Read Southern Kisi Āīsa̍yā 56 Bible Online

Āīsa̍yā 56 - Southern Kisi bible

Āīsa̍yā 56

¹Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Lā wa̍ sa̍kpō nāa̍ wānā o̍ wānā chu̍a̍, ndu̍yɛ̍ mī lā wa̍ sɔ̄ɔ̍ŋ tōnya̍ŋ tōsāa̍, fo̍ndōle̍, bōōndi̍i̍ ya̍ I̍ nɔ̍ le̍ nya̍ chīīndīa̍a̍ ve̍, ī chō su̍ŋ su̍ŋ fu̍u̍lūū. Ō bēndu̍ lɛ̍ a̍ ti᷅ŋ te̍, mī wānā o̍ wānā che᷅ mɛ̄ɛ̍ ya̍ I̍ pi̍ŋī ni̍ŋ ŋ̍wāŋndā chīe̍e̍ yɛ̍.

²Wānāa̍ ke᷅ ha̍ā pāa̍le̍ nīle̍ pɛ̍ŋgīāāle̍ŋ bɛ̄ɛ̄le̍ŋ, ā tɛ̍ɛ̍mbūū sāwa̍ ndɔ̄ɔ̍ le̍ wa̍, a̍ chɛ᷅l ha̍ā mā wōu̍ lābā o̍ yɔ̄ŋ wɔ̄ɔ̍ŋndo̍ tōsāa̍ ni᷄ŋ te̍ wa̍, wānāā kāŋ ā pɛ̄l tɔ̄nɔ̄ɔ̍.”

³Wānāā lēkāa̍wa̍a̍ cho̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ tɛ̄ɛ̄ŋ, ma̍ wā ndu̍ sōōlūūwo̍ wa̍, ā di̍mī lɛ̄ āā, “Mbɔ̄ Mɛ̄lɛ̄ka̍ Ya̍a̍wɛ̄ɛ̄ o̍ chɛ᷅l ni̍ŋ na̍a̍ mī ŋ̄ wa̍ wānāā ndɔ̄ le̍” le̍. Ndu̍yɛ̍, wāŋ pīāāndūāā nda̍ pīāl bo̍o̍sīla̍ŋ nda̍ bɛ̍ɛ̍, ā yi̍ya̍ŋ ndɛ̍ māā, le̍ mɛ̄ɛ̍ nda̍ vīlu̍ ŋ̍chu̍a̍ū le̍ yɛ̍, māā Mɛ̄lɛ̄ka̍ ō chɛ᷅l nda̍ mā wa̍ wānāā ndɔ̄ le̍ le̍.

⁴Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ wānāā nda̍ pīāl bo̍o̍sīla̍ŋ nda̍ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, “Tē wāŋnda̍ ha̍ā ā ke̍ pāa̍le̍ nīle̍ pɛ̍ŋgīāāle̍ŋ bɛ̄ɛ̄le̍ŋ pɛ̍, ndu̍yɛ̍ mā tōsa̍ nyɛ̍ hi̍nī ya̍ Mɛ̍lɛ̄ka̍ kɔ̄llo̍ wo̍, o̍ ko̍ŋ kɔ̍ɔ̍lī, kpe̍ma̍ ya̍ I̍ yi̍i̍ a̍ wānāā nīa̍a̍ wo̍, mā wa̍ o̍ kpe̍ma̍ ko̍ŋ bɛ̄ŋgu̍ pɛ̍,

⁵I̍ cho̍ nyɛ̄ sīmī o̍ chīɛ̄ī nūu̍ ni᷄ŋ wa̍nāā nīa̍a̍ tɛ̄ɛ̄ŋ le̍ wāa̍ nyɛ̄ lōōna᷄ŋ a̍ nda̍ o̍kɔ̄ɔ̄ le̍ fɛ̍ɛ̍ŋ a̍ fɛ̍ɛ̍ŋ. I̍ cho̍ nda̍ dīōla̍ŋ kē, lā wāŋnda̍ ā wā ni̍ŋ lo̍o̍nɔ᷄ŋndo̍ a̍ nda̍ o̍kɔ̄ɔ̄ le̍ fɛ̍ɛ̍ŋ a̍ fɛ̍ɛ̍ŋ nda̍ŋ, mbō hīōū bɛ̍ɛ̍ māā tē nda̍ a̍a̍ ve̍lū chūāūwa̍ pɛ̍. I̍ cho̍ to̍sā le̍ fɛ̍ɛ̍ŋ a̍ fɛ̍ɛ̍ŋ, dīōlā ndāla̍ŋ lā nyu᷅m o̍ chi̍e̍ēŋndo̍ chōo̍ le̍.”

⁶Wānāa̍ lēkāa̍wa̍, a̍ si̍mnu᷄ŋ ni᷅ŋ ha̍ā wānāā ni̍, ndu̍yɛ̍ ma̍ kāālā ya̍, o̍ ko̍ŋ kɔ̍ɔ̍lī, mā sāāŋgīāl la̍, mā kē pa̍a̍le̍ nīle̍ pɛ̍ŋgīāāle̍ŋ bɛ̄ɛ̄le̍ŋ, ndu̍yɛ̍, kpe̍ma̍ ya̍ I̍ yi̍i̍ a̍ wānāā nīa̍a̍ wo̍, ma̍ wā sa̍kpō o̍ kpe̍ma̍ ko̍ŋ kɛ̄sīo̍o̍ ni᷄ŋ nda̍, nyɛ̄ ya̍ I̍ di̍mi̍ a̍ nda̍ o̍kɔ̄ɔ̄ wo̍ cho̍ ho̍ō ni̍.

⁷Wāŋnda̍ ha̍ā, I̍ hu᷅ŋ ni̍ŋ a̍ nda̍ o̍ pēmbīī nīī di̍a̍ndɛ̄i̍ chōo̍, ndu̍yɛ̍ mī to̍sa̍ mā dɔ̄ɔ̄nu᷄ŋ nya̍a̍le̍ o̍ chīɛ̄ī nī pi̍ɛ̍i̍yāa̍ ni᷄ŋ. Sa̍lā o̍ sālā lūāmāā wāŋnda̍ ha̍ā ā hu᷄ŋ so̍lī o̍ ma̍āŋ nūu̍ chōo̍ pɛ̍, o̍ ko̍ŋ kɔ̍ɔ̍lī, a̍ sa̍lālā chēle̍ŋ nda̍ŋ, bīyɔ̄ɔ̍ ya̍ Mɛ̍lɛ̄ka̍ bīī sa̍lālā ndāla̍ŋ ni̍. Wāŋnda̍ ā vēēlū ni̍ŋ chi̍ɛ̍ī nūu̍ āā, “Chīɛ̄ī pīɛ̄īyāa̍ Mɛ̄lɛ̄ka̍a̍ le̍ lēkāa̍ o̍ lēkāa̍.”

⁸Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, o̍ mi̍ŋgi̍ I̍sɔ̄lūɛ̍i̍ya̍a̍ nda̍ kūɛ̄ o̍ bīyɔ̄ɔ̄ ni᷄ŋ nda̍ o̍ lɛ̄ŋndē ndāle̍ŋ ni᷄ŋ ndo̍, ō dīmi̍ āā, “Ō fūla̍ o̍ wānāā nīa̍a̍ ya̍ I̍ mi̍ŋgi̍ o̍ lɛ̄ŋndē ndāle̍ŋ ni᷄ŋ nda̍ kɔ̄ɔ̄lī, I̍ cho̍ vɛ̄lɛ̄ wānāā chēle̍ŋ chūūŋgīāā, mī ku̍ɛ̄ a̍ nda̍ mā kɔ̍ wa᷅ nda̍ wānāā nīa̍a̍ lātūlu̍.”

⁹Nya̍ vīsīa̍a̍ cho̍ yōndōla̍ŋ ni᷄ŋ a̍ o̍ būndɛ̍la̍ŋ ni᷄ŋ nda̍ kpo̍u̍, lā hu᷄ŋ. Lā chūūŋgi̍āŋ kpo̍u̍, mī lā hu᷄ŋ di̍ō nyɛ̄ dīa̍a̍.

¹⁰I̍sɔ̄lūɛ̍i̍ya̍, wānāā ndāā bɛ̍ndūa̍a̍ nɔ̍ mā wa̍ nda̍ hɔ̄lte̍ŋ chōo̍ wa̍ kpo̍u̍, ā sūma̍. Nda̍ kpo̍u̍ ā nɔ̍ lɛ̍ kɔ̄l kālu̍ o̍ kɔ̄l kālu̍ le̍. Nda̍ kpo̍u̍ ā yɔ̄nu̍ŋ mɛ̄ɛ̍ wāŋndo̍ ō nɔ̄ nu̍a̍ā tūŋnda̍ o̍ bā le̍ mɛ̄ŋgɛ̄lāa̍, kɛ̍ tūŋāā kāŋ ā bu̍sū le̍ yɛ̍. Le̍ te̍le̍ŋ o̍ te̍le̍ŋ ā chōnu᷄ŋ o̍ lūa̍a̍ŋ, mā sɔ̄l lɔ̍mā ndā, kāni̍ lūa̍a̍ŋ nda̍ kāāla̍ ta̍u̍ ni̍.

¹¹Ndu̍yɛ̍ mɛ̄ɛ̍ tūŋāā fo̍fo̍la̍a̍ bɛ̍ndūa̍a̍ ā wā nu̍a̍ā, mɛ̄ɛ̍ o̍ mɛ̄ɛ̍ nda̍ dīo̍ nyɛ̍ dīa̍a̍ ā pi᷅m te̍ yɛ̍, le̍nde̍ nda̍ chō ni̍. Ā chō māchūāā mɛ̄ɛ̍ wānāā māndāā lāsāa̍ a̍ si̍nā ha̍ā nyɛ̄ o̍ nyɛ̄ a̍ wa̍li̍ ma̍ndāā lāsāā o̍kɔ̄ɔ̄ le̍ wa̍ ā chō yɛ̍. Nda̍ kpo̍u̍, bā wānā o̍ wānā o̍ ye̍e̍ma̍ le̍ kɔ᷄ŋnda̍ŋ ndo̍ ko̍ni̍ o̍ ku̍a̍ŋnūŋ ni̍. Le̍ dɛ̍nɛ̍ nda̍ kɛ̍ndɔ̄ɔ̍ ko̍ni̍ nda̍ lāndu̍ŋ kɔ̍l ni̍.

¹²Ā bīī pɛ̍ ā dīmu̍la᷅ŋ āā, “Lā hu᷄ŋ ŋ̄ kōlnu᷅ŋ mūɛ̄īmā nāā ma̍ mākīle̍pīi̍. Ŋ̄ kōlnu᷅ŋ mā nɛ̄īyāā mā kɛ̄ndɛ̄ kɛ̍ndīa̍ŋ. Sīɔ̄dīi̍ bɛ̍ɛ̍, nu̍a̍ā ko̍ni̍ nyɛ̄ o̍ nyɛ̄ ō wā ni̍ŋ ni̍, kɛ̄lɛ̄ŋgāā sīɔ̄dīi̍ bɛ̍ɛ̍ nyɔ̄ɔ̍ hīāū ni̍ŋ na̍ŋɔ̄ɔ̄ a̍ hāū.”