ndu̍yɛ̍ chūāūwāā nūmnda̍ kpo̍u̍, ya̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ pɛ̍ɛ̍kū ni̍ŋ nda̍ ni̍, ndu̍yɛ̍ dɛ̍nɛ̍ kɛ̍ndɛ̍ wa᷅ ni̍ŋ le̍ nda̍ wo̍, ō wā ni̍ŋ o̍ bɔ̍ɔ̍.

¹⁴Sa̍kpōyɛ̍i̍ nūmndo̍ to̍sā ni̍ŋ mā wa̍ wāna̍ dīāllūŋ kālā. Ā wānūŋ ni̍ŋ o̍ bā nūmndo̍ chōo̍ yɛ̍lɛ̍kɛ̍lɛ̍ɛ̍, wānāa̍ tu̍sī wa᷅ŋnda̍ nyɛ̄ pālāa̍ chōo̍ wa̍, ā nɔ̍lā ni̍ŋ mā sɔ̄ɔ̄ŋgu̍u̍ nu̍m īkɛ̄i̍ le̍. Sɔ̄ɔ̍ŋ to̍sā mī sīōōŋīī bɛ̄ndūe̍i̍ ī bīī wāŋnda̍ wo̍ŋ, ŋ̄ ko̍māl nu̍m ni̍ŋ te̍.

¹⁵I̍ vi᷅m ndɛ̍ ni̍ŋ wa̍nā o̍ wānā le̍ nu̍m chīŋa̍la᷅ŋ a̍ sɔ̍ŋgɔ̄ le̍. Wānā o̍ wāna̍ chi̍ŋa̍la᷅ŋ nu̍m a̍ sɔ̍ŋgɔ̍ɔ̍ pɛ̍, yōmɔ̄ɔ̍ ŋ̄ yā ndu̍ ni̍.”

¹⁶“Mī di̍mu̍l nu̍m, ya̍ Mɛ̄lɛ̄ka̍ ya̍ to̍o̍si̍a̍a̍ sūmnda̍ ni̍, a̍ cha᷅l ha̍ā o̍ tōŋgo̍ chɔ̄ū, mā fūūlā mā chūāū wo̍lɔ̄ɔ̄lā chɔ̄ūla̍ŋ nda̍. Ya̍ to̍o̍si̍a̍a̍ wānāa̍ tɛ̍ɛ̍mbūū ha̍ā wāŋnda̍ a̍ wōlɔ̄ɔ̄lā ndāla̍ chɔ̄ūla̍ŋ nda̍ ni̍.

¹⁷Wōlɔ̄ɔ̄ o̍ wōlɔ̄ɔ̄ chɔ̄ū cho̍ mī wāŋndo̍ chīŋa̍la᷅ŋ nu̍m a̍ ndu̍ mbō nɔ̄la̍ nu̍m yōmɔ̄ɔ̄ le̍. Wānā o̍ wāna̍ ki̍ndi̍ le̍ nu̍m sūɛ̍i̍ hōlɔ̄ɔ̍ pɛ̍, bu̍u̍la̍ŋ te̍, ā chō dīōmndā ŋ̄ mūlūl ndu̍ la̍ŋ sɔ̄lā. Ya̍ Mɛ̍lɛ̄ka̍ Ya̍a̍wɛ̄ɛ̄, bu̍ɛ̍i̍yāā nīa̍a̍, sɔ̄ɔ̍ŋ kɛ̍ndɛ᷄ŋ ko̍māl nda̍ wo̍ŋ, mu̍ŋ cho̍ mu̍ŋ ni̍. Māndāa̍ ya̍ I̍ ma̍ndā nda̍ ni̍, mī to̍sa̍ mā yēm ya̍a̍mɔ̍ɔ̍wa̍a̍ ndāa̍. Ya̍ Mɛ̍lɛ̄ka̍ Ya̍a̍wɛ̄ɛ̄, nyɛ̄ ya̍ I̍ di̍mi̍ wo̍ ndu̍ cho̍ ko̍ŋ ni̍.”