Read Southern Kisi Āīsa̍yā 55 Bible Online

Āīsa̍yā 55 - Southern Kisi bible

Āīsa̍yā 55

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Wānā o̍ wāna̍ cho̍ a̍ bo̍lōlā vēsɛ̍i̍la̍ŋ, lā hu᷄ŋ nāa̍ mɛ̄ŋnda̍ŋ mā chō wa̍ mī lā ko᷄l. Nya̍ nɔ̍ nyɛ̍ sɔ̄lāā o̍ bā le̍ wa̍, lā hu᷄ŋ mī lā hu᷄ŋ pi̍o̍ndū nyɛ̄ dīa̍a̍ mī lā dē. Lā hu᷄ŋ pi̍o̍ndū mūɛ̄īmā mākīle̍pīi̍ya̍ŋ, a̍ mɛ̄ɛ̄mā nāūwa̍ŋ, kɛ̍ lā cho᷄ nyɛ̍ o̍ nyɛ̄ pāāwā le̍.

²Vɛ᷅ mi̍ lā wā nyɛ̄ nyā sɔ̍lāa̍ pīsīo̍o̍ le̍ nyɛ̍ cho̍ nyɛ̍ dīāā le̍ wo̍ pīōndɔ̄ɔ̍? Vɛ᷅ mi̍ lā wā nya̍ pi̍la̍ yɔ̄ɔ̄kpīa̍a̍, le̍ nyɛ᷄ ke᷅ nya̍ tɔ̄nɔ̄ o̍ tɔ̄nɔ̄ le̍ wo̍? Lā ya᷄ŋ ya̍ nīla̍ŋ nyɛ̄ kɛ̄ndɛ̄ kɛ̍ndɛ̄, mī lā tūēī nyɛ̄ dīāā kɛ̍ndɔ̄ɔ̍ yēēlā. Nyi̍nāā nyāa̍ ā chō nyɛ̄ dīāā kɛ̄ndɛ̄ kɛ̍ndɔ̄ɔ̍ yēēlā tu̍e̍i̍yɔ̄ɔ̄.

³“Lā ya᷄ŋ ya̍ nīla̍ŋ, ndu̍yɛ̍ mī lā hīŋ nāa̍ ya̍ chu̍a̍. Lā tūe̍i̍ nyɛ᷅ ya̍ I̍ cho̍ nya̍ dīmūllo̍, ko̍ŋ to̍sā ni̍, mī lā sɔ̄la̍ yōōmū kpe̍e̍kpe̍i̍yo̍. I̍ cho̍ kpe̍ma̍a̍ yīī a̍ nya̍, o̍ cho̍ wā na̍a̍ tɛ̄ɛ̄ŋ na̍a̍ nya̍ le̍ fɛ̍ɛ̍ŋ a̍ fɛ̍ɛ̍ŋ ndo̍. Kāālā kpe̍e̍kpe̍i̍ ya̍ I̍ chu̍e̍l sīndɛ̄ Dēēve̍ būŋgɛ̄i̍ yo̍, I̍ cho̍ nya̍ kāālā kōŋ chɔ̄m.

⁴Mi̍ lo᷅ o̍ ko̍ŋ mi̍ si̍i̍ŋgūū ndu̍ māsāa̍ lɛ̄ŋnde̍ chōo̍, ndu̍yɛ̍ mi̍ ha̍ndū ndu̍ lɛ̄ŋīī kēŋ bōlle̍ŋ. Ndu̍yɛ̍ mi̍ si̍i̍ŋgūū ndu̍ se̍īyo̍ le̍ wāŋnda̍ o̍ lɛ̄ŋnde̍ ni᷄ŋ.

⁵Lā vēēlū ni̍ŋ lɛ᷅ŋnde̍, lɛ̄ŋīī nya̍ si̍īni̍āŋ bɛ̍ɛ̍ pa̍a̍ndū nya̍ nda̍ā le̍ ve̍, mī lɛ̄ŋīī kēŋ ī hīŋ nāa̍ nya̍ chūā. Lɛ̄ŋīi̍ si̍nā bɛ̍ɛ̍ nya̍ pāāndū le̍ ve̍, ī hūŋ ni̍ŋ a̍ kīlta̍ŋ nāa̍ nya̍ chūā. Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, I̍sɔ̄lūɛ̍i̍ya̍, Mɛ̄lɛ̄ka̍ nya̍ kāsīo̍o̍, ya̍ cho̍ tōsā ni̍ mī mu᷅ŋ kpo̍u̍ ŋ̍ yɔ̍nu̍ŋ. I̍ cho̍ tōsā mī lā sīmnu᷄ŋ wa̍nāā lēbɛ̄ɛ̄ bɛ̄ndū.”

⁶“Le̍la̍ŋ lā mūli̍ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ wāŋnda̍ I̍sɔ̄lūɛ̄ī, bōōndi̍i̍ nya̍ nɔ̄lā he̍ī mī lā sāālu̍ŋ ndu̍ ve̍. Lā pīɛ̍i̍ ndu̍, bōōndi̍i̍ o̍ cho̍ he̍ī nya̍ māchɛ̄lū ve̍.

⁷Wānāā dɛ̍nɛ̍ wɔ̍ɔ̍ŋnda̍, ā pɛ̄ŋgi̍ sɔ̍ɔ̍ŋ wɔ̍ɔ̍ŋndo̍ŋ tōsāa̍, ndu̍yɛ̍ mā pɛ̄ŋgi̍ yīya᷄ŋnda̍ dɛ̍nɛ̍ wɔ̍ɔ̍ŋnda̍ŋ nɔ̄ɔ̍. Ā mīīŋgu̍ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, ō nɔ̄lā mbō tūīīnu̍ŋ nda̍ īnyīɛ̍ɛ̍. Ā hu᷄ŋ nāa̍ Mɛ̄lɛ̄ka̍ nāa̍ chūā, ō nɔ̄lā mbō ma᷄l nda̍ le̍ nyɛ̄ o̍ nyɛ̄ nda̍ tōsa̍.”

⁸Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Ya̍ Mɛ̍lɛ̄ka̍, yīya᷄ŋnda̍ nīla̍ŋ lā cho̍ māā yīya᷄ŋnda̍ nyāla̍ŋ te̍. Ka̍a̍lā nīla̍ŋ, lā cho̍ māā ka̍a̍lā nyāla̍ŋ te̍.

⁹Mɛ̄ɛ̍ ha̍la̍a̍ ō chō nu̍a̍ā la̍nda̍ŋ a̍ lɛ̄ŋnde̍ŋ yɛ̍, le̍nde̍ ka̍a̍lā nīla̍ŋ lā chō la̍nda̍ŋ a̍ ka̍a̍lā nyāla̍ŋ ni̍, ndu̍yɛ̍ le̍nde̍ ko̍ni̍ yīya᷄ŋnda̍ nīla̍ŋ lā chō la̍nda̍ŋ a̍ yīya᷄ŋnda̍ nyāla̍ŋ ni̍.”

¹⁰“Tē pīɔ̍ɔ̍ chɛ̍ŋ cho̍o̍ cho̍o̍ pɛ̍, mbō sīa̍ o̍ chi̍e̍ēŋndo̍ chōo̍, ɔ̄ɔ̄ mī mɔ᷄mndo̍ chɛ᷄ŋ cho̍o̍ cho̍o̍ mbō chūchū pɛ̍, pīɔ̄ɔ̄ kōŋ, kɛ̄lɛ̄ŋgāā mɔ᷄m ko̍ŋ, mɛ̄ŋmā ndūa̍a̍ŋ, lūɛ̄īyɔ̄ɔ̍ ma̍ lu̍ɛ̍ī lɛ᷅ŋ ni̍, mī mā pɔ̄ɔ̄la̍ lɛ̄ŋnde̍ŋ nyɛ̄ kɛ̄ndɛ̄ kɛ̍ndɛ̄ le̍ tɔ̄lɔ̄ɔ̄la̍ŋ. Mī pīɔ̄ɔ̄ kōŋ, kɛ̄lɛ̄ŋgāā mɔ᷄m ko̍ŋ ō tōsa̍ mī tɔ̄lɔ̄ɔ̄la̍ŋ lā na᷄ŋ o̍ chīɔ̍ɔ̍ŋ ni᷄ŋ, ndu̍yɛ̍ mī chīɔ̍ɔ̍ŋ ŋ̄ sōli̍ nyɛ̄ dīa̍a̍ ta̍u̍ ta̍u̍. O̍ ko̍ŋ, mī wānāā lāwa̍lla̍ ā sɔ̄la̍ yɛ̄i̍yo̍ŋ ta̍u̍ ta̍u̍, ndu̍yɛ̍ mī nyɛ̄ dīa̍a̍ ō wa̍ vɛ̄lɛ̄ ta̍u̍ ta̍u̍.”

¹¹Mɛ̄ɛ̍ le̍nde̍ ko̍ni̍ i̍ cho̍ a̍ dīōmndā nīla̍ŋ ni̍. Le̍ te̍le̍ŋ o̍ te̍le̍ŋ tē I̍ yɔ̍ŋ nda̍ŋ pɛ̍, lā mi̍i̍ŋgū ya̍ o̍ ībūŋ mī lā kɛ̄ɛ̍ nyɛ̄ tōsā le̍. Tōsāa̍ la̍ to̍sā nyɛ᷅ ya̍ I̍ kɛ̍ɛ̍sīāā le̍ tōsāa̍ wo̍ ni̍, ndu̍yɛ̍ nyɛ̄ o̍ nyɛ̍ ya̍ I̍ ve᷅m nda̍ŋ le̍ tōsāa̍ pɛ̍, tōsāa̍ la̍ to̍sā ni̍, mī nyɛ̄ o̍ nyɛ̄ kūɛ̄ ō kɛ̄ndɛ̄.

¹²“Lā fūlā ni̍ŋ na̍a̍ nya̍ chō wa̍ a̍ nya̍a̍lo̍o̍ le̍ mīīŋgōo̍, ndu̍yɛ̍ mā kūɛ̄ a̍ nya̍ yɛ̍lɛ̍kɛ̍lɛ̍ɛ̍ o̍ lɛ̄ŋndē nyāle̍ŋ ni᷄ŋ a̍ kɔ̄l nyūlū. Bōōndi̍i̍ nya̍ wā ni̍ŋ mi̍i̍ŋgōo̍ ve̍, pēmbūŋ bɛ̄ndo᷄ŋ, a̍ pēmbūŋ pɔ̄mbɔ᷄ŋ, ŋ̄ dūāūnūŋ ni̍ŋ nya̍a̍le̍ nya̍ lāchī, mī ŋ̄ sōli̍ chōndo̍ŋ. O̍ ko̍ŋ kɔ̍ɔ̍lī, yɔ̄mnde̍ bɛ̍ɛ̍ mī ī tɛ̄m bāla̍ŋ a̍ nya̍a̍lo̍o̍.

¹³Fo̍ndāŋndā yɔ̄ɔ̍ŋ ŋ̄ chīi̍ ni᷅ŋ chūā kpo̍u̍ la̍ŋ, yɔ̄mīī sa̍i̍pu̍lūɛ̄ɛ̄ve̍ ī chō hūnɔ̄ɔ̄ wūlɔ̄ɔ̄ o̍ fo̍ndāŋndā lāŋ kpo̍u̍. O̍ ko̍ŋ kɔ̍ɔ̍lī, fo̍ndāŋnda̍ bīl ŋ̄yɔ̄ɔ̍ ō chūa̍ kpo̍u̍ la̍ŋ, mī yɔ̄mīī ma̍tɔ̄ɔ̄ve̍ ī hu᷄ŋ wu᷅l lo̍ŋ. Sɔ̄ɔ̍ŋ mu᷅ŋ ŋ̄ chō wā māā tāāmāsi̍ le̍ lōōnɔ᷄ŋndo̍ a̍ nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ I̍ to̍sa̍ wo̍. Ndu̍yɛ̍ tāāmāsi̍o̍o̍ ho̍ō, ō cho̍ ta̍a̍māsi̍ ta̍mbu̍ le̍, ō chō wā le̍ fɛ̍ɛ̍ŋ a̍ fɛ̍ɛ̍ŋ.”