Read Southern Kisi Āīsa̍yā 57 Bible Online

Āīsa̍yā 57 - Southern Kisi bible

Āīsa̍yā 57

¹Wānāā kɛ̄ndīa̍a̍ mā vīŋnu᷄ŋ, kɛ̍ wānā o̍ wānā yi̍yāŋ bɛ̍ɛ̍ a̍ ndi̍ o̍kɔ̄ɔ̄ le̍. Wānāa̍ yɔ̍ŋgūŋ nu̍a̍ā o̍ Mɛ̄lɛ̄ka̍ lo̍ a̍ kɔ̄ltā ndāla̍ŋ kpo̍u̍ wa̍, mā vīŋnu᷄ŋ, ndu̍yɛ̍ wānā o̍ wānā si̍nā nyɛ᷅ yɔ̍nūŋ ko̍ŋ ndo̍ pɛ̄ŋgu̍ le̍. Kɛ̍ le̍ sa̍bū wānāā kɛ̄ndīa̍a̍ ā wu̍ le̍nde̍ wo̍ cho̍ ni̍, māā le̍ yɔ̄ŋi̍ dɛ̍nɛ̍ pa̍lāa̍ o̍ wa᷅ hu̍nɔ̄ɔ̍ le̍ nda̍ wo̍ ō kōma̍l nda̍.

²Wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, tē ā vī pɛ̍, ā kūɛ̄ o̍ kɔ̄l nyūlōo̍ ni᷄ŋ, ā lūɛ̄ī o̍ pɛ̄ŋgīo̍o̍ ni᷄ŋ.

³Kɛ̍ nya̍ ki̍nɛ̍i̍, nya̍ chūāūwāā wānāā vīāmāā lāyāwāa̍ ha̍ā, nya̍ fu̍la̍ ha̍ā o̍ pūlāle̍ wānāā sūūndɛ̍i̍ya̍ chōo̍ wa̍, a̍ ke̍ī ti̍ɔ̍mɔ̄ɔ̍ le̍ nyɛ̄ sɔ̄lāa̍ wa̍, lā hu̍ŋ mī ki̍lu̍l nya̍ yāmɛ̍i̍.

⁴Ō nɛ̄ɛ̍nɛ̍ nya̍ chō yɛ̄ māmɔ̄ɔ̍? Ō nɛ̄ɛ̍nɛ̍ nya̍ chō yɛ̄ sōndōo̍ kānyāllo̍, ndu̍yɛ̍ mī lā sōlūl ndu̍ dīɔ̄ɔ̄mūle̍ŋ? Nya̍ kpo̍u̍ wānāa̍ si̍mu̍l ya̍ Mɛ̄lɛ̄ka̍ wa̍ nya̍ chō ni̍. O̍ pūlāle̍ wānāā lāchōōwāa̍ chōo̍ nya̍ fu̍la̍ ni̍.

⁵O̍ yɔ̄mīī pūīyɛ̄i̍ bɛ̄ŋgu̍, nāa̍ nya̍ sōōlūū mɛ̄lɛ̄ka̍a̍ nyāa̍ wa̍, lo̍ŋ nya̍ kūā su̍u̍ndīāāla̍ŋ o̍ mɛ̄lɛ̄ka̍ā nyāa̍ sōōlūūwo̍ ni᷄ŋ ni̍. Chūāūwāā nyāa̍ nya̍ vēlū wa̍, o̍ kpōlōŋ kpo̍lo̍ŋnda̍ŋ ni᷄ŋ, ndu̍yɛ̍ a̍ o̍ pōūtā fe̍ke̍fe̍ke̍la̍ŋ bɛ̄ŋgu̍, lo̍ŋ nya̍ kūā nda̍ sa̍lāla̍ŋ sōlīo̍o̍ ni̍.

⁶Pōūtā kpɔ̄lɔ̄kɛ̍i̍la̍ nya̍ chɔ̄ɔ̄vi̍a̍a̍ o̍ kpōlōŋ kpo̍lo̍ŋnda̍ŋ ni᷄ŋ nda̍ŋ, la̍ŋ nya̍ sīīŋgūū mɛ̄lɛ̄ka̍ā nyā ni̍. La̍ŋ nya̍ sōōlūū ni̍, ndu̍yɛ̍ mī lā tālā mu̍ɛ̍īmā mākīle̍pīi̍ya̍ŋ o̍ la̍ŋ māā lāsa̍lā, o̍ ko̍ŋ kɔ̍ɔ̍lī, mī lā yāā tɔ̍lɔ̄ɔ̄lā nyāla̍ŋ ndo̍ŋ māā lākē. Lā nɔ̄ o̍ kɔ̄l, ya̍ Mɛ̄lɛ̄ka̍ I̍ hi̍ni̍ kɔ̄l a̍ ŋ̄ nya̍ chō mu᷅ŋ tōsāa̍ kpo̍u̍ wo̍ŋ?

⁷O̍ pēmbūŋ vīlɛ̄ŋ bɛ̄ndo᷄ŋ chōo̍, nāa̍ nya̍ kūā sa̍lāla̍ŋ sōlīo̍o̍ wa̍, mi̍ lā lō o̍ ko̍ŋ, mi̍ lā tīū kpēlēla̍ŋ ndo̍ŋ kpo̍u̍, le̍ kēīyo̍ sūūndīāāla̍ŋ ndo̍ŋ.

⁸O̍ chīɛ̄īlā nyāla̍ lɔ̍lāāla̍ŋ ni᷄ŋ bɛ̍ɛ̍ kpo̍u̍, lā nɔ̄ nyɛ̄m nya̍ sōōlūū māā mɛ̄lɛ̄ka̍ā nyā wo̍ŋ o̍ dīōla̍ŋ kɔ̄ɔ̄lī, ndu̍yɛ̍ a̍ o̍ kēe̍do᷄ŋ chōo̍, yɔ̄ŋi̍ nya̍ sōōlu̍u̍ ya̍. Mi̍ lā lō o̍ ko̍ŋ mi̍ lā kɛ̄ɛ̄ ya̍, mi̍ lā sōōlu᷄ŋ nyɛ᷅la̍ŋ lēkɔ̄ɔ̍, mī lā kūā hi̍ni̍la̍ŋ nya̍ sa̍ma̍a̍ nyāa̍ o̍ kpēlēla̍ nyāla̍ bɛ̍ndūla̍ŋ chōo̍, sa̍ma̍a̍ nyāa̍ nya̍ pāāwā le̍ lūa̍a̍ŋ a̍ nda̍ wa̍. Lo̍ŋ nya̍ kūā ye̍e̍ma̍ŋ nyāa̍ŋ sōlī ni̍.

⁹Tē lā wa̍ kɔ̄la̍ŋ mɛ̄lɛ̄ka̍ nyāa̍ Mo̍lɛ̍ki̍ sōōlūūwo̍ pɛ̍, la̍ kūɛ̄ a̍ chūɛ̄īmā ɔ̄li̍fīi̍ya̍ŋ, ndu̍yɛ̍ a̍ chūɛ̄īmā chūŋ kɛ̄ndɛ̄ kɛ̍ndīa̍ŋ le̍ ndu̍ kīo̍o̍, māā lākē. Mi̍ lā vīām ki̍i̍la̍a̍ nyāa̍ o̍ lɛ̄ŋīī lēvīlle̍ ni᷄ŋ pɔ̍, le̍ nya̍ kɔ̄la̍ŋ mɛ̄lɛ̄ka̍a̍ sɛ̄nɛ̄īya̍ nūūvīāllo̍. Chi̍e̍e̍ pīɔ̍m bɛ̍ɛ̍ mi̍ lā vīām ki̍i̍la̍a̍ lo̍ŋ di̍, le̍ nda̍ nūūvīa̍a̍.

¹⁰Mi̍ lā yɔ̄kpā yɔ̄kpāa̍ pīla̍ o̍ sɔ̄ɔ̍ŋ nya̍ wa̍ mu᷅ŋ tōsāa̍ wo̍ŋ ni᷄ŋ. Kɛ̍ a̍ yɔ̄kpā kōŋ kpo̍u̍, lā chɛ᷄l mī lā fāŋa̍ŋ sɔ̍ɔ̍ŋ mu̍ŋ kɔ̄ɔ̄lī le̍. Mi̍ lā chɔ̄ɔ̄lū bɛ̍ɛ̍ yo̍o̍mūmā sɛ̄nɛ̄īya̍ŋ sɔ̄lā le̍ hīōūwɔ̄ɔ̍ lāchī a̍ mu̍ŋ tōsāa̍. Lā chɛ᷄l mī lā ma᷄l mu̍ŋ tōsāa̍ le̍.

¹¹Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Le̍ nɛ̄ɛ̍nɛ̍ nya̍ yɔ᷄ŋ yɛ̄ sīōōŋnde̍, mi̍ lā dīmūl la̍ chōōla̍ŋ? Mi̍ lā pūɛ̄ɛ̄nu᷄ŋ a̍ ya̍ pɔ̍lī, kɔ̄l bɛ̍ɛ̍ o̍ de᷅l nya̍ o̍ ya̍lo̍, mī lā yīya̍ŋ a̍ ya̍ o̍kɔ̄ɔ̄ le̍. Bāā le̍ mɛ̄ɛ̍ ya̍ I̍ me̍e̍nu̍ŋ nya̍ le̍ te̍le̍ŋ vi̍lɛ̄ī, I̍ su̍ū nyɛ᷅ o̍ nyɛ̄ le̍ yɛ̍, nyɛ̄ kōŋ nya̍ nɔ̄ lɛ̍ īsīōōŋ le̍ ya̍ le̍ ni̍?

¹²Sɔ̄ɔ̍ŋ nyāa̍ŋ kɛ̍ndɛ̄ŋ nya̍ chō mu᷅ŋ chōo̍ wo̍ŋ, ndu̍yɛ̍ a̍ nyɛ̄ o̍ nyɛ̄ nya̍ chō tōsāa̍, I̍ cho̍ hūnɔ̄ɔ̄ nyɛ̄ o̍ nyɛ̄ chɔ̄ɔ̄mūū kpe̍nde̍ke̍le̍ mī wānā o̍ wānā che᷅. Ndu̍yɛ̍, mālā o̍ māla̍ lā nɔ̍lā mī lā sɔ̄la̍ o̍ sɔ̄ɔ̍ŋ mu᷅ŋ ni᷄ŋ te̍.

¹³Tē dɛ̍nɛ̍ pa̍lāa̍ ō kōma̍l nya̍ pɛ̍, lā cha᷄ŋ ndɔ̍ o̍ mɛ̄lɛ̄ka̍ā nyāa̍ nya̍ chūūŋgi̍a̍a̍ ka̍ŋ nda̍ lo̍, le̍ mā chīīndi̍a̍a̍ nya̍, tē ā nɔ̄lā mā chīīndi̍a̍a̍ nya̍ pɛ̍. Mɛ̄lɛ̄ka̍a̍ nyāā ka̍ŋ, nyɛ̄ fo̍ndō fu̍u̍ nda̍ chō ni̍, hūēīyīī tāa̍ni̍i̍ bɛ̍ɛ̄ i̍ hɔ̍ŋ pɛ̍, ī nɔ̄lā mī ī hīōū a̍ nda̍. Kɛ̍ wānāa̍ dɔ̍ū tīīnda᷄ŋ ndāa̍ o̍ ya̍ Mɛ̄lɛ̄ka̍ ni᷄ŋ nda̍ ki̍nɛ̍i̍, nda̍ cho̍ lɛ̄ŋnde̍ŋ nde᷅ŋ nɔ̍ ni̍. Nda̍ nɔ᷅ ni̍ŋ pe̍mbīī nīī kāsīe̍i̍ ni̍.”

¹⁴Mɛ̄lɛ̄ka̍ dīmūl ni̍ŋ wa᷅ŋnda̍ āā, “Lā tōōsi̍a̍a̍ nɛ̍īyo̍, lā tōōsi̍a̍a̍ ndu̍, ndu̍yɛ̍ mī lā bɛ̄ɛ̄ndi̍a̍a̍ ndu̍ nyɛ̄ kɛ̄ndɛ̄ kɛ̍ndɛ̄, le̍ wānāā nīa̍a̍ mā mīīŋgu̍. Lā fa̍a̍ŋi̍a̍a̍ nyɛ᷅ o̍ nyɛ̍ cho̍ kpɔ̍kɔ̍si̍ nda̍ lāchī.”

¹⁵Mɛ̄lɛ̄ka̍ nāa̍ kāsīo̍o̍, o̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ mbo̍ wā chōo̍ cho̍o̍ pɔ̍ wo̍, nyɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “I̍ cho̍ o̍ fo̍ndā ni̍ cho̍ chōo̍ cho̍o̍ pɔ̍, ndu̍yɛ̍ mbo̍ wā fo̍ndāŋ kāsīo̍o̍ wo̍, kɛ̍ wānāa̍ nɔ̍ ha̍ā nyīɛ̍ɛ̍ye̍ le̍ nyɛ̄ nda̍ tōsa̍ wo̍, ndu̍yɛ̍ ma̍ wā wānāā tūsīa̍ŋ to̍o̍lō wa̍, I̍ cho̍ a̍ nda̍ lātūlu̍. Wānāa̍ tu̍si̍ nda̍ pi̍la̍ tōōlō wa̍, yōōmūa̍ŋ ya̍ I̍ lu̍e̍ī nda̍ ni̍, ndu̍yɛ̍ wānāa̍ cho̍ a̍ nyīɛ̍ɛ̍ye̍ le̍ nyɛ̄ nda̍ tōsa̍ wo̍ wa̍, mī nyɔ̍ɔ̍lu̍ nda̍ kɔ̄lta̍ŋ.

¹⁶I̍ lo᷅ ni̍ŋ sɔ̍ɔ̍ŋ wɔ̄ɔ̍ŋ wāŋnda̍ ha̍ā ā tōsā wo̍ŋ chɔ̄mndo̍ nda̍ chōo̍ le̍ fɛ̍ɛ̍ŋ a̍ fɛ̍ɛ̍ŋ te̍, kɛ̄lɛ̄ŋgāāle̍, mī wa̍ tu̍mbo̍o̍ dɔ̄ɔ̄nɔ᷄ŋndo̍ a̍ nda̍ le̍ te̍le̍ŋ o̍ te̍le̍ŋ, kāni̍ fo̍ndōle̍, ya̍ to̍o̍si̍a̍a̍ wāna̍ chi̍o̍o̍ ni̍, mi̍ du̍a̍ū ndu̍ yōōmōo̍ o̍ mīli̍ŋ.

¹⁷Le̍ hɔ̄ltē ndāle̍ dɛ̍nɛ̍ wɔ̍ɔ̍ŋndē bɛ̍ndūle̍ŋ, ya̍ Mɛ̄lɛ̄ka̍ ya̍ i̍i̍ dɔ̍ɔ̍nu᷄ŋ tu̍mbe̍ a̍ nda̍ ni̍. Nyɛ̄ ko̍ŋ to̍sa̍ ni̍ mi̍ tu̍si̍ nda̍ nyɛ̄ pālāa̍ chōo̍, ndu̍yɛ̍ mi̍ vi᷅ŋ nda̍ hɔ̄lāā nīa̍a̍. Kɛ̍ a̍ ko̍ŋ kpo̍u̍, ā māŋga̍la̍ŋ te̍, ma̍ hīāū lāchī a̍ sɔ̄ɔ̍ŋ wɔ̍ɔ̍ŋndo̍ŋ tōsāa̍.

¹⁸“Nyɛ̄ o̍ nyɛ̄ nda̍ tōsa̍ kpo̍u̍ I̍ che᷅, kɛ̍ I̍ cho̍ nda̍ sīŋgī. I̍ cho̍ nda̍ wā nɛ̄īyo̍ chɔ̄mndo̍, nɛ̄i̍ nda̍ wā cho̍o̍ wo̍, ndu̍yɛ̍ mī nyɔ̍ɔ̍lu̍ nda̍ kɔ̄lta̍ŋ, nda̍ ni̍, a̍ wānāa̍ cho̍ cha᷄ŋnda̍ŋ le̍ nda̍ wa̍.

¹⁹Kɔ̄l nyūlōo̍ hīŋ, kɔ̄l nyūlōo̍ hīŋ le̍ wāŋnda̍ kpo̍u̍, a̍ cho̍ māchɛ̄lū wa̍ ni̍, a̍ a̍ cho̍ la̍nda̍ŋ la̍nda̍ŋ nda̍, ndu̍yɛ̍ I̍ cho̍ nda̍ sīŋgī. Nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ko̍ŋ ni̍.

²⁰Kɛ̍ wānāā dɛ̍nɛ̍ wɔ̍ɔ̍ŋnda̍ nda̍ nda̍, ā chō māchūāā mɛ̄ɛ̍ pēe̍ mɛ̄ŋmā īhɛ᷄llo̍ wā nu̍a̍ā, hīīlɔ᷄ŋndo̍ īyōkpa᷄ŋ yo̍kpa᷄ŋnde̍ ō si᷅m yi̍li̍ le̍ yɛ̍, ō mɛ̄ŋmā ndūa̍a̍ŋ mā wā ho̍ō kāālīa̍ŋndo̍ a̍ bīllo̍, ndu̍yɛ̍ a̍ lōōlīo̍o̍ lātūlu̍ wo̍.

²¹Wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍, ā sɔ̍lā kɔ᷅l nyūlū o̍ kɔ̄l nyūlū le̍.” Nyɛ̄ Mɛ̄lɛ̄ka̍ dīmi̍ wo̍ cho̍ ko̍ŋ ni̍.